Api-Slide-53-1
Api-Slide-53-2
previous arrow
next arrow

– ගෙදර ආදරේ –

▪️උදේට තේ හදන අම්මා 

මොන මලකරදරයක්ද මේක.. කොච්චර කළත් හොඳක් නෑ..

▫️උදේට තේ හදපු අම්මා 

පුතේ මේ තේ එක තාත්තට ගිහින් දීපන්..අනිත් අයත් එන්න තේ බොන්න..හා හා නැගිටපල්ලා කුම්බ්කර්ණයෝ ටික..

▪️උදේට උයන අම්මා

 උයනවා උයනවා තුන්සිය හැටපස් දවසෙම උයනවා. පොල් ටිකක් ගාලා දෙන්න එකෙක් නෑ..

▫️උදේට උයපු අම්මා

පොඩි පුතා..මාළු බැදලා වෙනම දැම්මා. බලාගෙන කන්න කටු හිර කරගන්නේ නැතුව.. ඒයි ඔයාගේ කෑම දෙකම බෑග් එකට දැම්මා. කෙසෙල් ගෙඩි වෙනම පෙට්ටියක දැම්මා.

▪️උදේට ගෙදරින් එළියට යද්දි අම්මා

▫️අද නම් ලොකූ උඹ රෑ වුණොත් අඬු කඩනවා. වරෙන්කෝ බලන්න රෑ වෙලා..

▪️රෑට අම්මා

හලෝ…හලෝ…ලොකූ දැන් දොලහත් පහුවෙලා. තාත්තට තරහ ගිහින් ඉන්නේ. මම කුස්සිය පැත්තේ දොර ඇරලා තියෙන්නෙ එහෙන් වරෙං.

▪️මේ සෙනසුරාදා අම්මා 

උඹලා රට වටේ රෝන්දෙ ගහපල්ලා. චිත්‍රපටියක් බලපු කාලයක් මතක නෑ.. මං මේ ගෙදරටම හිරවෙලා.

▫️ඊලඟ සෙනසුරාදාට අම්මා

අනේ මේ මට බෑ ඔය හෝල් ගානේ යන්න. මම ගියොත් මේ වැඩ කරන්නේ කවුද? තොපිලගෙ රෙදි හෝදන්නේ මොකාද? යන දේවාලෙක උඹලා පලයල්ලා.

▪️අපට අනතුරක් වුණ විගස අම්මා 

හරියට හරි..මම කිව්වා ඔය ටික වෙයි කියලා. උඹ ඇහුවද? හොඳ වැඩේ උඹට. ඔහොම වෙලා මදි තොට.

▫️ඊට විනාඩි දෙකකට පසු අම්මා 

කෝ බලන්න මෙහෙට එනවා. අම්මෝ ගොඩක් ලේ එනවනේ පුතේ. අයියෝ මම මේ අත පය කොච්චර පරිස්සමෙන්ද හැදුවේ පුතේ.. නාඩා ඉඳින් මම බෙහෙත් ඩිංඟක් අරන් එනකම්. 

▪️පෝය දවසට පෙරදා අම්මා

හෙට උදෙන්ම මම සිල් ගන්න යනවා. හෙට ඉතින් කෑම කඩෙන් තමයි. මගේ අගේ තෙරේවි උඹලට..

▫️පෝය දවසේ අම්මා 

කොහේ යන්නද සිල් ගන්න? උඹලයි උඹලගේ අප්පොච්චි බඩගින්නේ තියලා මට ඇහැකිද බොලව් සිල් ගන්න ? කියන බණ පදයක්වත් ඔළුවට යයිද? මං අන්න අර ඉඳි ආප්පයි, කොච්චි දාලා පොල් සම්බෝලයි, කිරි හොද්දකුයි හැදුවා. කන්න ඔක්කොම එක්ක. හැබැයි මස් මාංශ නෑ අද.

▪️රෑට උයන අම්මා 

තවම උයලා නෑ. මහත්තුරු ටික ඇඟ හෝදලා ලෑස්ති වෙලා එන්නකෝ. ආවා මෙතන හට්ටියට එබෙන්න..රෑට කන්න ඕන පොඩ්ඩයි. හිඟන්නෙක් වගේ හිඟන්නෙක් වගේ කන්න කියලා තියෙන්නේ.

▫️රෑට උයපු අම්මා 

හිටපන් තාත්තට බෙදනකම් මුලින්ම..ඔය පොඩ්ඩ කාලා ඇතිද මයෙ පුතේ? බෙදා ගනින් තව. හොඳට කාපන්. උදේට දවල්ට හරියට කන්නෙත් නෑ. ආ මෙන්න මේ බත් හැන්ඳත් දා ගනින්.

උඹලා නිදා ගනිල්ලා..හා..හා.. තුණුරුවන් සරණයි මගේ පැටව්නේ හෙට උදේම වැඩටත් යන්න තියෙනවනේ..මම දොරවල් වහලා නිදාගන්නම්.

චරියාගේ පන්හිඳ 

Charith Wijemanna

Sign up for our newsletter