Api-Slide-50-1
Api-Slide-50-2
Api-Slide-50-3
previous arrow
next arrow

වෙස් මුහුණු

ඔපීසියෙ කැන්ටිමේ – උඹේ බත් පත ලිහා

වරෙන් කාපන් කියා – ලෙන්ගතුව අමතලා

ගෙනත් තිබු බිත්තරෙන්-බාගයක් මට බෙදා

දුන්නු හැටි මතක් විය-ගිය බ්‍රහස්පතින්දා 

විමසනා විටදි මා- මචං කොහොමද කෙල්ල

ඔහේ ඉන්නවා බං- කීවෙ ගණනක් නැතුව

හැබැයි ඒ වෙලාවෙත් – ෆෝන් එක මේසෙ උඩ

දිටිමි මම මගහැරුණු- ඇමතුම් තිහක් විතර 

සති අන්තෙ සති මැද්දෙ-  ඕනෑම දවසකදි

නොකර අදි මදි කිසිත්-මදුවිතට එක්වෙද්දි

කලාවද, දර්ශනය- සිංදු කවි මික්ස් වෙද්දි

දිටිමි වැඩිපුර කෝල්- තිබුණ හැටි මිස් වෙච්චි

ඌ තරම් හොඳ එකෙක්- මේකෙ වෙන නෑ ඉතිං

කොල්ලා හිත හොඳ එකා- පණ වුණත් දෙයි මචං

උඹේ ගැන ඇහුවොතින්- උඹේ ගැන කිවුවොතින්

හොඳක් මයි කියැවුණේ  – කාගෙ කාගෙත් කටින්

රිලේශන්ශිප් දමා – තිබුණ උඹෙ නම එක්ක

ගෑනු ලමයෙක් එවපු – ටිකක් දිග ටෙක්ස්ට් එක

කියවද්දි ගිය මාසෙ – මගෙ හිතට දැනී දුක

චැට් කලා, විස්තරේ- දැන ගන්න ටිකෙන් ටික

උඹේ ගැනමයි මචං – ඒකි හැමදා ඇහුවෙ

උඹ රණ්ඩු වුණ විටදි – තමයි මට දුක කිව්වෙ

හැමදාම උඹ මත්තෙ – මැරෙන්නටමයි හැදුවෙ

කවදාද අන්තිමට – උඹ ඒකි ගැන බැලුවෙ

මුලදි පහු වුණත් පහු- වෙද්දි රිප්ලයි ක්ෂණික 

ඇගෙ ශෝක මූඩ් එක- ෆික්ස් කලා මම හනික

ගැලපෙනවා වගෙයි – මගෙ සහ ඇගේ වයිබ් එක

සොරි මචං ඊයෙ මම – කිව්ව ඒකිට “මැණික”

උඹ දන්නෙ නෑ උඹයි – ඇගෙ ලොවේ අංක එක

ඒකමයි රස කරන් – වින්දෙ උඹ දුන්න දුක

උඹ සුපිරි යාලුවෙක් – ඒක ගැන නෑනෙ සැක

හැබැයි උඹ දන්නෙ නෑ – ජීවිතේ ආට් එක

හැමෝටම කතාවක් – තියනවා ඇත්තමයි

තම තමන් ගැන දන්නෙ – තම තමන් විතරමයි

ඒ වුණත් සිතිය යුතු – වැදගත්ම දේ තමයි

අපෙ කතාවල ඉන්නෙ – අපිම විතරක් නෙවෙයි

තාරක ජයතිලක

Sign up for our newsletter