කුඩාකල සිටම කලා ක්ශේත්‍රයට අවතීර්ණය වී කාලයත් සමග ක්ශේත්‍රයේ ප්‍රවීනයන් බොහෝ
පිරිසකගේ ඇසුර ලබමින් සහ විවිධ වර්ගීකරණයන් යටතට ගොනු වු නිර්මාණ සදහා රංගන
දායකත්වය ලබාදීම තුලින් ලබාගත් අභ්‍යාස, අත්දැකීම් සමුදායෙන් පොහොසත්ව නිතර වේදිකාව,
රූපවාහිනි හෝ ච්ත්‍රපට වැනි මාධ්‍යයන් තුලින් පෙනි නොසිට ඉතා කල්පනාකාරීව තොරා ගත්
නිර්මාණ සදහා පමණක්ම දායකත්වය ලබා දෙන නමුදු ප්‍රේක්ෂක සිත්තුල සදා නොමැකෙන මතක
එකතු කල චරිතාංග රංගනවේදියානන් කෝකිල පවන් ජයසූරිය සමග යෙදුනු පිළිසදර…

1. කෝකිල, මොකද මේ දවල්වල කලා කටයුතු තුලින් ඔබව පේන්න නැත්තේ? 

පේන්න නැති උනාට, ඉදිරි කලා කටයුතු සඳහා සූදානම් වීමකයි මම ඉන්නේ. පේන්න ඉන්නවා වගේම
ඉවසීමකින් නොපෙනී ඉන්නත් ඕනෙනේ. කෙටි කාලයකට මම එංගලන්තයේ ජීවත් වෙනවා. 2026
අවුරුද්දේ වෙනස්ම ආරෙකින් මං නැවත පේන්න ඉඳීවී.

2. කුඩා කාලයේ පටන් දශක ගණනාවක් නිරත වුන නිර්මාණ කටයුතු සහ ඔබ වටා රොද බැදි
ප්‍රේක්ෂක පිරිසගෙන් ඇත් වීම ඔබට දැනෙන්නේ කොහොමද? 

ඇත්තෙන්ම මේ නිහඬ බව ඈත් වීමක් නෙමෙයි. මං මීට කලිනුත් මෙවැනි නිහඬ කාලයක් ගත කරලා
තියෙනවා. ප්‍රේක්ෂකයාට එය මතකයි. නමුත් ඉන් අනතුරුව මගේ නිර්මාණ ඔවුන් වෙනදාටත් වඩා
හොඳින් වැළඳගත්තා. මට ඕනේ ප්‍රේක්ෂකයාට හොඳ වින්දනයක් ලබා දෙන්න. ඒකයි කලාවේ යෙදෙන
අපේ වගකීම. මම වෘත්තීමය වශයෙන් කලා කරුවෙක්. මේ නිහඬ බව තුළ තියෙන්නේ නැවත
ගොඩනැගීමක්.

3. එංගලන්තයේදි අහඹු ලෙස ඔබට මුණ ගැහුන ප්‍රේක්ෂකයකුගෙන් ලැබුන අමතක නොවන
ප්‍රතිචාරයක් මතක් කලොත්… 

එහෙම මතක ගොඩක් තියෙනවා. සංගීත ප්‍රසංගයකදි ඔහු සෑහෙන්න දුරක් ගෙවාගෙන මාව බලන්න
ඇවිත් තිබුනා. ලංකාවෙදි ඔහු මගෙන් ලබා ගත් සමරු සටහනක් මට පෙන්නුවා. ඔහු එය අදටත් ඉතාම
පරිස්සමෙන් රැක ගෙන. අද සෙල්ෆියකින් අවසන් වන සමරු සටහන් අතරේ ඒ මතකය මට මහමෙරක්
තටම් වටිනවා.

4. දශක ගණනාවක උගත් දේවල් සහ පලපුරුද්ද තුලින් ලැබු කලා කුසලතාවයන් එංගලන්තයේ
වෙසෙන ශ්‍රී ලාංකිකයන් වෙත තිළිණ කරන්න ඔබ ආරම්භ කල ආයතනය පිළිබදව කිවුවොත්… 

එහි නම භාව. භාව ඇකඩමිය හරහා වයස් සීමාවකින් තොරව කලාවට ආදරය කරන ඕනෑම අයෙකුට
තම දක්ශතාවයන් ප්‍රගුණ කිරීමේ අවස්ථාව වගේම, ප්‍රගුණ කල දක්ශතා වේදිකා ගත කිරීමටත්
අවස්ථාව දැන් එංගලන්තයේ ජීවත්වන අපේ ශ්‍රී ලාංකික ආදණීයයන්ට තිබෙනවා. අපේ පලමු
ප්‍රසංගය
2025 වසරේදි පැවැත්වුවා. මෙම දින වල 2026 භාව ප්‍රසංගය සඳහා සූදානම් වනවා. 

5. එතෙක් මෙතෙක් රංගනයෙන් දායක වුන චරිත අතරින් ඔබට වඩාත්ම අභියෝගාත්මක ලෙස හැඟුණු
චරිතය මොකක්ද?

මම කරපු හැම චරිතයක්ම අභියෝගාත්මකයි. ඒ අතරින් මාලන්, බාබු, ශක්ති වැනි චරිත විශේෂ යි. 

6. ශ්‍රී ලාංකික ප්‍රේක්ෂක සිත් තුල නොමැකෙන මතක එකතු කල නාඩගම්කාරයෝ ටෙලි සිත්තමෙහි
මලමාලන්ගේ චරිතය වෙනුවෙන් ඔබ ලැබු අමතක නොවන ඉහලම ප්‍රතිචාරය… 

සද්දාමංගල සූරියබණ්ඩාර මහත්මාටත්, ජයප්‍රකාශ් සිවගුරුනාදන් මහත්මාටත්, චාමර සමරවික්‍රම
මහත්මාටත් ඉතාම ස්තූතිවන්ත වනවා මට ඒ චරිතය ලබා දුන්නාට. ඉහලම ප්‍රතිචාරය කියලා මට
විශේෂ කරලා කියන්න බැරි තරමටම අදටත් ප්‍රතිචාර ලැබෙනවා. ගොඩක් අය කියපු දේ තමයි
ටෙලිවිෂනයෙන් ඈත් වෙලා ඉන්න යුගයක නැවත ටෙලිවිෂනය ලඟට ඔවුන්ව ගෙනාවේ නාඩගම්කාරයෝ
කියලා. 

7. ඔබට ලැබුණු සම්මාන අතරින් හිතට දැනුන, හිතට ලගම සම්මානය මොකක්ද?

චීනයේ පැවති ජාත්‍යන්තර සම්මාන උළෙලේදි සිරි රජ සිරි චිත්‍රපටය වෙනුවෙන් හොඳම නලුවා
සදහා ලැබුන සම්මානය. 

8. ඔබගේ වෘත්තීය ජිවිතයේ ඔබට ඔබ ගැන ආඩම්බරයක් හිතුන අවස්ථාවක තියෙනවාද?

මම සෑම විටම මගේ වෘත්තීය කලා ජීවිතය ගැන ආඩම්බරයෙන් ඉන්නේ. මොකද කලාව හැමෝටම
පිහිටන්නේ නෑනේ. 

9. අනාගතයේදී අවස්ථාවක් ලැබුනොත් සම්බන්ධ වෙන්න කැමති විශේෂ චරිතයක් හිතේ තියනවද?

ගොඩක් තියෙනවා. ඒ චරිත මම අනිවාර්යයෙන්ම කරනවා. 

10. කලා ක්ශේත්‍රයේ ඔබ අනුගමනය කරන විශේෂ චරිත කිහිපයක්… 

මම හොඳ හොරෙක්. චරිතාංග රංගන ශිල්පියෙක් වීම මගේ අරමුණ. ඒකෙදි මගෙ ඉස්සරහට
හම්බුවෙන ඕනෑම කෙනෙක්ගෙන් මං, මට වැදගත් දේවල් මතක තියාගන්නවා. 

11. ඔබ රංගනයට මෙන්ම අති දක්ෂ ගායන හැකියාවද ප්‍රේක්ෂකයන්ට තිළිණ කරන්න අදහසක්
තියනවාද? 

ඔව්, මම උත්සාහ ගන්නවා. 

12. කලා ක්ශේත්‍රයෙන් පිටත ඔබ කරන්න බලාපොරොත්තු වෙන වෙනත් දෙයක් තියෙනවද?

ව්‍යාපාර කටයුතු වල නිරත වෙන්න මම කැමතියි. 

13. ශරීර සෞඛ්‍යය සහ මානසික සෞඛ්‍යය වෙනුවෙන් එදිනෙදා අමතක නොකර කරන දේවල්
තුනක් 

සංගීතයට සවන් දීම, ව්‍යායාම කිරිම සහ ආහාර පිසීම. 

14. ඔබට සතුට දෙන පුංචි දේවල් කිහිපයක් කිවුවොත්… 

මම ඕනෑම දේකින් සතුටු වෙනවා. දුකක් තිබ්බත් මම ඒක පෙන්නන්නේ නෑ. ඒ මගෙ හැටි. 

15. තව අවුරුදු 10කින් ඔබ ඔබව දකින්න බලාපොරොත්තු වෙන විදිය… 

මනස නිරවුල් කෙනෙක් විදියට.

16. විලාසිතාවන් අනුගමනය කිරීමට ඔබ කැමතිද?
ඔව්

17. විවාහයෙන් පසු ඔබේ ජීවිතයේ ඇතිවූ විශාලම වෙනස මොකක්ද?

හැමෝටම විවාහයෙන් පස්සේ ඇතිවෙන වෙනවසම තමයි. 

18. ඇය අතින් හදන කෑමවලින් ඔබේ ප්‍රියතම කැම වර්ගය මොකද්ද?
බිත්තර රොටි

19. ඔබ සමාජ මාධ්‍යයන් භාවිතා කරන්නෙක්ද? එසේනම් වැඩිපුර භාවිතා කරන අවකාශය… 

මම සාමාන්‍යයෙන් සමාජ මාධ්‍ය ලොකුවට භාවිත කරන කෙනෙක් නෙමෙයි. ප්‍රවෘත්ති නම් බලන්නේ
යූටූබ් එකෙන්. 

20. ඔබේ නිහැඩියාව නිමාවන කාල වකවානුවක් පිළිබදව හෝඩුවාවක් හොයන ලොව වටා සිටින
ඔබේ ප්‍රේක්ෂකයන්ට පණිවිඩයක් කියන්න ලැබුනොත්… 

2026 නොවැම්බර් 01

විශේෂයෙන් ස්තූතියි අමා අක්කේ ඔයාට 2026 වර්ෂයේ මගේ පලමු ආටිකල් එක කලාට.

මේ කතාබහ ඉතාම සරල, සහ හරිම ආදරණීයයි.

අමා නාකන්දලගේ