වර්තමාන නවීන සමාජ පරිවර්තනය සමග ආහාර, විහරණ විෂමතා සහ නොයෙකුත් පාරිසරික හේතූන් නිසා චර්ම රෝග බහුලව ඇතිවීමටත්, ක්‍රමයෙන් උත්සන්න වීමටත් හේතු වී ඇත.

නවීන පර්යේෂණ වාර්තා වලින් පෙන්වා දෙන අන්දමට ලෝක ජනග්‍රහණයෙන් 2% ක ප්‍රමාණයක් එනම් මිලියන 80ක් පමණ වයස හා ස්ත්‍රී–පුරුෂ බේදයකින් තොරව පීඩා විඳින සම ආශ්‍රිත චර්ම රෝග තත්ත්වයක් ලෙස Psoriasis හැඳින්විය හැක.

මෙය ස්වයං ප්‍රතිශක්තිකරණ (Autoimmune), කාලීන (Chronic) රෝග අවස්ථාවක් ලෙස දක්වා ඇති අතර සාමාන්‍ය ව්‍යවහාරයේ දී “පොතු කබර” රෝගය ලෙස හැඳින්වෙන්නේත් මෙම රෝග තත්ත්වය යි.

බටහිර වෛද්‍ය විද්‍යාව තුළ රෝගය හටගැනීම කෙරෙහි පැහැදිලි හේතු සාධක හඳුනාගෙන නොමැති නමුත් ජානමය හා පාරිසරික සාධක හේතුවෙන් ඇතිවන ඇතැම් සමේ ආසාදන වලට එරෙහිව ක්‍රියා කරන සෛල, සමේ නිරෝගී සෛලවලටම එරෙහිව ක්‍රියා කිරීමෙන් මෙම තත්ත්වය ඇතිවන බව පිළිගැනේ.

ආයුර්වේද වෛද්‍ය විද්‍යාව තුළ ඉගැන්වෙන ‘කුෂ්ඨ‘ රෝග යටතේ ‘ක්ෂුද්‍ර කුෂ්ඨ‘ ලෙසට වර්ගීකරණය වන මෙම රෝග අවස්ථාව ‘කිටිභ‘ ලෙස නම් කර ඇත.

කුෂ්ඨ රෝගයන් යටතේ ‘මහා කුෂ්ඨ‘ ලෙස නොසැළකෙන මෙම රෝගය සඳහා ප්‍රතිකාරයේ සාර්ථකත්වය පහසුවෙන් ලබා දේ.

අහිතකර ආහාර ගැනීම, අහිතකර විහරණ, ඖෂධ විෂ වීම් හා ජානමය හේතු කිටිභ රෝගය සඳහා ප්‍රධාන ලෙස බලපාන අතර වාත සහ කඵ දෝෂ වර්ධනය කරන ආහාර වන ජලීය පදාර්ථ අවම, වියළි හා ශීත ගුණ සහිත ආහාර වැඩි වශයෙන් ලබා ගැනීම, අධික ලුණු රස සහ තීක්ෂ්ණ ගුණ වලින් යුත් ආහාර නිතර පරිභෝජනය කිරීම, ව්‍යායාම අඩු වීම හා කෝපය, ශෝකය ආදී මනෝභාවික හෙතූන් කිටිභ රෝගය වැළඳීමට හේතු වන බැව් ආයුර්වේද වෛද්‍ය විද්‍යාව තුළ ඉගැන්වේ.

මීට අමතරව රෝග හේතු ලෙස :-
– ප්‍රකෘති තත්ත්වයට අහිතකර ආහාර–පාන හා විහරණ
– කෘත්‍රිම අහාර–පාන
– මානසික ආතතිය
– අධික අව් රශ්මිය
– මත්පැන්, මත්ද්‍රව්‍ය භාවිතය
– සත්ත්ව/ශාක විෂ ඇතුළු විෂ රසායනික සංයෝග ශරීර ගතවීම
හැඳින්විය හැකිය.

ආයුර්වේද ඉගැන්වීම් වලට අනුව ඇතැම් සමේ රෝග කර්මජ වේ. එනම් බටහිර වෛද්‍ය විද්‍යානුකූලව Autoimmune or Idiopathic වේ.

ආයුර්වේද වෛද්‍ය විද්‍යාවට අනුව වාත හා කඵ දෝෂ කෝප වීමෙන් පසු රක්තය හා එක්ව රැධිරය විෂ කොටස් නිසා දූෂණය වීමෙන් පසු සිරුරේ අනෙකුත් ධාතු දූෂණය වීමෙන් කිටිභ රෝගය ඇතිවේ.

කළු, අළු හා මිශ්‍ර දුඹුරු පැහැයෙන් හා ස්පර්ශ කිරීමේදී රළු බව සහ ස්පර්ශයෙන් අපහසු බව දනවන, කැසීම සහිත පිඩකාමය තත්ත්වයක් ලෙස කිටිභ රෝගය හට ගන්නා බව ‘චරක‘ ආචාර්ය වරයා විසින් දක්වා ඇති අතර ‘සුශ්‍රැත‘ ආචාර්ය වරයා විසින් දක්වා ඇත්තේ පළමුව කුඩා බිබිලි මෙන් සමෙන් ඉහළට සෑදෙන සමෙහි නෙරීම් වැනි තත්ත්වයන් මඟින් ස්‍රාව මෙන් වැගිරීමෙන් පසුව ඒවා වෘත්තාකාර හා ගණකමෙන් යුත් අධික කැසීමෙන් යුත් දිළිසෙන කළු වර්ණයෙන් හටගන්නා පිඩකාවන් කිටිභ ලෙස ය.

*රෝග ලක්ෂණ*

– දාර පැහැදිලිව දැකිය හැකි රතු මණ්ඩලාකාර ලප ඇතිවීම.
– පිඩකා මතුපිට රෝස පැහැ කබොල්ලක් සේ දිස්වීම.
– ස්පර්ශයෙන් රළු වීම.
– ස්පර්ශ කිරීමේදී වේදනාව හා දැවිල්ල පැවතීම.
– කැසීම බහුල වීම.
– කැසීමේදි පොතු ගැලවී යාම.

සමෙහි නිරන්තර වියළි බවත්, සම පොතුමෙන් නිතර නිතර ඉකමනින් ගැලවී යාමත් නිසා කැසීම අධික වීමෙන් රෝගියා බොහෝ සේ පීඩා විඳින අතර අනෙකුත් අයට රෝගී තත්ත්වය දර්ශනය වීම නිසා ද රෝගියා බොහෝ සෙයින් මානසික ආතතියට ලක්වේ.
එබැවින් සමාජ ආශ්‍රයන් පවා සීමා කරමින් රෝගියා කායිකව, මානසිකව හා සමාජයීය වශයෙන් පීඩා විඳී.

මෙම රෝග තත්ත්වය රෝගී පුද්ගලයන් මඟින් බෝවීම සිදු නොවුනද පුද්ගල සනීපාරක්ෂාව හා පිරිසිදු බව අතිශය වැදගත් වේ.

රෝගය හටගැනීම හා පැතිර යාම පුද්ගලයාගෙන් පුද්ගලයාට වෙනස් වන අතර ඇතැම් රෝගීන්ගේ හිස, අත්, පා ආදියෙන් ආරම්භ වී පසුව මුලු ශරීරය පුරාම පැතිරේ.

කණ දෙපස, පිට, පපුව හිස කෙස් හට ගන්නා දාර වල බහුලව දැකිය හැකිය.

හස්තපාදගත කිටිභ (Palmoplantar Psoriasis), ශිරෝගත කිටිභ (Scalp psoriasis) ලෙස හටගන්නා ස්ථාන අනුවද ප්‍රබේද කිරීම් දක්වා ඇත.

සමේ රෝගයකදී පසුවට හට ගැනෙන මානසික ආතතිය මෙන්ම ඇතැම් ආසාදනයන් හේතුවෙන් ද මෙම රෝගය උත්සන්න වීම දක්නට ලැබේ.

හිස් කබලේ සහ හිසකෙස් මායිම් (hair margins) වැනි අධිකව දහඩිය දමන ස්ථාන වලින් මෙන්ම වැලමිට සන්ධිය වැනි පෘෂ්ඨ මතුපිට ස්පර්ශ වන ස්ථාන වල රතු පැහැ ලප හෝ බිබිලි ලෙස අරම්භ වී (ඇතැම් විට මුලදී ස්‍රාව වැගිරවීම් සහිතව හෝ රහිතව) ක්‍රමයෙන් විශාල වී කැසීම හා කුඩු හැලීම සහිතව අධික පිඩාකාරි බවක් ගෙනදෙන පොතුකබර රෝගයට නිසි ප්‍රතිකාර නොලැබී කල්ගත වීම නිසා අභ්‍යන්තර පටක වෙත ගමන් කිරීමෙන් රෝගය උත්සන්න වීම සිදුවේ. පසුකාලීනව අස්ථි, මජ්ජා ධාතු ගතව Psoriatic arthritis තත්ත්වයන් පවා ඇතිවිය හැක.

බටහිර වෛද්‍ය විද්‍යාවට අනුව සුව කිරීම අපහසු, පාලනය කරගත හැකි රෝග අවස්ථාවක් වුවද, මෙය ආයුර්වේද ප්‍රතිකාර තුළින් පූර්ණ සුවයක් ලබාගත හැකි රෝගයකි.

ආයුර්වේද ප්‍රතිකාර තුල,
*අභ්‍යන්තර ඖෂධ ප්‍රතිකාර ,
*බාහිර ආලේපන ,
*පත්‍ය ආහාර / විහරණ මූලික වේ.

*වමන, විරේචන, රක්ත මෝක්ෂණ යන පංචකර්ම ප්‍රතිකාර තුළින් පූර්ණ සුවයක් ලබාගත හැකිය.

නමුත් කර්මජ හේතුවක් නිසා ඇති වූයේ නම් නැවත රෝගය හටගැනීමේ යම් අවදානමක් තිබිය හැක. නිවැරදි ප්‍රතිකාර හා හිතකර පත්‍යාපත්‍ය වල යෙදීමත් අහිතකර දෙයින් වැළකීමත් මඟින් ප්‍රතිකාරයේ සාර්ථකත්වය ලඟා කර ගත හැක.

ඖෂධීය කෂාය, ගුලි, කල්ක, චූර්ණ, ගුග්ගුලු, ඝෘත වර්ග අභ්‍යන්තරවද, ඖෂධීය තෙල්, ආලේප වර්ග බාහිර ප්‍රතිකාරයේදී ද වැදගත් වේ.

ආයුර්වේද වෛද්‍ය විද්‍යානුකූලව සමේ රෝග අවස්ථාවන්, රෝග හේතූන්, ලක්ෂණ, සම්බන්ධිත දෝෂ හා ශරීර ධාතු, පුද්ගල ප්‍රකෘතිය යනාදී සියළු කරුණු වෙන් වෙන් වශයෙන් දක්වා ඇති බැවින්, නිවැරදි රෝග විනිශ්චයන් පහසු වේ. තවද, රෝගී ප්‍රතිකාරය සිදු කළ යුතු ආකාරය පැහැදිලිව විශිෂ්ට ලෙස දක්වා ඇති බැවින් චර්ම රෝග සුව කිරීමෙහිලා ආයුර්වේද වෛද්‍ය විද්‍යාව සුවිශේෂී වේ.

*සමේ රෝග වලින් ආරක්ෂා වීමට පිලිවෙත්* :-

– උෂ්ණාධික ආහාර පාන වලින් වැළකී සිටීම
– නිතර ජලය වැඩි වශයෙන් පානය කිරීම
– අව් රශ්මියෙන් සම ආරක්ෂා කරගැනීම
– කෘතිම රසායනික ද්‍රව්‍යය ශරීරගත වීම අවම කරගැනීම
– ආසාත්මිකතා හඳුනාගෙන ඉක්මන් ප්‍රතිකාර සඳහා යොමුවීම
– හිතකර නැවුම් එලවලු, පලතුරු නිතර ආහාර සඳහා එක් කරගැනීම
– කොලකැඳ වර්ග පානය කිරීම
– මානසික ආතතිය අවම කරගැනීම
– පුද්ගල සනීපාරක්ෂාව සලසා ගැනීම
– මසකට වරක්වත් ඖෂධීය ජල ස්නානය කිරීම (නුග පොතු, බෝ පොතු, අට්ටික්කා පොතු, ගංසූරිය පොතු තැම්බූ වතුරෙන්)

සමේ රෝග සහිත රෝගීන් යනු මානසිකව අතිශය පීඩා විඳින රෝගී කාණ්ඩයකි. එසේ වනුයේ ඔවුන්ගේ රෝග ලක්ෂණ රෝගියාටම නිරන්තරයෙන් දිස්වීමෙන් අතිශය කම්පාවට හා මානසික ආතතියට ලක්වන බැවිනි.

එබැවින් රෝගියාගේ රෝග පීඩාව අනෙකුත් බරපතල රෝගයන්ටත් වඩා ඉතාමත් ඉහළ ය. එමෙන්ම සමේ රෝගයන්ගේ උත්සන්න වීම මානසික ආතතිය මත රඳා පවතින බැවින් රෝගී තත්ත්වය සුව වීම ප්‍රමාද වීමටත්, ක්‍රම ක්‍රමයෙන් උත්සන්න වීමටත් එයම හේතුවක් විය හැකිය.

එමනිසා යෝග අභ්‍යාස, භාවනා ක්‍රම ආදිය අනුගමනය ඉතා යෝග්‍ය වන අතර නිරවුල් මානසික සෞඛ්‍ය පවත්වා ගනිමින් කෝපය, ද්වේශය, වෛරය යනාදී අයහපත් මානසික ආවේගයන්ගෙන් වැලකී සිටීම අනිවාර්යයෙන්ම සිදුකල යුතු වේ.

ඉහත සඳහන් හිතකර පුරුදු වලට යොමුවීමෙන් සමේ රෝග වලින් වැලකී සිටීමත්, රෝග ලක්ෂණ හටගත් මුල් අවස්ථාවේදීම සුදුසුකම් ලත් වෛද්‍යවරයෙක් වෙතගොස් ප්‍රතිකාර සඳහා යොමු වීමත් ඉතා වැදගත් වේ.

රෝගියාගේ සහ රෝගයේ ත්‍රිදෝෂ සම්බන්දතාවය, දෝෂ බලාබලත්වය, දූෂිත අග්නිය හා සප්තධාතු ආදී කරුණු සලකා බලා නිසි ක්‍රමවේදයකට අනුව අභ්‍යන්තර සහ බාහිර ප්‍රතිකාර සිදුකිරීම ආයුර්වේද වෛද්‍ය වරුන් විසින් චිකිත්සාව සිදු කෙරේ.

එහෙයින් සමේ ඇතිවන රෝග සඳහා ඉතා ඉක්මනින් රෝගයේ මුල් අවදියේදීම ක්‍රමවත් නිවැරදි ආයුර්වේද ප්‍රතිකර්ම වෙත යොමුවීමෙන් පැහැදිලි, සාර්ථක හා ඉක්මන් ප්‍රතිඵල ලබාගත හැක.

*ආයුර්වේද වෛද්‍ය නාලිකා හංසිනී ජයතිලක*
BAMS – Colombo (SL)