අඳුරු අහසේ වලාකුළු මත
විදුලි එළියෙන් ලියමි මගෙ කව
කඳුළු වැහිබිඳු මවෙත දී ඔබ
හිරුත් සමඟින් පලා ගිය බව

කඳුළු අකුරු ද එකට මුසුවී
මහා වැසි මෙන් ඇද හැලෙන විට
හදවතේ ශීතලට හසුවී
සුදෝ සුදු හිම උපදවනු ඇත

වැහිලිහිණියන් තනුව සපයා
කවෙහි ලියවුණු දුක ගයනු ඇත
ශෝක ගීයේ උච්ච ස්වරය
අහස ගුගුරා පල කෙරෙනු ඇත

එහඬ නෑසෙන මානයේ ඇති
මන්දිරේ කවුළුවක් ලඟ ඔබ
වැටෙන හිම දෙස බලා සිටිමින්
සතුටු ගිනි උණුසුම විඳිනු ඇත

– තාරක ජයතිලක