හිරු උදාවට පෙරම – පාන්දර මදඳුරේ
තුරු පිසින මීදුමෙන් – වැසුණු නිල් කඳුකරේ
මේ ගමේ නිහඬබව – හැමදාම දුරුකරේ
ලංගමේ රියැදුරා – වෙල පහල චන්දරේ
බස් එකේ තරමටම – වඩා ලොකු නැති පාර
ඇස් වහන් යන්න හැකි – තරම් ඔහු හුරුකාර
උදේ හවසද රෑද – පෝය දවසෙත් නෑර
කොතරම්ද ගණිනු බෑ – විසි වසක් ගිය වාර
අපිත් එක්කම ගමේ – පාරවල් ලොකු වුණා
බස් තුනක් හතරක්ම – තරඟයට එක් වුණා
පරණ බස් එක වගෙම – චන්දරෙත් ලෙඩ වුණා
අඩක් නිමවූ නිවසෙ – බිරිඳ හා තනිවුණා
එක රෑක හොඳටෝම – වැඩි වුණිලු පපුවෙ හති
රෝහලට ගෙනියන්න – කවුරුවත් හිටියෙ නැති
නොපමාව දහස් දන – එතෙර කල නිසා නිති
නොපමාව දෙව්ලොවෙන් – ඔහුව කැඳවන්න ඇති
තාරක ජයතිලක
