~ නොකිලිටි කුණු ~
උණු බතක් නොවැරදී – ඉදුණමුත් හැමදාක
ලුණු ටිකක් සමඟ කා – නිදයි සමහර රෑක
හුණු නොගෑ බිත්ති ඇය – ගොඩනැගුවෙ තනියෙන්ම
කුණු අදින ට්‍රැක්ටරේ – වැඩ කරල සතියේම
පෑ සෙනේ නොකිලිටියි – කිලිටි වූවත් ගතින්
නෑ සියන් නැති දුකත් – දරාගති තනි සිතින්
බෑ කියා දෙයක් නෑ – දිරිය දුටුවෙමි ඇගෙන්
නෑ අපිට අඩු පාඩු – සතුටු වුණි ලද දෙයින්
පාසැලට යන විටදි – මිතුරු කැල සමගින්ම
මග තොටදි ට්‍රැක්ටරේ – ඉඳහිටක දුටුවාම
අම්මෙ මම මෙහේ යයි – කියන්නට කලියෙන්ම
නාදුනන සේ ගියේ – ඇයි කියන් හැමදාම
තාරක ජයතිලක
