නවමු බලාපොරොත්තු, අභිලාෂ, ඉලක්ක වගේම අභියෝග මේ අවුරුද්දටත් පොදුයි. විය යුත්තේ එළඹෙන දින 365කට ආසන්න කාලපරාසය ඵලදායී ලෙස කළමනාකරණය කර ගැනීම තුළින්, තමාට අවැසි ඉලක්ක කරා සාර්ථකව ළඟා වීමට ක්‍රියාත්මක වීමයි.
ගතවුන අවුරුද්ද තුළ ලද ජයග්‍රහණ යලි යලිත් සමරමින්, තමාට දිය යුතු උපරිම වටිනාකම දෙමින්, අතප්සුවීම් සහ පරාජයන් හමුවේ ලද අත්දැකීම් මේ අවුරුද්ද තුල සාර්ථක වීමට උපයෝගී කර ගත හැකියි. ඒවා පිළිසකර කරගෙන ඉදිරියට යාමම ජීවිතය දිනවීමක්.
සිත පිනවූ අවස්ථාවන් වගේම තවමත් සුව නොවුන සිත් පෑරීම්ද මේ අතරින් පතර ඇති. සර්ව සම්පූර්ණ කිසිවක් නොමැති අවකාශයක පරාජිත සිතිවිලි වලට ඔබව අඩපණ කරන්නට ඉඩත් ඇති. අවසානයේ සංයමයෙන් ඒ හැම දේකටම සුබවාදී පිළිතුරක් නිර්මාණය කරගත යුත්තේ ඔබමයි.
කෙසේහෝ, පුද්ගලයකු ලෙස අවංකවම ඔබට ඔබ ගැන තක්සේරුවක් කල හැකි, ඒ තුලින් නොමදව සතුටු විය හැකි, අභියෝග ජයගත් සැමරුම්ම බහුල නිදුක් නිරෝගී වාසනාවන්ත සුබ අලුත් අවුරුද්දක් වේවා!
දිමුතු සේනාදි
