ශීත සමයේ දී ත් ලස්සනට ඉන්න..

පසුගිය සතියක දී මා විසින් අරඹන ලද මෙම කාලෝචිත ලිපිමාලාවෙන් අද දිනයේ දී අධික සීත කාලයේ දී අපේ හිසකෙස් පිළිබඳව සැළකිලිමත් වන්නේ කෙසේ ද යන්න පිළිබඳව අපි කතාකරමු. 

හිසකෙස් කාන්තා, පිරිමි දෙපාර්ශවයට ම තමන්ගේ රුව පිළිබඳව සිතනා විට වැදගත් ම කොටසක් ලෙස හඳුන්වාදෙන්නට හැකි යි. ඉතින්, නොයෙකුත් පාරිසරික , කාලගුණික, සමාජයීය, සහ තවත් නොයෙකුත් හේතූන් ඔබේ හිසකෙස්වල වර්ධනයට,එහි නොයෙකුත් රෝගී තත්ත්වයන්ට සහ නිරෝගීබවටත් හේතු සාධක වනවා. මෙහි දී ලංකාව වැනි සෘතු භේදය දැඩිව නොදැනෙන රටක මෙන් නොව හිම පතනයවන අධික ශීත දේශගුණයක් ඇති රටක දී අපේ සමට සහ හිසකෙස්වලට මෙන් ම ශරීරයට ත් විවිධ සෘණාත්මක බලපෑම් ඇතිවන අවස්ථා ඉතා ම ඉහළ බැවින් නිතර නිවැරදි සත්කාර සහ රූපලාවණ්‍යය ම ය පුරුදු ඇතිකරගතයුතු වනවා. එසේනම් මූලිකව වම වැදගත්වන කරුණු එකිනෙක මා මෙහි දක්වන්නම්.

1. සතියකට කිහිපවරක් ඔබේ හිසට තෙල්සත්කාරයක් කරන්න.

හිසතෙල් ගැල්වීම ශ්‍රීලාංකික අපට ආගන්තුක කාරණයක් නොවුණත් අදවන විට අධික කාර්‍ය්යබහුල ජීවිත සහ නූතනවාදී ජීවනරටාවකට හුරු වී ඇති බහුතරයක් දෙනා අමතක කර ඇති වැදගත් ම සත්කාරයක් වන්නේ හිසතෙල් ගැල්වීම යි. බොහෝදෙනා තම පෙනුම සහ පෞරුෂය ගැන සැළකිලිමත්වන තරමට ම මෙවන් සත්කාර ගිලිහී යන්නටත් ඇති ඉඩකඩ ඉතා ම ඉහළ යි. එබැවින් ශීතකාලයේදී වෙනදාටත් වඩා ඔබේ හිසට සක හිසකෙස්වලට තෙල් සත්කාර අත්‍යාවශ්‍යය බව සිහිතබාගන්න.

පිරිසුදු පොල්තෙල්,ඔලිව් තෙල්, ආමන්ඩ් තෙල් වැනි වටිනා තෙල්වර්ගවල ඇති ඖෂධීය සංයෝග ඔබේ හිස්කෙස්වලට අවශ්‍යය පෝශණය ලබාදෙමින් හිස්කබලෙහි අධික වියළිබව නිසා ඇතිවන හිස් හොරි, පොතු ගැලවීම්, කැසීම් සහ වෙනත් එවැනි නොරිස්සුම් සහගත තත්ත්වයන් වැළැක්වීමට කටයුතු කර යි.එබැවින් සතියකට කිහිපවරක් එවැනි එක් තෙල් වර්ගයක් හෝ තෙල් මිශ්‍රණයක් මඳක් රත්කර හිස්කබලෙහි ගල්වා ඇඟිලි තුඩු මඟින් ඉතා ම හොඳින් මෘදුව සම්බාහනය කරන්න. අව ම විනාඩි දහයක් පමණ මෙසේ තෙල් ගල්වා සම්බාහනය කිරීමට වගබලාගන්න.එමඟින් හිසකෙස් මූලය ශක්තිමත් කරමින් රුධිර සංසරණ පද්ධතිය උත්තේජනය කිරීමටත්, ඔබේ ආතතිය සහ අනෙකුත් හිසකෙස් සම්බන්ධ අහිතකර තත්ත්ව පාලනය කිරීමටත් මහත් පිටිවහලක් ලබාදෙනු ඇත. තෙල් ගල්වා සම්බාහනයෙන් පැයකට පමණ පසුව ඉතා ම මඳ උණුසුම් වතුරෙන් අවශ්‍යය නම් පමණක් ෂැම්පු කන්ඩිෂනර් භාවිතකර සෝදාහරින්න. 

2. නිතර හිස සේදීමෙන් වළකින්න

මෙය සරලව ම දිනපතා නෑමෙන් වළකින්න යනුවෙන් අපට තේරුම්ගන්නට හැකි යි. දිනපතා ස්නානය අපේ පිරිසුදුකමට ඉතා වැදගත් වුවත් එහි අහිතකර තත්ත්වයක් ඔබේ හිසට , හිසකෙස්වලට, සහ ශරීරයට බලපානබව ඔබ දැන සිටියා ද? ඔව්, අපේ සමෙහි සහ හිස්කබලෙහි මෙන් ම හිස්කෙස්වල ස්වාභාවිකව ම පවතින හිතකර මෘදුකාරක කොටස් දිනපතා ෂැම්පු සහ සබන් භාවිතයෙන් ඉවත් වේ. ෂැම්පූ , සබන් සෑම දෙයක ම ඉහළ රසායනික සංයෝග පවතින අතර එමඟින් ශරීරයට හිතකර, ස්වාභාවික පවතින තත්ත්ව ඉවත්කරමින් නොයෙකුත් ගැටළු ඇතිකරන්නට හේතුවේ.  එනිසා තරමක් අපහසුවෙන් වුවත් දිනපතා හිසකෙස් සේදීමෙන් ඈත්වීම ඔබේ යහපතට ම හේතුවනවා ඇත.

3. නිවැරදිව කන්ඩිෂනර් භාවිතකරන්න

හිසකෙස් ෂැම්පූ යොදා සේදීමෙන් අනතුරුව හැමවිට ම ස්වාභාවිකත්වයට ළඟ , ස්වාභාවික ද්‍රව්‍යය අඩංගු මෘදු එමෙන් ම ඉතා හොඳින් හිසකෙස්වල තැවරිය හැකි කන්ඩිෂනර් වර්ගයක් යොදා සෝදාහරින්න. එමෙන් ම ඒ කන්ඩිෂනර් සහ ෂැම්පූ ඔබේ හිසට, සමට සුදුසු ම වර්ගය බව තහවුරුකරගැනීම අනිවාර්‍ය්ය කාරණාවක් බව අමතක කරන්න එපා.

4. නිතර ම ඉහළ උණුසුමකට රත්වුණු කොණ්ඩා මෝස්තර උපකරණ සහ ඒ ආශ්‍රිත නිෂ්පාදන භාවිතයට ගැනී ම අව ම කරන්න.

අද කාලයේ හිසකෙස්වල රැලිගතිය ඉවත්කරන්නට හෝ හිසකෙස් කෘතිමව රැලිකරන්න හෝ වෙනයම් කොණ්ඩා මෝස්තර සඳහා ඔබ අධික උණුසුමකින් භාවිතයට ගතයුතු කොණ්ඩා මෝස්තර උපකරණ (hair straightener, hair dryer or styling tools ) භාවිතයට ගන්නා අයෙකු නම් හැකි හැමවිට ම ඒ උපකරණ සහ නිෂ්පාදන භාවිතය අව ම කරන්න. දිනපතා එවැනි උපකරණ භාවිතයෙන් අධිකව ඔබේ හිසකෙස් සහ හිස්කබලට අහිතකර බලපෑම් එල්ලවන අතර ඉන්සමහර අවස්ථාවක දීර්ඝකාලීනව බලපෑ හැකි හානි ඔබේ හිසට සහ කෙස් කළඹට සිදුවිය හැකි අවස්ථා විරල නොවේ.

5. නිවසින් පිටවන හැම අවස්තාවක දී ම හැකි හැමවිට ඔබේ හිසකෙස් ආවරණය කරගන්න

අධික ශීතලට නිරාවරණය වන ඔබේ හිස කෙස් සහ හිස් කබල ඉතා ඉක්මනින් අධික වියළිබවට පත් වේ. එබැවින්  හැමවිට ම ඔබ නිවසින් පිටත් ඇවිද යනවිට දී හිසකෙස් ආවරණය කරගැනීමට මතක තබාගන්න. සැටින් හෝ සිල්ක් ලේන්සුවකින් පළමුව හිස ආවරණයකර අනතුරුව වූල් හෝ එවැනි අමුද්‍රව්‍යයවලින් නිමවූ හිස්පළඳනා පැලැඳීමෙන් නිතර සිදුවන අපහසුතා මඟහරවා ගත හැක. එසේ ම එම පියවරට පෙර ඔබට සුදුසු තෙල් මිශ්‍රණයක් හෝ තෙල්වර්ගයක් ස්ප්‍රේ කිරීමෙන් තවදුරටත් හිසකෙස් අපහසුතාවලින් තොරව ආරක්ෂා කරගැනීමට හැකිවනු ඇත.

6. තද උණුජලයෙන් ස්නානය කිරීමෙන් වළකින්න.

ශීතකාලයේ දී උණුජලය භාවිත නොකිරීමෙන් ඇතිවන අපහසුතා මා මෙහි දී කිවයුතු නෑ.ඔබ සැවො ම ඒ ගැන හොඳින් ම දන්නා නිසා.එහෙත් නිතර, දිනපතා උණු ජලය භාවිතයෙන් සේදුම්කිරීම නිසා හිස ද අධිකව වියළිභාවයට පත්වනු ඇත. එසේ ම හිසේ සහ සමේ ඇති හිතකර ස්වාභාවික තෙල් තට්ටුව ද එමඟින් වියැකී යන නිසා මඳ උණුසුම් වතුර නැතිනම් ඇල්මැරුණු දියෙන් ස්නානය කරන්නට වගබලා ගන්න. එමෙන් ම සතියට දෙවරක්වත් (ඔබ දිනපතා ස්නානය කරන අයෙක් නම්) deep hair conditioning හෝ hair mask එකක් භාවිත කරන්න.එමඟින් කොණ්ඩය අධිකව වියැලීමෙන් වලකා කෙස්කළඹ නිරෝගීව පවත්වාගැනීමට උපකාරවනු ඇති.

ඉතින් මෙයට අමතරව හැකිතරම් ජලය පානය කිරී ම ත්, සමබල ආහාරවේලකට දිනපතා හුරුවීම ත් ඔබේ හිසේ සහ හිසකෙස්වල නිරෝගී පැවැත්මට මහත් රුකුලක් වනු ඇති.

ඉතින් අද ත් ඔබට වැදගත්වන කරුණු බොහොමයක් මේ ලිපිපෙළින් ඉදිරිපත් කිරීමට ලැබී ම සතුටක්! 

ඔබ සැම දෙනාට ම සුබ දවසක් !!

සමීරා ජයසිංහ 

නදින් නන්දෙස කිතුගොස පතුරන හිරුෂි

චිත්‍ර ශිල්පය, ගායනය, නර්තනය, නිරූපණය, රූපණය, නිවේදනය, පූරකත්වය හා

ලේඛණය ආදී වූ කලාත්මක කෞශල්‍යයන් රැසක් උපතින්ම ධායාදකොටගනිමින් සංගීත

සංද්වනියේ නව්‍ය රස නිෂ්පත්තීන් සිසාරමින් මව්භිමේ කිතුගොස ජාත්‍යන්තර සංගීත

කරළිය අභිමුව රැව්පිළි රැව් නැංවීමට වෙරදරන තරුණ වෘත්තීමය ගායන ශිල්පිණී හිරුෂි

ජයසේන නම් ඇයගේ ආද්‍යාත්මයේ, දේශපාලනික ආක්‍යානයෙහි හා වෘත්තීත්වයේ ප්‍රථූල

හරසකඩක් සම්මුඛ කරවීමට ලත් වෑයමකි මේ.

Q). ඔබ පුද්ගලයෙකු වශයෙන් ඔබව දකින්නෙ කුමන අයුරකින්ද යන්න පිළිබඳව සඳහනක්

කරමු.

A). මම කලාවට බෙහෙවින් ආදරේ කරන මා ඇසුරු කරන තවත් නිර්මාණශීලී කලාශිල්පීන්

සමඟින් එකතුවෙලා විවිදාකාරයේ නිර්මාණයන් බිහිකිරීමට කැමති කෙනෙක්.

Q). ඔබ ජීවිතය යන්න දකින්නෙ කුමන අයුරින්ද යන්න පිළිබඳව හැඳින්වීමක් කරමු.

A). තමන්ගෙ අනන්‍යතාවය පිළිබඳවත් ඒ වගේම තමන් ජීවත්වෙන පරිසරය වෙතින්

පංචේන්ද්‍රියයන් හරහා සංවේදනය වන අත්දැකීම් සමුදාය දෙසත් සිදුකරන නිරීක්ෂණයක්

ලෙසින් මම ජීවිතය කියවගන්න කැමතියි. මම මේ සංකීර්ණ ලෝකය තුළ සරළ දේවල්

ඇසුරුකොටගෙන ජීවත් වෙන්න කැමති කෙනෙක්.

Q). ඔබේ ආගම හෝ දර්ශනය යන්න කුමක්ද යන්න සඳහන්කොට ඔබ අවබෝධකොටගත්

ආකාරයට එම ආගමේ හෝ දර්ශනයේ මූලික හර පද්ධතිය පිළිබඳව සෛද්දාන්තික විග්‍රහයක්

ඉදිරිපත්කරමින් ඒ තුළින් ජීවිතයට ලබාගත් වටිනාම දේ හෝ දේවල් මොනවාද යන්න

පිළිබඳවද විග්‍රහයක් සිදුකරමු.

A). බෞද්ධාගම හා බුදුදහම යන සංදර්භයන් ද්විත්වය ජීවිතය තුළට යොදවාගනු

ලැබෙන්නේ දෙවිදිහකට. මම බුදුදහම ඇසුරුකොටගෙන ජීවත්වෙන්න කැමති කෙනෙක්.

අනිත්‍ය ආදී වූ තිලකුණු පිළිබඳව අවධාරණයෙන් හදාරද්දි පෙනීයන්නෙ මිනිසුන් වශයෙන්

පුද්ගලික අනන්‍යතාවය පදනම්කොටගෙන විශාල විවිධත්වයක් පවතින්නාක් මෙන්

පෙනීගියත් සත්‍යයාකාරයෙන් අප සැවොම සුවිසල් විශ්වීය ගොඩනැගීමක කුඩා

සංරචකයන් සමූහයක් පමණක් යන්නයි.

බුදුදහම ඇසුරුකිරීම ඔස්සේ ලැබුණු පුහුණුව නිසා මිනිසුන් ඇසුරේ පවතින සියළු ආකාරයේ

විශ්වාසයන් හා ඒවා පදනනම්කොටගෙන ගොඩනැගුණු සියළු මාදිලියේ සංස්කෘතික

සංරචකයන් හා ඒවා විහිදීගොස් ගොඩනැගුණු දැනුම් පද්ධතීන් සියල්ල පිළිබඳවත් වඩාත්

පුළුල්ව කියවාගන්න මෙන්ම අවංකවම ඒ සියල්ලටම ගරු කරන්න මම පුරුදු උනා.

පරිසරය තුළ ජීවත්වෙද්දි ස්වකීය පාලනයෙන් ගිලිහුණු තත්ත්වයන් හමුවේ පුද්ගලත්වයේ

හෙවත් මමත්වයේ හැසිරීම හෙවත් තීරණ ගැනීම හා ප්‍රතිචාර දැක්වීම ඵලදායි අයුරින්

කළමනාකරණය කොටගැනීමට පහසුකම්ද එතුළින් සැලසුණා.

ජීවියෙක් විදිහට සියල්ල දෙස අවධාරණයෙන් සිහියෙන් නිරීක්ෂණය කිරීම පමණක්

සිදුකිරීමත් තමන් තුළට අවශෝෂණය නොකොටගෙන විනිශ්චයකට නොඑල්බී සිටීමත්

තමයි බුදුදහම තුළින් උකහාගත් සුවිශේෂීම දෙය විදිහට සළකන්න පුළුවන්.

මගේ අවබෝධයේ හැටියට ඇත්තෙන්ම ජීවිතය කියන්නෙ හරිම සරළ මෙන්ම හරිම සුන්දර

දෙයක් පුද්ගලත්වය හෙවත් මමත්වය විසින් සකස්කෙරෙන මායාත්මක වටිනාකම් වලින්

තොර වූ විටදී. ජීවිතය පිළිබඳව මම ලබාගත් මේ කියවාගැනීම සම්බන්ධයෙන් මම

අවංකවම ගොඩක් සන්තෝෂයට පත්වෙනවා.

Q). ඔබේ වැටහීමේ පරිද්දෙන් මනුශ්‍යත්වය අරුත්ගන්වාගන්නේ කෙසේද හා ඒ හට ඉහළම

වටිනාකමක් හිමිකරදෙන්නේ කෙසේද යන්න පිළිබඳව විස්තරයක් සිදුකරමු.

A). ඇත්තෙන්ම මම තවමත් මේ ලෝකයේ ජීවත්වෙලා තියෙන්නෙ දශක දෙකකට මඳක් වැඩි

කාලයක්. මම විශ්වාස කරන විදිහට ජීවිතය කියන්නෙ අඛණ්ඩ දීර්ඝ හැදැරීමක්. "

සංවේදනාව ", " කරුණාව " හා " පරෝපකාරය " යනු මනුශ්‍යත්වයේ ප්‍රදානම ගුණයන්

ලෙස මම සළකණවා.

ලෝකය තුළ විවිධාකාර සාධකයන් පදනම්කොටගෙන විවිධාකාර වර්ගීකරණයන්

පවතිනවා. ඒ ඇතැම් වර්ගීකරණයන් තුළින් සුවිසල් ලෙස මුදල් ඉපයීම හෙවත් ව්‍යාපාරයන්

සිදුකෙරෙනවා. උදාහරණ ලෙස රූපශ්‍රිය පදනම්කොටගෙන සිදුකෙරෙන වර්ගීකරණයන්

තුළින් විනෝදාස්වාදය සපයන කර්මාන්තයන් තුළත් ජාතීන් හෝ ආගම ආදී සංස්කෘතික

මූලාශ්‍රයන් පදනම්කොටගෙන සිදුකෙරෙන වර්ගීකරණයන් තුළින් යුධගැටුම් නිර්මාණය

කිරීමත් ඒවාට අවැසි ආයුධ නිපදවා අලෙවිකරණයත් දක්වන්න පුළුවන්.

පුද්ගලිකව අපට මුහුණදීමට සිදුවන ගැටළුන්හි ආක්‍යානයන් එකිනෙකට වෙනස් වූවත්

ප්‍රජාවක් ලෙස සැළකූවිටදී එම ආක්‍යානයන්ගේ මූලික ගොඩනැංවීම පොදුයි.

උදාහරණයක් ලෙස දුක, සතුට, භය, කුසගින්න ආදී වූ භාවාත්මික ප්‍රකාශනයන් හා

අවශ්‍යතාවයන් දක්වන්න පුළුවන්.

මේ යථාර්ථය අවබෝධකොටගෙන කවුරුන් හෝ සහය අවැසි කෙනෙකු හඳුනාගෙන

තමන්ගේ සීමාවන්ද ආරක්ෂාකොටගනිමින් අවංකව ඔහු හට කරුණාව පාමින් හැකි අයුරින්

උපකාර කිරීමට හැකිනම් ඒ තුළින් මනුශ්‍යත්වයට වඩාත් සංවේදී වටිනාකමක්

එකතුකරන්න පුළුවන්.

ගායනශිල්පිණියක් ලෙස මම ඉදිරියේදී උත්සාහ කරනවා විධිමත් හැදෑරීමකින් අනතුරුව

විවිධාකාර වූ මිනිසුන්ගෙ විවිධාකාර වූ අත්දැකීම් පිළිබඳව කථිකාවතක් මගේ නිර්මාණයන්

තුළින් ගොඩනංවන්න. මම තරයේ විශ්වාස කරනවා නිර්මාණශීලීත්වය

උපයෝගීකොටගනිමින් කලාව තුළින් සකලවිධ මනුශ්‍යය ප්‍රජාව භාවාත්මිකව ඒකරාශි

කිරීමට පුළුවන් යන බව.

Q). ඔබ මානව මනෝවිද්‍යාව යන විෂය පථය පිළිබඳව ඇමරිකා එක්සත් ජනපදයේ

විශ්වවිද්‍යාලයකින් මැනවින් අද්‍යාපනය හදාරලා තිබෙන අයෙකු විදිහට එම හැදෑරීම

ඔබේ ජීවිතය මෙන්ම ඔබේ ළබැඳියන්ගේ ජීවිත ආලෝකමත් කරගැනීම සඳහා

උපයෝගීකොටගත් ආකාරය පිළිබඳව අනාවරණය කරමු.

A). මානව මනෝවිද්‍යාව තුළින් මූලික වශයෙන් සිදුකෙරෙන්නෙ මිනිස් මනස පිළිබඳව

කියවාගැනීමයි. එනම් කෙටියෙන් කියතොත් පුද්ගලයෙකුගේ චර්‍යාවන්, පුරුදු හා

ආකල්පයන්ගේ ඔප්නැංවීම හා මූලාශ්‍රයන් පිළිබඳ ගවේෂණයයි. ජීවිතයේ අපිට

නොයෙකුත් මාදිලිවල පුද්ගලයන් මුණගැසෙනවා. ඔවුන් සමඟින් විවිදාකාරයේ ගණුදෙනු

කිරීමට සිදුවෙනවා.

මේ විවිධත්වය මත නානාප්‍රකාර රුචි – අරුචි කම් සියල්ලද තීරණය වෙනවා මෙන්ම ඒ

හේතුවෙන් ඇතැම්විට යම් යම් ගැටළුකාරී තත්ත්වයන් වුවද හටගැනීමට ඉඩකඩක්

තියෙනවා.

උදාහරණයක් ලෙස භාවාත්මිකව උද්වේගකාරී පුද්ගලයෙකුගේ එම චර්‍යාවන්, පුරුදු හා

ආකල්පයන් හටගැනුනු හා ඔප්නැංවුනු මූලාශ්‍රයන් ලෙස පවුල් පසුබිම, පාසැල්

අධ්‍යාපනය, මොළයේ භෞතික හා රසායනික ක්‍රියාවලිය හේතුවෙන් හටගැනුනු

මානසික තත්ත්වයන්, කුඩා අවධියේදී මුහුණදීමට සිදු වූ අත්දැකීම්, විවිදාකාරයේ

ජනමාධ්‍ය මූලාශ්‍රයන් තුළින් උකහාගත් දේවල්, සමාජයෙන් එල්ලවන බලපෑම් ආදී වූ

විවිධාකාර කාරණාවන්ගේ සෘජු හෝ වක්‍ර යෙදවීම් දක්වන්න පුළුවන්.

සාමාන්‍යයෙන් පුද්ගලයෙකු පරිණත වන අවධියේදී ඉහත විග්‍රහ කළ ආකාරයට ඔහු හෝ

ඇයව යම් නිශ්චිත ආකාරයකට රාමුගත වීමක් නෛසර්ගිකව සිදුවෙනවා. ඉන්පසු ඔහු හෝ ඇය

ඉදිරි කාලසීමාව ගතකරනු ලබන්නේ එම රාමුහත වීමට අනුකූලවයි.

මානව මනෝවිද්‍යාව හැදෑරීම තුළින් මම අවබෝධයක් ලබාගත්තෙ මෙම අතිශය සංකීර්ණ,

සියුම් හා ගැඹුරු වයුහගත ක්‍රියාවලිය පිළිබඳවයි. ඒ අවබෝධය තුළින් මට සුවිශේෂී

හැකියාවක් ලැබෙනවා අනෙකුත් පුද්ගලයන්ගේ නෛසර්ගිකත්වය පිළිබඳව මෙන්ම

විශේෂයෙන්ම මගේ නෛසර්ගිකත්වය පිළිබඳවත් ප්‍රමාණවත් කියවීමක් සිදුකරගන්න.

එතුළින් මා තුළ තිබෙන යම් යම් දුර්වලතා, දක්ෂතා, නිවැරදි විනිශ්චයන්, වැරදි

විනිශ්චයන්, අවශ්‍යතාවයන් හා සීමාවන් ආදිය පිළිබඳව පැහැදිලි හඳුනාගැනීමක්

සිදුකරන්න පුළුවන්. එය සෘජුවම ඉවහල් වෙනවා මගේ පෞද්ගලික ජීවිතය මෙන්ම

වෘත්තීය ජීවිතය වඩාත් සකසුරුවම්ව, ඵලදායීව හා කාර්‍යක්ෂමව පෙළගස්වාගන්න.

ඇතැම්විට අපි අපිවම රවටාගන්නා අවස්ථාවනුත් නැත්තෙම නෑ. නමුත් අපි අපේ හදවතටත්

එතුළින් නැඟෙන සිතැඟිවලට අවංක උනොත් ඒ හරහා ගුණාත්මක භාවයෙන් වඩාත් ඉහළ

මානව සම්බන්ධතා ජාලයක් අප වටා නිර්මාණය කරගැනීමේ වාසිය සලසාගන්න පුළුවන්.

ව්ශේෂයෙන්ම නිර්මාණශිල්පිනියක් විදිහට ප්‍රේක්ෂකයන්ගේ සිතුම් පැතුම්,

අවශ්‍යතාවයන්, ප්‍රවණතාවයන් ආදිය පිළිබඳව ප්‍රාමාණික හා ගුණාත්මක

විශ්ලේෂණයක් සිදුකොටගැනීමටත් එම තොරතුරු පදනම්කොටගෙන තමන්ගේ

සංකල්පනාවන් කැටිකොටගත් නිර්මාණශීලීත්වයෙන් හා ගුණාත්මක භාවයෙන්ද ඉහළ

ඵ්ළධායී නිෂ්පාදනයක් බිහිකිරීමට ඉහත කී අවබෝධය විශාල පිටිවහලක් සපයනවා.

Q). ඔබ කලාමාද්‍යයක් ලෙස සංගීතය හඳුනාගන්නේ කෙසේද යන්න පිළිබඳව පැහැදිලි

කිරීමක් කරමු.

A). මම පෞද්ගලිකව සංගීතය යන්න හඳුනාගන්නේ මම හැදෑරීමට කැමති විෂයක්

හැටියටත් වෘත්තීය වශයෙන් භාවිතාවේ යෙදීමට කැමති කර්මාන්තයක් හැටියටයි.

එමෙන්ම සෑමවිටම මම මටම අනන්‍ය වූ ප්‍රගතිගාමී දර්ශනයක් සමඟින් මඳකුදු හෝ

නව්‍ය වූ සංකල්පයක් පෙරදැරිකොටගත් සංවේදනාත්මක මෙන්ම විනෝදාත්මක

නිර්මාණයන් ප්‍රේක්ෂකයන් හට ඉදිරිපත්කිරීමට අපේක්ෂා කරනවා.

ඒ සඳහා ගායන කුසලතාවයට අමතරව විශේෂයෙන්ම වර්ථමානයේ වෙනත් සංගීත

කර්මාන්තයන්හි භාවිතාවන දියුණු තාක්ෂණික ප්‍රයෝගයන් සමඟින් රූපණ කුසලතාවයද

සුනම්‍ය අයුරින් මුසු කිරීමෙන් අනතුරුව ගෝලීය නව්‍යකරණයන්ට හා ප්‍රවණතාවයන්ට

අනුකූලව එකිනෙකට වෙනස මානයන් තුළින් ප්‍රේක්ෂකයන් ආමන්ත්‍රණය කළ හැකි

ප්‍රභල ප්‍රකාශන මාද්‍යයක් හැටියටත් සංගීතය අරුත්ගන්වාගන්න පුළුවන්.

" සංගීතය යනු විශ්ව භාෂාවක් " යන්න ඒ පිළිබඳව විශේෂ ප්‍රාගුන්‍යයක් දරන බොහෝ

විද්වතුන්ගේ මතයක්. මගේ අත්දැකීමේ හැටියට ඒකට ප්‍රදානතම හේතුව වන්නේ සංගීත

භාවිතාව තුළදී එහි මූලික සංරචකයන් හරහා ප්‍රේක්ෂකයන් වෙතට ජනනය කිරීමට

උත්සාහ කෙරෙන්නේ භාවයන් සමුදායක් වීමයි.

භාවයන් යනු ඉහත කී පරිදි මිනිසුන් හට පොදු ප්‍රස්තූතයක්. ඇතැම්විට වචන රහිත වූ හුදු

වාද්‍ය ඛන්ඩයකින් පවා අතිශයින් ප්‍රභල මානසික උත්තේජනයක් හටගන්වන්න පුළුවන්.

ඉන් වක්‍රාකාරයෙන් කියවෙන්නේ භාෂාව යනු ද්වීතියික ප්‍රකාශන මාදිලියක් බවයි.

Q). " සිනමාව යනු සකලවිධ කලා මාද්‍යයන්ගේ කූඨප්‍රාප්තියයි " යන්න විෂය පිළිබඳ

විශේෂ ප්‍රාගුන්‍යයක් සපිරි බොහෝ ශාස්ත්‍රීය විද්වතුන්ගේ මතයයි. සිනමාව තුළ

සංගීතයේ භාවිතාව පිළිබඳව ඔබේ අදහස් ඉදිරිපත්කරමු.

A). කෙසේනමුත් දකුණු ආසියානු කලාපය තුළ නිර්මාණය වන සිනමා නිර්මාණයන්හි ඉහත

කී පරිදි මානව භාවයන් සරු ලෙස උද්දීපනය කළ හැකි සංවේදනාව දනවන සුළු

ප්‍රාසාංගික ගීතයන් නොමඳව අන්තර්ගත කිරීමේ සම්ප්‍රධායක් ඒවායේ නිර්මාණකරුවන්

විසින් බිහිකොට තියෙනවා.

එම සම්ප්‍රධාය හේතුවෙන් දකුණු ආසියානු සිනමා භාවිතාව ලෝකයේ අනෙක් කලාපයන්හි

සිනමා භාවිතාවන්ගෙන් පැහැදිලි ලෙස වෙන් වී අනන්‍යානුකූලව ඉස්මතු වීමටත් ඒ හරහා

ලොව පුරා විසිරී සිටිනා සංගීත ලෝලීන් විශාල වශයෙන් එම සිනමා භාවිතාව

වැළඳගැනීමටත් මඟ සලසා තිබෙනවා.

එමෙන්ම මගේ අත්දැකීමේ හැටියට සංගීත කර්මාන්තය තුළ බිහිවන නිර්මාණයන්හීදීත්

රූපණය සිනමාත්මකව යෙදවීම තුළින් සිනමාලෝලීන් විශාල වශයෙන් එම නිර්මාණයන්

කරා ආකර්ෂණය වීමට වටපිටාවක් සලසණු ලබනවා.

සංගීතය හෝ සිනමාව එකිනෙකින් වියුක්තව පවතිනවාට වඩා ප්‍රශස්ථ ආක්‍යානයක්

ඔස්සේ මනා සුනම්‍යකරණයක් සහිතව අතිච්චාදනය කරවීමෙන් වඩාත් සංවේදනාත්මක

මෙන්ම වඩාත් ප්‍රාසාංගික නිර්මාණයන් උපද්දවන්නට හැකියි.

Q). ඔබේ වෘත්තීය සංගීත ජීවිතය තුළ ලබාගත් සුවිශේෂී ජයග්‍රහණයන් පිළිබඳ

මතකාවර්ජනයක් සිදුකරමු.

A). සාම්ප්‍රදායික අයුරින් සභාගර්භයක් මද්‍යයෙන් පැමිණ ආලෝකමත් වේදිකාවක් මතදී

ලබාගන්නා ඇගයීම්වලින් ඔබ්බට ගිය ලාංකීය සංගීතය ජාත්‍යන්තරකරණයට

යොමුකරවන්නට සමර්ථ අන්දමේ වටිනා කඩඉම් සමූහයක් පසුකරලන්නට සමත්වීම

සම්බන්ධයෙන් මම නිහතමානී ආඩම්බරයකිනුත් විශාල ප්‍රමෝදයකිනුත් පසුවෙනවා.

" BBC Radio London " ගුවන්විදුලි නාළිකාවෙහි මා ඇතුළු තවත් හිතවත් දක්ෂ ගී

රචකයින්, සංගීත නිෂ්පාදකවරුන්, මෝස්තර නිර්මාණ ශිල්පීන්, නර්තන අංගරචකයින්,

කැමරා ශිල්පීන්, විශේෂ දෘශ්‍ය ප්‍රයෝග නිර්මාණශිල්පීන් හා අදියුරුවරුන් ඇතුළු

නිර්මාණශිල්පීන් කිහිපදෙනෙකුගේ වෑයමක් ලෙසින් නිපදවුණු ගීතයන් කිහිපයක් විකාශය

වීම මෙන්ම " youtube " අවකාශයේ එවන් නිර්මාණයන් කිහිපයක්ම ප්‍රේක්ෂකයන් විසින්

උත්කර්ෂයට නංවා තිබීම ගුණාත්මක හා ප්‍රාමාණාත්මක උදාහරණයන් ලෙසින්

දක්වන්නට පුළුවන්. ඇමරිකා එක්සත් ජනපදයේදී රංගනය පිළිබඳ වෘත්තීය පුහුණු

පාඨමාලාවක් හැදෑරීම සඳහා මා නිර්දේශ වීමට පවා එම ජයග්‍රහණයන් ශක්තිමත්

පිටුවහලක් උනා.

ඊට අමතරව ජාත්‍යන්තරව කීර්තිමත් සංගීත කර්මාන්තයේ නියැලෙන්නන් කිහිපදෙනෙකු

සමඟින් නිර්මාණකරණයේ යෙදීමට භාග්‍යය උදාවුනා. උදාහරණයක් ලෙස උතුරු ඉන්දීය

සංගීත හා සිනමා කර්මාන්තයේ ප්‍රමුඛතම ගායන ශිල්පියෙකු හා සංගීතවේදියෙකු වන "

ශාන් මුඛර්ජී " හා මා එක්ව සිදුකෙරූ යුග ගායනය " මෙරී සින්දගී " ගීතය පිළිබඳව සඳහන්

කරන්න පුළුවන්. එය මගේ පළමු හින්දි ගී නිර්මාණයයි.

ජාත්‍යන්තරව කීර්තියට පත් කලාශිල්පීන් සමූහයක් සමඟින් සිදුකෙරුණු රසවත්

නිර්මාණයන් ගොන්නක් ඉදිරියේදීත් ප්‍රේක්ෂකයන් වෙතට මුදාහැරීම සඳහා අවැසි සියළු

කටයුතු ඉතා සාර්ථකත්ව සිදුවෙමින් පවතින බව ඉතාමත්ම ප්‍රමෝදයෙන් යුතුව ප්‍රකාශ

කිරීමට කැමතියි. මං තරයේ විශ්වාස කරනවා ඒවා ලාංකීය ප්‍රේක්ෂකයන් මෙන්ම විදේශීය

ප්‍රේක්ෂකයනුත් ඉතාමත්ම ආදරෙන් වැළඳගනියි කියලා.

Q). තරුණ වෘත්තීය ගායන ශිල්පිනියක් ලෙස සංගීත කර්මාන්තය තුළින් ජාත්‍යන්තරය

ජයගැනීම කෙරෙහි ඇති ඔබේ අභිලාෂය මුදුන්පත්කරගැනීමේදී මුහුණදීමට සිදුවන

අභියෝගයන් හා ඒවා ජයගැනීම වෙනුවෙන් ක්‍රියාත්මක කරමින් සිටින සැලසුම් පිළිබඳව

කෙටි විග්‍රහයක් කරමු.

A). දේශීය සංගීත කර්මාන්තය අතික්‍රමණය කරමින් ජාත්‍යන්තර සංගීත කර්මාන්තයන්

වෙතට පියමැනීම පිළිබඳව මා දකින්නේ ඉතාමත්ම ධණාත්මක විභවයක් හැටියටයි. අපේ

මව්බිමේ ජනගහනය මිලියන 22 කට සීමාවෙනවා. එබැවින් ලෝකයේ වෙනත් කලාපයන්හි

සංගීත ලෝලීන්ද ආකර්ෂණය කොටගැනීමට සමර්ථ වූ රස නිෂ්පත්තීන් ජනිතකොට මනා

කළමනාකරණයකින් යුතුව ජනගත කළ හැකිනම් එතුළින් ශ්‍රී ලාංකීය නාමය

සම්භාවනාවට බඳුන් කිරීමට මෙන්ම මූල්‍ය අංශයේ විකසනයක් කරා මෙහෙයවීමට පවා

සම්භාවිතාවක් තියෙනවා. ලාංකීය සංගීත කර්මාන්තය හා ජාත්‍යන්තර සංගීත

කර්මාන්තය අතරේ ශක්තිමත් වෘත්තීය සබැඳියාවන් ඔප්නැංවීමටත් ඒ ඔස්සේ අවකාශය

සැලසෙනවා.

නමුත් මා මෙහිදී ගෙනහැර පෑ යුතු විශේෂ කාරණාවක් තියෙනවා. නිර්මාණකරුවන්

වශයෙන් අපි ආරම්භයේ පටන් අවසානය දක්වාම ප්‍රමුදිතව නිර්මාණකරණයේ

යෙදෙන්නට අත්‍යාවශ්‍යයි. අවසාන ප්‍රතිඵලයන් කෙරෙහි සාපේක්ෂ පුරෝකථනයන්

සිදුකරමින් නිර්මාණකරණයේදී කැපකිරීම් සිදුකිරීම මා දකින්නෙ අරුත්සුන් තීරණයක්

ලෙසයි.

සාපේක්ෂ පුරෝකථනයන්ගෙන් තොරව සාමූහික ප්‍රයත්නයක් වශයෙන් සිදුකෙරෙන

අවංක නිර්මාණ වෑයමකදී බොහෝ වටිනා දෑ පිළිබඳව අත්දැකීම් කේන්ද්‍රකොටගෙන

උගත හැකියි. එම ඉගෙනුම අනාගත ප්‍රශස්ථ නිර්මාණකරුවෙකු බිහිකරවීමේ වස්තු

බීජයන් උපද්දවන්නට සමර්ථ වෙනවා.

ඉහත කී පරිදි මම සාමාන්‍යයෙන් නිර්මාණකරණයේ යෙදෙන්නේ සාමුහිකවයි. එහිදී අපි

අතරෙ නිරන්තරයෙන් අදහස් හුවමාරු කෙරෙනවා. ඒ අතරින් සාමුහික එකඟතාවය

සපයාගන්නා ප්‍රශස්ථ අදහස් නිර්මාණයන් හට උපයෝගී කෙරෙනවා.

ජාත්‍යන්තර සංගීත වෙළඳපොළ කේන්ද්‍රකොටගෙන සිදුකෙරෙන නිෂ්පාදන කටයුත්තක්

සම්බන්ධයෙන්නම් ඉහත කී ක්‍රියාවලිය නිරවද්‍යභාවය සහිත සංඛයාත්මක තොරතුරු

විශ්ලේෂණයක් උපයෝගීකොටගනිමින් වඩාත් සෛද්දාන්තිකව සිදුකෙරෙනවා. නමුත් මගේ

අත්දැකීමේ හැටියටනම් ඒ සියළු උත්සාහයන්ගේ අවසන් ප්‍රතිඵලය හුදු ප්රේක්ෂක සංගීත

භාවිතාව මත තීරණය වනවා.

Q). සංගීත කර්මාන්තය තුළ ඔබ වර්ථමානයේ නිරත වී සිටින නිර්මාණාංගයන් හා

ඉදිරියේදී එළිදැක්වීමට සැලසුම් කරමින් සිටින නිර්මාණාංගයන් පිළිබඳව හෙළිදරව් කරමු.

A). මේ වනවිටදී සිනමා නිර්මාණයන් කිහිපයකම පසුභිම් සංගීතය සැපයීම වෙනුවෙන්

මගේ කාලය විඩංගු කෙරිලා තියෙනවා. ඒ නිර්මාණයන් ඉදිරියේදී ඒ සිනමා නිර්මාණයන්

සමඟින්ම මුදාහැරෙයි. එමෙන්ම ජාත්‍යන්තර සංගීත කර්මාන්තයන්හි වෘත්තීය ලෙසින්

නියැලෙන ප්‍රමුඛතම සංගීතවේදීන් කිහිපදෙනෙකු සමඟින් නිර්මාණය කෙරුණු නවමු

ආරයන්ගේ ගීතයන් කිහිපයක්ද එළිදැක්වීමට නියමිතව තියෙනවා. ඇත්තෙන්ම ඒවා

පොපියමින් තිබෙන යෞවනත්වය උදෙසාම වෙන් වේවි කියලා අපේක්ෂා කරනවා.

අවංකවම ප්‍රකාශ කළෝතින් මගේ සංගීත නිර්මාණයන් තුළ සිනමාත්මක රූපණය

හුවාදැක්වීම පිළිබඳ මම විශාල උනන්දුවක් දක්වනවා. මගේ දැනුමේ පරිද්දෙන් සංගීත

ඛන්ඩවලින් හා භාෂාවකින් නිරාවරණය කරගත නොහැකි මට්ටමේ ඇතැම් පරිකල්පනයන්

රූපණය තුළින් ද ප්‍රේක්ෂකයන් වෙත සම්ප්‍රේෂණය කළ හැකි වෙනවා. ඇමරිකා එක්සත්

ජනපදයේදී ලබාගත් වෘත්තීය රංගන පුහුණු පාඨමාලාව තුළින් ලත් සෛද්දාන්තික හා

ප්‍රාසාංගික ආභාශය මේ සඳහා බෙහෙවින්ම උපයෝගී කරගන්නවා.

Q). ඔබ ඇමරිකා එක්සත් ජනපදයේ වෘත්තීය රංගන පුහුණු පාඨමාලාවක් සාර්ථකව

නිමකර සිටින අයෙක් වශයෙන් ලාංකීය සිනමා කර්මාන්තය වෙනුවෙන් ඔබේ රංගන

ධායකත්වය සැපයීම සම්බන්ධයෙන් දරන අදහස පැහැදිලි කරමු.

A). මගේ රූපණ දක්ෂතාවයන් සාර්ථක ලෙසින් පිළිපිඹු කිරීමට ශඛ්‍යතාවයක් සහිත

ප්‍රශස්ථ පිටපතක් ලැබුණොත් නියත වශයෙන්ම ඒ පිළිබඳව පුර්ණ අවධානය

යොමුකරන්න බලාපොරොත්තු වෙනවා.

සැකසුම : හිරාන් ගමගේ

Namadgi

මිහිතලයේ බොහෝ පෙදෙස් හිමෙන් වැසෙනා සමයක, ඕස්ට්‍රේලියාව පසු කරන්නේ හරිම උණුසුම් ගිම්හාන සමයක්. විටින් විට හේල් අයිස් කුණාටුත්, අහස ගුගුරාගෙන වැසි බිම ඇද හැලුනත්, වා තලයට මුසුවී එන ඒ ග්‍රීෂ්මය මග හැරිය නොහැක්කක්.

කාලගුණයෙන් වෙන කුඩම්මාගේ සැලකිලි අමතක කරමින්, අපි උදෑසනම සුදානම් වුයේ සුන්දර ගමනාන්තයකට පිටත් වන්නට. ඒ කැන්බරා දකුණු දෙසටත් ,එක්  පසෙකින් නිව් සවුත් වේල්ස් හි කොසියස්කෝ (Kosciuszko) ජාතික වනෝද්‍යානයටත් මායිම්ව ඇති නමාගි (Namadgi) ජාතික වනෝද්‍යාන කඳුවැටිය දිසාවට. ඕස්ට්රේලියානු ජාතික උරුම ලැයිස්තුවේත් සඳහන්වී ඇති මෙම ස්ථානය බෙහෙවින් විශේෂ වන්නේ  අවුරුදු විසිදහසක් දක්වා අතීතයක ට නෑකම් කියන අබෝරිජිනල් ආදිවාසි පැවැත්මේ සලකුණු  නිසාවෙන් . ඔවුන්ගේ බසෙන් නමාගි යනු කඳු වැටියයි.

බොහෝ වරක්, එහි පිහිටා ඇති බෝබෝයාන් පාර අසලින් ගලාගෙන යන ගද්ගේන්බි (Gudgenby) ගං  ඉවුරේ කඳවුරු බැඳ තිබුණත්, ඉන් ඔබ්බට සැරි සරන්නට කාලයෙන් අවකාශය ලැබී තිබුනේ නෑ .එබැවින් අපේ චාරිකාවේ මුලික අරමුණ වුනේ, ඉන් ඔබ්බට ගොස්, නමාගි හි සැඟව ඇති සුන්දරත්වය සොයා යන්නට.

පැයක පමණ ගමනකින් පසු අප සේන්දු වුයේ බෝබෝයාන් පාර වෙතට. එතැන් පටන් තවත් පැයක් පමණ ගං ඉවුර දිගේ උඩු ගං  බලා වේගයෙන් රිය පදවන්නට පෙළඹුනේ,  අපි මින් පෙර ගොස් නැති ප්‍රදේශය වෙත ඉතා ඉක්මනින් ළඟා වීමට. නමුත් නොසිතු අයුරින් පෙරදා කඩා හැලුණු අනෝරා වැහි නිසාවෙන්  සපත්තු පාලම්  සියල්ලම පාහේ වතුර පිරී අපගේ වේගය අඩාල කරන්නට වුණා . දුරකථන සංඥා ගිලිහෙමින් අපට යා යුතු මග හරි හැටි සොයාගත නොහැකිව සිටින මොහොතක හිතට සතුටක් ගෙනදෙමින් අප ඉදිරියට ජීප් රථයකින් පැමිණියේ නමාගි වන නියාමකවරයෙක් (Forest ranger) වන මයිකල්. ඔහුගේ අදහස වුයේ  මෙම පාරේ තව කිලෝමීටර දහයක් පමණ උතුරු දෙසට ගමන් කලත් අපට වෙනස්  දසුනක් දැක ගත නොහැකි බවයි. එම නිසාවෙන් ඔහුගේ යෝජනාවට අනුව මද දුරක් ගමන් කොට අප ගොඩබට වුයේ ගුරැ පාරකට. 

ගුරු පාරේ තත්වය දුටු විට මද තිගැස්මක් ඇති වුවත්, අප වාහනයේ, ගියරය 4WD වෙත මාරු කරගත්තේ මේ පාරේ අනිවාර්යෙන්ම ඉදිරියට ගමන් කල යුතු බව පසක් කරමින් ඈතින් පිළිඹිඹු වන්නට ගත්  ස්වභාව ආශ්චර්යයෙන්. විශාල මඩ කඩිති , පාර හරහා ගලාගෙන යන දොලපහරවල් ආදී විවිධ බාධක හමුවුවත්, ඉන් ලැබුණු සුන්දරත්වය කියා නිම කල නොහැක්කක්. නිලට හුරු ,තැනිතලා තණපිටි වල තැනින් තැන ගුලි ගැහී සිටිනා ස්කොට්ලන්ත හයිලැන්ඩර්  වර්ගයේ ගවයින් දුටු විට අප සිටින්නේ බ්‍රිතාන්‍ය කඳුවැටියකදැයි නොහැඟුනාම නොවේ. පාර හරහා පැන යන ඉතා විශාල කැන්ගරුවන් නිසාවෙන් අප බොහෝ වෙලාවක් මග නවතා ගෙන සිටියේ, මේ ඔවුන්ගේ රජ දහන බව හොඳ හැටි පසක් කරගෙන සිටි නිසාවෙන්. මේ කඳු නිම්නයේ ගලා ගෙන එන සුළඟ, දසත පිපී ඇති ඕස්ට්‍රේලියාවට ආවේණික ව්‍යිවර්ණ කුඩා මල්, කැන්ගරුවන්, ලාමා සතුන් මා නැවතත් කුඩා කාලයට රැගෙන ගොස්,  එකල නැරඹු ස්විට්සර්ලන්ත කඳු නිම්නයේ ජීවත් වූ පුංචි හයිඩිගේ චිත්‍රපටිය මනස්කාන්ත කරවන්නට වුවා .

ගුරු පාර දිගේ බොහෝ දුරක් මේ සුන්දරත්වය නරඹමින් ඉදිරියට ඇදුන අපි, රැගෙන ආ ස්ට්‍රෝබෙරි ජෑම් තැවරු සැන්ඩ්විච්, බටර් සුවදැති වැනිලා කේක් ආහාරයට ගෙන නැවතත් නිවහන බලා යන්නට සුක්කානම කැරකවූයේ , අහස කළු කරමින් කඳු අතරින් ඇදී එන වැහි වලාව බිම පතිත වුවොත් මගදී හමුවූ දිය කඩිති පිටාර යාමෙන් මග අවහිර වන නිසා. නමුත් වන මායිමෙන් පිට වීමට පෙර සංචාරක මධ්‍යස්ථානයට ගොස්  නමාගි සම්පුර්ණ සිතියම ලබාගත්තේ, මයිකල් කියාදුන් පරිදි ප්‍රධාන මාර්ගයෙන් පිටට ගොස් මේ වන ලැහැබේ සොයා යන්නට  බෝහෝ ස්ථාන ඇති බව අද දින තහවුරු වුනු නිසාවෙන්.

තරුණකම හැකි ඉක්මනින් භාවිතා කරමු!

තාරුණ්‍යය ජීවිතයේ සුන්දරතම වගේම අභියෝගාත්මක අවධියයි. ඒ සුන්දරත්වයට අපි සියලුම දෙනා ආශා කරන අතර ඒ කාලයේ අසිරියවිඳින්නට අපි සියලුම දෙනා තුළ පවතින්නේ දැඩි කැමැත්තක්.මනෝවිද්‍යාත්මකව තරුණ විය හදුන්වන්නේ ජිවිතයේ හැඟීම්බරතමකාල සීමාව ලෙසයි. ජිවිතය පිළිබඳ අත්දැකීම් ලබන්නට පෙරුම් පුරන අවධියේ දී තරුණ තරුණියන් ලෙස ජීවිතය හමුවේ අභියෝග රැසක්‌ පවතී. ඔබ ඔබේ ජීවිතය හමුවේ එන අභියෝග වලට සාර්ථකව මුහුණ දීමට නව යොවුන් වියට එළඹෙද්දීම සූදානම් විය යුතුයි. කායිකව හා මානසිකව වැඩි ශක්තියක් පවතින කාලයේ දී මේ ජවය, ශක්‌තිය යොදා ගනිමින් අලුත් අලුත් දේ කරන්නට සිතෙන, නව නිපැයුම් අත් හදාබැලීමට යොමුවන කාලයයි. සාම්ප්‍රදායික මත වාද පිලිබද නොතකමින්යමින් අලුත් මතවාදයන් සමඟ උරෙන් උර ගැටෙමින් මේ කාල සමයේ දී තරුණ ඔබ ඔබේ ජීවිතය හමුවේ පවතින අභියෝග හදුනා ගත යුතු අතර ඒ සඳහා සාර්ථවක මුහුණ දීම ද අත්‍යාවශ්‍යයි. මෙසේසාර්ථකත්වයට යෑමට නව යොවුන් විය පටන් ගැන්මේ පටන්ම ඒ සදහාසූදානම් වීම අවශ්‍යයි.

දැන් අපි බලමු මේ අභියෝග හදුනාගන්නේ කොහොමද කියලා.තාරුණ්‍ය කිනේනේ හැඟීම්, සිතුම් පැතුම් වර්ධනය වන කාල වකවානුවකි. ආදරය, රාගය වැනි තාරුණ්‍ය හා බැඳී පවතින හැඟීම් ඇති වන්නේත් වර්ධනය වන්නේත් මේ කාලය තුළයි. තරුණ තරුණියන් බොහෝ පිරිසකට තමන්ට තමන්වත් තේරුම් ගැනීමට නොහැකි වන ආකාරයට ජීවිතයේ වෙනස්‌කම් රැසක්‌ සිදුවන අවධියකි. එසේමනොයෙකුත් දෑ අත් හදා බැලීමට පෙලඹෙන්නේද මේ කාල සීමාවතුළය. එම වෙනස්‌කම් නිවැරදිව හදුනා ගතයුතුයි. තමන්ට තමන්වහදුනා ගැනීමට අතපසු වීම මේ අවධියේ තරුණ ඔබ හමුවේ පවතින සුවිශේෂම අභියෝගයකි. තාරුණ්‍යයේ පසුවන ඔබේ සිතුවිලි විවිධාකාරයි. ඒ හැඟීම් තේරුම් ගන්නට නොහැකි තරම් ඔබේ සිතුවිලි චංචලයි. මෙය වැඩිහිටියන් මෙන්ම ජීවිත ගමනට සැරසෙන ඔබත්අත්‍යවශ්‍යයෙන්ම හදුනාගත යුතුමයි. 

හැඟීම් වලට වහල් වී ජීවිතය ජය ගන්නට උත්සාහ දරන ඔබට ජීවිතයේ යථාර්ථය නොපෙනී යන කාල වකවානුවකි. තාරුණ්‍යයේ තියෙන සුන්දරත්වය රැක ගැනීමට ඔබම උත්සාහ ගත යුතුයි. හැඟීම් සමඟ ඇති වන මානසික අරගලය නිසා ඔබට නොදැනීම ඔබේ ජීවිතයේ විවිධ වෙනස්‌ වීම් ඇතිවිය හැකියි. නමුත් මේ මානසික අරගලය නිසා ඔබේ ජිවිතය අතරමං කරගන්න එපා. මෙහිදී හදවතටමූලිකත්වය නොදී බුද්ධිය ක්‍රියාත්මක කලයුතුයි. ජීවිතයේ සුන්දරතම කාලවකවානුව එනම් තාරුණ්‍යයේ දී ඔබේ ජීවිතයේ සුන්දරත්වය විඳින්න. එය ඔබේ ජීවිතයේ සාර්ථක ඉදිරි ගමනට මඟ පාදනු ඇත. 

බොහෝ විට තරුණ අවධියේ හැඟීම් වල සිදුවන වෙනසත් සමඟම ඔබට දෙමාපියන්, ඥතීන් සමඟ තම ආශාවන් සහ අවශ්‍යතාවන් ඉටු කර ගැනීම අපහසු වේ. ඒ නිසාම නිතර නිතර ගැටුම් ඇති කර ගනී. තාරුණයේ පසුවන ඔබේ හැඟීම් නිතර නිතර ඒ මේ අත ගමන් කරන නිසාම බුද්ධියට කලින් හිත ඉක්‌මන් වන අවස්‌ථා බොහොමයි. ඒ පිළිබඳ ඔබ සැලකිලිමත් විය යුතුයි. 

සම වයසේ පසුවන ඔබේ මිතුරන් සමඟ ඇසුරුකම් පැවැත්වීමේ දී ඔබට ඒ ගැන අවබෝධයක්‌ පැවතිය යුතුයි. සම වයස්‌ කණ්‌ඩායම් හා ඇසුරු කිරීමේ දි විශේෂයෙන් ඒ අයගෙන් ඇතිවන විවිධ බලපෑම් වලට හසු නොවී ඔබේ අරමුණු කරා ගමන් කළ යුතුයි. කුඩා අවධියේ සිටමඅරමුණු ගොඩ නගා ගනිමින් ඒ අරමුණු ජය ගැනීමට වෙහෙසෙන සිහින දකින ඔබ කිසි විටකවත් කුමන හේතුවක්‌ නිසාවත් ඔබේ අරමුණ අමතක නොකර ගතයුතුයි. එසේ වුවහොත් කවදා හෝ දිනක ඔබට ඔබේ ජීවිතය ගැනම විශාල කලකිරීමක්‌ හට ගනී. තාරුණ්‍යයේ ඔබේ ජීවිතය සුන්දරව විඳිය යුතුයි මිස විඳවිය යුතු නොවේ. 

තවද මෙම සමාජ අත්දැකීම් සාර්ථක ජිවිතයකට පාර කියා දේ. සමාජය තුළ ඒ ඒ කාල වලට විවිධ සමාජ රැලි ගොඩ නැගේ. ඒවායන්පළමුවෙන්ම බිල්ලට හසුවන්නේ ඔබේ ජීවිතයයි. එය බොහොමයක්‌ තරුණ ජීවිත වලට අමතක වී ගොස්‌ ඇත. තාරුණ්‍යයේ පසුවනබොහෝ දෙනෙක්‌ විවිධ සමාජ රැලි වලට හසු වනතුරුම දන්නේ නැති තරම්. විවිධ වාණිජ්‍ය උපක්‍රම වලට හසු වී තරුණ ඔබේ ජීවිත අතරමං නොකර ගෙන සැබෑ තාරුණ්‍ය ජිවිතයේ සුන්දරත්වය විඳින්න. වාණජ්‍යඋපක්‍රම වලට හසු වී විවිධ අත්හදා බැලීම් සිදු කරන්නට පෙළඹෙන්නඑපා. තරුණ හිත් බොහෝ සෙයින් සංවේදී නිසාම ඒම සංවේදී බවින් ප්‍රයෝජන ගැනීමට බොහෝ දෙනෙක්‌ පෙළ ගැසී ඔබ දෙස බලා සිටිනවා. ඔබේ ජීවිතය ඔවුන්ගේ අරමුණු ඉටු කර ගැනීම සඳහා බිලි නොදෙන්න. ඔබම ඔබේ ජීවිතය ආරක්‌ෂා කරගන්න වෙහෙස ගන්න. සියලුම දේ වාණජ්‍යකරණය වු මේ සමාජයේ ඔබේ තරුණ වියත් විකිණීමට ලක්‌ කරන්න එපා. 

ආකර්ශනය පසුපස හබා යන්නට වෙර දරන තාරුණ සමයේ දි ඔබේ සිතින් බොහෝ දේ ගිලිහී යා හැකියි. බාහිර ආකර්ශනයෙන් පමණක්‌ සිතුවිලි පුරවා නොගන්න. ජීවිතයේ යථාර්ථය අවබෝධ කර ගනිමින් ඉදිරියට ගමන් කරන්නට උත්සාහ ගන්න. තරුණ ඔබ සතුව විවිධ කුසලතා රාශියක්‌ සැඟවී තිබෙනවා. ඔබ ඒ හැකියාවන් හදුනා ගත යුතුයි. හැකියාවන් ඔස්‌සේ ඉදිරියට ගමන් කිරීමට වෙහෙස ගන්න. එය ඔබට ඔබේ ජිවිතයේ සැබෑ මඟ කියා දේවි. විලාසිතා තරුණ ඔබේ ජීවිතයට අවශ්‍යයි. ඒ තුළින් ගොඩ නගා ගන්නා ආකර්ශනය ද ඔබේ තුරුණු වියට අවශ්‍යම බව සැබෑවක්‌. නමුත් විලාසිතා මුවාවෙන් එන විවිධ රැවටීම් වලට හසු නොවන්න. 

තරුණ වියට එළබෙත්ම ඉගෙනුමට මෙන්ම ජිවිතයේ අභියෝග ජයගන්න ඔබම සැලසුම් සකසා ගත යුතුයි. ඒ පිළිබඳ දැනුවත් විය යුතුයි. ඒ දැනුම ඔබට ලබා ගත හැකි වන්නේ පාසලකින්වත් කිසිදු පාඨමාලාවක්‌ හදාරාවත් නොවේ. පොතපතේ දැනුමට ඒහා ගිය සමාජ දැන්මකින් ඔබ පෝෂණය විය යුතුයි. විවෘත මනසකින් සමාජය දෙස බැලිය යුතුයි. එසේ වුවහොත් ඔබට සමාජ රැල්ලට හසු නොවී ජීවිතයේ අභියෝග වලට සාර්ථකව මුහුණ දීමට හැකිවනු ඇත. හැමදාමත්හැමදෙයකින්ම ජිවිතය ගැන පාඩම ඉගෙන ගතයුතුයි. සමාජ දැනුමෙන් තරුණ ඔබ සන්සද්ධ විය යුතුයි. 

තමන්ගේ හැකියාවන් හදුනාගන්න. ඔබ සියලුම දෙනා සතුවම ඕනෑම අභියෝගයක්‌ ජය ගැනීමේ ස්‌භාවික ශක්‌තිය පවතිනවා. එය තමා විසින්ම කතමන්ගේ ජීවිතයෙන් මතු කර ගත යුතුයි. තමන් සතු කුසලතාවන් හදුනා ගෙන එම කුසලතාවන් දියුණු කර ගත යුතුයි. ඔබේ ජීවිතයේ ඔබ හමුවේ පවතින අභියෝග ජය ගන්න නිවැරදි තීරණ ගත යුතුයි. තරුණ ඔබ විශේ ෂයෙන්ම අන් අයගේ මත වලට ඇහුම්කම් දිය යුතුයි. තරුණ ඔබේ ජීවිතය හමුවේ ඇති අභියෝග ජයගන්න තමා සතු ආත්ම විශ්වාසය ශ පෞර්ෂය නංවා ගැනීම වඩා වැදගත්.

වෛද්‍ය චන්ද්‍රිකා රාජපක්ෂ

Doctor of Ayurveda| Motivational Speaker| Counsellor

M. Sc., BAMS, B. Sc., CCHRM

UK වල work කරන ලාංකිය ඔබ තමන්ගෙම නිවසක් මිලදි ගන්න සුදානම්ද?

UK වල work කරන ලාංකිය ඔබ තමන්ගෙම නිවසක් මිලදි ගන්න සුදානම්ද?

ලංකාවේ ඉඳන් uk ආව කට්ටිය අපෙන් අහන ප්‍රශ්නයක් තමයි skilled worker වීසා ඉන්න ගමන් Mortgage එකකට  යන්න පුළුවන්ද කියලා. Skilled worker visa එකක් අරන් ආව අය ගොඩක් වෙලාවට කල්පනා කරනවා Rent එකට private tenant කෙනෙක් විදියට ඉන්නවද නැත්නම් Mortgage එකක් දාලා ගෙදරක් සල්ලි දීලා ගන්නවද කියලා.

ගොඩක් අය හිතන් ඉන්නවා Skilled worker visa එකක ඉන්න කෙනෙක්ට Mortgage එකක් ගන්න අවුරුදු පහක්වත් අඩු ගානෙ uk ඉන්න ඕනි කියලා. ඒත් ඇත්තම තත්ත්වය එහෙම නෙවෙයි. ඔයා uk වලට ඇවිල්ලා මාස හයක් නැත්නම් මාස 12ක් මෙහේ ජීවත් වුණාට පස්සේ වුණත් Mortgage එකකින් ගෙදරක් ගන්න දැන් අවස්ථාව තියෙනවා.

1. Skilled worker visa එකක ඉන්න කෙනෙක්ට කොච්චරක විතර deposit එකක් ඕනි වෙනවද mortgage එකකින් ගෙදරක් ගන්න?

ගොඩක් හොඳ ප්‍රශ්නයක්! කෙටියෙන්ම උත්තරයක් දුන්නොත්, සමහර lenders ලා එක්ක 5% deposit එකකින් හරි නැත්තං 10% deposit එකකින් හරි පවා ගෙදරක් ඔයාලට ගන්න පුළුවන් Mortgage කරලා. ඒ වගේ පොඩි deposit එකකින් ගෙදරක් ගන්න නං lenders ලගෙ තියෙනවා Lending Criteria. එහෙම criteria වලට qualify වෙන්න ඕන. අනිත් option එක තමයි ඔයාලට 25% වගේ Deposit එකක් දාන්න පුලුවන්නම් Mortgage එකකට apply කරන්න පුළුවන්.

2. කොච්චරක විතර credit score එකක් තියෙන්න ඕනිද Skilled Worker Visa එකක ඉන්න ගමන් Mortgage එකකට apply කරගන්න?

ගොඩක් lendersලගෙ තියෙනවා internal credit score card කියලා එකක්. Mortgage එකේ අපි පලවෙනිම අදියර වශයෙන් applicentsලගේ  credit score එක Internal Score Card එකට වඩා වැඩි නම් Mortgage එකට decision in principle (DIP) එකක් ලබාගන්න පුළුවන්. 

3. Mortgage එකක් ගන්න ඕන කරන minimum income requirement එකක් තියෙනවද skilled worker visa ඉන්න කෙනෙක්ට?

මේක තීරණය වෙන්නේ තොරාගන්න lender අනුව සහ applicants ලට පුළුවන් ඩිපෝසිට් එක අනුව. උදාහරණයක් විදිහට ගත්තොත්, ඔයා යන lender, minimum income එක විදිහට £75,000 – £100,000 ඉල්ලනවා නම් එතකොට ඔයාට පොඩි ඩිපෝසෙට් එකක් දාලා වුණත් Mortgage එකක් ගන්න පුළුවන්. ඒ වගේම තවත් lenders ඉන්නවා. එහෙම Minimum income requirement එකක් ගැන බලන්නේ නැති.

4. Skilled Worker Visa එකේ remaining time එක mortgage එකකට apply කරද්දී බලපානවද?

ගොඩක් lenders ල visa එකේ 6 months remaining තියෙනවද කියලා බලනවා. ඒ වගේම සමහර lenders ඉන්නවා එයාලට specific මාස ගානක් තියෙන්න ඕන condition එකක් නැහැ. ඒවගේ lenders බලන්නේ applicant වීසා එක renew කරගන්න තියෙන possibility එක.

5. skilled worker visa එකක ඉන්න කෙනෙක්ට Mortgage එකක් අරගෙන ගෙදරක් ගන්න mortgage broker කෙනෙක් කොහොමද උදව් කරන්නේ?

Skilled worker visa mortgage ගැන specialist mortgage broker කෙනෙක්ට පුළුවන් applicant ගෙ information දිහා බලලා හරියටම ගැලපෙන lender කවුද කියලා තීරණයක් ගන්න. ඊට අමතරව mortgage application එක submit කරන වෙලාවෙ ඉඳන් home purchase completion මොහොත දක්වාඋදව් කරන්න පුළුවන්. 

At WIS Mortgages, we don’t charge any broker fees. Our services are remunerated by the lender. WIS is a national award winning mortgage intermediary (Winner- What Mortgage Awards 2023 up to 39 advisers) We are renowned for our exceptional customer service and whole of market mortgage advice!

As a mortgage is secured against your home or property, it may be repossessed if you do not keep up the mortgage repayments.

Website- www.wismortgages.co.uk

Email- help@wismortgages.co.uk

Phone- 02030111986

Book an appointment now- https://go.oncehub.com/Anoj

Offices- Ashford Kent, Dorking Surrey, Chelmsford, London

2024-Feb-26

චාල්ස් රජුගේ පිළිකාව සහ එක්සත් රාජධානියේ මහජන සෞඛ්‍ය 

බ්‍රිතාන්‍යයේ III වන චාල්ස් රජතුමාට පිළිකාවක් වැලඳී ඇති බව වාර්තා වීමත් සමඟ එක්සත් රාජධානියේ ජනතාව මහත් කැළඹීමට පත් උනා. පිළිකාව පිළිබඳව ජනතාව තුල පවතින අසුභ අදහස් සහ අත්දැකීම් එක්ක මේ පුවත බ්‍රිතාන්‍යයේ ජනතාවට මෙන්ම ලොව පුරා වෙසෙන රාජකීය පවුලට ආදරය කරන හැමෝටමත් ඉතා කණගාටුවක් ඇති කරන සිදුවීමක් උනා.

රජතුමා ගැන පමණක් නොව බ්‍රිතාන්‍යය රාජකීය පවුලේ සාමාජිකයන් කිහිප දෙනෙකු පිලිබඳවම පසුගිය දින වල කණගාටුදායක පුවත් අසන්න ලැබුනි. ඒ අතරින් පළමු පුවත ලෙස කේට් කුමරිය බරපතල සැත්කමකට මුහුණ දුන් බවත් ඒ හේතුවෙන් ඇය මාස කිහිපයක් රාජකාරි වලින් බැහැරව විවේක ලබන බවත් බ්‍රිතාන්‍යය මාධ්‍ය වාර්තා කර තිබුනා. එදිනම පස්වරුවේ බකිංහැම් මාලිගය නිවේදනයක් නිකුත් කරමින් III වන චාල්ස් රජතුමන් “පුරස්ථි ග්‍රන්ති විශාල වීමේ” රෝගයකට ප්‍රතිකාර ලැබීමට නියමිත බැවින් සති කිහිපයක් නිළ රාජකාරි වලින් ඉවත් වන බව ප්‍රකාශ කලා. තවත් දින කිහිපයකට පසුව යෝර්ක් හී ආදිපාදවර සාරා කුමරියට දෙවන වරටත් පිළිකාවක් වැලඳී ඇති බව බ්‍රිතාන්‍යයේ මාධ්‍ය රැසක් වාර්තා පලකර තිබුනා.

ඒ සියළු සිදුවීම් වලින් අනතුරුව චාල්ස් රජතුමාටද පිළිකාවක් වැලඳී ඇති බව බකිංහැම් මාලිගය නිවේදනයක් නිකුත් කර තිබූ අතර ලියුම්කරු මෙම සටහන තබන අවස්ථාව වන විටත් එය කුමන වර්ගයේ පිළිකාවක්ද යන්න හෝ එය කුමන මට්ටමේ පවතීද යන්න අනාවරණය කර නොතිබූ අතර රජතුමන් පිළිකාව සඳහා අවශ්‍ය මූලික ප්‍රතිකාර ආරම්භ කර තිබුනි. කෙසේ වෙතත් රජු තමන් සුව වීම පිලිබඳව බලාපොරොත්තුවෙන් සහ ධනාත්මකව සිටින බව ප්‍රකාශ කර තිබූ අතර වෛද්‍ය උපදෙස් ලැබෙන්නේ නම් මිස ව්‍යවස්ථාපිත රාජකාරි පවා සිදුකරගෙන යාමට අදහස් කරගෙන සිටින බව නිවේදනය කර තිබුනි.

රජුගේ රෝගී තත්වය අනාවරණය වීමත් සමඟ බ්‍රිතාන්‍යයේ පිළිකා රෝගය පිළිබඳව නැවත කතාබහක් ඇතිවී ඇති අතර රජුගේ රෝගී තත්වය පිලිබඳව නිළ නිවේදනයක් නිකුත් කරමින් මහජනතාව දැනුවත් කිරීමේ බලාපොරොත්තුව වී ඇත්තේද අවධානම් සහිත පුද්ගලයන් ස්වෙච්ඡාවෙන් ඉදිරිපත්වී පිළිකා පිලිබඳව පරික්ෂා කරගැනීමට උනන්දු කිරීම වේ. සාමාන්‍යයෙන් රජුගේ සෞඛ්‍ය ගැටළු පිලිබඳව අනාවරණය නොකරන අතර එහෙත් චාල්ස් රජතුමා නිතරම සිය සෞඛ්‍ය ගැටළු පිලිබඳව මහජනයාට දැනුම් දෙමින් ජනතාව සෞඛ්‍ය පරික්ෂාවන් හා ප්‍රථිකාර කෙරෙහි උනන්දු කරවීමට කටයුතු කරයි.

බ්‍රිතාන්‍යය රජයේ සෞඛ්‍ය සේවයේ දත්තයක්ට අනුව එරට ජනගහනයෙන් සෑම පුද්ගලයන් දෙදෙනෙකුගෙන්ම එක් අයෙක් සිය ජීවිත කාලය තුලදී පිළිකාවට මුහුණ දිය හැකි වේ. NHS වෙබ් අඩවියට අනුව මේ වන විට බ්‍රිතාන්‍යයේ පිළිකා වර්ග 200 කි පමණ හඳුනාගෙන ඇති අතර ඒ අතරින් වඩාත් සුලභ ඒවා ලෙස පියයුරු, පෙනහළු, පුරස්ථි ග්‍රන්ථිය සහ බඩවැල් ආශ්‍රිත පිළිකා හඳුනාගෙන ඇත.

රජුගේ පුරස්ථි ග්‍රන්ති විශාල විමේ රෝගයට ප්‍රතිකාර කරන අතර තුර සිදුකල පරීක්ෂණ වල ප්‍රථිපලයක් ලෙස ඔහුට වැලඳී ඇති පිළිකා තත්වය හඳුනා ගෙන ඇති අතර බ්‍රිතාන්‍යයේදී බොහෝ පිළිකා රෝගීන් හඳුනා ගන්නේ එසේ වෙනත් රෝගයක් සඳහා ප්‍රථිකාර කරන අතරතුරදී වීම විශේෂත්වයක් වේ. එලෙස වෙනත් ප්‍රථිකාර මැද හඳුනා ගන්නා රෝගීන් සංඛාව මුළු පිළිකා රෝගීන්ගෙන් පහෙන් එකක් පමණ වේ. පසුගිය මාස 12ට පමණක් වෙනත් රෝගයක් සඳහා ප්‍රතිකාර කරන අතර තුර හඳුනා ගත් රෝගීන්ගේ සංඛාව 66,000 පමණ වේ.

තත්වය එසේ උවද බ්‍රිතාන්‍යයේදී පිළිකාවක් වැලඳී ඇතැයි හඳුනාගන්නා මහජනතාව මුහුණ දෙන තත්වය රජු මුහුණ දෙන තත්වයට වඩා වෙනස් වේ. චාල්ස් රජුගේ රෝගය සඳහා හඳුනාගත් වහාම ප්‍රථිකාර ආරම්භ කලද සාමාන්‍ය ජනතාවට සැලකිය යුතු කාලයක් ප්‍රථිකාර ලැබීම සඳහා බලා සිටීමට සිදුවේ. පිළිකාවක් හඳුනා ගන්නා රෝගියෙකුට දින 62 ක් ඇතුලත ප්‍රථිකාර ආරම්භ කිරීම NHS හී ඉලක්කය උවද පසුගිය වසරේ පිළිකා ලෙස හඳුනාගත් සෑම රෝගීන් හතර දෙනෙකුගෙන්ම එක් අයෙක් ඊට වඩා වැඩි දින ගණනක් ප්‍රථිකාර ලැබීම සඳහා පොරොත්තු ලේඛන වල කල්ගත කර ඇත.

පසුගිය දශකයක පමණ කාලය තුළ පොරොත්තු ලේඛන වල ගතකරන කාලය ක්‍රමයෙන් දිගු වී ඇත. එයට හේතුව ලෙස සෞඛ්‍ය සේවක හිඟය, උපකරණ හිඟය සහ රජය ප්‍රමාණවත් ලෙස ඒ වෙත දිගුකාලීනව ආයෝජනය නොකිරීම වැනි දෑ දැක්විය හැක. උදාහරණයක් ලෙස ජර්මනියට සාපේක්ෂව බ්‍රිතාන්‍යයේ පවතින පිළිකා හඳුනා ගත හැකි ස්කෑන් යන්ත්‍ර සංඛාව හතර ගුණයකින් අඩුය. මේ හේතුවෙන් බ්‍රිතාන්‍යයේදී උවද එකම රෝගයක්  සම්බන්ධයෙන් උවත් මහජනතාව මුහුණ දෙන තත්වය රජු මුහුණ දෙන තත්වයට වඩා සම්පූර්ණයෙන්ම වෙනස් වේ.

තිලාන් ජයසේකර 

Vision

ඔයාගෙ Vision එක මොකද්ද ?

කියලා අපේ තරුණ පරම්පරාවෙන්,නිකමට ඇහුවොත් බහුතරයක්‌ ළඟ උත්තර නැහැ.🤔

තාරුණ්‍යට ඔන්න මෙන්න කියන පාසල් යන දරුවෙකුගෙන් ඇහුවොත් වැඩිහිටියෙක් උනහම මොකද කරන්න කැමති කියලා තාමත් බහුතරයකගේ උත්තර අර කටට එන පළියට ඔහේ කියවන , දොස්තර , ගුරු , ඉංජිනේරු , තනතුරු විතරයි .ඊට පස්සේ උසස් පෙළ ඉවර උන තරුණයෙක්ගෙන් ඔය ප්‍රශ්නෙම ඇහුවොත් කෝස් එකක් කරනවා පස්සේ ජොබ් එකක් හොයාගන්නවා ඕකයි උත්තරේ .

උත්තරේ විතරක් නෙමෙයි අන්තිමට විස්තරේ වෙන්නෙත් ඕකම තමයි.

අන්න ඒක නිසා තමයි එක දවසට සිය ගානක් ව්‍යාපාර අළුතෙන් ලියාපදිංචි වෙනකොට ඒ වගේ දෙතුන් ගුණයක් වැහිලා යන්නේ.හේතුව නිවැරදි vision එකක් එහෙමත් නැත්තම් දැක්මක් නැති කම. 😔

තාරුණ්‍යය එළිපත්තට එනකොටම කෙනෙකුට ජීවිත අරමුණක් තියෙන්න ඕනේ , තමන් අවුරුදු 20 කින් ලඟා කලයුතු දේ , අවුරුදු 30කින් ලඟා කල යුතු දේ ගැන දැක්මක් තියෙන්න ඕනේ , 

ඒ මූලික අරමුණු වලට අඩියෙන් අඩිය යන හැටි ගැන  ප්ලෑන් එකක් ඔළුවේ තියෙන්න ඕනේ , 

සමහරවිට යම් යම් කාරණා නිසා , ක්‍රමවේදය අතරමගදී වෙනස් කරන්න වෙයි ,මොකද අපි හිතන පතන හැමදේම ඒ විදිහටම සිද්ධ වෙන්නෙ නැහැ.

හැබැයි vision එකයි flexibility එකයි තියන කෙනෙකුට තමන්ගේ අවසාන අරමුණට යනව කියන එක මහ කජ්ජක් නෙමෙයි.

එහෙම තමන්ටම කියලා vision එකක් නැතුව,අල්ලපු ගෙදර කෙනා සුපර් ස්ටාර් ගිහින් ජීවිතේ ගොඩ දා ගත්තා කියලා බැරි බැරි ගාතේ ඔයත් සින්දු කියන්න පටන් ගත්තොත් ඒකෙන් වෙන්නෙ  සමාජයට විහිළුවක් වෙන එක විතරයි , නැන්දගේ දුව , සැලුන් එකක් දැම්මා කියලා ඔයත් සැලුන් එකක්ම දාන්න ඕනෙ කියලා නීතියක් නැහැ , අරයා මෙයා කරන දේවල් අද දැකලා පට ගාලා කිසිම අරමුණක් දැක්මක් නැතුව ඔයත් හෙට ඒක කරන්න පටන් ගත්තට කවදාවත් , ජීවිතේ දිනන්න බැහැ , රැල්ලට යන මිනිස්සු හරි ඉක්මනට ආයෙත් වැල්ලට ගොඩ ගහනවා , ඒ නිසා කරන්නන් වාලේ ජීවිතේට අරමුණු එකතු කර ගැනීම කියන්නේ තනිකරම විහින්  නාස්ති වීමක් විතරමයි , 

හැමදේටම කලින් තමන්ව ඇනලයිස් කරන්න , තමන්ට පුළුවන් දේවල් , තමන්ගේ හැකියා , දක්ෂතා , කැමැත්ත තේරුම් ගන්න , ඒත් එක්කම තමන් ළඟ තියන ශක්තීන් එක්ක ලෝකෙ තියන අලුත්ම ත්‍රෙන්ඩ් එක්ක ජීවිතේට වෙනස්ම අරමුණක් එකතු කරගන්න , ඒ අරමුණට අඩියෙන් අඩිය යන විදිහ ප්ලෑන් කරන්න , ඒ ගැන වැඩිපුර ඉගනගන්න , දැනුම එකතු කරගන්න , අත්දැකීම් හොයාගන්න ,හතු පිපෙන වේගෙන්ම පරවෙනවා , ඒ නිසා හදිස්සි වෙන්න එපා , අරමුණ පැහැදිලියි නම් , දැනුමෙන් හැකියාවෙන් ඔබ සන්නද්ධ නම් , ඔබට නිවැරදි දැක්මක් තියනවනම් , ආත්මවිශ්වාසයයි උවමනාවයි තියනවනම් හිමින් හිමින් හරි ගමන යන්න පටන් ගන්න , ඔබට දවසක නොවැරදීම ඔබේ දැක්ම දකින්න ලබෙනාවමයි .

දියුණු රටවල , පාසල් විශ්වවිද්‍යාලවල අනිත් විෂයයන් වගේම , ජීවිතේ දැක්ම ප්ලෑන් කරගන්න විදිහත් රටේ අනාගත පරම්පරාවට උගන්වනවා , ඉතින් අපේ දරුවෝ උපාධිය ඉවරවෙලා , රජයෙන් ඉල්ල ඉල්ලා   පිටකොටුවෙ පිකටින් කරන වෙලාවෙ අවුරුදු 18 , 19 වෙච්ච පිටරට දරුවෝ නාසා එකට උපදෙස් දෙනවා , තනියම රොකට් හදනවා , අලුත් app හොයාගන්නවා , නව නිර්මාණ , නව ව්‍යාපාර නිර්මාණ කරනවා , රොබෝ වරු හදනවා , ඒ වෙනසට හේතුව ආර්ථික හයිය විතරක්ම නෙමෙයි ,

ඒ අය ජීවිතේ අහුවෙන අහුවෙන් කොන් වලින් අල්ලගන්නේ නැහැ , පොඩි කාලෙම ජීවිතේට දැක්මක් ප්ලෑන් එකක් හදාගෙන ඒ ඔස්සේ ගමන් කරනවා .

යන්න පාරක් නැති අපේ තරුණ පරම්පරාව අහුවෙන අහුවෙන් තැන්වල නවතිනවා , දවසයි දෙකයි ආයෙත් අලුත් දෙයක් කරන්න ගන්නවා , ඒක බැහැ කියලා හිතුන ගමන් වෙන දෙයක් පටන් ගන්නවා , ඒකත් එපා උනහම වෙන අලුත් දෙයක් කරන්න ගන්නවා .අන්තිමට ජීවිතේ බාගයක් විතර ගිහින් කියලා තෙරුනහම වෙන කාගෙ හරි අරමුණු වල ඉත්තෝ වෙලා කාගේ හරි ළඟ මාස් පඩියට වැඩ කරන්න පටන් ගන්නවා .ඔන්න ඕකයි වෙන්නෙ ..

”අළුත් අළුත් දේ නොනගන ජාතිය නොනැගෙත් ” කියලා කියන්නෙ දවසින් දවස අලුත් අලුත් දේවල් කරන්න කියන එක නෙමෙයි , කවුරුවත් නොකරපු සීමාවන් වලින් හිතලා නිවැරදිව ප්ලෑන් කරලා දැක්මක් ඇතුව නව්‍යතා වලට නොයන ජාතිය දිනන්නේ නැහැ කියන එකයි .

රටේ අනාගතය බාරගන්න ඉන්න තරුණ පරම්පරාවට දැක්මක් තිබ්බොත් විතරයි රටට දැක්මක් තියෙන්නෙ , රටට දැක්මක් තිබ්බොත් විතරයි ඊළඟ පරම්පරාවට අරමුණක් තියෙන්නෙ , අරමුණක් නැති ජාතියක් කියන්නෙ හරියට මැටි ගොඩක් වගේ , හැමෝම ඇවිත්  හිතේ හැටියට මිරික මිරික තමන්ට ඕන දෙයක් හදාගන්න පටන් ගන්නවා , ඒකෙන් වෙන්නෙ රටම ජාතියම වැඩකට නැතිඇල්මැරුණු පඹයෝ ගානට වැටෙන එක විතරයි .දැන් වෙලා තියෙන්නෙත් ඒකම තමයි.

අද කෙසේ වෙතත් හෙට දවසේ වෙනසක් වෙන්න හරි,

පුද්ගලයෙක් , ගමක් , රටක් , ජාතියක් විදිහට කොන්දක් ඇතුව නැගිටින්න නම් , මුලින්ම තරුණ පරම්පාරව නියෝජනය කරන හැමෝම තමාට අවේණික වුන නිවැරදි දැක්මක් , අරමුණක් , විෂන් එකක් හදාගන්න ඕනේ, වෙන වෙන බහුබූත පාසේ නොයා ඒ දැක්ම පස්සෙ හඹාගෙන යන්න ඕනේ.

ඔබ‍ට ඔබ වෙනුවෙන් දැක්මක් නිර්මාණය කරගන්න බැරිවෙන තාක් වෙනත් අය ඔබව පාවිච්චි කරගන්න එක නවත්තන්න වෙන්නෙ නැහැ,

දැක්මක් තියන මිනිස්සු ලාබෙට විකිනෙන්නේ නැහැ, නිවැරදි දැක්මක් තියන මිනිස්සු ජීවිතය තමන්ගේ හීන නිර්මාණය කරනවා මිසක් අනුන්ගේ හීන වල ඉත්තෝ වෙන්නෙත් නැහැ.

ඔබ ඇල්මැරුණු පඹයෙක් නොවී  දැක්මක් තියන මිනිසෙක් උන දවසට ලංකාව තව දුරටත් දියුණු වෙමින් පවතින රටක් වෙන එකක්  නැහැ.

අනීෂා ජයකොඩි

NALIKA JAYATHILAKE

ආයුර්වේදයෙන් රෝග නිවාරණයට මග කියනා අපේ වෙදැදුරුතුමිය – NALIKA JAYATHILAKE

• ඔබේ නම, ගම, පවුලේ විස්තර ටිකක් කිව්වොත්?

මම නාලිකා හංසිනී ජයතිලක. ගම අනුරාධපුර. මට ඉන්නවා හරිම ආදරණීය පවුලක්. පවුලේ අම්මා, අප්පච්චි, අයියලා දෙන්නා සහ මම. 

• මේ දවස්වල මොකද කරන්නෙ?

මේ දවස්වල මම ඉන්නෙ දකුණු කොරියාවෙ. මම සහ මගෙ සැමියා උසස් අධ්‍යාපන කටයුතු සඳහා විදෙස්ගත වෙලා ඉන්නෙ. ඊට අමතරව මාර්ගගත ක්‍රමයෙන් ආයුර්වේද වෛද්‍ය උපදෙස් ලබාදීමත් (online consultation), සමාජ මාධ්‍ය ඔස්සේ ආයුර්වේදය සම්බන්ධ දැනුම සමාජගත කිරීමත් තමයි විශේෂයෙන්ම කරන්නෙ.

• ආයුර්වේද වෛද්‍යවරියක් දක්වා ඔබ පැමිණි ගමන්මග ගැන විස්තර කලොත්?

මම ප්‍රාථමික අධ්‍යාපනය ලැබුවේ ගල්නෑව ප්‍රාථමික විද්‍යාලයෙන්. පහ වසර ශිෂ්‍යත්ව විභාගය සමත් වෙලා කොලඹ දේවි බාලිකා විද්‍යාලයට ඇතුලත් වෙන්න ලැබීම මට ලැබුණ ලොකු භාග්‍යයක්. ඒවගේම උසස් පෙල විභාගය ජීව විද්‍යා අංශයෙන් සමත් වෙලා, කොලඹ විශ්ව විද්‍යාලයේ දේශීය වෛද්‍ය පීඨයට ඇතුලත් වීමෙන් පසුව ආයුර්වේද වෛද්‍ය හා ශල්‍යවේදී උපාධිය ලබාගෙන, ආයුර්වේද වෛද්‍යවරියක් විදිහට සේවය කරන්න මට අවස්ථාව ලැබෙනවා.

• වෛද්‍යවරියක් විදිහට ඔබේ වෘත්තිමය ජීවිතය ගැන කතා කලොත්?

මම මුලින්ම රැකියාව කරන්නෙ පෞද්ගලික අංශයේ. ආයුර්වේද ප්‍රතිකාර බලාපොරොත්තුවෙන් ලංකාවට පැමිණෙන විදේශීය සේවාලාභීන්ට ප්‍රතිකාර හා විශේෂඥ උපදෙස් ලබාදෙන වෛද්‍යවරියක් විදියට. විදේශිකයන්ට  ප්‍රතිකාර කිරීමේදී ආයුර්වේද වෛද්‍ය විද්‍යාව පිලිබඳ ඔවුන් දැරූ ධනාත්මක ආකල්ප මගේ ප්‍රතිකාර වල මේදක්වා සාර්ථකත්වයට විශාල රුකුලක් උන බව කියන්නම ඕන. ඉන්පස්සෙ මම රාජ්‍ය අංශයේ ප්‍රජා සෞඛ්‍ය ආයුර්වේද වෛද්‍ය නිලධාරිනියක් ලෙස සේවය කිරීමෙන් පසුව ස්ථානභාර වෛද්‍යවරියක් ලෙසත් සේවය කලා. ඊට අමතරව මගේ පෞද්ගලික වෛද්‍ය මධ්‍යස්ථානය මගිනුත් රෝගී ප්‍රතිකාර කටයුතු සිදු කලා. රෝගීන්ගේ ජීවිත වලට සුවයක් ලබා දීම කියන කාරණාව ඇතුලෙ  

මම මගේ වෘත්තීය ජීවිතය ගැන ඉතාම තෘප්තිමත්.

• එතරම් තෘප්තියකින් මේ වෛද්‍ය වෘත්තියේ නිරතවීමට විශේෂ හේතුවක් තියනවා ද?

අපි ඉගෙනගත්ත සංස්කෘත ශ්ලෝක පාඨයක් තියනවා. ඒකෙ සිංහල තේරුම මේ ප්‍රශ්නෙට උත්තරයක් කියලා මම හිතනවා. ඒ ශ්ලෝකයට අනුව,

“වෛද්‍ය කර්මය තැනකදී පින් ද, තැනකදී මිතුරුබව ද, කිසි තැනකදී වස්තුව ද, කිසි තැනකදී කීර්තිය ද, කිසි තැනකදී කර්මාභ්‍යාසය ද ගෙන දේ. එහෙයින් එය කිසි විටෙකත් නිශ්ඵල නොවේ.”

ඉතිං ඒ විදිහට මට මගේ වෘත්තිය ගැන තෘප්තිමත්  වෙන්න විශේෂ හේතු ගොඩක් තියනවා.

• ඔබේ උසස් අධ්‍යාපන කටයුතු සිදුවෙන්නෙ කොහොමද?

මම දැනට කැලණිය විශ්වවිද්‍යාලයයේ රෝහල් කලමණාකරණය පිළිබඳ පශ්චාත් උපාධිය සම්පූර්ණ කරලා තියෙනවා. මේ දවස්වල දකුණු කොරියාවෙ ජාතික විශ්වවිද්‍යාලයක පෝෂණවේදය සම්බන්ධව උපාධි පාඨමාලාවක් හදාරමින් ඉන්නවා. 

• විවිධ වෛද්‍ය ක්ෂේත්‍ර තුල ආයුර්වේද වෛද්‍ය විද්‍යාවේ ඇති විශේෂ වැදගත්කම ගැන ඔබ මොකද හිතන්නෙ?

වචනාර්ථයෙන් ආයුර්වේදය කියන්නෙ ආයුෂ පිලිබඳ වූ විද්‍යාව. නීරෝගී පුද්ගලයන් රෝගී බවින් ආරක්ෂා කිරීමත්, රෝගී පුද්ගලයන් රෝගී බවින් මුදවා ගැනීමත් අරමුණු කරගනිමින් ස්වභාවික පරිසරයේ ද්‍රව්‍ය ඖෂධ ලෙසට යොදා ගනිමින්  ප්‍රතිකාර සිදු කරන වෛද්‍ය ක්‍රමයක්. අවුරුදු 5000කට වඩා පැරණි ඉතිහාසයක් පවතින වෛද්‍ය ක්‍රමයක් වුණත් අදටත් චිකිත්සා ප්‍රයෝග ප්‍රත්‍යක්ෂ ප්‍රතිඵල ලබා දෙන, බටහිර රටවල පවා විශාල ඉල්ලුමක් පවතින, වටිනා දරශනයක් සහිත විද්‍යාත්මක ඉගැන්වීමක්. ඒ නිසා වර්තමාන ලෝකයේ ආයුර්වේද වෛද්‍ය විද්‍යාව ගොඩක් උසස් තැනක තියනවා. 

• ඔබ අදහස් කරන්නෙ වර්තමානයේදී ආයුර්වේද ප්‍රතිකාර ක්‍රම සඳහා යොමුවීමේ වැඩි නැඹුරුතාවක් තියනවා කියන එකද?

ඇත්තටම ඔව්. බටහිර වෛද්‍ය විද්‍යාවට අනුව පැහැදිලි කල නොහැකි ඇතැම් රෝග තත්වයන් ආයුර්වේද සංකල්ප තුලින් පහසුවෙන් පැහැදිලි කල හැකි වීමත්, චිකිත්සා මූලධර්ම බොහෝ රෝග අවස්ථාවන් සඳහා වර්තමානයේ පවා  ප්‍රයෝග කල හැකි වීමත් ආයුර්වේදයේ වර්තමාන සාර්ථකත්වයට හේතුවක් වෙලා තියනවා. විශ්ව විද්‍යාල අධ්‍යාපනයේදී ආයුර්වේද වගේම බටහිර වෛද්‍ය විද්‍යා මූලධර්මත් හදාරන්න අවස්ථාව ලැබෙන නිසා උපාධිධාරී ආයුර්වේද වෛද්‍යවරුන් ඉතාම සාර්ථක ලෙස රෝග ප්‍රතිකාර වල යෙදී සිටිනවා. ඒ වගේම පුද්ගල සෞඛ්‍ය සංරක්ෂණය සඳහා රෝග වලින් වැළකීමට ආයුර්වේද ඖෂධ භාවිතය නවීන ලෝකයේ වැඩි නැඹුරුතාවයක් තියෙනවා. 

• ආයුර්වේද ප්‍රතිකාර සඳහා වර්තමාන තරුණ පරපුරේ යොමුවීම මොන වගේද?

 කාර්‍යබහුල ජීවන රටාවත් එක්ක වර්තමානයේ තරුණ පරපුර බොහෝ අයහපත් සෞඛ්‍යය පුරුදු අනුගමනය කරන්න පෙළඹිලා තියෙනවා.ඒ වගේම නිසි ව්‍යායාම නොමතිවීම හා මානසික ආතතිය හේතුවෙන් නොයෙක් බෝ නොවන රෝග තරුණ වයසේදීම වැළඳීම නිසා දීර්ඝකාලීන බටහිර ඖෂධ ලබා ගැනීම වෙනුවට ආයුර්වේද ප්‍රතිකාර සඳහා යොමුවීමෙන් මුල් අවස්ථාවේදීම රෝග සුව කර ගැනීමට උත්සහ දැරීම තරුණ පරපුර අතර දකින්නට ලැබෙනවා. අද සමාජය තුල නොයෙකුත් රෝගාබාධ වයස් භේදයකින් තොරව වැළඳීමේ හැකියාව තියෙන නිසා රෝග වැළඳීමට පෙර රෝග වලක්වා ගැනීම සඳහා ආයුර්වේද ප්‍රතිකාර සඳහා යොමුවීම වර්තමානයේ සිදුවිය යුක්තක්.

• සමාජ මාධ්‍ය වලට සම්බන්ධව කටයුතු කරන වෛද්‍යවරියක් විදිහට සෞඛ්‍ය අධ්‍යාපනය ලබාදීම මගින් රෝගාබාධ පිලිබඳ සමාජය දැනුවත් කිරීමට සමාජ මාධ්‍ය යොදාගැනීම සිදුකලයුත්තේ කෙසේද?

රටක දියුණුව මිනුම් කරණ නිර්ණායක අතර සෞඛ්‍ය නිර්ණායක ඉදිරියෙන්ම තියෙනවා. එමනිසා සෞඛ්‍ය අධ්‍යාපනය අතිශය වැදගත්.

රෝග පිලිබඳ දැනුවත් වීම වගේම, නොයෙකුත් වෛද්‍ය ක්‍රම සතු ප්‍රතිකාර විධි පිලිබඳ දැනුවත් වීමෙන් පසු වෛද්‍යවරයකු හමුවී තමාට අවශ්‍ය ප්‍රතිකාර රෝගියා විසින්ම තෝරා ගැනීම බොහෝ දියුණු රටවල සිදුවන ක්‍රමවේදයක්. වෛද්‍යවරු රෝගීන්ට නිවැරදි සෞඛ්‍යය අධ්‍යාපනය ලබාදීම අතිශය වැදගත්වන්නේ ඒ නිසා. විද්‍යුත් මාධ්‍ය හා සමාජ මාධ්‍ය ඔස්සේ වෛද්‍ය කතිකාවත් ඇති කිරීම නිසා වර්තමානයේ පුද්ගල සෞඛ්‍ය අධ්‍යාපනය නගා සිටුවීමට ලොකු පහසුවක් ඇති වෙලා තියෙනවා.  පුද්ගලිකව මම සමාජ මාධ්‍ය ඔස්සේ විවිධ රෝග තත්ත්වයන් සඳහා ආයුර්වේද ප්‍රතිකාර පිලිබඳව වගේම රෝග ඇතිවීම වළක්වා ගැනීමට අදාලව දැනුවත් කිරීම් කරමින් වෛද්‍යවරියක් ලෙස සමාජ කාර්‍යභාරයක් සිදුකරනවා.

• වෛද්‍යවරියක ලෙස ගෙවන ජීවිතය කාර්‍යබහුල නැද්ද?

ඇත්තෙන්ම දැනට විදෙස් ගතවෙලා ඉන්න නිසා පවුලෙන්, යහළුවන්ගෙන්, නෑදෑයන්ගෙන් ඈත්වෙලා ගෙවන ජීවිතය ටිකක් විතර ඒකාකාරියි. ඒ වගේම අධ්‍යාපන කටයුතු නිසා ටිකක් කාර්‍යබහුලයි. නමුත් සියලු දේ මනාව කලමණාකරණය කරගෙන මානසික ආතතිය දරාගැනීමට පුලුවන් මට්ටමක රඳවා ගන්න තමයි හැමවෙලේම උත්සහ ගන්නෙ.

• මානසික ආතතිය අවම කර ගන්න ඔබ මොන වගේ දේවල් ද අනුගමනය කරන්නේ?

නිරෝගීව ඉන්න නම් මානසික නීරෝගීබාවයත් අතිශයින්ම වැදගත්. පුලුවන් හැමවෙලාවෙම ඒකාකාරී බවෙන් මිදෙන්න වගේම මාව සතුටු කරන්න වෙලාවක් හොයාගන්න උත්සහ කරන කෙනෙක් මම. ඉතින් ලස්සන තැන්වල ඇවිදින එක මගේ විනෝදාංශ වලින් එකක්. පරිසරයේ ලස්සන දකින්න වගේම තවත් කෙනෙක්ට ඒ ලස්සන අත්දැකීම් එක් කරන්න තියෙන උවමනාව හින්දම Travel with Doc කියන YouTube නාලිකාව මමත් මගේ සැමියාත් නිර්මාණය කරපු අපේ විවේක කාලය හරවත් දෙයකට වෙන්කරපු අලුත් වැඩක්.

• නාලිකා කියන්නෙ මොනවගේ චරිතයක්ද?

කලින් කිව්වා වගේම වෘත්තියෙන් වෛද්‍යවරියක්. ඒවගේම ආදරණීය දුවක්, ආදරණීය නැගණියක්, ආදරණීය බිරිඳක්, ආදරණීය යෙහෙළියක්, හිතවතියක්.

ජීවිතය දිහා ආදරෙන් බලන සරල කාන්තාවක්.

• අපි මැගසින් එකත් එක්ක සම්බන්ධ වීම හා මැගසින් එක ගැන හිතෙන දේ කිව්වොත්..

මට අපි මැගසින් කියන විද්‍යුත් සඟරාවේ ලේඛිකාවක් ලෙස ලිපි ලිවීමට ආරාධනාවක් ලැබෙන්නෙ මගේ මිතුරෙක් වන ප්‍රසංග මදුසංක මාර්ගයෙන්. මේ විද්‍යුත් සඟරාවේ විශේෂත්වයක් මම දකිනවා. එක් එක් ක්ශේත්‍රයන් වල අත්දැකීම් ඇති අයවලුන් විවිධ රටවල ජීවත් වුණත් එකම අරමුණකට ගෙනවිත් ගයාන්ගේ නිවැරදි නායකත්වය හා මඟ පෙන්වීම් අවසානයේ රසවත්, හරවත් e-magazine එකක් විදියට ප්‍රේක්ෂකයන් අතරට පත්වෙනවා. කියවීම මිනිසුන්ගෙන් ඈත් වෙලා තියන වර්තමාන සමාජයට කියවීමේ අත්දැකීම නවීන තාක්ෂණය ඔස්සේ ලබාදෙන්න අපි මැගසින් කණ්ඩායම සැබැවින්ම අගය කල යුතු ලොකු උත්සාහයක් දරනවා.

පුරා වසරකට අධික කාලයක් අපි මැගසින් කණ්ඩායම සමඟ එක්ව වැඩ කරන්නට ලැබීම පිලිබඳව පුද්ගලිකව මම ගොඩක් සතුටු වෙනවා වගේම අපි මැගසින් කණ්ඩායම කණ්ඩායම් හැඟීමෙන් වසර හතරක් පුරාවට සිදුකරන සමාජ සත්කාරය අගය කල යුතුම දෙයක්. අවසාන වශයෙන් මම අපි මැගසින් වෙනුවෙන් හදවතින්ම සුබ පැතුම් එක් කරනවා. ඒ වගේම දිගටම අපි මැගසින් එකත් එක්ක රැඳිලා ඉන්න බලාපොරොත්තු වෙනවා.

Suraj Mapa

වැටුණු තැන් සහ පැරදුණු තැන් වලින් පාඩම් ඉගෙන ගෙන මගේ ගමන පුරුදු පරිදි නිදහසේ හෙමින් සීරුවේ යන්න බලාපොරොත්තු වෙනවා.

පුංචි තිරයෙහි අති සාර්ථක ලෙස විකාශනය වු ඕලූ, පුජා වැනි ටෙලිනාට්‍යය තුලින් ප්‍රේක්ෂක සිත් තුල අමතක නොවන මතක සටහන් එකතු කල ඔහු රිදි තිරයද සාර්ථකව ස්පර්ශ කල දක්ෂ රංගන ශිල්පයෙකු වනවා. ලතින් ඇමරිකානු නර්තනය සම්ප්‍රදාය සහ උඩරට නර්තන සම්ප්‍රදාය ඉතා හොදින් ප්‍රගුණ කල ඔහු විවිධ නර්තනය තරග නියෝජනය කර ජයග්‍රහණය ලබන්නට වාසනාවන්ත වුනා. විලාසිතා නිරූපණයට මෙන්ම නොනිමි වැනි උසස් ඝණයේ නිර්මාණය අධක්ෂණයටද ඔහු උපන් හපනෙකු ලෙස හදුන්වා දිය හැකිය. තවද ව්‍යාපාර කලමනාකාරණය පිළිබදව දැනුමින් පෝසත් වු ඔහුට වර්තමානයේ Elsa සහ Veer සන්නාම තුලින් ව්‍යාපාර ක්ශේත්‍රයට සාර්ථකව එලබෙන්නට හැකි වුනා. මෙකි වතගොත තවත් දැන ගන්නට සුරාජ් මාපා නම් වු දශක ගණනාවක පුංචි තිරයේ ප්‍රේමවන්තයාව සමග කෙරුණු සාකච්ඡාව කියවන්නට අපි Magazine පාඨක ඔබටයි මේ ආරාධනය…

1)සුරාජ්, 2024 අලුත් අවුරුද්දේ අලුත් විස්තර මොනවද?

Covid වසංගතය සහ රටේ ආර්ථික අස්ථාවරත්වය වැනි විවිධ හේතුන් නිසා පහුගිය අවුරුදු කිහිපයේදි සැලසුමකට අනුකූලව වැඩ කිරිමේ හැකියාවක් තිබුනේ නැහැ නමුත් 2024 වසර සැලසුමකට අනුව
වැඩ කරන්න බලාපොරොත්තු වෙනවා. මෙම වසරේදි මගේ මීලග ටෙලිනාට්‍යය අධක්ෂණය සදහා සුදානම් වෙනවා. දැනට රංගන දායකත්වය ලබා දෙන සුසුම් රස්තියාදුවක්, සර්කස්කාරයෝ සහ උන්මාදිනි
ටෙලිනාට්‍යය තුන සදහා මෙම දිනවල රූපගත කිරිම්වලට සහභාගි වෙනවා. ඉදිරියේදි විදේශ සංචාර කිහිපයක් සදහා කාලය වෙන් කරන්න බලාපොරොත්තු වෙනවා. එමෙන්ම නර්තන ප්‍රසංගයක් පැවැත්විමට වැඩ කටයුතු සැලසුම් කරගෙන යනවා. ඊට අමතරව මගේ ව්‍යාපාර කටයුතු සැලසුම් කරගත් ආකාරයට සාර්ථකව කරගෙන යන්න බලාපොරොත්තු වෙනවා.

2)මෙම දිනවල පුංචි තිරයෙහි අති සාර්ථකව විකාශනය වන සුසුම් රස්තියාදුවක්, සර්කස්කාරයෝ සහ උන්මාදිනි ටෙලිනාට්‍යය ත්‍රිත්වය පිළිබදව ඔබේ අදහස සහ ලැබෙන ප්‍රේක්ෂක ප්‍රතිචාර පිළිබදව කියමුද?

මම සාමාන්‍යයෙන් ලැබෙන හැම නිර්මාණයම භාර ගන්න පුද්ගලයෙක් නෙවෙයි. නිර්මාණයක් භාර ගැනිමේදි පිටපත් රචනය, අධක්ෂණය, ‍නිර්මාණයෙන් සමාජයට දෙන පණිවිඩය, අභියෝගාත්මක චරිත තුලින් ලැබෙන ආත්ම තෘප්තිය වැනි කරුණු පිළිබදව විශේෂයෙන්ම සැලකිලිමත් වෙනවා.

උන්මාදිනි ටෙලිනාට්‍යයෙහි මම පෙනි සිටින්නේ ඉතාම අඩු කොටස් ප්‍රමාණයක වුවත් එම චරිතය මුලු නාට්‍යය පුරාම දිවෙනවා. එම චරිතය තුල වෙනස් වු ආකාරයේ චරිත රග දක්වන්නට මට අවස්ථාව ලැබෙනවා. එමෙන්ම සුසුම් රස්තියාදුවක් සහ සර්කස්කාරයෝ ටෙලිනාට්‍යය ද්ව්ත්වයත් මම ඉතාමත් කැමැත්තෙන් භාර ගත් අපූරු පිටපත් රචනයන් සහිත, දක්ෂ කලාකරුවන් රංගන දායකත්වය ලබා දෙන, අති දක්ෂ අධක්ෂකවරුන් දෙපලක් විසින් නිර්මාණය කරන, සමාජයට යහපත් පණිවිඩයක් ලබාදෙන ටෙලිනාට්‍යය ලෙස හදුන්වන්න පුලුවන්. මෙම ටෙලිනාට්‍යය ත්‍රිත්වයම සදහාම මා වටා එකතුවෙලා ඉන්න මට ආදරය කරන බුද්ධිමත් ප්‍රේක්ෂකයන්ගෙන් ඉතාම ඉහල ප්‍රතිචාර ලැබෙනවා.

3)ප්‍රේක්ෂක ජනදරය ඉතා ඉහලින් දිනු නොනිමි ටෙලිනාට්‍යයෙන් පසුව අධක්ෂණකවරයෙකු හැටියට ඔබේ ඊලග පියවර කුමක්ද?

කුඩා දරුවන් සම්බන්ධයෙන් වැඩිහිටියන්ට වැදගත් වු පණිවිඩයක් ලබා දෙන්න උත්සාහ කරන මගේ මීලග ටෙලිනාට්‍යය සදහා මෙම දිනවල පිටපත සුදානම් වෙමින් පවතිනවා. පිටපත සම්පුර්ණ වුවාට පසු රූපගත කිරිම් පිළිබදව සැලසුම් ආරම්භ කරන්න බලාපොරොත්තු වෙනවා. මෙම ටෙලිනාට්‍යය විශේෂ වෙනස් විදියේ අත්දැකිමක් ලබා දෙන්න පුලුවන් නිර්මාණයක් වෙයි කියලා මම හිතනවා.

4)සුරාජ්ගේ වැඩි කැමැත්ත රංගනයටද, නර්තනයටද, අධක්ෂණයටද?

මෙම අංශ තුනටම මම එක ලෙස ගරු කරනවා සහ ආදරය කරනවා. රංගනය තුලින් ජිවිතය සහ සමාජය පිළිබදව, නර්තනය තුලින් ස්භාවධර්මයෙහි රිද්මය පිළිබදව මම ගොඩක් දේවල් ඉගෙන ගත්තා. එමෙන්ම
අධක්ෂණය කියන්නේ හොයාගෙන යන දෙයක් කියලා මම හිතනවා. ඉතින් එක අංශයකට කොටු නොවි හැකි අයුරින් සියලු අංශ ඉදිරියේදි නියෝජනය කරමින් ප්‍රේක්ෂක රසවින්දනය වෙනුවෙන් අර්ථවත් නිර්මාණවලට දායක වෙන්න බලාපොරොත්තු වෙනවා.

5)සුරාජ් ඔබ ප්‍රේක්ෂක සිත් දිනාගත් කලා කලාකරුවෙකු මෙන්ම දක්ෂ ව්‍යාපාරිකයකුද වෙනවා. ඔබේ ඇගළුම් ව්‍යාපාර කටයුතු පිළිබදව කියමුද?

මම පොඩිකාලේ ඉදලාම විලාසිතා සදහා වැඩි කැමත්තක් දක්වනවා. විලාසිතා නිරූපණ ශිල්පයෙකු වශයෙන් කාලයක් විවිධ සන්නාම නියෝජනය කලා. Elsa සහ veer සන්නාම දෙක යටතේ පිරිමි සහ කාන්තා ඇගළුම් ODEL ආයතනය සදහා මම නිෂ්පාදනය කරනවා. මෙම සන්නාම දෙක ඉදිරියේදි පියවරින් පියවර ඉදිරියට ගොඩ නගා ගෙන යන්න බලාපොරොත්තු වෙනවා.

එමෙන්ම ඉදිරියේදි කෘෂි කර්මාන්ත කටයුතු සදහා යොමුවිමට බලාපොරොත්තුවක් තියනවා. Ravan නමින් මම පවත්වාගෙන යන නිෂ්පාදනය ආයතනය මගින් ටෙලිනාට්‍යය සහ ච්ත්‍රපට නිෂ්පාදනය කටයුතු කරන්න සැලසුම් කරගෙන යනවා. කලා කටයුතුවල නියැලෙන ගමන් ව්‍යාපාර කටයුතු සමබරව කරගෙන යන්න බලාපොරොත්තු වෙනවා.

6)ව්‍යායාම කටයුතු කිරිම, පෝෂ්‍යදායක ආහාරපාන ගැනිම වැනි නිරෝගි ජිවන රටාවකට අවශ්‍ය මූලික කරුණු පිළිබදව ඔබ වැඩි උනන්දුවක් දක්වනවා නේද?

වෘත්තීය කලා ශිල්පියෙකු සහ ව්‍යාපාරිකයෙකු වශයෙන් අනාගතයේදි එම කටයුතුවල නොනවත්වා නිරතවන්න සෞඛ්‍ය තත්වය හොදින් පවත්වාගෙන යාම ඉතාම වැදගත් වෙනවා. මහන්සි වෙලා රැකියාවන්වල නිරත වෙන නමුත් ශරීර සෞඛ්‍ය පිළිබදව අවධානය යොමු කරන්නට කාලය කලමනාකාරණය කර ගැනිමට නොහැකිවිමෙන් ලෙඩ රෝග නිසා පීඩා විදින බොහෝ දෙනෙක් මම දැකලා තියනවා. අනාගතයේදි මගේ සෞඛ්‍ය මට්ටමෙහි මොන මොන වෙනස්කම් වෙයිද කියලා කියන්න දන්නේ නැහැ නමුත් ව්‍යායාම කටයුතු කිරිම, පෝෂ්‍යදායක ආහාරපාන ගැනිම මෙන්ම ලැබුන ජිවිතය සතුටින් රස විදිමින්, සැහැල්ලු මානසික සෞඛ්‍යය තත්වයක් පවත්වාගෙන යෑමට මම නිතරම උත්සාහ කරනවා.

7)සුරාජ් වඩා කැමති තනිකඩ ජිවිතයද? ආදරය ගැන ඔබේ අදහස…

බොහෝ දෙනා විවාහ වෙන්නේ ආදරය නිසාද නැතිනම් විවාහ විය යුතුය යන සමාජ මතය නිසාද? යන්න ප්‍රශ්නාර්ථයක් වෙනවා. මගේ අදහස විවාහ නොවි තනිකඩව ඉන්න හෝ ඉක්මනින් විවාහ වෙන්න ඕනේ කියන එක නෙවෙයි. සමාජය අහන ප්‍රශ්නවලට පිළිතුරක් ලබා දෙන්න ඕනේ නිසා මම විවාහ වෙන්න සුදානම් නැහැ. ආදරය දැනෙන, ගැලපෙන කෙනෙක් තෝර ගන්න මට අයිතියක් තියනවා. මගේ ජිවිතය සතුටින් ගත කරන්න සහ ආදරය කියන සුන්දර දෙය විදින්න මම කැමතියි නමුත් මට ගැළපෙන කෙනෙක් ලැබෙයිද නොලැබෙයිද කියලා මම දන්නේ නැහැ. විවාහ ජිවිතය තුල සතුටින් ජිවත් වෙන්න උත්සාහ කරන කෙනෙක් ලැබුනොත් නිවැරැදි තීරණයක් ගන්න මම බලාපොරොත්තු වෙනවා.

8)ඔබව ඉදිරියේදි ප්‍රේක්ෂක අපට දකින්නට ලැබෙන කලා කටයුතු මොනවාද?

මාව පහු කරගෙන ගියපු අය සහ මම පහු කරගෙන ආපු කිසිම කෙනෙක් එක්ක මට තරගයක් නැහැ. වෙනදා වගේම කරන දෙය හරියට කරගෙන වැටුණු තැන් සහ පැරදුණු තැන් වලින් පාඩම් ඉගෙන ගෙන මගේ ගමන නිදහසේ හෙමින් සීරුවේ ඉදිරියේදිත් යමින් ප්‍රේක්ෂක රසාස්වාදය සහ බුද්ධි මට්ටම වැඩි කිරිම වෙනුවෙන් කලා කටයුතුවල නිරත වෙන්න, උසස් තත්වයේ නිර්මාණ සමග සම්බන්ධ වෙන්න බලාපොරොත්තු වෙනවා.

අමා නාකන්දලගේ