ගිමන් හලන වැහැරුනු කය
වාරුවටම වාඩිවෙලා
ඈත ඉමක සිතිජ කොනේ
මැවෙන රූ රටා,
සිතපු පතපු සමහර තැන්
අතරමගින් නැවති බලා
අතීතයක රූප මැවෙයි
මීදුමෙන් වෙළා…
දිනෙන් දිනම ජීවිතයක
ශේෂ වෙවී වියැකෙන පණ
තදින් බදා යදම් වෙලා
නවතනු බැරිදා,
කිනම් අරුත් පහදන්නද
ලොබ බැද ගත් කාසි පනම
සතර වරම් ලැබුවද මතු
හිමිඅහිමි වෙනා…
එපා කිසිත් පොදි බදිනට
දිරන කයට දිරියක් නැත
කල පිං පව් මතු උපදින
දා ඵල ලබනා,
අවුරුද්දක නියම අරුත
කාලය රන් හා සමවෙන
රිදවපු සිත් සුවපත් කොට
සව්සිරි පුරනා…
සිරිසුභ නව අවුරුද්දේ
කිරි ඉතිරෙන අනාවකේ
නව මංපෙත් විවරණයක
සේයා පෙනෙනා,
හීන මවපු නව ලෝකේ
එකම දැයක දරුවන් සේ
එකාවන්ව එකමුතුවී
සැම සවි වඩනා…
රීනා
