වත්මන් තාරුණ්‍යය තුළ පොෂ් වීම යනු එකිනෙකාට ආවේණික වූ මානසික තත්වයක්. ගැමිකම, සංවරකම යන්න දුර්වලකමක් ලෙස දකින ඇතැම්හු තම ආටෝප, සාටෝප ජීවිතය තුළින් තවකෙකුගේ ආකර්ෂණය දිනා ගැනීමට වත්මන් සමාජය තුළ කැපී පෙනීමට පොෂ් වීම අනිවාර්ය අංගයක් ලෙස සලකා කටයුතු තරන්නා සේම එය වත්මන් තාරුණ්‍යයට වැළදී ඇති වසංගතයක්.
මුලු ශරීරයම ලාභ අරමුණු වල ඉත්තන් බවට පත්වෙලා. අපේ හිත් පහුරු ගා සුන්දර ලෝකවල අපව අතරමං කරලා, අපේ පොකට් එකට තට්ටු කරන මගෝඩි අරමුණක් පෙරදැරි කරගනිමින් සිදුකරන දැලක අප පැටලී අවසන්. අප විසින් මානව ප්‍රගමනය උදෙසා සිදුකළ යුතු සියල්ල වෙළෙන්දන්, ඔවුන්ගේ ප්‍රාග්ධන ලාභ අපේක්ෂාවන් වෙනුවෙන් අපෙන් උදුරාගන්නට මාන බලමින් සිටී. මෙවැනි අවි`ඥානික දේවල් සමඟ නිරන්තරයෙන් අප ඔවුන්ගේ රූකඩ බවට පත්වන්නේ අපටත් නොදැනීමයි.
විශේෂයෙන් ගෝලීයකරණය හමුවේ ලංකාව වැනි රටක පවතින සංස්කෘතිය විවිධ සංස්කෘතික ආක‍්‍රමණ සංක‍්‍රමණ සමග වෙනස් වීමෙන් මෙය තාරුණ්‍යයේ බහුලව දකින්නට ලැබෙන දෙයක් බවට පත් ව අවසන්. විශේසයෙන්ම තාරුණ්‍යය තුළ පොෂ් යැයි සම්මත වීමට ස්මාර්ට් ෆෝන්, හිර ඩෙනිම එයට ආවේණික වූ ලක්ෂණයන් ලෙස දැක්යවි හැකියි. ඉපැරණි සමාජීය සංස්කෘතියෙන් මිදී නවීනත්වයට හුරු වීම වරදක් නොවන නමුත් වරදක්වන්නේ අවිඥාණිකව අප සංස්කෘතියට නොගැලපෙන දේ තුළින් අප ගොඩනගාගනු ලබන තාවකාලික ජීවිතය විශේෂයෙන් තාරුණ්‍යය තුළ විනාශයට අතවැනීමක් ලෙස පවතින නිසාවෙන්.
තමන්ට සහජයෙන් ලැබුණු රූපසොබාවෙන් සෑහිමකට පත්නොවී, තමන් කැතයි,කලුයි කියා පසුතැවෙමින්, සුදු වන්නට දඟලන බොහෝ තරුණියෝ කූට වෙළදුන්ගේ ඇම ගිලිමින් සුදුවන්නට විවිධාකාර ක්‍රීම් වර්ග ඇඟේ ගායි. ඇඟේ මස් පිඩු ජෝන් සීනාගේ වගේ නැතැයි සිතා වෙළඳුන්ගේ උප්පරවැට්ටි වලට රැවටි තම ඇඟ හදාගැනීමට කෘතිම ශක්තිවර්ධක යැයි හඳුන්වා දෙන ඊනියා ආහාර පාන වර්ග කන්නට පුරුදු වී අවසානයේ ලෙඩ දුක් සදාගනිමින් විඳවයි.
කොණ්ඩය ඉන ගාවට නැතත් රෙදි හැට්ට නොඇන්දත් හැදිච්චකම තාම තියනවා යැයි පවසන ලාංකික තරුණියන් තුළ එකී හැදිච්චකම තාම තියනවා ද යන්න අප වර්තමානයේ දී මදක් සිතා බැලිය යුතුයි. පෙනෙන ආකාරයෙන් මිනිසුන් මනින්නට බැරි බව සැබෑවක් වුව ද පොෂ් වසංගතය නිසාවෙන් තාරුණ්‍යයේ බාහිරින් පමණක් නොව අභ්‍යන්තරයෙන් ද වචන, හැසිරිමෙන් පවා වෙනසක් දකින්නට ලැබීම ඇතැම් විට හාස්‍යයක්. ඒ වගේම පිලිකුලක්.
පොෂ් සංකල්පය තුළ ස්තී‍්‍රත්වය යන්න මුදලට විකිණෙන සිල්ලර භාණ්ඩයක් ව හමාරයි. නිරුවත එහි ප‍්‍රධානතම අංගයක් ව හමාරයි. ශරීරය නිරාවරණයවන ශරීරයේ හැඩය ඉස්මතුවන ලෙස අදින පලදින වත්මන් තරුණියන් නොසිතූ ලෙස ඇතැම් අවස්ථාවන්හි දී තවකෙකුගේ ගොදුරක් බවට පත්වන අවස්ථා ඔනෑතරම් වත්මන් සමාජයෙන් අසන්නට දකින්නට ලැබේ. අනේකවිධ කොණ්ඩා විලාසිතාවන් වෛවර්ණ කොණ්ඩ සැකසුම වත්මන් සමාජයේ සුලභවන අතර ඒ නිසාම ස්තී‍්‍ර ලාලිත්‍යය සුන්දරත්වය විදීමට හැකිවන්නේ තරුණියන්ගෙන් කීදෙනෙකුගෙන් දැයි ඔබ මොහොතකට සිතා බැලවා ද?
තරුණියන් තුල පමණක් නොව තරුණයන් තුළ ද පොෂ් සංකල්පයේ එක් ප‍්‍රධානතම අංගයක් බවට පත්ව ඇත්තේ විවිධ මත්ද්‍රව්‍ය භාවිතයයි. එවැනි දේ සිදු නොකළහොත් තමා සමාජයෙන් කොන් වේ යැයි ඇතිවන බිය මෙන්ම ඉහළ පන්තිය සමග එකට ගැවසෙමින් ජීවත්වීමට නම් මේවා අත්‍යවශ්‍යය බව සිතන සමහරු ඒ පොෂ් වීමෙන් තම ජීවිතය වනසා ගන්නා අවස්ථා ඕනෑ තරම් වේ.විශේයෙන් තාරුණ්‍යය තුළ නිදහස ඉහළම වශයෙන් භුක්ති විදින විශ්වවිද්‍යාල පරිසරය තුළ පොෂ් වීම ප‍්‍රධානතම සංකල්පයක් බවට පතවන්නේ ඒ තුළ තාරුණ්‍යයේ වැඩි පිරිසක් කේන්ද්‍රවන නිසා විය හැකියි. ගමින් පැමිණෙන සංවරකම හැදියාව සුන්දරත්වය නැවත ගමට යනවිට ඒ ආකාරයෙන්ම රැගෙන යන්නේ කීයෙන් කී දෙනා ද? පවතින සමාජ සංස්කෘතික විපර්යාස හමුවේ වෙනස් වීම වරදක් නැත. නමුත් එයින් තමාගේ ජීවිතය සාර්ථක කර ගැනීම විනා විනාශ කරගන්නේ නම් එය විනයක් මිස වටිනා දෙයක් නොවන බව අප සිහි තබා ගත යුතුයි. ඒ නිසාවෙන් වෙනස්වන සමාජ සංස්කෘතියට අනුව වෙනස් වීමට වරදක් නොවුව ද ඒ තුළින් තම ජීවිතය විනාශ කර නොගැනීමට තරම් වත්මන් තාරුණ්‍යය බුද්ධිමත් විය යුතුයි.
වෛද්‍ය චන්ද්‍රිකා රාජපක්ෂ
Doctor of Ayurveda| Motivational Speaker| Counsellor
M. Sc., BAMS, B. Sc., CCHRM
