අද උදේ බස් රථයේ ගමන් කරන විට එක්තරා ගුවන්විදුලි චැනලයක ඇහුණ මෙන්න මේ දේ නිසා ලියන්න හිතුන කරුණක් මේ.
එක්තරා ස්ථානයක තිබුණු කිලෝ මීටර් ගණනක ඉන්ධන පෝලිමක සිටි එක්තරා පුද්ගලයෙකු පෝලිමේ ඉන්නා අනෙක් අයගෙන් “කෑවද” යන්න විමසමින් ගමන් කර ඇති බවත් , ඒ වන තෙක්ම කෑමක් නොගෙන පැය ගණනක් පෝලිමේ සිටි අය තමන් හා එකතු කරගෙන ඔහු නිවසින් ගෙනා එකම බත් පැකට්ටුව බෙදාහදාගෙන ආහාරයට ගත් බව එහි සඳහන් වුණා.
ත්‍රීරෝද රියැදුරෙකු වූ ඔහුගේ මෙම ක්‍රියාව පැසසුමට ලක් කරන්නට වටිනා එකක් බව පැහැදිලිවම සඳහන් කළ යුතුයි. “අවස්ථාවාදියෙකු” යන වචනය ඇහෙද්දිම අපගේ මනසට ඇතුල් වන්නේ කලු චරිතයකි. නමුත් තමන් මෙන්ම අසීරු අවස්තාවක සිටින්නා වූ අනෙක් අය ගැනද සිතමින් තමන් සතු දෑ බෙදාගන්නා මෙවන් අය අනිවාර්යයෙන් ම “සුදු පාට අවස්ථාවාදීන්” වන්නේය.
ඔබට හැකි සෑම විටම සුදුපාට අවස්ථාවාදියෙකු වන්න. ඔබ භාණ්ඩ මිළදි ගන්නා වෙළඳ පලේ ඉතිරිව ඇති සියලුම සබන්කැට මිළදී ගන්නා, අවස්ථාවාදියෙකු නොවන්න.
එදා වේල සරි කරගන්නා අසරණ මිනිසෙකු වෙනුවෙන් , යමක් කමක් කරගත හැකි ඔබගේ කුඩා අවශ්‍යතාවයක් කැප කරන්න. ඔබගේ දරුවන් වෙනුවෙන් මිළ දි ගන්නා අමතර “අත්‍යාවශ්‍ය නොවන” ආහාර වර්ග වලින් කොටසක් කැප කර මේ අසීරු වකවානුවේ බත් ඇටයක් ඇහැටවත් නොදකින දහස් ගණනක් දරුවන්ගෙන් කෙනෙක් වෙනුවෙන් යුතුකමක් ඉටු කරන්න.
ඔබේ නිවසේ අමතරව වැය වන අනවශ්‍ය සියලු විදුලි බුබුලු හැකි සෑම වේලාවකම
නිවා දමා දහසක් රටවැසියන් වෙනුවෙන් විදුලිය බිඳක් හෝ ඉතිරි කරන්න.
ඔබේ දරුවන් පුරුදු වී ඇති ජීවන රටාව මදක් හෝ වෙනස් කර ඔවුනට රටේ වාතාවරණය පිලිබඳව කියා දෙන්න. ඔවුන්ගේ ඉල්ලීම් කෙතරම් වුණත් ඒවායේ අත්‍යාවශ්‍ය බව අනුව ප්‍රමුඛත්වය දෙන්න.
ඔබේ වාහනයට ඉන්ධන තිබේ නම් මහමහ අසරණ වූ කවුරුන් හෝ ඈත්නම් ඔබට ඔවුන්ට ප්‍රවාහණ පහසුකම් ලබා දියහැකි වාතාවරණයක් ඇත්නම් එය දෙන්න.
මොන යම් අවස්තාවකදී වුවද ඔබට අන් අයෙක් වෙනුවෙන් පෙනී සිටිනනට හෝ උදව් කරන්නට හැකි නම් දෙවරක් නොසිතා එය කරන්න. මනුස්සකම වපුරන්නටත් , හොඳම හා අවශ්‍යම කාලයක් මේ.
අවස්තාවාදීන් බොහොමයක් මැද ඔබ “සුදු අවස්ථාවාදියෙක්” වෙන්න.
දිගැසි පබසරා අමරසිංහ
