Api-Slide-53-1
Api-Slide-53-2
previous arrow
next arrow

24-05-11

කටූම්බා බ්ලු මවුන්ටන්ස්

හිරු පිබිදෙන්නටත් ප්‍රථම අප ලහි ලහියේ සූදානම් වුයේ ඊසාන දෙසින් හොක්ස්බරි සහ නේපියන් ගංගා වලටත්, බටහිරින් කොක්ස් ගංගාවත්, දකුණින් බූරාගොරාන්ග් වැව්  ඉස්මත්තත්, උතුරුබටින් වොල්ගොන් සහ කොලෝ ගංගාවලටත් මායිම් වී ඇති ඕස්ට්‍රෙලියාවේ බෙහෙවින් ප්‍රචලිත නිව් සවුත් වේල්ස් ප්‍රාන්තයේ පිහිටා ඇති, ඒවගේම ලෝක උරුමයක් ලෙස නම් කර ඇති කටූම්බා (Katoomba)  බ්ලු මවුන්ටන්ස් (Blue Mountains) කඳුවැටිය වෙත ලඟා වන්නට.  

අදහාගත නොහැකි ඉතා විශාල වපසරියකට විහිදී ගොස් ඇති කඳු පන්තියේ බොහෝ දෙනෙක් ගේ ආකර්ශනය හිමිවන්නේ ත්‍රී සිස්ටර්ස්  (Three Sisters ) කඳු වළල්ල වෙතයි. 

මේ සොභා මවිතය දැක බලාගැනීමට අප පෙරාතුවම සීනික් වර්ල්ඩ් සමාගමෙන් ප්‍රවේශ පත්‍ර දෙකක් මිලදී ගත්තේ, බොහෝ දුර ගොස් නැවතත් හැරී ඒමට හිතේ අහලකවත් නොතිබූ නිසා. මිතුරන්ගෙන් දැනගත් පරිදි අපි කාළගුණය කොතරම් සුබදායි දැයි බලන්නට අමතක නොකලේ, ඔවුන් පැවසු පරිදි වැහි කෝඩයක් හෝ මිහිදුම් පටලයක් පැමිණියහොත් එහි දසුන් පැහැදිලිව දැකබලා ගැනීමට නොලැබෙන නිසාවෙන්.

පැය හතරකට ආසන්න කාලයක් සුන්දර කැළෑ බද පෙදෙස්වලින්, කඳුවැටි, බැටළුවන් පිරි ගොවිපලවල්, මිදි වතු පසු කරමින් උණුසුම් කෝපි වලටත් සීනි සම්බෝල තැවරූ පාන් පෙති වලටත් ස්තුතිවන්ත වෙමින් අප ලඟා වුයේ සීනික් වර්ල්ඩ් නැරඹුම් මධ්‍යස්ථානය වෙතටයි. මුදල් නොගෙවා, මෙම මධ්‍යස්ථානයට පැමිණෙන්නේ නැතුව හිතු මනාපෙට මේ සුන්දරත්වය දැකගැනීමට හැකියාව තිබුනත්, ඒ සඳහා බොහෝවිට පැමිණෙන්නේ කඳු නැගීමට සහ වික්‍රමාන්විත ක්‍රියා සඳහා බොහෝ පළපුරුද්දක් ඇති දක්ෂයින් පමණයි.කටූම්බා  කඳු වැටියේ සහ වන ලැහැබේ සුන්දරත්වය සොයා යන්නට ගොස් විවිධ විපත් වලට මුහුණ දී අද  වනතුරුත් නැවත නොපැමිණි සංචාරකයින් නැතුවාම නොවේ.

කලින් ප්‍රවේශ පත් මිලදී ගත නිසාවෙන් කිසිම තදබදයක් නැතිව අපි බ්ලු මවුන්ටන්ස් සංචාරක ඇරඹුම් ස්ථානයට ඇතුළු වුයේ මුව පුරවාගත් සිනාවකින් අප පිළිගෙන ස්ථානීය ක්‍රියාකාරම් සහ භූගෝල පිහිටීමේ සිතියමක් අප අත තැබූ සේවිකාවගේ මග පෙන්වීම යටතේයි.

මෙහි තිබූ තවත් විශේෂත්වයක් වන්නේ ලොව ඇති වැඩිම බෑවුමක් කරා ගමන් කරන සංචාරක දුම්රියත් (World’s Steepest Train), දකුණු අර්ධගෝලයේ වැඩිම බෑවුමක් වෙත ගමන් කරන කේබල් කාර් රථයත් (Steepest Aerial Cable Car in the Southern Hemisphere) මෙහි ජැමිසන් නිම්නය හරහා පිහිටා තිබීමයි.

එහි ගමන් කරනා විට ත්‍රී සිස්ටර්ස් ඉතා සුපහදිලිව දැක ගැනීමට සංචාරකයින්ට හැකිවන අතර වනපෙතේ සුන්දරත්වය, ඒ සිසිලස විඳීමට කැමති අය සඳහා නැවතත් සීනික් වර්ල්ඩ් මධ්‍යස්ථානයට පැමිණීමට විවිධ වන මංපෙත් සාදා තිබෙනවා. ඒවගේම මෙම කඳු පන්තියේ බොහෝ ස්ථානවල නැරඹුම් ලක්ෂ්‍ය පිහිටා තිබෙනවා. ඡායාරූප කලාවේ යෙදෙන කෙනෙකුට මෙන්ම, සොබා සෞන්දර්ය නිදහසේ අත්වින්දින්නට කැමති ඕනෑම කෙනෙකුට එය කදිම තෝතැන්නක්.

කටූම්බා බ්ලු මවුන්ටන්ස් නරඹා නැවතත් සංචාරක මධ්‍යස්ථානයට පැමිණි අපගේ විඩාවත් , කුසගින්නත් නිවා ගත්තේ එහි  පිහිටා ඇති ටෙරස් කැෆේ හි  ලී උදුනේ පිළිස්සූ පීසා සහ ලෙමනේඩ් වීදුරුවක් පානය කිරීමෙන්. 

මෙම අවන්හල උණුසුම් ආහාර සහ කෝපි වල සිට සීතල දේශීය බියර් සහ අයිස්ක්‍රීම් දක්වා සෑම දෙයක්ම පිරිනමන අතර නිල් කඳුකරයේ හොඳම දර්ශනීය පැතිකඩක් එහි බැල්කනියට ගොඩවන්නෙකුට දැකගැනීමට ලැබෙනවා. 

ඉතාමත් සුන්දර ලොව සුපතල සොභා සුන්දරත්වයක් විඳි අපි නැවතත් කැන්බරා බලා පිටත් වුයේ මේ වනාන්තරය සහ කඳු පන්තියේ මිහි මව කොපමණ නම් රහස් සඟවාගෙන , මිහිතලය සුරැකිව තබාගන්නවා ඇත්දැයි සිහිපත් කරමින්.

Sign up for our newsletter