Month: October 2021

දෙපත් නයා

Posted on | by Digital My Business

Srilankan pipe snake 

Cylindrophis maculatus

Cylindrophiidae කුලයේ ශ්‍රී ලංකාවේ දී දැකබලාගත හැකි එකම විෂේශය ලෙස Cylindrophis maculatus යන විද්‍යාත්මක නාමයෙන් ද “දෙපත් නයා/ වට උල්ලා” යන සිංහල නාමයන්ගෙන් ද හඳුන්වන ඉතා අලංකාර අර්ධ පාංශුවාසී සර්ප විශේෂය හැඳින්විය හැක. නිශාචර, සර්ප විශේෂයක් වන දෙපත් නයින් තෙත්, වියළි සහ අතරමැදි යන දේශගුණික කලාපයන්හි දැකගත හැකි අසල ගති පැවතුම් පෙන්වන හානියක් නොමැති නිර්විෂැති, ආවේණික සර්ප විශේෂයක් ලෙස තවදුරටත් විස්තර කළ හැක. සාවද්‍ය අර්ථකථනයන් සහ සුවිශේෂී චර්‍යා රටාවන් හේතුවෙන් මිත්‍යා මත කිහිපයක් ම කරපින්නා සිටින සර්ප විශේෂයක් වන අතර එම මිත්‍යා මතයන් අතර, දෙපත් නයින් සිරුරේ පූර්ව මෙන්ම අපර කොටසෙත් හිස් ඇති දෙපසට ම සංචරණය සිදු කළ හැකි අරුම පුදුම සත්ත්ව විශේෂයක් ලෙසත් *විෂ සහිත සර්පයෙක් ලෙසත් පවතින මිත්‍යා මතයන් පෙන්වා දිය හැක. නමුත් සැබැවින් ම ඒවාගේ කිසිදු සත්‍යතාවක් නොමැති අතර විකෘතිතාවක් හේතුවෙන් මිස එලෙස හිස් දෙකක් සහිත සර්ප විශේෂයක් මේ වන තෙක් ලෝකයේ කොතැනක හොල් සොයාගෙන නැති බව සඳහන් කළ යුතුයි; මතු දිනයක හෝ එවැනි සර්ප විශේෂයක් සොයාගැනීම ද සිදුනොවිය හැක්කක් බව සියල්ලන්ට ම වැටහෙන්නකි. බිය වූ හෝ කලබල වූ අවස්ථාවන්හි ආරක්ෂාව සඳහා ශරීරය පැතලි කොට වල්ගය පෙනයක් සේ පෙන්වා, තමන් විෂ සහිත සර්පයෙක් ලෙස පෙන්වීමට අනුගමනය කරනා සුවිශේෂී චරියාව හේතුවෙන් ඉහත සඳහන් කළ දෙවැනි මිත්‍යා මතය * සකස්ව පවතින්නක් විනා කිසිදු සත්‍යතාවක් නොමැති මිත්‍යාවක් පමණක් බව නැවතත් සඳහන් කළ යුතුය. වටකුරු හොම්බක් සහිත පැහැදිලි ගෙලක් නිරීක්ෂණය කළ නොහැකි සිලින්ඩරාකාර දේහයකින් සහ ඉතා කෙටි වල්ගයකින් යුතු මෙම සර්ප විශේෂයේ අලංකාර වර්ණ රටාවන් පෘෂ්ඨීය ව මෙන් ම උදරීය ව ද නිරීක්ෂණය කළ හැක. පෘෂ්ඨීය ව ගඩොල් රතු හෝ තද තැඹිලි වර්ණයක් ගන්නා අතර ගෙලේ සිට වල්ගය කෙළවර තෙක් කශේ කොරළ පෙළ තද දුඹුරු හෝ කළුය. තවද කළු පැහැ දාරයක් සහිත පුල්ලි යුගල 35-55 පමණ නිර්මාණය කරන පෘෂ්ඨීය රේකා ජාලයකි. හිස සහ වල්ගය කෙළවර කළු පැහැයක් ගන්නා අතර ගෙල ප්‍රදේශයේ සුදු පැහැ වළල්ලක් නිරීක්ෂණය කළ හැක. උදරීයව සුදු හෝ ලා රෝස පැහැ වන අතර කලු හරස් පටි හෝ ජලාකාර වටාවක් සහිතය. ආහාර වශයෙන් ගැඩවිලුන්, වේයන් සහ කෘමි සතුන් මත යැපීම සිදු කරයි. මීට අමතරව දෙපත් නයින් සර්ප භක්ෂණය පෙන්වන සත්‍ත්ව විශේෂයක් වන බැවින් වෙනත් කුඩා සර්ප විශේෂයන් මතද යැපීම සිදු කරන අවස්ථාවන් වාර්තා වෙයි. අන්ඩජාලාබුජතාවය මගින් පැටව් බිහිකරන මෙම සර්ප විශේෂය වරකට පැටවුන් 1-15 අතර සංඛ්‍යාවක් ප්‍රසූත කිරීම සිදු කරයි.

හඳුනා ගැනීම – කුඩා, පෘෂ්ඨිමත්, සිලින්ඩරාකාර දේහය. පළල්, පෘන්දෝදරීයව පැතලි, පාත්විකව

මොට කුඤ්ඤයක හැඩැති (wedge-shaped) හිස. හොම්බ පෘෂ්ඨියව වටකුරුය. පැහැදිලි ගෙලක් රහිතය. ඉලිප්සාකාර කණීනිකාවක් සහිත ඉතා කුඩා ඇස්. පෘෂ්ඨියව පිහිටි ඉතා කුඩා නාස් විවර. ඉතා කෙටි, ශංක්වාකාර (conical) වලිගය.

වර්ණය – පෘෂ්ඨියව ගඩොල් රතු හෝ තද තැඹිලි. ගෙලේ සිට වල්ගය කෙළවර තෙක් කශේ

කොරල පෙළ තද දුඹුරු හෝ කළුය. කළු පැහැති දාරයක් සහිත පුල්ලි යුගල 35-55ක් පමණ

නිර්මාණය කරන පෘෂ්ඨිය රේඛා ජාලයකි. හිස සහ වල්ගය කෙළවර කළුය. ගෙල ප්‍රදේශයේ සුදු වළල්ලකි. උදරීයව සුදු හෝ ලා රෝස වන අතර කළු හරස් පටි හෝ ජාලාකාර රටාවක් පිහිටයි.

දිග – උපතේදි මි.මී. 100-150, වැඩුණු සතුන් මි.මී. 300-650.

හැසිරීම – නිශාචර පාංශු සර්පයෙකි. දිවාකල කොලරොඩු, කොටන් හා ගල් ආදිය යට ගතකරයි. අලසය, නොකිපෙනසුලුය. කලබල වූ විට සිරුර පැතලි කර දඟර ගැසී, හිස දඟරය තුළ හොවා ගනී. වල්ගය කෙළවර ඉදිරියට නම ඉහළට ඔසවයි. මෙලෙස සිරුරෙන් 1/8-1/ 4 ක පමණ කොටසක් ඉහළට එසවිය හැක. මෙම පෙනයක් වැනි වගය හේතුවෙන් මොවුනට දෙපත්නයා යන නම පටබැඳි ඇත. ඇතැම්විට කහ පැහැති, දුගඳවත් දියරයක් ජම්බාලියෙන් පිටකරයි. අණ්ඩජාලාබුජ වන අතර වරකට පැටවුන් 1-15ක් පසුත කරයි.

ආහාර – ගැඩවිලුන්, උභයජීවින්, කමින් හා වෙනත් නිර්විෂ සර්පයින්.

විෂ – නිර්විෂැතිය. බොහෝවිට සපා කෑමට තැත් නොකරයි.

ව්‍යාප්ති කලාපය, හමුවී ඇති ප්‍රදේශ සහ තත්ත්වය – 

මෙරටට ආවේනික විශේෂයකි. ම.ම.උමී. 1000 ක් පමණ උච්චත්වයක් වන තෙක් පිහිටි වියළි. අතරමැදි හා තෙත් කලාපවලට අයත් ප්‍රදේශවල හමුවේ. පුත්තලම, පොළොන්නරුව, අනුරාධපුර මුන්ඩල, නාඋල, පොල්ගහවෙල, බෙල්ලන්විල, බලංගොඩ, බෙරගල, කොග්ගල මෙන්ම මහනුවර සහ රන්තපුරය අවට ප්‍රදේශ රැසකින්).

සටහන සහ ඡායාරූප – චමල් ලක්ෂාන් ජයවීර

චරියාගේ පන්හිඳ

Posted on | by Digital My Business

– දරු සම්පත –

පංසලේ කෝවිලේ දවස     ගෙවලා

නොදුටු දෙවිවරු සැමට       පුදලා

දොලොස් වසරක් පෙරුම්     පුරලා

පොකැට්ටුවත් දැන් හොඳට හිඳිලා

අටවා ගත් පැල උකසේ      තියලා

රටේ නැති විටමින් ඇයට පොවලා

බලනවා නිති ස්කෑන්          කරලා

පුංචි සතුටකි අඹු පාට       වැටිලා

දොම්නසින් මුළු දිවිය      වැහිලා

දෙන්නගෙම දැන් කෙසුත්  පැහිලා

වැඩ කළත් කන්තෝරුවේ   ඉඳලා

දරුවෙක්ගෙ සුරතල් හිතේ මැවිලා

රට්ටු කියයි දැන් වයස     පැනලා

රිස්ක් එකක් ගන්නට එපා කියලා

කියනවුන්ගෙ හොම්බටම ඇනලා

කියනු රිසි ආතල් නෙමෙයි කියලා

දෙදෙනගෙම වරදක් නෑනෙ    කියලා

ඩොක්ටර් කිව්වත් රිපෝට්       බලලා

බෝඩ් ගැහුවත් බෙල්ලේ         එල්ලා

ගම්මු ඉන්නවද උන්ගෙ කටක්  වහලා

එදත් උදේ දෙවි බඹුන්        වැඳලා 

බලන් උන්නා රාහුත් යනවා පැනලා

අඹු සමඟ මීටර් ටැක්සියක නැගලා

ගියා අපි ඩොකටර් හමුවටය කියලා

මගේ සුබ පැතුම නුඹට පුත කියලා

ඩොක්ටර්ගෙ අත මෙමට දික්කරලා

කිව් වදනින් අප දෙසවන්ද    පිරිලා

අඹුගෙ නෙතඟින් කඳුළු වැක්කිරිලා

දින සති මාස මෙලෙසින්ම ගෙවිලා

අඹුගේ බඩ දැන් ඉදිරියට   නෙරලා

ඈ කන්න ආස හැම කෑම       දීලා

නිරෝගිව මා පුතු ඉපදෙන්න කියලා

කිරි කැටි පුතුගේ කට හඬක්   ඇහිලා

දොර ලඟ සිටි මගෙ ලෝකයම  පිරිලා

දුවගොස් පිය බිරිගෙ හිස         සිඹලා

කීවා අවසන ජීවිතෙ දිනුවා       කියලා

ගමේ තැන තැන පද හොඳට     හදලා

දැන් දුටුවිට යනවා බෙලි බිමට  නමලා

තරහක් නෑ උඹලට අනුකම්පාම කරලා

තාත්තෙකි මමත් ආඩම්බරෙන්  කියලා

මාස හයේදී ඩොක්ටර් හමුවෙන්න කියලා

ගියේ වුණ භාර සැම ඔප්පු            කරලා

පුතුව චෙක් කර හදවත් සිදුරක්ය  කියලා

අඹු සිහසුන්ය එතන ඇද              වැටිලා

ක්ෂණයෙන් මුළු ලෝකෙ කඩා    වැටිලා

දෙවියනේ ඇයි අපිට දඬුවම්       කරලා

දැන් මොකද ඩොක්ටර් කරන්නේ අහලා

දෙඅත් බැඳ මම එහි දණින්       වැටිලා

තව දින දෙක තුනයි තියෙන්නේ    කියලා

ඩොක්ටර් ගියා ලොකු සුසුමකුත් හෙලලා

ඇඳේ වැතිර සිටි පුතුව තුරුළු      කරලා

අඹු අහනවා පුතු යයිද අපිව         දමලා

ඉස්පිරිතාලෙම ඉතිරි දින ටිකත් ගෙවිලා

පුතුගේ හැමතැන බට නොයෙක් ගහලා

දොස්තරලා ඇවිත් හැමදේම      බලලා

නිරුත්තරව යයි මා පිටට තට්ටු   කරලා

අවසන් මොහොත පුතුගේ එළඹිලා

ගහපු බට එකින් එක       ගැලවිලා

අඹු හඬා වැටේ අනේ පුතු    කියලා

පියෙකි මම කිමද අසරණ    කරලා

මව්ගෙ සෙනෙහස අසීමිතය   කියලා

දැනුණෙ මට අඹුගෙ විලාපය  ඇහිලා

මව්ගෙ හඬට හද රිදුමෙ වැඩි   වීලා 

පණ අදින පුතුටත් දැන් එයම දැනිලා

______චරියාගේ පන්හිඳ______

චරිත් විජේමාන්න

ප:ලි: යමෙකුට දරු සම්පත් ලැබෙන්නේ හෝ නොලැබෙන්නේ පෙර කළ කුසල අකුසලයන් හේතුකොටගෙනය. එබැවින් දරු සම්පත් නොලද හිතෙන් පීඩා විඳින මිනිසුන් ගැන තැන තැන අදහස් ප්‍රකාශ කිරීමෙන් හෝ උපහාසයට ලක් කිරීමෙන් වළකින්න. එය ඔවුන් සතු ප්‍රශ්නයකි. ඔවුන් එය විසඳා ගනු ඇත. ඔබ එසේ කරන්නේ නම් මෙලොවදීම ඔබට එය විඳවීමට හේතුවක් වනු නොඅනුමානය.

සමනලුන්ගේ වත ගොත

Posted on | by Digital My Business

පළමු කොටස

අපි කවුරුත් ගස් වලට ආසයි, තව ලස්සන මල් වලට ආසයි, එතැනින් එහාට ගිහාම මේවා ලස්සන කරන සත්තුන්ටත් ආසයි. කුරුල්ලෝ, බත්කූරෝ, පාට පාට චූටි කුරුමිණියෝ වගේම අපේ ඇස් දෙක දුවන තවත් කට්ටියක් තමයි මේ සමනල්ලු කියන්නේ. 

කවුද මේ සමනල්ලු? ලස්සන ලස්සන පාට තියෙන පියාඹන්න පුලුවන් කෘමියෝ රංචුවක් කිව්වොත් කවුරුත් පිළිගනිවී. ඒත් ඇත්තටම මේ ජීවි කාණ්‌ඩෙට මේ නම ලැබුනේ කොහොමද කියන්න කවදා හරි හිතලා තියෙනවද?

“සමාන නාල දෙකක් ඇති හෙයින් සමනලයා යැයි කියනු ලැබේ”. මොනාද මේ නාල? ඔයාලට සමනලයෙක් ගාවට ලන්වේලා බැලුවොත් මෙයාලගේ ඔලුවට සවි වෙලා තියෙන එක සමාන කූරු දෙකක් පේන්න තියෙයි. සමනල්ලු ගැන කතා කරද්දි අපි මේවාට කියන්නනේ ස්පර්ෂක (Antennae) කියලා. ඉතින් මේ පුංචි දූපතේ ඔය වගේ සමනල්ලු කීයක් නම් ඇත්ද? සිය ගනන් දහස් ගනන් ඈතට පියාඹගෙන යද්දි මේ සමනල්ලු කෙහෙද ඉන්නේ?  මෙහෙම පාට වුනේ කොහොමද? මෙයාලගේ නම් මොනාද? වගේ ප්‍රශ්ණ පේලියක් හිතට ගලාගෙන එනවා ඇති. ඒ ප්‍රශ්න වලට පිළිතුරු මේ “සමනලුන්ගේ වත ගොත” එක්ක ඉස්සරහට යද්දි ඔයාලට හමුවෙයි කියලා මම හිතනවා. එහෙනම් අපි සමනල් සවාරිය පටන් ගමු.

ශ්‍රී ලංකාව ඉන්දියන් සාගරයේ පිහිටන නිවර්තන කලාපීය රටක් වන බව අප සැම දන්නා කාරුණකි. මේ දිවයින ඉතා වටිනා කියන සම්පත් රැසකින් සමන්විත සුර පුරයක් යැයි කිවහොත් නිවැරදි. ඒ සම්පත් අතුරින් අපගේ නෙත් දිනාගත් සම්පතක් ලෙස අප අවට සිටින සත්වයින් හැදුන්වන්න පුලුවන්. මේ මාලාවෙන් දිගහරින්න යන්නේ ද ඒවැනි වු අලංකාර දර්ශනයක් ලබාදෙන සමනලුන් පිළිබදවයි. මෙම දිවයිනේ අන්තර් ගත බොහෝ දෑ ඉගෙන ගැනීමේ දි එය පහසු කිරීම සදහා මෙය දේශගුණික කලාප 4 ක ට වෙන් කර දක්වා තිබේ. එනම්, තෙත් කලාපය, අතරමැදි කලාපය, වියලි කලාපය හා ශුෂ්ක කලාපය යි. මේ සියලු කලාප ආවරණය වන පරිදි ශ්‍රී ලංකාවේ දැනට සමනලුන් වි‌ශේෂ 248 ක් වාර්ථා වේ. එයිනුත් විශේෂ 32 ක්  මේවන විට ලංකාවට ආවේනික වේ. 

සමනලුන් ගේ වර්ගීකරණය ගත් කල මොවුන්ගේ ආදි මුතුන් මිත්තන් මෙන්ම මොවන් ද කෘමී වාංශිකයන්ගෙන් පැවතෙන ලෙපි‌ඩෝටෙරා (Lepidoptera) ගොත්‍රයට අයත් සත්ව කාණ්ඩයක්වේ. මොවුන් ගේ අධ්‍යනය පහසු කිරීම සදහාත් ඔබ අප සැමගේ තේරුම් ගැනීම පහසු වීමත්සදහාත් මොවුන් කුල ගනනාවකට වෙන් කර දක්වා ඇත. මේ අතරින් ශ්‍රී ලංකාව තුල කුල වර්ග 6 ක් දැක ගැනීමට හැකිවේ. ඒවා නම් Papilionidae, Pieridae, Nymphalidae, Lycaenidae, Hesperiidae සහ Riodinidae වේ. මෙසේ සමනලුන් මෙවැනි කුල වලට වෙන් කර ගැනීමට ප්‍රධාන වශයයෙන් බලපා ඇත්තේ මොවුන්ගේ රූපවිද්‍යාත්මක සාධක වේ. ඒ පිළිබදව කතා කලහොත්, Papilionidae කුලයේ දක්නට ලැබෙනුයේ ශරීර ප්‍රමානයෙන් විශාල සමනලුන් වේ. විශාල දිගු පියාපත් හා එහි පිහිටන දිගු වල්ගයක් (tornus tail) ද මොවුන්ට පිහිටයි. ඒ වගේම වර්ණය අතින් ද විශාල පරාසයක වර්ණ සහිත සමනලුන් මෙ‌ම කුලයට අයිති වේ.

Pieridae කුලය ගත් විට එහි ප්‍රධාන වශයෙන් ම දැකගත හැක්කේ සුදු හා කහ පැහැති සමනලුන් වේ. මෙම කුලයේ ද සමනලුන් හට ඔවුන්ටම ආවේනික වු ලක්ෂණ රැසක් දක්නට ලැබේ. Lycaenidae කුලයේ අපට දක්නට ලැබෙනුයේ ඉතා කුඩා ප්‍රමාණයේ සමනල්ලු විශේෂ වේ. මොවුන් පියාපත් සලන විට පියාපත් ඇතුලත දීප්තිමත් නිල් වර්ණයක් දිස් වේ.මේ හේතුවෙන් මෙම සමනලුන් Blues යනුවෙන් ද හදුන්වන අතර ලංකාවේ වැඩිම සමනලුන් සංඛ්‍යාවක් සිටින කුලය වශයෙන් හැදින්වීමට හැකිය.

Hesperiidae කුලයේ සිටින සමනලුන් ව්‍යාජ සමනලුන් ලෙස හදුන්වනු ලබයි. මොවුන් පෙනුමෙන් සමනලුන් මෙන් නොපෙනෙන අතර පෙනුම බොහෝ සෙයින් සළඹයිනක් ගේ පෙනුමට සමාන වෙති. නමුත් මොවුන් තුල ඇති යම් යම් ලක්ෂණ හේතුවෙන් මෙ‌ම විශේෂය සමනලුන් අතරට පැමිණ ඇත. Riodinidae කුලය. මෙම කුලයේ විශේෂත්වය  වනුයේ එක් විශේෂයක් පමනක් මෙරටින් හමු වීමයි.  අවසාන වශයෙන් Nymphalidae කුලය, මෙම කුලයේ විවිධ වු සමනලුන් විශාල සංඛාවක් දක්නට ලැබේ. දිවයින තුල හමුවන දෙවනුවට විශාල සමනල වීශේෂ ගනණක් හමුවන කුලය යනුවෙන් හැදින් විය හැක. මෙවැනි විවිධ ලක්ෂණ සහිත සමනලයන් විශේෂ සිය ගණනක් ලංකව පුරා පැතිර සිටින අයුරු අපට දැකගත හැක. 

ඉතින් ලංකාවේ අපිට දකින්න ලැබෙන සමනල්ලු මෙන්න මේ විදිහට කුල වලට බෙදලා වෙන් කරලා තියෙනවා. සමනල්ලු කියන්නේ ඇත්තටම හරිම ලස්සන සත්තු කාණ්ඩයක්. එයාලා ගැන දැන ගන්න අපි කවුරුත් වගේ කැමති. මෙයාලගේ කුල ගැන තියෙන තවත් රස කතා එක්ක ඊලඟ කලාපයේ හමුවෙමු.

Posted on | by Digital My Business

අග්‍රගන්‍ය කළාකරුවකු වන ලූෂන් බුලත්සිංහල මහතාගේ පද රචනයක් වන මුතු කුඩ ඉහලන මල් වරුසාවේ ගීතය ගායනා කරනු ලබන්නේ රෝහණ වීරසිංහ මහතාය.

ගීතය පුරාවටම ඇත්තේ අමිහිරි අත්දැකීමක් මිහිරි ලෙස දුටු ඉතා සංවේදී පිරිමි හදවතක දෝංකාරයයි…. වචනයෙන් වචනයට… මෙන්ම සංගීතයද හිතට අමුතුම හැගීමක් ගෙන දෙන්නේ ඒ නිසාය

මුතුකුඩ ඉහළන මල් වරුසාවේ

උඩ ඉගිලෙන විට වැහි ලේණී

එබී බලා රිය කවුළු දොරින්

යට ගිය දවසේ

දෑස ගියා ඉගිලී….

වැහි ලිහිණියන් ඉගිලෙන පුංචි මල් වැස්සක පාරක ඇවිදගෙන යන එක් ආදරණීය මිනිසෙකුට, රියක නැගී යන ගැහැණියකගේ නෙතට නෙත ගැටෙන්නේ රියේ කවුළුව අතරින්ය. ඒ දුටු විගසම ඔහුගේ නෙත් ඇදුනේ ඈත අතීතයටය.. ඒ සොදුරු අතීතයටය….

අඳුරු ලලා සෙංකඩගල වැස්සේ

දිය දහරා පාටයි දේදුන්නේ

තෙමී තෙමී ආදර මධු වැස්සේ

ගිය දෙදෙනා අද යනවා දෙමංතලේ

අඳුර ගලාගෙන එන වැස්සක තෙමි තෙමී මහනුවර පාරවල් දිගේ දෙදෙනා ඇවිදපු ඒ අතීතය කෙසේනම් අමතක කරන්නද… ආදරය ඉදිරියේ ඕනෑම ගැටළුවක් ඉමිහිරිය .. සොදුරුය … ඉතින් එදා ඒ වැස්ස ඔවුන්ට දැනුනේ ආදරයේ මධු වැස්සක් ලෙසය. දිය දහරා පෙනුනේ දේදුන්නේ පාට වලින්ය ..

ඒ ආදරයේ සොදුරුතම බවයි..

ඒත් එදා එකට ගිය දෙදෙනා එවැනිම වැස්සක අද මාවත් දෙකකය

රිය ඇතුළේ

උණුසුම ඔබට දිදී

නහවයි මා

රියසක මඩ වතුරේ…”

මේ නෙතට නෙත ගැටුනේ අහම්බයකින්ය.. ඒ මේ මෝටර් රථයේ රෝදයෙන් ඉසුනු මඩ පහරින් මේ මිනිසා නැහැවුනු නිසාය. තම ආදරයේ වර්ථමාන අයිතිකාරයා… ඒ ආදරයට රිය ඇතුලේ උණුහුම දිදී වැස්සෙන් ආරක්ෂා කරගෙන, තමන්ව මඩ වතුරෙන් නාවලා යන හැටි බලා මේ මිනිසාට තරහවක් නොදැනුනේ ඔහුගේ ආදරය ඒ තරමටම අව්‍යාජ එකක් වීම නිසාමය..

නෑ හිත රිදුණේ

අදත් එදා සිහිවී

අපේ සබඳකම්

නෑ රිය සක දන්නේ

තමන්ට ආදරය අහිමිකර අද වෙනකෙක් ලඟ සැනසෙන තමන්ගේ ආදරය , අතීතයේ තමන් හා සිටි හැටි ඔහුට මතක්වුනේ හිතට අමුතුම සැනසීමක්ද ලබාදෙමිනි. අද වෙනකෙකුගේ වී, හරි උජාරුවෙන් තමන්වද මඩ වතුරේ නාවා ඉගිලී යන ඇය ගැන මොහුගේ හිතෙ වෛරයක් ඇති නොවුනේ ඔහුගේ හිත ඒ තරමටම නිවී සැනසී තිබූ නිසාය.. යථාර්තය තෙරුම් ගත හැකි උසස් මනසක් ඔහු සතු වුනු නිසාය.

අවංකවම ඔහු ඇයට ආදරේ කල නිසාය

එදා ඔවුන් අතර තිබූ බැඳීම, ආදරය..ඔවුන්ගේ ආදරයේ අතීත ඉමිහිරි මතකයන් වාහනයේ රෝද කේසේනම් දැනගන්නද ….ඒ නිසා මේ සිදුවූ සිදුවීම ගනනකට ගතයුතු නැත

ඔහු සිත සනසාගත්තේ එලෙස සිතමින්ය ..

මෙවැනි සොදුරු මිනිසුන් සැබෑ ලෝකයේ සිටින්නේද ? ….

ඔබෙත් මගෙත් පිලිතුර නැත යන්නයි…

නමුත් …….

අප නිවැරදි නැත … මේ සත්‍යය සිදුවීම සිදුවූයේ ඒ අග්‍රගන්‍ය කළාකරුවා වන ලූෂන් බුලත්සිංහලයන් හටය ..ඔහු අතින් මේ ගීතය ලියවුනේ ඒ අත්දැකීම නිසාය

ඔබ ඔබම වෙන්න

Posted on | by Digital My Business

ඔබ මොන දේ කොහොම කරත් ඔබ අවට අය එය දකින්නේ අඩුපාඩුක් දකින ආකාරයටයි. 

 ළදරුවකුව සිටියදී;

😌”අපෝ ඒ බබාගෙ මහත, අම්ම පිටි කිරිම දීලද කොහෙදෝ”

😌” අපෝ ඒ ළමයගෙ කෙට්ටු.. මන්දපෝෂණේද කොහෙද? අම්මගෙ හැටියටනෙ ඉතිං ළමයා”

😌” ඒ බබාගෙ මූණ ඇදයි නේද?”

😌”අම්මෝ ඒ ළමයගෙ පාට. අඟුරු වගේ. ඒ මදිවට ඇඟේ කොරපොතු වගේ හම”

😌”අප්පෝ ඒ බබාට තියෙන්නෙ කැරපොතු සුදක්”

😌” ඒ ළමය අඬනවා රෑ දෙගොඩහරියක් වෙනකම්. අපිට නිදාගන්නත් නෑ”

😌” අඬන්නෙම නැති ළමයෙක්. මොකක් හරි ලෙඩක්ද දන්නෙ නෑ” etc…

දරුවෙක් ලෙස වැඩෙද්දී;

😒” අපොයි ඒ ළමය කතා කරන්නවත් දන්නෙ නෑ. දෙමව්පියො හදල තියෙන හැටි තමයි”

😒”ඒ ළමයට මෙලෝ දෙයක් ඉගෙන ගන්න බෑ.වැඩ හරිම දුර්වලයිලු”

😒”ඒ ළමයා ආපු තැනක් ඇත්තම් වනසනවා. අපේ ළමයි එක්ක නම් තියන්න හොඳ නෑ. උනුත් නරක් වෙයි”

😒” ඒ ළමය ඉතිං බඩුවක් ගත්තොත් කඩනවානේ” etc..

තරුණ වියට එළබෙද්දී;

තරුණියකට නම්,

————

🤪”අන්න අදත් සක්කරවට්ටම වගේ ඇඳගෙන යනවා. කොහේ යනවද දන්නෙ නෑ “

🤪”ඔය කොන්ඩෙ ස්ට්‍රෙට් කරල පාට ටිකක් උලාගත්තම කොල්ලො පස්සෙන් එයි කියල හිතන් ඇත්තෙ.”

🤪”ඔහොම හිටියට ඕලෙවල් වත් පාස් නැද්ද කොහෙදෝ”

🤪” ගෑණු ළමයෙක් උනාම හැක හැක ගාල හිනා වෙන්ඩ හොඳ නෑ”

🤪”මං ඊයෙත් දැක්ක කොල්ලෙක් එක්ක කතා කර කර ඉන්නවා.කීවෙනි කොල්ලද දන්නෙ නැ. ආයෙ ඒකෙ දෙකක් නෑ හතර පහක් අමාරුවේ දාල ඇති. අම්ම වගේම නැතෑ”

🤪”ඔය ශෝක් කරන්නෙ ඔය ගෙදර මහ මිනිහා අමාරුවෙන් හම්බ කරන සල්ලි”

🤪”කැම්පස් යනව කියලා කොහේ යනවද දන්නෙ නැ. මොකද අපි එතනට ගිහින් බලනවයැ.”

🤪” ඔය රස්සාවක් කියල සාරි බාරි පටලගෙන ගියාට ඇති මොකද්ද දන්නෙ නෑ කරන රස්සාව”

🤪”තාම.බැඳලා නැත්තේ, බඳින්න බැරි වෙන තැනට වැඩ සිද්ද කරගෙන වෙන්න ඇති”

🤪” ඉගෙන ගන්නත් බැරි වෙච්ච එකේ ඔය මිනිස්සුන්ට තියෙන්නෙ කාවහරි අල්ලලා බන්දලා දාන්න” etc…

තරුණයෙකුට නම්;

😎”ඔය කොල්ලා අර මිනිස්සුන්ගෙ සල්ලි නාස්ති කරන තරම්”

😎”ඉගෙන ගත්තෙත් නෑනෙ. කුඩු ගහනවත් ඇති, ඇඟේ හැටි බලන්නකො”

😎” රස්සාවකුත් නැද්ද කොහෙදො”

😎” ඔය කොල්ල දන්න දවසෙ ඉඳන් කරේ නසරානි වැඩ”

😎” කෙල්ලො හය හතක් අමාරුවෙ දාල ඉන්නෙ ඔය”

😎” දැන් ඔය රට යනවා කියලා ගියාට, මතුරටද දන්නෙ නෑ ඉන්නෙ” etc..

විවාහක යුවලකට නම්;

😳”අරගොල්ලො බැඳලා මාස 5-6 වෙනවා.තාම ලමයි නෑ නේද”

😳”ජෝඩුව හිනාවෙලා හිටියට ගෙදරදි ගහ මරා ගන්නව ඇති. පේන්නෙ නැද්ද ගෑනි ඇදිල පැදිල ගිහිල්ල”

😳”ඔය දෙන්න එකතු වෙලා බිස්නස් එකක් කියල කරන්නෙ මොනවද දන්නෙ නැ. කුඩු විකුණනවද දන්නෙත් නෑ”

😳”ෆේස් බුක් එකේ ඔක්කොම දාන්නෙ අපිට පේන්න වෙන්න ඇති”

😳”කෑම හද හදා ඉන්ස්ටා දාන්නෙ බේකරියක් දාලද කොහෙද ගෙදර”

😳”අපි නම් ඔහොම ට්‍රිප් ගිහින් ෆොටෝ හැම තැනම දාන්නෙ නෑ. උන් ඉතිං සෝබනේනේ”

😳”ගෙදර උයලා කරල ළමයි බලාගන්න උන්ට වෙලාවක් නැතුව ඇතු නේද? ඇයි බැලුවොත් ෆේස් බුක් එකේනෙ”

😳”ඔය මනුස්සයා රස්සාවක් කරන්නෙ නැද්ද්ද් කොහෙද? ගෑනිගෙන් කකා ඉන්නව ඇති. රස්ස්වක් කරනව නම් කෝ යනව එනව පේන්න එපැයි”

etc…

     මේ අප එදිනෙදා ජීවිතයේදි අප වටා සිටින්නන්ගෙන් අහන, ඇහෙන දේවල් වලින් ඉතාම අල්පයක්. උපන්දා සිට මරණය දක්වාම එහි වෙනසක් නැ. ඒ වගේම කිසි දිනක අපවටා ඉන්න අයගේ ආකල්ප වෙනස් කරන්නත් බෑ. කළ යුත්තේ අපේ සතුට අපි හොයාගැනීමයි.

       🌹ඔබ යම් දෙයකින් සතුටක් ලබනවා නම්, එය අන් අයට හානියක් නැත්තම් එය පවත්වාගන්න. එය විඳින්න. 

       🌹ඔබට හොඳයි යැයි හැඟෙන දේ ඔබ කරන්න.

       🌹ඔබේ ජීවන වුර්තිය ඔබට අවශ්‍ය ලෙස මිසක් අන් අයට අවශ්‍ය ලෙස තෝරා නොගන්න. ඔබ ලැජ්ජා විය යුත්තේ හොරකම් , මත්ද්‍රව්‍ය , නීති විරෝධී ව්‍යාපාර කිරීමට මිස ඔබ අභිමානවත් ලෙස කරගෙන යන රැකියාව හෝ ව්‍යාපාරය කිරිමට නොවේ.

      🌹ඔබ ඔබම වන්න. අපවාද , ගල්මුල් වැඩි වේවී..

          “ඵල ඇති රුකටනේ ගල් වදින්නේ

     🌹ඔබේ සිහිනය ඔබ මිස අන් අයට දකින්නට ඉඩ නොදෙන්න. 

     🌹ඇති නැති හැම අවස්ථාවකදීම ජීවිතය විඳින්න.

     🌹වෙනස් වන සෑම මොහොතක්ම, අවස්ථාවක්ම එය ඔබේ යහපතට සිදු වුනේ යැයි සිතන්න. එය විශ්වාස කරන්න. පරම සත්‍යය එයයි.

ඉතිං.. ඇයි තවත් පමා..

    අපි ජීවිතය විඳිමු..

©️දිගැZ✍️

තනිවූ කොටි හාමි

Posted on | by Digital My Business

පුංචි දුවලා පුතාලා ඔන්න අද අලුත් කතාවක් කියලා දෙන්නයි මේ හදන්නේ.

මේ කතන්දරය කැලෑවක තනි වූ කොටි හාමි කෙනෙක් ගැනයි.

ඔන්න ඉතින් කොටි හාමිට හරිම කම්මැලියි ඒ වගේම දුකයි. මොකද දන්නවාද කොටිහාමි ගොඩ දවසක් තනියෙම ම ජීවත් වුණ නිසා. තවදුරටත් මෙහෙම ඉන්න බෑ කියලා හිතුනා. ඉතින් කොටිහාමි හිතුවා මේ කැලෑවේ ඉන්න අනෙක් සතුන් සමඟ යාලු වෙන්න ඕන කියලා. 

නමුත් කොටිහාමි ට බයයි අනෙක්‌ සතුන් මා එක්ක මිතුරු වෙයි ද?. මට බය වෙයි ද කියලා.. 

ඔහොම කල්පනා කරමින් යන විට දැක්ක අලි රංචුවක්  සෙල්ලම් කරනවා. හෙමි හෙමින් කොටිහාමි ලොකු කොළ කිහිපයක් අරන් ඇඟේ දවටා ගත්තා. දැන් මාව අලියෙක් වගේ පෙනේවි යයි කියා හිතුවා. හොඬවැල වෙනුවට ලී කැබැල්ලක් ගෙන කටින් අල්ලා ගත්තා. 

වෙස්වළා ගැනීම නම් විශිෂ්ටයි ඔහු හිතුවා. 

ටික ටික අලි රංචුව ළඟට කිට්ටු උනා. මේ යාලුවනේ මොකද්ද අද අපි කරන සෙල්ලම ඔහු ඇහුවා. 

අලි රාළ කෙනෙක් හොඳින් කොටි හාමි දිහා බැලුවා. ඔබ අලියෙක් නොවෙයි. කොටියෙක් ඉතින් අපි ඔබ සමඟ සෙල්ලම් කරන්නේ නෑ. අලි රාළ කිව්වා. කොටි හාමි ට දුක හිතුනා. ඔහු හෙමි ට එතනින් ඉවත් උනා. 

මේ විදියට එක් එක් ආකාරයේ සතුන් ලෙස වෙස් වෙලාගෙන එම සතුන් එක්ක මිත්‍ර වෙන්න කොටි හාමි උත්සාහ කළා. නමුත් ඔබ කොටියෙක් කවුද කොටියෙක් සමඟ මිතුරු වෙන්නේ කියලා සතුන් හැමෝම ඔහුව තනිකර දමා ගියා. 

කොටි හාමි හරිම දුකෙන් ආපසු ගුහාව වෙත ගියා.  

ටික වෙලාවක් යද්දි කැලෑව ඇතුලෙන් ශබ්දයක් ආවා. හිස ඔසවා බැලුවා මෙතරම් විශාල ශබ්දයක් මොකද්ද මේ..  අහා.. මම වගේමයි… කොටි රංචුවක් නේද.. කොටි රාළට හිතා ගන්න බැරි වුණා. ඔහුට හරිම සතුටු හිතුනා දුවගෙන ගියා එදෙසට… 

නමුත් ඒ හිටියේ කොටි හාමිලා නම් නොවේ. ඇඟේ ඉරි ඇඳගෙන වෙස්වළාගෙන ඉන්න අනෙක් සතුන්. 

ඒ හැමෝම ඇවිත් තියෙන්නේ කොටි හාමි දුකෙන් තනියම ඉන්නවා දැක්ක නිසා. ඔහුට ඇති බිය නිසා ඔහුව ප්‍රතික්ෂේප කළත්, අනෙක් සතුන් කොටි හාමි ට අවස්ථාවක් දෙන්න ඕන කියලා තීරණය කර තිබුණා. 

ඉතින් කොටි හාමි ට හරිම සතුටුයි. ස්තූති කලා ඔහුව හොයන් ආවට. ඒ වගේම ඔහු පොරොන්දු වුණා ඔහු ගෙන් කිසිම අනතුරක් අනෙක් සතුන් ට නොවන බවටත්.. 

 ඉතින් ඔන්න කොටි හාමි හැමෝ එක්කම සතුටින් සෙල්ලම් කළා. ආයේ කවදාවත් තනිවම දුකින් හිටියේ නෑ. 

අලුත් කතාවක් එක්ක නැවැතත් හමු වෙමු. 

පුංචි දුවලා පුතාලා සතුටින් ඉන්න. 

තිලෝ ප්‍රනාන්දු.

වේශ නිරැපණයෙන් අලුත් හැඩතල මවන අපේ රුවැත්ති- ROSHINI SULOCHANA

Posted on | by Digital My Business

රෝෂිනී කියන්නෙ ඔයාගෙම වචනෙන් කිව්වොත්

සංකීර්ණ වෙන්න ඕන තැන සංකීර්ණ වෙන , අනිත් අය වගේම සාමාන්‍ය සරල මනුෂ්‍යයෙක්

ඔයාගෙ පවුලෙ විස්තර ටිකක් කිව්වොත් 

මගෙ පව්ල ඇතුලෙ ගොඩක් අය ඉන්නව , හැබැයි මම හදාගත්ත පව්ලෙ ඉන්නෙ , මගෙ ජිවිතය ඉදිරියට ගෙනියන්න බලාපොරොත්තු ඇතිකරන දඟකාර දුවයි , ඒ බලාපොරොත්තු වලට හයියක් වන මහත්තයයි .

රැකියාව ගැන පොඩ්ඩක් කතා කරොත්

හරි ඔන්න ඔතනදි මට ගැලපෙන පිලිතුරක් දෙන්න අමාරුයි ,හැමෝම දන්නෙ වේශනිරැපනය කියන දේ ම⁣ට රැකියාවක් කියන ඒක , වේශනිරැපනය කියන දෙය මට පුදුම ලස්සන කලාවක් , මම හරිම ආසාවෙන් කැපවීමෙන් කරන කලාවක් , ගොඩක් අවස්ථාවල මම එක්ක වැඩ කරන අය කියන්නෙ මම මුන සිතුවමක් කරනව කියල , ඉතින් ඒ නිසාම මේ කලාව මගෙ විනොදාන්ෂ්‍ය වෙලා තියෙන්නෙ .

මොනවගේ styles ද අපිට රෝෂිනීගෙන් දැනගන්න පුලුවන්

වේශනිරැපනය තුල තියෙන විලාසිතා බොහොමයි ,  Dramatics, gothic, artistic, natural, bridal , tv , makeup කියල විවිධ විලාසිතා තියෙනවා , මේ එකකට එකක් වෙනස්වන අවස්තා තියෙනවා, අපි සාමාන්‍යයෙන් කරන ⁣makeup එකක් , tv makeup එකකට or photo shoot එකකට දාන්නෙ නැහැ , .ඒ වගේ දේවල් වලදි අපි භාවිතා කරන technic එකේ ඉන්දන් products එක දක්වා වෙනස් කරන අවස්තා තියෙනවා, 

මේ වෙන කොට බොහොම සුළු නිර්මාණ කොටසක් තමයි බාවිතා කරල තියෙන්නෙ , ඉදිරියට හරිම හෙමින් තව නිර්මාණ කරන්න බලාපොරොත්තු වෙනවා .

ලංකාවෙන් එංගලන්තෙට ආපු එක ගැන අද දැනෙන්නෙ කොහොමද 

සරලව කියනවනම් මට ලොකුවට හැඟිමක් දැනෙන්නෙ නැහැ , හැබැයි මේ වගේ රටක අපිට ඉගෙන ගන්න දේවල් බොහොමයි , ඉතින් ඒ නිසා සතුටුයි , මගෙ කලාව මට තව දුරටත් මේ වගේ රටකින් ඉගෙන ගන්න පුළුවන් එක ගැන .

Beautician  කෙනෙක් උනේ කොහොමද?  ආපු ගමන ගැන කිව්වොත් 

අයිය ප්‍රශ්නය ඇහුව වැරදි , මම beautician ( රැපලාවන්ය ශිල්පියෙක්) කෙනෙක් නෙවෙයි , 

මම Make up artist ( වේශනිරැපන ශිල්පියෙක් ) කෙනෙක් ,  මේ දෙක අතර ඇත්තටම වෙනසක් තියෙනවා , මේ දෙන්නම මේ දෙකම කරාට , මේක ෂේෂ්ත්‍ර දෙකක් ,  සරලව කියනවනම් beautician හම , පැහැය , නිය , හිසකස් , මේ බොහොමයක් දේවල්  මනාව හසුරුවන කෙනෙක් , 

 Makeup artist, පෙනුම , වෙනස් අකාරයකට හෝ අලුත් වේශයකට වෙනස් කරන කෙනෙක් 

මට නිර්මාණය කරන්න තිබ්බ ආසාව එක්ක තමයි , මම මෙතෙන්ට අවතිර්ණ වුනේ , වෙනස් දේවල් කරන්න ඕන වුනා , out box  හිතල නිර්මාන කලා , මගෙ කලාවට ආදරය කරන අය බොහොම දෙනා ඒවා ආදරයෙන් වැලඳ ගත්ත .හැමෝම මගෙ නිර්මාණයන් දකින නිසා මම ඒ සම්බන්ධව කතා නොකර ඉන්නම් .

මම ආපු ගමන ගැන නිහතමානිව ආඩම්බරයි , හැම දෙයක්ම. Products , technics , style තනියම ඉගෙන ගත්ත  . ඒ වගේම ගොඩක් දෙනාට ඉගෙන්නුව , 

මගෙ දැනුම බෙදා ගත්ත , වෙන රටවල් වල සහ අපේම අනිත් makeup artist ලට පවා මම දනන් දේ මම කියල දුන්න , මට ඇත්තටම සතුටුයි .

 ලංකාවේ සහ එංගලන්තයේ  Makeup artist කෙනෙකුගෙ තියෙන්නෙ වෙනස්කම් ගැන කිව්වොත්

මෙහෙමයි ,  මම දකින දෙයක් ලන්කාව මනාලියන් හැඩ ගැන්විම ඉතා සාර්ථකව කරනවා , හැබැයි ලංකාව Avatar film එකක් වගේ දෙයක් කලොත් , එදාට මම , ඔයා ,මේ හැමෝම ලංකාවෙයි පිටරටයි වේශනිරැපනයෙ වෙනසක් නොදකියි .

Makeup artist කෙනෙක් ලෙස ඔයා ලබපු අද්දැකීම් සහ අලුතෙන් මේ ක්ශේත්‍රයට එන අයට මොනවද දෙන උපදෙස්

අත්දැකිම් හොන්ද වෙන්න පුලුවන් නරක ඒවා වෙන්න පුලුවන් , හැබැයි ඒ හැම දෙයක්ම මට ආශිර්වාදයක් , ශක්තියක් වුනා. අත්දැකීම් කියන්න තරම් සුන්දර නැහැ , ඒ නිසා නොකිය ඉමු. 

අලුතින් එන අයට කියන්නේ , මුලින්ම මේ කලාවට ආදරය කරන්න , අලුත් දේවල් කරන්න , හොයන්න , experiment කරන්න , මම ගොඩක් දේවල් ඉගෙන ගත්තෙ තනියම experiments  කරල , අනිත් නිර්මාණ බලන්න , inspired වෙන්න .

 ජීවිතයෙ ලස්සනම දවස ගැන පොඩ්ඩක්  මතක් කරොත් සහ රෝෂිනීගෙන් අපෙ අයට මොනවගේ සහයෝගයක් ද ලබා ගන්න පුළුවන් contact කරගන්න පහසුම විදිය

මගෙ ලස්සනම දවස , මට ලැබුනෙ  පුංචි කෙල්ලක් කියල nurse මගෙ පපුවට මගෙ කෙල්ලව තියපු දවස . 

අපි දුවෙකුට ආසාව තිබ්බ , හැබැයි දරැව ලැබෙනකම් gender එක check කලේ නැහැ,  ඉතින් ආසාවත් එක්ක ලොකුම බලාපොරොත්තුවක් ඉටුවුනු ලස්සනම දවස ඒ, 

මගේ සේවාවන් , 

මම Bridal සම්බන්ධයෙන් කතා කලොත් , මම , Indian , western , Sri Lankan ( kandiyan) Jewellery  වල ඉන්දන් , ඇදුම් පැලදුම් , මල් , සහ අනෙකුත් සැම කටයුත්තක් සදහාම සහය වෙන්න පුලුවන් හැකියාවක් මට තියෙනවා ,  

ඒ වගේම tv , film , shoot , වැනි නිර්මානවල වේශනිරැපනයට මගෙ දැනුම බෙදාදෙන්න මම සුදානම් , 

ඔයාලට වේශනිරැපනය සම්බන්ධයෙන් තියෙන ගැටලු වලට හැකි ආකාරයෙන් සහයෝගය ලබාගන්න පුලුවන් . 

මාව සම්බන්ධ කරගන්න පුලුවන් 

පහත  ආකාරයන්ට . 

Beyond Reality- Artistic Makeup ( fb page & Instagram page) 

Roshini Sulochana ( fb profile) 

07453 419227 Mobile / WhatsApp

අපි Magazine එක ගැන සහ ඒකට ලියන්න ලැබීම ගැන මොකද හිතෙන්නෙ.

මුලින්ම Magazine එකේ කතෘ ගයාන් අයියට ස්තුති කරන්න ඕනෙ , පිටරටක ඉනන් අපේ අනෙත් සහෝදර සහෝදරියන් ගෙ නිර්මාණය එලි දක්වන්න තෝතැන්නක් හදන එකම කරන ලොකු ආශිර්වාදයක් මේ හැමෝටම , අවුරුද්දකටත් වඩා වැඩි කාලයක් , මටම වෙනම fashion පිටුවක් වෙන් කරල ,  මගෙ නිර්මාණය වලට අවස්ථාවක් දෙන එකට බො⁣හොම ස්තුති කියල මම නවතින්නම් .

රෝගියෙකු වෙනුවෙන් දෙන සේලයින්

Posted on | by Digital My Business

ඔන්න දැන් අපේ රටේදීම නිෂ්පාදනය කරන්න පටන් අරන් ,එලෙස නිශ්පාදනය  කළ පළමු සේලයින් තොගය රාජ්‍ය සෞඛ්‍ය අංශ වෙත බෙදා හැරීම  පහුගිය දවස්වල ආරම්භ කලා. සේලයින් සදහා වසරකට විශාල මුදල් ප්‍රමාණයක් විදෙස් රටවලට යාම මෙමගින් ඉතිරි කරගැනීමට හැකිවීම නිසා 

මේක අපේ රට ලැබූ විශාල ජයග්‍රහණයක් විදිහට කියන්න පුළුවන් .

ඒවගේම සම්පූර්ණයෙන් විෂබීජ රහිතව සිරුරට විෂ නැති ප්ලාස්ටික් බෝතලයක ගබඩා කර, විද්‍යානුකූලව පහසුකම් සහිත බෙහෙත් කර්මාන්තශාලාවල තමයි  සේලයින් නිපදවන්න පුළුවන් ,

ඇත්තටම සේලයින් කිව්වම  හුගක් දෙනෙක්ගෙ තියෙන්නෙ වැරදි මතයක් කියල හිතෙනවා ,ඒකට හේතුව තමයි රෝහල්ගත කල රෝගියෙකුට සේලයින් එකක් දුන්නොත් ඒ ලෙඩා හුගක් අසාධ්‍ය තත්වයෙ ඉන්නෙ කියල සමහරු හිතනවා,සේලයින් එකක් නොදුන්නොත් ඒකත් පොඩි ගැටලුවක් ,

ඇත්තටම කිව්වොත් මේ සේලයින් කියන්නෙ අපි ආහාරයට ගන්නා ලුණු Nacl එහෙම නැත්තං සෝඩියම් ක්ලෝරයිඩ් ඉතා ස්වල්පයක් මිශ්‍ර වූ පිරිසිදු ජලය .

“සේලයින් වලට ඕනෙ නම් බේත් දාලා දෙන්න පුලුවන්. 

එතකොට ඔබට හිතෙයි අපිට මේ සේලයින් කියල ලුණු මිශ්‍ර වතුර දෙන්නෙ මොකද කියල ,

රෝගියෙකුගේ රුධිර පීඩනය  අවස්ථාව අනුව රෝගය අනුව වෙනස් වෙන්න පුළුවන් .ඒ කියන්නේ රෝගියාගේ රුධිර නාල ඇතුලේ අවශ්‍ය තරම් රුධිර පීඩනයක් නැති අවස්ථාවක් .

රුධිර නාල රබර් බට වගේ. ඒවා ඇදිලා තියෙන්නේ ඒවා ඇතුලේ ගලන රුධිරයේ පීඩනයක් තියෙන නිසා. ඒ පීඩනය ‍ලබා දෙන්නේ හෘදයෙන් කරන පොම්ප කිරීමෙන්. ඉතින් මේ පීඩනය අඩු උනොත් බට ඇකිලිලා හෘදයෙන් ඈත තියෙන අවයව වලට රුධිර සැපයුම අඩු වෙන්න පුලුවන්. මේ අතරින් මොළය, වකුගඩු වගේ අවයව විශේෂයි. රුධිර සැපයුම අඩු උනොත් ඒවට පෝෂණය සහ ඔක්සිජන් හරියට ‍නොලැබී ‍ඒවා මිය යන්නටත් පුලුවන්. වතුර බීලා ඒ පීඩනය නිවැරදි කරන්න අමාරුයි. ඉතින් ඒ වගේ අවස්ථාවක ඉක්මණින් රුධිර පීඩනය තාවකාලිකව ඉහළ නංවන්න තමයි රෝගියෙකුට  සේලයින් දෙන්නෙ . 

ලුණු තිබෙන නිසා සේලයින් වල රුධිරයට සාපේක්ෂව සමාභිසාරක ද්‍රාවණයක් (isotonic solution) නිසා ශරීරයේ සෛල හා රුධිර නාල පුරා සමව බෙදී යනවා. 

” මීට අමතරව අවස්ථාව හා රෝගීන්  අනුව භාවිතා වන සේලයින් වර්ගත් තියනව “

 අපි කතා කරන මේ Normal Saline හැමෝටම දෙන්නෙත් නෑ ,මොකද 

අනවශ්‍ය විදියට සේලයින් දෙන්න යන එකෙන් වෙන  කරදර ගොඩක් වෙන්න පුලුවන්.ඒ තමයි 

1. විෂබීජ ශරීරයට පහසුවෙන් ඇතුල්වීම (cannula site infections) :

* සේලයින් දෙන්නේ cannula නම් ශරීරයේ බාහිරයේ සිට ශිරාවකට ඇතුල් කළ කටුවක් හරහා. මෙසේ කිරීමේදී සම මතුපිට ඉන්න විෂබීජ රුධිරයට ඇතුල් වීමේ අවදානමක් තිබෙනවා. ඉතින් මේ කටු මාරු කරන්න වෙනවා දවස් 3කට වැඩියෙන් භාවිතා වෙනවා නම්.

2. රුධිර නාල තුළ තරල ප්‍රමාණය ඉහළ යාම (fluid overload) : හෘදයට වැඩිවූ තරල ප්‍රමාණය පොම්ප කර ගැනීමට නොහැකි වීමෙන් අකර්මන්‍ය (Heart Failure) වෙන්න පුලුවන්.

3. රුධිරයේ  Na+, K+, Cl- වැනි අයන අසමතුලිතතා ඇතිවීම : හෘදයාබාධ ඇතිවී මරණයට පත්වීමේ අවදානමක් තිබෙනවා. 

4. අසාත්මිකතා (allergic reactions) :  කලාතුරකින් ඇතිවිය හැක. විශේෂයෙන් සේලයින් හරහා වෙනත් ඖෂධ ලබාදීමේදී බහුලවම දක්නට ලැබෙනවා. කෙලින්ම රුධිරයට කලවම් වන නිසා බරපතල තත්වයන් (anaphylaxis) පවා ඉක්මණින් ඇතිවී මරණයට පත්වීමේ අවදානමක් තිබෙනවා.

නමුත් වෛද්‍යවරු මේ ඖෂධ දීමේදී ඉතා සැලකිලිමත් ලෙස මාත්‍රාව හසුරුවන නිසා මෙවැනි දේ ඉතා කලාතුරකින් තමයි දකින්න ලැබෙන්නෙ. ඒනිසා ඔබ ඒගැන බියවිය යුතු නැහැ .

ඒවගේම  සේලයින් බෝතලයේ හැඩරුව ඇති ඖෂධ වර්ග රාශියක්  එලෙස ලබා දෙනවා. උදාහරණ ලෙස

# 5% ග්ලූකෝස් ද්‍රාවණය රුධිරය අඩු වු විට දෙන ප්ලස්මා වැඩිකරන දේවල් හෙවත් Plasma expanders, 

# මුඛයෙන් ආහාර නොගන්නා විට දෙන ආහාරමය ඖෂධත්, අධික පාචනය, වමනය නිසා රුධිර පොටෑසියම් අඩු විටෙක දෙන “හාට්මාන්” නම් ඖෂධයත් තවත් එවැනි ඖෂධ කිහිපයකුත් හඳුන්වන්න පුළුවන්.

නමුත් ඉතා බහුලව පාවිච්චි කරන සේලයින් ද්‍රාවණය “සාමාන්‍ය සේලයින්” හෙවත් “Normal Saline” ලෙස හඳුන්වනවා. 

මේ සාමාන්‍ය සේලයින් ලබා දෙන්නෙ ප්‍රධාන වශයෙන් ශරීරයට ජලය හා ලවණ අවශ්‍ය වූ විට .

උදාහරණයක් ලෙස 

* වමනය, පාචනය, අධික දහදිය ආදී ලවණ හා ජලය ශරීරයෙන් පිටතට යන අවස්ථාවල.

* අධික රුධිර වහනය වැනි අවස්ථාවක රුධිරය ලබා දෙන තෙක් හා සාමාන්‍ය රුධිර වහනයකදී ප්‍රතිකාරයක් ලෙසත් සාමාන්‍ය සේලයින් වැදගත් වෙනවා.

* කම්පන තත්වයක් (shock State) ශරීරයේ රෝගාබාධයක් නිසා රුධිර පීඩනය ඉතාමත්ම අඩු වී කම්පන තත්වයක් ඇති වූ විට රුධිර පීඩනය වැඩිකිරීමට.

* ශල්‍යකර්මවලදී ශරීරය ඇතුළත පිරිසිදු කිරීමට ජලය වෙනුවට සාමාන්‍ය සේලයින් භාවිතා කරනවා

* තවද ඇස, කන, නාසය වැනි ඉන්ද්‍රියන් පිරිසිදු කිරීමටත්, තුවාල පිරිසිදු කිරීමටත්, ඒ ස්ථානයන්ට පමණක් සේලයින් පාවිච්චි කරනු ලබනවා.

* මීට අමතරව සමහර බෙහෙත් වර්ග, විටමින් ආදිය ශරීරය තුළට ලබා දෙන මාධ්‍යයක් ලෙසත් භාවිතා කරනවා.

 ඇත්තටම අපි රෝගී වූ විට සේලයින් අපිට යම්කිසි ජීවයක් ලබා දෙනවා කියන එක සේලයින් භාවිතා කරන අවස්ථා දිහා බැලුවාම ඇත්තක් කියලා කියන්න පුළුවන්. නමුත් හොඳට මතක තියාගන්න සේලයින් ලබා දිය යුත්තේ ඇත්තටම සේලයින් අවශ්‍යම විටෙක පමණක් නිසා “සේලයින් ටිකක්වත් දුන්නේ නැහැ කියලා” හිත නරක් කර ගන්නත් එපා.

නිශා

කෙසෙල් වලින් කේක් එකක් (Banana Cake)

Posted on | by Digital My Business

අවශ්‍ය ද්‍රව්‍ය: 

– හොඳට ඉදුණු කෙසල් ගෙඩි 2 ක්. ( 250g පමණ)

– බිත්තර 3 ක්

– ලා දුඹුරු සීනි 100g

– තෙල් 150 ml (sunflower or vegetable oil)

– පිටි 275g 

– කුළුබඩු මිශ්‍රණය තේ හැඳි 1 (spice mix)

– බේකින් පවුඩර් තේ හැඳි 1

සාදන ක්‍රමය: 

– බේක් කිරීමට ගන්නා 6″ කේක් ටින් දෙකක් බේකින් පේපර්ස් දමා සකස්කර ගන්න. පිටි  සහ බේකින් පවුඩර් පිටි හලනයකින් හලා පසෙකින් තබන්න. 

– Oven එක සෙල්සියස් අංශක 170 උෂ්ණත්වයේ විනාඩි දහයක් පමණ කලින් රත්කර ගන්න. 

– කෙසෙල් ගෙඩි ගෑරුප්පුවක් ආධාරයෙන් කැටි නැතිවන තුරු හොඳින් පොඩි කරගන්න. එයට බිත්තර, සීනි සහ තෙල් එකතුකර whisk එකක් හෝ hand mixer එකක් ගෙන හොඳින් කළවම් කරගන්න. 

– ඉන්පසුව පිටි මිශ්‍රණය ද එකතුකර කැටි නැතිවන තුරු හොඳින් කළවම් කරගන්න. කලින් සකසා ගත් කේක් ටින් දෙකට සම සමව දමා විනාඩි 40 බේක් කරගන්න. විනාඩි 40 පසු පොඩි toopick එකක් ආධාරයෙන් බේක් වී ඇද්දැයි බලන්න. බේක් වී මඳිනම් තව විනාඩි 5-10 ක් තබන්න. 

– හොඳින් නිවුනාට පසු පිළිගන්වන්න.

Anushka Nanayakkara

 (Diploma in Cake Decorating. RL Clement Cake School, Sri Lanka)

ගෙදරම ඉන්න නිසා ඇඟ හැඩ කරලා – ලෙඩ අඩු කර ගන්න සාර්ථකම ක්‍රමේ මෙන්න

Posted on | by Digital My Business

ස්ත්‍රී පුරුශ භේදයකින් තොරව අපි හැමෝම කැමතිනේ අනිත් අයට පේනන හැඩට වැඩට ඉන්න. ඉතින් මේ කොරෝනා කාලේ ගෙදරටම වෙලා ඉන්න ඔයාලව තවත් ලස්සන කරන්න පුලුවන් ඒ වගේම නිරෝගී කරන්න පුලුවන් වටිනා ක්‍රමයක් කියලා දෙන්න තමයි මගේ මේ සූදානම. ඒ ක්‍රමය තමයි ‘විරේචන’ එහෙමත් නැතිනම් විරේක කිරීම. අපේ මිනිස් සිරුරේ ක්‍රියාකාරිත්වය යන්ත්‍රයකට සමානයි. යන්ත්‍ර සුත්‍ර නිසි පරිදි ක්‍රියා කිරීමට නම් නිසි කලට පිරිසුදුකර අලුත්වැඩියා කරනවනේ. එ වගේම තමයි අපේ මේ  මිනිස් සිරුර ද වරින් වර පිරිසුදුකර අලුත්වැඩියා කිරීම අනිවාර්ය වෙනවා. අපි අපේ සිරුර පිරිසුදු කරනු ලබන්නේ බාහිරව පමණයි. ඒ වුනත්  මිනිස් සිරුරේ, ක්‍රියාකාරිත්වයට, ආයු කාලය ට, නිරෝගී බව වර්ධනයට; අපේ  සිරුර අභ්‍යන්තරව ද පිරිසුදු කිරීම අනිවාර්යයෙන්ම කල යුතු දෙයක්.

ඉතින් අපි දැන් බලමු කොහොමද මිනිස් සිරුරේ අභ්‍යන්තරය මනාව පිරිසුදු කරන්නේ කියලා. මේ සඳහා වමන, විරේචන, නස්‍ය, වස්ති හා රක්ක මෝක්ෂණය යනුවෙන් ප්‍රතිකාර විධි පහක් තියෙනවා. මේ අතුරින් වෛද්‍යවරයකුගේ උපදෙස් මත එහෙත් වෛද්‍යවරයකු නොමැතිව කළ හැකි එකම ප්‍රතිකාරය වන්නේ විරේචන කර්මයයි. විරේචන ප්‍රතිකාරය සාමාන්‍ය ව්‍යවහාරයේදී විරේක කිරීම, බඩ විරේක කිරීම යනුවෙන් හඳුන්වනවා. සාමාන්‍යයෙන් කාන්තා, පිරිමි භේදයකින් තොරව සෑම අයකුම මාස හයකට වතාවක්වත් විරේක කර්මයක් කළ යුතුමය.

සිරුරේ අප ගන්නා ආහාරපානවල නො දිරවු ඇතැම් කොටස් ශරීරයෙන් පිට නොවී ශරීරය තුළම තැන්පත්ව පවතිනවා. ඉතින් මේ විරේක කිරීමෙන් අධෝ මාර්ගයෙහි තැන්පත් වන මල කොටස් හෙවත් අපද්‍රව්‍ය සිරුරෙන් බැහැර වී යනවා. එවිට සිරුරේ නාලවල අවහිරතා මඟ හැරී සිරුරේ ක්‍රියාකාරීත්වය නිසි පරිදි සිදුවනවා. විශේෂයෙන් අතීතයේ සිටම මිනිසා  තම ආයු කාලය හා නිරෝගීබව වර්ධනය කරගැනීමට විරේක කිරීම භාවිතා කලා. විරේක කිරීම හරහා කාන්තාවන්ට මෙන්ම පුරුශයින්ටද  තම රූ සපුව ඔප් නංවා ගත හැකියි.

ක්ෂණික පහසුව හා ප්‍රතිඵල පසුපස හඹා යන මිනිසා බටහිර ජාතීන් අපට හුරු කළ පණු බෙහෙත් ,මල්ටි විටමින් ,විවිධ රෑපලාවන්‍ය පෙති වර්ග අහුරු පිටින් ගිල දමනවා. පණු බෙහෙත් බීම නරක නැහැ. නමුත් පණු බෙහෙත් බීමෙන් සිදු වන්නේ මිනිස් සිරුර අභ්‍යන්තරයේ ජීවත්වන නිශ්චිත සත්ත්ව කොටසක් පමණක් විනාශ වී යෑමයි. එයින් අප සිරුරේ නාලවල පවතින අවහිරතා මඟ හැරී යන්නේ නැහැ. නමුදු විරේක කිරීමෙන් මිනිස් සිරුරේ සියලුම නාලවල පවතින අවහිරතා මඟ හැරී ගොස්, ශරීරයේ සැහැල්ලු බව, නිරෝගී බව, ආහාර රුචිය, කුසගින්න, පිපාසය හොඳින් වර්ධනය වෙනවා. පසිඳුරන් හා මනස යන මේවායේ පවිත්‍රතාව, ශාරීරික ශක්තිය, බුද්ධිය හා සිරුරේ පැහැය වර්ධනය වෙනවා.

විරේක කිරීම ඔස්සේ රූපලාවණ්‍ය ආරක්ෂා වන්නේ මෙලෙසිනි. අධෝ ප්‍රදේශයේ සියලු නාලවල අපද්‍රව්‍ය එක් රැස් වී පිට නොවී පැවතීමෙන් සිරුරේ පැහැය අවපැහැ වේ. විරේක කිරීම හරහා අපද්‍රව්‍ය ඉවත් වී ශරීරය පැහැපත් වෙනවා. ඊට අමතරව ඇස් වටා කළු පැහැය ඉවත් වීම,  මුඛයේ හා දහදිය දුගඳ දුරු වීම, අධික තරබාරු බව දුරුකර ගැනීමට ද විරේක කර්ම මඟින් සහනයක් ලැබෙනවා. විරේක කිරීම නුසුදුසු අය ලෙස; උණ හා අජීර්ණ රෝගීන්ට, කුඩා ළදරුවන්ට, මහලු අයට, ශාරීරික ශක්තිය දුර්වල වූවන්ට හා ගර්භණී කාන්තාවන්ට විරේක කිරීම නුසුදුසුය. විරේක කර්ම කළ යුත්තේ ද අලුයම් කාලයේ දී බව ආයුර්වේද පොත්පත්වල සඳහන් වෙනවා.

විරේක ඖෂධ කිහිපයක් පහත පරිදි දැක්විය හැක. නමුත් මේවා භාවිය්හයට පෙර ඔබට සුදුසු නුසුදුසු බව බැලීම සඳහා අනිවාර්‍යෙන්ම උපාධිධාරී ආයුර්වේද වෛද්‍යවරයෙකුගේ සහය ලබා ගැනීම ඉතා යෝග්‍ය වේ.                   

⏩ තැඹිලි ගෙඩියක් ඇස්ස කපා, එයින් තැඹිලි වතුර ස්වල්පයක් ඉතිරිකර එයට අරළු කලං 6, සුකිරි කලං 6 ක් කුඩුකර දමා තැඹිලි ගෙඩියේ ඇස්ස වසා රාත්‍රියේ පින්නේ තබා උදැසන පෙරා පානය කිරීම.

⏩අරළු කලං 4, බුළු කලං 4, නෙල්ලි කලං 4 බැගින් ගෙන වතුර පත අට එකට සිඳ උදෑසන සීනි හෝ එරඬු තෙල් හෝ සහිඳ ලුණු ස්වල්පයක් දමා පානය කිරීම.

 ⏩වෙළෙඳ පොළෙන් මිලදී ගත හැකි ත්‍රිපලා චුර්ණය, ධාත්‍රි චුර්ණය, මනිභද්‍ර චුර්ණය, සුකුමාර චුර්ණය, යන මේවායින් එක් වර්ගයක් තේ හැඳි එකක ප්‍රමාණය උණු වතුර අඬු කෝප්ප එකකට දමා විනාඩි 10 ක කාලයක් වසා තබා රාත්‍රී නින්දට පෙර පානය කිරීම.

⏩විරේක ඖෂධ පානයෙන් පසු සිසිල් ජලය කිසිදු විටෙකත් පානය නොකළ යුතුයි. විරේක වනවිට වරින් වර උණුසුම් ජලය පානයට දියයුතු අතර, එමඟින් විරේක ක්‍රියාවලිය පහසු වේ. විරේක වුවා ඇති යැයි සිතුණහොත් සිසිල් දිය, කෝපි, තැඹිලි පානයෙන් විරේක වීම නවතී.

⏩විරේක කළ දින උදෑසන ආහාර ගැනීම නුසුදුසුය. දහවල ආහාරය සඳහා කැඳ වර්ගයක් ද රාත්‍රි ආහාරය සඳහා උකු කැඳ වර්ගයක් ද ගත හැකියි. විරේක වුවාට පසු උණු ජලයෙන් අත් පා සෝදා ගැනීම, මඳ උණුසුම් පේයා ලබාදීම කළයුතු අතර තවදුරටත් විරේක වීම වැළැක්වීමට මී පැණි තේ හැන්දක් බීමට ලබා දිය යුතුයි.

වෛද්‍ය ආර්. චන්ද්‍රිකා රාජපක්ෂ

M. Sc. (UoP-SL),

BAMS (UoC-SL),

Dip. in Ayurveda Beautyculture treatments and Beautycare