Month: January 2023
අනඳ අභිනන්දන
අලුත් යාලුවා.
නිරෝගී දරු පරපුරක් උදෙසා රත කල්කයේ ආයුර්වේදීය වටිනාකම
රටක යහපත් වූ අනාගතය තීරණය කරනුයේ නිරෝගී දරු පරම්පරාවක් විසිනි. රටක් භෞතික තත්වයන්ගෙන් කෙතරම් සශ්‍රීක වුවත්, සම්පත් නිවැරදිව කළමණාකාරණය තුළින් අනාගත සුරක්ෂිත බාවය කරා රැගෙන යන්නේ වර්තමානයේ බිහිවන නිරෝගී දරු සම්පත මගිනි. එනම් නිරෝගී දරුවන් යනු අනාගතය වෙත සිදුකරන මිල කළ නොහැකි ආයෝජනයකි.
එම නිසා සෑම රටක්ම තම සංවර්ධනයේ ප්‍රමුඛ ස්ථානයක් නිරෝගී දරු පරපුරක් බිහි කිරීම වෙනුවෙන් ලබා දීමට නිරන්තරයෙන් වෙහෙස වේ.
මවකගේ නිරෝගී ගර්භනී කාලයත්, ප්‍රසව කාලයත්, ඉන් පසුව එළඹෙන පසු ප්‍රසව කාලයත් අළුත උපන් බිළිඳකුගේ නීරෝගී බාවය කෙරෙහි අතිශය බලපාන අවධීන් ය. ප්‍රසවයෙන් පසු බිලිඳුන් හට ඇතිවිය හැකි රෝගී තත්ත්වයන් මඟහරවා ගැනීමේ අදහසින් අතීතයේ සිටම අළුත උපන් බිළිදාට රත කල්කය ලබා දීම සිරිතක්ව පැවතිණි.
කුඩා බිළිඳකුගේ දිවේ, උගුරේ මැලියම් බැඳී ඇතිවිට, බඩගින්න අඩු අවස්ථා වලදී බඩගින්න වර්ධනය වීමට, බඩ පිපුමට, ඉස්මුරුත්තාවට, වියළි මල පිටවීමට, ඇගමැලි කැඩීමට, කැස්සට, සෙමට, උණට, සමෙහි රතු බිබිලි හෝ පලු මතු වීමට යනාදී නොයෙක් රෝග ලක්ෂණ සඳහා දේශීය වෙදකමෙහි සඳහන් රත කල්කය වසර ගණනක සිට භාවිතා වූ අද්විතීය ඖෂධයකි.
ගැමි ව්‍යවහාරයේ තවමත් ප්‍රචලිත ‘රත ගාය’ නමින් හැඳින්වෙන රෝගී තත්ත්වය සඳහා ජනප්‍රිය ඖෂධය ‘රත කල්කය’යි. එය දෙසඳුන් කල්කය, රත් හඳුන් කල්කය, බිළිඳු කල්කය, කොත්තමල්ලි කල්කය යනාදී අන්වර්ථ නාමයන්ගෙන් ප්‍රචලිතය.
රත් හඳුන් හා සුදු හඳුන් අන්තර්ගත ඖෂධයක් වූ නිසා දෙසඳුන් කල්කය ලෙසට ප්‍රකට වූවා විය හැක. පැහැයෙන් රත් පැහැ ගන්නා කල්කයක් වූ නිසාද, කුඩා බිළිඳුන්ට මව් කිරෙන් දිය කර පෙවීම නිසාද, අවුරුද්දකට වැඩි ළඳරුවන් හට කොත්තමල්ලි තම්බා අනුපාන ලෙස කල්කය සමග පෙවීම නිසාද අනෙක් පර්‍යාය නම් ලැබෙන්නට ඇති බව විශ්වාස කල හැක.
කාලයක් තිස්සේ භාවිතා කළ රත කල්කයෙහි බිළිඳු රෝග සුව වීමේ සාඵල්‍යතාවය සායනිකවද පරීක්ෂා කොට ඇත.
වර්තමානයේ රත කල්කයේ යෝග්‍යතාව හා එහි ගුණාත්මක බාවය පරීක්ෂා කොට ඉදිරිපත් කළ පර්‍යේෂණ නිබන්ධන රාශියක් පවතී.
සුදු හඳුන්, රත් හඳුන්, කොල්ලු, වැල්මී, වදකහ, සහිඳ ලුණු සියුම් චූර්ණය ගෙන දෙහි යුෂෙන් අඹරා ඉතා පිරිසිදුව තනා ගන්නා රත කල්කය වර්තමානයේදී කුඩා ළඳරුවන්ගේ සමේ රෝග බොහොමයක් සඳහා ප්‍රත්‍යක්ෂ ප්‍රතිඵල ලබා දේ.
නිසි වෛද්‍ය නිර්දේශ මත, නියමිත මාත්‍රාවෙන්, නියමිත ප්‍රමිතියකින් යුතු රත කල්කය දරුවන් වෙත ලබා දීමෙන් ළඳරු කාලයේ චර්ම රෝග වලින් ආරක්ෂා වීමට පමණක් නොව ළඳරු උණ, ශ්වසන ව්‍යුහගත රෝග, ආහාර මාර්ගගත රෝග, ආසාදන තත්ත්ව නිසා හටගන්නා රෝග වලින් ආරක්ෂා වීමටද ඉවහල් වේ.
නිරෝගී, නියමිත උපත් බර සහිත බිළිඳුන් හට සති දෙකෙන් පසු රත කල්කය ලබා දීම පිළිගත් ආයුර්වේද හෝ දේශීය වෛද්‍යවරයෙක් පරීක්ෂා කොට නිර්දේශ කෙරේ. මාස02 සිට අවුරුදු 02 දක්වා බුද්ධි වර්ධන කාලයේ රත කල්කය භාවිතය ඉහළ ප්‍රතිඵල ගෙන දෙන බව සායනිකව සනාථ කොට ඇත.
අඩු උපත් බර සහිත, නොමේරූ, දිගු කාලීන රෝගයන්ට ගොදුරු වූ, ජීර්ණ ක්‍රියාවලිය නිසි ලෙස සිදු නොවන අන්ත්‍රගත රෝග සහිත ළඳරුවන්ට රත කල්කය ලබා දීම තීරණය කිරීම විශේෂිත අවධානයක් යටතේ සුදුසුකම් ලත් ආයුර්වේද වෛද්‍යවරයෙකු තීරණය කළයුතු වේ. එමනිසා හිතුමතේ ඖෂධ ලබාදීම අනුමත නොකරන අතර නියමිත ප්‍රමිතියකින් යුතු ඖෂධ ලබා දීම මගින් ළදරුවාගේ ප්‍රතිශක්තිය වර්ධන හැකියාව වැඩිවී රෝග වලින් ආරක්ෂා වීම නොහොත් ආයුර්වේද වෛද්‍ය විද්‍යාවේ සඳහන් ව්‍යාධි ක්ෂමත්වය ගොඩනැංවීම රත කල්කය භාවිතයෙන් සිදුවේ.
ක්ෂුද්‍ර ජීවී ආසාදන වලින් වැළකී, බෝ වන රෝග වලින් ආරක්ෂා වී, මල-මූත්‍ර හොඳින් බැහැර වී, රක්තය ශෝධනය වී නිරෝගී ළඳරු කාලයක් හිමි කර දීමට රත කල්කයේ ඖෂධීය වටිනාකම අතිමහත් ය.
අතීතයේ සිට වර්තමානය දක්වා ප්‍රතිශක්ති වර්ධක ඖෂධයක් ලෙසට ප්‍රචලිත වූ රත කල්කය ළඳරු කාලයේ හටගන්නා බොහෝ රෝග වලින් බිළිඳුන් ආරක්ෂා කොට නිරෝගී ළමා පරපුරක් ගොඩනැඟීමට ඉවහල් වූ බව අතීත ප්‍රයෝගයන් සාක්ෂි දරනු ඇත.
සායනිකව සනාථ කොට ඇති එවන් වටිනා ඖෂධයක ඖෂධීය ගුණය ළදරුවන් වෙත ලබා දීම මඟින් ළඳරු කාලයේ බිළිඳුන්ගේ රෝග බොහොමයක් වළක්වා ගැනීමට හැකියාව ලැබේ. වර්තමානයේද තරුණ දෙමාපියන් රත කල්කය තම දරුවන් වෙත ලබාදීමට පෙළඹීම දක්නට ලැබීම සතුටට කාරණයකි.
ආයුර්වේද වෛද්‍ය නාලිකා හංසිනී ජයතිලක
BAMS (Colombo)
සුනියමි දෙවියන් නොහොත් ගමිභාර දෙවියෝ
පස්වාන් දහසකට ආවඩා ආයු බෝ වේවා… ආයු බෝ වේවා…. ආයු බෝ වේවා….
ශිව මස්තු නමෝ රාමා
කන්ද සේනා සමාගමා
වඩිග තන්ත්‍ර මණි කන්ඨ
ඔඩිඩී මංගල නමෝ නමං
අග්නී කන්දන්ච හස්තේන
හස්තේන වඩිග කර්ගිතේ
මුඛෙින විෂ කේශකේ
ශිර්ශේ පංච කේශකේ
උදරේ නාග බන්දාමී
නීලෝත්තුරග වාහනං
සුනියමි දේවතා නාම
මයිහං ත පාදතේ නමං
ඉතිං ඔන්න අද මං අපි මැගසින් එක ඔස්සේ ඔයාලට අරන් ආවෙි දේව පුරාණ කතාවක්…… ඉතිං දෙවියන් කිවුවාම සමහර අයගේ හිත් වල ඇති වෙන්නේ පුදුමාකාර ගෞරවයක්… තවත් සමහර අය නමි ගණන් නොගන්නා තරමි…. කෙසේ උවත් ඉන්නවා කියනා තිස්තුන්කොටියක් දෙවිවරුන් අතරින් අද මම ඔයාලට කියන මෙි දෙවියන් ගැන මගේ හිතෙත් තියෙන්නේ ලොකු බක්තියක්…. එ තමයි සිද්ධ සුනියමි දිව්‍යරාජයා, එහෙමත් නැත්තමි ගමිභාර දෙවියන්
සූනියම් දෙවියන්ගේ උපත පිළිබඳව ජනප්‍රවාදයෙන් විවිධ කතා තිබෙනවා… මේ දෙවියන්, වසඟපුර විචිල රජුගේ සහ නිර්මලා දේවියගේ පුතෙක් ලෙස උපන් බවත් ඔඩ්ඩි දේශයේ ඔඩ්ඩි නම් රජුට දාව යදම්බරී නම් බිසවුන් වහන්සේගේ කුසයෙන් මෙලොවට පහළ වූ බවත් සඳහන් වෙනවා.. ජනප්‍රවාද කතාවල එහෙමයි… එ වගේම විස්වාස කල හැකි රසවත්ම කතාවකුත් තියනවා..
මිනිසුන්ගෙ ගෞරවයටත් භක්‌තියටත් පාත්‍ර වී ඇති මෙි දෙවියන් යුක්‌තිය පසිඳලන්නා වූද යහපත කරන්නන්ට යහපත් ප්‍රතිඵල ද අයහපත කරන්නන්ට අයහපත් ප්‍රතිඵලද ලබා දෙනු ලබන බවයි සඳහන් වන්නේ. සූනියම් දෙවියන්, අර්ධ දේව ස්‌වරූපයක්‌ද අර්ධ යක්ෂ ස්‌වරූපයක්‌ ද සහිත දෙවි කෙනක්‌ බව කිව යුතුයි…
සූනියම් දෙවියෝ, රාත්‍රි කාලයේ සුදුවන් වස්‌ත්‍රාභරණයෙන් සැරසී ඉතා ශාන්ත ස්‌වරූපයෙන් ගම් බිම් වල සැරිසරණ විට පිච්චමල් සුවඳ විහිදෙන බවත් ගැමි ජනයා අතර ප්‍රකට කරුණක්.. උන්වහන්සේ වෙත බුරාගෙන පනින සුනඛයන්ට තම අත රැඳි සෝලු ලීයෙන් පහර දෙන බවත් එසේ පහර කෑ සතුන් හඳුනාගත නොහැකි කොන්ද අප්‍රාණික වන රෝගයකින් මියයන බවත් මිනිසුන් තුළ දැඩි විශ්වාසයක් පවතිනවා….
භයංකාර පෙනුමකට හිමිකම කියන සූනියම් දෙවියන් නීල වර්ණ ශරීරයකින්ද, හිස පැළදි සුදු ජටාවකින්ද, දිවියකුගේ සමින් නිර්මිත සළුවකින්ද සැරැසී සිටීනවා…. සුදු අශ්වයා වාහනය කරගත් සූනියම් දෙවියන්ගේ කරේ නාගයන්ගෙන් සෑදුණු නාග මාලයක් හා මුඛයේ සපාගෙන සිටින නාගයෙක්ද සිටිනවා… එසේම දෙඋර මත කරවලුන් සිව් දෙනා බැගින්ද, දෙඅතේ කරවලුන් අට දෙනෙක්ද වෙළාගෙන සිටිනවා වගේම ඉණේ කොට නාගයන් කිහිපදෙනකුද වෙළාගෙන සිටිනවා….
මේ සියලු නාගයන්ට අතිරේකව දෙපතුල ළඟද නාගයෙක් සිටිනවා… ලේ පොළඟුන් දහතුන් දෙනෙක් සිරුර පුරා සිටිනවා වගේම, හිස සිට දෙපතුල දක්වාම දිග නාගයන් දෙදෙනෙක්ද සිටිනවා…. භයංකාර රාක්‍ෂ මුහුණකින් යුතු සූනියම් දෙවියන්ගේ හිස හැඩපළු 13කින් යුතුයි.. සුරතේ තියුණු වඩිග කඩුවකින්ද, වමතේ ගිනිගෙන දැවෙන කබලක්ද දරා සිටින සූනියම් දෙවියන් සූකරාකාර පාද යුගලකටද හිමිකම් කියනවා.
නාමයන් රැසකින් හඳුන්වනු ලබන සූනියම් දෙවියෝ මතු බුදු බව පතන දෙවි කෙනෙක් බවයි සදහන් වෙන්නේ.. සූනියම් දෙවියෝ ප්‍රාදේශීයව විවිධ නාමයන්ගෙන් හඳුන්වනු ලබනවා… කබලෑමුත්තා, කබලෑ දෙවියන්, කබලෑ අප්පච්චී, ගම්භාර සුද්ධ සූනියම්, ගම්බාරු මුත්තා, සුද්ධ සූනියම්, වඩිග සූනියම්, ඔඬිඩි වඩිග සූනියම්, ඔඬිඩියා, ඔඬිඩි මස්සිනා, ඔඬිඩි දේවතාවා, ඔඬිඩි යකා හා ගම්බාර දෙවියන් ලෙසයි හදුන්වන්නේ…
ඉතිං උන්නාන්සේ ගැන තව විස්තර කියනවා නමි සූනියමි දෙවියන්ද විෂ්ණු කරගම දැඩිමුණ්ඩ ආදි දෙවිවරුන් මෙන් ගෞරවය ලබන දෙවි කෙනෙක්.. සූනියමි දෙවියන් කතරගම දෙවියන්ගෙ සෙමිපති ලෙසද , දැඩිමුණ්ඩ දෙවියන්ගෙ අධිකාරමි ලෙසද , එම පොත්ගුල් සතරේ භාරකරු ලෙසද, උපුල්වන් දෙවියන්ගෙ පණිවිඩකරු ලෙසද කටයුතු කරන බවයි ජනප්‍රවාද වල සදහන් වෙන්නේ…
සුනියමි දෙවියන්ගෙ බලය තේජස ශක්තිය විශේෂිතයි.. අන් දෙවිවරුන් වගේ නොවෙයි උන්වහන්සේගේ ආඩමිබර ගතිය වැඩියි.. අන් අයට පහන් දැල්විමට පෙර සුනියමි දෙවියන්ට පහන් දැල්වීම මන්ත්‍රවෙිදීන්ගේ සිරිතක්… එ ඇයි කියනවා නමි උන් වහන්සේ කිසිවෙකුට දෙවනි විමට අකමැති නිසා… එ වගේමයි සුවදට කැමති දෙවතාවුන් වහන්සේ කෙනෙක්.. අවෙිලාවෙි පිචිච මල් සුවද අපේ නාසයට දැනෙන විට අපේ පරණ ගැමියන් පවසනවා එ තමයි සුනියමි දෙවියන් වඩිනා බවට දන්වන පෙර ලකුණු බව….
එ වගේමයි සුබ දේට සූනියමි දෙවියන් ලෙසද, අසුබ දෙයට ඔඬ්ඩි යක්ෂයා ලෙසින් ස්වරූපය වෙනස් කරගන්නා බව සදහන්….. ගුප්ත කර්ම කටයුතු වලදි උන්වහන්සේ නොමැතිව වින කැපිම කල නොහැකි බවයි මන්ත්ර කරුවන් පවසන්නේ.. අදුරු ආරක්ෂාව වගේම ආතුරයන්ගේ ආරක්ෂාව උන්වහන්සේ සතු බැවින් ගුප්ත කර්ම කල නොහැකි බවයි පැවසෙන්නේ.. එ නිසාම උන්වහන්සේට ඇත්තේ විශේෂ තැනක්…
අද වන විට ලංකාවෙි වැඩිම පිරිසක් පුද පුජා කරන දෙවියන් සුනියමි දෙවියන් බව රහසක් නොවෙයි.. ඉස්සර අපේ ගෙදරත් සුනියමි දෙවියන්ට පහනක් පත්තු කල බවක් ආචිචි අමිමා මට පැවසූවා…. මන්ත්ර විද්‍යාව දන්නා අයෙක් වෙි නමි ඔහු හො ඇය සුනියමි දෙවියන්ගෙ එක මන්ත්‍රයක් හො කට පාඩමි කරගෙන සිටින බව රහසක් නෙවෙයි.. එයින්ම උන්වහන්සෙගේ තේජස පිහිට කෙතරමිදැයි වටහා ගත හැකි බවයි පවසන්නේ…
සුනියමි දෙවිදුන්ගේ බැල්ම ආකර්ෂණය ඇති මන්ත්ර රාශියක් තියනවා…. නිල් හත, නිල් විසි එක, නවනීලය, මහීපාලය, අංගාරුඪය, සිවපාදය, ඔඩිඩිකුමාර බන්ධනය, නාඟවෛයිරොඬිය, ඔඩිඩිප්‍රලය, සුනියමි දේවශාන්තිය, සුනියමි දැහැන, සුනියමි බන්ධනය, හන්තු දැහැන, නමාමි දැහැන, මල් යහන් ප්‍රලය, භාවිතා කරන මන්ත්ර නාම කිපයක් මට විස්තර සොයා යෑමෙිදි දැනගත හැකිවුවා….
තවද මන්ත්ර ස්තොත්‍ර මල් යහන් කවි විශාල ප්‍රමාණයක් තිබෙනවා….
ඉතිං දැන් තමයි හොදම කතාව මං කියන්න හදන්නේ.. සුනියමි දෙවියන්ගෙ තවත් කතාවක්… කෙටියෙන් කියන්නමි…
පුරාවෘත වල කියන විදිහට ඈත අතීතයේ ඉන්දියාවෙි වඩිග කියන දේශයේ වඩිග කියලා රජ කෙනෙක් රජකමි කරන කාලෙක සිද්ධ උන දෙයක් මෙි.. එ රජතුමාගේ බිසවගේ නම යවුදගිරි.. ඉතිං මෙි යවුදගිරි බිසව ගොඩක් ලස්සනයිලු. දවසක් අහසේ ගමන් කරන මහේශාක්‍ය දෙවි කෙනෙක් මෙි බිසවගේ ලස්සනට වශි වෙලා, බිසවගේ ඇගට ආවෙිස වෙලා.. දෙවියො ආවෙිස උන නිසා බිසවට සිහි නැති වෙලා… සිහි නැතුව ඉන්න බිසවව සනීප කරගන්න රජතුමා සෘෂිවරු ගෙන්නලා මන්ත්ර මතුරලා දෙවියට සිහිය අරගෙන… ඉට පස්සේ තමයි දෙවියට දරුවෙක් ලැබෙන්න ඉන්න බව දැනගෙන තියෙන්නේ.. කතාවෙි කියන විදිහට දේවියට ඇඹුල් ජාති කන්න දොලදුකක් ඇවිත් එවත් සංසිදවලා.. එත් තවත් දොලදුකක් ඇවිත්, එ තමයි රත්තරන් වලින් සැරසිලා සර්පයන් ඇගේ ඔිතාගෙන නුවර වටෙි ඇවිදින්න ඇතිවුන ආසාව… හැබැයි රජතුමා නමි මෙිකට කැමති වෙලා නැ. රජතුමා නියොග කරලා දේවියව මරන්න.. නමුත් දේවිය ඉල්ලීමක් කරලා දරුවා ලැබෙන තුරු ජිවිතේ නැති කරන්න එපා කියලා.. එකට රජතුමා කැමති වෙලා
කොහොම හරි දරුවා ඉපදිලා වසර දහයක් ගියාට පස්සේ මෙි වඩිග කුමාරයා කැලේ ඇවිදින්න ගිහින්. එ යද්දි කැලේ හිටිය විස සර්පයන්ගේ දල කඩලා එ විස උරා බිලා. දල කඩපු සර්පයන්ව ඇඟ වටෙි ඔිතාගෙන… නයි , පොලොංගු , කරවලයො ඇගේ ඔිතාගෙන, ටික ටික විස ශරිරයට ඇතුල් වෙද්දි මෙි කුමාරයා යක්ෂ අවතාරයක් බවට පත්වෙලා… ඉතිං මුලින්ම මෙි යක්ෂ අවතාරය යන්නේ වඩිග දේශයට. එ ගිහින් වඩිග රජතුමා ඇතිලු මුලු නුවරම වනසන්නේ මිනිස්සු මරා දාලා..
මිනිස්සු මර මර ආහාරයට ගත් මෙි වඩිග යක්ෂයා තමන්ගේ සේනාව වැඩි කරගන්න අමතක කරන්නේ නැ. වෙසමුනි රජු මුනගැහෙනන ගිහින් එතනත් දොරට පයින් ගහලා කලබල කරලා තමයි වෙස්මුනිගෙන් වරමි ගන්නේ. එ මොහොතේ වෙසමුනි අහලා තියනවා ” මෙච්චර ලොකු සද්ද දාලා වැඩ පෙන්නන හෙතුව මොකද” කියලා. එතකොට යකා කියලා තියනවා වඩිග දේසේ වඩිග රජාට දාව යවුදගිරි බිසවගේ කුසේ ඉපදුණ ඔඩිඩි වඩිග සිද්ධ සුනියමි යක්ෂයා මමයි මට නරලොව මිනිමස් කන්නට වරමි ඔින ” කියලා . පස්සේ එ වරම වෙසමුනි දුන්නා කියලා ජනප්‍රවාදයේ සදහන් වෙනවා..
එ වගේම තමන්ගේ සේනාව වැඩි කරගන්න මහාකෙල නාගරාජයාගෙ දල හතරේ දූවරුන් හතර දෙනාව සේනාවට එකතු කරගන්නවා.. එ තමයි තකරී, මකරී, යාමී, යමදූතී… තව යක්ෂණියො අට දෙනෙක් එකතු කරගන්නවා. එ තමයි අයිලක්කණ්ඩි, මයිලක්කණ්ඩි, වචක්කණ්ඩි, තොටක්කණ්ඩි, අසේනි, විසේනි, කාලරත්ති, තස්මාදේවි කියන අට දෙනා.. තව තවුතිසාවෙන් දෙවියන් බිය ගන්වලා එහෙනුත් සේනාවට එකතු කරගන්නවා සිරටිටා, වාරටිටා, ගොරාටිටා කියන දෙවිවරුන් තිදෙනා. මෙි සේනාවත් එක්ක මහාපොළවට ඇවිත් විශාලා මහානුවර ගමි නියන්ගමි වල ඉන්න මිනිස්සු මරලා මිණි මස් කනවා. ළදරුවො පවා අතුරුදහන් වෙනවා.
ගමෙි අයට තව දුරටත් මෙික බලන් ඉන්න බැරි නිසා මන්ත්ර ගුරුකමි දන්න තෙලිඟු රටෙන් අති දක්ෂ යකදුරෙක් ගෙන්නලා යකාව බන්ධනය කරන්න මන්තර අලුතින් හදනවා.. මෙි මන්තර හද හද පුස්කොල පොත් වල ලියද්දී යකදුරා අතින් මන්ත්ර ලක්ෂ ගාණක් ලියැවිලා, මෙි මන්ත්ර ජප කර කර අදාල ගුරුකමි කරද්දි සුනියමි යකා මෙි පුස්කොල පොතට ඇදිලා ඇවිත්. පස්සේ රත්තරන් නුලකින් මෙි පොත තද කරලා ගැට ගහලා මුහුදට දාලා තියනවා..
මෙි පුස්කොල පොත පා වෙලා ලංකාවෙි දකුණු වෙරළට තමයි එන්නේ… සුනියමි යකා ලංකාවට එන්නෙත් එ විදිහට.. මාතර ප්‍රදේශයේ පුද්ගලයෙක්ට තමයි මෙි පොත හමුවෙන්නේ.දෙවියන් හිනෙන් එ පුද්ගලයාට කියලා තියනවා මෙි පුස්කොල පොත විවෘත කරන්න එපා කියලා.. එ හින්දා එ පුද්ගලයා පොත විවෘත නොකර රහාසේ තියා ගන්නවා. නමුත් දෙවුන්දරට වන්දනාවෙි එන කුලියාපිටිය කියන ගමෙි උපාස කෙනෙක් ගැන හිත පැහැදිලා පුස්කොල පොත එ උපාසක මහාත්තයාට දෙනවා පරිස්සමෙන් ආරක්ෂා කරන්න කියලා. පුස්කොල පොත දිග නොහරින බවට පොරොන්දු කරගත් පසු මෙි පුද්ගලයා උපාසක මහාත්තයාට පොත දෙනවා. උපාසක මහාත්තයා මෙි පොත අරන් ගිහින් පරිස්සමට පෙටිටගමකට දාලා වහලා තිබුණත් එ පැත්තේ හොරෙක්ට මෙි පොත ගැන දැනගන්න ලැබෙනවා.. ඉතිං හොරා නිකමි ඉන්නේ නැ. පොත හොරකමි කරලා පොත විවෘත කරනවා.. මොකද හොරා හිතන්නේ එක මහා බලගතු මන්ත්ර තියන මන්ත්ර පොතක් කියලා.
සුනියමි යක්ෂයා බන්ධනයෙන් නිදහස් වෙද්දි දෙවිවරුන් ඝොසා කරලා ” කඹ ලා හිර කරනු , කඹ ලා හිර කරනු ” කියලා. එත් යකා එලියට ගිහින් ඉවරයි. විශාලා මහානුවර විනාස කරා වගේම මෙි යකා ලංකාවෙි කුලියාපිටිය පැත්තේ මිනිස්සු මරාලා කන්න පටන් ගත්තේ මිනිස් ජිවිත භීතියෙන් ඇලලි යද්දි. වාසනාවක වගේ එ පැත්තේ හිටපු දෙවියන්ගෙන් වරමි ගත්ත සිල්වත් මන්තර සාස්තර දන්න රාජපද්ම මුදියන්සේ කියලා උපාසක මහත්තයෙක් ඔහුගේ දේව වරම උපයොගි කරගෙන පත්තිනි දෙවියන්ට කන්නලව් කරනවා… පස්සේ පත්තිනි මැණියන් මෙි උපාසක මහාත්තයාට කියනවා නවගුණ මන්ත්‍රයෙන් ලක්ෂ වාරයක් ජිවමි කරපු නවගුණ වැල් හත් පටක් ලබා දෙන්න කියලා,
ලක්ෂ හත් පාරක් මතුරපු මෙි නවගුණ වැල් හත්පොට උපාසක මහාත්තයා ලබා දෙනවා පත්තිනි මැණියන්ට… පත්තිනි මැණියන් අමාරුවෙන් අහසට පැනලා මෙි සුනියමි යකාගේ බෙල්ලට නවගුණ වැල් හත්පට දානවා.. එත් එ හත්පොටෙන් හතර පොටක් යකා කඩා දානවා. එත් තුන් පොටක් ඉතිරි වෙනවා.. පස්සේ රාජපද්ම මුදියන්සේ උපාසක මහත්තයා ඇතුළු පිරිසක් යකාව මතුරපු කඹ වලින් බන්ධනය කරලා හිර කරනවා. එදා ඉදන් තමයි එ ප්‍රදේශය කඹලෑව කියලා ප්‍රසිද්ධ වෙන්නේ..
පත්තිනි මැණියො මෙි යකාගේ බලය දැකලා තීරණය කරනවා දේව වරමක් දෙන්න. නැවතත් කිසිම දවසක මිනීමස් නොකන බවට පොරොන්දු කරගත්තාට පස්සේ පත්තිනි මැණියො සුනියමි යකාට දේව වරමක් දිලා කියනවා සුනියමි විදිහට අරක්ගෙන දොළ පිදේනි ගන්න , ලෙඩිඩු සුවපත් කරන්න, ආතුරයින්ට වැහෙන යක්ෂ දෝෂ දුරු කරන්න, සෑම මන්ත්‍රයකටම අරක්ගෙන ඉන්න කියලා….
මෙන්න මෙහෙමයි සුනියමි දෙවියන් ලංකාවෙි දේවත්වයට පත් වෙන්නේ.. එදා වැටුණු තැන කඹලෑව ( කබල්ලෑව) කියන ප්‍රදේශය තමයි එතුමාට කැපඋන ප්‍රධාන තැන.. තව ඔරුගොඩවත්ත ලුනාව සුනියමි දේවාලයත් එහෙම තැනක් කියලා විස්තර හොයද්දි මට මගේ මිත්‍රයෙක් පැවසුවා.. එ වගේම තමයි ඔඩිසි සිද්ධ සුනියම එනකොට විස ඝොර සර්පයෝ පිරිවරාගෙන එන බවත් කියනවා. එ තරමි එ පෙණුම බියකරු බවයි ඔහු මට පැවසුවෙි..
සිදුහත් කුමරු ගිහිගෙයින් නික්‌ම ගියේ කන්ථක නම් අශ්වයා රැගෙන බව අපි කවුරුත් දන්නවා.. කන්ථක අශ්වය ලය පැලිලා මිය යැමෙන් පසු සූනියම් දෙවියන්ගෙ නාමයෙන් දේවත්වයක්‌ ලබා පුද සත්කාර ලබන බව පැරණි දේවකතාවල සඳහන් වෙනවා. සූනියම් දෙවියන් ගමන් බිමන් යැමට සිය වාහනය ලෙස තෝරාගෙන ඇත්තේද සුදු අශ්වයෙක්.. මේ නිසා අශ්වයන්ට සූනියම් දෙවියන්ගේ බැල්ම ඇති බව මිනිසුන්ගෙ විස්වාසය… අශ්වයන් හට ගසා ඇති ලාඩම් ඉබේ හැලී ගිය පසු ඒවා රැගෙන පිරිසුදු කොට ජීවම්කර නිවෙස්වල, ව්‍යාපාරික ස්‌ථානවල ඉදිරිපස එල්ලන්නේ එ නිසයි. මේ එල්ලීමෙන් ඇස්‌වහ කටවහ දුරුවී සොර සතුරු බියෙන් මිදී සෞභාග්‍ය උදාවී සූනියම් දේවතාවුන්ගේ ආරක්ෂාව ලැබෙන බවට ඇති විශ්වාසය නිසාමයි…..
සූනියම් දෙවියන්ට පින් දෙන ගාථාව
නානාවණ්ණෝ මහා තේජෝ
ඕදාතහය වාහනෝ
ගාම සංචාරකෝ දේවෝ
ඉමං පුඤ්ඤානුමෝදතෝ
නිසංසලා රණසිංහ
කාමිණී – කෙටි කතාව
මේ ලෝකෙ ජීවත් වෙන මිනිස්සු එක එක ජීවිත ගෙවනවා. සමහර මිනිස්සු කාර් විකුණනවා, තවත් සමහරු සිල්ලර බඩු විකුණනවා, ඒ අතර මහා පරිමාණ වගේම කුඩා පරිමාණ ව්‍යාපාර මේ හැම එකෙන්ම අපි මිනිස් ශ්‍රමය හරි භාණ්ඩයක් හරි මිලක් නියම කරලා විකුණනවා. මේ හැමදේම අතර තවත් සමහරු ඇඟ විකුණනවා. ඔව්… හරිම පිළිකුල් නේද? අහද්දිත් පිලිකුල් ඇති පත්තිනි ලෝගුව පොරවගෙන ඉන්න සමහරුන්ට නම්… ඒත් ඒකත් රස්සාවක්; බුදුන්ගේ කාලයේ ඉදන් පැවතගෙන එන..
ඇය නම් කාමය දෝතින් දරාගෙන ආව කාම රැජිණක්. වචනයේ පරිසමාප්ත අර්ථයෙන්ම සරාගීබව නොඅඩුව ඇති රූප රාජිණියක්. පිරිමින්ගේ ඇසට රසඳුනක් වූවත් ඕනෑම ගැහැණියකගේ හිත එක මොහොතකට හෝ ඊර්ෂ්‍යාවෙන් පුරවාලන්නට හැකි ඉහල පෙලේ පිරිමින්ගේ අතින් අතට යන ලෝකයේ පැරණිම රැකියාව කරන්නියක්. ඇතැම් ගැහැණුන් දහදිය මහන්සියෙන් රුපියල් දෙතුන් දහසක් මුලු මාසකටම හොයද්දි එක් රැයකින් එක් පිරිමියෙක් හෝ පිරිමින් කිහිපයක් සනසවා රුපියල් ලක්ෂ ගණනින් සොයන අති සාර්ථක ව්‍යවසායිකාවක්.
ඇය එසේ වෙද්දි ඈ ළඟට ඇදෙන බඹරුන්ගෙන් තවත් එක් බඹරෙකු වන මම දේවක සඳගලතැන්නයි. දිවයිනේ ප්‍රමුඛ පෙලේහෝටල් ජාලයක හිමිකරුවෙකු වන මම වෙනත් ව්‍යාපාරිකයන් මෙන් කටුකත්වය දෝත දරාගෙන ආව කෙනෙක් නෙවෙයි. මගේ පියාගෙන්, මගේ සීයගෙන් ලැබුනු ව්‍යාපාර ජාත්‍යන්තරයට අරගෙන ගිය කෙනෙක්. කුරුදුවත්තේ ඉපදිලා, ලංකාවේ අංක එකේ පිරිමි පාසලක ඉගෙන ගෙන එංගලන්තයේ ප්‍රධාන සරසවියක උපාධියක් හදාරපු මම මටම ගැලපෙන පවුලකින් විවාහයක් කරගත්තත් තරුණ කාලේ සල්ලාලකම් කොහොම අත අරින්නද?
ශාමිනී එක්ක විවාහ වුනත් , පසු කාලීනවදෙදරු පියෙක් වුනත් මම පරණ පුරුදු අත ඇරියේ නෑ. ශාමිනීත් එහෙමයි. ඇය ඇයගේ ලෝකයේ ජීවත් වුනා මම මගේ ලෝකයේ ජීවත් වුනා , දරුවෝ දරුවන්ගේ ලෝක වල ජීවත් වුනා. ඒත් ලෝකේට පේන්න අපි අති සාර්ථක පවුල් ජීවිතයක් ගෙව්වා.
ඔබ මම ගැන හිතන විදිය හරි.. ඔව්…මම ස්ත්‍රී ලෝලියෙක්. මම නැහැ කියන්නෙ නෑ. හැබැයි මම අතිශය පෞද්ගලික විදියට ඒ දේවල් ගණුදෙනු කරන්නෙ.ඇතැම් වෙලාවල් වලට ගැහැනු මගේ යහන මතට නගින තුරු දන්නෙ නෑ කවුරු ළඟටද යන්නෙ කියලා. ඒ තරම් පෞද්ගලිකව මම ගණිකාවන් ඇසුරු කල කෙනෙක්. ඒත්…..,
කාමිණී, කාමයට වඩා යමක් ඇය මට දෙනවා. ඒත් ඒ මොකද්ද? ඒ පහස අවසානයේ හැමදාම මම හිතනවා. ඒත් ඇය මාව සත පහකට මායිම් නොකර සල්ලි මිටියත් අරගෙන බැහැලා යනවා. ආයෙමත් දෙදවසකින් මම ඇය හොයාගෙන යනවා. පුරුදු හැඟීමම මගේ හිතේ ඉතිරි කරලා ඇය යන්න යනවා. මම බලාගෙන ඉන්නවා.
‘ බොබී ඇත්තටම කාමිණී කියන්නෙ කවුද?’
‘ කවුද මිස්ටර් දේවක දන්නේ? එක දවසක් මාව හොයාගෙන ආවා. මාත් රස්සාව දුන්නා. කොහෙන් ආවද කොහොම ආවද දන්නෙ නෑ ඒකි සල්ලි අච්චු ගහන මැශිමක් හින්දා මම විස්තර අහන්න ගියේ නෑ’ කාමිණී ගැන හිතලා හිතලා බැරිම තැන ඇයගේ තැරැව්කාරයා වුනු බොබීගෙන් මම ඇහුවම හරිම සරළව ඔහු එහෙම පිළිතුරු දුන්නා.
ඒත් ඇය ගැන සෙවීම එතනින් අත් නොහැරපු මම එක් දවසක් රෑ ඇයගෙන්ම ඇහුවා.
‘ කාමිණීගේ ගෙවල් කොහෙද?’
‘ ඒවා දැනගන්නම ඕනද මිස්ටර් දේවකට මගේ ඇඟ උඩ නගින්න?’ එදා ඒ තියුණු උත්තරේ මාව නිරුත්තර කලා. ඒ රැයින් පස්සේ මම ඒ රුව දිහා බලාගෙන ඉන්නවා. ඇය මාව සනසවනවා. ඇයගේ හිතේ කාමයපමනක් දෝරේ ගලනකොට මගේ හිතේ ඈ වෙනුවෙන් උපදින ආදරය දෝරේ ගලනවා.
‘ ශාමිනීගෙන් දික්කසාද වෙලා මම කොහොමහරි කාමිනී බදිනවා’ එක දවසක් මම ඒ තීරණයට ආවා. එදාත් හවස වෙනදා වගේම මම බොබීගෙන් එක රෑකට කාමිණීව වෙන් කරගත්තා. වෙනදාට වඩා ලස්සනට මම ලෑස්ති වුනා. අවුරුදු පනස් පහ පිරුණු මම විසි ගනන් වල කාමිනීට විවාහ යෝජනාවක් අරගෙන යනවා. මේ ජරා ජීර්ණ වුනු ජීවිතෙන්ැයව සදහටම මුදවගෙන මගේම කරගන්න බලාපොරොත්තුව හිතේ කොණක රජයනවා.
තිබුනු හොඳම සූට් එක ඇදපු මම වෙනදාටත් වඩා සුවඳ විළවුන් තැවරුවා. හොඳම රූපලාවන්‍ය ශිල්පියෙකු ලවා කොණ්ඩය වගේම රැවුලත් සකසාගෙන වෙනදාට අපි මුණගැහෙන තැනට පිටත් වුනා.
අදත් ඇය වෙනදා වගේමයි. ගැහැණියකගේ සිරුරේ වැසිය යුතු කොටස් යන්තමින් වැසුනු ඇදුමත්, හිත මන්මත් කරන සුවද විලවුන් මෙන්ම සරාගී රුවත් ඈ පිළිඹඳව මා තුල උපන් හැගීම තවත් අලුත් කලා. වෙනදා වගේම අනවශ්‍ය කතා වලින් තොරව ඇය මගේ හැඟීම් සන්තාපනය කලා. මම වෙනදාට වඩා සන්‍යමයෙන් ඒ මොහොත අත්වින්දා.
අනුරාගී මොහොතකට පසුව මම තීරණය කලා මගේ සිතැඟි ඇයට පවසන්න. මට ලොකු විශ්වාසයක් තිබුනා ඇය මට අකමැති නොවන වගට. කවුද අකමැති ලංකාවේ ලොකුම සල්ලිකාරයෙක්ගේ බිරිඳ වෙන්න? ‘ මම මගේ හිතට ධෛර්‍ය ගත්තේ ඒ විදියට.
‘ කාමිණී…….’
‘මිස්ටර් දේවක ඔයාගේ ෆෝන් එකට කෝල් එකක්’
ඇයගෙත් මගෙත් සොඳුරු මොහොතට බාධා කරමින් ආව දුරකථන ඇමතුම ගැන මට නැගුනේ පුදුම තරහක්. මගේ ලේඛම්වරයාගෙන් ලැබුනු ඒ ඇමතුමට මම ප්‍රතිචාර දැක්වූයේ පුදුමාකාර කේන්තියකින්.
‘ කියන්න ගිහාන්.. මොකද මේ මහ රෑ’
‘ සර් සමාවෙන්න මහ රෑ කරදර කලාට.. සර්ට අමතක වෙලා ඇති කියලා හිතුනු නිසා මතක් කරන්න ගත්තේ. හෙට හවස සර්ටයි මැඩම්ටයි අගමැති තුමා එක්ක ඩිනර් එක තියනවා හවස හයට නිල නිවසෙදි’
ගිහාන්ගේ වචන කවදාවත් නැතුව මාව වෙනම ලෝකයක අතරමං කලා. ‘අගමැතිතුමාගේ නිල නිවස, සර්- මැඩම්’ මේ වචන කවදාවත් නැතිව මගේ හිත හෙල්ලුවා. මම එහෙමම දුරකථනය විසන්ධි කරලා කාමිණී දිහා බැලුවා; ශාමිනීව හිතේ ඇඳගෙන. ඒත් එක්කම රටක් පිළිගන්න කෝටිපති ව්‍යාපාරික දේවක සඳගලතැන්නගේ ප්‍රතිරූපය තවත් පසෙකින් සිතුවම් වෙන්නට පටන්ගත්තා.
‘ මම මුළු රෑටම ගෙවලා තියෙන්නේ.. සෝ විල් ස්ටාර්ට් අගේන්’ මම කාමිණීට අණ දුන්නා. හිතේ උපන් ආදරය තත්වය , මුදල් වගේම බලය ඉදිරිපිට එහෙමම දිය වෙලා ගියා.
තක්ෂිලා ඒකනායක
ජීවිතාවර්ජනය
අද වන විට ලංකාවේ ප්‍රධාන මාතෘකාව අයිස්. මොනවද මේ අයිස්? ලොව ප්‍රබල වූ මත්ද්‍රව්‍යයක්. කුඩා දරුවන්ගේ සිට මිනිස් ජීවිත ගැහැනු පිරිමි භේදයකින් තොරව බිලිගන්නා මත් රකුසා. මෙය පාසල් වල දැන් දැන් සීඝ්‍රයෙන් ව්‍යාප්ත වන බව අපට අසන්නට ලැබෙනවා. වැඩි කාලයක් යන්නට මත්තෙන් ජීවිත මුළුමනින් විනාශ කර දමන්නට අයිස් වලට පුළුවන්. මේ මත්ද්‍රව්‍ය වලට දවසින් දෙකෙන් ඇබ්බැහි වන්නට විශේෂම හේතුව වන්නේ ඒ තුළ අන්තර්ගත වී ඇති රසායනික සංයෝගය බව සොයාගෙන ඇත.
මගේ පෞද්ගලික අදහස නම් අයිස් පිළිබඳව විද්‍යුත් මාධ්‍ය තුළ නිතර නිතර සිදුකරන ප්‍රචාරණය තුළින් වයස අවුරුදු 10 – 18 ත් අතර ළමයින් හා තරුණ තරුණියන් හට එය වරක් හෝ භාවිත කර බැලීමට පෙළඹවීමක් ඒ තුළින් ඇති වන බවයි. එබැවින් අයිස් පමණක් නොව සියලු මත්ද්‍රව්‍ය අප රටින් තුරන් කිරීමට මාධ්‍යයට ලොකු මෙහෙවරක් කළ හැකියි.
දිනෙන් දින වැඩි වන මේ මත්ද්‍රව්‍ය පිළිබඳ කතා කළත් එය රට තුළට පැමිණෙන්නේ කෙසේද යන්න සොයා බැලුවත් ඒ පිළිබඳ නිසි ක්‍රියාමාර්ග අප රට තුළ ගන්නා බවක් නම් අපට පෙනෙන්නට නැහැ. වටලනු ලබන මත්ද්‍රව්‍ය ඇත්තටම විනාස කරනවද? කාලයක් යද්දි නැවත එය වෙළඳපොළට ම පැමිණෙනවාද? මේ පිළිබඳ අපට ඇත්තේ ලොකු ප්‍රශ්නාර්ථයකි.
මේ වන විට අප රටේ ප්‍රධාන මාතෘකාවට සම්බන්ධ කතාබහක නියැලෙන්න ටයි මේ සූදානම. මත් වතුරට ඇබ්බැහි වී එයින් මිදුණු පුද්ගලයෙකු වසර 38 පුරා නොබී එය පවත්වාගෙන යන්නේ කෙසේද? ඇබ්බැහි වීමෙන් මිදීමට ඇත්තටම හැකිද? යන ප්‍රශ්න වලට ඔහු අපට පිළිතුරු සපයනු ඇත. ඔහුගේ නිර්ණාමිකත්වය රැක ගැනීම සඳහාත්, සාකච්ඡාව ඉදිරියට පවත්වාගෙන යාමේ පහසුව සඳහාත් මා ඔහුට ජෝර්ජ් ලෙස ආමන්ත්‍රණය කරමි.
ජීවිතාවර්ජනය .. ඇබ්බැහි වීමෙන් මිදුණු ජීවිත වල පසු විපරම..
1. ජෝර්ජ් මහත්තයාගෙ වයස කීයද? ගම කියන්න කැමතිනම්.
මගේ වයස දැන් අවුරුදු 71
ගම කොළඹ
2. මොනවටද ඇඩික්ට් වෙලා හිටියෙ?
මත්පැන් , කසිප්පු
කොච්චර කල් ඉදලා ද? කොහොමද එක වුනේ
මම පාසල් ගියේ කොළඹ ප්‍රසිද්ධ පෙළේ පාසලකට. පාසලේදී තරුණ ගුරුවරුන් කිහිප දෙනෙකු සමග පාසල් කාල වේලාවෙන් පස්සේ මත්පැන් පානය කරලා ප්‍රින්සිපල්ට අහුවෙලා මාවත් ගුරුවරුන් වත් පාසලෙන් ඉවත් කළා. මේ සිද්ධිය වෙනකොට මගේ වයස අවුරුදු 16ක් විතර. මගේ අම්මා මට අවවාද කරලා මාව හෝටල් ශේස්ත්‍රයට යොමු කලා. ඒ කාලේ ලංකාවේ සංචාරක හෝටල් හැදෙමින්, සංචාරක ව්‍යාපාරය දියුණු වෙමින් තිබුණු කාලයක්. මෙය මගේ ජීවිතේට ලොකු අවස්ථාවක් වුණත් ඒ සුදු මහත්වරු නෝනලා හවස 7 , 8 වෙද්දි කාලා පාන්දර 2, 3 වෙනකන් මත්පැන් තොල ගානවා මම දැක්කා. ඒ ජීවිතය ට මම ආස කලා. රස්සාවට ගිය මම රෑ වෙද්දි සුදු මහත්තුරු එක්ක බොන්න පටන් ගත්තා. ඒ අය ශොට් එකක් දානකොට මටත් අරගෙන දුන්නා. හතර පස් දෙනෙක් බොද්දි මට ඒ හැමෝගෙන්ම ශොට් එක ගානේ ලැබුණා. එතකොට තේරෙනවනෙ ඒ අයට වඩා මම මත් වෙලා පිස්සු නටන්න ගත්තා. මේ නිසා මට මගේ පළමු රැකියාව අහිමි වුණා. ඔය වගේ සංචාරක හෝටල් දහයක විතර මම වැඩ කළා. හැමතැනින්ම මගේ බීමත්කම නිසා රැකියාව අහිමි වුණා. තරු පහේ හෝටල් වලින් බොන්න පටන් ගත්ත මම අවසානයේ කස්සිප්පු පොලවල් වලට යන්න පටන් ගත්තා. අතේ සල්ලි නැති වෙනකොට හොරකමට පුරුදු වුනා. මම අවුරුදු 22 දි විවාහ වුණා. අවුරුදු 25 වෙනකොට වෙනකොට මට දරුවෝ තුන් දෙනෙක් හිටියා. මගේ දරුවොත් එක්ක මගේ බිරිඳ ගොඩක් දුක් වින්දා. මට වයස අවුරුදු තිස් 31 වෙනකොට මගේ බිරිඳ මාව දාලා ගියා. මගේ අම්මයි තාත්තයි සහෝදර සහෝදරියොයි මාව ප්‍රතික්ෂේප කළා. යාලුවෝ මං එනකොටත් මූ මාර ඇණයක් කියලා මාව කොන් කළා. මට අවසානයට ඉතුරු වුනේ මං විතරයි.
3. ඔබ පුනරුත්ථාපනය වුන කෙනෙක් නෙවෙයි. ඒ ගැන අපිට විස්තර කරන්න.
ඔව් මං පුනරුත්ථාපනය වුණේ නැහැ. මට බොන්න සල්ලි නැති වෙනකොට මම ගෙදර බඩු විකුනුවා. අහල පහල අය මගින් ඇයි ඇහුවහම , මම කිව්වේ Wife දරුවෝ නැතුව මේ බඩුවලින් ඇති වැඩක් තියෙනවද කියලා. මගේ මේ වැඩේ දැකලා හිතවත් කෙනෙක් මාව නිර්නාමික මත්ලෝලීන් ගේ රැස්වීමකට එක්කගෙන ගියා. එතන හිටිය හැමෝම ඇබ්බැහි වීමි වල සිට එයින් මිදුණු අය. ඒ අය අත්දැකීමක් බෙදා ගන්නකොට මට දැනුනේ මගේ ජීවිත කතාව කියනවා වගේ. මොකද ඒ අයටත් මට වගේම කතාවක් තිබුණා. නමුත් ඒ අය ඒ වෙනකොට ලබපු නිදහස සතුට දැක්කහම මටත් ඒ නිදහස සතුට ලබන්න ලොකු ආසාවක් ඇති වුණා. මොකද ඒ වෙනකොට මට හැමදේම නැති වෙලා. මත්පැන් මත්ද්‍රව්‍ය නවත්තන්න ලේසියි. අමාරුයි. නොබී දවස දවස ජීවත් වෙන්න මට ශක්තියක් වුනේ මං වගේම අත්දැකීමක සිටි අයයි. අදටත් මේ වයසක මට නොබී ඉන්න මේ නිර්ණාමික මත්ලෝලීන් ගේ සංසදය උදව් කරනවා. ඒ වගේම මාත් ඇතුළු එම කණ්ඩායම ඇබ්බැහි වී සිටින අයට එයින් මිදීමට අත දෙනවා.
4. මතින් තොර වෙන එක තනියම කරන්න පුලුවන්ද?
බැහැ. ඒකට ශාරීරික මානසික හා අධ්‍යාත්මික සුවය ඉතා වැදගත්. ඒ වගේම පවුලේ සාමාජිකයින්ගෙන් ලැබෙන සහාය හා පිළිගැනීමත් හරිම වැදගත්.
5.මේ ඇබ්බැහි වීමත් එක්ක ඔයාට අහිමි වුණ දේවල් මොනවාද?
ජීවිතයේ ඇරෙන්න හැමදේම නැති වුණා. තනි උනා, බිරිඳ දරුවන් දෙමව්පියන්. ගෙදර පිළිගැනීම නැති වුණා, රැකියාව නැති වුණා.
6 මේ අහිමි වුන දේවල් නැවත ළගා කරගන්න ඔයා මොනාද කලේ?
කලින් කිව්වා වගේ AA එකේ සහයෝගයත් එක්ක මං අතින් සිදුවන වැරදි මං පිළිගත්තා. මගේ දුර්වලකම තේරුම් ගත්තා. මං නිසා අනිත් අයට වුණු අපහසුතාවයන් ගැන අවංකවම දුක් වුණා. මේ නිසා මට නැවත පිළිගැනීමක් ලැබුණා. නැතිවුණු දේවල් නැවත ලඟා කරගන්න අධිෂ්ඨානයක් ඇති වුණා.
7. ඔයාගේ ඒ අඳුරු කාල පරිච්ඡේදය තුළ ඔයාගෙන් අන් අයට වුන අපහසුතා මොනවද?
ගොඩක් දේවල් වුනා. ආර්ථික අපහසුතා වලට මුහුණ දෙන්න සිදුවුණා. බිරිඳ දරුවො ලොකු මානසික පීඩාවන්ට මුහුණ දුන්නා. සමාජයෙන් කොන් වුණා.මං නිසා ලැජ්ජාවට පත්වුණා.
8. මත්පැන් මත්ද්‍රව්‍ය ගැන ඔයාගේ දැන් අදහස මොන වගේද?
මිනිස් ජීවිත විනාශ කරන දෙයක්. ජීවිතය විඳින්න ඕන කාලේ විඳවන්න වෙන දෙයක්.
9. ඔයා ලබපු අලුත් ජීවිතේ ගැන මොනාද හිතෙන්නේ?
පුදුම සතුටක් සැහැල්ලුවක් දැනෙනවා. හැමදේම නැති වෙච්ච මං ව්‍යාපාරයක් කරනවා. දැන් නං මගේ අම්මා තාත්තා ජීවතුන් අතර නැහැ. මං ඇබ්බැහිවීමෙන් මිදුනාම ඒ අයට පුදුම සතුටක් දැනුණා. මට පුදුම විදියට විදිහට ආදරය කරන්න පටන් ගත්තා. මගෙ බිරිඳ මගෙන් වෙන්වුනත් අදටත් මට කතා කරනවා. මගේ දරුවෝ මං ගැන හොයලා බලනවා. මේ ලඟදි මට ඔපරේශන් එකක් කලා. ඒකට වියදම් කළේ මගේ පුතා. අපි අතර අතරේ ලොකු බැඳීමක් දැන් තියෙනවා. මේ ටිකම ඇති දැන් මට සතුටු වෙන්න.
10. තරුණ පරපුරට ඔබට දෙන්න පුළුවන් උපදෙස මොකක්ද?
නිර්නාමික මත්ලෝලීන් ගේ සංසදයට සම්බන්ධව වැඩ කරන කෙනෙක් හැටියට කිසිම විටෙක මම කාටවත් බොන්න එපා කියන්නැහැ. මොකද සමාජයේ කොටස් තුනක් ඉන්නවා.
* බොන්නෙම නැති අය
* සමාජශීලී මත්ලෝලීන්
* මතට ඇබ්බැහිවූවන්
තමන්ගේ පමණ ඉක්මවා බොන අය තමයි ඇබ්බැහිවුවන් වෙන්නේ. ඊට පස්සේ ඒ අයට, පවුලේ අයට විවිධ ගැටළු වලට මුහුණ දෙන්න සිද්ධවෙනවා. මේ අය සමහර විට විවිධ හේතූන් නිසා මතට ඇබ්බැහිවූවන් වෙන්න පුළුවන්. ආර්ථික ප්‍රශ්න, සම්බන්ධතා බිඳවැටීම් උදාහරණ විදිහට දෙන්න පුළුවන්. ඉතින් හොඳම දේ තමන්ට ප්‍රශ්නයක් තියෙනවා නම් තමන්ට ඇහුම්කන් දෙන තේරුම් ගන්න පුළුවන් කෙනෙක් සමග කතා කරන්න. ඇබ්බැහිවීම් වලින් ඇත්තටම මිදෙන්න පුළුවන්. ඒ සඳහා අවශ්‍ය වෙන්නේ ශාරීරික මානසික හා අධ්‍යාත්මික ශක්තිමත්භාවයයි. ඇබ්බැහිවීම ක සිටිනවානම්, එහෙම කෙනෙක්, ඒ අයට සමීපතමයෙක්, එහෙමත් නැත්තං ඔබේ පවුලේ කෙනෙක් මිතුරෙක් මිතුරියක් මත්පැන් මත්ද්‍රව්‍යවලට ඇබ්බැහිවී සිටිනවා නම් ,ඔවුන්ට ඇත්තටම ඉන් මිදීමට අවශ්‍ය නම් ” අනේ මට මේක නවත්ත ගන්න බැහැ” කියලා හිතන්න එපා. ඔබට පුළුවන්.. ඔව් ඔබට එය නවත්වන්න පුළුවන්. නිර්නාමික මත්ලෝලීන් ගේ සංසදය සහෝදරත්වයේ දෑත් ඔබ වෙත දිගු කරනවා ඔබ එයින් මුදවා ගැනීමට සහාය වන්නට.
අවබෝධයෙන් අවධානයෙන් සතුටින් ජීවත් වෙන්න.
ස්තුතියි
පියුමි සිල්වා
නිහඬ ආලවන්තයා
තුමිදු දොඩන්තැන්න
පන්නිපිටිය ධර්මපාල විද්‍යාලයෙන් උගත් නාට්‍ය හා රංගනය පිළිබඳ අධ්‍යාපනය, රංගන අභ්‍යාස සහ අත්දැකිම් තම රංගන ජිවිතයෙහි ප්‍රායෝගික භාවිතයෙන් ඔහු වේදිකාව, පුංචි තිරය සහ රිදිතිරය එක ලෙස ස්පර්ශ කරමින් නිර්මාණවලට දායකත්වය ලබා දි තිබෙනවා.
පුංචි තිරයෙහි එතෙක් මෙතෙක් විකාශනය වුන ටෙලිනාට්‍යය රාමුන්වලට නව මුහුණුවරක් ගෙන දෙමින් 2017 සහ 2018 වර්ෂයන්වලදි විකාශනය වු විශේෂ නිර්මාණය කුඹියෝ ටෙලිනාට්‍යයෙහි ජෙහාන් ෆනෑන්ඩුගේ චරිතයට පන පොවමින් සුවිශේෂී හැඩයක් එක් කල ඔහුට එහි සාර්ථකත්වය වෙනුවෙන් ප්‍රේක්ෂකයන්ගේ ආදරය මෙන්ම සම්මානයන්ගෙන්ද
පිදුම් ලබන්න හැකියාව ලැබෙනවා.
ප්‍රේක්ෂක ජනාදරයට පත් වු දක්ෂ, රුවැති බිරිඳක් සහ පුංචි පුතෙකුගෙන් පරිපුර්ණ වු සුන්දර පවුලක් ලැබිමේ වාසනාවද ඔහුට නොඅඩුව ලැබි තිබෙනවා.
එසේනම් මෙවර අපි Magazine ජනවාරි කලාපය තුලින් අප කතා බහ කරන්නේ කොළඹ විශ්වවිද්‍යාලයේ කතිකාචාර්යතුමා ඔබ කවුරුත් ආදරය කරන රංගනවේදි තුමිදු දොඩන්තැන්න මහතා සමගයි.
🔸 තුමිදු දොඩන්තැන්න මේ දවස්වල අපිට දකින්න නැත්තේ ඇයි?
මම දැනට එංගලන්තයේ University Of London හි ආචාර්ය උපාධිය (PHD) වෙනුවෙන් අධ්‍යාපන කටයුතු කරගෙන යනවා. මේ සදහා මම අවුරුදු ගානක් තිස්සේ සැලසුම් කරමින් සුදානම් වුනා. එම කාලය ඇතුලත මම ලංකාවේ හිටියත් ගොඩක් අඩුවෙන් නිර්මාණ සදහා සහභාගි වුනේ.
මම පසුගිය කාලයේ ලක්මාල් ධර්මරත්නගේ ච්ත්‍රපටයක වැඩ කටයුතු ආරම්භ කරලා තිබුනත් Covid කාල වකවානුවේදි එම චිත්‍රපටයෙහි සහ තව සම්බන්ධ වෙන්න සැලසුම් කරලා තිබුන නිර්මාණවල වැඩ කටයුතු ප්‍රමාද වුනා. ඒ අතරතුරදි මට අධ්‍යාපන කටයුතු සදහා එංගලන්තයට එන්න සිදුවුනා.
මම කතිකාචාරවරයෙක් වශයෙන් කොලඹ විශ්වවිද්‍යාලයේ ශ්‍රීපාලි මණ්ඩපයෙහි සේවය කරන අතරතුර නිවාඩු ලබා ගෙනයි එංගලන්තයට පැමිණියේ. මම සැලසුම් කරලා තියෙන්නේ අධ්‍යාපන කටයුතු හොදින් අවසන් කරගෙන සුපුරුදු පුරුදු පරිදි නැවත මගේ රැකියා කටයුතු සමග සම්බන්ධ විම සහ කලා කටයුතුවල නියැලිමටයි.
🔸ඔබගේ පවුලේ තොරතුරු, පාසල් ජිවිතය සහ විශ්වවිද්‍යාල ප්‍රවේශය පිළිබදව විස්තර ටිකක් කියමුද?
මගේ ගම බලංගොඩ. මගේ අම්මාගේ තාත්තාගේ පාර්ශවයේ සියලුම නැදැයන් ඉන්නේ බලංගොඩ නමුත් මම ඉපදෙන්නේ සහ මගේ ළමා කාලය ගත කරන්නේ අනුරාධපුරයේ. ඒකට හේතුව මගේ අම්මායි, තාත්තායි ගුරුවරුපත්විම් ලැබිලා සේවය කලේ අනුරාධපුරයේ වීම. මම ළමා කාලයේදි අනුරාධපුරයේ St. ජෝසප් විදුහලෙන් අධ්‍යාපන ලැබුවා.
පසු කාලෙක මගේ තාත්තාට ජාතික අධ්‍යාපන ආයතනයේ පත්විමක් ලැබුන නිසා අපි කොළඹ පදිංචියට ආවා. ඉන්පසු මම පන්නිපිටිය ධර්මපාල විද්‍යාලයේ උසස්පෙළ දක්වා ඉගෙනුම ලබා කැලණි විශ්වවිද්‍යාලයට ඇතුලත් වෙනවා. එහිදි මම
නාට්‍යය හා රංග කලාව පිළිබදව special degree සහ Masters, MPhil උපාධි හදාරනවා. ඒ සමගම මට කැලණි විශ්වවිද්‍යායේ තාවකාලික කතිකාචාරවරයෙකු වශයෙන් වැඩ කරන්න අවස්ථාව ලැබුනා. පසුව මම කතිකාචාරවරයෙකු වශයෙන් කොලඹ විශ්වවිද්‍යාලය සමග සම්බන්ධ වෙනවා.
මගේ පවුලේ ඉන්නේ තාත්තයි, අම්මයි, අයියයි, නංගියි. මගේ තාත්තා 2012 දි අප අතරින් සමු ගත්තා. අම්මා අපිත් එක්ක ජිවත් වෙනවා. ඔබ කවුරුත් දන්නා කුඹියෝ ටෙලිනාට්‍යය නිෂ්පාදකවරයා මගේ අයියා පදිංචි වෙලා ඉන්නේ ඔස්ට්‍රේලියාවෙහි. නංගි මේ දවස්වල අයර්ලන්තයේ එයාගේ ආචාර්ය උපාධිය සදහා අධ්‍යාපනය ලබනවා.
🔸ඔබගේ ආදරණීය බිරිඳ අපි කවුරුත් ආදරය කරන ආදරණීය කලණිව හමු වුනේ කොහොමද?
මම රංගනයෙන් දායක වුන නාට්‍යයක් බලන්න කලණි ඇවිත් තිබුනා. නාට්‍යය අවසානයේදි එයා මට සුභ පතන්න කතා කලා. එතනදි දැන ඇදින ගෙන කාලයත් සමග අපේ කතා බහ ආදර සම්බන්ධයක් බවට පත්වුනා.
කලණි චිත්‍ර ශිල්පිනියක්. ඇය උපාධිය හැදැරුවෙත් ඒ සම්බන්ධවමයි. එමෙන්ම ඇය Art therapy කියන විෂයත් ඉගෙන ගත්තා. දැන් ඇය මොරටුව විශ්වවිද්‍යාලයේ දියගම පීඨයෙහි වෘත්තීය උපදේශකවරියක් ලෙස සේවය කරනවා.
අවුරුදු 3ක් විතර කාලයක් ආශ්‍රය කරලා 2014 දි අපි විවාහ වුනා. අපිට දැන් අවුරුදු 4ක විතර පුංචි පුතෙක් ඉන්නවා. මම දැනට එංගලන්තයෙහි ජිවත් වන නිසා මගේ අම්මා, කලණි සහ පුතා ලග නැති අඩුව මට සැහෙන්න දැනෙනවා. ඉදිරි කාලයේදි කලණි සහ අපේ පුතා අපූර්ව එංගලන්තයට ගෙන්න ගන්න මම සැලසුම් කරලා තියනවා.
🔸ඔබගේ නම කියු සැනින් අපට සිහියට නැගෙන ඔබ සම්මානයට පාත්‍රවූ කුඹියෝ ටෙලිනාට්‍යය සමග සම්බන්ධ වුනේ කොහොමද? ඔබට ලැබුනු ප්‍රතිචාර සහ කුඹියෝ 2 එනකම් බලන්න ඉන්න ප්‍රේක්ෂකයන්ට දෙන පණිවිඩය මොකක්ද?
කුඹියෝ ටෙලිනාට්‍යය මගේ ජිවිතයේ හැරවුම් ලක්ෂයක් වෙනවා මොකද මාව ගොඩක් අය දැන ගත්තේ කුඹියෝ ටෙලිනාට්‍යයෙන් පස්සේ. රංගන ශිල්පියෙකු විදියට ප්‍රේක්ෂකයන් අපිව දැන ගන්න එක ලොකුම ජයග්‍රහණයක් කියලා මම හිතනවා.
කුඹියෝ ටෙලිනාට්‍යය සදහා ලක්මාල් ධර්මරත්න මට කතා කරන කාලයේදි මම පශ්චාත් උපාධිය සදහා අධ්‍යාපන කටයුතු වෙනුවෙන් කෙටි කාලයකට ඔස්ට්‍රේලියාවට යන්න සුදානම් වෙමින් හිටියේ. ලක්මාල් කතා කරපු ගමන් මම කිවේ “Sorry ලක්මාල් මට එන්න බැහැ. මම ලොකු වැඩක් එක්ක ඉන්නේ. මට studies එක්ක දෙකක් කරන්න බැහැ. ඒ හින්දා ඔයා වෙන actor කෙනෙක් ගන්න මේ වැඩේට මට රගපාන්න බැහැ” කියලා.
ලක්මාල් කියන්නේ එහෙම වචනෙන් බැහැ කිවාට ලේසියෙන් අතාරින කෙනෙක් නෙවෙයි. ඒක ඇත්තටම මම පස්සේ තමයි දැන ගත්තේ. එතන ලක්මාල් සහ දමිත් චන්ද්‍රසිරි දෙදෙනාම හිටියා. මට කිවා පිටපත කියවලා බලන්න කියලා. ඉතින් මම කිවා “කිසිම හේතුවක් නිසා මට පිටපත එවන්න එපා. මොකද මම දන්නවා ඔයගොල්ලෝ ලියන ඒවා මාර රහයි කියලා. පිටපත කියෙවුවොත් මට ඕක කරන්න ආස හිතෙනවා” කියලා.
දවසක මගේ facebook massenger එකට ලිපි
ගොනු වගයක් එවලා තිබ්බා. මම දැනගෙන හිටියේ නැහැ කවුද එවලා තියෙන්නේ කියලා. මම බැලුවම පිටු 300 ගානක පිටපතක්. මම ඒ වෙලාවෙම පිටපත කියවන්න පටන් ගත්තා. ඇත්තටම නවත්තන්න හිතුනේ නැ. පැය කිපයක් ඇතුලත පිටු 300 ගානම කියවලා ඉවර කලා. එතනදි තමයි ලක්මාල්ගේ ගේම් එකට මම අහු වුනේ. ඉතින් ඒ විදියට තමයි මම කුඹියෝ ටෙලිනාට්‍යය සමග සම්බන්ධ වුනේ.
ඔය අතරතුරේ දි මට අධ්‍යාපන කටයුතු සදහා මාස 6 කට ඔස්ට්‍රේලියාවට යන්න වුනා. ඒ අවස්ථාවෙත් මම ලක්මාල්ට කිවා වෙන රංගන ශිල්පියෙකු හොයා ගන්න කියලා. ඒත් ලක්මාල් මම එනකම් හිටියා. නමුත් මම ආපහු එනකොට නිශ්පාදකවරයා අයින් වෙලා තිබුනා. ඒ නිසා තමයි මම මගේ අයියාට අරාධනා කලේ ටෙලිනාට්‍යයෙහි නිශ්පාදන කටයුතු සමග සම්බන්ධ වෙන්න.
ලක්මාල්, දමිත, කලණ ඇතුලු කුඹියෝ කණ්ඩායම එක්ක වැඩ කරපු වකවානුව හරිම රසවත්, මිත්‍රශිලි, සුන්දර කාලයක්. කුඹියෝ නිසා මට ජනප්‍රියම නළුවා සම්මානය සහ හොදම නළුවා සම්මාන දෙවතාවක් ලැබුනා. කුඹියෝ ටෙලිනාට්‍යය නිසා මට ලැබුන හැමදේටම මම කුඹියෝ කණ්ඩායමට ස්තුතිවන්ත වෙනවා.
කුඹියෝ 2 එනවා. ඇත්තටම කුඹියෝ 2 ක මීට ගොඩ කාලයකට කලින් ප්‍රේක්ෂකයන්ට ලබා දෙන්න තිබුනා.
කුඹියෝ 2 හි වැඩ පටන් ගන්න කලින් අපේ කණ්ඩායම සැලසුම් කරලා තිබ්බේ ච්ත්‍රපටයක් කරන්න. එම ච්ත්‍රපටයේ වැඩ COVID වසංගතය නිසා ප්‍රමාද වුනා නමුත් මේ වනවිට ච්ත්‍රපටයෙහි වැඩ අවසන් කරගෙන යනවා. ඊට පස්සේ අපි කුඹියෝ 2 රූපගත කිරිම් පටන් ගන්නවා. ඇත්තටම ලක්මාල් මේ වනවිට පිටපතෙහි සෑහෙන ප්‍රමාණයක් ලියලා තියෙන්නේ. ලක්මාල් හිතන විදිය ගැන මට අදහසක් තියන නිසා මම හිතනවා කුඹියෝ 1 ටෙලිනාට්‍යය වගේම කුඹියෝ 2 ටෙලිනාට්‍යයත් සාර්ථක වෙයි කියලා. එමෙන්ම ප්‍රේක්ෂකයන් ආදරය කරයි කියලා. කුඹියෝ 2 රූපගත කිරිම් සදහා මම ලංකාවට යන්න බලාපොරොත්තුවෙන් ඉන්නවා.
🔸 ඔබේ රංගනය ජිවිතයේ ආරම්භය පිළිබදව සහ එතෙක් මෙතෙක් රංගනයෙන් දායක වුන වේදිකා නාට්‍යය, ටෙලිනාට්‍යය සහ චිත්‍රපට පිළිබදව කිවුවොත්..
මට රගපෑම ගැන ආසාවක් ඇතිවුනේ ධර්මපාල විද්‍යාලයට ආවාට පස්සේ. අපේ පාසලේ තිබුනා වාර්ෂික නාට්‍යය තරඟයක්. මම යාළුවන් එක්ක එකතු වෙලා වාර්ෂික නාට්‍යය තරගයට නාට්‍යයක් ඉදිරිපත් කලා. එය එතරම් සාර්ථක වුනේ නැහැ හැබැයි මට ඊට පස්සේ අදහසක් ආවා ඒ පිළිබදව ඉගෙන ගන්න. ඊට පස්සේ මම පාසලේ හැදෙන නාට්‍යයවලට සම්බන්ධ වෙලා රංගන පිළිබදව ටික ටික ඉගෙන ගත්තා.
උසස්පෙළ සමත් වෙලා විශ්වවිද්‍යාලයට යන්න කලින් අවුරුදු 2ක විතර කාලයක් මට ගෙදර ඉන්න සිද්ධ වුනා. එම කාලයේදි මම ටවර් හෝල් රඟහල පදනම සමග සම්බන්ධ වෙලා අවුරුද්දක පමණ පාඨමාලාවක් හැදැරුවා. එහිදි ඒ වෙනකොට ලංකාවේ හිටපු මහා නාට්‍යයකරුවන්ගෙන් ගුරුහරුකම් ලබා ගන්න මට අවස්ථාව ලැබුනා.
පිටපත් රචනය, අධක්ෂණය සහ මගේ තාත්තාගේ උදව්වෙන් නිශ්පාදනයද කරමින් මම 1999 දි අරුන්දති නමින් මගේ ප්‍රථම නාට්‍යය නිර්මාණය කලා. අරුන්දති නාට්‍යය සදහා සම්මාන කිපයක්ම ලබා ගන්නටත් මට පුලුවන් වුනා.
හෙන්ඩ්‍රි ජයසේන මහතාගේ හුනු වටයේ කතාව, අපට පුතේ මගක් නැතේ, බන්දුල ජයවර්ධන මහතාගේ බෙර හඩ, ලුෂන් බුලත්සිංහල නාට්‍යයකරුවාගේ තාරාවෝ ඉගිලෙති, රතු හැට්ටකාරි වැනි ඒ වෙනකොටත් ඉතාමත් ජනප්‍රිය නාට්‍යයන්ගේ අලුත් නිෂ්පානයන්වල මට රංගනයෙන් දායක වෙන්න ලැබිම මගේ ජිවිතයේ මට ලැබුන ලොකු අවස්ථාවන් කියලා මම හිතනවා.
ඒ වගේම රාජිත දිසානායක, අතුල පතිරණ, ප්‍රියංකර රත්නායක වැනි නාට්‍යයකරුවන් බොහෝමයක් සමග මට වැඩ කරන්න අවස්ථාව ලැබුනා. වේදිකාවෙන් ලැබුන අත්දැකිම් නම් මට අමතක වෙන්නේ නැහැ.
ප්‍රසන්න ජයකොඩිගේ සංකාර ච්ත්‍රපටයෙන් මට ප්‍රථම වරට රිදි තිරයෙහි රංගනයෙන් දායක වෙන්න අවස්ථාව ලැබෙනවා. ඉන්පසු බුඩි කිර්තිසේනගේ මාතා, අනුර ජයවර්ධනගේ නිකිණි වැස්ස, සුමිත්‍රා පිරිස්ගේ වෛෂ්ණාවී, චන්න දේශප්‍රියගේ U Turn වැනි ච්ත්‍රපට කිපයකම රංගනයෙන් දායක වෙන්න මට හැකියාව ලැබුනා.
ප්‍රේම කුමාර ජයවර්ධනගේ දිය මත රුව, නමවෙනි කඩුල්ල, පිනිබර යාමය වැනි ටෙලිනාට්‍යය කිපයකම රංගනයෙන් දායකත්වය ලබා දෙන්න මට හැකි වුනා.
ඒ අතරතුර තමයි මට කුඹියෝ ටෙලිනාට්‍යය සදහා ආරාධනාව ලැබෙන්නේ. ඒවගේම මමයි කලණියි අපි දෙන්නම නාමල් ජයසිංහගේ සහෝදරයා ටෙලිනාට්‍යයට දායක වුනා. ඊට අමතරව මම කරපු කෙටි චිත්‍රපට කිපයකුත් තියනවා.
🔸 ඔබව පුංචි තිරයේ සහ රිදි තිරයේ ඉදිරියේදී ප්‍රේක්ෂකයන්ට දැක ගන්නට ලැබෙන නිර්මාණ මොනවාද?
මම කලින් කියපු විදියට මගේ ආචාර්ය උපාධිය සදහා සුදානම් වුන නිසා සහ දැනට එංගලන්තයෙහි ජිවත් වන නිසා මගේ නිර්මාණ ගොඩක් නම් ඉදිරියේදි දකින්නට නැති වෙයි. මම රංගනයෙන් දායක වෙන ලක්මාල් ධර්මරත්නගේ ච්ත්‍රපටයෙන් ප්‍රේක්ෂකයන්ට ඉදිරියේදි මාව දකින්නට ලැබේවි.
අමා නාකන්දලගේ
මගේ හිතට ආව සිතුවිල්ලක
මගේ හිතට ආව සිතුවිල්ලක ප්‍රතිපලයක් විදියට තමයි ” අපි magazine ” එලිදැක්වෙන්නෙ .
එහි නමේම තියෙනවා සමුහිකත්වය කියන ආකල්පය. මට හිතුනත් .. මගේ නෙමෙයි, “අපේ” කියන හැගීම. අන්න ඒ “අපි” කියන හදවතට කතා කරන වචනෙත් එක්ක ආරම්භ වුණ අපි සගරාවට අවුරුදු තුනක් දැන්.තෙවැනි අවුරුද්ද සමරන මේ වෙලාවෙ මුලින්ම ආදරයෙන් මතක් කරන්න ඕනෙ චන්දන සහ චමින්ද මගේ සහෝදර මිතුරන් දෙදෙනාව. මගේ සිතුවිල්ලට පනක් දෙන්න ඒ දෙදෙනාගෙන් ලැබුනු නොමසුරු සහය අපරිමිතයි.
එතනින් ගත්ත ආරම්භය මේ වෙනකොට අවුරුදු තුනක දුර ගමනක් අරන් එන්න කොහෙත්ම පුලුවන්කමක් නැතිවෙන්න තිබුනා, මාත් එක්ක දිගටම හෙවනක් වගේ සඟරාව තමන්ගෙම දෙයක් වගේ ආදරයෙන් හොයලා බලලා අඩුපාඩු හදාගෙන, අලුත් අදහස් එක්ක ඉන්න මගේම සහෝදර සහෝදරියන් වගේ ඉන්න අපි ටීම් එක. පුරා අවුරුදු තුනක්ම මා සමඟ හිටිය සහ ඒ වගේම , අලුතින් එකතුවුනු අපි ටීම් එකේ හැමෝවම මේ වෙලාවේදි ආදරෙන් මතක් කරනවා.
මට හැමදාම ඕන වුණේ පිට රට ඉන්න ලංකාවෙ අය එකම තැනකට එකතු කරන්න ක්‍රමයක්. මේ ගෙවුන අවුරුදු තුනේදී අපි ටීම් එකට ඒ දේ හිතුවටත් වඩා සාර්තකත්වයකට යන්න පුලුවන් වුණා කියලා හිතනවා.
රටවල් ගනනාවකින් ලැබෙන ප්‍රතිචාරත් එක්ක හිතට දැනෙන සතුටත් එක්ක මේ වැඩේ අපි ටීම් එකට ලස්සනට කරගෙන යන්න පුලුවන් වෙලා තියෙනවා. තව දෙයක් ගොඩක් ආඩම්බරෙන් කියන්න ඕන. ඒ තමයි මගේ කතෘ මන්ඩලය. අපි සඟරාව වර්ණවත් සහ හරවත් කරන අපි කතෘ මන්ඩලය ඒ ඒ ලියන විෂයන්වල ප්‍රවීනයන් වීම මට තියෙන ලොකුම ආඩම්බරයක්.
ඒ අයගෙ දැනුම අපි අතරෙ කිසිම පැකිලීමකින් තොරව බෙදාගන්න හරිම ආසාවකින් බලගෙන ඉන්නවා .
ඉදිරි වසරෙත් අලුත් ලිපි සහ මාධ්‍ය කරනයේ තවත් එක් සංදිස්ථානයක් සලකුනු කිරීමට බලපොරොත්තුවෙන් සිටිනවා. නව ආරෙකින් ,නවමු අත්දැකීම් එකතුවක් සමඟින් තවත් අවුරුද්දක් අපි සඟරාව ඔබ අතට පත්කරන බලාපොරොත්තුවත් එක්ක, අපි සඟරාව සමග එකතු වෙන්න කියල ආදරයෙන් ආරාධනා කරනවා.
ස්තූතියි !
මම,
ගයාන් කරුණාරත්න.
