Month: February 2023
නිසි ආයුර්වේද ප්‍රතිකාර හමුවේ සම්පූර්ණයෙන් සුවකළ හැකි ‘අම්ලපිත්ත’ රෝගය
වර්තමානයේ සමාජය තුළ බහුලව දක්නට ලැබෙන රෝගී අවස්ථාවක් ලෙසට ගැස්ට්‍රයිටිස් (Gastritis) රෝගය හැඳින්වීමට පුළුවන. ආයුර්වේද වෛද්‍ය විද්‍යාවට අනුව එය ‘අම්ලපිත්ත’ නම් රෝගයේ එක්තරා අවස්ථාවක් ලෙසට විග්‍රහ කෙරේ.
අම්ලපිත්ත රෝගය ආහාර ජීර්ණ පද්ධතිය ආශ්‍රය කොට ගනිමින් හට ගන්නා අතර වයස් භේදයකින් හෝ ස්ත්‍රී පුරුෂ භේදයකින් හෝ තොරව හට ගනී.
ආයුර්වේද මතානුකූලව පිත දෝෂය ප්‍රමුඛ කොට හටගන්නා රෝග තත්ත්වයක් වුවද අනෙකුත් දෝෂයන් වන වාත දෝෂ හා කඵ දෝෂ වල අනුබන්ධතාවයක්ද අම්ලපිත්ත රෝගී තත්ත්වය හා බැඳේ.
ආහාර නිසි පරිදි දිරවීමට ශරීරයේ පිත දෝෂය ප්‍රමුඛත්වයක් ගන්නා බැවින් ‘ප්‍රකෘති පිත’ එනම් විකෘති නොවූ පිත් දෝෂය මගින් ආහාර දිරවීම සිදු කෙරේ. නමුත් පිත් දෝෂය විකෘති වූ කල්හි පිතෙහි ආම්ලික බව අධික වීමෙන් අම්ලපිත්ත රෝගය හට ගැනීමට හේතු සැළසේ.
‘විදග්ධ පිත්තං අම්ලපිත්තං’ යන සංස්කෘත අර්ථ දැක්වීමට අනුව විදග්ධ වූ පිත නොහොත් ‘ඇඹුල් පිත’ හටගැනීම ‘අම්ලපිත්ත’ ලෙසට හැඳින්වේ.
ආමාශය තුළ ආහාර ජීර්ණ ක්‍රියාවට උපකාරී වන ‘පාචක පිත’ සමඟ ආහාරය නිසිලෙස නොපැසී පල් වීම නිසා අම්ලපිත්ත රෝගය උපදනා බව සරලව කිව හැක.
රෝගය ඇතිවීමට හේතු කාරණා කල්තියා හඳුනා ගැනීම රෝගය ඇතිවීම වළක්වා ගැනීමේ පළමු පියවරයි.
කුසගිනි දැනෙන අවස්ථාවන්හි ආහාර නොගෙන සිටීමෙන් අමාශය තුළ දිගින් දිගටම ශ්‍රාවය වන ආමාශයික අම්ලය හේතුවෙන් ආමාශයේ අභ්‍යන්තර ශ්ලේෂ්මල පටලයට හානි වීම සිදුවේ. තවද, අමාශය, ගලනාලය, ග්‍රහණිය හා කුඩා අන්ත්‍රය යන ඉන්ද්‍රියයන් මෙමගින් පීඩාවට පත්වේ. ආමාශය තුළ නිපදවෙන මෙම අධික ආම්ලිකතාවය (Hyper acidity) හේතුවෙන් පිළිස්සී තුවාල වූ, අමාශයේ ඇතුල් බිත්ති වල Helicobacter pylori (H pylori) වැනි වූ බැක්ටීරියා ආසාධන ඉතා පහසුවෙන් සිදු වේ.
ගලනාලය පහළ කෙළවර පවතින කපාටයේ ක්‍රියාකාරීත්වයේ හා ව්‍යුහාත්මක වෙනස්කම් ද අම්ලපිත්ත රෝගය ඇති වීමට හේතු වේ. එවැනි වූ අවස්ථාවල දී අමාශය තුළ නිපදවී ඇති අම්ලය ගලනාලය තුළට පහසුවෙන් ඇතුල්වීම සිදුවේ. එවිට ගලනාලයේ ඇතුල් බිත්ති හානි වී ගලනාලය ප්‍රදාහ වීම, උගුර දැවිල්ල, ඔක්කාරය, වමනය ඇති වීම (Gastroesophageal Reflex Disease-GORD) සිදුවිය හැක.
අම්ලපිත්ත රෝගීන්ගේ බහුලව දක්නට ලැබෙන රෝග ලක්ෂණ ලෙසට ආහාර ගත්පසු බඩ පුරවා දැමීම, කටට තික්ත හෝ අම්ල රස නිතර දැනීම, පපුවේ හෝ උදරයේ වේදනාව, වමනය, ඔක්කාරය, නොදිරවූ ආහාර මල සමග පිටවීම හා මලබද්ධය හැඳින්විය හැක.
ආයුර්වේද වෛද්‍ය විද්‍යාවට අනුව ඌර්ධවගත අම්ලපිත්ත හා අධෝගත අම්ලපිත්ත ලෙස දෙයාකාරයකි.
ඌර්ධවගත අම්ලපිත්ත රෝගය සඳහා විකෘති වූ පිත හා සෙම සම්බන්ධ වේ. අම්ලපිත්ත රෝගයේ වඩා සුලභ රෝගී අවස්ථාව මෙය වන අතර එය ආමාශය හා ගලනාලයේ පහළ කොටස් කෙරෙහි බලපායි. සෙම සහිත වමනය, ඔක්කාරය සමඟ උගුරට ඒම, බඩ, පපුව හා උගුර දැවිල්ල, තදබල හිසේ වේදනාව හා කල් යාමේදී ආමාශගත තුවාල ඇතිවීම ඌර්ධවගත අම්ලපිත්තයේදී බහුලව දක්නට ලැබෙන ලක්ෂණ කිහිපයකි.
අධෝගත අම්ලපිත්තය එතරම් සුලභ නොවුනද එම රෝගී අවස්ථාවේදී දැවිල්ල, ඔක්කාරය, කුසගිනි අඩු වීම, මල මාර්ගයේ දැවිල්ල හා වේදනාව, මලබද්ධය හා දියරමය මල පිටවීම, මල මාර්ගයේ තුවාල, පැලීම්, බිබිලි හටගැනීම, අරශස්, ගුද මාර්ගය පහත්වීම යන අපහසුතා ඇතිවිය හැක.
නිසිලෙස වෛද්‍ය ප්‍රතිකාර නොකිරීමෙන්, ආමාශ බිත්තියේ ලේ ගැලීම්, තුවාල හටගැනීම් (Peptic ulcer) දක්වා රෝගය උත්සන්න වීම සිදුවිය හැක.
මෙහිදී, තුවාල වූ ග්‍රහණිය හා අන්ත්‍ර කොටස් මගින් ආහාරයේ පෝෂ්‍ය කොටස් නිසිලෙස උරාගැනීමට නොහැකි වීමෙන් ශරීරයට අවශ්‍ය පෝෂණය නිසිලෙස නොලැබී යාමත්, රුධිර වහනය හේතුවෙන් රක්ත හීනතාවයත් (Anemia) ඇති විය හැක.
මානසික ආතතිය හා චිත්ත ආවේග අධිකව දීර්ඝ කාලයක් පැවතීම, නිසිවේලාවට ආහාර නොගැනීම, සමබල ආහාර වේලක් නොගැනීම, ආහාර දිරවීමට පෙර වරින් වර ආහාරයට පෙළඹීම, ක්ෂ්ණික ආහාර නිතර ගැනීම, අධික මත්පැන් හා මත්ද්‍රව්‍ය ගැනීම, දුම්පානය, විෂ ද්‍රව්‍ය ආහාර මාර්ග ගත වීම, කෘතිම රසකාරක අඩංගු ආහාර හා බීම වර්ග භාවිතය, රාත්‍රී නිදි මැරීම හා දහවල නිදීම, අධික අම්ල, ලවණ හා තීක්ෂණ ආහාර ගැනීම, අධික කුළුබඩු යෙදූ ආහාර, තෙල් බැඳුම් වර්ග නිතර භාවිතය, නරක් වූ පිළුණු ආහාර ගැනීම, තේ, කෝපි නිතර භාවිතය, අධික හිරු එළියට නිරාවරණය වීම, අවශ්‍ය තරම් ජලය පානය නොකිරීම, ඖෂධ වර්ග නිසි වෛද්‍ය නිර්දේශයකින් තොරව භාවිතය යන හේතූන් නිසා අම්ලපිත්ත රෝගය පහසුවෙන් හට ගනු ඇත.
රෝග ලක්ෂණ හටගත් වහාම සුදුසුකම් ලත් වෛද්‍යවරයෙක් හමුවී නිවැරදි රෝග විනිශ්චය සිදුකොට වෛද්‍ය ප්‍රතිකාර හා උපදෙස් ලබා ගැනීම සිදු කළ යුතුය.
හෘදයාබාධ, ආමාශයේ තුවාල හෝ ව්‍රණ, ආමාශයේ පිළිකා, අග්න්‍යාශ ප්‍රදාහ යන වෙනත් රෝගී අවස්ථාවන්හිදීද මෙම රෝග ලක්ෂණයන්ට සමාන ලක්ෂණ හටගන්නා බැවින් කල්තියා නිවැරදි රෝග විනිශ්චය සිදු කිරීම අතිශය වැදගත් වේ.
අම්ලපිත්ත රෝගීන් පත්‍ය අපත්‍ය ආහාර හා විහරණයන් කෙරෙහි සැළකිලිමත් වීම අනිවාර්‍ය වේ. ආහාර වේල් නිසි වේලාවට ගැනීම, ජලය වැඩි ප්‍රමාණයක් පානය කිරීම, තෙල් අඩු, අධික ලෙස මිරිස් තුනපහ නොයෙදූ ආහාර ගැනීම, තේ, කෝපි වැනි පානයන් වෙනුවට පලතුරු යුෂ, ඔසු පැන්, කොත්තමල්ලි පානය කිරීම නිතර පුහුණු කිරීම කළ යුතුය.
නිවුඩු හාල් බත්, පලා වර්ග, කැකිරි, පිපිඤ්ඤා, පුහුල්, වැටකොළු, බණ්ඩක්කා, බතල, කොහිල, කෙහෙල්මුව, නෙළුම් අල, තැඹිලි, කුරුම්බා, සව්, බාර්ලි, කව්පි, මුං ඇට, අනෝදා, කොමඩු, ගොටුකොළ, මුකුණුවැන්න, හාතවාරිය, පොල්පලා, ඉරමුසු, බෙලිමල්, විෂ්ණුක්‍රාන්ති, කෝමාරිකා, ඉදුණු බෙලි, දෙළුම් වැනි ආහාර අම්ලපිත්ත රෝගීන් සඳහා ඉතා යෝග්‍ය වේ.
තවද, දියබත් සාදා නිතර අනුභවයෙන් ආමාශගත තුවාල සුව වීම් සිදුවේ.
තක්කාලි, අන්නාසි, ඉස්සන්, දැල්ලන්, බල මාළු, හරක් මස්, ඌරු මස්, දෙල්, මුරුංගා, අඹ, ඇඹරැල්ලා, අබ, විනාකිරි, අච්චාරු, මාළුමිරිස්, ලුණු මිරිස්, කොච්චි මිරිස්, කරවල, පාන්පිටි ආහාර, ජාඩි, චොක්ලට් වර්ග ආහාරයට ගැනීම අහිතකර වේ.
මනස විවේකීව තබා ගැනීම, යෝග ව්‍යායාම් වල නිරත වීම, රාත්‍රී නිදිමැරීම හා දිවා නිද්‍රාව සිදු නොකිරීම යන විහරණයන් පුරුදු කිරීමද හිතකර වේ.
රෝගියා විසින් අහිතකර ආහාර විහරණයන්ගෙන් ඈත්ව, හිතකර ආහාර විහරණයන් කෙරෙහි වැඩි අවධානය යොමු කිරීම තුළින් ගැස්ට්‍රයිටිස් රෝගය නැවත ඇතිවීම වළක්වා ගත හැකි අතර නිසි ආයුර්වේද ප්‍රතිකාර හමුවේ අම්ලපිත්ත රෝගී තත්ත්වය ප්‍රත්‍යක්ෂ ලෙස සුව කළ හැකි රෝගයකි.
ආයුර්වේද වෛද්‍ය නාලිකා හංසිනී ජයතිලක
BAMS (Colombo)
ගැහැණිය
අලුත් අවුරුද්දට පවුලම හැඩකරන PETTAH STREET
එංගලන්තයේ වෙසෙන ශ්‍රී ලාංකීයන්ට ලංකාවේ සාම්ප්‍රදායික ඇගලුම් හා නිශ්පාදන පහසු මිලට ඉතා ඉක්මන්ම සේවාවකින් ඔවුන් අතට පත් කරන අපේ කම තියෙන PETTAH STREET ගැන, සිංහල සහ හින්දු අලුත් අවුරැද්දට දැන්මතියා ලකලෑස්තිවන ඔබව දැනුවත් කිරීමට Pettah Street අධ්‍යක්ෂ පසිදු රණසිංහ ‘අපි Magazine’ කන්ඩායම සමග කල කතාබහයි මේ….
මොකක්ද මේ හැමෝම මේ දවස්වල කතාවෙන හැමතැනම පේන්න තියෙන PETTAH STREET?
Pettah Street කියන්නෙ බ්‍රිතාන්‍යයේ වෙසෙන ලාංකිකයන්ට තම ප්‍රියතම handloom, Batik වැනි දේශීය නිමි ඇදුම් සහලංකාවෙ සාම්ප්‍රදායික නිශ්පාදන පහසුවෙන් මිලටගැනීමට සහ දින දෙකතුනක් වැනි ඉතාමත් කෙටිකාලයකින් නිවසටමගෙන්වාගතහැකි online ව්‍යාපාරයක්.
ඒකියන්නෙ ළඟ එන අලුත් අවුරුදු සමයේදී ශ්‍රී ලාංකික පාරිභෝගිකයන්ට සේවා සැලසීමට PETTAH STREET සූදානම්ද?
100% ක්ම ලෑස්තියි. අපේ ආරම්භක පසුගිය වසරේ අපිට ඉතා හොද ඉල්ලුමක් සහ විශේෂයෙන් ගැනුම්කරුවන්ගෙන් හොදප්‍රතිචාරයක් ලැබුනා. ඒ ලැබුනු පන්නරයක් සමග මෙම නව වසර සදහා මුලු පවුලටම ගැලපෙන නව විලාසිතා 100ක් පමනඑකතුකරා. මෙවර www.pettahstreet.co.uk වෙත පිවිසෙන ඔබට සම්පූර්ණ විලාසිතා 200කට වඩා තෝරාගැනීමක්තිබෙනවා. ඒවගේම විශේෂම කාරනය, අපගේ සියලු නිශ්පාදන 100% ක්ම ශ්‍රීලාංකික නිශ්පාදනයි.
PETTAH STREET ආරම්භ කරන්න ඔබව පොළඹවන්න හේතු උනේ මොනවද?
ශ්‍රී ලංකාව සමඟ සම්බන්ධ ව්‍යාපාරයක් කිරීමට මට බොහෝ කාලයක සිට වුවමනාවක් තිබුණා. ඒකට හේතු කිහිපයක් තියෙනවා. මම ඉපදී හැදුණු වැඩුණු රටට යමක් ආපසු ලබා දෙන්නත් ඒ මගින් පුළුවන්. ව්‍යාපාරයක් ඇරඹීමේ අදහසක් ඇති වීමත් එක්කමමම ලංකාවේ දේශීය ඇගලුම් සහ සාම්ප්‍රදායික නිෂ්පාදන ගැන මදක් සොයා බැලුවා. ඒ සාම්ප්‍රදායික නිෂ්පාදන අපනයනය සඳහායම් කිසි උදව්වක් ඒ නිෂ්පාදකයන්ට අවශ්‍ය වී තිබෙන බවත් එක්සත් රාජධානිය තුළ ජීවත්වන ශ්‍රී ලාංකිකයන් සැලකිය යුතුප්‍රමාණයකට එවැනි භාණ්ඩ සඳහා ප්‍රවේශයක් නොමැති බවත් මා හඳුනා ගත්තා. ඒ සියල්ල සැලකිල්ලට ගනිමින් තමයි මා මේව්‍යාපාරය ආරම්භ කළේ.
ව්‍යාපාර ක්ෂේත්‍රයේ ඔබට තිබෙන අත්දැකීම් මොනවාද?
ව්‍යවසායකයෙක් විදිහට මගේ පළවෙනි අත්දැකීම මෙය වුණත්බ්‍රිතාන්‍යයේ පාරිභෝගික භාණ්ඩ අලෙවි හා බෙදාහැරීම ක්ෂේත්‍රයේ දශකයකට වඩා වැඩි කාලයක අත්දැකීම් තිබෙනවා. ශ්‍රීලංකාවෙන් භාණ්ඩ ආනයනය කර එක්සත් රාජධානිය සහ යුරෝපය තුළ විකුනුම් සහ බෙදා හැරීමේ ක්‍රියාවලිය සමග මාසම්බන්ධ වී සිටියා. ඒ කටයුත්තෙහි සාර්ථකව නිරත වන ශ්‍රී ලාංකිකයෙකුට අයත් ව්‍යාපාරයක් සමග දීර්ඝ කාලයක් තිස්සේසම්බන්ධ වී සිටීමෙන් ව්‍යාපාර කටයුතු වල බොහෝ පැතිකඩයන් පිළිබඳ ප්‍රායෝගික අත්දැකීම් රාශියක් මට ලැබුණා. ඒ අත්දැකීම්සහ පළපුරුද්ද මට මගේ ව්‍යාපාරය සඳහා විශාල ශක්තියක්.
ව්‍යාපාරයක් ලෙස ස්ථාපිත කිරීමේදී මතු වූ ප්‍රධාන අභියෝග මොනවාද?
ඕනෑම අලුත් ව්‍යාපාරයක් ආරම්භකිරීම සහ පවත්වාගෙනයාම අභියෝගයක්. විශේෂයෙන්ම UK වගේ ඉතාමත්ම ඉහල තලයේBrands ජනප්‍රිය රටක මුලසිටම brand එකක් වශයෙන් ස්තාපිතවීම පහසු වැඩක් නෙමෙයි. ඒ සදහා මම විශාල වශයෙන්මහන්සිඋනා. ඒ වගේම මොනදේටත් වඩා මම බ්‍රිතාන්‍යයේ වෙසෙන ශ්‍රීලාංකිකයන්ව විශ්වාස කරා. ඔවුන්ට උසස් තත්වයේනිශ්පාදනයක්, සාදාරන මිලකට පහසුවෙන් ලබාගතහැකිනම් ඔවුන් අප සමග අනිවාර්යයෙන් රැදෙනවා. නමුත් target market එකකට විශාල marketing budget එකක් නැතුව පිවිසීම දුශ්කරයි. ඒනිසා brand එකක් ලෙස ජනප්‍රිය වීමට සහශ්‍රීලාංකිකන්ගේ අතරට යාමට social media platform තුලත් community groups සමගත් විශාල වැඩකොටසක් කලා.
PETTAH STREET කියන්නෙ පාරිභෝගිකයන්ට විශ්වාසය තැබිය හැකි වෙළඳ සන්නාමයක් වන්නේ ඇයි?
අනිවාර්යයෙන් අපගේපාරිභෝගිකයන්ම ඒ සදහා සාක්ශි දරයි. Sales කියන process එකේ මම වැඩියෙන්ම විශ්වාස කරනදේ තමයි customer satisfaction එක. ඒක තමයි brand එකක් ඉස්සරහට යන්න අවශ්‍යම සාදකය. Customer satisfaction කියනදේඅවසානයේ ලැබෙන්නේ ඔවුනට quality, price, service කියනදේ උපරිමයෙන් ලැබුනාම. අපි නිරන්තරයෙන් උත්සාහ කරන්නෙ ඒදේ උපරිමයෙන්ම ලබාදෙන්න. ඒවගේම අපි UK සිට ක්‍රියාත්මකවීම, අපගේ products සහ ඇගලුම් UK සිට courier කිරීමCustomer Queries වලට ඉතා ඉක්මනින් response කිරීමත් පාරිභෝගිකයන්ගේ විශ්වාසය තවතවත් වැඩිවීමට හේතුවීතිබෙනවා.
භාණ්ඩ මිලදී ගැනීමෙන් ශ්‍රී ලංකාවට අත්වන වාසි මොනවාද?
ශ්‍රී ලංකාව ඉතිහාසයේ දරැනුතම ආර්ථික අර්බුදයකට පත්වෙලා ඉන්න අවස්තාවකයි ඉන්නෙ. විශේෂයෙන් අඩු අදායම්ලාබීන් තවත්අසරනවෙලා. අපි නිශ්පාදන වැඩිවශයෙන් මිලට ගන්නෙ ඉතා කුඩා ප්‍රමාණයේ, නිවාස අශ්‍රිතව තම නිශ්පාදන කරනව්‍යවසායකයන්ගෙන්. පසුගිය වසරපුරාවටම අපට හැකියාව ලැබුනා ඔවුන්ට ආර්ථික වශයෙන් අමතර ශක්තියක් ලබාදෙන්න. අපගේ පාරිභෝගිකයනුත් ඔවුන් නොදැනුවත්වම අපේ රටට ලොකු දායකත්වයක් ලබාදීලා තියෙනවා. අනිත් අතට අත්‍යාවශ්‍යමExports වැඩිකිරීම සදහාත් අපි දායකවෙනවා. ඒ වගේම පාරම්පරික හා දේශීය නිපැයුම්කරැවන් ආරාක්ශාකරගැනීමටදායකත්වයක් සැපයීමත් වගේම UK වල ජීවත්වන අපේ ඊලග පරම්පරාවට අපේ සංස්කෘතිය, දේශීයත්වය සමග බද්දවන්නටපහසුවක් අපි නිර්මානය කරලා තියෙනවා..
PETTAH STREET වෙත පිවිසෙන පාර්භෝගිකයන්ට වඩාත් හොඳ පාරිභෝගික අත්දැකීමක් ඔබ සහතික කරනවාද?
අපගේ website එක www.pettahstreet.co.uk නිර්මානයකරේ customer friendly විදිහට. පාරිබෝගිකයාට පහසුවෙන්තෝරාගැනීමටත්, ඉතා ආරක්ශාකාරීව මුදල් ගෙවීමටත් හැකියා පවතිනවා. පාරිභෝගිකයාට, උදාහරණයක් වශයෙන්, ඇදුමකඅවශ්‍ය සියලු විස්තර, තමන්ට ගැලපෙන size එක අනුව තිබෙන තොග, ඇදුමක detailed photos වැනිදේ ලබාදී තිබෙනවා. මෙහි තියෙන විශේෂ කාරනය වෙන්නේ මිලදීගන්නා ඇදුමක් ඔබට size එක සම්බන්දයෙන් විශේෂයෙන් ගැලපෙන්නෙ නැතිනම් එයexchange කිරීමේ හැකියාවත් එයත් ඉතාම කෙටි දින කිහිපයකින් ලබාගැනීමටත් නැතහොත් අනවශ්‍යනම් return කිරීමේහැකියාවත් තියෙනවා. ඔබ ලංකාවෙන් යමක් මිලදීගෙන UK වලට ගෙන්වාගත්විට මෙවැනි පහසුකමක් ලැබෙන්නේ නෑ.
ඒවගේම අපේ Hotlines, WhatsApp සහ Messenger වලින් දවසේ ඕනෑම වෙලාවක අපහා සම්බන්ධ වෙන්න පුලුවන්. අපටලැබෙන ඇනවුම් සියල්ල 3 working days ඇතුලත deliver කරනවා. කෙනෙකුට විශේෂ අවශ්‍යතාවයක් මත අපි සමගසම්බන්ධවී Express delivery එකක් ලබාදීමටත් අපි සූදානම්.
PETTAH STREET මීළඟ ඉලක්කයන් මොනවාද?
මූලික වශයෙන් UK ජීවත්වන සියලුම ශ්‍රීලාංකිකයන්ට අවශ්‍ය දේශීය ඇගලුම් හා අනෙකුත් දේශීය නිශ්පාදන ලබාගැනීමට හැකිonline ව්‍යාපාරයක්ලෙස තවදුරටත් ස්තාපිතවීම අවශ්‍යයි. ව්‍යාපාරයක් ලෙස ප්‍රචලිතවීම සමග ලංකාවතුල අප ව්‍යාපාරයසම්බන්ධ පෙරකියු සියලුදේ වැඩිවීමක් සිදුවේවි, විශේෂයෙන් Exports වලට අපිට වැඩි දාගකත්වයක් දෙන්න පුලුවන්වේවි. ඊටඅමතරව අනෙකුත් යුරෝපීය රටවල ශ්‍රීලාංකිකන්ටත් Pettah Street shopping experience එක සලසාදීම මේවනවිටත්සාකච්ඡාකරමින් පවතිනවා.
Contact Pettah Street
Phone – 0333 09 09 129
WhatsApp – 074 19 21 19 13
Email -info@pettahstreet.co.uk
රුව ආලේපන
දෙවියන්වහන්සේ තුළ ඔබ සැමට ආශිර්වාදවත් සතියක් වේවා.අද දවසේ මා ඔබට කියන්න යන දේ ගැන හොඳින් මෙනෙහි කරන්න.හොඳින් කල්පනා කර බලන්න.මගේ අද මාතෘකාව තුල ඔබ වෙනසක් දකිනවා ඇත.නමුත් මේ තුළ විශාල ගැඹුරු රහසක් ඇත.මා එයින් බිඳක් ඔබ හමුවේ තබන්නෙමි.ඔබ මොහොතක් කල්පනා කරන්න.(makeup)මුහුණු ආලේපන අපිව වෙනස් කරන්න මොනතරම් වෙලාවක් ගන්නවද,මොනතරම් වියදම් කරනවාද,ඔබගේ මුහුණට/ශරීරයට කොතරම් දේවල් ඔබ කරනවද ඔබගේ පිටත ශරීරය ලස්සනට තබා ගන්න.නමුත් ඔබ කොතරම් කාලයක් දෙනවද ඔබේ ඇතුළාන්ත මනුෂ්‍යයාව ලස්සන කරන්න.ඔබ මේ ගැන මොහොතක් කල්පනා කර තිබේද?.මොහොතක් නැවතී සිතන්න.ඔබ සිටින තැන ගැන.
එසේය, ජේසුස් ක්‍රිස්තුස්වහන්සේගේ මුහුණෙහි දෙවියන් වහන්සේගේ තේජස දැනගැන්ම නැමැති ආලෝකය බැබළෙන පිණිස, අපගේ සිත්වල බැබළුවේ අන්ධකාරයෙන් ආලෝකය බැබළෙන්නට කීවාවූ දෙවියන්වහන්සේය.
(2 කොරින්තී 04 : 06)
මෙම බයිබල් පදය දෙස බලන විට අපිට පැහැදිලිවම පෙනේවි අපගේ ජීවිතයේ තිබෙන දෙයට වඩා වටින්නේ අපගේ ඇතුලාන්තයයි.මන්ද අපගේ ජීවිතයේ අපට යම් දවසක ඉතිරි වන්නේ අපේ ඇතුළාන්ත මනුෂ්‍යයාව පමණි.එමනිසා මාගේ ප්‍රේමවන්ත ඔබ මේකප් එකට (මුහුණු ආලේපන) වියදම් කරනවා වගේම, ඔබ එයට මහන්සි වෙනවා වගේම ආත්මික දේයටත් මහන්සි වෙන්න පුරුදු වෙන්න.එවිට සැබැවින්ම ඔබ ලස්සන වේවී.ඒ වගේම ඔබ ජීවිතය ද ජය ගනීවි.ඔබ ඉගෙන ගත් කාරණාවන් ගැන හොඳින් මෙනෙහි කර බලන්න. එය අමතක නොකරන ලෙස මා ඉල්ලා සිටිමි. ඔබ දෙවියන් වහන්සේට යාඥා කරන්න. ඇතුලාන්ත මනුෂ්‍යයාව ශක්තිමත් කරගන්නා පිණිස බලය දෙන ලෙසට ඔබ ඉල්ලන විට දෙවියන්වහන්සේ ඔබට එය නිදහස් කරනු ඇත.
උන්වහන්සේ කලන්ත වූ අයට ශක්තිය දෙනසේක, බලය නැත්තාට සවිය වැඩිකරන සේක.
(යෙසායා 40 : 29)
දෙවියන්වහන්සේ නුබලාට ආශිර්වාද කරන සේක.ඔබ සැමට ආශීර්වාදමත් මාසයක් වේවා.
ජේසූ පිහිටයි!
ඉවැන්ජලීස්ත අමිල දිසානායක
මාර්ගය සහෝදරත්වය සභාව – මහරගම
+94 774682729
ලෝකයේ මුල
යමක් ඇති නම් එහි මුලක් හෙවත් පටන් ගැනීමකුත් තිබිය යුතුය යන න්‍යායයෙහි පිහිටා ඇතැම්හු ලෝකයේ හා සත්ත්වයාගේ මුල සොයන්නට ගොස් නොයෙක් මිථ්‍යා අදහස් ඇති කර ගත්හ. තථාගතයන් වහන්සේ හේතුව නිසා ඵලයත් ඒ ඵලය නිසා නැවත හේතූන් ද ඇති වීමෙන් සංසාරය නො සිඳී පවතිනවා මිස එහි මුලක් නොලැබිය හැකි බව දැන වදාළ සේක. “අනමතග්ගොයං භික්ඛවෙ, සංසාරො පුබ්බා කොටි න පඤ්ඤායති” යනුවෙන් “මහණෙනි, සංසාරය නො දන්නා ලද අග ඇතියක, එහි පෙර කොන නො පෙනේ ය”යි තථාගතයන් වහන්සේ වදාළහ. සංසාරයේ පටන් ගැනීම, මුල් කොන නො පෙනේය”යි තථාගතයන් වහන්සේ වදාළේ ඇත්තා වූ සංසාරයේ මුල් කොන උන්වහන්සේට නො පෙනෙන නිසා නොව එහි පටන් ගැනීමක් නැති නිසා ය.
යමක් ඇති නම් එහි පටන් ගැනීමකුත් තිබිය යුතුය යන න්‍යාය සියල්ලටම සාධාරණ නො වේ. ආකාශය ඇති බව සියල්ලෝ ම පිළිගනිති. එහෙත් එහි පටන් ගැනීමක් නැත. පටන් ගැනීමක් ඇති වන්නට නම් ආකාශය නො තුබූ කාලයක් තිබිය යුතුය. එබඳු කාලයක් නො විය හැකි ය. ආකාශය දීර්ඝ කාලයක් හිස් ව තිබී පසු ව එය තුළ ලෝක ධාතු හා සත්ත්වයන් ඇතිවීමට හේතුවක් නැත. මේ ආකාශයේ මුලින් කිසිවක් නො තුබුණා නම් සැම කල්හි ම එය ඒ සැටියෙන් ම තිබිය යුතු ය. ආකාශය තුළ ලෝක ධාතූන් ඇත්තේ සත්ත්වයන් ඇත්තේ ඒවා ද ආකාශය සේම ආකාශය තුළ තුබූ නිසා ය. යම් සේ අහසේ පටන් ගැනීමක් නො ලැබිය හැකි ද එමෙන් ආකාශය තුළ පවත්නා සත්ත්ව සංස්කාරයන් පිළිබඳ පටන් ගැනීමක් නැති බව කිය යුතු ය. පටන් ගැනීමක් නැති ලෝකය ඉතා පරණ වුව ද එහි සෑම කල්හි ම අලුත් බවක් ද ඇත්තේ ය. උපන් සත්ත්වයෝ මැරී නැවත ඉපද අලුත් වෙති. ලෝකයෙහි ඇති අනික් සියල්ල ද නැසී නැසී නැවත නැවත අලුත් දේ පහළ වේ. මහපොළෝ ආදි ලෝකධාතූහු ද කලකට විනාශ වී ගොස් නැවත අලුතෙන් පහළ වෙති. අලුතෙන් ඇතිවන සියල්ල ම පුරාණ වස්තූන්ගේ විකෘති ලෙස කිව ද වරද නැත, පරණ දේ නිසා පුරාණ ධාතූන් නිසා ඇතිවන අලුත් දේය කිව ද වරද නැත.
ලෝකයේ පෞරාණිකත්වය අනමතග්ගසංයුත්තයේ එන සූත්‍ර දේශනා අනුව කිව යුතුය. කල්පය වනාහි වර්ෂගණනාවෙන් ප්‍රමාණ කළ නොහෙන අතිදීර්ඝ කාලයෙකි.
දිනක් එක්තරා බ්‍රාහ්මණයෙක් බුදුරදුන් වෙත පැමිණ “පින්වත් ගෞතමයන් වහන්ස, දැනට ඉක්ම ගොස් ඇති කල්ප කෙතෙක් වන්නාහුදැ”යි ඇසීය. එකල්හි තථාගතයන් වහන්සේ “බ්‍රාහ්මණය, ඉක්ම ගිය කල්ප ඉතා බොහෝය, ඒවා මෙපමණ සියගණනක්ය කියා හෝ මෙපමණ දහස් ගනණෙක ලක්ෂගණනෙක කියා හෝ ප්‍රමාණ කිරීමට නුපුළුවනැ”යි වදාළ සේක. “උපමාවකින් එය දැක්විය හැකිදැ”යි බ්‍රාහ්මණයා ඇසූ කල්හි “බ්‍රාහ්මණය, මේ ගංගානදිය පටන්ගන්නා තැන සිට මුහුදට වැටෙන තැන දක්වා අතරතුර ඇති වැලිකැට ගණන ප්‍රමාණ කළ නො හෙන්නාක් මෙන් අතීත කල්ප ගණන ප්‍රමාණ නො කළ හැකි බව වදාරා, සංසාරය නො දන්නා ලද අග ඇතියක් හෙවත් පටන් ගැනීමක් නැතියක් බව වදාළ සේක.
(අනමතග්ග සංයුක්ත)
දිනක් එක්තරා භික්ෂුවක් බුදුන් වහන්සේ වෙත එළඹ “ස්වාමීනි, කල්පය කොතෙක් දික් වන්නේ දැ”යි ඇසීය. “මහණ කල්පය ඉතා දිගය, එය මෙපමණ වර්ෂ ගණනක්ය, මෙපමණ වර්ෂ සිය ගණනක්ය, මෙපමණ වර්ෂ දහස් ගණනක්ය, මෙපමණ වර්ෂ ලක්ෂ ගණනක්ය කියා ගණනින් ප්‍රමාණ නොකළ හැකිය” යි තථාගතයන් වහන්සේ වදාළහ. “ස්වාමීනි, උපමාවක් දැක්විය හැකිදැ”යි භික්ෂුව කීය. එකල්හි තථාගතයන් වහන්සේ වදාරන සේක් “මහණ, දිගු පුළුලින් යොදුන බැගින් ඇති උසින් යොදුනක් ඇති ඒකඝන මහ කළුගලක් සිය වසකට වරක් කසී සළුවකින් පිස දැමුව හොත් ඒ කළුගල කලකදී ගෙවී යන්නේ ය. එහෙත් එපමණ කලකින් කල්පය ගෙවී නොයන්නේ ය”යි වදාළහ.
(අනමතග්ග සංයුක්ත)
➤➤ ලෝකයේ ඇතිවූයේ කෙසේද?
———————————
ලෝකයේ ඇතිවූයේ කෙසේද? යනු ගැඹුරු පැනයෙකි. ලෝකය ඇති වීම ගැන කල්පනා කළ ඇතැම්හු ඇඳ පුටු මේස රිය ගෙවල් ආදිය කෙනකු විසින් නො සෑදුව හොත් ඉබේ ඇති නො වන්නාක් මෙන් අනේකප්‍රකාර සත්ත්වයන්ගෙන් වෘක්ෂලතාදි වස්තූන්ගෙන් යුක්තවන මේ ලෝකය කෙනකු විසින් නො සාදන ලද නම් මෙසේ ක්‍රමානුකූලව ඇති විය නො හැකි ය. ලෝකය මෙසේ ක්‍රමානුකූලව ඇති වී පවත්වන්නේ යම් කිසිවකු විසින් මෙය ඇති කරන ලද නිසා ය යි සිතූහ. වඩුවකු ඇඳක් – පුටුවක් තනන්නාක් මෙන් ද්‍රව්‍ය එකතු කොට කපා කොටා ද මේ ලෝකය නො තැනිය හැකිය.
මෙය තැනිය හැකි වීමට සිතීම් මාත්‍රයෙන් ඒ ඒ දෙය නිර්මාණ වීමේ බලයක් ඇති පුද්ගලයෙකු විය යුතුය යි ද සිතූහ. එ බඳු මහාබලයක් ඇතියකු මේ ලෝකයේ මිනිසුන් අතර දක්නට නැති බැවින් මැවුම්කරු අහසෙහි අන් ලොවක වෙසෙන පුද්ගලයෙකු විය යුතුය යි සිතා ගත්හ. දෙවියන් වහන්සේ ය, බ්‍රහ්මයා ය, ඊශ්වරයා ය කියා නොයෙක් නම් ඔවුහු මැවුම්කරුට තබා ගත්හ. මැවුම්කාරයකු ඇති නම් ඔහුත් ලෝකයේ කොටසක් විය යුතු බව හෝ ඔහුත් රූපාදිය ම විය යුතු බව හෝ මැවීමට කෙනෙකු සිටිය යුතු නම් මැවුම් කරු මවන්නටත් කෙනෙක් වුවමනා බව හෝ ඔවුහු කල්පනා නො කළහ. ඔවුහු තමන් විසින් ම සිතින් මවා ගත් ඒ මැවුම්කරුගේ පිහිටෙන් දුකින් මිදීමටත් සැපයට පැමිණීමටත් සිතූහ.
සියල්ල පිළිබඳව ම සම්මෝහය දුරු කර ගත් තථාගතයන් වහන්සේ වනාහි ලෝකය කෙනකු විසින් මැවිය හැකියක් නො වන බව දත් සේක. ලෝකය පුද්ගලයෙකු විසින් මැවිය යුත්තක් නම්, සත්ත්ව ලෝකයට අයත් වන මැවුම්කරුට ඇති විය නො හැකි බවත් දැන වදාළ සේක.
බීජයෙන් ගසත් ගසින් බීජයත් ඇතිවීමෙන් ගස් පරම්පරාව නො සිඳී පවත්නාක් මෙන් පළමු පළමු පහළ වූ සංස්කාරයන් නිසා පසු පසු සංස්කාරයන් පහළ වීමෙන් සත්ත්වලෝක සංස්කාරලෝක අවකාශ ලෝක යන ලෝකත්‍රය පවත්නා බව තථාගතයන් වහන්සේ දැන වදාළ සේක. මවන්නකු නැති ව සංසාරයේ නො සිඳී පැවැත්ම සිදු වන සැටි තථාගතයන් වහන්සේ විසින් ක්‍රම කීපයකින් වදාරා ඇත්තේ ය.
එක් භවයක දී ඇති වන තණ්හාව නිසා මරණින් භවය සිඳී නොගොස් නැවත ද උපදී. උපන් පසු එහි ද නැවත තණ්හාව ඇති වේ. ඒ නිසා මරණින් පසු නැවත ද භවයක් ලබයි. මෙසේ සංසාරය නො සිඳී පවතී. කර්ම කළ කල්හි ඒවායේ විපාකය ඇතිවීම් වශයෙන් නැවත ද උපදී. උපන් පසු නැවත ද කර්මය කරයි. මෙසේ කර්මය නිසා විපාක ද විපාක නිසා කර්මය ද ඇතිවීමෙන් සංසාරය නො සිඳී පවතී. අවිද්‍යාදි හේතු ධර්මයන් නිසාද සංස්කාරාදි ඵල ඇතිවීම නිසා ද සංසාරය නො සිඳී පවතී.
— සූවිසි මහ ගුණය – අතිපූජ්‍ය රේරුකානේ චන්දවිමල නාහිමි—
Back Cover – 23 – Feb
Traditional Mongolian Buuz
සීත කාලයේදී ඇතිවන රූපලාවණ්‍යය ගැටළුවලට විසඳුම් කිහිපයක් .
වර්තමානයේ අධික ශීත දේශගුණික විපර්‍යාසවලින් පීඩා විඳින ඔබට නොයෙකුත් රූපාලංකරණ ගැටළු, සමෙහි, හිසකෙස්වල ගැටළු මතු වී ඇතිවා වෙන්නට පුළුවන් . ඉතින් වෙනදා මෙන් ම අදත් අපි නිවසේ දී ඔබට ම කරගතහැකි රූපලාවණ්‍ය ගැටළු කිහිපයකට පිළිතුරු ලබාදෙන්න යි මේ සූදානම් වන්නේ.
සමෙහි අධික වියළිබව-
අධික ශීතල නිසා ඔබේ සම මහත් හිරිහැරයකට පත්වන බව ඔබ ඕනෑවටත් වඩා අත්විඳිනවා විය හැකියි. එබැවින් හැකි හැම විට ම පිරිසුදු වතුර සිරුරේ බර අනුව පානය කිරීම මෙන් ම දිනකට වරක් හෝ රාත්‍රී නින්දට පෙර ඇලෝවේරා ජෙල් සමඟ coconut oil , caster oil හෝ ඔලිව්තෙල් බිඳු කිහිපයක් එකට මිශ්‍රකර එම මිශ්‍රණය පිරිසුදු කරගත් සිරුරේ සහ මුහුණේ ආලේප කර පිරිමදින්න. සමට එම මිශ්‍රණය හොඳින් උරාගන්නා තුරු හිඳ නින්දට යන්න. හැකිනම්
දිනකට දෙවරක් මෙම ප්‍රතිකාරය සිදුකරන්න.එමඟින් ඔබේ සම අධික වියළි බවින් මුදවා තෙතමනය ආරක්ෂා කරනු ඇත.
අධික වියළි දෙතොල් සඳහා –
මෘදු ගිතෙල් හෝ මීපැණි නිතර දෙතොලේ ආලේපකිරීමෙන් සීතල නිසා ඇතිවන වේදනාකාරී ඉරිතැලුම් සහ අධික වියළිබව නිසා ඇතිවන අපහසුතා මඟහරිනු ඇත. එමෙන් ම එමඟින් මනා පෝෂණයක් සහ දෙතොලේ තෙතමනය රැක
දෙනු ඇත.
වියළි සහ වේදනාකාරී දෙපතුල් සඳහා-
රාත්‍රී නින්දට පෙර පිරිසුදු කරගත් දෙපතුල්වල , විශේෂයෙන් ම විලුඹ ප්‍රදේශයේ වැස්ලින් ඝන තට්ටුවක් ආලේප කර සම්බාහනය කරන්න. අනතුරුව මේස් පැළඳ නින්දට යන්න. ඔබේ දෙපතුල්වල මෘදු බවක් ඇතිකිරීමටත් වේදනාකාරී පතුල් පැලීමෙන් වලක්වාලීමටත් එය මහත් සේ උපකාර වනු ඇත. එමෙන් ම වැස්ලින් ආලේපකිරීමට පෙර හැකිනම් foot cream ආලේපකර සම්බාහනය කිරීමෙන් අනතුරුව වැස්ලින් ආලේප කිරීමෙන් ප්‍රතිඵල තවත් සාර්ථක වනු ඇත.
වියළි හිස කෙස් සඳහා
අධිකව උණුසුම් කබා සහ හිස්වැසුම් පැළඳීමට සිදුවන මේ කාලයේ ඔබේ හිසකෙස් සඳහාඅ අමතර ආරක්ෂාවක් අවශ්‍යය වේ. එබැවින් ඔබ හිස කෙස් සෝදන හැමවරක ම ඉතා ම හොඳින් කන්ඩිෂනර් කිරීමට මතක තබාගන්න. ඊට අමතරව ෂැම්පූ භාවිතයේ දී ෂැම්පූ සමඟ පොල්තෙල් බිඳු කිහිපයක් මිශ්‍රකර ආලේප කිරීමෙන් ද ෂැම්පූ නිසා ඇතිවන වියළි බව දුරලා ඔබේ හිසකෙස්වලට අමතර ආරක්ෂාවක් ලැබෙනු ඇත. හිසකෙස්වල වියළිබව දුරලන හෙයාර් මාස්ක් වර්ග භාවිතයෙන් වඩාත් හිතකර ප්‍රතිඵල ලඟාකරගත හැකිවනු ඇත. එමෙන් ම දහවල් කාලයේදී තෙල් සම්බාහනයක් සතියකට කිහිපවරක් කිරීම ද ඉතා ම ප්‍රතිඵලදායී වන අතර එහෙත් එහි දී ඔබට වෙනත් සෙම් ආශ්‍රිත රෝගාබාධ තිබේ නම් වඩා සැලැකිළිමත් වන්න.
උදෑසනට ඉඟුරු තේ
උදෑසන බොහෝ දෙනෙකුට නැතිව ම බැරි තේ කෝප්පයට ඉඟුරු එක්කරන්න. ඉඟුරුවල ඇති ස්වාභාවික රසායනික සංයෝග ඔබේ ප්‍රතිශක්තිකරණ පද්ධතියේ යහපත් ක්‍රියාවලියනට උදව්කරන අතර, එමඟින් සෙම් ආශ්‍රිත රෝගවන සෙම්ප්‍රතිශ්‍යාව , කැස්ස ආදී ලෙඩ රෝග සඳහා ද ඉතා හොඳ remedy එකක් වනු ඇති. එසේ ම රාත්‍රී නින්දට පෙර කුරුඳු අඩංගු කිරි වීදුරුවක් හෝ කුරුඳු තේ කෝප්පයක් පානය කිරීමෙන් ඔබට වඩාත් යහපත් ප්‍රතිඵල ලඟාකරගත හැකිවනු ඇත.
ඉතින් මේ ශීතලෙන් ශීත වූ සමයේ දී ඔබේ රුව එලෙසින් ම පවත්වාගෙන යාමට මේ කරුණු කිහිපය උදව්වනු ඇති යැයි මා විශ්වාස කරනවා. ඔබ සැමට සුබ නව වසරක් වේවා යැයි ආදරයෙන් මා ප්‍රාර්ථනා කරනවා !
Sameera Jayasinghe
