පාළු සුළඟට දැවෙන දෙනෙතට
හඬන්නට තව කඳුළු නැතිවද ?
හිස් අහස මත නුඹේ රූපය
මවන්නට තහනමක් කාගෙද ..?
මතකයන් කටු ඇනී රිදුනද
සුවඳ තාමත් රැඳෙයි හිත මත
නුඹ මගෙන් දුර ඈත ගිය හැටි
සිහිනයක්මයි තවම මා හට…
වදන් නොම වූ නුඹේ සෙනෙහස
දෙනෙත් වල ලිය වූ අපූරුව
නුඹයි කීවේ කියවනා ලෙස
නුඹේ නෙත් තුළ රැඳුණ ප්‍රේමය….
අකුරු වැරදී ගියාදෝ මට
එදා නුඹෙ පෙම කියවනා කල
එක වරක් විත් කියනවද මට
“ආදරේ මම කලා ඇත්තට“…
සුරේඛා
ජීවිතේ කියන්නෙම පාසලක්,
හැමදාම අපි එහි ශිෂ්‍යයන්..
දුක, වේදනාව කියන්නෙම අභියෝගයන්,
දවසක දිනන්නම ඕන පරීක්ෂණයන්..
සමහරක් චරිත වේදිකාවල රගපාද්දී
තවත් සමහරෙක්,
ඇත්ත ජීවිතේම රගමඩලක් කරන්…
පව් පින් දෙකම පොදු මිනිස් ධර්මතාවන්,
දවසක කාටත් මුහුණ දිය යුතුවූ
සංසාර චක්‍රයක්…
තනග පිණිබිදක් වන් ජීවිතේ
කොයියම්ම මොහොතක හෝ
ඒ ගමන යා යුතුයි…
ඉදින් තව තවත් ව්‍යිරය වපුරා
එහි අස්වැන්න නෙලන්නෙපා…
අපෙන් මතු පරපුරක් හෙට තනා
ඒ අස්වැන්නේ සිරගත කරනෙපා..
ඒ මල් කැකුළට රෝසමලක්ව පිපී
කටු මැද වුවත් ලස්සන ගුණ රැකන්
පිපී දිලෙන්නත්,
තවකෙකුට ආදරේම මිස
ව්‍යිරය නොදෙන්නත් කියාදී,
මේ රගමඩලෙන් සැනසීමෙන් අපි සමුගනිමු…
රීනා
අපි මේ ලෝකයට ආවේ විවිධ මසකදීය. සමහරවිට අපගේ උපන් මස අපගේ හැඳුනුම්පතේ මූලික තොරතුරක් පමණක් ලෙස පෙනුනත්, බොහෝ කලාපවල සංස්කෘතික, ආගමික සහ ජෝතිෂ්‍ය විශ්වාසයන් අනුව එය අපගේ ජීවිතයට විශේෂ අරුතක් ලබා දෙයි.
උපන් මස හා ජෝතිෂ්‍යය
ඇතැම් විශ්වාසයන් අනුව උපන් මස අනුව පුද්ගලයෙකුගේ චරිත ගුණ, පාලන ග්‍රහ සහ ජීවිතයේ ගමන නියම වේ. උදාහරණයක් ලෙස:
මෙය විද්‍යාත්මක සත්‍යයක් නොවූවත්, බොහෝ දෙනාට තමන්ගේ උපන් මස හා ග්‍රහ සම්බන්ධාත්මක කතා රසවත් ය.
උපන් මස හා සංස්කෘතිය
ලෝකයේ විවිධ රටවල් තුළ මනුෂ්‍යයෝ තම උපන් මස සම්බන්ධයෙන් විශේෂ සම්ප්‍රදායන් පවත්වාගෙන යති.
උපන් මස සහ පුද්ගලික හැඟීම්
අපගේ උපන් මස අපට විශේෂ හෝ ආදරණීය හැඟීමක් ලබා දෙයි. උපන් මස පැමිණෙන විට, අලුත් අවුරුද්දක් ආරම්භ වන සේම, ජීවිතය ගැන නව අරමුණු සකස් කරන අවස්ථාවක් ද වේ.
නිගමනය
උපන් මස යනු අපගේ හැඳුනුමක කොටසක් පමණක් නොව, ජීවිතයට අලුත් අරුතක් දෙන කාලයක් ලෙසද සැලකිය හැක. එය විද්‍යාත්මකව සාධාරණ වුවද නොවුවද, අපේ සම්ප්‍රදා, විශ්වාස සහ මතක වලට එය වටිනාකමක් ලබා දේ.
උපන් මස අනුව ගුණාංග, රත්‍රන් සහ මල්
ජනවාරි (January)
පෙබරවාරි (February)
මාර්තු (March)
අප්‍රේල් (April)
මැයි (May)
ජූනි (June)
ජූලි (July)
අගෝස්තු (August)
සැප්තැම්බර් (September)
ඔක්තෝබර් (October)
නොවැම්බර් (November)
දෙසැම්බර් (December)
අහිමි හිමිකරු
ජීවිතයත් හරියට මේ ගතවෙන ඍතු වගේ කියලා හිතෙනවා. සීතලම කාල, ගිනියම් කාල, වැහි කාල වගේම සුලි කුනාටු කාලවල් අපේ ජීවත වලටත් වරින් වර එනවා යනවා.
ඇවිත් යන මේ වෙනස්කම් තුලින් අත්දැකීම් ජීවිතේට එකතු කරගන්නවා වගේම පෙරට වඩා ශක්තිය සම්පන්න පුද්ගලයකු වීම තමයි කල යුතු වන්නේ කියලා හිතනවා. සමහර වෙලාවට මේ ගෙවෙන්නේ හරිම අමරු ඍතුවක් කියලා හිතුන, හිතෙන අවස්ථාවන් ඕන තරම් ඇති. එතනින් ඉදිරියට යන්න, වඩාත්ම කාලීන හා නිවැරැදිම තීරණය ගැනීම තමයි අභියෝගය. අවස්ථානුකූලව කටයුතු කරන්න පුලුවන් නම්, සමහර අමාරු කාල වල තරම් සුන්දරම මතක ජීවිතයට එකතු වෙන්නෙ නැහැ.
ලස්සනම දවස් වගේම හරිම අමාරු දවසුත් තියෙයි. අත හැරෙන්නට නොදී ඒ හැමදේම අල්ලාගෙන ඉන්න. හෙට දවස ශක්තිමත් වෙන්න අද දවසේ එකතු කරගත්ත දේවලුත් උදව් කරගන්න.
මොන ඍතුව ආවත්, ජීවිතය දිහා සුබවාදීව බලන එක නම් නතර කරන්න එපා.
දිමුතු සේනාදි
ඉතා පලතුරු රසයෙන් පිරුණු සහ සම්ප්‍රදායන්ගෙන් අනූන“Dundee cake” යනු කාලයේ පරීක්ෂණයට ලක් වූ ස්කොට්ලන්ත සම්භාව්‍යයකි. අලංකාර ලෙස සකස් කරන ලද සුමටව සකසා ගත් ආමන්ඩ් සඳහා ප්‍රසිද්ධ මෙම සැහැල්ලු පළතුරු කේක් 19 වන සියවස දක්වා දිවෙන අතර උත්සව අවස්ථාවන් සඳහා ප්‍රියතම තේරීමක් ලෙස පවතී – නැතහොත් තේ සමඟ සුවපහසු දහවල් සංග්‍රහයක් ලෙසද ගැළපේ. නිවසේදී නියමාකාරයෙන් “Dundee cake” එකක් සාදා ගන්නේ කෙසේද යන්න දැන් බලමු…
අවශ්‍ය ද්‍රව්‍ය :-
කේක් සඳහා:
* ලුණු රහිත බටර් ග්‍රෑම් 175 (මෘදු කළ)
* මෘදු, ලා දුඹුරු සීනි ග්‍රෑම් 175
* ලොකු බිත්තර 3
* පිටි ග්‍රෑම් 225
* බේකිං කුඩු තේ හැඳි 1½
* මිශ්‍ර කුළුබඩු ග්‍රෑම් 1
* මිශ්‍ර වියළි පලතුරු ග්‍රෑම් 250 (මුද්දරප්පලම්, සුල්තානා, වියළි මිදි)
* කැබළි කරගත් ග්ලේස් චෙරි ග්‍රෑම් 50
* කැබළි කරගත් මිශ්‍ර ලෙලි ග්‍රෑම් 50
* දොඩම් ගෙඩියක ලෙල්ලෙන් ගාගත් කුඩු
* කිරි මේස හැඳි 2 (අවශ්‍ය නම්)
ටොපිං සඳහා:
* සම්පූර්ණ පොතු රහිත කළ ආමන්ඩ් 25-30
උපදෙස්
1. උඳුන -(160°C (140°C විදුලි ) / 325°F / ගෑස් 3) දක්වා රත් කරන්න. ගැඹුරු සෙන්ටිමීටර 20 (අඟල් 8) වටකුරු කේක් ටින් එකක් බේකිං කඩදාසිවලින් ග්‍රීස් කර පෙළගස්වන්න.
2. බටර් සහ සීනි සැහැල්ලු හා සුදුමැලි වන තෙක් එකට ක්‍රීම් කරන්න.
3. බිත්තර එකින් එක එකතු කරන්න, එක් එක් එකතු කිරීමෙන් පසු හොඳින් බීට් කරගන්න. මිශ්‍රණය කැටි ගැසීමට පටන් ගන්නේ නම්, පිටි මේස හැන්දක් එක් කරන්න.
4. පිටි, බේකිං කුඩු සහ මිශ්‍ර කුළුබඩු එකට හලා, පසුව ක්‍රමයෙන් බැටරයට මිශ්‍ර කරගන්න.
5. වියළි පලතුරු, චෙරි, මිශ්‍ර ලෙලි සහ දොඩම් ලෙලි කුඩු ඒකාකාරව මිශ්‍ර වන තෙක් කලවම් කරන්න. බැටරය ඉතා තද බවක් දැනේ නම්, කිරි ස්වල්පයක් එක් කරන්න.
6. මිශ්‍රණය සකස් කරගත් කේක් ටින් එකට හැන්දකින් දමා මතුපිට සුමට කරන්න. සකස්කොටගත් ආමන්ඩ් පිළිවෙලට වක්‍රාකාරයෙන් සකසන්න.
7. පැය 1½ සිට 2 දක්වා පුළුස්සන්න, නැතහොත් මැදට ඇතුළු කළ කූරක් පිරිසිදුව එළියට එන තුරු. කේක් එක ඉක්මනින් දුඹුරු පැහැයට හැරේ නම්, foil තීරු වලින් ලිහිල්ව ආවරණය කරන්න.
8. කේක් ටින් එකේ විනාඩි 15 ක් සිසිල් කරන්න, පසුව සම්පූර්ණයෙන්ම සිසිල් වීමට වයර් රාක්කයකට මාරු කරන්න.
සැබවින්ම ස්කොට්ලන්ත ආකාර පිළිස්සීමක් සඳහා උපදෙස් –
* ගුණාත්මක වියළි පලතුරු භාවිතා කරන්න – හැපෙනසුළු මුද්දරප්පලම් සහ පිම්ඹුනු සුල්තානා සියල්ල වෙනස් කරයි.
* දොඩම් ලෙලි මඟ හරින්න එපා; එය දිදුලන සුලුබවක් සහා ඉතා අගනා රසයක් එක් කරයි.
* සාම්ප්‍රදායික භාවයක් සඳහා, රසයේ අමතර ගැඹුර සඳහා පළතුරු විස්කි හෝ තැඹිලි යුෂ වල එක රැයකින් පොඟවා ගන්න.
ඩන්ඩි කේක් හොඳින් තබා ගැනීමට –
foil කොළ වල ඔතා සති දෙකක් දක්වා වාතය රහිත ටින් එකක ගබඩා කරන්න.
චාරුණී පෙරේරා
වාතරක්ත රෝගය යනු, වාත දෝෂය හා රක්ත ධාතුව මූලික කොට ගෙන ත්‍රිදෝෂය කෝපවන හා රක්තය දූෂණය වන හේතු කාරණා නිසා හටගන්නා රෝග අවස්ථාවකි.
මෙය, ළමුන් හා ඔසප් වයසේ පසුවන කාන්තාවන්ට කලාතුරකින් වැළඳෙන රෝග අවස්ථාවක් වුවද, ආර්තවය අවසන් වූ කාන්තාවන් හට බහුලව වැළඳෙන රෝගී තත්ත්වයකි.
අධික වේදනාව හා ඉදිමුම යන රෝග ලක්ෂණ සහිත බැවින් බොහෝ දෙනා විසින් සාමාන්‍ය ආතරයිටීස් තත්ත්වයක් ලෙස සිතා නිසි රෝග විනිශ්චයකින් තොරව නිවැරදි ප්‍රතිකාර නොලබා නොසලකා හැරීමෙන්, පසු කාලීනව ස්ථිර අස්ථි විකෘතිතා පවා ඇති කරන රෝග අවස්ථාවක් ලෙස දැක්විය හැක.
වාත–රක්ත යන වචනාර්ථයට අනුව වාතය හා රක්තය සම්බන්ධ වීමක් රෝග සම්ප්‍රාප්තිය කෙරෙහි හේතුවන බව පෙන්නුම් කෙරේ. නමුත් රක්තවාත යන රෝග අවස්ථාව හා මෙම රෝගී අවස්ථාව අතර වෙනස්කම් දක්වයි.
ආඩ්‍යවාත– එනම් සුවපහසු ජීවිත ගත කරන පුද්ගලයන්ගේ වාත දෝෂයේ විකෘති බව හේතුවෙන් රක්තය දූෂණය වීම නිසා හටගනු ලබන රෝගය ලෙස හඳුන්වන්නේ ද වාතරක්ත රෝගය යි.
දැවිලි සහිත අධික වේදනාව, සන්ධි ආශ්‍රිතව රතු වීම,
සන්ධි ඉදිමුම යන ප්‍රදාහ ලක්ෂණ මෙම රෝගයේදී පළමුව හට ගන්නා අතර ශරීරයේ කෙළවර පිහිටි කුඩා සන්ධීන්ගෙන් එනම් පාදයේ හා අතේ ඇඟිලි අතර පිහිටා ඇති කුඩා සන්ධීන්ගෙන් රෝග ලක්ෂණ ආරම්භ වීම විශේෂිත වේ.
නිසි ප්‍රතිකාර සඳහා යොමු නොවීමෙන් සන්ධි ක්‍රියා කරවීමේ අපහසුව, අධික වේදනාව, හන්දිවල තද බව හා සන්ධි විකෘති හැඩයක් ගැනීම සිදුවිය හැක.
බොහෝ විට පිරිමි පුද්ගලයන්ට මෙම රෝග තත්ත්වය වැලඳීමේ අවදානම කාන්තාවන්ට සාපේක්ෂව වැඩි වන නමුත් කාන්තාවන් හට ආර්තවහරණයෙන් පසුව රෝගය වැළඳීමේ අවදානම බොහෝ සෙයින් වැඩිවේ.
වාතරක්ත රෝගය, වාත දෝෂය ප්‍රධාන රෝග අවස්ථාවක් වුවද පිත හා කඵ දෝෂ සම්බන්ධිත ත්‍රිදෝෂ ජන්‍ය රෝග අවස්ථාවකි.
වාතය හා රක්තය කෝපකරන හේතූන් වාත දෝෂයත්, රක්ත ධාතුවත් දූෂණය කරමින් විකෘති වූ දෝෂ–ධාතු මඟින් වාතරක්ත නම් රෝගය ඇති කරයි.
විකෘති වාත දෝෂය රක්තය අවුරුවා රක්ත ධාතුවේ දූෂණය තව දුරටත් සිදු කරන අතර, දූෂිත රක්තය ශරීරය පුරා පැතිරී ගොස් වාතයේ ක්‍රියාව අවුරුවාලමින් අතෙහි හා පාදයෙහි ඇඟිලි ආශ්‍රිතව අධික වේදනාවත් ගෙනදේ.
පසුව පිත දෝෂයද හා එක්ව විවිධාකාර වේදනාවන් හට ගැනීම වාතරක්ත රෝගයේදී සිදුවේ. තවද, කඵ දෝෂයේ විකෘතිවීම නිසා ස්‍රාව ගැලීම වැනි රෝග ලක්ෂණද දැකිය හැකි වේ.
රක්තය, සම හා මාංශ ධාතු දූෂණය කරමින් හස්ත–පාද සන්ධි ආශ්‍රිතව මෙම රෝගය පළමුව හටගනී.
ක්‍රියාකාරී බවින් අඩු ව්‍යායාම් වල නොයෙදෙන සුකුමාර පුද්ගලයන් නිතර නිතර පැණිරස භාවිතය, දිරවීමට අපහසු ආහාර භාවිතය වැනි අහිතකර චර්‍යයා රටා හේතුවෙන් පසු කාලීනව වාතරක්ත රෝගයට පහසුවෙන් ගොදුරුවිය හැකි බව ආයුර්වේද වෛද්‍ය ඉගැන්වීම් වල තවදුරටත් සඳහන් වේ.
බටහිර වෛද්‍ය විද්‍යානුකූල සංසන්දනය සමඟ බැලූ විට ගම්භීර වාතරක්ත අවස්ථාව බොහෝ සෙයින් ‘Gout’ රෝගය හා සමානතා දක්වයි. සාමාන්‍ය ආතරයිටීස් රෝග අවස්ථාවදී මෙන්ම සන්ධීන් ක්‍රියාකරවීමට අපහසු වීම, සන්ධීන්ගේ තද බව, ඇවිදීමට අපහසු වීම යන රෝග ලක්ෂණ ක්‍රමයෙන් හටගන්නා අතර ඇතැම් විට තීව්‍ර රෝග ලක්ෂණ එකවිටම ප්‍රකට වීමේ අවස්ථා ද පවතී.
Gout රෝග තත්ත්වය සිරුරේ පරිවෘත්තිය ක්‍රියාවලියේ දෝෂ තත්ත්වයක් නිසා ඇතිවන රෝගී අවස්ථාවක් වන අතර අධික තරබාරුව, දියවැඩියාව, අධි රුධිර පීඩනය, වකුගඩු රෝග තත්ත්ව, අධික ලෙස මත්පැන් භාවිතය, ඇතැම් ඖෂධ හා මානසික ආතතිය රෝග හේතු ලෙස දක්වා ඇත. රතු මස් වර්ග, පැණි බීම, මත්පැන්/බියර් වැනි ආහාර–පාන නිතර ගැනීම නිසා ශරීරයේ යූරික් අම්ල සාද්‍රණය වැඩි වීමෙන් මුත්‍රා සමඟ නිසි ලෙස ශරීරයෙන් බැහැර වීම සිදු නොවීමෙන් යූරික් අම්ල (Uric acid) පදාර්ථ (මොනො සෝඩියම් යුරේට් ස්ඵටික) සන්ධිවල තැන්පත් වීම නිසා Gout රෝගය හට ගැනීම සිදුවේ.
නිරෝගී පුද්ගලයකුගේ සාමාන්‍යයෙන් සිරුරේ යූරික් අම්ලය නිපදවීම වැඩි වූ විට බැහැර කිරීමේ යාන්ත්‍රණය මඟින් එය පාලනය වේ. නමුත් මෙම යාන්ත්‍රණය නිසියාකාරව සිදු නොවීමෙන් ඇතැම් විට අධික ලෙස යූරික් අම්ලය නිපදවීමත්, නිසි ලෙස බැහැර කිරීම සිදු නොවීමත් යන හේතූන් නිසා රුධිරගත යූරික් අම්ල සාන්ද්‍රනය වැඩි විය හැක. මෙම යූරික් අම්ල පදාර්ථ, විශේෂයෙන්ම සන්ධි, කණ්ඩරා සහ සිරුරේ ඇතැම් වෙනත් පටකවල ද තැන්පත් වීමෙන් ඒ ආශ්‍රිතව වේදනාව, ඉදිමීම සහ සන්ධි ප්‍රදාහ තත්ත්වයන් ඇතිවීම සිදුවේ.
මුල් අවස්ථාවේදීම රෝග ලක්ෂණ පෙන්නුම් නොකළද, පසු කාලීනව පළමු ඇඟිලි පුරුක් ආශ්‍රිතව (first metatarsal joints) රෝග ලක්ෂණ ඇතිවේ.
වාතරක්ත රෝග හේතු :-
– ලුණු සහිත ආහාර
– අම්ල රසැති ආහාර
– අධික කුළු සහ තික්ත රස ආහාර
– කෂාරීය ආහාර
– අධික පැණිරස ආහාර
– අධික තෙල් සහිත ආහාර
– උෂ්ණාධික ආහාර
– අමු හෝ කලින් සකස් කරන ලද මස් වර්ග
– වියළි එළවළු හා රූක්ෂ ධාන්‍ය වර්ග
– ජලජ සත්ත්ව මාංශ
– මීකිරි සහ මාළු ආදී වශයෙන් වූ විරුද්ධ ආහාර
– අජීර්ණ ආහාර
– ආහාර දිරවීමට පෙර නැවත ආහාරයට ගැනීම
– නිරාහාරව සිටීම හා බොහෝ අඩුවෙන් ආහාර ගැනීම
– නියමිත වේලාවට ආහාර නොගැනීම
– පෝෂ්‍ය ගුණයෙන් අඩු ආහාර ගැනීම
– උක්පැණි, කොල්ලු, උඳු, රාබු වැනි ආහාර අධිකව පරිභෝජනය කිරීම.
– මත්පැන් පානය කිරීම
– දහවල් නිදා ගැනීම
– රාත්‍රී නිදි වැරීම
– නිතර කෝප ගැනීම
– අධික මානසික ආතතිය
– අධික සීතලට නිරාවරණය වීම
– රක්ත ශෝධනය නිසිපරිදි සිදු නොකිරීම
– අධිකව ව්‍යායාම කිරීම හා ව්‍යායාම නොකර සිටීම
– පිහිනීම වැනි ජල ක්‍රීඩා වල නිතර යොමු වීම
– මල, මුත්‍රා වැනි පිට කල යුතු වේගයන් පිට නොකර දරා සිටීම
– හදිසි අනතුරු
– බොහෝ වේලාවක් පාද පහළට හෙළා දීර්ඝ ගමන්–බිමන් වල යෙදීම
ඉහත සඳහන් අහිතකර ආහාර හා චර්යා රටා, වාතරක්ත රෝගයට හේතු වන බව ආයුර්වේද මූලග්‍රන්ථයන්හි දක්වා ඇති බැවින් එම හේතූන්ගෙන් වැළකීමෙන් රෝගය හටගැනීම වළක්වා ගත හැක. එමෙන්ම රෝග ලක්ෂණ සහිත පුද්ගලයින් අහිතකර ආහාර හා චර්‍යයා රටාවන්ගෙන් වැළකීමත්, හිතකර ආහාර හා චර්‍යයාවන් අනුගමනය කිරීමත් විශේෂයෙන් සිදුකළ යුතුය.
රෝග ලක්ෂණ :-
– අධිකව දහඩිය දැමීම හෝ සාමාන්‍ය පරිදි දහඩිය දැමීම අඩුවීම
– ශරීරය කළු පැහැ ගැනීම
– ස්පර්ශය අපහසු බව
– සන්ධීන්ගේ ලිහිල් බව ඇතිවීම
– අලස බව, දුර්වල බව
– අත්–පා වල බර බව
– හිරිය
– සන්ධි ආශ්‍රිත කැසීම
– කුඩා බිබිලි හට ගැනීම
වාතරක්ත ප්‍රබේද:-
1. උත්ථාන වාතරක්ත
2. ගම්භීර වාතරක්ත
මීට අමතරව,
1. වාත ප්‍රධාන වාතරක්ත
2. පිත්ත ප්‍රධාන වාතරක්ත
3. කඵ ප්‍රධාන වාතරක්ත
4. රක්ත ප්‍රධාන වාතරක්ත
ලෙස ප්‍රමුඛ වන දෝෂය අනුව ද ප්‍රබේද වේ.
‘උත්ථාන වාතරක්ත’ රෝග අවස්ථාවේදී, සම සහ මාංශ (මස්) ආශ්‍රිතව රෝග ලක්ෂණ හටගන්නා අතර සම මත තුවාල ඇති වීම, කැසීම, සන්ධි ඉදිමීම, දැවිල්ල, අනින්නාක් බඳු වේදනාව, සම දුඹුරු/කළු, රතු පැහැයක් ගැනීම හා ස්‍රාව ගැලීම වැනි ලක්ෂණ දැකිය හැක. මෙය වාතරක්ත රෝගයේ ප්‍රාථමික අවස්ථාව වශයෙන් දැක්විය හැකිය.
‘ගම්භීර වාතරක්ත’ එසේත් නැති නම් අස්ථි, ඇටමිදුළු, ආශ්‍රිතව නොයෙක් විෂ පදාර්ථ තැන්පත් වීමෙන් හටගන්නා රෝග තත්ත්වය රෝගයේ උත්සන්න අවස්ථාවයි. ඉදිමුම හා සන්ධීන්ගේ තද ගතිය, දාහ, වේදනා, සපර්ශ කිරීමේ අපහසුබව, පැසවීම වැනි ප්‍රදාහ ලක්ෂණ මෙහිදී දක්නට ලැබේ.
රෝග ප්‍රතිකාර :-
රෝගයේ නිවැරදි විනිශ්චය සඳහා රෝග–රෝගී පරීක්ෂාව සඳහා රෝග ඉතිහාසය ඉතා වැදගත් වේ. ඇතැම්විට පවුලේ සාමාජිකයන් අතර රෝග ඉතිහාසයක් පැවතීමද රෝගය හටගැනීමට හේතුවක් විය හැක.
Serum uric acid මට්ටම පරීක්ෂා කිරීම තුළින් රෝග තත්ත්වයේ තීව්‍ර තාවය හඳුනා ගැනීම ඉතා පහසු වේ.
මෙම රෝගය ශරීරයේ විෂ පදාර්ථ තැන්පත් වීමක් නිසා හටගන්නා රෝග අවස්ථාවක් බැවින් ‘පංචකර්ම’ ප්‍රතිකාර මඟින් සිරුරෙන් එම විෂ සහිත දොස් බැහැර කිරීම ආයුර්වේද මූලධර්මානුකූලව චිකිත්සාවේදී සිදු කරයි.
ඒ සඳහා විරේක, වස්ති,රක්ත මෝක්ෂණය යන පංච කර්ම ප්‍රතිකාර මෙන්ම, අවස්ථානුකූලව විශේෂිත බාහිර ප්‍රතිකාර ලෙස ප්‍රදේහ, පරිශේක, අභ්‍යංග ප්‍රතිකාර සිදු කෙරේ.
කෂාය, ගුලි, කල්ක, ගුග්ගුලු, චූර්ණ ඖෂධ මඟින් අභ්‍යන්තර ප්‍රතිකාර ලබා දීමෙන් ශෝධන හා ශමන ප්‍රතිකාර පද්ධතියක් පුද්ගල ප්‍රකෘතිය, රෝගයේ තීව්‍රතාවය, රෝගයේ හා රෝගියාගේ ශක්තිමත් බව සළකා බලා ආයුර්වේද වෛද්‍යවරයා විසින් තීරණය කරනු ලැබේ.
රෝගය පිළිබඳ මනා දැනුවත් බව තුළින් රෝගය හටගැනීම වළක්වා ගැනීමත්, රෝග ලක්ෂණ හඳුනාගත් වහාම සුදුසුකම් ලත් ආයුර්වේද වෛද්‍යවරයෙක් වෙත ගොස් ඉක්මන් ප්‍රතිකාර ලබා ගැනීමෙන් රෝගී තත්ත්වය උත්සන්න වීම වළක්වා ගැනීමත් අතිශය වැදගත් වේ.
ආයුර්වේද වෛද්‍ය නාලිකා හංසිනී ජයතිලක
BAMS – Colombo (SL)
ශ්‍රි ලාංකේය නිවේදන ක්ෂ්‍රේත්‍රයේ අභිමානය ජාත්‍යාන්තරයට රැගෙන යන මෑත කාලයේ බිහි වූ ආදරණීය පුංචි සුරංගනාවිය……
හිරුන්දි තිරන්‍යා වික්‍රමසිංග
01. හිරුන්දි….මේ දවස්වල කොහොමද ජීවිතේ ?
හරිම සතුටින් ජිවිතේ ගත කරනවා.
02. මෑතකදී සම්මාන උලෙලවල් ද්විත්වයකින් සම්මාන පිදුම් ලැබුවා නේද ?Diamond Excellence Awards 2025 සම්මාන උළෙලේ ලැබුණ සම්මානය ගැන මතක් කළොත් ?
හරිම වටිනා අවස්ථාවක් තමයි Diomend Excellence Award 2025 කියන්නේ. දකුණු ආසියාවේ පවත්වපු සුවිශේෂි සම්මාන උළෙලක් තමයි ඒක. ඉතිං මට ගිය මාසේ සාරංගනාවී රන් සම්මානයත් ලැබුණා. ඉතින් රන් සම්මානයට පස්සේ Diamond සම්මානයත් ලැබීම මට හරිම නිහතමානී ආඩම්බරයක් දැනෙනවා.
03. Sri Lankan Top 100 සම්මානයෙන් ද පිදුම් ලැබීමටද අපේ පුංචි දියණියට හැකි උනා. ශ්‍රී ලංකාවේ දක්ෂයින් 100 අතරට තේරී පත්වීම ගැන ඔයාට දැනෙන හැඟීම මතක් කළොත් ?
මට ලැබෙන හැම සම්මානයක්ම මට ලොකු විශේෂත්වයක් එක්ක තමයි ලැබෙන්නේ. මගේ මුල්ම සම්මානය 2021 Future Leader සම්මානය. ඉතිං එදා 2023 Future Leader කෙනෙක් විදිහට සම්මානනිය කරපු අහස මීඩියා අද මට ශ්‍රි ලංකාවේ හොඳම දක්ෂයින් 100 අතරට එකතු කලා. මට හැකි උනා Sri Lankan Top 100 සම්මානය දිනාගන්න. මම හිතනවා මාමේ එදා ඒ අහස මීඩියා මට දීපු අඩිතාලම උඩ මම ලොකු මාලිගාවක් හැදුවා කියලා. මම ගොඩක් වැඩ කරලා තමයි මේ සම්මානය ලබාගත්තේ. ඒක නිසා ගොඩක් සතුටුයි.
04. හිරුන්දි අපිට ආරංචි වුණා ඔයා මේ දවස් වල අලුත්ම කලා කටයුතු ටිකක් නාලිකා මෙන්ම ආයතන එක්ක ආරම්භ කරලා තියෙනවා කියලා. ඒ අලුත් වැඩකටයුතු මොනවද ?
මම මාමේ ඇත්තටම අලුත් වැඩක්, අලුත් Team එකක් එක්ක කරන්න මේ දිනවල කටයුතු කරනවා. ඒ ගැන විස්තර ළඟදීම කියන්නම්. තව නිවේදන අංශවල පවත්වන දේශන වල ආරාධිත දේශන වලටත් ආරාධනා ලැබිලා තියෙනවා. දැනට නුවර/කොලොන්නාව/දේශන වලට සහභාගි වෙලා තියෙනවා. සැප්තැම්බර් 13 ගාල්ලේ දේශනයකටත් සහභාගි වෙනවා. මගේ නිවේදන අත්දැකීම් මගේ යහළුවන් එක්ක බෙදාගන්න එක මට සතුටක්.
05. නිවේදන ක්ෂේත්‍රට ආරම්භය ලබාගත්තේ කොහොමද ?
ඒක අහම්බෙන් සිදු වුණු දෙයක්. මගේ හොඳම යහළුවා දිනේලි. ඉතින් දිනේලිගේ තාත්තා මගේ දක්ෂතා දැකලා මාව සිරස TV ආයතනයට අදුන්වලා දුන්නා. එතනදි ටෂ්මා නැන්දා/විරාජ් මාමා/චන්ද්‍රිකා නැන්දා ළමයි ගොඩක් අතරින් මාව තෝරාගෙන තිබුණා.
06. පාසලේ කටයුතුත් සමග නිවේදන කටයුතු කළමනාකරණය කර ගන්නේ කොහොමද ?
ඒකට නම් මගේ අම්මා තමයි ලොකුම වගකීම ගන්නේ. අම්මා මාත් එක්ක එකතු වෙලා දවසේ වැඩ ප්ලෑන් කරනවා. සමහර දවස් අපිට දිගයි. නින්ද අඩුයි. ඒත් අපි දවසේ වැඩ ඒ දවසේම ඉවර කරනවා. අපි නිදහසේ හොඳ කැපවීමෙන් වැඩ කරනවා.
07. හිරුන්දි කියලා කියන්නේ ජාත්‍යන්තර ජයග්‍රහණයන් ලබපු කෙනෙක්. දේශීය මෙන්ම විදේශීය ලබාගත් ජයග්‍රහණ ගැන මතක් කළොත් ?
ඒක වෙනමම අත් දැකීමක්. ජිවිතේ අමතක නොවන එකක්. තමන්ගේ රට වෙනුවෙන් ලෝකේ තියෙන ලොකුම Stage එකේ තමයි අපි ඉදිරිපත් කිරිම් කරේ. මට ඒ දවසේ තමයි මගේ රට ගැන ලොකුම ලොකු දෙයක් දැණුනේ. හරිම ශක්තියක් දැනෙනවා. අපේ ජාතික කොඩිය ලගදී. විවිධ රටවල් 30 ක් ඉන්දියාවේ ප්‍රාන්ත 29 ක ළමයි ඉදිරියේ මගේ උපරිමය කලා. ලෝකයෙම 3 ස්ථානය සහ Best team player ශ්‍රි ලංකාවට අරගෙන ආවා.
08. නිවේදනයට අමතරව මේ දවස් වල රංගන කටයුතුවලත් නියැලෙනවා නේද ?
ඔව් වේදිකා නාට්‍යයක රංගනයෙන් දායක වෙනවා. වෙනස්ම අත්දැකීමක්. ටෙලිනාට්‍ය වලටත් ආරාධනා නම් ලැබිලා තියෙනවා. ඒ ගැන නම් තාම හිතනවා. ඊට අමතරව මම Tebale Tennis ක්‍රීඩාව කරනවා. නිවේදන වලට අමතරව දැනට වැඩි කාලයක් දෙන්නෙ ක්‍රීඩාවටයි.
09. නිවේදන ක්ෂේත්‍රය සම්බන්ධ වැඩමුළු යම් ආයතන සමඟ එකතුවෙලා කරනවා නේද ?
ඔව් ඇත්තටම මගේ නිවේදන සහ හඬ කැවීම් වල අත් දැකිම මම වගේම පුංචි යහළුවන්ට බෙදා දෙන්න මම හරිම ආසාවෙන් ඒ ආරාධිත දේශන වලට සහභාගි වෙනවා. පුංචි අපි හැමෝටම දක්ෂතා තියෙනවා. මම ආසයි මගේ අත්දැකීම් වලින් ප්‍රයෝජන අරගෙන මම වගේ හැමෝම ඉදිරියට යන එකට. දැනට මම ආයතන කිහිපයක් එක්ක ආරාධිත දේශන වලට සහභාගි වෙනවා. ඉදිරියේදි ගොඩක් වෙනස් වැඩක් ආයතනයක් සමග කරන්න බලාපොරොත්තු වෙනවා.
10. හිරුන්දි ඔයාගේ ඉදිරි බලාපොරොත්තු මොනවද ?
මම හරිම ආසයි හැමෝටම මට පුළුවන් උදව්වක් කරගෙන සතුටින් ජීවත් වෙන්න. මගේ අම්මා මට නිතර පුරුදු කරන දෙයක් තමයි අපිට කාටහරි උදව්වක් කරන්න පුළුවන් පලවෙනි අවස්ථාවෙම ඒ දේ කරන්න කියන එක. අපි හැමෝටම විවිධ දක්ෂතා තියෙනවා. අපි හැම වෙලාවෙම අනිත් අයගේ පුංචි දක්ෂතාවයක් උනත් අගය කරන්න ඕනි. අපේ අත්පුඩි හැම වෙලාවෙම අනුන් වෙනුවෙන් ගැහෙනවා නම් අපිට අත්පුඩි නිකම්ම ලැබෙනවා.
සටහන – බුද්ධික පින්නදුව
පාඩම් කරන දේවල් මතක තබා ගැනීම කියන්නේ ගොඩක් අයට තියෙන ප්‍රශ්නයක්. වෙලාවට විභාගයට ලියන්න යනකොට පාඩම් කරපු දේවල් අමතක වෙනවා. ඒත් බය වෙන්න එපා! මේකට හොඳ විසඳුම් තියෙනවා. මෙවර ලිපියෙන් අපි ඒ වගේ පහසු ක්‍රම 5ක් ගැන කතා කරමු.
1. මතක සිතියම් (Mind Maps) සාදන්න
මතක සිතියම් කියන්නේ පාඩම් මතක තබා ගන්න තියෙන හොඳම ක්‍රමයක්. ප්‍රධාන මාතෘකාව පිටුවේ මැදට දාලා, ඒකට අදාළ අතුරු මාතෘකා සහ අදහස් රේඛා වලින් සම්බන්ධ කරලා සටහන් කරන්න. මේ වගේ දේවල් වලට විවිධ පාට පෑන් පාවිච්චි කරන්න පුළුවන්. මේ ක්‍රමය පාවිච්චි කරනකොට අපේ මොළය දෘශ්‍යමයව (visual) තොරතුරු සංවිධානය කරගන්නවා. ඒක නිසා මතක තබා ගන්න පහසුයි.
2. තොරතුරු කොටස් වලට කඩන්න (Chunking)
විශාල තොරතුරු ප්‍රමාණයක් එකවර මතක තබා ගැනීම අමාරුයි. ඒ නිසා ඒ තොරතුරු කුඩා කොටස් වලට කඩලා පාඩම් කරන්න පුළුවන්. උදාහරණයක් විදිහට දුරකථන අංකයක් මතක තබා ගන්නකොට අපි ඒක කොටස් වලට කඩලා මතක තියා ගන්නවා. ඒ වගේම ඕනෑම විශාල තොරතුරක් කොටස් වලට කඩලා පාඩම් කරන්න පුළුවන්.
3. පුනරාවර්තනය (Repetition) සහ නැවත නැවත මතක් කිරීම
ඕනෑම දෙයක් මතක තබා ගන්න පුනරාවර්තනය අත්‍යවශ්‍යයි. ඔබ පාඩම් කරන දේවල් නිතරම ආවර්ජනය කරන්න. පොඩි වෙලාවක් අරන් කලින් පාඩම් කරපු දේවල් මතක් කරලා බලන්න. මේ ක්‍රමය ඔබ පාඩම් කරන දේවල් ඔබේ දිගුකාලීන මතකයට (long-term memory) ගබඩා කරගන්න උපකාරී වෙනවා.
4. ශබ්ද නඟා කියවීම (Reading Aloud)
පාඩම් කරනකොට ශබ්ද නඟා කියවීමෙන් ඔබට කියන දේ ඇහෙනවා. ඒකෙන් මතක තබා ගන්න පහසු වෙනවා. ඔබ පාඩම් කරන මාතෘකා අනිත් අයට තේරුම් කරලා දෙනවා වගේ හිතාගෙන කියවන්න. එහෙම නැතිනම් ඔබේම හඬින් රෙකෝඩ් කරලා පස්සේ අහන්න. මේ ක්‍රමය auditory learners ලාට (ඇසීමෙන් ඉගෙන ගන්නා අයට) ගොඩක්ම ප්‍රයෝජනවත්.
5. පාඩම් කරන ස්ථානය වෙනස් කරන්න
හැමදාම එකම තැනක පාඩම් කරනවට වඩා විවිධ තැන්වල පාඩම් කරන්න පුළුවන්. උදාහරණයක් විදිහට එක දවසක් පුස්තකාලයේ, තව දවසක් උද්‍යානයක, තව දවසක් ගෙදර පාඩම් කරන්න පුළුවන්. මේකෙන් ඔබ පාඩම් කරන තොරතුරු ඒ ඒ ස්ථාන වලට සම්බන්ධ වෙන නිසා මතක තබා ගැනීම පහසු වෙනවා.
මේ ක්‍රම 5ම ඔබගේ පාඩම් කටයුතු වලට එකතු කරගෙන බලන්න. ඔබට වඩාත්ම ගැලපෙන ක්‍රමය මොකක්ද කියලා තීරණය කරලා ඒක නිතරම භාවිතා කරන්න. එතකොට පාඩම් කරන දේවල් මතක තබා ගැනීම තවත් පහසු වේවි.
පියුමි නෙළුමිකා
තාමත් මට සිතාගත නොහැකියි මගේ මෙි සැබැවු සිහිනය…. මිට මෙළවු අතක් බඳු නකල්ස් කදු වැටිය සොයා යාම මෙි වසරේ මගේ හොදම සංචාරය ලෙසයි මට හැඟි යන්නේ.. එ තරමට මම හීන දැක්කා ආස කලා මෙි කදු මුදුණ දැක ගන්නටත් එ සිසිල් සුළං රැල්ලක පහස විදින්නත් නකල්ස් ඇල්ලේ සුන්දරත්වය දකින්නත්…
නිතරම මීදුමෙන් බරවී තිබිම නිසාම දුමිබර යන නමින් වගේම , බටදඬු ගස් බොහොමයක් ඇති නිසාම බටදඬු කදු වැටිය යන නමින්ද ප්‍රචලිත මෙි කොළපාට ලොකය හොයාන මට යන්නට හැකි උනා…. ඉතිං.. මෙි සුන්දර චාරිකාවෙි මම ලද අත්දැකීම් ගොන්නක් රැගෙනයි මම මෙවර ඔයාලා හමුවට ආවෙි….
මෙි ගමන යන්න මාත් සමග තවත් හතර දෙනෙක් එකතු උනා… ඉතිං අපි පස් දෙනාම එකතු උනේ වත්තේගමට… වත්තේගමින් ගමන ආරම්භ කල අපි පන්විල හරහා බඹරැල්ලට පැමිණියේ ඉතාමත් සුන්දර මාර්ගයක් දිගෙයි… මෙි එන මාර්ගයේදි බොහො දිය ඇලි ප්‍රමාණයක් දැක ගන්නට හැකියාව ලැබෙනවා.. එ අතර හුළුගඟ ඇල්ල රහස් ඇල්ල සාරි ඇල්ල ජොඩු ඇල්ල වගේ තවත් මා නොදන්නා බොහොමයක් සුන්දර තැන් දැක බලා ගන්න පුළුවන්…
නමුත් අපේ ගමනාන්තය උනේ නකල්ස් කදු මුදුන් පහා නිසාම ජොඩු ඇල්ල වගේ තැන් ඇතින් දැකගෙන ගමන ආරම්භ කලා… එත් අමතක කලේ නෑ මම මෙි ගමන යන්නට මුලපිරු දින සිටම මගේ තාත්තා මට පැවසූ රහස් ඇල්ල බලන්න.. රහස් ඇල්ලත් බලාගෙන හුළුගඟ ඇල්ලත් බලාගෙන අපි ගියේ බඹරැල්ල දෙසට…
බඹරැල්ලට ලගා උන අපි මඟ සිටි අයගෙන් මාර්ගය අසාගෙන ගියත් මඟදි එක් අයෙක් පැවසූවෙි වනජීවී කාර්යාලය ඇති ස්ථානයට බයිසිකල් වලට යා නොහැකි බවයි.. එසේ යනවා නමි තවත් මාර්ගයක් ඇති බවත් ඔහු පැවසූවා.. නැවත හරවාගත් අපි පස් දෙනාම කාපටි යෙදු මාර්ගයේ 3kmක් නැවත ගියේ වනජීවී කාර්යාලය ඇති ගොමරය ගමට යන්නට ඇති දුෂ්කර ගල් බොරළු මාර්ගය වෙතටයි….
ඉතාමත් අබලන්වු මාර්ගයක් ඔස්සේ ලගා උනා රක්ෂිතයට යන්නට අවසර ගන්න වනජීවී කාර්යාලය අසලට… අපි එහි යන විටත් වෙිලාව උදැසන දහයයි තිහ පසුවි අවසන්… අප පැමිණි බයිසිකල් කීපය වනජීවී කාර්යාලයත් වනපෙතට ඇතුල් වෙන ස්තානයත් පසු කර ඉදිරියට ගොස් මෙි මාර්ගයේ අවසන් නිවස වන මල්ලිකා අක්කාගේ නිවසේ නවතා ගමනට සූදානමි උනා….
හරියටම මධ්‍යාහන උදා විමට හොරාවක් තබා මා විසින් චාරිත්‍රයක් ලෙස කොල අත්තක් කඩා මෙි වනයට අරක්ගෙන සිටින සියළු දෙවියන්ගේ ආරක්ෂාවත් අවසරයත් ඉල්ලා සිට ගමන ආරමිභ කලා….
අපි ඇතුල් වෙන්නේ හදවතක් බඳුවු ස්ථානයකට… දවටගල ස්වාභාවික මංපෙත.. සමිපූර්ණ දුර කිලොමිටර් 08යි… ගමන ආරමිභ කලේම දහවලේ නිසා පුළුවන් තරමි දුරක් ගොස් හවස හතර වන විට නැවත පල්ලමි බැසිමට අප කතාබහ කරගත්තේ මෙි රක්ෂිතයේ රාත්‍රියේ රැදිම දඬුවමි ලැබිය හැකි වරදක් බව දන්නා නිසාමයි…
ගමන ආරම්භ වන තැන සිට වනලැහැබ මැදින්
වනයට ඇතුල්වි මිටර් 300ක් පමණ ගිය විට හමුවන දිය පාරෙන් ගොඩවු විට ඇති තුන්මන් හන්දියෙන් දකුණු පසට ඇති අඩි පාරේ මදක් පහලට බැසගත් පසු නකල්ස් ඇල්ල හමුවෙනවා… මගේ ජිවිතේ මම දකින්න හීන දැක්ක දිය ඇල්ලක් මෙි ලෙස මගේ දෑස මානයේ සුන්දරත්වය විදහාලමින් සිටියේ සතුට වැඩි කමට මටත් නොදැනි මා පිස්සෙකු සේ කෑ ගසද්දියි…. මෙි දිය කොමලියගේ උස 10mක් ලෙසයි දැනගත හැකි උනේ…
සුන්දර නකල්ස් දිය ඇල්ල ලග මොහොතක් ගත කල අප ඉක්මනින් නැවත ගමන ආරම්භ කලේ අපේ කාල වෙිලාව පිළිබඳව ඇති ගැටලුව නිසාමයි.. දිය ඇල්ලෙන් සමුගෙන නැවතත් අප පැමිණි තුන්මන් හන්දියට පැමිණ වමි පසට ඇති අඩිපාරේ ඉදිරියට ගමන් කලේ කදු පහා සොයා යෑමෙි අරමුණින්… මද දුරක් අඩි පාරේ ගමන් කල අප අවතීර්ණ උනේ එළිමහන් ස්තානයකට.. මෙි ස්ථානයට නකල්ස් කදු පහා වගේම වමි පසින් රිලාගලත් පැහැදිලිව දැකගත හැකි උනා… මෙි අතරමග තමයි මෙි ගමනේ හමුවන අවසන් දිය පාර හමුවන්නේ.. අපි රැගෙන ගිය බොතල් වලට එයින් ඇති පදමට ජලය පුරවාගෙන නැවත ගමන ආරමිභ කලා..
දහවල නිසා දැඬි අවු රශ්මියත් විදගෙන ඉදිරියට ඇවිද ගිය අප ඇතුල් උනේ අඳුරු වනලැහැබකට… දැඬි අවු රශ්මියෙන් එළිමහන් ප්‍රදේශය පසු කර පැමිණි මට වචනයෙන් කියාගත නොහැකි සිසිලසක් ගතට දැණුනා මෙි වනලැහැබ තුලදි… කෙමෙන් කෙමෙන් අප කදු මුදුණට ලගා වෙන නිසාම දැඩි වෙහෙසක් දැණුනා මට….
මෙි වන ලැහැබ පුරාම මම දුටුවෙි විසල් වනස්පතින් සමග ඇති කුඩා ශාක… යටි රෝපණයක් නැති තරමි… දහවල් ආහාරය ලෙස ගෙනා කුඩා ඉදි ආප්ප පාර්සලය ලිහා බඩකට පුරවාගෙන නැවතත් ගමන ආරමිභ කලේ කුඩැල්ලන්ගේ පහසත් විදගෙනමයි….. බැලු තෙක් මානේ ඇත්තේ ඝන වනාන්තරය වෙනකොට නැවතත් අප මෙි අඳුරු වන ලැහැබ පසු කරගෙන ලගා උනේ එළිමහන් උස් ස්ථානයකට… දැස් අදහාගත නොහැකි තරමි වට පිටාවෙිම තිබුණේ උස් කදු විතරමයි… කොළපැහැති ලොකයක් තමයි අප වටා තිබුණේ… අපේ මුහුණු වල තෙහෙටිටුව මදකට අඩුවි සිනාවෙන් මුහුණු වර්ණවත් වෙන්න ගියේ තත්පරයයි…
අප සිටින මෙි ස්ථානයට අපේ ගමනාන්තය පැහැදිලිවම දිස් වෙද්දි අප නැවතත් ගමන ආරමිභ කලේ තවත් කිලොමිටර් කිපයක් අපට පළවන සහා දෙවන කදු මුදුන් වලට යෑමට ඇති හෙයිනි… අප මදකට විවෙික ගත් ගල් පර්වතයෙන් බැස නැවතත් සීග්‍ර නැග්මක් ඔස්සේ ගමන ආරමිභ කලේ පළවන කදු මුදුණතට ලගා විමටයි.. මෙි යන අතරමග අපට ලාංකිය සංචාරකයන් වගේම විදෙස් සංචාරකයන්ද මුණගැසුණු බව සදහන් කල යුතුමයි.
එළිමහන් ස්ථානය පසු කර ගිය පසු බට පඳුරු ශාක බහුලව ඇති සීග්‍ර නැග්මක් ඔස්සේ පැමිණි අප අවතීර්ණ උනේ තංගප්පුව මාර්ගය අප යන මාර්ගයට සමිබන්ද වෙන ස්ථානයටයි.. මෙි වෙතට ලගා වෙත්ම ලංකාවෙි සංචාරයට පැමිණි පොලන්ත ජාතිකයන් පිරිසක් අපට මුණගැසුණා.. ඔවුන් අපට දකුණු පසින් ඇති අළුගල් ලෙනට යන තංගප්පුව මාර්ගයෙන් පහලට බැස ගියේ මෙි පටු මාර්ගයේ ඔවුන් යන තෙක් ඉඩදී බලා සිටියදියි….
නොයෙක් වර්ගයේ ශාක කඳන් වසාගෙන ඇති තෙත පාසි වර්ග අතගා බලා සිසිලස විදගෙන වන මල් පිපි ඇති වනලැහැබෙි සුන්දරත්වයත් විදගෙන මම නමි දැඩි වෙහෙසකින් ඉදිරියට නැඟ ගියේ බලාපොරොත්තු දහසක් හිත තුල පොදි බැදගෙනයි…
අපේ ගමනාන්තයේ පළවෙනි කදු මුදුණතට ලගාවු පසු මගේ විඩාව නමි කොහේ ගියාදැයි සිතාගත නොහැකි උනා.. 1500m උසින් පිහිටි මෙි කදු මුදුණත තරමක පටු තැනක් , පහලින් ප්‍රපාතය නිසා පළමු කදු මුදුණේ සිට අවට රිසි සේ නැරඹීමට නොහැකියි.. මද වෙලාවක් එහි සිටි අප නැවත අඩිපාර දිගේ ඉදිරියට ඇවිද ගියේ දෙවනි කදු මුදුණත සොයාගෙනයි…
මාව පිස්සෙකු සේ මන්මත් කල නකල්ස් කදු මුදුන් පහේ උසම කදු මුදුණතට අප ලගා උනේ සියළු වෙහෙස මහන්සිය කොහෙන් ගියාදැයි සිතාගත නොහැකි වෙද්දියි…
නකල්ස් කදු වැටියේ උසම කදු මුදුණ වන ගොමිබානියට දෙවනි වන කදු මුදුණත තමයි මෙි five peaks වල දෙවන කදු මුදුණ.. උසින් 1864m… දහවල් එකොලහට වනාන්තරයට ඇතුල්වි සීග්‍ර නැග්මන් ඔස්සේ 6kmක් ගෙවා අප දෙවන කදු මුදුණතට ලගා වෙන විට වෙලාව් හවස තුනයි…
අප පසු කර පැමිණි කාපටි මාර්ගයේ අප ඉදිරියෙන් දිස්වු කන්ඳසාමි ගල පැහැදිලිවම අපට දැකගත හැකි උනා. එ වගේමයි මගේ තවත් හීන ගමනාන්තයක් වන ලකේගල , ගොමිබානිය අළුගල් කන්ද රිලාගල වගේ තවත් බොහො කදු මුදුන් මගේ දැස් මානයේ විරාජමානව තෙජාන්විතව සිටියේ හරියට එ කදු මුදුන් මට කතා කරනවා වගේ හදවතට දැනෙද්දි…
මොහොතකට මට සිතුනා මගේ දැස් කොයිතරමි නමි වාසනාවන්තදැයි කියලත්.. වර්ණවත් ශාක පත්‍ර වගේම වනමල් මගේ හිත වශිකරගෙන… රාවණ ඉතිහාසය ගැන බොහො කතාන්දර මෙි නකල්ස් කදු මුදුණ් සමග බැදී පවතිනවා.. එ කතා ලියා තැබිමට ගියහොත් මගේ ලිපිය තවත් දීර්ඝ වෙන බව මා දන්නා නිසාම ලකේ ගල ගිය දවසක එ විස්තර රැගෙන එන්නට පොරොන්දු වෙනවා…
අපේ රට මොනතරමි නමි සුන්දරද.. මෙි රටේ සුන්දරත්වය දැක බලා ගන්නට මෙවැනි කදු මුදුණකට එන්නම ඔින… දෑස් මානයේ පෙනෙන්නට ඇති අනෙක් කදු මුදුණ් ත්‍රිත්වය දෙස බලා සිටියේ එහි යාමට අපට කාල වෙිලාව නොමැති සොවින්…
ඉතිං… බොහො වෙිලාවක් මෙහි සුන්දරත්වය විදගෙන ගෙනා කෙටි ආහාර වලින් කුසත් පුරවාගෙන හතරයි තිහ වන විට අප පල්ලමි බැස්සේ අඳුර වැටෙන්නට ප්‍රතම අප පැමිණි දුශ්කර බොරළු ගල් ගොඩැලි ඇති ගොමරය ගමි පියසේ මාර්ගය පසු කර යා යුතු නිසයි…
හදවත නකල්ස් දෙවන කදු මුදුණත තබා මෙි විශ්වයට ස්තුති කර නැවත පහලට බැස ගත්තා… පැමිණි මාර්ගයේ එළිමහන් තැන්නට පැමිණි පසු නැවතත් සුළු මොහොතක් අප තරණය කල දෙවන කදු මුදුණත දුටු විට ඇතිවු තෘප්තියෙන් හදවත පිරි යද්දි බස්නාහිරි හරි අපූරුවට හිරු බැස යන සුන්දරත්වයත් මෙි විශ්වය අපට තෑගි කලා…
මෙි සුන්දරත්වය දෑස් පුරා පුරවාගෙන නකල්ස් වලට සමුදි සවස හයයි තිහ වන විට අප පැමිණි යතුරුපැදි නවතා ඇති නිවසට පැමිණියා… එ එන විටත් මල්ලිකා අක්කා ඇගේ නිවසේ ඉදිකඩ ලග පෙර මඟ බලා සිටියේ අප දහවලේ කදු තරණයට ගිය හෙයින් අඳුර වැටෙන විට අතරමං උවාදැයි බියෙන්.. මදක් ඇගේ නිවසේ ගිමන් හැර නැවත අප අපේ ගමි බිමි කරා පිටත්ව ආවෙි සුන්දර මතක ගොන්නකින් හදවත පුරවාගෙනයි….
මෙි ගමන පුරාවටම මගේ හිත සතුටින් පිරිලා… වෙනදා වගේම මෙි ගමනෙත් මාව පරිස්සමට එක්ක ගිය මගේ මිත්‍රයන් උපුල්,සංජිව, නදීශාන් සමග අලුත් මිත්‍රයා මහීවත් ආදරයෙන් මතක් කරනවා… කදු තියෙන්නේ නගින්න හදවත් තියෙන්නේ සතුටින් පුරවා ගන්න.… සුන්දර මතක පුරවාගෙන තාමත් එ සුන්දර මකත මතක් කරමින් සතුටු වෙන මම වෙනදා වගේම අවසානයේ ස්තුති කරන්නේ මෙි විශ්වයට…. ස්තුතියි මාව සතුටින් තබනවාට…
ඔබත් දිනක එහි යන්න… එ සුන්දරත්වය විදින්න..එ වගේම මතක තබාගන්න එ නොයිදුල් පරිසරය ආරක්ෂා කරන්න.. තමන් රැගෙන යන දේ නැවත රැගෙන එන්න තරමි කාරුණික වෙන්න… එහෙනමි තවත් නිසංසලාගේ චාරිකාවකින් ඔබ හමුවට එන්නමි..
නිසංසලා රණසිංහ
