Author: Digital My Business

එක්සත් රාජධානියේ දේවි ආදි ශිෂ්‍යාවන්ගේ සංගමය (Devi Past Pupils’ Association of the United Kingdom – Devi PPA UK) 1991 දී එක්සත් රාජධානියේ පදිංචි වූ ආදි දේවි බාලිකාවන් විසින් ස්ථාපිත කරන ලදී. 2026 දී මෙමෙ සංගමය “Coral Anniversary” සන්ධිස්ථානයට ළඟාවීම, සංවිධානය ස්ථාපනය කිරීමට උර දුන් අයගේ අනගි ජයග්‍රහණයකි. පසුගිය අවුරුදු 34 පුරා මෙම සංගමය කටයුතු කොට ඇත්තේ මූලික අරමුණු දෙකක් සාක්ෂාත් කරගැනීමටයි.
• ශ්‍රී ලංකාවේ දේවි බාලිකා විද්‍යාලයේ ශිෂ්‍යයන්ගේ අධ්‍යාපනය ඉදිරියට ගෙන යාම සඳහා අධ්‍යාපනික සම්පත් හා ආර්ථික ආධාර සැපයීම.
• එක්සත් රාජධානියේ පදිංචි පුරවැසිවරුන්, ගුරුවරුන් සහ පවුල් අතර සම්බන්ධතා ශක්තිමත් කිරීම.
2025 අගෝස්තු මාසයේදී මෙම සංගමය නිල වශයෙන් සත්කාරක ආයතනයක් (charitable organisation) ලෙස ලියාපදිංචි කරන ලදී. වසර පුරා සංස්කෘතික වැඩසටහන් සහ අනෙකුත් උළෙලවල් උළෙලවල් සංවිධානය කරමින්, පවත්වාගෙන යමින්, එකී අවස්ථාවන් වල රැස්වෙන මූල්‍යමය සම්පත් ප්‍රධාන වශයෙන්ම “උපාධිධාරී ශිෂ්‍යත්ව වැඩසටහන” සඳහා යෙදවීම සුවිශේෂී කාර්යයක් ලෙස නම් කල හැක. 2003 දී ආරම්භ වූ මෙම සත්කාර වැඩසටහන, විශ්වවිද්‍යාල, අධ්‍යාපනික ගැටළු හා ආර්ථික අපහසුතා අත්විඳින දේවි ශිෂ්‍යාවන්ගේ වෙනුවෙන් වැයවේ. 2009 දී සම්මත වීමෙන් අනතුරුව මෙම සංගමය විසින් ශිෂ්‍යත්ව ලබාදුන් සිසුවියන් පිරිස 100කට වැඩි සංඛ්‍යාවක් වෙයි. මෙම සහාය ඔවුන්ට ඔවුන්ගේ අධ්‍යාපනික සිහිනයන් ඉටු කර ගැනීමට හා විවිධ වෘත්තිමය ක්ෂේත්‍රවලට පිවිසීමට උපකාරී වී ඇත. එමඟින් ශ්‍රී ලංකාවේ බුද්ධිමය හා වෘත්තිමය ප්‍රජාවට ද සැලකිය යුතු දායකත්වයක් ලබාදී ඇත.

දේවි ආදි ශිෂ්‍ය සංගමය සංවිධානය කල සංස්කෘතික උත්සවයන් අතරින් “දේවි කලා උළෙල” මුල් තැනක් ගනී. 2024 සැප්තැම්බර් මාසයේදී සාහිත්‍ය මාසය සමරමින් මුල්වරට පැවැත්වුණු දේවි කලා උළෙල මෙවරද අතිසාර්ථක ප්‍රවේශයක් ගනිමින්, සහෝදර පාසල් වල ආදි සිසු සංගම්ද එක් රොක් කරගනිමින්, 2025 සැප්තැම්බර් 21 වැනිදා, Watford Grammar School for Boys හි James Theatre හිදී දෙවන වරටත් පැවැත්විණි. එක්සත් රාජධානියේ ආදි සිසු සංගම් 20කට ආසන්න සංඛ්‍යාවක් මෙම අවස්ථාවට සහභාගී වූ අතර, සම්ප්‍රදායික සංගීත, නර්තන, නාට්‍ය, සහ ගැහැණු හා පිරිමි කණ්ඩායම් අතර තරග විවාදයන්ද මෙහි විශේෂාංග විය.
කවිය, කෙටිකතා, හා ලිවීමේ වෙනත් කලාවන් සදහා තරගද පැවැත්විණි. ස්වාධීන විනිශ්චය මණ්ඩලයක් විසින් විනිශ්චය කරන ලද මෙම තරගවල ජයග්‍රාහීන්ට ඔවුන්ගේ නිර්මාණාත්මක දායකත්වය පිළිබඳව සම්මාන පිරිනමන ලදී.

එක්සත් රාජධානියේ දේවි ආදි ශිෂ්‍ය සංමයෙහි ක්‍රියාකාරකම් විශ්වාසනීයව මඟ පෙන්වනු ලබන කමිටුවකින් සංවිධානය වන අතර, 2025/2026 වර්ෂයට ගයනි වීරසිංහ මහත්මිය සභාපතිනිය ලෙසත්, ගෝතමී වීරකෝන් මහත්මිය උප සභාපතිනිය ලෙසත් කටයුතු කරයි. ඊට අමතරව ,ඉමල්කා රත්නායක සහ තේජා කලුබෝවිල මහත්මීන් සම ලේකම් ලෙසත්, ජෙනිෆර් පෙරේරා මහත්මිය භාණ්ඩාගාරික ලෙසත්, උදේනි සමරවික්‍රම මහත්මිය උප භාණ්ඩාගාරික ලෙසත් මේ වසරේ කටයුතු කරයි. මෙම වසරේ පැවැත්වූ දේවි කලා උළෙලෙහි සේයාරූ කිහිපයකින් ලිපිය හැඩ ගන්වමින්, එක්සත් රාජධානියේ දේවි ආදි සිසුවියන්ගේ සංගමයට තව තවත් දිරිය සවිය ප්‍රාර්ථනා කරමි.

සේයාරූ – ප්‍රනීත් හෙට්ටිආරච්චි

දිමුතු සේනාදි

ඔන්න අද අපි අරගෙන ඇවිත් තියෙනවා මේ දවස් වල trending ම මාතෘකාවක් ඉතින්

ඔයාලත් මේක කියවලා අපි Magazine හා එක් වෙනවාට ඔයාලා හැමෝටම ගොඩාක්

ස්තූතියි.ඩිජිටල් ලෝකයේ අන්තර්ගත නිර්මාණය (Content Creation) යනු තවදුරටත්

විනෝදාංශයක් පමණක් නොවේ. එය මුදල් ඉපයිය හැකි, වෘත්තීය මට්ටමේ ක්‍ෂේත්‍රයකි.

ශ්‍රී ලංකාවේ සිටින Facebook භාවිතා කරන ඔබටත් ඔබේ නිර්මාණශීලී අන්තර්ගතයන්

මුදල් බවට පත් කර ගැනීමේ අවස්ථාව දැන් උදා වී තිබේ.

මෑතකදී ශ්‍රී ලංකාවට ද Facebook Monetization පහසුකම නිල වශයෙන් විවෘත කිරීමත්

සමඟ, සිංහල භාෂාවෙන් අන්තර්ගතයන් නිර්මාණය කරන අපේ රටේ නිර්මාණකරුවන්ට

සිය වීඩියෝ, රීල්ස් (Reels), සහ අනෙකුත් පළ කිරීම් හරහා සෘජුවම මුදල් ඉපයීමේ

හැකියාව ලැබී ඇත.

මෙම ලිපියෙන් Facebook Monetization යනු කුමක්ද, එයින් මුදල් උපයන්නේ කෙසේද, සහ

ඊට සුදුසුකම් ලැබීමට අවශ්‍ය දෑ ගැන සවිස්තරාත්මකව දැනුවත් වෙමු.

Facebook Monetization යනු කුමක්ද?

Facebook Monetization යනු අන්තර්ගත නිර්මාණකරුවන්ට (Creators) ඔවුන්ගේ Facebook

පිටු (Pages) හෝ වෘත්තීය ගිණුම් (Professional Accounts) හරහා මුදල් ඉපයීමට Facebook

විසින් සපයන මෙවලම් සහ වැඩසටහන් සමූහයකි. ඔබේ අන්තර්ගතය නරඹන පිරිස

(Audience) සහ ඔවුන්ගේ නියැලීම (Engagement) මත පදනම්ව ඔබට මුදල් ඉපයීමට

මෙයින් අවස්ථාව ලැබේ.

මුදල් ඉපයීමේ ප්‍රධාන ක්‍රම (Key Monetization Tools)

මෑත කාලීන යාවත්කාලීන කිරීම් අනුව Facebook විසින් සිය මුදල් ඉපයීමේ වැඩසටහන්

ඒකාබද්ධ කර Facebook Content Monetization Program නමින් නව වැඩසටහනක් හඳුන්වා

දී ඇත. කෙසේ වෙතත්, සාමාන්‍යයෙන් පහත සඳහන් ආකාරයට ඔබට මුදල් උපයා ගත

හැක.මම ඒ ක්‍රම මේ විදියට ලියන්නම් කරුණු වශයෙන්.

1. In-Stream Ads (වීඩියෝ තුළ දැන්වීම්)

දිගු වීඩියෝ (අවම වශයෙන් මිනිත්තු 3ක්) අතරතුර ධාවනය වන කෙටි දැන්වීම් හරහා

ආදායමක් ලැබෙන ක්‍රමය මෙයයි.

• සුදුසුකම් අවශ්‍යතා (සාමාන්‍යයෙන්):
• අවම වශයෙන් Followers 10,000 ක් සිටිය යුතුය.
• පසුගිය දින 60 තුළ මිනිත්තු 600,000 ක නැරඹුම් කාලයක් (Watch Time) සම්පූර්ණ කර

තිබිය යුතුය.

• සක්‍රීය වීඩියෝ 5ක් වත් තිබිය යුතුය.

2. Ads on Reels (රීල්ස් දැන්වීම්) සහ Performance Bonus

මෙය කෙටි වීඩියෝ (Reels) හරහා මුදල් ඉපයීමේ ක්‍රමයකි. ඔබගේ Reels හි දර්ශන වාර

(Views) සහ නියැලීම (Engagement) මත පදනම්ව ආදායමක් ලැබේ.

• Facebook Content Monetization වැඩසටහන යටතේ Reels, වීඩියෝ, ඡායාරූප, සහ සරල

text posts පවා ඒවායේ කාර්ය සාධනය (Performance) මත පදනම්ව මුදල් ඉපයීමට

සුදුසුකම් ලබයි. මෙම නව වැඩසටහනට ආරාධනා (Invite-only) ලැබීමෙන් හෝ

Professional Dashboard හරහා ඔබගේ උනන්දුව ප්‍රකාශ කිරීමෙන් (Express Interest)

සම්බන්ධ විය හැක.

3. Stars (තාරකා)

නරඹන්නන්ට ඔවුන් කැමති නිර්මාණකරුවන්ට සජීවී (Live) වීඩියෝ හෝ සාමාන්‍ය

වීඩියෝ නරඹන අතරතුර 'Stars' මිලදී ගෙන යැවිය හැක. ලැබෙන සෑම Star එකක්

සඳහාම නිර්මාණකරුට මුදල් හිමි වේ.

• සුදුසුකම් අවශ්‍යතා:
• Facebook හි ප්‍රතිපත්ති වලට අනුකූල වීම.
• අඛණ්ඩ දින 30ක් පුරා අවම වශයෙන් Followers 500 ක් සිටිය යුතුය.
• වයස අවුරුදු 18 සම්පූර්ණ වී තිබිය යුතුය.

4. Fan Subscriptions (අනුගාමික දායකත්ව)

අනුගාමිකයින්ට මාසික ගාස්තුවක් ගෙවා ඔබේ පිටුවේ සුවිශේෂී අන්තර්ගතයන්

(Exclusive Content) සහ විශේෂ වරප්‍රසාද ලබා ගැනීමට මෙයින් අවස්ථාව ලැබේ.

• සුදුසුකම් අවශ්‍යතා:
• අවම වශයෙන් Followers 10,000 ක් හෝ නිරන්තරයෙන් පැමිණෙන නරඹන්නන් 250+

ක් සිටිය යුතුය.

• අදාළ Engagement අවශ්‍යතා සපුරා තිබිය යුතුය.

Facebook Monetization සඳහා ශ්‍රී ලංකාවේ නිර්මාණකරුවන් සූදානම් විය යුත්තේ කෙසේද?

මුදල් ඉපයීමට සුදුසුකම් ලැබීමට පෙර පහත මූලික කරුණු කෙරෙහි අවධානය යොමු

කිරීම අත්‍යවශ්‍ය වේ.

1. නීතිරීතිවලට අනුකූල වන්න

• Partner Monetization Policies: Facebook හි මූලික නීතිරීති හා ප්‍රමිති වලට අමතරව මුදල්

ඉපයීම සඳහා වන විශේෂ ප්‍රතිපත්ති (Partner Monetization Policies) පිළිබඳව දැඩි

අවධානයක් යොමු කරන්න.

• ප්‍රකාශන හිමිකම් (Copyright) ගැටළු: වෙනත් අයගේ වීඩියෝ, සංගීතය හෝ ඡායාරූප

අවසරයකින් තොරව භාවිතා කිරීමෙන් වළකින්න. මුදල් ඉපයීමට නම් ඔබේ

අන්තර්ගතය සම්පූර්ණයෙන්ම ඔරිජිනල් (Original) විය යුතුය.

2. ගුණාත්මක අන්තර්ගතය (Quality Content)

• අගය එකතු කරන්න: ඔබේ නරඹන්නන්ගේ ගැටළු විසඳන, ඔවුන්ට දැනුම හෝ

විනෝදය ලබා දෙන ගුණාත්මක සහ ආකර්ශනීය අන්තර්ගතයන් නිතිපතා පළ කරන්න.

• නියැලීම වැඩි කරන්න: ප්‍රශ්න අසමින්, අදහස් (Comments) වලට පිළිතුරු දෙමින්, සහ

සජීවීව (Live) විකාශනය කරමින් නරඹන්නන් සමඟ සමීප සම්බන්ධතාවක් පවත්වා

ගන්න.

3. සුදුසුකම් පරීක්ෂා කිරීම සහ සැකසීම

• Meta Business Suite / Professional Dashboard: ඔබේ පිටුව හෝ ගිණුම අවශ්‍යතා සපුරා

ඇත්දැයි පරීක්ෂා කිරීමට සහ Monetization මෙවලම් සකස් කිරීමට මෙම වේදිකාව

භාවිතා කරන්න.

• Monetization Tab: Meta Business Suite හි ඇති Monetization කොටසට ගොස් ඔබේ පිටුවට

විවෘත වී ඇති මෙවලම් සහ ඒවාට සුදුසුකම් ලැබීමට අවශ්‍ය දෑ පරීක්ෂා කරන්න.

4. ගෙවීම් සැකසීම (Payout Setup)

• මුදල් ඉපයීම ඇරඹීමෙන් පසු ඔබට ඔබේ බැංකු ගිණුම (බැංකු විස්තර, Swift Code

ආදිය) සහ අනෙකුත් ගෙවීම් තොරතුරු Facebook හා සම්බන්ධ කිරීමට අවශ්‍ය වනු ඇත.

ශ්‍රී ලංකාවට මේ සඳහා විදේශ මුදල් හුවමාරු කළ හැකි ගිණුම් අවශ්‍ය වේ.

Facebook Monetization යනු එක රැයකින් ධනවත් වන මාර්ගයක් නොවේ. එයට කැපවීම,

නිරන්තරයෙන් ගුණාත්මක අන්තර්ගතයන් සැපයීම සහ Facebook නීතිරීතිවලට ගරු

කිරීම අවශ්‍ය වේ. ශ්‍රී ලංකාවේ නිර්මාණකරුවෙකු ලෙස, මෙම අවස්ථාවෙන් උපරිම

ප්‍රයෝජන ගෙන, ඔබේ දක්ෂතා මුදල් බවට පත් කර ගැනීමට මෙය රන් අවස්ථාවකි!

P.K.D.Manujaya

(BSc Hons. In Computer Science, Social Media Strategists, Dip in HRM, Dip in Finance

Management, Dip in Production Management , Dip in Sales Management )

+9476 2209299

Www.dilshanmanujaya.com

Yes.manujaya@gmail.com

වයස අවුරුදු 30-60 අතර වූ බොහොමයක් කාන්තාවන් අතර බහුලව දක්නට ලැබෙන රෝග තත්ත්වයක් ලෙසට CTS හෙවත් Carple Tunnel syndrome තත්ත්වය හැඳින්විය හැක. ලෝක ජනගහනයෙන් 4.25% ක පිරිසක් පීඩා විඳින මෙම රෝග අවස්ථාව කාන්තාවන් හට වැළඳීමේ හැකියාව පිරිමි පාර්ශ්වයට වඩා 3 ගුණයක ප්‍රවණතාවක් ඇත.
CTS යනු අතෙහි මැණික් කටුව ආශ්‍රිතව අභ්‍යන්තර ව්‍යුහාවේ පවතින වලලු ආකාර කුහරමය ගමන් පථය (tunnel) පටු වීම, ඒ ආශ්‍රිත පටක ප්‍රදාහයට ලක්ව ඉදිමීම, අතෙහි ඇඟිලි කරා ස්නායු ආවේග සම්ප්‍රේෂණය සිදු කරන ප්‍රධාන ස්නායුව මත නිතර පීඩනයක් යෙදීම හා අතෙහි රුධිර සැපයුම අඩාල වීම යන ප්‍රධාන හේතූන් නිසා හටගන්නා රෝග අවස්ථාවකි.

දුරකථනය හෝ පුවත්පත අතට ගත් විට හෝ වාහනයේ සුක්කානම මත අත තැබූ විට ඉහත වේදනා හටගනී නම් බොහෝ විට එය CTS රෝග අවස්ථාව විය හැකිය.
රාත්‍රියේදී වේදනාව අධික වීම හේතුවෙන් නින්ද නොයෑම මෙන්ම උදෑසනට අතේ හිරියක් පැවතීම ප්‍රධාන රෝග ලක්ෂණ ලෙස දක්නට ලැබේ.

අතට ස්නායු ආවේග සපයන ප්‍රධාන ස්නායුව වන median nerve (මධ්‍ය ස්නායුව) මත අනවශ්‍ය පීඩනයක් නිතර යෙදීමෙන් පසු කාලීනව හිරිය, ක්ෂණිකව හිරි වැටී යාම, අස්වාභාවික දැනීම්, වේදනාව, දැවිල්ල හා අතෙහි ක්‍රියාකාරීත්වය දුර්වල වීම සිදු වේ.
නිසි ප්‍රතිකාර සඳහා යොමු නොවීම හේතුවෙන් ස්ථිර ස්නායු හානිය, මහපට ඇඟිල්ලේ අස්ථීන් විකෘති වීම හා මාංශ පේශි ක්ෂය වීම පවා සිදු විය හැක.
ආයුර්වේද වෛද්‍ය විද්‍යාත්මකව ස්ථිර ලෙසටම බටහිර රෝග විනිශ්චයන් සමඟ සමපාත කළ නොහැකි රෝගී තත්ත්වයක් වුවද CTS සඳහා සාර්ථක ප්‍රතිකාර පද්ධතියක් ආයුර්වේද ප්‍රතිකාර සතු වේ.

රෝග හේතු :-
– කාන්තා හා වයස්ගත පුද්ගලයන් හට පහසුවෙන් වැළඳීමේ ඉහළ සම්භාවිතාවයක් ඇත.
– ජානමය හේතු– ඇතැම් පුද්ගලයන්ට උපතින්ම ශරීර රචනාත්මක වෙනස්වීමක් ලෙස මෙම කුහරමය පථයෙහි (tunnel) පටු වීම පවතී. එමනිසා ඒ තුළින් ගමන් කරන ස්නායු මත පීඩනයක් යෙදීම නිරන්තරයෙන් සිදු වේ. පවුලේ අනෙක් අය අතර රෝග ඉතිහාසයක් පවතී නම් රෝගය හට ගැනීමේ ඉහළ හැකියාවක් පවතී.
– සන්ධීන්ගේ අධික්‍රියාකාරීත්වය– අත හා මැණික් කටුව වෙහෙසවමින් එකම කාර්‍ය්යක බොහෝ වේලාවක් නිරත වීම නිසා අතෙහි හා මැණික් කටුව ආශ්‍රිතව බන්ධනී හා ඛණ්ඩරා මත ඇති කරන අනවශ්‍ය පීඩනය හේතුවෙන් සන්ධි ආශ්‍රිත ප්‍රදාහ තත්ත්ව පහසුවෙන් හට ගනී. එමනිසා සන්ධිය වටා ඉදිමීම සිදුවන අතර ඉදිමුම මඟින් නැවත නැවතත් ස්නායුව මත පීඩනයක් ඇති කරයි.

– අතෙහි හා මැණික් කටු සන්ධිය ආශ්‍රිත චලනයන්ගේ ඇදීම්, තෙරපීම්, අනවශ්‍ය තරමට වඩා නැවීම් බොහෝ කාලයක් පුරාවට සිදුවීම හේතුවෙන් ස්නායුව මත පීඩනයක් නිරන්තරයෙන් ගොඩනැගේ. පසුකාලීනව CTS රෝගය ඇතිවීමට එය හේතු වේ.
– ගර්භණීභාවය සමඟ ඇතිවන හෝර්මෝනමය වෙනස් වීම් හේතුවෙන් ද ශරීරයේ සන්ධි ආශ්‍රිත ඉදිමීම නිසා මධ්‍ය ස්නායුව මත පීඩනයක් ගොඩනැගීම සිදු වේ.

මැණික් කටු සන්ධියේ ඇතිවන අස්ථි බිඳීම්, අවහන්දි වීම්, රුමොටොයිඩ් ආතරයිටීස් වැනි ආතරයිටීස් තත්ත්ව නිසා කුඩා සන්ධීන්ගේ ස්වරූපයේ වෙනස්කම් ඇති වීම නිසා පසු කාලීනව මෙම රෝග තත්ත්වය ඇතිවීමේ හැකියාව පවතී. එමෙන්ම Carple tunnel ප්‍රදේශය කාන්තාවන්ගේ පිරිමින්ට සාපේක්ෂව කුඩාවට පිහිටා ඇති බැවින් කාන්තා පාර්ශ්වය අතර රෝගය හට ගැනීම ඉහළ අගයක් ගනී.
ස්නායු ආඝාත හා ඇතැම් කාලීන රෝග දියවැඩියාව නිසා පසු කාලීනව සිදුවන ස්නායු හානි වීම නිසා අතට ස්නායු ආවේග සම්ප්‍රේෂණය සිදු කරන මධ්‍ය ස්නායුවට හානිවීමත්, ඇතැම් ඖෂධ භාවිතය, ආර්තවාභාවය හා
තයිරොයිඩ් ග්‍රන්ථිය ආශ්‍රිත රෝග, වකුගඩු අකර්මණ්‍ය වීම, වසා ග්‍රන්ථි ප්‍රදාහ වැනි රෝග අවස්ථා වලදීත් CTS ඇතිවීමේ ප්‍රවණතාවක් පවතී.

රෝග ලක්ෂණ :-
– හිරිය, අසාමාන්‍ය/අස්වභාවික දැනීම්, දැවිල්ල, වේදනාව, මුල්ම අවස්ථාවේදී අතෙහි මහපට ඇගිල්ලේ සිට වෙදගිල්ල දක්වා (lateral half of ring finger) රෝග ලක්ෂණ හට ගනී.
– රාත්‍රී කාලයේදී වේදනාව ප්‍රමුඛ රෝග ලක්ෂණ උත්සන්න වේ.
– ඇඟිලි වල එකවර විදුලියක් දිවයන්නා මෙන් වේදනාවක් ඇතිවේ. ඇඟිලි වලින් ආරම්භ වී අත දිගේ ඉහළට දිවයන වේදනාව හා හිරිය ක්‍රමයෙන් හට ගනී.
– අතෙහි හටගන්නා දුර්වලත්වය හේතුවෙන් අතෙන් සිදු කරන සියුම් ක්‍රියාවලි, උදාහරණ ලෙස කමිසයක බොත්තම් දමා ගැනීම වැනි දේ සිදු කිරීමට පවා නොහැකි වේ.
– හිරිය, මාංශ පේශි දුර්වලත්වය හා පේශි සමායෝජනයේ අඩාලත්වය හේතුවෙන් රෝග ලක්ෂණ තීව්‍ර වී, අතට ගත් දේ බිම වැටීම පවා පසු කාලීනව සිදු වේ.
රෝගය ඇති වීම ක්‍රමක්‍රමයෙන් සිදු වන අතර රෝගය හටගත් පසු රෝග ලක්ෂණ කිහිපයක් එකවර තීව්‍ර ලෙස ඉස්මතු වේ. මුල් කාලයේදී රෝග ලක්ෂණ ඇති වීම දිනයේ ඇතැම් විට පමණක් වුවද පසු කාලීනව දිනය පුරා පැවතිය හැක.
නින්දට පවා බාධා ගෙනදෙමින්, එදිනෙදා වැඩ වලට පවා පීඩා ගෙන දෙන පරිදි රෝග ලක්ෂණ පවතින අවස්ථාව වනතුරු බොහෝ රෝගීන් වෛද්‍ය ප්‍රතිකාර සඳහා යොමු නොවේ. මෙම අවස්ථාවේදීත් ප්‍රතිකාර නොලැබ නොසලකා හැරීමෙන් ස්නායු හා මාංශපේශීන්හි ස්ථිර හානි වීම් සිදු විය හැක.

ඇඟිලි වල සංවේදනය හා මාංශ පේශී ශක්තිමත් බව පරීක්ෂා කිරීම මගින් වෛද්‍යවරුන් විසින් රෝගය නිශ්චිතව තහවුරු කර ගන්නා අතර මැණික් කටු සන්ධියෙන් අත නැවීමේදී මෙන්ම, මධ්‍ය ස්නායුව මදක් තෙරපීමේදී වේදනාව අධික වීම රෝගය හඳුනා ගැනීමේ ප්‍රධාන ලක්ෂණ වේ.
මීට අමතරව X-ray හා Scan පරීක්ෂණ මගින් වෙනත් රෝගයන්ගෙන් වෙන්කර හඳුනා ගනිමින් නිවැරදි රෝග විනිශ්චය පහසුවෙන් සිදුකළ හැක.

මාංශපේශීන්ගේ හා මධ්‍ය ස්නායුවේ (median nerve) නිසි ක්‍රියාකාරීත්වය පරීක්ෂා කිරීමට නවීන වෛද්‍ය විද්‍යාවේ දී Electromyography පරීක්ෂණ භාවිතා වේ.

බටහිර වෛද්‍ය විද්‍යාවේ සිදුකරන ශල්‍ය කර්ම මගින් රෝග ලක්ෂණ අඩු කිරීම සිදු වුවද නැවත රෝගය ඇතිවීමත්, උපද්‍රව හට ගැනීමත්, ඇතැම්විට ඇතිවන අතුරු ප්‍රතිවිපාක හේතුවෙන් සන්ධියේ ක්‍රියාකාරීත්වය කෙරෙහි අහිතකර බලපෑම් පසු කාලීනව ඇති විය හැකිය.

ආයුර්වේද වෛද්‍ය විද්‍යා මූලධර්මානුකූලව වාත ව්‍යාධි රෝගයක් වන බැවින් ප්‍රකුපිත වාත දෝෂය හා බැඳි රෝග ලක්ෂණ වලින් යුක්ත මෙම රෝගයට ස්නේහ යුක්ත මෘදු විරේචන සහිත වාත ව්‍යාධි චිකිත්සා ප්‍රත්‍යක්ෂ ප්‍රතිඵල ලබා දේ. කෂාය, චූර්ණ, වටී, ගුග්ගුලු, තෛල, ඝෘත හා රස ඖෂධ භාවිතය සාර්ථක ප්‍රතිඵල ලබා දෙන අතර අභ්‍යංග, ඌෂ්ණ ස්වේද, උපනාහ ස්වේද, බන්ධන (bandage) යෙදීම, පිචු, ලේපන, ධාරා, නස්‍ය, රක්තමෝක්ෂණ හා අග්නි ප්‍රතිකාර ක්‍රම සාර්ථක බාහිර ප්‍රතිකාර ලෙස දක්වා ඇත.

ආයුර්වේද වෛද්‍ය විද්‍යාවට අනුව ‘මනිබන්ධ මර්මය‘ මැණික් කටු සන්ධිය ආශ්‍රිතව පිහිටා ඇති අතර මර්මය පීඩාවට පත් වීම රෝගය හට ගැනීම හා උත්සන්න වීමට හේතු වේ. දීර්ඝ කාලීනව මර්මය පීඩාවට පත් වීමෙන් අතෙහි ක්‍රියාහානිය පවා සිදු විය හැක. එමෙන්ම හදිසි අනතුරු හේතුවෙන් මර්මය පීඩාවට පත්වීමෙන් පසු රෝගය හට ගන්නා අවස්ථාවන්ද පවතී. රෝග ලක්ෂණ හටගත් මුල්ම අවස්ථාවේදී ප්‍රතිකාර වෙත යොමු නොවීමෙන් රෝග ලක්ෂණ තීව්‍ර වීමත්, රෝගය සුව වීමට කල්ගත වීමත් සිදු වේ.
රෝග ලක්ෂණ උත්සන්න වීමේදී අත දිගේ ඉහළට වේදනාව පැතිර යාම දක්නට ලැබෙන අතර, මෙම අවස්ථාව ආයුර්වේද වෛද්‍ය විද්‍යාවේ සඳහන් ‘විශ්වාචී‘ රෝග අවස්ථාව (Brachial neuralgia) හා සැසඳීම සිදු කළ හැක.

හිතකර ක්‍රියා :-
– කාර්‍ය්යන්ගේ නිරත වීමේදී යොදන බලය අවම කිරීම හා විවේකය ලබා දීම. උදා:- යතුරුපුවරුවක ක්‍රියාවේ යෙදේ නම් පීඩනයකින් තොරව යතුරු එබීම සිදු කළ යුතුය. ලිවීමේදී ප්‍රමාණයෙන් ලොකු පෑනක් භාවිතා කිරීම හා මෘදු ලෙස අල්ලා ගැනීමට හැකි වන අයුරින් සකසා ගැනීම මෙන්ම මෘදුව ලිවීමට උත්සාහ ගැනීම කළ යුතුය.
– කඩින් කඩ විවේක ගැනීමත්, අල්ල දිගහැර ඇඟිලි විහිදුවීම හා මැණික්කටු සන්ධියෙන් දෙපසට අත නවමින්, දිගහරිමින්, සෙමෙන් කරකවමින් අතට ව්‍යායාම ලබා දීමත් සිදුකළ යුතුය.

– බෙල්ලේ හා උරහිස් – මාංශපේශීන්ගේ තද බවද ස්නායු තෙරපීමට හේතු විය හැකි බැවින් ඇඟිලි හා අතෙහි වේදනාව ගෙන දිය හැකිය. එබැවින් නිවැරදි ඉරියව් භාවිතය අනිවාර්යයෙන්ම කළයුතුය.
– එමෙන්ම වායු සමීකරණ තුළ රාජකාරියේ යෙදීමේදී වේදනාව වැඩි විය හැකිය. එමනිසා අත් උණුසුම්ව තබා ගැනීමට උණුසුම් අත් ආවරණ පැළඳීම සුදුසු වේ.
– අති ස්තෞල්‍ය පුද්ගලයෙක් නම් ශරීර බර පාලනය කළ යුතුය.
– මැණික් කටු සන්ධිය වටා ප්‍රත්‍යස්ථ වෙළුම් පටියකින් වෙළීම හෝ elastic band එකක් පැළඳීම සුදුසුය.
– අත මත නිදා ගැනීම සිදු නොකළ යුතුය.

රෝග ලක්ෂණ හටගත් වහාම සුදුසුකම් ලත් ආයුර්වේද වෛද්‍යවරයෙක් වෙත ගොස් නිසි ඉක්මන් ප්‍රතිකාර ලබා ගැනීමෙන් මෙම රෝග තත්ත්වය පහසුවෙන් සුවකර ගත හැක.

ආයුර්වේද වෛද්‍ය නාලිකා හංසිනී ජයතිලක
BAMS – Colombo (SL)

අප ලෝකය දකින ආකාරය හැඩගැස්වීමේදී මාධ්‍ය බලවත් කාර්යභාරයක් ඉටු කරයි, එයට අපි ස්ත්‍රී පුරුෂ භාවය (Gender) තේරුම් ගන්නා ආකාරයද ඇතුළත් වේ.රූපවාහිනී වැඩසටහන් සහ චිත්‍රපටවල සිට ප්‍රවෘත්ති, වෙළඳ දැන්වීම් සහ සමාජ මාධ්‍ය දක්වා, පිරිමි හෝ ගැහැණු වීම යන්නෙන් අදහස් කරන්නේ කුමක්ද යන්න හෝ එම සාම්ප්‍රදායික භූමිකාවන්ගෙන් ඔබ්බට හඳුනා ගැනීම පිළිබඳ අපගේ අදහස්වලට මාධ්‍ය බලපෑම් කරයි. කෙසේ වෙතත්, ස්ත්‍රී පුරුෂ භාවය බොහෝ විට අසාධාරණ සහ සීමිත ආකාරවලින් පෙන්වනු ලබන අතර එය පුද්ගලයන්ට සහ සමාජයට ප්‍රබල බලපෑමක් ඇති කළ හැකිය.

දිගු කලක් තිස්සේ මාධ්‍ය ක්ෂේත්‍රයේ කාන්තාවන් සුන්දරත්වය, ප්‍රේමය හෝ ගෙදර දොරේ වැඩ කෙරෙහි අවධානය යොමු කරන භූමිකාවන්හි පෙන්වා ඇත. කාන්තා චරිත බොහෝ විට පිරිමින්ට වඩා අඩු බලගතු හෝ අඩු වැදගත්කමක් දරයි. මෙය මිනිසුන් විශ්වාස කරන්නේ කාන්තාවන් මෘදු, චිත්තවේගීය හෝ යැපෙන්නන් විය යුතු බවත් පිරිමින් ශක්තිමත්, නිර්භීත සහ නායකයින් බවත්ය. මෙම අදහස් සැමවිටම සත්‍ය නොවේ, නමුත් මාධ්‍ය බොහෝ විට ඒවා පුනරාවර්තනය කරයි. මෙය ස්ත්‍රී පුරුෂ භාවය පිළිබඳ ඒකාකෘතියක් (Stereotype) ලෙස හැඳින්වේ. මාධ්‍ය කාන්තාවන් මව්වරුන්, පෙම්වතුන් හෝ වින්දිතයින් ලෙස සහ පිරිමින් වීරයන්, සටන්කරුවන් හෝ ලොක්කන් ලෙස පමණක් පෙන්වන විට, එය පැරණි අදහස් ජීවමාන කර ප්‍රගතිය නතර කරයි.

තවත් ගැටළුවක් වන්නේ සාම්ප්‍රදායික ස්ත්‍රී පුරුෂ භූමිකාවන් අනුගමනය නොකරන පුද්ගලයින් අප දකින්නේ කෙතරම් අල්ප වශයෙනි. උදාහරණයක් ලෙස, සංක්‍රාන්ති ලිංගික (Transgender) සහ ද්විමය නොවන (Homo Sexual) පුද්ගලයින් බොහෝ විට නොසලකා හරිනු ලැබේ හෝ සෘණාත්මක ආකාරයකින් පෙන්වනු ලැබේ. ඔවුන් විහිළු, අපරාධකරුවන් හෝ ව්‍යාකූල ලෙස පෙන්විය හැකි අතර, එය සැබෑ ජීවිතයේ වෙනස්කම් කිරීමට හේතු විය හැක. මෙම අසාධාරණ පින්තූර අන් අය ඔවුන්ට සලකන ආකාරය සහ ඔවුන් තමන් ගැන හැඟෙන ආකාරය වේදනා සහ මානසික පීඩනයක් වේදනා සහ මානසික පීඩනයක් ගෙන් දෙයක් විය හැකිය. මාධ්‍ය මෙම කණ්ඩායම් කරුණාවන්ත හා ගෞරවනීය ආකාරයකින් නියෝජනය කිරීමට අපොහොසත් වූ විට, එය වරදවා වටහා ගැනීම සහ වෛරය වැඩි කරයි.

සමාජ මාධ්‍ය විසින් මිනිසුන්ට තමන් වෙනුවෙන් කතා කළ හැකි නව අවකාශයන් නිර්මාණය කර ඇත. දැන්, වැඩි හඬවල් ඇසෙන අතර, මිනිසුන්ට සාම්ප්‍රදායික ස්ත්‍රී පුරුෂ භාවය පිළිබඳ රූපවලට අභියෝග කළ හැකිය. ක්‍රියාකාරීන් සහ නිර්මාණකරුවන් සැබෑ කථා, නව අනන්‍යතා සහ ශක්තිමත් කාන්තා නායිකාවන් පෙන්වීමට Instagram, TikTok සහ YouTube වැනි වේදිකා භාවිතා කරයි. මෙය බොහෝ දෙනෙකුට දැක ඇති සහ තේරුම් ගත් බවක් දැනීමට උපකාරී වී ඇත. එය මහජන මතය වෙනස් කිරීමට සහ සමාන සැලකිලි සඳහා තල්ලු කිරීමට ද උපකාරී වේ. අසාධාරණ මාධ්‍යවලට හඬ නඟා වෙනසක් ඉල්ලා සිටීමෙන් සමාජ මාධ්‍ය මිනිසුන්ට ඉක්මනින් ප්‍රතිචාර දැක්වීමට ඉඩ සලසයි.

දේවල් දියුණු වෙමින් පැවතුනද, තවමත් බොහෝ දුර යා යුතුව තිබේ. බොහෝ වෙළඳ දැන්වීම් තවමත් කාන්තාවන් වස්තූන් ලෙස පෙන්වයි හෝ කුසලතා වලට වඩා අලංකාරය කෙරෙහි අවධානය යොමු කරයි. ප්‍රවෘත්ති කථා බොහෝ විට කාන්තා නායකයින් පිරිමි නායකයින්ට වඩා වෙනස් ලෙස සලකයි, ඔවුන්ගේ වැඩවලට වඩා ඔවුන්ගේ ඇඳුම් ගැන කතා කරයි. සංගීත වීඩියෝ සහ චිත්‍රපට තවමත් පිරිමින්ගේ ඇස සතුටු කරන ආකාරයෙන් කාන්තාවන් පෙන්වන අතර, මෙය ගැටලුව දිගටම කරගෙන යයි. මාධ්‍ය හැඟීම් සැඟවීමට හෝ සෑම විටම “දැඩි” ලෙස ක්‍රියා කිරීමට ඔවුන්ට බලපෑම් කරන විට පිරිමින් ද පීඩාවට පත්වේ. මෙම යථාර්ථවාදී නොවන අපේක්ෂාවන් සෑම කෙනෙකුටම හානිකර ය.

මාධ්‍ය සියලු ලිංගභේද සාධාරණ, ගෞරවනීය සහ සමාන ආකාරයකින් පෙන්වීම වැදගත් වේ. දරුවන් සහ තරුණයින් තමන් නරඹන දෙයින් බොහෝ දේ ඉගෙන ගනී. ඔවුන් මාධ්‍ය තුළ වඩාත් ශක්තිමත් කාන්තාවන්, කරුණාවන්ත පිරිමින් සහ විවිධ ලිංගභේද අනන්‍යතා දුටුවහොත්, ඔවුන් වඩාත් විවෘත මනසකින් වැඩෙනු ඇත. මෙය වඩාත් සමාන හා සාධාරණ සමාජයකට මඟ පාදනු ඇත. දරුවන්ට තමන් දකින මාධ්‍ය ගැන විවේචනාත්මකව සිතීමට උපකාර කිරීමේදී පාසල් සහ දෙමාපියන් ද විශාල කාර්යභාරයක් ඉටු කරයි.

අවසාන වශයෙන් කිව හැක්කේ මාධ්‍යයට විශාල බලයක් ඇත – බලය සමඟ වගකීම පැමිණේ. ලේඛකයින්, අධ්‍යක්ෂවරුන්, මාධ්‍යවේදීන් සහ බලපෑම් කරන්නන් ඔවුන් බෙදා ගන්නා රූප සහ කථා ගැන හොඳින් සිතා බැලිය යුතුය. සියලුම ලිංගභේදවල සැබෑ සහ ගෞරවනීය පින්තූර පෙන්වීමෙන්, සෑම කෙනෙකුටම තමන් කවුදැයි නිදහසේ සිටින ලෝකයක් ගොඩනැගීමට මාධ්‍යයට උදව් කළ හැකිය. නියෝජනය වැදගත් වන අතර සාධාරණ මාධ්‍යයට සැමට ගෞරවය, සමානාත්මතාවය සහ අවබෝධයෙන් පිරුණු අනාගතයකට දොර විවර කළ හැකිය.

පවිත්‍රා රණතුංග

ගුරු ගෝල බැඳීම යනු හුදු විෂය දැනුම හුවමාරුවකට පමණක් සීමා වූවක් නොවේ. එය මානව සබඳතා අතර ඇති පූජනීයම බැඳීමක් වන අතර, එහි හරය වී ඇත්තේ ගුරුවරයා තම ගෝලයන් කෙරෙහි දක්වන අසීමිත ආදරය, කරුණාව සහ කැපවීමයි. ගෝලයන්ට ආදරය කිරීම යනු ඔවුන්ගේ අධ්‍යාපනයට පමණක් නොව, සමස්ත ජීවිතයටම ආලෝකයක් ලබා දීමකි.

දරුවෙකුගේ ජීවිතයේ පළමු ගුරුවරුන් වන්නේ දෙමාපියන්ය. එහෙත්, ලෝකය අවබෝධ කර ගැනීමටත්, සමාජයේ යහපත් පුරවැසියෙකු වීමටත් අවශ්‍ය දැනුම, කුසලතා සහ ආකල්ප ලබා දෙන්නේ ගුරුවරයා විසිනි. එම නිසා, ගුරුවරයා බොහෝ විට ‘දෙවන මව්පියන්‘ ලෙස හැඳින්වේ. මේ බැඳීමේ පදනම වන්නේ ආදරය සහ විශ්වාසයයි. ගුරුවරයා ගෝලයන්ට දක්වන ආදරය, ඔවුන්ව ආරක්ෂිත, උණුසුම් සහ ධනාත්මක ඉගෙනුම් පරිසරයක් තුළ තබයි. ගුරුවරයා තම දරුවන් මෙන් ශිෂ්‍යයන් රැකබලා ගන්නා විට, ඔවුන් බියෙන් තොරව තම අදහස් ප්‍රකාශ කිරීමටත්, ප්‍රශ්න ඇසීමටත්, අභියෝග භාර ගැනීමටත් පෙලඹෙති.

සමහර විට ගෝලයන්ට ආදරය යනු ඔවුන්ගේ වැරදිවලට සමාව දීම පමණක් නොවේ. සැබෑ ආදරය යනු ඔවුන්ට නිවැරදි මාවත පෙන්වීමයි. ආදරණීය ගුරුවරයෙකු කිසිවිටෙකත් දරුවන් දඬුවම් කිරීමෙන් පමණක් හික්මවන්නේ නැත. ඔවුන් දරුවාගේ වැරැද්දට හේතුව තේරුම් ගෙන, සංවේදීව කතා කර, නිවැරදි මාර්ගය පෙන්වා දෙයි. ගුරුවරයාගේ ආදරය නිසාම, ශිෂ්‍යයා තමන් නිවැරදි විය යුතු බව තේරුම් ගෙන, ස්වයං විනයක් ඇති කර ගැනීමට පෙලඹේ.

සෑම දරුවෙකු තුළම සුවිශේෂී දක්ෂතාවක් ඇත. ආදරණීය ගුරුවරයෙකුට කළ හැකි වැදගත්ම දේ වන්නේ, එක් එක් ගෝලයාගේ අනන්‍යතාවය හඳුනාගෙන, ඔවුන්ගේ හැකියාවන්ට ගරු කිරීමයි. සමහරු විෂය දැනුමෙන් දක්ෂ විය හැකි අතර, තවත් සමහරු කලාවෙන්, ක්‍රීඩාවෙන් හෝ නිර්මාණශීලීත්වයෙන් දක්ෂතා දක්වනු ඇත. ගුරුවරයාගේ ආදරය සහ දිරිගැන්වීම, මෙම දක්ෂතා ඔප්නංවා ගැනීමට අවශ්‍ය ආත්ම විශ්වාසය ඔවුන්ට ලබා දෙයි. ශිෂ්‍යයෙකු තුළ තමාගේ හැකියාවන් පිළිබඳව විශ්වාසයක් ඇති කිරීම, ඔවුන්ගේ ජීවිතයේ සාර්ථකත්වයට මග පාදයි.

ගෝලයන්ට ආදරයෙන් කටයුතු කිරීම යනු රටක අනාගතයට කරන උතුම් ආයෝජනයකි. ගුරුවරයා දෙන ආදරය සහ මඟ පෙන්වීම නිසා ගුණවත්, බුද්ධිමත් හා සමාජයට වැඩදායී පුද්ගලයන් බිහි වේ. මේ නිසා ගුරුවරයාගේ බලපෑම පන්ති කාමරයට පමණක් සීමා නොවේ; එය මුළු සමාජය පුරාම විහිදේ. ගුරුවරයෙකුගෙන් ලබන ආදරය ජීවිත කාලය පුරාම ගෝලයාට රැකවරණයකි.
ගෝලයන්ට ආදරය කිරීම ගුරුවෘත්තියේ පරම පූජනීය වගකීමයි. එය හුදු උපදේශනයකට එහා ගිය, හදවතින්ම ගලා එන බැඳීමකි. මෙම ආදරය තුළින්, ගුරුවරයා තම ගෝලයන්ගේ ජීවිත ආලෝකවත් කරන අතර, ලෝකය යහපත් තැනක් බවට පත් කිරීමට මඟ පෙන්වයි. ගෝලයන්ට ආදරය කරන ගුරුවරයා සැබවින්ම දෙවියන් හා සමාන වන්නේ එබැවිනි.

පියුමි නෙළුමිකා
ශ්‍රි ජයවර්ධනපුර විශ්වවිද්‍යාලය

සැබෑ දියුණුවේ රහස – අන්‍යයන් පරදවා නොව, තමා දිනා ගැනීමයි….

​ලෝකය දිනෙන් දින තරඟකාරී වෙන බව ඇත්ත. අපේ අරමුණු කරා යන ගමනේදී, අපට විවිධ බාධක සහ අභියෝගවලට මුහුණ දීමට සිදු වෙනවා. නමුත්, සැබෑ දියුණුව සහ ස්ථාවර සාර්ථකත්වය තියෙන්නේ අනුන්ගේ ගමන අඩාල කරලා අපේ ගමන යෑමේ නෙවෙයි. “අනුන්ට වලවල් නොකපා තමන් ගොඩ එන්න” කියන මේ සරල කියමන තුළ ගැබ්ව ඇත්තේ පුද්ගල සහ සමාජ සංවර්ධනය සඳහා වූ ගැඹුරු දර්ශනයක්.

​1. වලවල් කැපීමෙන් සිදුවන්නේ කුමක්ද?


​අප අන්‍යයෙකුගේ සාර්ථකත්වය ඊර්ෂ්‍යාවෙන් හෝ තරඟයෙන් දැක, ඔවුන්ව පහතට ඇද දැමීමට උත්සාහ කරන විට, අපේ ශක්තියත් කාලයත් නිකරුණේ අපතේ යනවා.
​වෙහෙස දෙගුණ වීම: අනුන්ගේ දියුණුව වැළැක්වීම සඳහා අප දරන වෙහෙස, අපේම දියුණුව වෙනුවෙන් යෙදවීමට තිබූ ශක්තියයි. එමඟින් අපේ ගමන දෙගුණයක් දුෂ්කර වෙනවා.
​සෘණාත්මක මානසිකත්වය: නිතරම අන් අය දෙස බලා ඊර්ෂ්‍යාවෙන් ක්‍රියා කිරීමෙන්, අපේ මානසිකත්වය සෘණාත්මක වෙනවා. සතුට, තෘප්තිය සහ නිර්මාණශීලීත්වය වෙනුවට හදවතේ ඉතිරි වන්නේ වෛරය සහ කලකිරීම පමණයි.
​සමාජ විශ්වාසය බිඳ වැටීම: තවත් කෙනෙකුට හානි කිරීමට උත්සාහ කිරීමෙන් අවට සමාජයේ අප කෙරෙහි ඇති විශ්වාසය බිඳී යනවා. දිගුකාලීන සාර්ථකත්වයට අත්‍යවශ්‍ය වන සහයෝගය සහ සම්බන්ධතා අපට අහිමි වෙනවා.

​2. තමන්ගේ සාර්ථකත්වය තහවුරු කරගන්නා මඟ

​අනුන්ට වළ කැපීමෙන් ලැබෙන තාවකාලික සතුට වෙනුවට, අපේ ශක්තිය යෙදවිය යුත්තේ වඩාත් ඵලදායී ක්‍රියාවලියක් සඳහායි:
​තමාගේ අභියෝග ජය ගැනීම: අපේ අවධානය යොමු කළ යුත්තේ අන් අය දෙස නොව, තමාගේ දුර්වලතා සහ තමාට ඇති බාධක දෙසටයි. අපේ දැනුම, කුසලතා සහ හැකියාවන් වැඩි දියුණු කර ගන්නේ කෙසේදැයි සැලසුම් කරන්න.
​අන්‍යයන් සමඟ සහයෝගීතාව: සාර්ථක පුද්ගලයෙක් තම ගමන පහසු කර ගැනීමට අන් අයගේ සහයෝගය ලබා ගන්නා අතර, තමාට හැකියාවක් ඇති විට අනුන්ට ද උපකාර කරනවා. එකට එකතු වී වැඩ කිරීම තුළින් කිසිදා තනිව ළඟා විය නොහැකි ඉලක්ක කරා අපට යා හැකියි.
​ධනාත්මක දැක්ම: අන් අය දියුණු වන ආකාරය දකින්නේ තරඟකරුවන් ලෙස නොව, අපටත් ආදර්ශයට ගත හැකි ප්‍රබෝධමත් සාර්ථකත්වයන් ලෙසයි. ඔවුන්ගෙන් ඉගෙන ගෙන, ඔවුන්ව අභිබවා යාමට නිරෝගී මානසිකත්වයකින් ක්‍රියා කරන්න.
​නිර්මාණාත්මක විසඳුම්: ගැටලුවක් ආ විට අනුන්ට දොස් කීම වෙනුවට හෝ ඔවුන්ව පහතට දැමීමට උත්සාහ කිරීම වෙනුවට, එම ගැටලුවට විසඳුම් සෙවීමට ඔබගේ නිර්මාණශීලිත්වය යොදවන්න.

​ 3. අත්තිවාරම ශක්තිමත් කරමු

​සැබෑ දියුණුව කියන්නේ, කඳු මුදුනට තනිවම නැගීමක් නෙවෙයි. එය, ශක්තිමත් පදනමක් ගොඩනඟා, ස්ථාවරව ඉහළට යෑමකි. අන් අය සමඟ සටන් කරමින් ගොඩනඟන සාර්ථකත්වය වැලි පවුරක් වැනිය. නමුත්, අන්‍යෝන්‍ය ගෞරවය සහ සහයෝගය මත පදනම් වූ සාර්ථකත්වය යනු ස්ථාවර අත්තිවාරමක් මත ගොඩනැඟූ මන්දිරයකි.
​අපේ ගමනේදී, අපිට අවශ්‍ය වෙන්නේ අන්‍යයන් පරාජය කිරීම නොවෙයි. අපිට අවශ්‍ය වන්නේ තවත් හොඳ, දියුණු ලෝකයක්. ඒ සඳහා, අද දින සිට අනුන්ට වලවල් කැපීම වෙනුවට, අපේම පාරවල් පුළුල් කර, අනෙක් අයටත් ඒ ගමනට ආරාධනා කරමු!
​
සටහන
නවොද්‍යා දෙව්මිණි ආරියවංශ.

රැයක් හෝ පැයක්

~ නොබිඳෙන පතිකුලයේ අරුමැසි හාස්කම ~

"ධම්ම ජාගොඩ රංග ශිල්ප ශාලිකාවේ" රංගවේදය හදාරා ඉන් නොනැවතී

ඉන්දියාවේ මුම්බායි හී “National Institute of Film Television & Theatre” හී ද

තවදුරටත් රංගවේදය හදාරන ලාල් වීරසිංහ ලාංකේය සිනමා කර්මාන්තයේ

රංගනවේදියෙකු ලෙස අත්පොත් තබන්නේ වර්ෂ 1991 දී රිදී තිරය

ආලෝකමත් කෙරූ "වැඩ බැරිනම් වැඩක් න" සිනමාපටයේ යොවුන්

රංගනවේදියෙකු ලෙසයි.

වර්ථමානය වන විට වෘත්තීය භාවයෙන් රූපලාවණ්‍ය ශිල්පියෙකු වන ඔහු

මෙරට ටෙලිනාට්‍යය මෙන්ම සිනමා කර්මාන්තයන් තුළත් රංගවේදියෙකු,

අදියුරුවරයෙකු, නිෂ්පාදකයෙකු හා තිර රචකයෙකු යන භූමිකාවන් ද

ඉටුකොට, සාඩම්භර ලෙසින් ඉන්දීය සිනමාපට කිහිපයක් වෙනුවෙන් ද සිය

රංගන ධායකත්වය ප්‍රදානය කොට තිබීම සුවිශේෂී කරුණකි.

වර්ෂ 2015 දී රට වටා සිනමාහල්හී තිරගත කෙරුණු "සිංග මචං චාලි" යන

සිය කුළුඳුල් වෘතාන්ත සිනමාපටයෙන් අනතුරුව සිය දෙවන වෘතාන්ත

සිනමාපටය වන "රැයක් හෝ පැයක්" ද ලෝ වාසී මිලියන සංඛ්‍යාත

සිනමාලෝලීන්ගේ නෙත් සිත් කුල්මත් කරවන නියාවෙන් ඔහු විසින් නුදුරේදීම

මුදාහරින්නට සැරසෙන වග ඉමහත් සතුටෙන් කියා සිටින්නට කැමැත්තෙමි.

දකින්නෙකුට ඊර්ෂ්‍යා සිතෙන පරිද්දෙන් සන්තුෂ් සිය ප්‍රිය බිරිය අපර්ණා හා

සිය එකම දියණිය සමඟින් කුඨුම්භය පුරා මන්දහාසය පතුරවයි. එනමුත්

ඔවුන් සිහිනෙන්වත් නොපැතූ විරූ විලසින් එයින් මදහස අතුරුදන් වන්නේ

සන්තුෂ් රහසේ අනියම් සම්බන්ධයක් පවත්වන බව අපර්ණා පසක් කොටගත්

නිමේෂයේය.

නොබෝ කල් නොගොස් සන්තුෂ් විශ්‍රාමික යුධ හමුදා නිළදාරියෙකු සමඟින්

ආරවුලක් ද ඇතිකරගනී. එයින් වික්ෂිප්ත භාවයට පත්වන අපර්ණාගේ මනසේ

අඳුරු කම්පනයන් දෝංකාර දෙන්නට පටන්ගන්නේ සිය එකම දියණිය ද

හිටිහැටියේ අතුරුදන් වද්දීය. ඉක්බිති අපර්ණා බිරියක විලසින් හා මවක

විලසින් කොතනකදී කෙලෙසින් තීන්දු තීරණ ගනීවිද? ඇගේ තීන්දු තීරණ

හමුවේ සන්තුෂ් කොතනදී කෙලෙසින් තීන්දු තීරණ ගනීවිද? ඔවුන්ගේ තීන්දු

තීරණ හමුවේ දියණියගේ ඉරණම කෙලෙසින් විසඳෙයිද…?

ප්‍රේක්ෂකාගාරයේ අසුන්ගත් සිනමා රසකාමී සබුද්දික රසික සිත් තුළ කුතුහලය

නොපිරිහෙලා උපදවමින් විටින්විට පැනනගිනා මෙම උභතෝකෝටික

ප්‍රශ්ණාර්ථයට ශ්‍රව්‍ය – දෘශ්‍ය මාධ්‍යයෙන් රිදී තිරය මත පිළිතුරු ප්‍රක්ශේපනය

කරමින් සිතුවම් පටය ඉදිරියට ධාවනය වේ.

දිවිහිමියෙන් පතිවත රකිනා කුලවත් කාන්තාවක් සතු විමසිලිමත් භාවය,

සුපරික්ෂාව, ඉවසීම, දරාගැනීම හා එඩිතරකම යන ධණාත්මක ගුණාංගයන්

සිය ලබැඳියන් අනතුරු කලාපයෙන් මුදාගැනීමට සවිමත් තෝතැන්නක් වන

අයුරු හුවාදැක්වීම තිර රචකයාගේ මෙන්ම අදියුරුවරයාගේ ද නිර්මාණ වෑයම

වන්නට ඇතැයි සිතමි.

උක්ත වායාමය පරිපූර්ණ අයුරින් සඵල වන්නට යථාර්ථවාදී රඟ

සොභාවක් තිරය මතට ගෙනහැරපෑමට සමත් වැඩිහිටි හා

ළමා රූපණ වේදීන් සමුදායක් තිර රචනය වටා ඒකරාශි

කරගැනීමට අදියුරුවරුන් යුගලය භාග්‍ය සම්පන්න වී ඇති

බැව් නොවලහා කිවයුතුය.

ප්‍රදාන රංගන ධායකත්වය

ලාල් වීරසිංහ

චන්න පෙරේරා

දිල්රුක්ශි වීරප්පෙරුම

කුමාර ජයකාන්ත

රජිත හිරාන්

නොෂින් ද සිල්වා

රුද්‍රා

අතිරේඛ රංගන ධායකත්වය

සංජනා නයිඳු

යෝගී රාම්

රාජිත මෙල්ඩර්

අමිල හේරත්

චතුරිකා ආරියවංශ

උදාරි නදීශානි

ලියනා මෙල්ඩර්

නිශාල කේ. නිශ්ශංක

යූසුෆ් මොහොමඩ්

මිෂාල් පෙරේරා

කාංචනා පීරිස්

මිලින්ද පෙරේරා

ඔසදි කුමා කුරුකුලසූරිය

ආලෝකා ධනංජනී

චමෝද් ලක්ෂාන්

තිර රචකයාගේ තියුණු පෑන් පහරේ නිර්මිත අරුත රිදී

තිරය මතතේජාන්විතව රූප මාධ්‍යයෙන් ගෙත්තම් කරවීමේ

අදියුරුවරයාගේ මුඛ්‍ය කාර්‍යභාරය ප්‍රශස්ථව ඉටුකළ හැක්කේ කලා

අධ්‍යක්ෂකවරුන්, කැමරා ශිල්පීන්, වේශ නිරූපණ ශිල්පීන් හා

සංස්කාරකවරුන් යන සිව් වැදෑරුම් නිර්මාණවේදීන් ද ඊට අමතරව

තාක්ෂණික දැනුමින් අනූන කාර්මික ශිල්පීන් ද ස්වකීය

මෙහෙය සකසුරුවම්ව අනූපමේයව ඉටුකරලන්නේ නම් පමණි.

නිෂ්පාදන කාර්‍ය මණ්ඩලය

අධ්‍යක්ෂණය | ලාල් වීරසිංහ

නිෂ්පාදනය | ධනුෂි ප්‍රේමරත්න

කතාව හා තිර රචනය | ආර්. කුලන්දායි යේෂු

කැමරා අධ්‍යක්ෂණය | තංගයියා මඩසාමි

සටන් අධ්‍යක්ෂණය | එස්. ආර්. මුරුගන්, ශේන් ආර්‍යන්

කලා අධ්‍යක්ෂණය | එම්. සෙල්වරාජ්, නාලක කුරුප්පුආරච්චි

අංග රචනය | රාමු

5.1 ශබ්ද මිශ්‍රණය | කාවින්ද රංගන

කොන්ඩා මෝස්තර | කුමුදු ළමාහේවා

නිෂ්පාදන සම්බන්ධීකරණය | නිමල් වික්‍රමසිංහ

නැටුම් අධ්‍යක්ෂණය | රේඛා ඇන්ජලීනා, පී. එම්. නන්ද කුමාර

පසුබිම් සංගීතය | සජිත් ඇන්ඩර්සන්, සම්පත් ප්‍රනාන්දු

ගීත රචනය | සුනිල් ධර්මසිරි, හර්ෂ උඩකන්ද

ගීත ගායනය | නොයෙල් රාජ්, චම්පා කල්හාරි, දිනූෂ දිසානායක, ශෂිකා

මධුශානි

විධායක නිෂ්පාදනය | මංජුලා ද සිල්වා, නිශාන්ත ප්‍රදීප්

නිෂ්චල ඡායාරූප | ප්‍රවීන් කුමාර

සංස්කරණය | එල්. යූ. කේ. ඩොෂ්

නිෂ්පාදන කළමනාකරණය | මහේෂ් වනිගසූරිය, චන්ද්‍ර සේකරන්

සහය අධ්‍යක්ෂණය | චාමර බලංගොඩ, සාදුනි ජයපත්මා සුභ්‍රමනි

තාක්ෂණික සම්බන්ධීකාරක | බුද්ධික මංගල

ලාල් වීරසිංහගේ දෙවන සිනමා සම්ප්‍රාප්තියට ආශිර්වාදයක් වන

මැයින් චිත්‍රපට ශාලාවන් වෙතටම සිය ළබැඳියන් සමඟම

ගොස් අරුමැසි සිනමා ආශ්වාදයක් විඳගන්නට ස්වදේශීය සිනමාලෝලී

න් හට ලෙන්ගතු සිත් පෙරදැරිව ඇරයුම් කර සිටින්නේ මතු ශ්‍රී

ලාංකේය සිනමාවලෝකනයේ ප්‍රභාෂ්වරය නෙතු ගැටෙන්නට හද

පුරාවට පතමිනි.

සැකසුම

හිරාන් ගමගේ