Category: Daily-Topics

පසුගිය සතියක දී මා විසින් අරඹන ලද මෙම කාලෝචිත ලිපිමාලාවේ අවසන් අදියරට අප පැමිණ සිටිනවා. ඉතින් ශීත සමයේ ත් අවසන් අදියරේ සිටින ඔබට රුව රැකගැනීම සඳහා වැදගත්වන කරුණු කාරණා මේ ලිපි පෙලෙන් සාකච්ඡාවූවා යැ යි මා සිතනවා.

ඉතින් අවසානයට අධික ශීතල නිසා නිතැනින් ම අපේ සිරුරේ නොයෙකුත් සෘණාත්මක වෙනස්කම් ඇතිවීමට ඇති ඉඩකඩ වැඩි යි. එබැවින් මේ කුඩා පුරුදු පුහුණුකිරීමෙන් ඔබේ සමට සහ ශරීරයේ ඇතිවන නොයෙකුත් අපහසුතා මඟහරවාගත හැකිවනු ඇත.

◦ ඔබ උදෑසන තේ පානය කරන්නෙක් නම් උදෑසන තේ කෝප්පයට ඉඟුරු ස්වල්පයක් එක් කරන්න. මේ සඳහා හැකි හැමවිට ම නැවුම් ඉඟුරු භාවිතකරන්න. නැතිනම් වියළි ඉඟුරු කුඩු ස්වල්පයක් නටන උණුවතුරට එක්කර මඳවේලාවක් වසා තබා පානය කරන්න. එමඟින් ඔබේ ශරීරයේ ප්‍රතිශක්තිය වර්ධනය කරන අතර දවස ම නැවුම් ව ගතකිරීමට ඔබට ඉඩ සලසා දෙනු ඇති.

◦ ඔබ ස්නානය කරන විට දී භාවිතකරන ෂැම්පූ සමඟ පොල්තෙල් ස්වල්පයක් මිශ්‍රකර සෝදා හරින්න.එමඟින් ඔබේ හිසකෙස්වල තෙතමනය සහ නිරෝගීබවත් නිතර හිස ආවරණය කිරීම නිසා ඇතිවන අධික වියළිබවත් දුරුකර මනා පෝෂණයක් ලබා දෙනු ඇති. අධිකව හිසකෙස් ගැටගැසීමෙන් වළකාලනු ඇති. 

◦ රාත්‍රීයේ නින්දට පෙර ගිතෙල්, මීපැණි, ඔලිව්තෙල් හෝ පොල්තෙල් දෙතොලේ ආලේප කර නින්දට යෑමෙන් අධික වියළිබවෙන් තොර මෘදු නිරෝගී දෙතොලක් ඔබට ශීත කාලයේ දී වුවත් පවත්වාගත හැකිවනු ඇත. 

◦ රාත්‍රියේ දී ස්නානයෙන් හෝ ඇඟ සෝදාහැරීමෙන් පසුව පොල්තෙල් , කෝමාරිකා සාරය හෝ කෝමාරික ජෙල් සමඟ මුසුකර මුහුණේ සහ අත්පාවල හොඳින් ආලේප කර පිරිමදින්න. එමඟින් සම වියැළීමෙන් වළකා අවපැහැ ගැන්වීමෙන්ද වළකාලනු ඇති. 

◦ රාත්‍රී නින්දට පෙර මෙන් ම මේස් පළඳින හැම විටක ම පිරිසුදුකරගත් යටිපතුළේ වැස්ලින් ආලේපකර මේස් පළඳින්න. එමඟින් දෙපතුල් වියළීමෙන් වළකාලන අතර එනිසා ම දෙපතුල් පැලීම නිසා ඇතිවන අපහසුතා ද මඟහැරී යනු ඇති.

◦ එසේ ම හැකි හැමවිට ම හෑන්ඩ් ක්‍රීම් එකක් භාවිතයෙන් දෙඅත්වල තෙතමනය පවත්වාගන්න අමතක කරන්න එපා එමඟින් සුමුදු දෙඅත්ලක් මෙන් ම අධික වියළිබව නිසා ඇතිවන අපහසුතා ද මඟ හැරෙනු ඇති. 

ඉතින් තවත් මෙවැනි ම වැදගත් ලිපිපෙළකින් ඔබව හමුවන බලාපොරොත්තුවෙන් අදට සමුගන්නම්. සුබ දවසක්!

සමීරා ජයසිංහ 

රොෂාන් විතාරණගේ  කියන්නෙ කවුද? ඔයාගෙම වචනෙන් කිව්වොත් සහ පවුලෙ විස්තර ටිකක් කිව්වොත්

රොෂාන් විතාරණගේ  කියන්නේ team එකක්. මම තනියම වැඩකරන කෙනෙක් නෙවෙයි.හැම මොහොතකම මගේ පිටුපස ශකිතිමත් කණ්ඩායමක් ඉන්නවා.එය හරිම අපූරු බැදීමක්. එකිනෙකට උදව්කරන, ශකිතියක් උන, මහා පෞරක් වගේ දෙයක්. අපිට හැමදාම සුන්දර දවස් තිබුනේ නෑ . අමාරු හැම අවස්ථාවකම එකට මුහුණ දීලා, පෙරට වඩා හොදින් ඉදිරියට යන්න අපිට හැකියාව ලැබුනේ මේ කණ්ඩායම් ශක්තිය .

මගේ පවුල ගැන කතකොලොත්, මගේ අම්මයි තාත්තයි දෙන්නම දැන් ජීවතුන් අතර නැහැ . මට සහෝදරයින් තිදෙනෙක් ඉන්නවා. ඔවුන් ජීවත් වෙන්නේලංකාවේ. මගේ බිරිඳ, දුවල දෙන්නා බ්‍රිතානයේ මා සමග ජීවත් වෙනවා. මගේ පවුල මට හැමවිටම ශක්තියක්.

BVS ගැන කතාකරොත්, එංගලන්තෙට ඇවිල්ලා තමන්ගෙම කියලා දෙයක් ආරම්භ කරන්න හිතුනද නැත්තම් වෙන කාගෙහරි අදහසක් එක්ක ආපු දෙයක් ද?

මට, මගේම කියල දෙයක් පටන්ගන්න හීන දැකපු කෙනෙක්.BVS කියන්න මටයි මගේ බිරිදටයි අපු අදහසක්. BIZVIZ Solutions කියලා  තමයි  අපි මුලින්ම 2010 දී  වියාපාර ලෝකෙට ඇතුල් උනේ. 2018 වෙනකොට අපි ගොඩක් දේවල් ඉගෙනගත්තා, අපිට පොඩි කණ්ඩායමක් සිටියා. අපිව විශ්වාස කරන පොඩි පාරිභෝගිකයින් පිරිසක් ගොඩනගාගන්නට හැකියාව ලැබුණා. ඒක බාධා මැදින් ආව සුන්දර ගමනක්. හැමදවසක්ම වෙනස් දවසක්. වෙනස්  පාරිභෝගික අවශ්‍යතා.වෙළඳපොල වෙනස් වීම්. කණ්ඩයමේ වෙනස් වීම්. මේ හැම  දෙයක්ම අපිව ඉදිරියට අරගෙන යන්න උදව් උනා. 

2018 දී අපි BVS Brand එක ස්ථාපිත කලා. එය BIZ VIZ Solution එකේ මුල් අකුරු තුන එකතුකරලා හැදුවේ. මම හීන දැක්කේ අලුත් දෙයක් වෙනස් විදියට කරන්න.BVS Brand එක හැදුණේ මගෙයි මගේ බිරිදගෙයි ඒ හීනේ ප්‍රතිපලයක් විදියට.අපි මුලින්ම Mortgage Industry එකට ඇතුල් වුණා. ඉන්පසුව Accounting practice එක BVS නමින් rebrand කලා. ඉන්පසුව BVS Legal , BVS Consultancy සහ BVS Digital Marketing business පටන් ගත්තා.ඉදිරියේදී තව බොහෝ දේවල් කරයි කියලා බලාපොරොත්තු තියාගන්න අපේ පාරිබෝගිකයන්ට පුලුවන්.

රොෂාන්ගෙ තියෙන දැනුමත් එක්ක එංගලන්තයේ වසර ගානක් Mortgage පැත්තට තිබුන පලපුරුද්දත් එක්ක තමන්ගෙ ව්‍යාපරයේ පුලුල්වීමක් අපි දැක්කා. ඒ ගැන කිව්වොත්

මම මේ පැනයට පිළිතුරු දෙන්න එංගලන්තයට එන්න කලින් මම ගැන කියලා ඉන්නම් . මම පොඩි කලේ ඉඳලා ක්‍රීඩා වලට ගොඩක් ඇලුම් කල කෙනෙක්. කණ්ඩායම් ශක්තිය ගැන කියලා දුන්නේ ක්‍රීඩා දිවිය කියලයි මට හිතෙන්නේ. මම උසස් පෙළ ගණකාදිකරණය විෂය ධාරාව හැදෑරුවේ. එය මට මුල්‍ය ශේෂ්ත්‍රයේ දැනුම දුන්නා. විශ්වවිද්‍යලට ගියේ Marketing ඉගෙන ගන්න.මේ Finance සහ Marketing දැණුම විශාල අතවැලක් උනා ව්‍යාපාර ලෝකයට ඇතුල් වෙන්න. 

එංගලන්තයට ඇවිත් මම වසර 7ක් London Real Estate Agency එකක Accountant කෙනෙක් විදියට වැඩකලා. 2014 වෙනකොට මට පුළුවන් උනා Professional Land Lord කෙනෙක් වෙන්න.මේ හැම දැනුමක්ම එකතු කරගෙන තමයි ව්‍යාපාර ලෝකයට ඇතුල් උනේ.

මගේ කණ්ඩායම තරුණ ජවයක් තියෙන, වෙනස් හැකියාවන් වලින් පිරුණ කණ්ඩායමක්. ඒක නිසා වියාපාරයෙ පුලුල්වීම ඉක්මන් උනා. අපේ team එකේ ශක්තියත් එක්ක අපි තව ඉදිරියට යයි.

ඔබගේ ව්‍යාපාර ජාලයට අපේ ලාංකිකයන්ගෙන් ලැබෙන ප්‍රතිචාරය ගැන කතාකරොත්.

අතිවිශිශ්ටයි. මම ඒ ගැන ගොඩක් සතුටු වෙනවා. අපි මුලින්ම ඉලක්‌ක කළේ ශ්‍රී ලාංකීය පාරිභෝගිකයින්. පසුගිය වසර 5 තුල ඉතා සාර්ථක ලෙස ඔවුන්ගේ විශ්වාසය දිනාගෙන, ඔවුන්ගේ අවශ්‍යතා උපරිමයෙන්ම සපුරාලන්නට BVS කණ්ඩායමට හැකියාව ලැබුණා. ඔවුන්ගේ නිර්දේශය තමයි අපේ ඉහලම වත්කම. මට සතුටින් සඳහන් කරන්න පුළුවන්, අපි ශ්‍රී ලාංකිකයින්ගෙන් ආරම්භ කරලා, මේවනවිට අනෙකුත් පාරිභෝගික ප්‍රජාවන් වලටත් සාර්ථක ලෙස සමීප වී තිබෙනවා. 

මගේ කණ්ඩයමේ ඉන්නෙ ශ්‍රී ලාංකියින්. ඔවුන් එංගලන්ත වෙළඳපොලෙන් ගන්න දැනුම, ශ්‍රී ලාංකිකයන්ට ගැලපෙන ආකාරයට රිසිකරණය කර ලබාදෙනවා. ඒනිසා ඔවුන්ගේ අවශ්‍යතා පහසුවෙන් ඉටුකරගන්න පුළුවන්. 

මම මගේ ශ්‍රී ලාංකිකයන්ට මුළු හදවතින්ම ස්තුති වන්ත වෙනවා අපිව විශ්වාස කර අපගේ සේවාවන් ලබාගැනීම පිළිබඳව. ඔවුන් දුන් ධෛර්යය මේ ගමන එන්න ගොඩක් උදව් උනා. ඔවුන්ගේ සහයෝගය ඉදිරියට එහෙමම බලාපොරොත්තු වෙනවා.

එංගලන්තයේ ජීවත්වෙන අපේ අයගේ මූලික වෙන දෙවල් තමයි ගෙයක හෝ ව්‍යාපරයක සිහිනය. ඒ සිහිනයට යන්න පුලුවන් කාටද සහ කොහොමද කියලා කෙටියෙන් දැනුවත් කරොත්

කෙටියෙන්ම කිව්වොත්  , ගෙයක සිහිනය විශාල ආයෝජනයක්, මම අවුරුදු 33 ක් rent එකට හිටියෙ. හරියටම අවුරුදු 20 කට කලින් ලන්කාවෙ 1 bedroom Rental flat එකක අපි 6 දෙනක් සිටියා. අමරු කාලයක්. තමන්ගෙම කියලා ගෙයක් තිබීම කියන සිහිනය මම හොදටම අදුරනවා. මේ සිහිනය හමෝටම ලගාකර දීම තමයි මගේ සහ BVS Mortgages කණ්ඩායමේ සිහිනය වෙලා තියෙන්නෙ.

ව්‍යාපාරයක් සාර්ථක කරගන්නවා කියන එකත් ගොඩ දෙනෙකුට තියෙන සිහිනයක්. ඒ සිහිනය හැමෝටම සැබෑ කරගන්න පුළුවන්, හැබැයි එකට ලොකු විශ්වාසයක්,  උනන්දුවක්, කැපවීමක් සහ සැලැස්මක් තියෙන්න ඕනේ.සමහර විට හොඳ මගපෙන්වීමක් තිබුනොත්, ඒ සිහිනිය සැබෑ කරගන්න තවත් පහසුයි. BVS Accounting කණ්ඩායම ස්ථාපිත කළේ අන්න ඒ මගපෙන්වීම අවශ්‍ය අයට ලබාදෙන්න. ඒක ටිකක් ගැඹුරින් කතාකරන්න අවශ්‍ය මාතෘකාවක්.  එකිනෙකාගේ සිහින වෙනස්. එකම සැලසුම හැමකෙනාටම ගැලපෙන්නේ නෑ. හැබැයි ඒ හැම හීනයක්ම සාක්ෂාත් කරගන්න පුළුවන් කියල මම නැවතත් කියන්න කැමතියි.

ව්‍යාපාර කටයුතුත් එක්ක ලංකාවෙ community එක රොෂාන් Handle කරන්නෙ කොහොමද?

ගොඩක් දෙනෙක් හිතන්නේ  ව්‍යාපාරයක  යෙදෙනවා කියන්නේ මුළු ජීවිතයම ඒවෙනුවෙන් යොදවන්න ඕනේ කියල. ඒක වැරදි වැටහීමක්. අපි සාර්ථක  ව්‍යාපාරිකයෙක්නම් හැමදෙයක්ම සමබර කරන්න පුළුවන් වෙන්න ඕනේ. මම මගේ කාලය ව්‍යාපාරයට, මගේ පවුලේ අයට, මගේ කණ්ඩායමට වගේම ශ්‍රී ලාංකික මිතුරන්ට සමබරව ලබාදෙනවා. අපි හැමමෝම ජීවත් වෙන්නේ උපන් බිමේ නෙමේනේ. ශ්‍රී ලාංකික මිතුරන් සමග කාලය ගෙවීම හරිම සතුටක්. අපේ කම තදින් දැනෙනවා. ඒගොල්ලන්ගේ අවශ්‍යතාවකට උදව් කරන්න ලැබුනාම හරි සතුටක් දැනෙනවා. මම පුළුවන් හැම වෙලාවේම ශ්‍රී ලාංකික මිතුරන් සමග ඉන්නවා. 

මම ඒ හැමදෙනෙක්ම ආදරයෙන් මතක් කරනවා. මොකද, ඒ හැමෝගෙම උදව්ව, සහයෝගය,විශ්වාශය මගේ මේ ගමන එන්න විශාල රුකුලක් උනා.ලන්කාවෙ community එකේ සහයෝගයට බොහොමත්ම ඉස්තුතියි.

අපි දැක්කා සමහර තැන්වලදි ඔයාගෙ ව්‍යාපරයත් එක්ක ඉන්න ලොකු Team එකක්. ඒ ගැන මොනවද කියන්න තියෙන්නෙ.

ඒ තමයි මගේ වත්කම, හයිය. මගේ කණ්ඩායම විවිධයි. වෙනස්  හැකියාවන් තියෙන, වෙනස් විදියට හිතන, හැමෝටම උදව් කරන කණ්ඩායමක්. ඇත්තටම මම හරි ආඩම්බරයි මගේ කණ්ඩායම ගැන. මට විශ්වාසයි අපිට ලොකු ගමනක් යන්න මේ ශක්තිය පිටුවහලක් වෙයි කියල.

අපේ විදියට ඇහුවොත්, ලංකාවෙ අපේ අයව ගොඩදාන්න පුලුවන් නම් ඔයාගෙ මගපෙන්වීමෙන් ඔයා කොහොම තැනකද ඉන්නෙ සහ රොෂාන් ගෙ ඉදිරි සැලසුම්

අනිවාර්යෙන්ම. ඕනෑකමක් තියෙනවනම්, මගපෙන්වීම කරන්න මම සුදානම්. මම පටන් ගත්තේ හරිම සුළුවෙන්. පියවරෙන් පියවර. මේ වසර ගණනක  අත්දැකීම් තව කෙනෙක්ගේ හීනයක්  සැබෑ කර ගන්න  උදව් වෙනවා දකින එක තමයි  මගේ සතුට. මම විවෘත ආරාධනාවක් කරනවා, අපිට කතාකරන්න, එක පියවරක් තියන්න.හෙටට කල්ද දමන්න එපා. හැමදාම පුංචි පියවරක්න්නෙ තියන්න ඕනෙ. දන්නේම  නැතුව ලොකු ගමනක් යයි.

අපිට ඉදිරි සලසුම් ගොඩක් තියෙනවා. ඒවා ඉදිරියේදී දකින්නට සලස්වන්නට team එක prepare වෙමින් ඉන්නවා.

මගේ අන්‍තිම ප්‍රශ්නෙ, අපි Magazine එක ගැන මොකද හිතෙන්නෙ

මට හිතෙන්නේ අපි Magazine එක එංගලන්තයේ සිටින ශ්‍රී ලාංකික ප්‍රජාව වෙනුවෙන් මහගු මෙහෙයක් ඉටු කරන්න උත්සහ කරනවා. විවිධ මාතෘකා ඔස්සේ අපේ රසිකයන්ට තොරතුරු ගොනුකර දෙනවා.ගයාන් සහ කණ්ඩායම දරන මේ වෑයම අගය කරනවා. අලුත් දෙයක් අලුත් විදියකට කරන්න හදන කණ්ඩායමක්. අපි ඔබලාට හදවටතින්ම සුබ පතනවා.

ශ්‍රී ලාංකේය අභිමානවත් සංස්කෘතිය පෝෂණය කිරීමෙහිලා නර්තන කලාව ඉටු කරන්නෙ සුවිශාල වූ මෙහෙවරකි. වසර 2500 කටත් එපිට ඓතිහාසික යුග වල දී පවා ශ්‍රී ලාංකේය නර්තන කලාව ප්‍රශස්ථ මට්ටමක පැවති බවට ඓතිහාසික මූලාශ්‍ර සාක්ෂි සපයයි. විජය කුමරුන් ලංකාවට පැමිණෙන විටත් ශ්‍රී ලංකාවේ ඉතා දියුණු සංස්කෘතියක් පැවති බවටත්, ඉතා ප්‍රශස්ථ මට්ටමේ ගායන, වාදන නර්තන කලාවක් පැවති බවටත් ඓතිහාසික තොරතුරු අධ්‍යනය කිරීමේදී ගම්‍යමාන වේ. රන් හා ලෝහමය බෙර තිබූ බවටත් සිය ගණනක් වූ වාද්‍ය භාණ්ඩ තිබු බවටත් රාජ්‍ය අනුග්‍රහය සහිතව මාස් පතා වැටුප් ලබමින් නර්තනය කළ ශිල්පීන් සිටි බවටත් අනුරාධපුර, පොළොන්නරු හා කුරුණෑගල ආදී ඓතිහාසික යුග අධ්‍යනයේ දී තොරතුරු හමුවේ. කෙසේ වෙතත් ශ්‍රී ලාංකේය නර්තන කලාව නර්තනය, ගායනය හා වාදනය පමණක් නොව බොහෝ අනු කලාවන්ගෙන් පෝෂණය වූ ඉතා විචිත්‍රවත් වූ අංග සම්පූර්ණ කලාවක් ලෙස තිබූ බව පෙනී යන්නේ එය අදටත් ලොව පුරා ප්‍රේක්ෂකයින්ගේ සිත් වසග කර අමන්දානන්දයට පත් කිරීමේ විස්මිත හැකියාවෙන් හා විවිධත්වයන් තුළින් පෝෂණය වීමේ සජීවී ගුණය හේතුවෙනි.

ඒ අනුව “තාලපූර්ණ” නම් රංගායතනය පූර්ණිමා රංග ශිල්පායතනය ලෙස 2000 වර්ෂයේ දී කලඑළි බසින්නේ නර්තනය පිළිබදව පිපාසාවෙන් පෙළෙන සුවහසක් ලාංකේය දුවා දරුවන්ට නර්තන අධ්‍යාපනය, රිද්මයේ අවකාශය හා ජීවන රිද්මය සොයා යාම වෙනුවෙනි. දරුවන් කිහිප දෙනෙකුගෙන් ආරම්භ කරන ලද මෙම ආයතනය පසුව දහස් ගණනක් වූ දරුවන්ට නර්තන අධ්‍යාපනය ලබා දෙන ප්‍රදේශයේ ප්‍රමුඛ පෙළේ අයතනයක් බවට පත් වන්නේ කාගෙත් ගෞරවාදරය දිනා ගනිමිනි. උඩරට, පහතරට, සබරගමු, භරත නාට්‍යම්, බෙර වාදනය, අංග රචනය, රංග වස්ත්‍ර නිර්මාණය, කැටයම් කලාව, ඡායාරූපකරණය හා අලෝකකරණය ආදී නර්තනය හා බැදි බොහෝ අනුෂාංගික කලාවන් පිළිබද දැනුමද දරුවන් වෙත ගෙන යනු ලබන්නේ නර්තනය පිළිබදව මනා අවබෝධයකින් හෙබි අභිමානනීය නර්තකයෙකු බිහි කරවීමේ අධිෂ්ඨානය ඇතිවය. තාලපූර්ණ රග පෙළහර 1,2,3,4 ලෙස දරුවන්ගේ කලඑළි මංගල්‍යය හා නර්තන ප්‍රසංග පවත්වමින් දරුවන්ගේ දක්ෂතා සමාජය වෙත ගෙන ගියේ විෂය ක්ෂේත්‍රයේ විදත් පිරිසගේ ඇගයුමට හා පැසසුමට ලක් වෙමිනි. වසර 22 කට ආසන්න කාලයක් ලාංකේය දරු දැරියන්ට නර්තනය පිළිබදව පමනක් නොව ජීවිතයට අවශ්‍ය රිද්මීය ජීවන කුසලතා ඉහළ නංවමින් උසස් අධ්‍යාපනය ක‍රා දරුවන් යොමු කරමින් එහිදී ද විද්‍යාර්ථීන් ලෙස ද ඔවුන් තව තවත් ඔසවා තැබීමට අමතක නොකොට ඇත.

2023 වර්ෂයේ එක්සත් රාජධානියේ ලිවර්පූල් නගරයේහී ශ්‍රී සම්බුද්ධ විහාරයේ දී පුණ්‍ය ආයතනයක් වශයෙන් තාලපූර්ණ ශ්‍රී ලාංකික නර්තන පාසල පිහිටවනු ලබන්නේ සංස්කෘතිය කෙරෙහි වූ ලබැදියාව නතර කරනු නොහැකි බවට නිදසුන් සපයමිනි. තම සංස්කෘතිය මිනිසුන්ගේ ලේ ධාතුවටම මුසු වී ඇති බව නොරහසක් වන්නේ ඒ පිට දේශයක වුව ද මතු වීමට පොර බදන නිසාය. තම මවු බිම හා සංස්කෘතිය කෙරෙහි උපන් ගෞරවය සෙනෙහස හා සෞන්දර්‍යාත්මක ලබැදියාව සනිටුහන් කරමින් තාලපූර්ණ දිගුව ලිවර්පූල් හැඩ කරන්නට විණි.

ශ්‍රී ලාංකේය සංස්කෘතිය තුළ ජන විඥානය එකලස් කිරීමේ දී පන්සල ඉටු කරන්නේ සුළු පටු කාර්‍ය්‍යක් නොවේ. මිනිසුන් එකාවන්ව එක් රැස් කිරීමේ ගෞරවය පන්සල සතුය. පන්සල යනු සංස්කෘතික කේන්ද්‍රස්ථානයකි. එය ලොව ඕනෑම තැනක සත්‍ය්‍යයක් බවට පත්ව ඇත. ලිවර්පූල් ශ්‍රී සම්බුද්ධ විහාරය ලාංකේය ජන ප්‍රජාව ඒකරාශී කෙරෙන සංස්කෘතික මධ්‍යස්ථානයකි. සීමා මායිම් නැති ආගමික සංස්කෘතික විවිධත්වය හා අසමානතා ඒකරාශී කර එකදු පහදු කරනා ස්ථානයකි.

ශ්‍රී ලාංකේය සංස්කෘතික බීජයන් රෝපණය කරනුවස් තාලපූර්ණ ශ්‍රී ලාංකික නර්තන පාසල පිහිටුවීමේහිලා ලිවර්පුල් සම්බුද්ධ විහාරයේ නායක ස්වාමීන් වහන්සේ ඇතුළු විහාරවාසී මහා සංඝරත්නයට හා විහාරස්ථ දායක සභාව විසින් ඉටු කරනු ලබන අනගිභවනීය මෙහෙවර ගෞරවණීයව සිහිපත් කරන්නෙමු.

පූර්නිමා රත්නායක සහ ප්‍රභාෂ් නිරංග යන ආචාර්‍ය දෙපළ යටතේ ශ්‍රී ලාංකේය දරු දැරියන් 40කට ආසන්න ප්‍රමාණයක් අද වන විට තාලපූර්ණයෙන් හැඩවේ. ඔවුන්ගේ ජිවීත වලට සංස්කෘතිකමයවූ අපේකම බිදෙන් බිද එක් වෙමින් මව් භාෂාවේ අරුමය කියාපාන්නේ ඔවුන්ටත් නොදැනීමය. ශ්‍රී ලාංකේය නර්තන කලාවන් හා වාදනය, ගායනය, ජන නැටුම, ජන සංස්කෘතිය ආදී බොහෝ කලාවන් හබා යන්නට අද ඔවුන් දක්ෂයෝය. පූර්ව ළමා වියේ පසුවන දරුවන්ගේ සිට විශ්වවිද්‍යාල අධ්‍යාපනය ලබන දරුවන් තෙක් සීමාන්තික නොවී නර්තනයේ නර්තන කලාවේ සුවපහස විදින්නේ තමන් තුළ අති රස වින්දන කුසලතාවය ද ඔප්නංවමිනි.

ශරීරය මාධ්‍ය කොටගත් නර්තන කලාව කිසි විටකත් නර්තකයාගේ අකමැත්තෙන් සිදු කළ නොහැක්කකි. ඒ සදහා නර්තකයා තුළ ශාරීරික මෙන්ම මානසික එළඹුමක් ද තිබිය යුතුමය. සුසමාහිත පෞර්ෂයකින් හෙබි දරුවන් බිහි කිරීමේහිලා නර්තන කලාව නිරායාසයෙන් පෙරමුණ ගන්නේ බොහෝ අනුශාංගික කලාවන්ගේ සුසං‍යෝගයෙන් ද සුපෝෂනය වී ඇති මහා වෘක්ෂයක් වීම හේතුවෙනි.

දරුවන්ට මානසික උත්තේජනයක් හා සංස්කෘතික ලක්ෂණ ලොවට පළදායී ලෙස කාන්දු කිරීමේ ප්‍රයත්නයේ අභියෝගය තාලපූර්ණයෙන් පටන්ගෙන අවසානය. එංගලන්තයේ ජීවත් වන හා මෙරට ඉපදී හැදී වැඩෙන දරුවන් තුළ තම මවු දේශයට හා සංස්කෘතියට ලොබ බැදීමට දරුවන් නිවැරදි ලෙස යොමු කරවන ශ්‍රී ලාංකේය මා පිය ප්‍රජාව විසින් සිදු කෙරෙන මහගු මෙහෙවර ප්‍රශස්තය. මෙම තාලපූර්ණ නර්තන පාසල දරුවන්ගේ ජාතික, සංස්කෘතික ආගමික හා භාෂාමය හර පද්ධතීන් මෙන්ම ශාරීරික හා මානසික වශයෙන් වූ විවිධ සෞඛ්‍ය සම්පන්නතා හදුනාගනිමින් ඒවා නර්තනය නම් වූ පොදු සාධකය තුළ ලඝු කිරීමේ මෙහෙවරෙහි නිරතව සිටී. 

තවද විශේෂකොටගෙන සදහන් කලයුත්තක්මැ වන්නේ, තාලපූර්ණ ශ්‍රී ලාංකික නර්තන පාසලේ 

දරු දැරියන්ගේ හා මා පිය ප්‍රජාවගේ අප්‍රතිහත ධෛර්යයේ මේ වන් තෙක් ඔවුන් කැටි කොට ගත් සංස්කෘතික රිද්මයේ දිගුවක් ලිවර්පූල් හී පෙළහර පෑමට වස්තු බීජයන් ඇති බවයි.

ප්ප්ඔප්එම සංස්කෘතික බීජ රෝපණයේ කූටප්‍රාප්තියක් ලෙස දරුවන්ගේ සමාජීය වගකීම් ඔවුනට කුඩා කල සිටම කා වැදීද්මේ අරමුණින් පුණ්‍යාතනයක් වූ තාලපූර්ණ නර්තන පාසලේ අරමුණ තීව්‍ර කරමින් තවත් පියවරක් ඉදිරියෙන් ඔසවා තැබීමට ඔවුන් සූදානම් වේ. ඒ තාලපූර්ණ නර්තන පාසල, ලිවර්පූල් ඇල්ඩර් හේ ළමා රෝහල හා අත්වැල් බැද ගනිමිනි. “Little hands – Big Hearts” නමින්, තම වයසේම දරුවන්ගේ හුස්මට සවියක් වෙමින් තාලපූර්ණ 2024 UK ප්‍රසංගය ඔවුන්ගේ සංස්කෘතික කළඑලි මංගල්‍යයක් මේ වසරේ පැවැත්වීමට සැලසුම් පෙරදැරි කරගෙන සිටී. ශ්‍රී ලාංකේය සංස්කෘතියෙන් උරුම වූ අනෙකා වෙනුවෙන් කැපවීමේ මහගු සිතිවිල්ල පෙරදැරි කරගෙන ඔවුන්ගේ මෙම පියවර ඔබ සියල්ලටම ඉතා විචිත්‍රවත් වූ ශ්‍රී ලාංකේය සංස්කෘතික මංගල්‍යයක් ලෙස පෙළහර පෑමට නුදුරේම නියමිතය.

 රීනා ද සිල්වා

 ඡායාරූප – අනුරුද්ධ ලොකුහපුආරච්චි

යේසුස් ඔබට ආදරෙයි!

(යොෂුවා 1:5)‬‬‬‬

"දිවි ඇති තාක් නුඹලාට විරුද්ධ ව කිසිවෙකුට නැඟී සිටින්නට නොහැකි

වන්නේ ය. මම මෝසෙස් සමඟ සිටියාක් මෙන් නුඹ සමඟත් සිටින්නෙමි. මම

නුඹ කෙරෙන් අහක් ව යන්නේ වත්, නුඹ අත්හරින්නේ වත් නැත."

මාගේ සෙනෙහෙවන්ත සහෝදර සහෝදරියනි අද දවසේ මා ඔබට පෙන්වන්නේ ජේසුස්

වහන්සේ ඔබව අත්නාරින ඔබෙන් අහක්ව නොයන බව පැහැදිලි කිරීමටය. ඔබ සැමටම

ආශිර්වාදමත් මාසයක් වේවා!.. දෙවිඳුන්ගේ බලවත් ප්‍රේමය අත්දකින දවසක් වේවා කියා

ප්‍රාර්ථනා කරමි!..

මාගේ ප්‍රේමවන්තයිනි සෑම මවක්ම තමන්ගෙ දරුවන් ගැන ඉතා ආදරයෙන් හා පිරී ඉතිරී

යන සෙනෙහසින් සලකන්නාක් මෙන් අපගේ ස්වර්ගික දෙවි පියාණන් වහන්සේ ද අපගේ

මව්වරු මෙන්ද ඊටත් වඩා ද අප ගැන සලකන සේක. එබැවින් ඔබගේ සිත

නොකැළඹේවා..අපගේ ස්වර්ගීය දෙවි පියාණන්ට මෙහෙවර කරන පිණිස බොහෝ

ස්වර්ගික දූත සේනාවක් සිටිති. නුමුත් උන්වහන්සේ අපිව පරීක්ෂා කරන්නටවත්, අපට

ඔවුන් ලවා ආඥා නියෝග ලබා දෙන්නවත් ඔවුන්ව පත් කර නොමැත. ඒ ගැන දේව

වචනයේ පවසන්නේ ඔවුන් ද අපගේ මෙහෙකරුවන් බවය. මක්නිසාද ගීතාවලිය 91:11

හී ලියා තිබෙන්නේ අපගේ සියලු මාර්ගවල දී අප ආරක්ෂා කරන පිණිස උන්වහන්සේ

ස්වකීය දූතයන්ට අප ගැන අණ දෙන බවයි. එම නිසා පුත්‍රකමේ ආත්මය ලැබූ ඔබ

මෙහෙකරුවන්ට වඩා කොපමණ උසස් ද කියා මදක් සිතන්න.

"ඔබ ගන්න සෑම පියවරක දී ඔබ රක්නා පිණිස, එතුමාණෝ සිය දූතයන්ට

අණ දෙන සේක."

මාගේ ප්‍රේමවන්තයිනි ඔබගේ ජීවිතයට පැමිණෙන ප්‍රශ්න, පීඩා, කරදර ඔබ බිය

නොවන්න මක්නිසාද දෙවි පියාණන් වහන්සේ ඔබ ගැන සලකන බව මෙනෙහි කරමින්

ඔබගේ සියලු කාරණාවලදී ඔබ උන්වහන්සේට යාඥා කරන්න.

(නික්මයාම 3:14)

"එවිට දෙවියන්වහන්සේ කථාකොට: මම යම්සේ සිටිම්ද එසේම සිටිමියි

මෝසෙස්ට කීසේක"

මෙසේ මෝසෙස් තුමාට පොරොන්දු වූ ජීවමාන දෙවි සමිඳාණෝ මේ

මොහොතෙදිත් ඔබ සමග සිටින සේක බැවින් උන්වහන්සේ ඔබගෙන් අහක්ව

යන්නේවත් ඔබව අත්නාරින්නේවත් නැත.

අදත් ඔබට ජය දවසක්…ඔබ සැමටම නැවතත් ප්‍රකාශ කරමි ඔබට ආශිර්වාදමත්

මාසයක් වේවා!..

ජේසු පිහිටයි!..

"සමිඳාණෝ පිළිතුරු දෙමින් මෙසේ වදාළ සේක: “මවකට හැකි ද, කුසේ දැරූ බිළිඳා

අමතක කරන්න? හැකි ද ඈට ඇගේ ම කිරි දරුවාට පෙම් නොකරන්න? මවක

ඇගේ දරුවා අමතක කළත්, මම නම්, කිසිදා නුඹ අමතක නොකරමි."

ඉවෙන්ජලිස්ත අමිල දිසානායක

මාර්ගය සහෝදරත්වය සභාව

මහරගම

එක්සත් රාජධානියේ ඉදිරි වසර සඳහා වූ අයවැය ලේඛනය පසුගිය බදාදා බ්‍රිතාන්‍යය චාන්සලර් ජෙරමි හන්ට් විසින් පාර්ලිමේන්තුවට ඉදිරිපත් කරනු ලැබුවා. බොහෝ විට මේ වසරේ අවසාන භාගයේදී මහමැතිවරණයකට මුහුණ දීමට බලාපොරොත්තුවෙන් සිටින වර්ථමාන රජයේ අවසාන අයවැය ලේඛනය විය හැක්කේ බදාදා ඉදිරිපත් කල අයවැය වන බැවින් බදු අඩුකරමින් සහ තවත් දීමනා කිහිපයක් වැඩි කරමින් ජනතාවට සහන රැසක් ලබා දෙන්නට චාන්සලර්වරයා කටයුතු කර තිබුනා. පක්ෂයක් ලෙස කොන්සර්වේටිව් පක්ෂය මැතිවරණයේදී යම් වාසියක් ලබාගැනීමේ බලාපොරොත්තුව මෙවර ලබාදුන් සහන වල සැඟවුණු කතාව බවයි බොහෝ දේශපාලන විචාරකයන් ප්‍රකාශ කරන්නේ.

අයවැය යෝජනා රැසක් අතරින් ප්‍රධානතම සහ ආකර්ෂණීයම යෝජනාව වූයේ පුද්ගලයන් විසින් ගෙවන ජාතික රක්ෂණය 2% අඩු කිරීමයි. පසුගිය සැප්තැම්බර් අයවැය ලේඛනය මගින්ද එවකට 12% ක්ව තිබූ ජාතික රක්ෂණය 10% අඩු කල අතර අප්‍රේල් මාසයේ සිට ක්‍රියාත්මක වීමට නියමිත නව අඩු කිරීම මගින් ජාතික රක්ෂණ ප්‍රතිශතය 8% බවට පත්වනු ඇති. ඒ අනුව £ 25,000 ක වාර්ෂික වැටුපක් උපයන්නෙකුට පවුම් 249 ක් පමණ වාර්ෂිකව ඉතුරු කල හැකි අතර £35,000 වාර්ෂික වැටුප් උපයන්නෙකු පවුම් 750 ක පමණ ප්‍රතිලාභයක් උපයනු ඇති.

ඊට අමතරව ආදයම් බදු ගෙවන ආදායම් සීමාවන් 2028 වසර දක්වා වෙනස් නොකිරීමටද අයවැයෙන් යෝජනා කෙරුනා. ඒ අනුව £50,000 දක්වා වාර්ෂික ආදායම් උපයන්නන් 20% බදු ගවිය යුතු ප්‍රතිශතය 2028 වසර දක්වා පවතිනු ඇති. එහෙත් එම යෝජනාව මගින් අනාගතයේදී වැඩි පිරිසකට ඉහළ බදු ගෙවීමට සිදුවෙතැයි අදහස් පළවෙනවා. අනාගතයේදී ආදායම් හෝ වැටුප් මට්ටම ඉහළ යාමට සාපේක්ෂව බදු ගෙවිය යුතු ආදායම් සීමාවන් ඉහළ නොයැම හේතුවෙන් මෙලෙස වැඩි පිරිසකට බදු ගෙවීමට සිදුවනු ඇති. ආර්ථික විද්‍යාඥයන්ගේ අනාවැකි වලට අනුව 2028 වසර වන විට තවත් මිලියන 3.7 ක ජනතාවකට අළුතින් බදු ගෙවීමට සිදුවනු ඇති.

අයවැය මගින් ලබාදුන් තවත් සහනයන් අතර දරුවන් වෙනුවෙන් ලබාදෙන දීමනාව ඉහළ දැමීමද වඩා ආකර්ෂණීය යෝජනාවක් වේ. ඒ අනුව මේ වන විට පවුලක පළමු දරුවා වෙනුවෙන් රජය විසින් සතියකට ගෙවනු ලබන £24 ක මුදල 25.60 දක්වා ඉහළ යනු ලබන අතර අමතර දරුවෙකු වෙනුවෙන් සතියකට ගෙවන ලද £15 ක මුදල 16.95 දක්වා ඉහළ දමා තිබේ. ඒ අතර ළමා දීමනාව ලැබිය හැකි දෙමව්පියන්ගේ අවම වාර්ෂික ආදායම් මට්ටම පවුම් 50000 සිට £ 60,000 දක්වා ඉහළ දමා තිබේ. ඒ අනුව වාර්ෂික කුටුම්භ ආදායම පවුම් 60000 දෙමව්පියන්ට පවා ළමා ප්‍රතිලාභ ලබාගත හැකි වේ. සමස්තයක් ලෙස 2024-25 වසර තුල පවුල් 485,000 ළමා ප්‍රතිලාභ ලබාගනු ඇතැයි රජය අපේක්ෂා කරයි.

පළමු වරට නිවසක් මිළදී ගන්නන් සඳහා කිසියම් ප්‍රතිලාභ යෝජනා ක්‍රමයක් අයවැය මගින් යෝජනා කරනු ඇතැයි බලාපොරොත්තු උවද ඒ සම්බන්ධයෙන් කිසිඳු යෝජනාවක් මෙවර අයවැය තුල ඇතුලත්ව නොතිබිනි. බ්‍රිතාන්‍යය මාධ්‍ය අනාවැකි පළකර තිබුනේ 99% නිවාස ණය ලබාදීමේ යෝජනාවක් අයවැයට ඇතුලත් වනු ඇති බවයි. එහෙත් ආර්ථික විශේෂඥයන් කල් තියාම අනතුරු අඟවා තිබුනේ එවැනි යෝජනාවක් අයවැයට ඇතුලත් උවහොත් ඉදිරි වසර කිහිපය තුල බ්‍රිතාන්‍යයේ නිවාස වෙළඳපොළ කඩාවැටෙනු ඇති බවයි.

වරක් භාවිතා කර ඉවත දමනු ලබන දුම්වැටි වර්ගයක් වන Vaping සඳහා 2026 වසරේ සිට නව බද්ධක් පැනවීමට අයවැයෙන් යෝජනා කල අතර ඒ අනුව එම දුම්වැටි වල මිළ ඉදිරියේදී ඉහළ යනු ඇති. ඒ අතර මත්පැන් සඳහා පනවා ඇති බදු ලබන වසරේ පෙබරවාරි දක්වා ඉහළ හෝ පහළ නොදමන බවට චාන්සලර්වරයා ප්‍රකාශ කල අතර ඒ අනුව ලබන වසර දක්වා බ්‍රිතාන්‍යයේ මත්පැන් මිළ ඉහළ නොයනු ඇති. 

දැනට බ්‍රිතාන්‍යයේ බදු ගෙවීමකින් තොරව පුද්ගලයෙකුට මුදල් ඉතිරි කල හැකි ස්ථාවර ගිණුම් හෙවත් ISA සීමාව පවුම් 20,000 සිට 25,000 දක්වා ඉහළ දැමීමට අයවැය මගින් යෝජනා කල අතර එම නව සීමාව ඉහළ යන දිනයක් තවමත් ප්‍රකාශ කර නොමැති වේ.

අයවැය අතර තුර හෙලිකෙරුනු තවත් වැදගත් කාරණාවක් වන්නේ මේ වන විට බ්‍රිතාන්‍යයේ පවතින උද්ධමනය මේ වසරේ ජුනි මාසය වන විට 2% දක්වා අඩුවනු ඇති බවත් එය ලබන වසරේදී 1.5% දක්වා අඩුවීමට නියමිතව ඇති බවත් වේ. අයවැය මගින් කරන ලද යෝජනා සහ පළකරන ලද ආර්ථික අනාවැකි ඒ ආකාරයෙන්ම ක්‍රියාත්මක වන්නේ නම් ලබන වසර ආරම්භව වන විට වඩා හොඳ ජීවන තත්වයක් උදාකර ගැනීමට බ්‍රිතාන්‍යයේ ජීවත් වන ජනතාවට හැකියාව ලැබෙනු ඇති.

තිලාන් ජයසේකර 

පසුගිය සතියක දී මා විසින් අරඹන ලද මෙම කාලෝචිත ලිපිමාලාවෙන් අද දිනයේ දී අධික සීත කාලයේ දී අපේ හිසකෙස් පිළිබඳව සැළකිලිමත් වන්නේ කෙසේ ද යන්න පිළිබඳව අපි කතාකරමු. 

හිසකෙස් කාන්තා, පිරිමි දෙපාර්ශවයට ම තමන්ගේ රුව පිළිබඳව සිතනා විට වැදගත් ම කොටසක් ලෙස හඳුන්වාදෙන්නට හැකි යි. ඉතින්, නොයෙකුත් පාරිසරික , කාලගුණික, සමාජයීය, සහ තවත් නොයෙකුත් හේතූන් ඔබේ හිසකෙස්වල වර්ධනයට,එහි නොයෙකුත් රෝගී තත්ත්වයන්ට සහ නිරෝගීබවටත් හේතු සාධක වනවා. මෙහි දී ලංකාව වැනි සෘතු භේදය දැඩිව නොදැනෙන රටක මෙන් නොව හිම පතනයවන අධික ශීත දේශගුණයක් ඇති රටක දී අපේ සමට සහ හිසකෙස්වලට මෙන් ම ශරීරයට ත් විවිධ සෘණාත්මක බලපෑම් ඇතිවන අවස්ථා ඉතා ම ඉහළ බැවින් නිතර නිවැරදි සත්කාර සහ රූපලාවණ්‍යය ම ය පුරුදු ඇතිකරගතයුතු වනවා. එසේනම් මූලිකව වම වැදගත්වන කරුණු එකිනෙක මා මෙහි දක්වන්නම්.

1. සතියකට කිහිපවරක් ඔබේ හිසට තෙල්සත්කාරයක් කරන්න.

හිසතෙල් ගැල්වීම ශ්‍රීලාංකික අපට ආගන්තුක කාරණයක් නොවුණත් අදවන විට අධික කාර්‍ය්යබහුල ජීවිත සහ නූතනවාදී ජීවනරටාවකට හුරු වී ඇති බහුතරයක් දෙනා අමතක කර ඇති වැදගත් ම සත්කාරයක් වන්නේ හිසතෙල් ගැල්වීම යි. බොහෝදෙනා තම පෙනුම සහ පෞරුෂය ගැන සැළකිලිමත්වන තරමට ම මෙවන් සත්කාර ගිලිහී යන්නටත් ඇති ඉඩකඩ ඉතා ම ඉහළ යි. එබැවින් ශීතකාලයේදී වෙනදාටත් වඩා ඔබේ හිසට සක හිසකෙස්වලට තෙල් සත්කාර අත්‍යාවශ්‍යය බව සිහිතබාගන්න.

පිරිසුදු පොල්තෙල්,ඔලිව් තෙල්, ආමන්ඩ් තෙල් වැනි වටිනා තෙල්වර්ගවල ඇති ඖෂධීය සංයෝග ඔබේ හිස්කෙස්වලට අවශ්‍යය පෝශණය ලබාදෙමින් හිස්කබලෙහි අධික වියළිබව නිසා ඇතිවන හිස් හොරි, පොතු ගැලවීම්, කැසීම් සහ වෙනත් එවැනි නොරිස්සුම් සහගත තත්ත්වයන් වැළැක්වීමට කටයුතු කර යි.එබැවින් සතියකට කිහිපවරක් එවැනි එක් තෙල් වර්ගයක් හෝ තෙල් මිශ්‍රණයක් මඳක් රත්කර හිස්කබලෙහි ගල්වා ඇඟිලි තුඩු මඟින් ඉතා ම හොඳින් මෘදුව සම්බාහනය කරන්න. අව ම විනාඩි දහයක් පමණ මෙසේ තෙල් ගල්වා සම්බාහනය කිරීමට වගබලාගන්න.එමඟින් හිසකෙස් මූලය ශක්තිමත් කරමින් රුධිර සංසරණ පද්ධතිය උත්තේජනය කිරීමටත්, ඔබේ ආතතිය සහ අනෙකුත් හිසකෙස් සම්බන්ධ අහිතකර තත්ත්ව පාලනය කිරීමටත් මහත් පිටිවහලක් ලබාදෙනු ඇත. තෙල් ගල්වා සම්බාහනයෙන් පැයකට පමණ පසුව ඉතා ම මඳ උණුසුම් වතුරෙන් අවශ්‍යය නම් පමණක් ෂැම්පු කන්ඩිෂනර් භාවිතකර සෝදාහරින්න. 

2. නිතර හිස සේදීමෙන් වළකින්න

මෙය සරලව ම දිනපතා නෑමෙන් වළකින්න යනුවෙන් අපට තේරුම්ගන්නට හැකි යි. දිනපතා ස්නානය අපේ පිරිසුදුකමට ඉතා වැදගත් වුවත් එහි අහිතකර තත්ත්වයක් ඔබේ හිසට , හිසකෙස්වලට, සහ ශරීරයට බලපානබව ඔබ දැන සිටියා ද? ඔව්, අපේ සමෙහි සහ හිස්කබලෙහි මෙන් ම හිස්කෙස්වල ස්වාභාවිකව ම පවතින හිතකර මෘදුකාරක කොටස් දිනපතා ෂැම්පු සහ සබන් භාවිතයෙන් ඉවත් වේ. ෂැම්පූ , සබන් සෑම දෙයක ම ඉහළ රසායනික සංයෝග පවතින අතර එමඟින් ශරීරයට හිතකර, ස්වාභාවික පවතින තත්ත්ව ඉවත්කරමින් නොයෙකුත් ගැටළු ඇතිකරන්නට හේතුවේ.  එනිසා තරමක් අපහසුවෙන් වුවත් දිනපතා හිසකෙස් සේදීමෙන් ඈත්වීම ඔබේ යහපතට ම හේතුවනවා ඇත.

3. නිවැරදිව කන්ඩිෂනර් භාවිතකරන්න

හිසකෙස් ෂැම්පූ යොදා සේදීමෙන් අනතුරුව හැමවිට ම ස්වාභාවිකත්වයට ළඟ , ස්වාභාවික ද්‍රව්‍යය අඩංගු මෘදු එමෙන් ම ඉතා හොඳින් හිසකෙස්වල තැවරිය හැකි කන්ඩිෂනර් වර්ගයක් යොදා සෝදාහරින්න. එමෙන් ම ඒ කන්ඩිෂනර් සහ ෂැම්පූ ඔබේ හිසට, සමට සුදුසු ම වර්ගය බව තහවුරුකරගැනීම අනිවාර්‍ය්ය කාරණාවක් බව අමතක කරන්න එපා.

4. නිතර ම ඉහළ උණුසුමකට රත්වුණු කොණ්ඩා මෝස්තර උපකරණ සහ ඒ ආශ්‍රිත නිෂ්පාදන භාවිතයට ගැනී ම අව ම කරන්න.

අද කාලයේ හිසකෙස්වල රැලිගතිය ඉවත්කරන්නට හෝ හිසකෙස් කෘතිමව රැලිකරන්න හෝ වෙනයම් කොණ්ඩා මෝස්තර සඳහා ඔබ අධික උණුසුමකින් භාවිතයට ගතයුතු කොණ්ඩා මෝස්තර උපකරණ (hair straightener, hair dryer or styling tools ) භාවිතයට ගන්නා අයෙකු නම් හැකි හැමවිට ම ඒ උපකරණ සහ නිෂ්පාදන භාවිතය අව ම කරන්න. දිනපතා එවැනි උපකරණ භාවිතයෙන් අධිකව ඔබේ හිසකෙස් සහ හිස්කබලට අහිතකර බලපෑම් එල්ලවන අතර ඉන්සමහර අවස්ථාවක දීර්ඝකාලීනව බලපෑ හැකි හානි ඔබේ හිසට සහ කෙස් කළඹට සිදුවිය හැකි අවස්ථා විරල නොවේ.

5. නිවසින් පිටවන හැම අවස්තාවක දී ම හැකි හැමවිට ඔබේ හිසකෙස් ආවරණය කරගන්න

අධික ශීතලට නිරාවරණය වන ඔබේ හිස කෙස් සහ හිස් කබල ඉතා ඉක්මනින් අධික වියළිබවට පත් වේ. එබැවින්  හැමවිට ම ඔබ නිවසින් පිටත් ඇවිද යනවිට දී හිසකෙස් ආවරණය කරගැනීමට මතක තබාගන්න. සැටින් හෝ සිල්ක් ලේන්සුවකින් පළමුව හිස ආවරණයකර අනතුරුව වූල් හෝ එවැනි අමුද්‍රව්‍යයවලින් නිමවූ හිස්පළඳනා පැලැඳීමෙන් නිතර සිදුවන අපහසුතා මඟහරවා ගත හැක. එසේ ම එම පියවරට පෙර ඔබට සුදුසු තෙල් මිශ්‍රණයක් හෝ තෙල්වර්ගයක් ස්ප්‍රේ කිරීමෙන් තවදුරටත් හිසකෙස් අපහසුතාවලින් තොරව ආරක්ෂා කරගැනීමට හැකිවනු ඇත.

6. තද උණුජලයෙන් ස්නානය කිරීමෙන් වළකින්න.

ශීතකාලයේ දී උණුජලය භාවිත නොකිරීමෙන් ඇතිවන අපහසුතා මා මෙහි දී කිවයුතු නෑ.ඔබ සැවො ම ඒ ගැන හොඳින් ම දන්නා නිසා.එහෙත් නිතර, දිනපතා උණු ජලය භාවිතයෙන් සේදුම්කිරීම නිසා හිස ද අධිකව වියළිභාවයට පත්වනු ඇත. එසේ ම හිසේ සහ සමේ ඇති හිතකර ස්වාභාවික තෙල් තට්ටුව ද එමඟින් වියැකී යන නිසා මඳ උණුසුම් වතුර නැතිනම් ඇල්මැරුණු දියෙන් ස්නානය කරන්නට වගබලා ගන්න. එමෙන් ම සතියට දෙවරක්වත් (ඔබ දිනපතා ස්නානය කරන අයෙක් නම්) deep hair conditioning හෝ hair mask එකක් භාවිත කරන්න.එමඟින් කොණ්ඩය අධිකව වියැලීමෙන් වලකා කෙස්කළඹ නිරෝගීව පවත්වාගැනීමට උපකාරවනු ඇති.

ඉතින් මෙයට අමතරව හැකිතරම් ජලය පානය කිරී ම ත්, සමබල ආහාරවේලකට දිනපතා හුරුවීම ත් ඔබේ හිසේ සහ හිසකෙස්වල නිරෝගී පැවැත්මට මහත් රුකුලක් වනු ඇති.

ඉතින් අද ත් ඔබට වැදගත්වන කරුණු බොහොමයක් මේ ලිපිපෙළින් ඉදිරිපත් කිරීමට ලැබී ම සතුටක්! 

ඔබ සැම දෙනාට ම සුබ දවසක් !!

සමීරා ජයසිංහ