Author: Digital My Business

නරක සොරා

Posted on | by Digital My Business

ගෙදර හාල් ඇටයක් නෑ..ළමයගේ පංති ගාස්තු ගෙවාගන්න විධියක් නෑ. මොකද්ද මේ ජීවිතේ ? තමුසෙ ඉතින් උඩ බලාගෙන ඉන්නවා..

කෑ ගහන්න එපා උදේ පාන්දර..මොකක් හරි කරන්නම් ඉන්න..( එසේ කියමින් ව්‍යාකූල මනසින් යුතුව රන්සිරි ගෙදරින් පිටත් විය. )

ආහ්..‍රන්සිරි..උදේම මොකෝ මේ ?

ගෙදරින් බර බරේ බං..බැරිම තැන එළියට බැස්සා..මුකුත් වාසියක් නැද්ද බං ?

මොන වාසිද බං ? අපේ ගෙදරත් ඕකම තමයි..කණක් ඇහිලා ඉන්න බෑ..

මෙහෙම ගියොත් පාරට බහින්න තමයි වෙන්නේ බං..

මේ ඒක නෙවෙයි, අර වංගුවේ ගෙදරට අළුතෙන් කට්ටියක් ඇවිල්ලා..( බෝක්කුව උඩ සිට කුරුඳු දණ්ඩකින් දත් වහල්ල මදිමින් සිටි ගජනායක කීවේය. )

ඇත්තද ?

ඔව්..දැන් මාසයක් විතර වෙනවා..

පේන්න ගෑනු දෙන්නෙක් විතරයි ඉන්නේ..

එහෙමද ? උඹ කොහොමද දන්නේ ? ( රන්සිරි කුතුහලයෙන් මෙන් ඇසුවේය. )

මම දන්න මගුලක් නෑ බං..ඔය ටික කිව්වෙත් අපේ ගෑනි..සල්ලි බාගෙ එහෙම තියෙනවලු..සුදු පාට ලොකු වාහනයක් දවසගානේ එනවලු ගෙදරට..ගෙදර ලොකු ගෑනු ළමයා බලන්න වෙන්න ඇති..ලස්සන කෙල්ල..පාරේ යන ඕනම කෙනෙක් එක්ක හිනාවෙනවා..සිරියාවන්ත කෙල්ල..

අම්මද බොල..උඹේ ගෑනි ජාතකේම දැනගෙනනේ..

උන්ට වෙන වැඩක් නෑනේ බං..හ් හ් හා..

ඒක ඇත්ත.. ( රන්සිරිගේ සිතේ සල්ලි බාගෙ තියෙනවා කියූ කතාව සහ ගෙදර ඉන්නේ ගෑනු දෙන්නෙක් විතරක් යන කතාව පලපැදියම් විය. )

එදා මොරසූරන වැසි දවසක්..කළු පැහැති ඇඳුමකින් සැරසුණු රන්සිරි කළු පාටින්ම රෙදි කඩක්ද රැගෙන පාන්දර 2.30ට පමණ ගෙදරින් පිටවිය. රන්සිරිගේ බිරිඳ සහ පුතා තද නින්දේ පසුවිය. විටින් විට දැල්වූ ටෝච් එළියේ ආධාරයෙන් රන්සිරි පෙර කී වංඟුවෙ ගෙදරට සේන්ඳු විය.

පිළිකන්න පැත්තෙන් ගෙදරට ගොඩ වෙන්න පුළුවන්ද කියලා බලන්න ඕන ( රන්සිරි සිතන්නට විය. )

තිත්ත කළුවරත්, මහ වරුසාවත් ගෙයක් බිඳින්නටම කියාපු වෙලාවක් සහ අහල පහල කිසිවෙකුට කිසිම සද්දයක් නොඇසෙන නිසාවෙන් රැගෙන ආ රෙදි කඩෙන් මුව බැඳගත් රන්සිරි පිළිකන්නේ දොරට ගැසූ පා පහරින් එතරම්ම ශක්තිමත්ව සකසා නොතිබූ දොර විවර විය. 

ඈහ්..තවත් දොරක්..රන්සිරි විස්මිත විය. 

තාවකාලිකව ඉදිකර තිබූ කුස්සිය ගෙදරට සම්බන්ධ කර තනා තිබූ නිසා එම කුස්සියෙන් ඇතුළත් වූ අයෙකු තවත් දොරක් විවර කරගෙන ගෘහයට ඇතුළත් විය යුතුය. 

මේක නම් අරින එක ලේසි නෑ..වහලේ උළු දෙක තුනක් බාගැනීම නුවණට හුරු යැයි සිතා කුස්සියේ දුම් කවුළුව දිගේ උඩට යෑමට තැත් කරනවාත් සමඟම..

ක්‍රෑස්…ක්‍රෑස්… දොර විවර වන ශබ්දය රන්සිරිට ඇසිණි. 

ලලයි ලිලයි ලයි..සිසිලයි..සුළඟයි..ලලයි ලිලයි ලයි සිසිළයි..සුළඟයි..

මේ රෑ දෙගොඩහරියේ සින්ඳු මුමුණන්නේ කවුද යකෝ ? ඒකත් ගෑනු කෙනෙක්..( රන්සිරි දුම් කවුළුවේ බිත්ති හතරේ නිසොල්මන්ව ‍රැඳී සිටිමින් ඇහුම්කන් දුන්නේය..)

දුහුල් සළුවකින් සැරසී සිටි ඉටි රූපයක් බඳු ලලනාවකගේ ඡායාව ජනේලය මතින් වැටෙන හඳ එළිය තුළින් රන්සිරි දුටුවේය. ඇය හරිම සැහැල්ලු මනසකින් සිටින වගද පෙනෙන්නට විය. 

කූල් පෙට්ටිය ඇර ජෑම් බෝතලයක් සහ පෙති කපන ලද පාන් ගෙඩියක් ගත් ඈ පාන් පෙති දෙකක ජෑම් තවරනු රන්සිරි බලා සිටියේය. ඒ සමඟම..

ස්‍රාස්..දඩං…#%***€€£|%]£]£!\££**..

දුම් කවුළුවේ අසීරුවෙන් රැඳී සිටි රන්සිරි එකවරම රූටාගෙන වැටිණ. හට්ටි මුට්ටි පෙරළගෙන බිමටම ඇද වැටුණි..

හ් හ් හා..හ් හා හා….හ් හ් හා හා.. මහ හයියෙන් සිනාවකි..

රන්සිරිට සිදුවූයේ කුමක්දැයි අදහාගත නොහැකි විය. වැටුණ එකටත් වඩා හිනාව ගැනය.

මම දැනගත්තා එයි කියලා..නරක සොරා..

මො..මො..මොකද්ද නෝනා..?

නෝනා නෙවෙයි අනේ මම ඔයාගේ ශෝනා..

පිටිපස්සෙන් ආවේ ඇයි අනේ ඉස්සරහෙන් එන්න තිබ්බනේ..ලැජ්ජයි නේ ? මමී ඉන්න නිසා..මම මමීට කිව්වා ඔයා කොයි වෙලාවේ හරි එනවා කියලා.

හෑ..මො..මො..ම..මම..මම එනවා කියලා..?

( වඳින්න ගිය දේවාලේ ඉහේ කඩං වැටුණාක් මෙන් රන්සිරිට හැඟෙන්නට විය. )

ඔව් අනේ..හරි හරි එන්න මම ඔයාට ජෑම් එක්ක පාන් කවන්නම්..

ඔයා ස්ට්‍රෝබෙරි ජෑම් කන්න ආසයිනේ..මම දන්නවා..

මම..මේ..මේ..මම..( මොන ජෑමක්ද හත්තිලව්වේ..අපි කන හැටි ලිපා දනී.. රන්සිරි තමාටම කියාගත්තේය..)

මෙන්න මෙහෙ එනවා නරක සොරා..( බිම වැතිර හිඳගෙන සිටි ශෝනා හිල් කරන ලද පොල් කට්ටකින් පොඩි එකෙකුව හරහට දා නාවන්නාක් මෙන් රන්සිරිව තමා වෙත ඇද හිස උකුළෙහි හොවාගෙන ජෑම් තැවරූ පාන් පෙත්තක් කවන්නට වූවාය. 

රන්සිරිට බිව් රන් කිරි සිහි විය. ජෑම් සමග පාන් කනවාට වඩා රන්සිරිට ඇගේ දුහුල් සළුවේ සුසුනිඳු බව දැනෙන්නට විය. මොර සූරන වැස්සක, තිත්ත කළුවරක, හඳ එළියක, හිරි ගඩු පිපෙන සීතලක, සුන්දර ලඳකගේ ඔඩොක්කුවේ හිස තබාගෙන ස්ට්‍රෝබෙරි ජෑම් තැවරූ පාන් කෑල්ලක් කන්න ලැබෙන එක සොරකම් කර ලැබෙන සොච්චමට වඩා කෙතරම් අගනේද යන්න රන්සිරිගේ යටි හිත කියයි. 

තව ඕනද වස්තුවේ ? 

ආහ්…ආහ්.. හා හා තව කෑල්ලක් කමු එහෙනම්..

අන්න මගේ හොඳම නරක සොරා.. ඉන්න මම ජෑම් ගාන්නම්..

පසුදා උදෑසන..

රන්සිරියා අද මොකද නැත්තේ..? ( ගජනායක මුමුණන්නට විය..)

අපි යමු උගෙ ගෙවල් පැත්තට..

ඔව් යමු..

රන්සිරි…රන්සිරි..

ආහ්හ්.. එයා නිදි.. ඉන්න මම ඇහැරවන්නම්..

ආහ්..ගජේ..මොකද මේ ? රන්සිරි එළියට විත්..

නෑ ඉතින් උඹ අද ඒ පැත්තට ආවේ නැති නිසා අපි ආවේ..මොකෝ ඔය මූණේ දැලි ගෑවිලා..?

දැලි..? ( ක්ෂණයෙන් මුහුණ පිසදා ගනිමින්..) නෑ නෑ ඊයේ නින්ද ගියේ නෑ බං..එළිවෙන ජාමේ තමයි නින්ද ගියේ..

මේ ඒක නෙවෙයි…අද පාන්දර එක විජ්ජුම්බරයයි අර වංඟුවෙ ගෙදර..

ඈහ්…ඇයි මොකද ?

අපේ ගෑනි ඉතින් ඇහැ ගහගෙනනේ ඉන්නේ ඒ පැත්ත දිහා..

රන්සිරි ඇස් ලොකු කරගෙන කෙළ ගිල්ලේය.

මො..මොකද වෙලා තියෙන්නේ ?

ඊයේ ඒ ගෙදරට හොරෙක් පැනලා..

හො..හො..හොරෙක් ?

ඔව් ඔව් හොරෙක්..

ඉ..ඉ..ඉතිං ?

ඒ ගෙදර ලොකු කෙල්ල..අර මං කිව්වේ සීදේවි කෙල්ල..

ඔව් ඔව් මං දන්නවා ( එකවරම රන්සිරිට කියැවිණ..)

උඹ දන්නවද ?

නෑ නෑ මම දන්නේ නෑ..උඹනෙ එදා මට කිව්වේ..

ආහ් ඔව් ඔව්.. ඒ කෙල්ලට ඔල්මාදෙලු..අර සුදු වාහනයක් නිතරම එන්නේ දොස්තර මහත්තයෙක් ඇවිත් බෙහෙත් කරනවලු. අද පාන්දර ඔල්මාදෙ හොඳටම තද වෙලාලු.. නරක සොරා මට ඕන..නරක සොරා මට ඕන කිය කිය බෙරිහන් දෙනවලු.. වත්ත වටේ දුවනවලු.. එහා ගමටත් දුවලා අද උදේ..මේ පැත්තටත් එන්න බැරි නෑ..

ඈහ්..මේ පැත්තට ? ගජේ මට හරි නිදි මතයි..හවස හම්බවෙමුද ?

ආහ්..හරි හරි..අරකි මේ පැත්තට ආවොත් කෝල් එකක් ගහපන් හරිද ?

ආහ් හරි හරි..මම කියන්නම්..

මේ රන්සිරි හොඳම එක කියන්න බැරි වුණානේ..

මොකද්ද ?

අර ආපු හොරා ඒකිත් එක්ක ජෑමුයි පානුයි කාලා ගිහින් තියෙන්නේ..

චරියාගේ පන්හිඳ

ඔයත් Cyber Bullying වලට ගොදුරු උණාද?

Posted on | by Digital My Business

අපි හැමෝම ලොකු කුඩා භේදයක් නැතුව මේ කාලෙදි සයිබර් අවකාශෙ පාවිච්චි කරනවා. ඒ අතරිනුත් Social media (සෝෂල් මීඩියා) කියන්නෙ අපි නිතරම බලන, ගත කරන තැනක්. ෆේස්බුක්, යූටියුබ් කියන දේවල් දැන් බහතෝරන කාලෙ පොඩි දරුවෙක් උනත් දන්නවා. ඉතින් මේ Social media වල හොඳ පැත්තක් වගේම නරක පැත්තකුත් තිබෙන බව අපි හැමෝම හොඳින්ම දන්නවා. අද මම මේ ලිපියෙන් ඔබත් සමග කතා කරන්නේ, මේ Social media වලින් අපිට වෙන්න පුළුවන් නරකම දෙයක් ගැන. ඒ තමයි Bullying වලට ලක්වීම එනම් අයුතු ලෙස හිරිහැරයට ලක් වීම. මෙහෙම උන කෙනෙක් දැඩි ලෙස මානසික කම්පනයට ලක් වෙනවා. එයින් ඔහුගේ හෝ ඇයගේ ජීවන ගමන කෙළවර වෙන්න උනත් පුළුවන්.

ඇත්තටම මොකක්ද මේ Cyber bullying කියන්නෙ? මේකෙන් අපිට සිද්ධ වෙන්නෙ මොකක්ද? කියලා ගොඩක් දෙනෙක්ට ලොකු වැටහීමක් නැහැ. ඔබ සයිබර් අවකාශයට එක් කරන යම්කිසි පෝස්ට් එකක්, වීඩියෝ එකක්, ඕඩියෝ එකක්, ඔබට යම් කිසි අපහසුතාවයක් ඇති කිරීමේ අරමුණින් යම්කිසි පුද්ගලයෙක් හෝ පුද්ගල කණ්ඩායමක් ව්කෘති කර පතුරවාලීම මෙහිදී සිදු වෙනවා. තවද ප්‍රේම සම්බන්ධතා කඩ වීමෙන්, යහළුකම් පලුදු වීමෙන් පසු පළිගැනීමේ චේතනාවෙන් ද සමහර පුද්ගලයන් නිරුවත් චායාරූව, වීඩියෝ සහ නැවත සකසන ලද (Edited) චායාරූප සහ වීඩියෝ මේ සයිබර් අවකාශයට එක් කරන්නටත් පුළුවන්.

මේ ඕනෑම ආකාරයකින් ඔබ bully වීමකට ලක් වෙන්නට පුළුවන්. අපි මෙහෙම උදාහරණයක් ගනිමු. ඔබට ඔබ ළඟින්ම ආශ්‍රය කරන කෙනෙක්ගෙන් එන ඇමතුමකදී…

“හෙලෝ, මේ ඔයා දාපු පෝස්ට් එකක් මෙහෙම edit කරලා share වෙනවා. හැමතැනම” කිව්වොත් ඔබට මොකක්ද හිතෙන්නෙ?

‘මම දැන් මොකද කරන්නෙ?, මම ඉවරයි, මම කොහොමද දැන් සමාජෙට මුහුණ දෙන්නෙ?” වගේ සිතුවිලි සමුදායක් ඔබේ සිතටත් එන්නට එක නිමේෂයක් ඇති. ඊට පස්සෙ හතර වටින්ම ඔබට දෝෂාරෝපණ එන්නට ගනීවි. සමහරුන් බනින්නටත්, සමහරුන් හොඳ කියන්නටත් පටන් ගනීවි. ඔබ මේ සිදුවීම් දිහා බල බලා අඬාවි. දොඩාවි. වැළපේවි. ඇත්තටම ඔබ මොකක්ද කරන්න ඕනි?

මෙහෙම දෙයක් උනාම මුලින්ම ඔබ කලබල වෙන්නට එපා. ඔබ ඔබව විශ්වාස කරන්න. ඔබ වරදක් කරේ නැත්නම් ඒ විශ්වාසයම ඇය්හි ඔබට දිනන්න. ඊට පස්සෙ ඒ share වෙන දේවල් වලට, ඒ ගැන දාන comments වලට, මැසේජ් වලට reply කරන්න යන්න එපා. කොටින්ම කිව්වොත් ඒවා බලන්නවත්, ඒවා ගැන හිතන්නවත් ඔබේ වටිනා කාලය නාස්ති කරන්නම එපා. ඔබේ ළඟින්ම ඉන්න අම්මා, තාත්තා, සහෝදරයා, සහෝදරිය, පෙම්වතා හෝ පෙම්වතිය, සැමියා හෝ බිරිඳ මේ ගැන දැනුවත් කරන්න. හැකි නම් ඔබ වැඩ කරන තැන අයවත් දැනුවත් කරන්න. ඔවුන් ඔබට කිසියම් ඍණවාදී දෙයක් කිව්වේ නම්, නෙගටිව් කමෙන්ට්ස් දුන්නේ නම් ඒවා නිවැරදි කරන්න යන්න එපා. ඔබ ඔබේ ගමන යන්න පටන් ගන්න.

ඔබ දන්නවාද? අපේ රටේ විතරක් නෙවෙයි, කෝලෙ පුරාම ඕනෑ තරම් ප්‍රසිද්ධ ජනප්‍රිය පුද්ගලයන් නිරන්තරයෙන්ම මේ bully වීම් වලට ලක් වෙනවා. ඒ හින්දා ඔවුන්ගේ ජීවිත ඔවුන් නතර කර ගන්නේ නැහැ. ඔහු හෝ ඇයව bully කරන්නට ක්ටියාත්මක වූ ඇඟිලි වලින්ම ඔවුන්ට අත්පොළසන් දෙන අවස්ථා දක්වා රැගෙන යන්නට ඔවුන්ට හැකි වෙලා තිබෙනවා. ඉතින් ඔබ ඇයි ජීවිතේ එතැන නතර කරන්නෙ?

තමන්ව විශ්වාස කරලා, ඔයත් වැඩ කරන්න පටන් ගන්න. ඔයාගෙ style එකකට. සාමාන්‍ය විදිහටම Social media පාවිච්චි කරන්න. ඇවිදින්න. හැකි තරම් ඔබ සතුටින් ගත කරන ජීවිතේ ඔවුන්ට පෙන්වන්න. ඒවට වැටෙන කමෙන්ට්ස්, මැසේජ් බලන්න යන්න එපා. ඔය bully කිරීම් කරන අය දිනන්නෙ ඔබ හැංගුනොත්. ඒ හින්දා හැංගෙන්න එපා. පුළුවන් තරම් වැඩ කරන්න. සමාජයෙ ඉන්න. එතකොට ඔවුන්ට තේරෙනවා ඔබව වට්ටන්න බෑ කියලා. ටික දවසකින් ඒ දේවල් මග හැරිලා යනවා. ඒ වෙද්දි ඔබ ඔබේ ජීවිත ගමන යන්න ඕනි.

මතක තියාගන්න. ‘සෑම අඳුරු වළාකුළකම රිදී රේඛාවක් තිබෙනවා’. ඒ රිදී රේඛාව හොයාගන්න ඕනි ඔයා. මේ වගේ අවස්ථාවක ඔබ ඔබේ රිදී රේඛාව හොයා,ගත්තොත්, ඔබේ දියුණුව නවත්වන්න කිසිම කෙනෙක්ට බැහැ.

තවදෙයක්. ඔබ වෙන කෙනෙක්ට හිරිහැරයක් කරන්නට සිතන් වෙන අයෙක්ව bully කරන කෙනෙක් නම් මේ ටිකත් හිතට ගන්න. ඔබට, ඔබේ මවට පියාට, සහෝදරයාට සහෝදරියට එහෙම උනොත්? ඒ හින්දා තමන්ට වෙනවට අකමැති දේවල්, අනිත් අයට නොකර ඉන්න.

ඔබට ජය!

වෛද්‍ය චන්දි රාජපක්ෂ

Doctor of Ayurveda | Motivational Speaker | Counsellor

M. Sc., BAMS, B. Sc., CCHRM,

Ad. Dip. in Psychotherapy & Dip. in Counseling Psychology

ආසාවෙන් බොරු අහන්න

Posted on | by Digital My Business

ඉස්සර මට නිතරම හිතිච්ච දෙයක්‌ තමයි,  මිනිස්සු ඇයි මේ තරමට බොරු කියන්නෙ “කියලා 

බොහෝ සත්‍යවාදී කියලා පිටට පෙන්නගෙන ඉන්න අයත් දිගින් දිගටම කියලා තියන ඔක්කොම බොරු කියලා එකින් එක  ඔප්පු වෙනකොට මිනිස්සුයි බොරුයි අතර සම්බන්ධය මීට එහා ගියපු දෙයක් කියලා තේරුණ නිසා,

මම බොරු ගැන බලන කෝණය වෙනස් කලා.

ඇත්තටම,  මිනිස්සු මේ තරම් බොරු කියන්නෙ ඇයි කියලා එතකොට තමයි හරියටම තේරුනේ..

ඇත්තම කිව්වොත් බොහෝවිට මිනිස්සු බොරු කියනව නෙමෙයි,ඔවුන්ට බොරු කියන්න වෙනවා, ඒ කිව්වෙ ඔවුන් බොරු හෝ කිවිය යුතු තත්වෙට පත් වෙනවා.

ඒක වෙන්නේ මෙහෙමයි.

ප්‍රධාන කාණ්ඩ දෙකක මිනිස්සු මේ සමාජයේ ඉන්නවා

1) තියන දේවල් වලට වඩා තියන බව පෙන්නන අය..

2) බොහෝ දේ තියාගෙනත් කිසිවක් නැති බව පෙන්වන අය..

මේ වර්ග දෙකම, තම තමන්ගේ මතයේ පැවැත්ම වෙනුවෙන් නොසෑහෙන්න බොරු කියනවා, බොරු කරනවා,

උදාහරණයක් විදිහට, ඉතා පීඩිත විවාහයක් ගත කරන මුත් සමාජයේදි යම් මට්ටමක් පෙන්වාගෙන ඉන්න කෙනෙක්, අනේ මගෙ මහත්තයා මන් ගැන බලන්නේ නැහැ, එයාට තව කසාදයක් තියනවා,ඉතින් මම ඉන්නෙ බොහොම දුකෙන්, කියලා ඔබ සමග ඇත්තම කියලා ඔවුන් ඔබ ඉදිරියේ මවා තිබෙන සමාජ ප්‍රතිරූපය බිඳ දමා ගත යුතුයි කියලා ඔබ විශ්වාස කරනවද?

ඇත්තටම එහෙම වෙන්න ඕනේ නැහැ ඉතින්.

ලෝකෙට බම්බු ගහගන්න කියලා අපිට ඕනේ විදිහට අපි ජීවත් වෙමු කියලා වචන්යෙන් කිව්වට රටක් විදිහට මේ අමුතු ඇටේ ඇතුලේ ඕක ලොකුවට කරන්න අමාරුයි.

ඒ නිසා ගෙයක් නැත්තම් ණය වෙලා ලෝකෙට පේන්න හරි හෙන පත ගෙයක් අරගෙන ලීස් කරලා හරි වාහනයක් අරගෙන බඩට නොකා හරි,මිනිස්සු තම තමන් කැමති විදිහට status maintain කරනවා.

ඕකෙ ඇත්ත තත්වේ කවුරුම හරි දැනගෙන අනේ ඔයාල මහ ලොකු පොරවල් වගේ හිටියට ලෝකෙටම ණයයි නේද කියලා කෙනෙක්‌ අහනවට කවුරුවත් කැමති වෙයිද?

මහ ලොකුවට ඇති දේකුත් නැති, නැති දේකුත් නැති, පොළවේ පය ගහල ඉන්න නිසා, සාපේක්ෂව මට බොරු කියන්න වෙන්නේ අඩුවෙන්,( කියන්න වෙන වෙලාවල් තියෙනවා )

හැබැයි මම බොක්කේ තියන දේ ගැනත් ඇත්තම කියද්දී යාලුවෝ නෑදැයෝ  අතේ පැළවෙන ටොන් පච දිගට හරහර වනද්දී ඉස්සර නම් ඇඟේ ලේ රත් වෙන ගානටම තරහ එනවා.

ඒත් දෙයියනේ කියලා දැන් නම් එහෙම තරහ එන්නෙ නැහැ.

 ඇත්තටම බොහොවිට මිනිස්සු හරිම අසරණයි,

නැති කමට, බැරි කමට, දුකට, තනිකමට, වැරදිම්වලට පැරදීම් වලටහිනාවෙන්න බලන් ඉන්න සමාජයක් ඉස්සරහ මිනිස්සු අසරණයි.

ඉතින් කැමැත්තෙන් අකමත්තෙන්, හේතුවක් ඇතුව හේතුවක් නැතුව ප්ලැන් කරලා හෝ ඔහේ කටට එනවට මිනිස්සු හිටු කියලා බොරු කියනවා.

ඇත්තම ඇත්ත හොඳින්ම දන්න අයට ඒවා දැකල තරහ ගියාට, ඒවා අහල හිනා ගියාට අපි ඒක දන්නවා කියලා ඒක ඒ බොරුව කියන කෙනාට දැනෙන්න දෙන්න එපා.

මොකද ඔවුන් ඒ බොරුවකින් මහන්නේ ඉරිච්ච ජීවිත කතාවක් වෙන්න පුළුවන්, එහෙමත් නැත්තම් මැරිච්ච හීනයක් වෙන්න පුළුවන්, සමහරක් විට ඔවුන්ට තියන එකම එක බලාපොරොත්තුව වෙන්නත් පුළුවන්.

බොරුවලට බොරු කාරයින්ට නොරැවටෙන එක ඔවුන්ව තව දුරටත් විශ්වාස නොකරන එක ඔබේ වැඩක්, හැබැයි අකමැත්තෙන් උනත් පිළිගත්තා වගේ බොරුව අහගෙන ඉඳල හා හොඳයි කියන එක ලොකු පිනක්.

මොකද, පටටම පට්ට සරළ ජීවිත මිනිස්සු මාර කට්ටක් කාලා විහින් සංකීර්ණ කරගෙන, බැලුම් වගේ හුලන් දාලා පුම්බගෙන ඒ හිස් ජීවිත ඇතුලේ පට්ට වටින දේවල් තියෙනවා කියලා ලෝකෙට පෙන්නන්න මාර බොරුවක් කරනවා,

ඇත්තම කිව්වොත් අහන අපි විතරක් නෙමෙයි කියන උනුත් තමන්ගේම බොරුවට අහුවෙලා ඉවරයි.

ඒ නිසා මීට පස්සෙ, ඇයි මිනිස්සු බොරු කියන්නෙ කියලා හිතලා දුක් වෙන්න එපා, මිනිස්සුන්ට බොරු කියන්න වෙනවා,

 කියන යතාර්ථය තේරුම් අරන් දත කට මැදන් සාවධානව බොරු අහන්න ලෑස්ති වෙලා ඉන්න.

කාගෙ හරි තත්වයක් රැකෙනවානම්, කාට හරි මම පොරක් කියලා හිතෙනවනම්, කාගෙ හරි හිතට අරූ මගෙ බොරුවට හොඳටම රැවටුනා රැවටුනා කියලා හිතල පොඩි හරි  සැනසීමක් ලැබෙනවානම්,එන්න එච්චරයි වෙන්න ඕනේ..

මීට පස්සෙ මිනිස්සු අපිට ඇත්ත කියයි කියලා හිතන්න එපා, ඇයි මිනිස්සු බොරු කියන්නෙ කියලා හිතලා දුක් වෙන්නත් එපා, අපෝ එයා ඒ තරම් බොරු හිලක්ද කියලා හිතලා හිත කලකිරවගන්නත් එපා.

මිනිස්සුන්ට බොරු කියන්න වෙනවා,ඒ තරමටම ඒ මිනිස්සු අසරණයි නේද කියලා හිතලා  හිත හදාගන්න..

කොහොම උනත් කියන්නෙ බොරු කියලා දැන දැනම ” ආනේ ඇත්තද ” කියලා අහන් ඉන්න එකෙත් අමුතුම එකක් තියනවා..දිගටම පුරුදු උනහම ඒක වෙනමම ආතල් එකක් වෙනවා..

කොහොමත් ඉතින්, ස්කන්ධය දිරලා ආතල් විතරක් ඉතුරු වෙන එකේ කියන කෙනාට බොරු කියලා ආතල් එකක් ගන්න දීලා ඔයා බොරු අහලා ආතල් එකේ ඉන්න. මොකද අපි ඇත්ත අහන්න ආස උනාට ඇත්ත කියන අය දැන් නැහැ..


අනිශා ජයකොඩි ✍️

ඔබව දෙවියන් වහන්සේ

Posted on | by Digital My Business

ඔබව දෙවියන් වහන්සේ අල්ලා

ගන්නේ නම් වලක්වන්ට කිසිවකුට

බැරිය.

(යෝබ් :9 – 12)

උන්වහන්සේ අල්ලාගන්න කල උන්වහන්සේ

වලක්වන්නේ කවුද? ඔබ මක්කරනවාදැයි

උන්වහන්සේට කියන්ට පුළුවන් කාටද?

සෙනෙහෙවන්ත දරුවනේ දෙවියන්වහන්සේගේ

මහත් වූ ප්‍රේමය නොහැද ජේසුස් ක්‍රිස්තුස්

වහන්සේගේ ගැලවීම නොලැබු ජීවිතයේ කඳුළු,දුක්

පමණක්ම ඉතිරි වී හැදු වැඩු දෙමාපියන්ටත් ඔබව

එපා වී,මාවතේ කිසිදු සරණක් නොමැතිව සිටින්නේ

නම් යේසුස් වහන්සේ ඔබව අල්ලා ගැනීම

මොනතරම් නම් යහපත් වාසනාවන්ත දෙයක්ද?

එමෙන්ම එය වලක්වන්ට මිහිපිට සමත් වන්නා වූ

කිසිවෙක් නොමැති බව ඔබ හොඳින් සිහි

තබාගන්න.එබැවින් ඉහත ප්‍රධාන දේව වචනය වන

යෝබ් නමයේ සිට දොලහා අනුව උන්වහන්සේ

අල්ලා ගන්නා කළ උන් වහන්සේව වළක්වන්නේ

කවුද? කියා ඔබේන් ප්‍රශ්න කරනු ලබයි.

එම නිසා අද දින ඔබව දෙවිඳුන් අල්ලා

ගන්ටත්,ඔබගේ සිත සැනසීමෙන් පිරවීමටත්

හැකියාව ලැබෙන යහපත් ආශිර්වාදමත් දවසක්

ඔබට ඔබ සැමට උදා වේවා කියා ජීවමාන යේසුස්

යන බලවත් නාමයෙන් මම සුබ ප්‍රාර්ථනා කරමි.

දුක් නොවන්න බිය නොවන්න මන්ද සර්වබලධාරී

ජීවමානව යේසුස් වහන්සේ ඔබව කිසිදා අත්

නොහරින්නේ ය.

ඔබට ජේසු පිහිටයි!

Google Keep Document

Posted on | by Digital My Business

කොහොමද වලට ඉතින් හුඟ දවසකින් හම්බුන නිසා අද අපි කතා කරන්න හිතුවා සමාජයේ පොදු ක්‍රියාවන් අපි සිත කරන කොට අපිට සිද්ධ වෙනවා පාවිච්චි කරන්න විවිධ ක්‍රම එහෙම නැත්නම් strategies ,ඉතින් මෙන්න මේ strategies ටිකක් අද ඔයාලත් එක්ක බෙදාගන්න තමයි මම ඉන්නෙ ගොඩක් වෙලාවට මෙතනදී සිකුරුටි සම්බන්ධ කාරණා සහ ඔයාලගේ privacy එක ගැන ගොඩක්ම හිතලයි මං මේ කරුණු කාරණා ටික ඔයාලත් එක්ක බෙදාගන්න හිතුවේ.

හරි ඉතින් මෙතනදි සඳහන් කරන සමහර කරුණු නිසා කිසිම ඇප් එකක් වත් කිසිම ආයතනයක් වත් මම ප්‍රමෝට් කරන එක නෙමේ මේ කරන්නේ මෙතනදි මම ඔයාලත් එක්ක බෙදා ගන්න බෙදා ගන්නේ මගේ prrsonal අත්දැකීම් සහ මම ඒ ඒ අවස්ථාවල දී පාවිච්චි කරන විවිධ ක්‍රම .

මුලින්ම අපි බලමු අපි ගොඩක්ම පාවිච්චි කරන පාවිච්චි කරන චැට් කරන්න එහෙමත් නැත්නම් සෝෂල් මීඩියා හරහා තව කෙනෙක්ට කතා කරන්න පාවිච්චි කරන apps මොනාද කියල.අපි හැමෝම අතර ජනප්‍රිය කීපයක් තියෙනවා imo, viber, whatsapp ඉතින් මේ විදියට තවත් ගොඩක් තිබුනත් අපි ප්‍රධාන වශයෙන් හැමෝම භාවිත කරන ලංකා ප්‍රසිද්ධ මෙය 3 ගැන කතා කරමු .රිතික් සිකුරුටි අතින් බැලුවොත් ඉමු කියන ඇප් එක ෆෝන් දෙකක එකවර එකම මොහොතේ එකම එකවුන්ට් එක පාවිච්චි කරන්න පුළුවන් ඉතින් මේක එක්තරා විදියක අවාසියක්.ඒ වගේම තමයි වට්ස්ඇප් සහ වයිබර් කියන ඇප් එක ගොඩක් අය පාවිච්චි කරණවා.මේ දෙකේම secutity එක ටිකක් වැඩියි ඒ අතින් වැඩිම security එකක් තියෙන්නෙ Viber app එකට ඉතින් ඔයාට පුළුවන් මේකේ තියෙන secret chat කියන option එක use කරලා files ,photos,messages හැමදෙයක්ම යවන්න පුළුවන් වගේම හැම දෙයකම රහස්‍ය භාවය රැකෙනවා..ඉතින් ඔයාලටත් පුළුවන් මේ ක්‍රමේ try කරලා බලන්න.

ඔයාලා දන්නෙ නැති භාෂාවක ලියකියවිල්ලක් හෝ යම් දෙයක් හම්බුනොත් අපි උදාහරණයකට කියමු අපි අලුතෙන් මිලදී ගන්නවා නිවසට අලුත් විදුලි උපකරණයක් හෝ විදෙස් රටකින් කුමන හෝ දෙයක් ගත්තොත් සාමාන්‍යයෙන් ඉංග්‍රීසි භාෂාව පාවිච්චි කළත් වෙනත් භාෂාවකින් යමක් තිබුනොත් එය අපට කියවීමට හෝ තේරුම් ගැනීමට නොහැකිය.ඒ වගේ වෙලාවට ඔයාලට ලෙහෙසියෙන්ම කරන්න පුළුවන් දෙයක් තමයි google lens කියන ඇප් එක පාවිච්චි කරලා ඔයාලට සජීවීව යම් කිසි වස්තුවක් මත මුද්‍රණය කරලා තියෙන ඕනම දැනට ලෝකයේ සම්මත පිළිගත් ඕනෑම භාෂාවක් ඔයාලට කැමති භාෂාවක් විදියට පරිවර්තනය කරන්න පුළුවන්.

ඉතින් මේ වගේ එදිනෙදා ජීවිතයේදී තවත් භාවිතා කරන්න පුලුවන් පුංචි උපක්‍රමයක් තමයි හදිසියෙවත් ඔයාලගෙ ෆෝන් එකක් අස්ථාන ගත උනොත් ඒ කීවේ නැති උනොතින් හොයාගන්න ටිකක් සම්භාවිතාවක් තියෙන ක්‍රමයක්.ඔයාලා දන්නවද find me කියන option එක ඇත්තටම මේක app එකක් විදියටත් තියෙනවා.හැබැයි ඔයාලා මේක කලින් ඔයාලගෙ gmail එකකින් ලොග් වෙලා බලන්න ඒකට access දෙන්න සහ ඔයාලගෙ දුරකතනයේ location සහ mobile data හෝ wifi යන Option දෙක අනිවාර්‍යෙන්ම ක්‍රියාත්මක කර තැබිය යුතුමයි.තවද ඔබගේ දුරකතනයේ මේ settings වෙනත් පුද්ගලයෙකුට ක්‍රියා විරහිත කිරීම හෝ ඒ setting වලට acccess වීම වැලැක්වීමට දුරකතනයට Lock එකක් දමා තිබිය යුතුමයි සහ එම lock එක තිබියදී අර settings වලට access වීමේ හැකියාව නැති විය යුතුමයි .ඉතිං මේ අය පහසුකම් ටික ඔබ සපුරා තිබේ නම් හදිසියේ ඔබ අතින් ඔබගේ දුරකථනය නැති වූ අවස්ථාවකදී හෝ අස්ථානගත වූ අවස්ථාවකදී ඔබට වෙනත් දුරකථනයක් භාවිතයෙන් ඔබගේ gmail එක තුළට තුළට ඇතුළු වී මෙම app එක හරහා ඔබගේ දුරකථනය තිබෙන තැන එහි තිබෙන දත්ත මකා දැමීම හා එයින් ශබ්දයක් නිකුත් කිරීම එහෙමත් නැත්නම් එයින් music එකක් වැනි දෙයක් නිකුත් කිරීම කළ හැකියි.

ඉතින් ඔන්න අද අපි විවිධ ක්‍රම තුනක් අරගෙන ආවා ඔයාලටඉතිං ඔය වෙනසකටත් එක්ක හිතුව මේ වගේ පොඩි පොඩි දේවල් ටිකක් ඔයාලට අරගෙන එන මොකද අපි සමහර වෙලාවට හිතන්නේ නැති පැති වලින් අපිටදැනුම අවශ්‍ය වෙනවා ඉතින් මම හිතුවා මින් ඉදිරියට මේ වගේ පුංචි පුංචි ටෙක්ස් සහ තවත් ඔයාට උවමනා කරන අවශ්‍යම දේවල් අරගෙනඔයාලා අත 4ක් එන්න ඉතින් අතට අපේ ලිපිය අවසන් වෙනවා ඉතින් මේ වගේ තවත් ලිපියක් අරගෙන ලබන මාසේ ඔයාලට එන්න මම බලාපොරොත්තු වෙනවා .

P.K.D.Manujaya

(BSc Honors. In Computer Science , Social Media Strategists ,Dip in HRM ,Dip in Finance Management, Dip in Production Management , Dip in Sales Management )

076 2209299

www.dilshanmanujaya.com

Paper Quilling Art

Posted on | by Digital My Business

ශතවර්ෂ ගණනාවක පෙර ඉජිප්තුවෙහි (Egypt) පේපර් කුයිලින් නිර්මාණ කලාව දක්නට ලැබි ඇති බව කියවෙනවා. ඉන්පසුව ක්‍රමක් ක්‍රමයෙන්  ප්‍රංශය සහ ඉතාලිය වැනි යුරෝපීය (Europe) රටවලත් මෙම කලාව ප්‍රචලිත වි තිබෙනවා. පේපර් කුයිලින් නිර්මාණය කලාව මේ වනවිට ලෝකයේ විවිධ රටවල කාන්තාවන්ගේ විනෝදාංශයක් මෙන්ම, මුදල් ඉපයිමේ මාර්ගයක් ලෙසත් ලොව පුරා වඩාත් දියුණුවෙමින් පවතිනවා.

කඩදාසි කොළ තීරු භාවිතා කර විවිධ හැඩතලයන් නිමවා කලාත්මක නිර්මාණකරණය පේපර් කුයිලින් කලාව (Paper quilling art) ලෙස හදුන්වා දෙන්න පුලුවනි.

පිටු සලකුණු, සුභ පැතුම් පත්, කාන්තා ආභරණ, බිත්ති සැරසිලි වැනි පේපර් කුයිලින් කලාව භාවිතා කර සාදා ගන්නා අලංකාර නිර්මාණ වෙළදපොලෙහි අද වන විට බහුලව දක්නට ලැබේ.

කුයිලින් නිර්මාණ කලාවේදී අවශ්‍ය මූලිකම අමුද්‍රව්‍ය වන්නේ කඩදාසි කොළ තීරුයි. කඩදාසි කොළ තීරු නිර්මාණයට අවශ්‍ය වන පරිදි  විවිධ ප්‍රමාණයන්ගෙන් යොදා ගත හැකිය. කඩදාසි කොළතීරු අවශ්‍ය ප්‍රමාණවලට පහසුවෙන් කපා ගැනිම සදහා පේපර් ශ්‍රෙඩර් (Shredder) එකක් භාවිතා කර ගත හැකිය. එමෙන්ම 1mm සිට විවිධ ප්‍රමාණයන්ගේ සහ වර්ණයන්ගේ කඩදාසි කොළ තීරු ඔබට වෙළදපොලෙන් මිලදි ගැනිමේ හැකියාවද තිබේ. 5mm කොළ තිරු මෙම නිර්මාණ සදහා බහුලවම භාවිතා කර ගනී.

මෙසේ ඔබට අවශ්‍ය වර්ණයන් සහ ප්‍රමාණයන් තෝර ගත් පසු කඩදාසි තීරු ඔතා ගැනීම සඳහා ස්ලොටට් කුයිලින් ටූල් (Slotted quilling tool) එක භාවිතා කර ගත හැකිය.

කුයිලින් හැඩතල සාදා ගැනිම සදහා ස්ලොටට් කුයිලින් ටූල් එකෙහි මිට කොටසෙන් අල්ලා ගෙන කොළ තිරුව ඉදිකටුව වැනි කොටසෙහි අග කොටසට ඇතුල් කර කොළය අල්ලාගෙන තද කරකවමින් හොඳින් ඔතා ගත යුතුය. කුයිලින් නිර්මාණ සදහා භාවිතා කරන මූලික හැඩතල කිපයක් ඇත. එම මුලික හැඩතල පහත රුපසටහනෙහි දැක්වේ.

කොළ තීරු භාවිතයෙන් සාදා ගන්නා හැඩතල ඔබට අවශ්‍ය නිර්මාණයට අනුකූලව අත්කම් නිර්මාණ සදහා භාවිතා කරන ගම් වර්ගයක් ‍යොදාගෙන ඝන කොළයක අලවා ගත යුතුය. ඔබ තෝරා ගන්නා නිර්මාණය අනුව ඝන කොළයේ ප්‍රමාණය තීරණය කල යුතුය. නිර්මාණයට ගැළපෙන පරිදි විවිධ වර්ණයන්ගෙන් මෙම ඝන කොළ වෙළදපොලෙන් මිලදි ගැනීමට පුලුවන.

වර්ණ කඩදාසි කොළ තීරු සහ ස්ලොටට් කුයිලින් ටූල් මෙන්ම පේපර් කුයිලින් කලාව භාවිතා කර නිර්මාණකරනයේදී අවශ්‍ය වන දේවල් පහත දැක්වේ.

•කොළ තීරු(Quilling paper strips)

•ස්ලොටට් කුයිලින් ටූල් (Slotted quilling tool)

•කුයිලින් නීඩල් (Quilling needle)

•ටුවිසර් (Tweezer)

•කුයිලින් මෝල්ඩ් (Quilling Mould)

•අත්කම් නිර්මාණ සදහා භාවිතා කරන ගම් වර්ගයක්

•ඝන කොළ (Hard board)

•පැන්සලක්

•කතුරක්

පේපර් කුයිලින් කලාව යොදා ගනිමින් කල විවිධ නිර්මාණය කිපයක් මෙම ලිපියෙහි ඔබට දක්නට පුලුවන. 

මෙම නිර්මාණ කිරීමේදී වැඩිදුර විස්තර දැන ගැනීමට සහ නිර්මාණ ඇනවුම් කිරීමට අවශ්‍ය නම් අපට ලියන්න.

Email: amas.homemade@gmail.com

Sri Lanka Birdwing

Posted on | by Digital My Business

Papilionidae කුලයට අයත් වන Troides darsius  වශයෙන් හදුන්වන සියොත් වැන්න හෙවත් Sri Lanka Birdwing වර්ශය පුරා ශ්‍රී ලංකාවේ දක්නට ලැබෙන අතර පහතරට තෙත් කලාපයේ වැඩි වශයෙන් ව්‍යාප්තව සිටි. ශ්‍රී ලංකාවේ සිටින විශාලතම සමනල විශේෂය වන අතර පියාපත් 130-170 mm පමණ දිගින් යුක්ත වේ. මෙම සමනල විශේෂය ලංකාවට ආවේණික විශේෂයක් වෙත්ම ශ්‍රී ලංකාවේ ජාතික සමනලයා ද වෙයි.

මොවුන් හදුනා ගැනීමේදි පිරිමි සතුන්ගේ පිටිපස තටුව (hind wing) යට පැත්තෙහි (verso) කලු පැහැති පසුබිමේ කහ පැහැති තරමක් දිගු තද කහ පැහැති පැල්ලම් දැක ගත හැකිය. සාමාන්‍ය පිරිමි සතෙකුගේ මෙම කහ පැහැති පැල්ලම් 6 ක් පමණ පිහිටයි. 

ගැහැණු සතුන්ගේ පිටුපස තටුවෙහි යටි පැත්ත තරමක් දුරට ලා පැහැයක් ගන්නා අතර පිරිමි සතුන්ට වඩා ගැහැණු සතුන්ගේ මෙම පැල්ලම් කුඩා වේ. තවද, ගැහැණු සතුන්ගේ අපර දාරයට වන්නට කහ පැහැති සලකුණු දිස්වේ. මොවුන්ගේ ගැහැණු සමනලුන්ගේ පමණක් ඉදිරිපස තටුවේ (fore wing) නහර මත සුදු පැහැ දාර දැක ගත හැකි වේ. 

මෙම විශේෂයේ උරස ප්‍රදේශය රතු පැහැති කලාපයත් දිසු වේ. එම රතු පැහැති කලාපය මගින් ඔවුන් පෙන්නුම් කරනුයේ ඔවුන් විෂ සහිත බවකි. Troides darsius  විශේෂයේ ව්‍යාප්තිය පැහැදිලි ලෙස සදහන් කලහොත් ශ්‍රී ලංකාවේ පහතරට තෙත් කලාපයේ වැසි වනාන්තර ආශ්‍රිත මෙන්ම වියළි කලාප වල ගෙවතු සහ ලදු කැලෑ ආශ්‍රිත ව දක්නට ලැබේ.සප්සද ශාකයේ (Aristolochia indica) බිත්තර දමන අතර වරකට එක් බිත්තරයක් දමන විශේෂයක් වේ. සාමාන්‍යයෙන් බිත්තර සතියක් ඇතුලත පුපුරා කීටයන් එලියට පැමිණේ. බිත්තරය රතු කහ පැහැයක් ගන්නා අතර එය 0.5mm පමණ වේ. මොවුන්ගේ කීටයා සාමාන්‍යයෙන් කලු පැහැයක් ගන්නා අතර කීට අවස්තා 5ක් යටතේ වර්ධනය වේ. මොවුන්ගේ කෝෂ කහ පැහැති වේ. ඉතාමත් අලංකාර සමනල විශේෂයක් වන සියොත් වැන්නා පරිසරයේ ඇති අලංකාරය ද තවත් වැඩි කරයි.

Hard-Working වෙහෙස මහන්සි වී වැඩ කිරීම.

Posted on | by Digital My Business

“ｄｏｎ’ｔ ｂｅｌｉｅｖｅｉｎ ｌｕｃｋ ｂｅｌｉｅｖｅ ｉｎ ｈａｒｄ ｗｏｒｋ…”

වානෙ භාවිතයේදී බැබළෙන අතර විවේකයේදි මළකඩ  බැඳෙයි.

වෙහෙස මහන්සි වී වැඩ කිරීම යනු අප සැමට ජීවිතයත් අවශ්‍ය දෙයකි.වෙහෙස මහන්සි නොවී කිසිම කෙනෙකුට කිසිම දෙයක් ළඟා කරගත නොහැක.තමන්ට ජයගැනීමට ඉලක්ක තිබියදීත් ඒවා වෙනුවෙන් ඇපකැප නොවී  වෙහෙස මහන්සි නොවී කිසි දෙනෙක ඒවා ජයගත නොහැක නිරන්තරයෙන් තමන්ගේ ඉලක්ක අරමුණු හා සාර්ථකත්වය වෙනුවෙන් වෙහෙස මහන්සි වී වැඩ කරන පුද්ගලයාට නිතැතින්ම ජයග්‍රහණය ලැබෙනවා නොඅනුමානයි.

මේරි බරරා ජෙනරල් මෝටර්ස් සමාගමේ ඉහළම තලයට පැමිණියේ වසර තිස් තුනකට පසුව සමාගම තුළමය.

මේරි බරරා  ජෙනරල් මෝටර්ස්හි ප්‍රධාන විධායක නිලධාරී, ජොනතන් අර්නස්ට්,රොයිටර් බරා වයස අවුරුදු දහ අටේදී ජෙනරල් මෝටර්ස් හි පතුලෙම ආරම්භ වූ අතර ඇය සමාගම විසින් අනුග්‍රහය දක්වන ඉංජිනේරු විද්‍යාලයකට ඇතුළත් විය. එහිදී ඇය වසර භාගයක් ගත කළේ fortune පුවත්පතකට අනුව ෆෝන්ටියා කම්හලක කොටස් පරීක්ෂා කිරීමට ය.

ඇය දක්ෂ තීරණ ගැනීමක් සහ ඇය සතු සියල්ල සමාගමට ලබා දීමට කැමැත්තෙන් ඉණිමඟ ඉහළට ගමන් කළාය ෆිනෑන්ෂල් ටයිම්ස් වාර්තා කරන්නේ ඇය සෑම උදෑසනකම කාර්‍යාලයේ පළමු පුද්ගලයා වූ බවත් රාත්‍රී 11 න් පසු ඊමේල් වලට ප්‍රතිචාර දක්වන බවත් සගයන් සිහිපත් කරයි 2013 දි ඇය ජෙනරල් මෝටර්ස් හි ප්‍රථම කාන්තා ප්‍රධාන විධායක නිලධාරියා ලෙස නම් කරන විට ඇයගේ කැපීමට ත්‍යාග පිරිනමන ලදී.

ඇය  ජයග්‍රාහිපසාර්ථක පුද්ගලයකු වී ඇත්තේ වෙහෙස මහන්සි වී වැඩ කළ නිසා ය.ඔබේ සිහින කරා ළගාවීමට වෙහෙස මහන්සි වී වැඩ කිරීම මහත් සේ උපකාරී වේ. වානේ භාවිතයේදී බැබළෙන අතර විවේකයේදි මලකඩ බැඳෙයි.එමෙන්ම අපද වෙහෙස මහන්සි නොවුනොත් තමන් සතු වටිනාකම තමන් විසින්ම ක්ෂය කර ගනී.

වෙහෙස මහන්සි වී වැඩ කරන තත්පරයක් තත්පරයක් පාසා අපට අරමුණු වෙත ලගා වීමට ඉතාම පහසුය වාසනාව බලපා ලැබෙන දේකට වඩා තමන් දහඩිය හෙළා උපයා ගන්නා සෑම දෙයක්ම ප්‍රබලය,වටිනාකමින් වැඩිය එයින් තමන්ට ද අවසානයේ සතුටක් ලැබෙනු ඇත.

අපි ජීවිතයේ බොහෝ දේවල් ළඟා කරගැනීමට කැමැත්තෙමු.නමුත් මේ සියලු දේ ලබා ගැනීමට අප අනිවාර්යෙන් වෙහෙස මහන්සි වී වැඩ කළ යුතුය. අතපය හතර පිහිටලා තියෙන නිරෝගි පුද්ගලයකු දුප්පත් වී සිඟමන් යැදීම නිශ්ඵල දෙයකි.ඔවුන් වෙහෙස මහන්සි වී තමන් දන්නා රැකියාවක නියැලෙන්නේ නම් කිසිවෙකුට අතනොපා ජීවත් විය හැකිය.දුප්පත් වී ඉපදීම ඔබගේ වරදක් නොවේ,චනමුත් දුප්පත් වී මිය යෑම ඔබේ වරදකි මන්දයත් ජීවත්වෙන කාලයේදී තමන්ට වෙහෙස මහන්සි වී උපයා ගත හැකි දේවල් මග හැර කාලය නිශ්ඵල ලෙස වැය කිරීම දුප්පත් වීම මෙන්ම සෑම යහපත් සාර්ථක ක්‍රියාවක්ම පහතට වැටීමේ ප්‍රධාන සාධකයයි.

ඒ අනුව ඔබට සාර්ථකත්වය,දිනුම ඉලක්ක හඹා යෑමට නම්, වෙහෙස මහන්සි වී වැඩ කිරීම අනිවාර්යය වේ ඔබ නියැලෙන කාර්යයෙහි වෙහෙස මහන්සි වී වැඩ කිරීම ඔබට නිසැකයෙන් අවශ්‍ය ප්‍රතිඵල ගෙන දෙනවා නොඅනුමානයි.

පොහොසත් වීම, සාර්ථක වීම පමණක් නොව රැකියාව හා ජීවිත සබඳතාවලට ද වෙහෙස මහන්සි වී වැඩ කිරීම ඔබ විනයගරුක සමෘද්ධිමත් පුද්ගලයකු වෙනවා නිසැකයි.මළකඩ බැඳුණු මිනිසෙකු නොවී වෙහෙස මහන්සි වී වැඩ කර මුවහත් මිනිසෙකු වන්න.

“Hard work beats talent when talent doesn’t work hard.”

-Tim  Notke –

සටහන 

නවෝද්‍යා දෙව්මිණි ආරියවංශ.