Category: Interviews

රොන් පොදක් වෙන්නම්, හද හඩලා, පාරාදීසේ සහ මේ වේදිකාව ජිවිතේ අපේ වැනි ගීතවල පලමු පද කිහිපය කියු සැනින් ඔබට ඔහුව නිතර්කයෙන්ම මතකයට නැගෙන බව නොරහසකි. දශක කිහිපයක් පුරාවට එක ලෙස රසික හදවත් තුල ලැගුම් ගත් එවැනි ගීත ගොන්නක හිමිකාරිත්වය ඔහු සතුයි.

සංගීත කේෂ්ත්‍රයට පැමිණ දශක කිහිපයක කාලය ගෙවි ගියත් මියුරු හඩ පෞර්ෂය සහ එදා අපි දැකපු රැව එක ලෙසම පවත්වාගෙන ‍යන්නට ඔහු වාසනාවන්ත වුනා. එමෙන්ම එදා ඔහු වටා එකතු වු ප්‍රේක්ෂක පිරිස මෙන්ම නව පරපුරේ සංගීත ලෝලි රසික පිරිසගෙන්ද ආදරය ලබන්නට ඔහුගේ මියුරු හඩට සහ ඔහු සතුවු ගීත ගොන්නට හැකි වුනා.

ගායනය සහ වාදනය පමණක් නොව ඔහුට රංගන දක්ෂතාවයන්ද හිමි බව සින්තටික් සිහින සහ අරුණෝද කලාපය වැනි නිර්මාණ තුලින් සහ හිරු නාලිකාවෙහි විකාශනය වන දිවිතුරා ටෙලිනාට්‍යයෙන්ද ප්‍රේක්ෂක අපට දැක ගන්නට ලැබුනා.

එසේනම් අපි Magazine පාඨක ඔබ වෙනුවෙන් මෙවර සම්බන්ධ කර ගන්නේ ප්‍රේක්ෂක සිත් තුල

නොවෙනස්ව තම ජනප්‍රියත්වය පවත්වාගෙන, ප්‍රේක්ෂක රසවින්දනය වෙනුවෙන් ගීත ලෝකයට මියුරු ගී සමුදායක් තිළිණ කල අතුල අධිකාරි මහතාවයි.

මේ දවස්වල ඔබ නිරත වන කලා කටයුතු මොනවාද?

මම කැමතියි පිළිවෙලකට, සැලසුමකට අනුව කෙරෙන ප්‍රසංග සහ වැඩසටහන් සමග සම්බන්ධ වෙන්න. ලංකාවේ පැවැත්වෙන තෝරාගත් ප්‍රසංග කිහිපයක් සහ රූපවාහිනි නාලිකාවල පැවැත්වෙන වැඩසටහන් කිහිපයක් සමග සම්බන්ධ වෙලා වැඩ කටයුතු කරගෙන යනවා. ඒවගේම අගෝස්තු සහ සැප්තැම්බර් මාසවල එංගලන්තය, ඩුබායි සහ කටාර්වල පැවැත්වෙන සංගීත ප්‍රසංග කිහිපයකට සහභාගි වෙන්න බලාපොරොත්තුවෙන් ඉන්නවා.

දිවිතුරා ටෙලිනාට්‍යය සමග සම්බන්ධ වුනේ කොහොමද? දිවිතුරා කණ්ඩායමෙන් ඔබට ලැබුන සහයෝගය කොහොමද?

හිරු නාලිකාවෙහි වැඩසටහන් අධ්‍යක්ෂකවරයෙකු වන විරාජ් වැලිවත්ත මහතාගේ සහ දිවිතුරා ටෙලිනාට්‍යයේ අධ්‍යක්ෂකතුමා වන චාමර ජයවීර මහතාගේ ආරාධනයෙන් මම අවුරුදු දෙකක කාලයක් දිවිතුරා ටෙලිනාට්‍යයෙහි රංගනයෙන් දායක වුනා නමුත් පසු කාලිනව දිවිතුරා ටෙලිනාට්‍යය සමග සම්බන්ධ වෙමින් මගේ සංගිත වැඩ කටයුතු සදහා කාලය වෙන් කර ගැනිමේ අපහසුතාය නිසා මම ටෙලිනාට්‍යයෙන් ඉවත් වෙන්න තිරණය කලා.

දිවිතුරා ටෙලිනාට්‍යයෙහි මම ගායනා කල “මම හිතක්” තේමා ගීතයට විශාල ප්‍රේක්ෂක ප්‍රතිචාරයක් ලැබුනා. දිවිතුරා ටෙලිනාට්‍යයෙහි රංගනයෙන් දායක වුන ජ්‍යෙෂ්ඨ සහ නවක රංගන ශිල්ප, ශිල්පිනියන්ගෙන් සහ අධ්‍යක්ෂකතුමා ඇතුලු දිවිතුරා කණ්ඩායමේ සියලුම දෙනාගෙන් මට හොද සහයෝගයක් ලැබුනා.

ඔබ රංගනයෙන් දායක වන ටෙලි නිර්මාණ අපට ඉදිරියේදි දකින්නට ලැබෙයිද?

මම රංගනය අධ්‍යනය කල, පුහුණු කල ශිල්පයෙකු නෙවෙයි නමුත් මම රගපාන්න උත්සාහ කරනවා.

මම හිතන්නේ රංගනය කියන්නේ විශාල කාලයක් කැප කරන්න ඕනේ කේෂ්ත්‍රයක් කියලා. රංගන කටයුතුවල නියැලෙනවා නම් සංගීත නිර්මාණකරණය, රූපවාහිනි වැඩසටහන් සහ විශේෂයෙන් විදේශ ප්‍රසංග සදහා සම්බන්ධ වෙන්න තියන කාලය අවම වෙනවා. එම නිසා නැවත දීර්ඝ ටෙලිනාට්‍යය සදහා සම්බන්ධ වෙන්න අදහස් නැහැ නමුත් අඩු කොටස් ප්‍රමාණයක් සහිත ගුණාත්මක නිර්මාණයක් ලැබුනොත් සම්බන්ධ වෙන්න බලාපොරොත්තු වෙනවා.

සංගීතය සහ රංගන, ඔබ වඩාත් කැමති කුමන කේෂ්ත්‍රයටද?

මම සුපුරුදු පරිදි සංගීත කටයුතුවල නියැලෙන්න වඩාත්ම කැමතියි. මම කලින් සදහන් කල ආකාරයට රංගන කටයුතුවල නියැලිමේදි ඒ වෙනුවෙන් ඉතා විශාල කාලයක් යොදවන්න වෙනවා. මම රංගනයෙන් දායක වුන අශෝක හදගම මහතාගේ සින්තටික් සිහින සහ ශෙනෙෂ් බණ්ඩාර දිසානායක මහතාගේ අරුණෝද කලාපය වැනි ගුණාත්මක සහ කොටස් ප්‍රමාණය අඩු ටෙලි නිර්මාණ සදහා පමණක් සහභාගි වෙන්න මම තිරණය කරලා තියනවා.

ඔබගෙයි, කවින්ද්‍යා දුවගෙයි අතර තිබෙන බැදීම ගැන කියමුද?

දුව මගේ ලග නොහිටියත් මගෙයි දුවගෙයි අතර ලොකු බැදිමක් තියනවා. අපිට ඕන දෙයක් විවෘතව කතා කරන්න පුළුවන්. අපි දෙන්නා ඇත්තටම යාළුවෝ වගෙයි.

විදේශ සංචාර සදහා සමිතා බොහෝ දුරට සහභාගි වෙන්නේ නැති නිසා ඉදිරියේදි දුවත් එක්ක විදේශ සංචාර කිහිපයකට සහභාගි වෙන්න සැලසුම් කරගෙන ඉන්නවා.

ගායන තරු තරග තුලින් කේෂ්ත්‍රයට පැමිණෙන නවක ශිල්ප, ශිල්පිනියන්ට ප්‍රවීන කලා කරුවෙකු වශයෙන් ඔබ මොනවාද කියන්න කැමති…

රූපවාහිනි නාලිකා මගින් මෙහෙය වන ගායන තරු තරගවලින් පැමිණෙන ගායනයට ඉතාම දක්ෂ ශිල්ප, ශිල්පිනියන් බොහෝමයක් දකින්නට ලැබිම සතුටක්.

ගායන තරගවලදි තරගකරුවන්ගේ සියළුම කටයුතු සංවිධායක මණ්ඩලයක් යටතෙ මෙහෙයවිම නවක ශිල්පියෙකුට බොහෝ උපකාරි වෙනවා නමුත් තරගයෙන් අනතුරුව බොහෝ දෙනෙක්ට

තමන්ගේ වැඩ කටයුතු තනිවම සංවිධානය කර ගන්න අපහසු වුන අවස්ථාවන් මම දැකලා තියනවා.

ඉතින් තරගකරුවන් එම තරගය තුලදිම හොද අවබෝධයකින්, අධ්‍යනයක් ඇතුව, තමාව ගොඩ නගා ගනිමින් කේෂ්ත්‍රයට පැමිණෙනවා නම් දීර්ඝ කාලිනව කේෂ්ත්‍රයේ රැදි සිටිමට හේතු වෙනවා කියලා මම හිතනවා.

ඔබේ රසික, රසිකාවියන්ට සමාජ මාධ්‍යයන් (Facebook) හරහා ඔබව සම්බන්ධ කර ගන්න පුලුවන්ද?

අවුරුදු 15ක් පමණ පරණ Facebook ගිණුමක් මට තිබුනා නමුත් එය මේ වනවිට මා සතුව නැහැ. එම නිසා මට නැවත facebook ගිණුමක් හදා ගන්න සිදුවුනා. මගේ නමින් මගේ නොවන වෙනත් පුද්ගලයන් විසින් මෙහෙය වන facebook ගිණුම් බොහෝමයක් තියනවා. ඉතින් Facebook ගිණුම් හරහා මා සමග සම්බන්ධ විමේදි නිවැරදි ගිණුම තහවුරු කර ගැනිම අත්‍යාවශ්‍යයි කියලා මම හිතනවා. ඉදිරි කාලයේදි රසික, රසිකාවියන් වෙනුවෙන් මගේ facebook ගිණුම විධිමත්ව පවත්වාගෙන ‍යන්න සහ අනෙකුත් මගේ නම්න් පවත්වාගෙන ‍යන ගිණුම් අවලංගු කිරිම සදහා අවශ්‍ය කටයුතු කරන්න බලාපොරොත්තු වෙනවා.

ප්‍රේකෂක අපට ඉදිරියේදි දැක ගන්න ලැබෙන ඔබේ නිර්මාණය මොනවාද?

අලුතින් නිර්මාණය කල ගීත කිහිපයක් සහ නැවත නිර්මාණ කල මගේ පැරණි ගීත කිහිපයක් රසික රසිකාවියන්ට ඉදිරි කාලයේදි අහන්න ලබා දෙන්න සැලසුම් කරලා තියෙනවා. ඉදිරි මාසවලදි යෙදිලා තියන විදේශ සංචාර කිහිපයෙන් පසු එම කටයුතු සදහා කාලය වෙන් කරන්න බලාපොරොත්තු වෙනවා.

අමා නාකන්දලගේ

ඔබට මතකද මෑත කාලයේදි විකාශනය වු රාවණ ටෙලිනාට්‍යයෙහි රණශුර කාන්තාව මාලනි, තනමල්විල කොල්ලෙක් ටෙලිනාට්‍යයෙහි ගැමි යුවතිය ධම්මි එමෙන්ම පහුගිය වකවානුවේදි අතිශය ජනප්‍රිය ටෙලිනාට්‍යයක් වු නාඩගම්කාරයෝහි මාලන්ගේ ආදරවන්තිය රසිකා?

ඇය ටෙලි නිර්මාණය තුලින් නිරන්තරයෙන් අපට දකින්නට නොලැබුනත් මෙවැනි එකිනෙකට වෙනස් වු චරිත තාත්විකව නිරූපණ කරමින් චරිතාංග රංගනයෙහි දක්ෂතාවයන් ප්‍රේක්ෂක අපට මනාවට පෙන්නුම් කලා. එමෙන්ම ප්‍රේක්ෂක සිත් ‍රසවින්දනයෙන් ඉතා ඉහල තැනකට ඔසවා තබන්න ඇයට හැකිවුවා.

සෞන්දර්ය කලා විශ්වවිද්‍යාලයෙන් උගත් රංගනය පිළිබද අධ්‍යාපනය, ස්වයං අධ්‍යනය තුලින් ලබාගත් ප්‍රායෝගික දැනුම සහ අත්දැකිම් ඇයට මෙවැනි සාර්ථක ගමනක් එන්නට ඉවහල් වු බව නොරහසකි.

එසේනම් රංගනයේ උපන් හැකියාවන් ඇති අපගේ සිත් සොරාගත් රුවැත්තිය කසුනි ප්‍රනාන්දුගේ තොරතුරු බිදක් මෙවර “අපි Magazine” ඔස්සේ ඔබ සමග බෙදා ගන්නටයි අපගේ සුදානම…

කසුනි, මොනවද මේ දවස්වල නිරත වන කලා කටයුතු?

මම දායක වෙන්නේ තෝරා ගත් සීමිත ටෙලි නිර්මාණ ප්‍රමාණයකට පමණයි. මම රංගන දායකත්වය ලබා දුන් ස්වර්ණවාහිනියේ විකාශනය වු BIO ටෙලිනාට්‍යයෙහි දෙවෙනි කොටස පහුගිය කාලයේදි විකාශනය නිමා වුනා. ඊට අමතරව මුලිකව කොටස් කිපයක් පමණක් රූගත කල ටෙලිනාට්‍යය 5 ක් පමණ තියනවා නමුත් රටෙහි ආර්ථිකය තත්වය අනුව එම නිර්මාණවල ඉදිරි වැඩකටයුතු ඇරඹෙයිද කියන්න මට හරියටම අදහසක් නැහැ.

ච්ත්‍රපට පිළිබදව කතා කලොත් පහුගිය කාලයේදි අති සාර්ථක ලෙස තිරගත වුන ගජමෑන් ච්ත්‍රපටයෙහි ප්‍රධාන චරිතයක් සදහා පන පොවන්න මට අවස්ථාව ලැබුනා.

එමෙන්ම පසුගිය දිනවල තිරගත වූ උතුරු සුළග ච්ත්‍රපටයෙහි මම රංගන දායකත්වය ලබා දුන්නා. ඒවගේම මම ප්‍රධාන චරිත සදහා රංගන දායකත්වය ලබා දුන් ච්ත්‍රපට 2 ක් ලගදිම නිකුත්විමට කටයුතු සුදානම් වෙමින් පවතිනවා.

මෙම දිනවල මම වේදිකා නාට්‍යයක පුහුණුවිම කටයුතු කරගෙන යනවා. එම නිර්මාණය මෙම අවුරුද්දෙ අග භාගයේදි වේදිකා ගත වෙයි කියලා බලාපොරොත්තු වෙනවා.

රංගන ශිල්පයක් වෙන්න ඕනේ කියලා කසුනිට හිතුනේ කොයි කාලයේ වගේද?

කුඩා කාලයේ ඉදලාම මම නර්තනයට දක්ෂයි. උඩරට සහ සබරගමු නර්තනය ශෛලියන් මම හැදෑරුවා. පාසල් කාලයේදි සංගීතය, නර්තනය, රංගනය සම්බන්ධ සියලුම වැඩසටහන් සහ විවිධ තරග සදහා මම සහභාගි වුනා.

මට වයස අවුරුදු 10 දි විතර ළමා නිලියක් විදියට මුලින්ම වේදිකා නාට්‍යයක රංගනයෙන් දායක වෙන්න අවස්ථාව ලැබුනා. පාසල් කාලයේදි විවිධ වේදිකා නාට්‍ය සහ කලාත්මක, හරවත් ටෙලි නිර්මාණ නරඹන්නට මට අවස්ථාව ලැබුනා. එම නිර්මාණවලින් මම දැකපු දක්ෂ රංගන ශිල්ප, ශිල්පයන් ගැන මම ගොඩක් උනන්දුවෙන් හොයන්න ගත්තා. ඒ සමගම සාමාන්‍ය පෙළ සහ උසස්පෙළ සදහා නාට්‍යය හා රංග කලාව විෂය හැදෑරිමට මම තිරණය කරනවා. උසස්පෙළ අධාපනය ලබන කාලයේදි ටෙලිනාට්‍ය රංගනයට අවස්ථාව ලැබුණත් රංගන ශිල්පිනියක් වන්නට ඒ කාලය වනවිට අදහසක් තිබුනේ නැති නිසා භාර ගත්තේ නැහැ.

උසස්පෙළ විභාගයෙන් පසුව සෞන්දර්ය කලා විශ්වවිද්‍යාලයෙහි නාට්‍යය හා රංග කලාව වැඩිදුර අධ්‍යාපන ලබන්නට මට අවස්ථාව ලැබෙනවා. ඉන්පසු වේදිකා නාට්‍යවලට සම්බන්ධව වැඩ කරන්න මට අවස්ථාව ලැබුනා. පසුකාලීනව ප්‍රසන්නජිත් අබේසූරිය මහතාගේ මග පෙන්විම යටතේ මම ටෙලිනාට්‍යය රංගනයට පිවිසෙනවා. මෙතෙක් කාලය තුළ මම ප්‍රතික්ෂේප කරපු නිර්මාණ ප්‍රමාණය භාරගත් නිර්මාණ ප්‍රමාණයට වඩා වැඩියි.

 නාට්‍යය හා රංග කලාව පිළිබදව විදිමත් අධාපනයක් ලබා රංගන ක්ශේත්‍රයට පැමිණිම චරිතාංග රංගනයෙ යෙදිමේදි ඔබට පහසුවක් වුනාද?

රූපණය විෂය විධිමත්ව හදාරපු නැති ඉතාම දක්ෂ ‍රංගන ශිල්ප, ශිල්පිනියන් අපේ ක්ශේත්‍රයේ ඉන්නවා. මෙම විෂය සම්බන්ධව අවංක අශාවක් තිබිම ඉතාම වැදගත් වෙනවා. එහෙම අවංක කැමැත්තක් තිබෙන අය විෂය ගැන කැමැත්ත තියන අය විෂය ගැන උනන්දුවෙන් ඉගෙන ගන්නවා. ඒ සදහා විශ්වවිද්‍යාලයකට යාම අත්‍යවශ්‍ය නැහැ. ඒවගේම උත්පත්තියෙන් ලැබෙන හැකියාවෙන් ඉදිරියට යන්න පුලුවන් සීමාවක් තියෙනව කියලා මම විශ්වාස කරනවා. එම නිසා විධිමත්ව හෝ අවිධිමත්ව විෂය හැදෑරීම වැදගත් වෙනවා. මම නිරන්තරයෙන්ම විෂය සම්බන්ධයෙන් ස්වයං අධ්‍යනයක නියැලෙනවා.

රංගනය හදාරලා ඉවර කරන්න පුලුවන් විෂයක් නෙවෙයි. සමාජයේ සිදුවන දේවල් පිළිබදව දැනුම, පොත්පත් කියවිම සහ විවිධ දෙස් විදෙස් නිර්මාණ පිළිබදව අධ්‍යයනය තුළින් සහ තමන්ගේ අත්දැකීම් තුළින් ඉගෙනගන්නා දේවල්වලින් දක්ෂතාවය නිරන්තරයෙන් මුවහත් කර ගැනිම අත්‍යාවශ්‍යයි. එය චරිතාංග රංගනයෙහි යෙදිමට උපකාරි වෙනවා.

වේදිකාව, පුංචි තිරය සහ රිදිතිරය, ඔබ රංගනයේ යෙදෙන්න වඩාත් කැමති මාධ්‍යය මොකක්ද?

වේදිකාවට සහ සිනමාවට සම්බන්ධ වෙලා වැඩ කටයුතු කරන්න මම එක හා සමානව කැමතියි.

විවිධ නිර්මාණ තුලින් එකිනෙකට වෙනස් චරිත නිරූපයෙන් ප්‍රේක්ෂක හිත් ඇද බැද ගැනිමට ඔබට උපන් හැකියාවක් ඇතිබව නොරහසකි.

මෑතකදී විකාශනය වු රාවණ, තනමල්විල කොල්ලෙක්, නාඩගම්කාරයෝ ටෙලිනාට්‍යයවල ඔබ රංගන දායක වු චරිත පිළිබදව ඔබේ අදහස සහ ප්‍රේක්ෂක ප්‍රතිචාර පිළිබදව අපිට කියන්න කැමතියිද?

පුංචි තිරයෙන් ප්‍රේක්ෂකයන් දකින බොහෝ නිර්මාණ අතරින් ඉහල ප්‍රේක්ෂක ප්‍රතිචාර ලබා ආන්දෝලනයක් ඇති කරපු නිර්මාණ කිපයකම කොටස්කාරියක් වෙන්න මම වාසනාවන්ත වුනා. එවැනි ඉතාම ජනප්‍රිය වුන කුඹියෝ ටෙලිනාට්‍යයෙහි චරිතයකට සම්බන්ධ වෙන්න මට අවස්ථාව ලැබුනා. රාවණ, තනමල්විල කොල්ලෙක් සහ නාඩගම්කාරයෝ ටෙලිනාට්‍යයන් වටා විශාල ප්‍රේක්ෂක පිරිසක් එකතු වුනා. ඉතින් නිරන්තරයෙන්

ටෙලිනාට්‍ය ක්ෂේත්‍රයේ වැඩවලට සම්බන්ධ නොවුනත් ඉදලා හිටලා සම්බන්ධ වෙන නිර්මාණ ඉතා ජනප්‍රියවිම ගැන මම සතුටු වෙනවා.

දෙරණ නාලිකාවෙහි විකාශනය වු තුෂාර තෙන්නකෝන් මහතාගේ රාවණ ටෙලිනාට්‍යයෙහි රණශූරියක් වන මාලනිගේ චරිතය සදහා දායකවන්නට මට අවස්ථාව ලැබුනා. ඒ සදහා කඩු සටන් ශිල්පය පිළිබදව නිර්මාණයට අවශ්‍ය ප්‍රමාණයට ඉගෙන ගත්තා. මාලනි කියන්නේ දුෂ්ඨ චරිතයක් වුනත් එම චරිතය වෙනුවෙන් මට ඉතාම ඉහල ආදරණීය ප්‍රේක්ෂක ප්‍රතිචාර ලැබුනා.

මගේ සමෙහි වර්ණය නිසා සමහර ගම්බද කතා ආශ්‍රයෙන් ගොඩනැගෙන ටෙලිනාට්‍යය සදහා මාව ප්‍රතික්ෂේප වෙලා පොඩි කලකිරිමක් දැනුන කාලයක නොහිතපු විදියට මට තනමල්විල කොල්ලෙක් ටෙලිනාට්‍යය සදහා ආරාධනාව ලැබුනා. රොෂාන් රවින්ද්‍ර මහතාගේ මග පෙන්වීම යටතේ සහ නිර්මාණයෙහි මා සමග වැඩ කරපු සහෝදර රංගන ශිල්ප, ශිල්පිනියන්ගේ සහයෝගයෙන් ධම්ම් කියන චරිතය ගොඩනගා ගන්න මම මහන්සි වුණා. එම චරිත නිරූපණයේ සාර්ථකත්වය පිළිබද ප්‍රේක්ෂකයන්ගෙන් වගේම, ක්ෂේත්‍රයට සම්බන්ධ සෑහෙන පිරිසකගෙන් මට ඉහළ ප්‍රතිචාර ලැබුනා.

ජයප්‍රකාෂ් සිවගුරුනාදන් මහතා අධක්ෂණය කල නාඩගම්කාරයෝ ටෙලිනාට්‍යයෙහි මම නිරූපණය කලේ අඩු වයසින් විවාහ වුන අම්මා කෙනෙකුගේ චරිතයක්. එහි ගොඩ නැගුන මාලන් සහ රසිකා ආදර කතාවට සහ නිරූපණය කල චරිතයේ සාර්ථකව වෙනුවෙන් අති විශාල ප්‍රේක්ෂක ප්‍රතිචාරයක් ලැබුනා.

මෙම චරිත තුන විකාශනය අවසන් වෙලා තිබුනත් අදටත් ප්‍රේක්ෂකයන් ආදරය කරනවා, මතක් කරනවා, විශාල ප්‍රේක්ෂක ප්‍රතිචාරයක් ලැබෙනවා.

ඔබ රංගනය ශිල්පිනියක් මෙන්ම මේ වන විට ව්‍යවසායිකාවක් වනවා. ඔබගේ ව්‍යාපාරය පිළිබදව අපි දැන ගන්න කැමතියි…

මම පහුගිය කාලයේදි Kazee නමින් ව්‍යාපාරයක් ආරම්භ කලා. මගේ අතින්ම නිර්මාණය වුන විලාසිතාවන් එකතුවක් Kazee තුලින් ඉතා සාර්ථකව පාරිභෝගිකයනට ලබා දෙන්න මට හැකි වුනා. පහුගිය COVID කාල සමයේදි ඇති වුන අපහසුතායන් නිසා තාවකාලිකව ව්‍යාපාරය නවත්තන්න මට සිදු වුනා. නමුත් ඉතා ඉක්මනින්ම නව විලාසිතා එකතුවක් සමග නැවත ආරම්භ කිරිමේ සුදානමක් තියනවා.

ලගකදි විවාහ වෙන්න එහෙම අදහසක් තියනවාද? ආදරය සහ විවාහය පිළිබදව ඔබේ අදහස මොකක්ද?

ලගදි විවාහ වෙන්න නම් අදහස් නැහැ. කලබල වෙලා, යම්කිසි වයස සිමාවක් ඇතුලත විවාහ වෙන්න ඕනේ කියලා මගේ අදහසක් නැහැ.

ආදරය කිරිමේදි සහ විවාහයකදි විශ්වාසය ගොඩනගා ගැනිම, එකිනෙකාව තේරුම් ගැනිම, සහයෝගයෙන් කටයුතු කිරිම සහ අනවශ්‍ය විදියට සීමා, නිතිරීති නොදමා එකිනෙකාට නිදහස ලබාදෙමින් එකිනෙකාගේ අවශ්‍යතාවයන් තේරුම් ගෙන ඉවසීමෙන් ගණුදෙනු කිරිම සහ අනෙකාගෙන් බලාපොරොත්තු වෙන දේවල්වල සීමාවක් තබාගැනීම සම්බන්ධතාවක් සාර්ථකව පවත්වාගෙන ‍යන්න ඉතාම වැදගත් වෙනවා කියලා මම හිතනවා.

රංගන ක්ශේත්‍රයට පැමිණෙන නවක රංගන ශිල්ප ශිල්පිනියන්ව දිරිගැන්විමට ඔබ මොනවාද කියන්න කැමති?

මම හිතනවා මෙම විෂයට අවංකව ආශාවක්, ආදරයක් තියෙන්න ඕනේ කියලා. එවැනි පිරිස විෂය පිළිබදව හොයන්න, ඉගෙන ගන්න ඉබේම යොමු වෙනවා. එම අධ්‍යනයෙන් තමයි චරිතාංග රංගන ශිල්පියෙකු විදියට ඉදිරියට යන්න පුලුවන්. රංගන පිළිබදව ඉගෙන ගන්න ජාතික තරුණ සේවා සභාව, ටවර් හෝල් පදනම වැනි ආයතන සහ ක්ශේත්‍රයේ ප්‍රවීනයන් විසින් මෙහෙයවන පාඨමාලාවන් තියනවා. විෂය පිළිබදව මූලික අධ්‍යාපනයක් ලබා අඩිතාලමක් සකසා ගනිමින් ක්ශේත්‍රයට පැමිණිම මෙහි රදා පැවැත්මට ලොකු රුකුලක් වෙනවා කියන එකයි මගේ විශ්වාසය.

කසුනිගේ තවත් රංගන හැකියාවන් ප්‍රේක්ෂක අපට ඉදිරියේදි දැක ගන්න ලැබෙන නිර්මාණය මොනවාද?

මම රංගනයෙන් දායක වු වෛතාලේ, රැහැයියෙක් වැනි ටෙලි නිර්මාණය ඉදිරි කාලයේදි විකාශනය වෙයි කියලා බලාපොරොත්තු වෙනවා.

ඒවගේම සසික හේරත් මහතා අධක්ෂණය කල සිහින සමිකරණ ච්ත්‍රපටය ඉදිරියේදි තිරගතවිමට නියමිතයි. මෙම ච්ත්‍රපටයෙහි සජිත ඇන්තනි සමග ප්‍රධාන චරිතය නිරූපණය කරන්න මට අවස්ථාව ලැබුනා. මෙය කාලීන මාතෘකාවක් පිළිබදව ගොඩ නැගුන ච්ත්‍රපටයක් වෙනවා. මෙම ච්ත්‍රපටය ප්‍රේක්ෂකයන් ආදරයෙන් වැළද ගනිවි කියලා අපි බලාපොරොත්තු වෙනවා.

අමා නාකන්දලගේ

කලා ලෝකයෙහි අපි ආදරය කරන දක්ෂ තරු පවුලක සාමාජිකයෙක් සමග පිළිසදරෙහි යෙදෙන්නටයි අපගේ සුදානම. ඔබ අප කවුරුත් ආදරය කරන ප්‍රවීන රංගන ශිල්පීන් යුවලක් වන ආන්නද වික්‍රමගේ සහ මානෙල් වානගුරු දෙපළගේ දෙවෙනි පුත්‍රයා කිවාම ඔහු රංගනයෙන් දායක වුන ටෙලිනාට්‍යය කිපයක්ම ඔබට මතකයට නැගේවි.

එම ටෙලිනාට්‍යය අතරින් මෑත කාලයේදි ස්වාධීන රූපවාහිනියෙහි විකාශනය වු “කලු කුරුල්ලා” ටෙලිනාට්‍යය, සිරස TV නාලිකාවෙහි විකාශනය වු “චායා” ටෙලිනාට්‍යය සහ ස්වර්ණවාහිනියෙහි විකාශනය වු “කෝටිපතියෝ” ටෙලිනාට්‍යය ඔහුගේ රංගන හැකියාවන් මනාවට පිළිබිඹු කල ටෙලිනාට්‍යයන් වන අතර අපගේ හිතේද සුන්දර මතක සටහන් එකතු විශිෂ්ට නිර්මාණයන් වේ.

කුඩා කාලයේ සිටම කලාව තුලම හැදි වැඩුන ඔහු රංගනයේ දක්ෂතාවයන් සහ අත්දැකීමෙන් පරිපුර්ණ අයෙකු මෙන්ම ජනප්‍රියත්වයද එක ලෙසම පවත්වාගෙන ‍යන්නටද වාසනාවන්ත වුනා. නමුත් ඔහුව අපට මේ දවස්වල දකින්න නැත්තේ ඇයි? ඔහුගේ අලුත් තොරතුරු දැන ගන්නට අපි මෙවර සම්බන්ධ කර ගන්නේ අපි කවුරුත් ආදරය කරන සංකේත් වික්‍රමගෙ නම් වු රංගන ශිල්පයාවයි.

▪️සංකේත් වික්‍රමගේව අපිට මේ දවස්වල දකින්න නැත්තේ ඇයි?

පහුගිය කාලයේ විදෙස් ගත වෙන්න සැලසුම් කල නිසා සහ වෙනත් වැඩ කිපයක නියැලිමට සිදු වුන නිසා කලා නිර්මාණ සදහා දායකත්වය ලබා දෙන්න නොහැකි වුනා. මම දැනට මාස කිපයකට ඉහත දි එංගලන්තයෙහි පදිංචියට ආවා. ඉතින් මෙහෙ ඉදලා ලංකාවේ රූපගත කරන නිර්මාණය සදහා සම්බන්ධ වෙන්න අපහසු නිසා කලා කටයුතුවලින් කෙටි කාලයකට ඈත් වෙලා ඉන්න සිදුවෙනවා.

▪️ප්‍රේක්ෂක අප බොහෝ ආදරය කරන ඔබගේ පවුලේ අයගේ වතගොත ටිකක් කියමුද?

මගේ පවුලේ ඉන්නේ තාත්තයි, අම්මායි, අයියායි, මගේ බිරිඳ සහ අපිට දැන් චූටි පුතෙක් ඉන්නවා. අපි දෙන්නායි පුතයි බිරිදගේ තාත්තා සමග එංගලන්තයෙහි පදිංචි වෙලා ඉන්නවා. මගේ අම්මා සුපුරුදු පරිදි රංගන කටයුතු සදහා ඇයගේ දායකත්වය ලබා දෙනවා. මගේ තාත්තා පහුගිය කාලයේ අසනිපයෙන් හිටිය නමුත් ඔහු දැන් නිරෝගි සුවයෙන් ඉන්නවා. මගේ අයියා ජනිත් වික්‍රමගේ, එයත් සුපුරුදු පරිදි කලා කේෂ්ත්‍රයේ වැඩ කටයුතු වල යෙදිලා ඉන්නවා.

▪️ඔබගේ ජිවිතයේ ආදරය, ඔබේ ආදරණීය බිරිඳව අපට හදුනාවා දෙන්න කැමතියිද? ඇයව හමු වුනේ කොහොමද?

මගේ බිරිඳ අචිනි දුලංජලි දිල්හාරා. මම ඇයව දැන ගත්තේ මගේ යාළුවෙකුගේ මාර්ගයෙනුයි. ජනප්‍රිය පුද්ගලයන් සමග ගොඩක් දෙනෙක් හිතවත් වෙන්න, කතා බහ කරන්න කැමතියි. නමුත් අචිනි මට එහෙම විශේෂත්වයක් දැක් වුයේ නැහැ. මම එයාගේ ඒ ගතිගුණයට ගොඩක් කැමති වුනා.

මගේ අම්මා තාත්තා ලස්සන පවුල් ජිවිතයක් ගත කරනවා. අම්මා තාත්තට සලකන විදියට, ඔහුව රැක බලා ගන්න විදියට මම හරිම කැමතියි. අම්මයි මමයි හරි එකතුයි. මට සමහර වෙලාවට පොඩි බයකුත් හිතුනා අම්මා මගේ ලග නැති වුනොත් මට මොනවා වෙයිද කියලා.

මම ගිය ආත්මේ කරපු පිනකට වෙන්න ඇති අම්මා වගේම කෙනෙක් මට හම්බුනා. අචිනිගේ රූපයත් අම්මාට ගොඩක් සමානයි. ඉතින් අපි සතුටින් ජිවිතය ගත කරනවා.

ඒවගේම මගේ බිරිඳගේ තාත්තාව විශේෂයෙන් මතක් කරන්න ඕනේ. අපි කවුරුත් අදුරන් නැති නොදන්න රටක ජීවත් වෙන්න අවශ්‍ය ගුරුහරුකම් ලබා දෙමින් අපිත් එක්ක හැමදාම ලගින් ඉන්නවට තාත්තට මම මගේ හද පතුලෙන් ම ස්තුතිවන්ත වෙනවා.

▪️එංගලන්තයේ ජිවිතය කොහොමද? ලංකාවට යන්න බලාපොරොත්තුවක් තියනවාද?

එංගලන්තයේ ජිවිතය ගොඩක් හොදයි. ලංකාවට වඩා වෙනස් පරිසරයක් නිසා මට මෙහෙට තව හුරු වෙන්න වෙනවා. මම දැනට ව්‍යාපාරයක් මිලදි ගෙන තියනවා. මෙම දිනවල එහි නිතිමය කටයුතු කිපයක් කරගෙන යනවා. මෙහෙ හැමදේම ප්‍රමිතියකට අනුකුලවයි සිදු වෙන්නේ.

මම හිතන්නේ එංගලන්තය ජිවත් වෙන්න හොද රටක් නමුත් මගෙයි බිරිඳ ගෙයි බලාපොරොත්තුව ලංකාවේ චාරිත්‍රවලට අනුව ශ්‍රී ලාංකික පසුබිමක අපේ පුතාව උස් මහත් කරන්න.

මම කවදාවත් ලංකාව අමතක කරන්නෙ නැහැ. ඉදිරි කාලයේදි මගේම කලා නිර්මාණයක වැඩ කටයුතු ආරම්භ කරන්න ලංකාවට යන්න බලාපොරොත්තුවෙන් ඉන්නවා.

▪️ඔබේ රංගන ජිවිතයේ ආරම්භය පිළිබදව සහ මෙතෙක් රංගනයෙන් දායක වුන නිර්මාණ පිළිබදව කිවුවොත්..

මට වයස අවුරුදු 5 දි විතර මගේ තාත්තා රංගනයෙන් දායක වුන ටෙලිනාට්‍යයක් සදහා සම්බන්ධ වෙන්න අවස්ථාව ලැබුනා. එය

මගේ පළමු ටෙලිනාට්‍යයයි. ඉන්පසු මට වයස අවුරුදු 10 දි විතර සුමිත්‍රා රාහුබද්ධ මහත්මිය තිර පිටපත රචනා කල කුලවමිය නම් ටෙලිනාට්‍යය සදහා තෝරා ගන්නවා. එම ටෙලිනාට්‍යයෙහි මට ලැබුනේ විශේෂ අවශ්‍යතා සහිත දරුවෙකුගේ චරිතයක් ‍රග දක්වන්නයි. ඒ සදහා එවැනි දරුවෙකු සමග මම හිතවත් වෙලා කාලය ගත කරමින් අධ්‍යනය කලා. එම ටෙලිනාට්‍යයෙහි මගේ පියා සහ මව ලෙස රංගනයෙන් දායක වුන ලකි ඩයස් මහතා සහ වසන්ති චතුරාණි මහත්මිය මට විශාල සහයෝගයක් ලබා දුන්නා. ඒ දෙපළව මම ආදරයෙන් මතක් කරනවා. මෙම නාට්‍යයෙහි මගේ චරිතය වෙනුවෙන් සිඩ්නිස් සම්මාන උළෙලෙහි සම්මානයෙන් ඇගයිම් ලබන්න මට හැකියාව ලැබුනා.

එමෙන්ම සුදත් රෝහණ මහත්මයාගේ එක ඉත්තක මල් සහ ගග අද්දර කැලේ යන ටෙලිනාට්‍යයන් සදහා රංගනයෙන් දායකවන්නට මට අවස්ථාව ලැබුනා. ඉන්පසු භාතිය සහ සංතුශ් දෙපලගේ උන්මාදිනි හැංගුනා ගීතයටද මට සම්බන්ධ වෙන්න පුලුවන් වුනා. ඒ අතරම පාසලේ කලා නිර්මාණය සදහා මම දායක වුනා.

කෙටි කාලයක විවේකයකින් පසුව ස්වාධීන රූපවාහිනියෙහි විකාශනය වු “කලු කුරුල්ලා” ටෙලිනාට්‍යය, සිරස TV නාලිකාවෙහි විකාශනය වු චායා ටෙලිනාට්‍යය සහ ස්වර්ණවාහිනියෙහි විකාශනය වු කෝටිපතියෝ ටෙලිනාට්‍යය වැනි ටෙලිනාට්‍යය කිපයකම රංගන දායකත්වය ලබා දෙන්න මට හැකියාව ලැබුනා.

ඉතින් එහෙත් මෙතෙක් මගේ රංගන ජිවිතය ගැන, මට ලැබුන අවස්ථාවන් ගැන මම සතුටු වෙනවා.

▪️ඔබගේ ජීවන රටාව අපට දකින්නට ලැබෙන අලුතින් ආරම්භ කල කාර්ය්‍ය පිළිබදව කියමුද?

මාව දන්න අදුනන අය මෙන්ම, මගේ ප්‍රේක්ෂකයන් බොහෝ දෙනෙක් අහනවා “ඔයා කොහෙද ඉන්නේ? මොකද කරන්නේ? ඇයි අපට පේන්න නැත්තේ? කියලා. ඉතින් මට ආදරය කරන, මගේ තොරතුරු දැන ගන්න කැමති ඒ හැමෝම වෙනුවෙන් මම හිතුවා Youtube channel එකක් ආරම්භ කරන්න.

මගේ ව්‍යාපාර කටයුතු සහ පෞද්ගලික වැඩ කටයුතු නිසා කාර්යබහුලත්වය වුවත් මට ආදරය කරන අය වෙනුවෙන් කාලය වෙන් කර ගෙන එංගලන්තයේ තියෙන විශේෂ ස්ථාන සහ රසමුසු තැන් youtube channel එකක් ඔස්සේ පෙන්වන්න බලාපොරොත්තුවක් තියනවා. ඇත්තටම කිවුවොත් මේ සදහා මටත් වඩා උනන්දුවක් තියෙන්නේ මගේ බිරිඳටයි.

ඉතින් මගේ ප්‍රේක්ෂකයන් සියලු දෙනාටම ආරාධනා කරනවා “Sanketh Wickramage” මගේ Youtube channel එක සමග එකතු වෙන්න කියලා.

▪️රංගන ක්ශේත්‍රයෙන් දුරස් විම පිළිබදව ඔබට දැනෙන්නේ කොහොමද? කලා හැකියාවන්ගෙන්, අත්දැකිමෙන් පරිපුර්ණ වු එමෙන්ම ප්‍රේක්ෂක ආදරය දිනා ගත් ඔබව අපට නිර්මාණ තුලින් ඉදිරියේදි දකින්නට ලැබේවිද?

මේ වනවිට ලංකාවේ ප්‍රමිතියකට අනුව බොහෝ උසස් නිර්මාණය බිහිවිම ගැන මම සතුටු වෙනවා. ඒ වගේම ඉතා දක්ෂ නවක රංගන ශිල්ප ශිල්පිනියන් ක්ශේත්‍රයට එකතු වෙලා ඉන්නවා. මම හිතනවා ඒ අයටත් අපි අවස්ථාව දෙන්න ඕනේ කියලා.

මම මීට පෙර සදහන් කලා වගේ ගුණාත්මක නිර්මාණයක් ආදරණිය ප්‍රේක්ෂකයන්ට ලබා දීමේ බලාපොරොත්තුවෙන් ඒ සදහා මුලික වැඩ කටයුතු මේ වනවිට සුදානම් කරමින් ඉන්නවා.

ඉස්සර වගේ කලා නිර්මාණ සදහා දායකත්වය ලබා දෙන්න නම් බැරි වෙයි. නමුත් කලාවෙන් ඈත් වෙලා නම් නැහැ.

අමා නාකන්දලගේ

එදා 1953 වසරේ පොසොන් මස දෙවැනිදාවක් විය. දකුණු ලක ගාල්ල නඟරයේ උඩුගම ග්‍රාමයේ පිහිටි කුඩා රෝහලකින් ඇසුණු බිළිඳු හඬකි. එදා වාතලයට මුහුවු ඒ හඬ දිනෙක හිරු නොබසින අධිරාජ්‍යයේ හඬ නගාවියැයි ඒ බිළිඳා මෙළොවට බිහිකළ පෙම්බර මෑණියෝවත් සිතන්නට නැත. පොසොන් මස උදා වී ඇහැල මලින් පරිසරය කහපාටින් බැබලෙද්දී,රජයේ සේවකයකු වූ ජේ. ඊ. අමරසිංහ සහ පද්මාවතී විජේසේකර ඒකනායක නම් වූ එම දම්පතීන්ගේ තෙවැනි පිරිමි දරුවා ලෙස උපන් මේ කුල කුමරාට බන්දුල යැයි නම් තබනු ලැබිණ. 

දකුණු පලාතේ ගාල්ල දිස්ත්‍රික්කයේ හිනිදුම්‍ පත්තුවේ තවලම නම් වූ සුන්දර ගම්මානය මේ ළඳරු බන්දුලගේ දෙමාපියන්ගේ ගම විය. මනබඳිනා සුන්දර කඳු වළල්ලකින් වටවු තවලම ගම්මානය සිංහරාජ වනය ආසන්නයේම පිහිටි අතර ගම මැදින් ගලා ගිය ගිං ගං කොමළිය ගමේ සුන්දරත්වය  තව තවත් ඉහළ නැංවීමට සමත්‍ වූවද අධික වැසි සමයන්හිදී ගංවතුර තර්ජනයෙන් ගම බිළිගැනීමටද අමතක නොකලාය. හැම වසරකම මෙය සිදු වූවත් ගම්මු කිසිදාක ගඟ හා උරණ නොවූයේ පරිසරයට පෙම් බැඳි ඔවුන් එහි අගය දැන උන් හෙයිනි. 

රජයේ සේවකයකු වීමේ වරදට කුඩා බන්දුලගේ පියාට රටේ තැනින් තැනට මාරු වී යාමට සිදු වූ අතර හෙතෙම ඒ යන සෑම තැනකටම තම දරු පවුළද රැගෙන ගියේ පවුළකට පියෙකුගේ ආදරය හා රැකවරණය නිරතුරුවම අවැසි බව එතුමන් ඇදැහූ සත්‍යක්ම වූ බැවිනි. එහෙත් මෙම සංචාරක දිවි පෙවෙත නිසා කුඩා බන්දුලට තවලම සුන්දර ගම්මානයේ එතරම් කාලයක් විසීමට නොලැබිණ. එමෙන්ම පස්වන වසරට සමත් වෙද්දී රට පුරාම පිහිටි පාසල් පහකට යෑමටද ඔහුට සහ ඔහුගේ සොයුරු සොයුරියන්ට සිදු විය. කුඩා බන්දුලට වැඩිමහළු සොයුරන් දෙදෙනකු උන් අතර ඔහුට බාල මලනුවන් දෙදෙනකු හා නැගෙණියන් සය දෙනෙකු සිටියහ. මව පියා ඇතුළු සාමාජිකයින් දහතුන් දෙනෙකු උන් එම පවුළ ඉතාමත් සතුටින් දිවි ගෙවූයේ කොයි පලාතට මාරුකර යැවූවද ඒ යන තැන දෙව්විමන තනා ගනිමිනි. 

පුංචි සංන්දියේ බන්දුල ළදරුවාට තිබූ ග්‍රහ අපලයක් නිදහස් කර ගැනීම සඳහා ඔහුව ආරණ්‍යකට පූජා කිරීමට දෙමාපියන්ට සිදු වූවද ඔහුව මහණ කිරීම සඳහා කැමැත්‍තක් මෙන්ම අකමැත්තක්ද ඔවුන්ගේ හදවත් තුළ නොතිබිණ. එහෙත් අනෙක් දරුවන්‍ අතරේ ඔහුට යම් විශේෂත්වයක් නම් දෙමාපියන්ගෙන් ලැබිණ. එනම් ඔහුට දඬුවම් ආදිය අඩුවෙන් දීමයි. කෙසේ වෙතත් උපතින්ම නිවුණු දරුවකු වූ පුංචි බන්දුලට දඬුවම් කිරීමේ අවශ්‍යතාවයක් දෙමාපියන්ට පැන නැඟුනේ නැත. 

කුඩා බන්දුල පාසල් යන වයසට කෙමෙන් ළඟා වූ අතර ඔහුගේ පියා ඔහුව ගාල්ලේ කලේගාන කතෝලික විද්‍යාලයට  නමෝවිත්තියෙන්ම ඇතුළත් කරනු ලැබිණ. ප්‍රාථමික පාසලක් වූ එහි ඔහුට ඉගෙන ගන්නට ලැබුණේ වසරකි. 

ඉන්පසුව ඔහුව සහ ඔහුගේ වැඩිමහල් සොයුරන් දෙදෙනාව ගාල්ලේ රිච්‍මන්ඩ් විද්‍යාලයට ඇතුළත් කිරීමට කුඩා බන්දුලගේ පියා සමත් විය. එහි එක දිඟට වසර කිහිපයක්ම ඉගෙනුම ලැබුමට තුන් සොහොයුරන් වාසනාවන්ත වූහ. 

එහෙත් හදිසියේම පියා රජයේ සේවකයකු වීමේ අභාග්‍යට මුහුණ දීමට ඔවුන් තිටදනාට සිදු විය. මෙවර පියාට මාරු වීම ලැබී තිබුණේ ඇතුගල් පුරයටය. ඒ, 1963 වසරේදීය. එහිදී දස හැවිරිදි බන්දුල කුරුණෑගල මලියදේව විද්‍යාලයට ඇතුළත් කරනු ලැබිණ. එහෙත් අවාසනාවකට එහි ඔහුට රැඳෙන්නට හැකි වූයේ වසරක වැනි කෙටි කාලයක් පමණි. ඒ, ඔහුගේ පියාට පොලොන්නරුවට මාරුවීමක් ලැබුණු බැවිනි. 

සිය පවුළම කැටුව පොලොන්නරුවට ගිය පියා කුඩා බන්දුලව පොලොන්නරුව තෝපාවැව මහා විදුහලට ඇතුළත් කළේය. එහිදි ඔහුට ඉගෙන ගැනීමට ලැබුණේ එකම එක වසරක් පමණි. ඉන්පසු ඔහුට යෑමට සිදුවූයේ කඳුරුවෙල මහා විද්‍යාලයටයි. වසරින් වසර එක් එක් පාසලට මාරු වී යාම බන්දුල දරුවාට දැනුනේ මහා වදයක් ලෙසිනි. තනිකරම දඬුවමක් විලසිනි. එමෙන්ම රිච්මන්ඩ් සහ මලියදේව වැනි ඉහල පාසල්වල ලැබූ අධ්‍යාපනයත් සමඟ සසැඳීමේදී මෙම කුඩා පාසල්වල ඉගෙනුම ඔහුට වහකදුරු මෙන් තිත්ත වීමට වැඩි දොහක් ගියේ නැත. ඒත් සමඟම ඔහුගේ සිතට ආවෙ කඳිම අදහසකි. එනම් මහනවීමට යෑමයි. 

හොඳ දිනයක් එනතුරු ඇඟිලි ගනිමින් හුන් බන්දුල ගැටවරයා තම අදහස දෙමාපියන් හමුවේ තැබුවත් ඔවුන් ඊට කැමති වූයේ නැත. එහෙයින් දිඟටම ඒ ගැන කන්නලව් කරන්නට ඔහුට සිදු විය. අවසානයේ මෙය වදයක් වනතුරුම උග්‍ර වූ විට එක පොරොන්දුවක් මත මහන වීම සඳහා ඔහුට අවසර ලැබිණ.  එනම් කිසිමදාක සිවුරු නාරින බවට වූ පොරොන්දුවයි. 

මේ කාලයේ මහන වීමට මාර්ගයක් සොයමින් හුන් බන්දුල කොලු ගැටයාට දිනෙක පුවත්පතක පළ වී තිබූ දැන්වීමක් අහම්බෙන් ඇස ගැටුණේ දෛවයේ සරදමක්‍ විලසිනි. එනම් මහන කිරීම සඳහා යම් පිරිවෙනකින් කුළ දරුවන් සොයනා බවයි. වහා ක්‍රියාත්‍මක වූ හෙතෙම තම දෙමාපියනට මේ බැව් දැන්වීය. මහනවීම සඳහා අම්බලන්ගොඩ මහාචේතිය පිරිවෙනට යා යුතු වූ අතර 1964 වසරේ දිනෙක දෙමාපියන් සහ නෑදෑයින්ද කැටුව ඔහු එහි ගියේය. මහනවීමට සූදානම්වීමක් වශයෙන් මාස දෙකක පමණ කාලයක් පිරිවෙනේ නතර වී සිටීමට කුඩා බන්දුලට සිදු විය. ඉන්පසු එම වසරේම දිනෙක ඔහුව මනකරනු ලැබූවත් වැඩි දොහක් එම පිරිවෙනේ සිටීමට පොඩි හාමුදුරුවන්ට නොහැකි විය. ඒ විහාරස්ථානයේ ඇතිවූ අරබුද තත්ත්වයක් හේතුවෙනි. ඔහුගේ පියා වහා පැමිණ පොඩි හාමුදුරුවන්ව පොළොන්නරුවට කැටුව ගිය නමුදු හාමුදුරුවන්ට කුමක් කළ යුතුදැයි නිශ්චිත සැලසුමක් ඔහු තුළ නොවීය. 

මෙසේ කාලය ගතවෙද්දී පුංචි හාමුදුරුවන්ගේ මෑණියන්ගේ ඥාතීන් දෙදෙනකු වූ එවකට ප්‍රසිද්ධ සඟරුවන් ද්විත්වයක් පිළිබඳව ඔවුන්ට සිහිපත් විය. ඉන් එක හාමුදුරුනමක් වූයේ ගාලු පලාතේ ප්‍රධාන සංඝනායක වූ නෙලුවේ ශ්‍රී ගුණානන්දාබිධාන මහා නායක ස්වාමින් වහන්සේය. උඩුගම ශ්‍රී සාසනාලංකාරාමයෙහි වාසය කළ උන්වහන්සේ ඉතාමත් චතුර ලෙස ධර්මදේශනාවේ සමතකු වූ අතර පළාතේම ඉතාමත් ප්‍රසිද්ධ සඟරුවනක් විය. උන්වහන්සේ අනගාරික ධර්මපාල තුමන් සමඟ එකට කටයුතු කරමින් හා එතුමා අනුව යමින් පාසල් රාශියක් පලාතේ ඇරඹීමට මූලිකව ක්‍රියාකළ අතර සමාජයට සිදුකළ මෙහෙය අපමණ විය. 

අනෙක් ඥාති ස්වාමින්වහන්සේ වූ නෙළුවේ ශ්‍රී ජිනරතන ස්වාමින් වහන්සේ ඉන්දියාවේ කල්කටා නුවර පංසලක විසූ අතර අනගාරික ධර්මපාල තුමන් ඇරඹූ ඉන්දියානු මහාබෝධි සමාඟමේ ලේකම්වරයා විය. 

ඉඳින් , පුංචි හාමුදුරුවන්ව උඩුගම සාසනාලංකාරාමයට ගෙනගොස් ඇරලීමට පියා කටයුතු කළ අතර 1966 වසරේදී නැවතත් පැවිදි දිවියට ඇතුළත්කරනු ලැබිණ. එහිදී මෙම කටයුත්තට නාකියාදෙණිය ශ්‍රී සරණපාල පිරිවෙනේ නායක හාමුදුරුවන් වූ කදුරුපොකුණේ ධම්මාවංස හාමුදුරුවන් මූලික වී කටයුතු කළ අතර කුඩා හාමුදුරුවන්ගේ සිවුරුපටිය කරේ බඳින ලද්දේද උන්වහන්සේ විසිනි. මෙහිදී පොඩි හාමුදුරුවන්ට නමක් ලබා නොදුන් අතර ඕනෑ නමක් දමාගැනීමට අවසර දෙනු ලැබිණ. එහෙයින් උන්වහන්සේගේ ගිහි කල නම වූ බන්දුල යන නමම පාවිච්චියට ගැනුනු අතර දෙමාපියන්ගේ ගමේ නමද මුලට යොදා තවලම බන්දුල නමින් දෙවැනි වරට පැවිදි දිවිය ඇරඹූ සේක. 

ඉන්පසු නාකියාදෙණිය ශ්‍රී සරණපාල පිරිවෙනින් අධ්‍යාපනය ලැබීම ඇරඹූ තවලම බන්දුල ස්වාමින් වහන්සේ එහිදී හොඳින් ඉගෙනීමේ කටයුතු කරමින් ප්‍රාචීන ප්‍රාරම්භක විභාගය සහ ප්‍රාචීන මධ්‍යම විභාගයද සමත්ව අපොස සාමාන්‍ය පෙළ හා උසස් පෙළද ඉහලින්ම සමත් වීමට හැකියාව ලබා ගත්හ. 

1974 වසරේදී මහණුවර මල්වතු මහා විහාරයේදී උපසම්පදාවද ලබා ගත් තවලම බන්දුල ස්වාමින් වහන්සේ 1975 වසරේදී පේරාදෙණිය සරසවියේ කලා පීඨයට ඇතුළු වූහ. එහිදී වසර 4 ක් පුරා සමාජ විද්‍යා විෂය හදාරා 1979 වසරේදී දෙවැනි පෙළ ගෞරව උපාධියක්ද සමඟින් තම උපාධිය සම්පූර්ණ කළේ උන්වහන්සේ සතු නිසර්ග හැකියාවන් ප්‍රදර්ශනය කරමිනි. 

1979 වසර වෙනවිට රටේ ඇතිවූ ආරථික සහ සාමාජීය වෙනස්කම් සහ තම ගුරුදේවයන් වූ නෙළුවේ ශ්‍රී ගුණානන්ද යතිවරයානන්ගේ අපවත්වීම ආදිය හමුවේ මේ ලිපියේ කතානායක ස්වාමින්වහන්සේ වූ තවලම බන්දුල හාමුදුරුවන්ට තම දිවියේ යම් වෙනසක් ඉතාමත් තදබල ලෙසින් දැනෙන්නට විය. එනම් මව්බිමෙහිම මෙලෙසින් වසනවාද නැතිනම් ලෝකයේ වෙන රටකට ගොස් ධර්මප්‍රචාර කටයුතු කරමින් ලෝකයට සමාජයට සේවයක් කරනවාද යන්නයි. 

මේ මොහොතේ උන්වහන්සේගේ මතකයට එකවරම ආවේ කල්කටාවේ සිටින තම ඥාති ස්වාමින් වහන්සේ වූ නෙළුවේ ශ්‍රී ජිනරතන හාමුදුරුවන්වය. වහා තම අදහස එනම් අධ්‍යාපන හමාරකොට ඇතිබව, ශ්‍රී ගුණානන්ද හාමුදුරුවන්ගේ අභාවය සහ තමන් පිටරටක ධර්මප්‍රචාරයට ඇති කැමැත්ත යන කාරණා දක්වා ලියමනක් තැපැල් කළේ ලැබෙන ඕනෑම පිළිතුරක් බලාපොරොත්තුවෙනි. එහෙත් ලැබුණු පිළිතුර බන්දුල හාමුදුරුවන්ගේ බලාපොරොත්තු පුබුදුවාලීමට සමත් විය. 

ලැබුණු ඇරයුම ඉතසිතින් බාරගත් බන්දුල හාමුදුරුවෝ තමන්ගේ මිත්‍ර හිමිනමක් වූ අත්තනගල්ලේ ලංකානන්ද ස්වාමින් වහන්සේත් සමඟ කොළඹ කොටුව දුම්රියපළින් ප්‍රවේශපත්‍ර ගෙන තලේමන්නාරම දක්වා දුම්රියෙන් ගොස් එතැන සිට බෝට්ටුවක දකුණු ඉන්දියාවේ චෙන්නායී නුවරට ළඟා වූහ.  එතැනිනි කල්කටාව බලා ගිය උන්වහන්සේලා දෙනම ශ්‍රී ජිනරතන හාමුදුරුවන් බැහැදැක කල්කටාවේ එම විහාරස්ථානයේ දින කිහිපයක් ලැගුම් ගත්හ. 

ඉන්පසු ගුණානන්ද හාමුදුරුවන්ගේ මඟපෙන්වීම යටතේ ලංකාවෙන් පැමිණි මෙම නව යොවුන් හාමුදුරුවරු දෙනම කල්කටාවෙ වෙනත් ප්‍රාදේශීය විහාරස්ථානයක වැඩකටයුතු බලාකියාගෙන ධර්මප්‍රචාරක කටයුතු කිරීම සඳහා යවනු ලැබිණ. එතැන ටික දිනක් ඒ වැඩ කරමින් සිටිනා විට බන්දුල හාමුදුරුවන්ට සිතුනේ තම අධ්‍යපන සුදුසුකම් හා දැණුම අනුව මීට වඩා වැඩි සේවයක් සමාජයට හා බෞද්ධ ප්‍රජාවට කළ හැකි බවයි. එහෙයින් මේ ගැන දන්වා එම විහාරස්ථානයේ කටයුතු ලංකානන්ද හාමුදුරුවන්ට පැවරූ බන්දුල හාමුදුරුවෝ ආපසු කල්කටා විහාරයට වැඩමකොට  එහි උප ප්‍රධාන සංඝනායක තනතුරද හොඹවමින් එහි වසර අටක කාලයක් ගත කළේ තමන් සතු ආගමික හා පරිපාලන හැකියාවන් මොනවට ප්‍රදර්ශනය කරමිනි. 

ඒ කාලයේ දී කල්කටා විශ්ව විද්‍යාලයටද ඇතුළත් වූ උන්වහන්සේ පුස්තකාල සම්බන්ධ උපාධියක් සම්පූර්ණ කර ගැනීමට සමත් වූ අතර තමන් උපාධිය ගෙන තිබූ සමාජ විද්‍යා විෂයෙන්ම ශාස්ත්‍රපති උපාධියද දිනා ගැනීමට කටයුතු කළහ. 

කල්කටාවේ විහාරස්ථානයේ වැඩවසන සමයේ නෙළුවේ ශ්‍රී ජිනරතන ලොකු හාමුදුරුවන්ගේ මඟපෙන්වීම යටතේ කල්කටාවේද අනාථ නිවාසයක් නිර්මාණය කර ඒ තුළින් අන්ත අසරණ කාත්කවුරුත් නොමැති ළමුන්ට සරණක් වූයේ අනගාරික ධර්මපාල තුමන් ගත් මඟ යමිනි. අනගාරික ධර්මපාල පදනමේ උදව්වෙනි. 

මෙසේ කාලය ගෙවී ගිය අතර 1983 වසරේ දී නෙළුවේ ශ්‍රී ජිනරතන ලොකු හාමුදුරුවන්ගේ අපවත්වීමත් සමඟම එම විහාරස්ථානයේ පරිපාලන කටයුතුවල විශාල වෙනස්කමක් සිදුවිය. පූජ්‍ය මාපලගම විපුලසාර හිමියන් මහා බෝධි සමාගමේ නව ලේකම් ධූරයට පත් වී පැමිණි අතර උන්වහන්සේ සමඟද අපේ තවලම බන්දුල ස්වාමීන්වහන්සේ තමන්ට පැවරුණු  වගකීම් ඉටුකරමින් විහාරස්ථානයේ සහ සමාජයේ දියුණුවට කටයුතු කළහ. එහෙත් තම දෙවැනි ගුරුදේවයන්ගේද අභාවයෙන් පසු වෙනත් තැනකට යෑමට කාලය පැමිණ ඇතිබව උන්වහන්සේට සිතිණ. මේ අදහස මාපලගම විපුලසාර ස්වාමීන්වහන්සේට සැලකළ විට උන්වහන්සේ ඉතාමත් කරුණාවෙන් යුතුව ලංඩනයේ බෞද්ධ විහාරයේ පුරප්පාඩුවක් ඇතිබව සැලකර සිටියේ බන්දුල හාමුදුරුවන්ගේ බලාපොරොත්තු ඉහළ නංවමිනි. 

එකල ලංඩන් බෞද්ධ විහාරය බටහිර ලංඩනයේ චිසික් නගරයේ හීත්ෆීල්ඩ් ගාඩ්න්ස් පාරේ පිහිටි අතර එහි නායකත්වය දැරුවේ පූජ්‍ය මැදගම වජිරඥාණ ස්වාමීන්වහන්සේ විය. විපුලසාර හිමියන් වජිරඥාණ හිමියන්ට ලිපියක් යැවූ අතර ඊට කැමැත්ත පළකෙරුනෙන් ලංඩනයට යෑම සඳහා වීසා ගැනීමට අපගේ බන්දුල හාමුදුරුවන්ට ලංකාවට යෑමට සිදු විය.  ඒ 1987 වසරේ දීය. කොළඹදී සම්මුඛ පරීක්ෂනයකට මුහුණදුන් බන්දුල හිමියන් එයින් සමත්ව තෙවසරක කාලයක් සඳහා ලංඩනයට පා තැබුවේ 1987 වසරේදීමය. 

එවකට ලංඩන් විහාරයේ දායක පිරිස දෙකට බෙදී යම් අරබුධකාරී තත්ත්වයක් පැන නැගී තිබිණ. සමාජ විද්‍යාව හා පරිපාලනයේ හසල දැණුමක් තිබූ බන්දුල ස්වාමින් වහන්සේ වජිරඥාණ නායක හාමුදුරුවන්ගේද අනුශාසනය යටතේ මෙම අරබුදකාරී තත්ත්වය සමනය කොට දායකයන් අතර සමගිය ගොඩනැඟීමට සමත් වූහ. එහිදී විහාරස්ථානයේ අයවැය කටයුතු හා ප්‍රචාරක කටයුතු ආදිය කිරීම බන්දුල හාමුදුරුවන්ට පැවරුණු අතර උන්වහන්සේ විහාරස්ථානයේ දහම්පාසල ඇරඹීමටද මූලික වී ක්‍රියා කළහ. මේ අතර කොම්පියුටර් තාක්ෂණයද ඉගෙන ගත් අපේ බන්දුල ස්වාමීන්වහන්සේ දායකයන්ගේ දත්ත ගබඩාකර ගැනීම ඔවුන්ට ඊමේල් යැවීම ආදි කටයුතුද මැනවින් ඉෂ්ඨ කරමින් විහාරස්ථානයේ දියුණුවට උර දුන්හ. වසර කිහිපයකට පසු 1994 දී ලංඩන් බෞද්ධ විහාරය එය වර්ථමානයේ පිහිටි දි ඇව්නිව් පාරට ගෙන එනු ලැබිණ. 

එතැන්පටන් විහාරයට පැමිණෙන ශ්‍රී ලාංකිකයින්ට පමණක් නොව සුදු ජාතිකයින්ටද ධර්මය කියාදෙමින් ඒ සැමටම සැනසීමක් ලබාදීමට අපේ බන්දුල හාමුදුරුවෝ කටයුතු කළහ. එමෙන්ම විහාරයට අඩුවක්ව තිබූ වෙබ් අඩවිය නිර්මාණය කිරීම, දායකයන්ගේ දත්ත ගබඩා කිරීම, ඊමේල් යැවීම ආදිය උන්වහන්සේගේ ක්‍රියාත්මක කළ අතර ඒ සඳහා දැණුම ලබා ගත්තේ තේම්ස් වැලි විශ්ව විද්‍යාලයට ඇතුල් වී උන්වහන්සේ ලබාගත් පුස්තකාල සහ තාක්ෂණ විද්‍යාව පිළිබඳ ඩිප්ලෝමා උපාධියට පිංසිදු වන්නටය. මෙයින් අපට පෙනී යන්නේ ඉගෙනුමට සහ තමන් සිටිනා ආයතනයේ දියුණුව සඳහා උන්වහන්සේගේ ඇති කැපවීම සහ නොපසුබට උත්සහයේ තරමයි. 

විහාරස්ථානයේ දියුණුවට ,ආගමික සහ සාමාජික කටයුතු සඳහා තම දිවියම කැප කළ උන්වහන්සේ තමන් කල්කටාවේදී ක්‍රියත්මක කළ සුබසාදන වැඩකටයුතු අනුව යමින් රාහුල අරමුදල නමින් සුබසාදන අරමුදලක් පිහිටුවීමට මූලික වී කටයුතු කළ සේක. දායකයන්ගේ සහ වර්ථමාන ලංඩන් බෞද්ධ විහාරාධිපති පූජ්‍ය බෝගොඩ සීලවිමල ස්වාමින්වහන්සේගේද සහය ඇතිව ඉතාමත් සාර්ථකව පවත්වාගෙන යනු ලබන රාහුල පදනමින් ලංකාවේ පමණක් නොව නේපාලයේ පවා නැතිබැරි ළමුන්ගේ සුබසාධනය හා ඉගෙනීමේ කටයුතු සඳහා සලසනුලබන සේවය අතිමහත්ය. දැනට ළමුන් දාහක් පමණ මෙම අරමුදලින් පිහිට ලබන අතර ඉන් ආධාර උපකාර ලබා තම දිවිය සාර්ථක කරගත් ළමුන්ද බොහෝ පිරිසකි. වසර 22 ක් පුරා අඛණ්ඩව  ක්‍රියත්මකවන රාහුල පදනමේ නිර්මාතෘ අපේ බන්දුල හාමුදුරුවන් බව ගෞරවපූර්වකව නැවතත් සිහිපත් කරනුයේ උන්වහන්සේට කෘතවේදීත්වය පළකිරීමක් වශයෙනි. 

ඔබ දැන් කියවා අවසන් කළේ මේ වසරේ පොසොන් මස දෙවැනිදාට තම දිවියේ සැත්තෑවන සැතපුම් කනුවට පියනඟන ශාස්ත්‍රපති පූජ්‍ය තවලම බන්දුල ස්වාමින්වහන්සේ මෙතෙක් පැමිණි ගමන් මඟයි.  බොහෝ ස්වාමීන්වහන්සේලා මෙන් තමන්ගේම කියා පන්සලක් තනාගැනීම තම දිවියේ මූලිකම දෙය වශයෙන් සලකා ඒ සඳහා උනන්දු නොවූ අපේ බන්දුල හාමුදුරුවෝ තමන් වැඩවසනා විහාරස්ථානයේ දියුණුවට සහ එයට අනුබද්ධිත දායක දායිකාවන්ට ආගමික හා සාමාජීය සැනසීමක් උදාකර දීම තම දිවියේ උතුම්ම යුතුකම හා වගකීම ලෙස සිතා කටයුතු කළ සේක. උන්වහන්සේගේ ජීවන ගමන් මඟ අප කාටත් ආදර්ශ ලබාගත හැකි ඉතාමත් සාරථක ගමන් මඟක් වන්නේ එහෙයිනි. මෙම සටහන අවසන් කිරීමට මත්තෙන් මේ සඳහා මට තොරතුරු ලබා ගැනීමට දායක වූ ලංඩනයේ කිරණ ටීවී ජාලයේ විසින් උන්වහන්සේගේ දිවිය අළලා නිර්මාණය කරන ලද “යතිවර ගවේෂණය” වැඩසටහන වෙනුවෙන් කිරණ ටීවී ජාලයට මගේ ස්තූතිය පුදකරමි. මෙම සාසනික හා සමාජීය සේවාව තව තවත් ඉදිරියටම රැගෙන යමින් තව තවත් අපේ රටට හා සමාජයට සේවය කිරීමට අවශ්‍ය කායික හා මානසික නිදහස පූජ්‍ය තවලම බන්දුල ස්වාමින් වහන්සේට ලැබේවායි සහ උන්වහන්සේට නිදුක් නිරෝගී සුබම සුබ හැත්තෑවෙනි ජන්ම සංවත්සරයකට සුබාසිරි පතමින් මම මේ සටහන අවසන් කරමි.

සටහන- චන්දන ගුණසේකර

කලා ලෝකයට පායා දීර්ඝ කාලයක් වුනත් නිර්මාණ තුලින් නිතර ඇයව අපට දකින්නට ලැබෙන්නේ නැහැ. නමුත් ඉතා සීමිත ජනප්‍රසාදයට පත් විශේෂ නිර්මාණ කිපයකින් ප්‍රේක්ෂක හිතේ සදා රැදි ඉන්නට ඇය සමත් වුනා. කූඹියෝහි සුදු නංගි, යං ටෙලිනාට්‍යයෙහි නන්දනි, ශ්‍රී සිද්දාර්ථ ගෞතම ටෙලිනාට්‍යයෙහි බද්‍රා කුමරිය සහ මෑතකදි විකාශනය වු වීදුරු මල්හි බිනුරි වැනි ලාංකික ටෙලි නාට්‍යය අඹරේ ඉතා ප්‍රසිද්ධියට පත් නිර්මාණයන් තුලින් ඇය පෙන්නුම් කල රංගන හැකියාවන් අප කෙසේ අමතක කරන්නද?

සෞන්දර්ය කලා විශ්වවිද්‍යාලයෙහි නාට්‍යය හා රංග කලාව විශේෂවේදී උපාධියකට හිමිකම් කියන ඇය එහිදි උගත් දැනුම, වෘත්තීමය වශයෙන් සේවය කරමින් ලාංකික දරු දැරියන් හට බෙදා දිමේ වගකිම ඉතා මැනවින් ඉටු කරනවා.

රංගන විෂයෙහි උගත්කම සහ ගායන, නර්තන දක්ෂතාවයන් මෙන්ම ඇය තුලින් දකිනා විශේෂ ලක්ෂණක් වන්නේ කරුණාවන්තකමයි. දරු දැරියන් වෙනුවෙන් සේවය කරන ගමන් සතුන් වෙනුවෙන්ද තමන්ගේ වටිනා කාලය වෙන් කරමින් ස්වේච්ඡාවෙන් ඉදිරිපත්වි වැඩ කිරිම ඇයගේ අප දකිනා තවත් විශේෂත්වයක් වෙනවා.

මෙවර අපි Magazine හරහා විස්තර ගෙන එන්නට අප සම්බන්ධ කර ගන්නේ කලා ලෝකයෙහි රංගන ශිල්පිනියන් අතර ඉතා වෙනස් ලස්සන ඇස් දෙකක් හිමි අහිංසකාවිය බිලේශා විජේරත්නයි.

🔸බිලේශා මේ දවස්වල මොනවාද කරන්නේ? ප්‍රේක්ෂක අපට ඔබව වැඩිය දකින්න නැත්තේ ඇයි?

මම රංගන ක්ශේත්‍රයට සම්බන්ධ වෙලා දැනට අවුරුදු නමයක් විතර වෙනවා නමුත් මම ඉතාම සිමිත නිර්මාණ ප්‍රමාණයකට සම්බන්ධ වෙලා තියෙන්නේ.

සෞන්දර්ය කලා විශ්වවිද්‍යාලයේ නාට්‍යය හා රංග කලාව විශේෂවේදී උපාධිය හදාරලා අවසන් කලාට පස්සේ මට පුලුවන් වුනා වැඩිපුර කාලයක් රංගන කටයුතු සදහා වෙන් කර ගන්න. වෘත්තීය රංගන ශිල්පිනියක් වශයෙන් අවුරුදු කිපයක්ම මම වැඩ කලා නමුත් පසුව මම තීරණය කලා ස්ථිර රැකියාවක් කරන්න. මම දැනට සපුගස්කන්ද මහා විද්‍යාලයේ සේවය කරනවා. මට නිවාඩු ලැබෙන ආකාරයට තෝරා ගත් ඉතාම සීමිත නිර්මාණ කිපයකට සම්බන්ධ වෙලා වැඩ කටයුතු කරගෙන යනවා.

🔸පහුගිය වකවානුවේදි ඉතා සාර්ථකව නිමාවු වීදුරු මල් සමග ගෙවුන කාලය කොහොමද?

චාමර ජනරාජ් පීරිස් මහතාට මාව හදුන්වා දුන්නේ වීදුරු මල් ටෙලිනාට්‍යයෙහි කලා අධක්ෂණය කල මලිත් පීරිස් අයියා. චාමර අයියා බිනුරි කියන චරිතයට මාව තෝර ගත්තා. ඔහු ඉතාමත් සුහදශිලි කෙනෙක්. ඔහු සමග වැඩ කටයුතු කරන්න හරිම පහසුයි. ඒවගේම ධනංජය අයියා ඇතුලු වීදුරුමල් ටෙලිනාට්‍යයෙහි මා සමග වැඩ කරපු සියලුම රංගන ශිල්ප, ශිල්පිනියන්ගෙන් සහ ටෙලිනාට්‍යය කණ්ඩායමෙන් මට විශාල සහයෝගයක් ලැබුනා.

වීදුරු මල්හි බිනුරිගේ චරිතයට මට ඉතා ඉහල ප්‍රේක්ෂක ප්‍රතිචාරයක් ලැබුනා. ප්‍රේක්ෂක ප්‍රතිචාර ගැන කතා කරනකොට රූපවාහිනියක් බලලා කෙනෙකුව මතක තියා ගන්න පුලුවන් වෙයි කියලා හිතන් නැති තරම් ඉතාම කුඩා වයසක දරුවෙක් මාව දැකලා අදුන ගෙන මට කතා කලා. එය මට මෑත කාලයේදි වුන අමතක නොවන සිදුවිමක් වෙනවා. ඉතින් මම හිතනවා බිනුරිගේ චරිතයට මම සාධාරණයක් කලා කියලා.

🔸ඉදිරියේදි රංගනයෙන් දායකවන්නට කැමති, හමු වෙනකම් බලාගෙන ඉන්න චරිතයක් තියනවාද? ඒවගේම ඔබ සම්බන්ධ වි වැඩ කරන්න කැමති අධක්ෂණකවරයෙකු ඉන්නවාද?

මම හරිම කැමති විවිධ ශෛලියේ චරිතයන් සදහා දායක වෙන්න. දැනට මම සම්බන්ධ වෙලා වැඩ කරපු සහ වෙනත් දක්ෂ අධක්ෂකවරුන්ගේ නිර්මාණ සදහා අවස්ථාව ලැබුනොත් තෝරාගෙන භාර ගන්නවා.

🔸ඔබ ආදරවන්තියක් ද? නැතිනම් ඔබ හොයන ආදරවන්තයාව කොහොම කෙනෙක්ද?

මම ආදරවන්තියක් වෙලා ඉදලා තියෙනවා නමුත් මම දැන්නම් ආදරවන්තියක් නෙවෙයි. මම විශේෂ දේවල් බලාපොරොත්තු වෙන්නේ නැහැ. මගේ ආදරය තේරුම් ගන්න පුලුවන්, මට ආදරය කරන කෙනෙක්ට මම ආදරය කරනවා.

🔸බිලේශා ගැන ප්‍රේක්ෂක අප නොදන්නා දෙයක් කියන්න කිවුවොත්…

මම සතුන්ට හරිම කැමතියි. පාරවල්වල ඉන්න අසනිප සත්තු ගෙදර ගෙනල්ලා මම බෙහෙත් කරනවා. දැනට මගේ ගාව පාරේ ඉදපු, ගෙවල් වලින් එපා කියලා අයින් කරන්න හදපු සාමාන්‍ය අහිංසක පුස් පැටව් කිපදෙනෙක් ඉන්නවා. මම දැනට කුලි නිවසක ජිවත් වන නිසා බලු පැටව්ව ගෙදර හදන්න අපහසුයි. ඉතින් පාරේ ඉන්න බලු යාළුවන්ට කෑම දීලා එයාලා ගැන බලනවා.

මම සතුන්ට ආදරෙයි, එයාල එක්ක කාලය ගත කරන්න කැමති ඒ නිසාම පහුගිය කාලයේ කඩවත Dr Pet සත්ව රෝහලෙහි සේවය කලා. එහිදි එයාලව හසුරුවා ගන්න, බෙහෙත් කරන්න වගේ දේවල් ඉගෙන ගත්තා. ඒවගේම විශාල අත්දැකීමක් ලබා ගත්තා. ඇත්තටම සතුන් බලා ගන්න එක මම හිතුවට වඩා සෑහෙන්න වගකීමකින් කරන්න ඕනේ කාර්ය්‍යක් වෙනවා. විශේෂයෙන් ලෙඩ උන සතුන් බලාගන්න එක අවධානයෙන් කරන්න ඕනේ. ඉතින් Dr pet හි වෛද්‍යවරු සහ කාර්‍යමණ්ඩලය විශාල කැපකිරිමක් ඒ වෙනුවෙන් කරනවා. තවත් රැකියාවක් කරන ගමන් මට එච්චර කැපකිරීමක් කරන්න අසීරු නිසා මම එතනින් අයින් උනා.

🔸ඔබගේ ගීත ගායන සහ නර්තන හැකියාව පිළිබදව මතක් කරමුද?

මම සුමන බාලිකාවෙහි අධ්‍යාපනය ලබන කාලයේදි නාට්‍යය, සංගීතය සහ නර්තනය තරගවලට සහභාගි වුනා. මම කථක් නර්තනය පිලිබඳ සාදර සුපැතුම් පීරිස් අයියා යටතේ ඉගෙන ගත්තා. සංගීත තරගවලින් මුළු දිවයිනෙන්ම පළවෙනි ස්ථානය ලබා ගත්ත අවස්ථාවන් තියනවා. දැනට අවුරුදු කිපයකට කලින් ජිනිදු ප්‍රවින් අයියා සමග දියමල නමින් ගීතයක් ගායනා කලා. ඒවාගේම තව ගීත නිර්මාණයක් සදහා මෙම දිනවල සුදානම් වෙමින් ඉන්නවා.

🔸ඔබේ තනි නොතනියට ඔබේ ලගින් හැමදාම ඉන්න පවුලේ අය ගැන මතක් කරමුද?

මගේ පවුලේ ඉන්නේ තාත්තයි, අම්මයි, අයියයි, අක්කයි, මමයි. ඒවගේම මම ආදරයෙන් බලා ගන්න මගේ පූස් යාළුවෝ ටිකකුත් අපේ ගෙදර ඉන්නවා.

කලා වැඩ කටයුතු හැමදේකටම විශේෂයෙන්ම අම්මා මට උදව් කරනවා. අම්මාට කොච්චර ‍වැඩ තිබුනත් හැමදාම වගේ මගේ වැඩ කටයුතුවලට මූලිකත්වය දෙනවා. මගේ පවුලේ හැමෝම මම ආදරයෙන් මතක් කරනවා.

🔸බිලේශාව අපට ඉදිරියේදී දකින්නට ලැබෙන නිර්මාණය මොනවාද?

මම රංගනයෙන් දායක වුන ලෝචන සෙනෙවිරත්න මල්ලි අධක්ෂණය කරපු Second shy web series එක මෙම දිනවල විකාශනය වෙනවා. අනුෂ්ක ඉදුනිල් මෙම web series එකෙහි නිශ්පාදකතුමාගේ Youtube channel එක හරහා ඔබට එය නරඹන්න පුලුවන්.

අනුජ ප්‍රියභානු මහතාගේ ටැක්සිකාරයා ටෙලිනාට්‍යය ඉදිරියේදි විකාශනයවිමට නියමිතව තියනවා. තවත් කෙටි චිත්‍රපට සහ නිර්මාණය කිපයක් විකාශනයවිමට නියමිතයි නමුත් මම කලින් කියපු විදියට මගේ රැකියාවේ කාර්යබහුලත්වය නිසා නිර්මාණ බොහෝමයකින් නම් මාව ඉදිරියේදි දකින්නට නොලැබේවි.

අමා නාකන්දලගේ

අපේ ජීවිතවලට අභියෝග විවිධාකාරයි. අභියෝග, ප්‍රශ්න, හිත් රිදීම් වගේම සතුටු මොහත වල් ජීවිතය ජීවත් කරවනවා. ජීවිත වර්ජනය තුළින් සමාජයෙන් මගහැර මාතෘකාවක් පිළිබඳව මම ඔබ හමුවට ගෙන එන ලබනවා. කාලකන්නි ජීවිත ගත කරමින් සිට ජීවිතයේ සැබෑ අරුත වටහා ගත් මිනිස් ජීවිතවල පසුවිපරම් ඒ.

අද කතාව ඔබ මෙතෙක් කියපු සත්‍ය කතාවන්ට වඩා වෙනස්. පවුල් සංස්ථාව බිඳ වට්ටමින් සමාජයේ වියරුවක් ව ඇති මත් ද්‍රව්‍ය,  මත්පැන් මිනිස් ජීවිතවලට කරන විනාසය ඔබ මම හිතනවට වඩා අතිශය භයානක බව අද ඔබට වැටහේවි.

අද කතා නායකයා මා මේ අකුරු කරන මොහොත වන විට පනස් පස් වසරක් ජීවත් වී තම  දිවිගමනට සමු දී අවසන්. අතිශය කඩවසම් පුරුෂ දේහයකින් හෙබි ඔහු ජාලිය ලෙස මම හඳුන්වමි.

ජාලිය පිළිගත් සමාජ හා ආර්ථික පසුබිමකින් යුත් පවුලක එකම පිරිමි දරුවායි. ඔහුට වැඩිමහල් සහෝදරියන් දෙදෙනෙක් සහ බාල සහෝදරියන් දෙදෙනෙක් සිටී. 

ජාලිය  මොනාටද addict  වෙලා හිටියේ?

මත්පැන් වලට 

කොච්චර කල් ඉදලා ද? කොහොමද ඒක වුණේ?

පාසල් අධ්‍යාපනයෙන් පස්සේ  මම කායවර්ධන ශූරිය ලෙස එක්තරා තරඟයකින් තේරී පත්වුනා. ඊට පස්සේ මම කායවර්ධන මධ්‍යස්ථානයක් පවත්වාගෙන ගියා. ගොඩක් ළමයි මගේ ජිම් එකට ආවා.  මං සුවපහසු ජීවිතයක් ගත කළා.  ඒත් මගේ ආසාව තිබ්බේ වෙන දෙයක්. මම ලංකාවේ ආරක්ෂක අංශයට බැදුනා. මම යුද්ධයටත් ගිය කෙනෙක්. එහි සිදුවන යම් යම් ක්‍රියාකාරකම් මට ආතතිය ඇති කළා. ඒත් සමගම මම ටිකින් ටික මත්පැන් ම බොන්න පටන් ගත්තා. මට depression ඇති වුණ නිසා මගේ දෙමව්පියෝ එතනින් මාව අයින් කර ගත්තා. ඊට පස්සේ මම රැකියාව සඳහා ගියේ රටේ පිළිගත් ප්‍රධාන පෙළේ ආයතනයකට. මම හොඳ නිලයක් දරපු නිසා සැලකිය යුතු වැටුපක් ලැබුණා. ඒ ස්ථානය නිසා මට නිතර නිතර මත්පැන් ඇස ගැටුනා. නොදැනීම මම මත්පැන් වලට ඇබ්බැහි වුණා. මේ වෙනකොට මම විවාහ වෙලා සිටියෙ.

ජාලිය පුනරුත්ථාපනය වුන කෙනෙක් ඒ අත්දැකීම් අපිට කියන්න.

බීමත්කම නිසා ගෙදර හරියට ගැටුම් ඇති වුණා. මේ වෙනකොට මට පුතෙක් හිටියා. 

ගෙදර ප්‍රශ්න නිසා මගේ දෙමව්පියන් හිතවතකුගේ මාර්ගයෙන් නිර්නාමික මත්ලෝලීන් ගේ සංසදයට මාව යොමුකලා.  එතන හිටපු සහෝදරයෙක් මාව මඩකලපුවේ තියෙන පුනරුත්ථාපන කඳවුරට ගෙන ගියා. මම එතැනට කැමැත්තෙන් ගියත් ඒ යනකොටත් මම බෝතලයක් විතර බීල ඉඳල තියෙන්නෙ. එතන මාස තුනක් ඉඳලා ආවත් , මට බීම නවත්වන්න බැරි වුණා. ඇතුලෙ ඉදිද්දි නොබී හිටියට එලියට ආවම මට ආයෙත් බොන්න ඕන වුණා. මේක මහා  කරුම ඇබ්බැහිවීමක්. පුනරුත්ථාපනය වෙන්න මගේ රැකියා ස්ථානයෙන් මට නිවාඩු ලබා දුන්නා. ඒ ඇවිත් නැවත මම රැකියාවට ගියා. 

ජාලිය ගේ බිරිඳ දරුවා මොන වගේ තත්ත්වයකට මුහුණ දුන්නේ ?

මගේ බීමත්කම නිසා අපිට තිබුණු දෙමහල් නිවසත් විකුණන්න සිද්ධ වුණා. මගේ පුතාට මාව පෙන්නන්න බැරි වුණා. ඒත් මගේ බිරිඳ මාව කවදාවත් දාලා ගියේ නැහැ. මම එයාට අදටත් ණයගැතියි. පුදුම ඉවසීමක් එයාට තියෙන්න ඇත්තේ. දවසක් මං හොඳටම බීලා ඇවිත් බිරිඳගෙ කකුල් දෙකට කඩුවෙන් කෙටුවා. වාසනාවට මම එදා කොටලා තියෙන්නේ මුවහත් පැත්තෙන් නෙවෙයි. ඒත් අවුරුදු ගානක් එයාට බෙහෙත් කරන්න වුණා. 

පුනරුත්ථාපනය වුනත් ඔබ ඇබ්බැහි වීමෙන්  සම්පූර්ණයෙන් සුව වුණු කෙනෙක් නොවෙයි. මොකක්ද ඒකට හේතුව?

රැකියා කරන ස්ථානයෙන් තුන් වතාවක් මට අවවාද කරලා අවසානයේ මාව රැකියාවෙන් ඉවත් කළා. නැවතත් මගේ  සහෝදරියෝ එකතු වෙලා මාව එඩේරමුල්ල පිහිටි පුනරුත්ථාපන මධ්‍යස්ථානයකට යොමු කළා. ඒ වෙනකොට මම පවුලට, නෑදෑයන්ට ලොකු කරදරයක් වෙලා තිබුනේ. මධ්‍යස්ථානය ඇතුලේ ඉන්නකම් මට නොබී ඉන්න පුළුවන්. ඔවුන් අපිට කෙටි නිවාඩු ලබා දෙනවා. අපේ ස්වයං විනය පරික්ෂා කරන්න. ඒත් ඒ එක දවසක වත් මට නොබී ඉන්න  බැරි වුණා. මම සෙන්ටර් එකේ ඉදලා ගෙදර යන්න බීලා. මට මගේ හිත පාලනය කරගන්න බෑ. ආසාව එලියට එනවා. ඊට පස්සේ මම එතන පාලනාධිකාරියට කියලා  දිගටම එතන ඉන්න තීරණය කළා. එහෙම ඉන්නකොට මගේ දරුවත් බිරිඳක් සතුටින් කාලය ගත කලා. මාව ඉන් පස්සේ එතන කාර්ය මණ්ඩලයට  බඳවා ගත්තා. මම හොඳින් වැඩ කළා. එළියට ගියාමයි මට පරීක්ෂාව ඇතිවෙන්නෙ. ඒ නිසා මම ගෙදර යන එක නතර කළා. ඒත් මම සෙන්ටර් එකේ ඉන්නකොට අසනීප වුණා. පසුව දැන ගත්තා මං මම ලියුකේමියා රෝගයෙන් පෙළෙන බව. 

එතැනදී නැවතත් මගේ ජීවිතේ කඩාගෙන වැටුනා. නිතරම මම සෙන්ටර් එකෙන් එළියට ආව බෙහෙත් ගන්න. දවසක් එහෙම එළියට ආපු මම ආයෙත් සෙන්ටර් එකට ගියේ නැහැ. මට දැන් ජීවත් වෙන්න බලාපොරොත්තුවක්   නැහැ. තව ටික දවසකින් මම මැරෙනවා. ඒ නිසා මොකටද නොබී ඉන්න කියලා මම ආයෙත් බොන්න පටන් ගත්තා. මේ කරුණු ඇබ්බැහිවීමෙන් මට මිදෙන්න බැරි වුණා. මගේ පවුලත් එක්ක සතුටින් ජීවත් වෙන්න මට බැරි වුණා. මගේ හිතේ තියෙන්නෙ ලොකු පසුතැවිල්ලක් විතරයි. දැන් මගේ පවුලෙ අයට මං බිවුවත් එකයි නැතත් එකයි ගානයි. එයාලා මං වෙනුවෙන් කරන්න පුළුවන් හැමදේම කලා. මටයි හැදෙන්න බැරි වුනේ. පුනරුත්ථාපන මධ්‍යස්ථාන දෙකේදීම අපිට හැදෙන්න පුළුවන් හොඳම විදිහට අපව හැඩ ගස්සනවා. හැදෙන්න අපිටත් කැපවීමක් උත්සාහයක් තියෙන්න ඕන. ඒ වගේ ලැබෙන අවස්ථාවක් මම වගේ ඇබ්බැහි ඉන්නා අය කිසිම දවසක මග ඇර ගන්න එපා. ඒ තමයි අපිට අපේ ජීවිත හදාගන්න ලැබෙන හොඳම අවස්ථාවක්.  මට ඒ අවස්ථාවේ නිසි ප්‍රයෝජන ගන්න බැරි වුනා. 

මගේ පුතා දැන් කඩවසම් තරුණයෙක්. හොඳ රැකියාවක නිරත වෙනවා. එයා  මාත් එක්ක කිසිම සම්බන්ධයක් නැහැ. ඒ දරුවා සාධාරණයි මම ඒ අයට දුන්නු වද වලට.. එයා සතුටින් ජීවත් වෙනවා. ටික දවසකින් මැරෙන්න ඉන්න මට ඒ හොඳටම ඇති.

මම තරුණ දරුවන්ට කියන්නේ අද වෙනකොට හැම තැනම මේ මත්පැන් මත්ද්‍රව්‍ය. මිනිස්සු පුදුම විදිහට අසරණ වෙලා. මේ මත්ද්‍රව්‍ය මත්පැන් වලට ජීවිත බිලි දෙන්න එපා. ඇබ්බැහි උනත් අනේ එකෙන් ගැලවෙන්න උත්සාහ කරන්න. මං වගේ කාලකන්නියෙක් නම් වෙන්න එපා.  පුනරුත්ථාපනය වුන හැම කෙනෙකුටම එයින් සම්පූර්ණයෙන්ම සුවය ලබන්න නම් ස්වඋත්සාහයෙන්, ආත්ම දමනය කින්, පරීක්ෂාවට ලක් නොවී ඉන්න හිතට ගන්න. එතකොට ජීවිතය විඳවන්නෙ නැතුව විඳින්න පුළුවන් වෙයි. 

                          ස්තුතියි

                     පියුමි සිල්වා

සිංහල ගීත ගායනා කලාම විශාල ප්‍රේක්ෂක ප්‍රතිචාරයක් ලැබුනා.

මෑත කාලයේ පැවති බොහෝ රියලිටි තරග අතර ජාත්‍යන්තරව පිළිගත් සංකල්පයකට අනුව බිහි වු Sirasa Voice Teens වේදිකාවෙන් සිංහල ගීත හරිම අපූරුවට ගායනා කරන දමිළ යුවතියක් අපට දැක ගන්නට ලැබුනා.

දමිළ, හින්දි මෙන්ම සිංහල ගීත නිවැරැදිව උච්චාරණය කර ගායනා කරමින් ප්‍රේක්ෂක ජනාදරය ලබා ගත් ඇය විටෙක නර්තන වින්‍යාසයන්ද හදුන්වා දෙමින් ගායනයෙන් මෙන්ම නර්තනයෙන්ද දක්ෂ බව අපට හෙළි කලා.

ඇයගේ දැඩි කැපවිම, උත්සාහය සහ දක්ෂතාවයන් හොදින් හදුනා ගෙන ඇයට ශක්තියක් වි උර දුන් අපේ රටේ අති දක්ෂ ගායිකාවක් වන විශාරද අභිශේකා විමලවිර මහත්මියටද ආඩම්බරයක් එක කරමින් ඇයට voice teens තරගය ජයග්‍රහණය කරන්නට හැකි වුනා.

ඇයගේ අනාගත බලාපොරොත්තු සියල්ලට ජය පතමින් අපි මෙවර පිළිසදරට sirasa voice teens ජයග්‍රාහීකාව වන දක්ෂ ගායන ශිල්පිනිය ප්‍රනීර්ශා ත්‍යාගරාජා ව එකතු කර ගමු.

🔹ප්‍රනීර්ෂා voice teens තරගයට සම්බන්ධ වුනේ කොහොමද?

Voice teens වැඩසටහනේ ප්‍රචාරක දැන්විම් දැකලා මට ලොකු කැමැත්තක් ඇතිවුනා තරගයට ඇතුලත් වෙන්න. බණ්ඩාරවෙල පැවැත්වුන මුලික වටයේ තෝරා ගැනිම් සදහා මම අයදුම කලා. එහිදි මට අවස්ථාව ලැබුනා තරගයට සම්බන්ධ වෙන්න.

🔹Blind audition එකේදි ඔබ ගායනා කරන්නේ ජනප්‍රිය දමිළ ගිතයක් වන Rowdy Baby. ඔබ එම ගිතය දක්ශ ලෙස ගායනා කල බව සානාථ කරමින් ඔබට coaches හතර දෙනාගේම කැමත්ත ලබෙනවා. ඔබ coach අභිශේකාව තෝරා ගැනිමට හේතුවුයේ කුමක්ද?

Blind audition සදහා ඉදිරිපත් වෙනකොට coaches හතර දෙනාගෙන් කාවද මගේ coach විදියට තෝර ගන්නේ කියලා මට අදහසක් තිබුනේ නැහැ. ගීත ගායනා කර ඉදිරි වට සදහා තේරුන මගේ යාළුවන්ට coaches පුංචි තෑගි වගයක් දිලා තිබුනා.

Welcome to team අභිශේකා කියලා ලියලා තිබුන coarch අභිශේකාව දිපු ලස්සන පොඩි තෑග්ගට මම ගොඩක් කැමතියි වුනා. ඇත්තටම ඒ පුංචි තෑග්ග තමයි coach අභිශේකාව තෝරා ගන්න හේතුව වුනේ.

🔹දක්ශ ජනප්‍රිය ගායිකාවක්, ⁣ලේඛිකාවක් සහ නිවේදිකාවක් වන ඔබගේ coach විශාරද අභිශේකා විමලවීර මහත්මියගෙන් voice teens තරගයේදී ඔබට ලැබුනු සහයෝගය කොහොමද?

Coach අභිශේකාගෙන් මට විශාල සහයෝගයක් ලැබුනා. මම සිංහල ගීත කලින් ගායනා කරලා තිබුනේ නැහැ. සිංහල ගීත ගයනා කරද්දී අපහසු වචන උච්චාරණය සහ ගීතය මතක තියා ගන්නා ආකාරයට වැනි සියලුම දේවල මට coach කියලා දුන්නා.

විශේෂයෙන්ම ඩෙංගු උණ හැදුන අවස්ථාවේදි coach මට ලොකු ශක්තියක් වුනා.

🔹ඉතාමත් දක්ෂ තරගකරුවන් සමග තරගවැදී සතියෙන් සතිය ඉදිරිවට සදහා තේරිපත්වි යැමේදි

Voice teens තරගය ජයග්‍රහණය කරන්න පුලුවන් වේ යැයි ඔබ හිතුවාද? ජයග්‍රහණය පිළිබදව ඔබේ අදහස කුමක්ද?

Blind audition ඉදලාම තරගයෙන් මම ඉවත් වෙයි කියලා පොඩි බයක් තිබුනා.”එහෙම හිතන්න එපා. ඔයාට පුලුවන්. ඔයා තමයි තරගය දිනන්නේ” කියලා coach හැම වෙලාවේදි ම මාව දිරිමත් කලා. voice teens තරගය ජයග්‍රහණය කරන්න ලැබිම මට ලොකු සතුටක්.

🔹දමිල භාෂාව වැඩිපුර භාවිතා කරන කෙනෙක් හැටියට සිංහල භාෂාව සහ සිංහල ගීත ගායනා කිරිමේදි ඔබට ලැබුනු අභියෝග මොනවාද?

සිංහල ගීත ගායනා කිරිම මට ලොකු අභියෝගයක් වුනා. ගීතයේ වචන ඉංග්‍රීසි භාෂාවෙන් ලියාගෙන, නිවැරැදිව වචන උච්චාරණය කරන ආකාරය coach ගෙන් ඉගෙන ගෙන, ගීතය කිපවතාවක් අහලා, පුහුණුවිම කලා.

🔹Voice teens තරගයට සම්බන්ධ වි සිටි කාලයේදී සිදුවුනු අමතක නොවන අත්දැකීමක් පිළිබදව විස්තර බෙදා ගන්න කැමතියිද?

මට උණ හැදිලා ප්‍රතිකාර ලබන කාලයේදි voice teens අර්ධ අවසන් තරගය සදහා සහභාගි වෙන්න සිදු වුනා. මට ඩෙංගු උණ හැදිලා කියලා දැන ගත්තාම මාව රෝහල් ගත කලා. මම coach එක්ක දුරකථනයෙන් සම්බන්ධ වෙලා පුහුණුවිම කලා. අවසන් තරගය සදහා සහභාගි වෙන්න තරගයට දවස් දෙකකට කලින් මට රෝහලෙන් ගෙදර එන්න පුලුවන් වුනා.

🔹Voice teens වේදිකාවේ ප්‍රනීර්ශා ගායනා කල ගීත අතරින් ප්‍රේක්ෂක ප්‍රතිචාරය ඉහලින්ම ලැබුනු ගීතය විදියට “සාමි” දමිළ ගීතය හදුන්වන්න පුලුවන්.

ගීතය තෝරා ගැනිම, නර්තනය වින්‍යාසය පුහුණුවිම සහ ලැබුනු ප්‍රේක්ෂක ප්‍රතිචාර පිළිබදව අපි දැන ගන්න කැමතියි.

“සාමි” ගීතය මට coach තෝරලා දුන්නේ. මම හිතුවා ගීතය ගායනා කරන ගමන් dance steps ටික කලොත් ප්‍රේක්ෂකයන් කැමති වෙයි කියලා. ගායනයට සහ ඉදිරිපත් කිරිමට මට හොද ප්‍රේක්ෂක ප්‍රතිචාර ලැබුනා.

🔹 “මගේ රටට දළදා හිමි සරණයි”

ලක්වාසී ලෝකවාසි බෞද්ධ පිරිසට මෙම ගිතය දමිළ ජාතික ඔබේ හඩින් අහන්න ලැබිම ඉතාමත් සුවිශේෂී වෙනවා. මෙම ගිතය ගායනා කිරිමෙන් පසු ඔබට ලැබුනු ප්‍රතිචාර කොහොමද?

Blind audition වටයේ ඉදලා මම දමිළ, හින්දි ගීත ගායනා කලා. මම මුලින්ම සිංහල ගිතයක් ගායනා කලේ knockout වටයේදි. දමිළ ජාතික කෙනෙක් විදිහය සිංහල ගීත නිවැරැදිව උච්චාරණය කර ගායනා කලාට පසුව සිංහල ගීතවලට කැමති ප්‍රේක්ෂකයන්ගෙන් විශාල ප්‍රතිචාරයක් මට ලැබුනා. දළදා මාලිගාවෙහි ආරාධනයෙන් මට එම ගිතයෙහි cover ගිතය ගායනා කරන්නත් අවස්ථාව ලැබුනා.

🔹 ඔබගේ අධ්‍යාපන කටයුතු සහ මෙම තරගය සමබරව කරගෙන යෑම සදහා ඔබගේ දෙමාපියන්ගෙන්, ඔබගේ පාසලේ ගුරුවර ගුරුවරියන්ගෙන් සහ මිතුරු මිතුරියන්ගෙන් ලැබුණු සහයෝගය කොහොමද?

තරගයේ වැඩ කටයුතු සහ අධ්‍යාපන කටයුතු සමබරව කරගෙන යන්න මගේ අම්මායි, තාත්තයි ගොඩක් උදව් කලා. මම තරගය තිබුන කාලයේ කොලඹ නැදෑයෙකුගේ ගෙදර නතර වෙලා හිටියේ. මගේ පාසලේ ගුරුවරුන් අතපසු වුන පාඩම් අතිරේක වෙලාවන් වෙන් කර ගෙන කියලා දුන්නා. පාසලේ මට අතපසුවෙන වැඩ සදහා මගේ යාළුවෝ ගොඩක් උදව් කලා. සමහර යාළුවෝ මගේ පොත් අරගෙන් ගිහින් සටහන් ලියලා දුන්නා. බණ්ඩාරවෙල tamil central college හි මගේ ගුරුවරුන් සහ යාළුවන් ආදරයෙන් මතක් කරන්න ඕනේ.

🔹ඔබගේ ස්වතන්ත්‍ර නිර්මාණය අපට ඉදිරියේදී අහන්නට දකින්නට ලැබේවි යැයි අප සිතනවා. සංගීත අංශයෙන් සහ අධ්‍යාපනය අංශයෙන් ඔබගේ අනාගත බලාපොරොත්තු මොනවාද?

Coach අභිශේකා සමග ගායනා කල “සබදිනි” වැනි ආරයේ ගීත සහ විවිධ වෙනස් ආරයේ ගිත ඉදිරියේදි ගායනා කරන්න මම හරිම කැමතියි. ඒවගේම ඉදිරියේදි දොස්තරවරියක් වන්නට අවශ්‍ය අධ්‍යාපන කටයුතු සදහා යොමු වෙන්න බලාපොරොත්තුවෙන් ඉන්නවා.

අමා නාකන්දලගේ

Interview

Q1. මුලින්ම ඔයා ගැන හැඳින්වීමක් කලොත්.

මම හිරුණි පීරිස් දැරණියගල, වයස 24 යි. පාසල් ගියේ

දෙහිවල ප්‍රෙස්බිටීරියන් බාලිකා පාසලට. දැනට උපාධිය

අවසන් කරලා පුහුණු වන ගෘහ අභ්‍යන්තර

නිර්මාණශිල්පිනියක් විදිහට වැඩ කරනවා.

Q2. අපි දැන ගන්න කැමතියි හිරුණිගේ පවුලේ විස්තර

පවුල් ගැන කිව්වොත් මට ඉන්නේ අම්මා, තාත්තා, නංගි.

නංගි නම් දැන් විදෙස් ගත වෙලා ඉන්නේ. අම්මයි තාත්තයි

මේ වෙද්දි විශ්‍රාම සුවයෙන් ඉන්නවා.

Q3. අපිට ඔයාව magazine එකෙන් හමුවෙන්නේ සමනල්ලුත්

එක්ක, ඉතින් කොහොමද ඔයා සමනල්ලු ගැන ඔය විදිහට

විස්තර දැනගත්තේ, ඒ ගැන අපිට විස්තර ටිකක් කියන්න.

මෙහෙමයි මුලින්ම කියන්න ඕනේ මේක මගේ විනෝදාංශය.

සත්තු ගැන ඉගෙන ගන්න එක ඇත්තටම වෙනම විදිහක

විනෝදයක්. ඉතින් ඒ අතරින් මගේ වැඩි කැමැත්ත ගියේ

සමනල්ලුන්ට.

එහෙම ගත්තාම මම විධි කිහිපයකින් සමනල්ලු ගැන

ඉගෙනගෙන තියෙනවා වගේම තවමත් ඉගෙන ගන්නවා.

මුලින්ම මම සමනල්ලු ගැන ඉගෙන ගත්තේ ශ්‍රී ලංකා තරුණ

සත්වවේදින්ගේ සංගමයෙන් පස්සේ ඒගොල්ලෝ ගැන දැනුම

එක මට්ටමකට ආවම තනිමත් විස්තර හොයන්න පටන්

ගත්තා. ඇත්තටම ලංකාවේ සත්තු ගැන ඉගෙන ගන්න

ගොඩක් හොඳ සංවිධාන තියෙනවා වගේම මේ ජීවි කාන්ඩය

ගැන ක්ෂේත්‍රයේ ප්‍රවීනයෝ ගොඩක් ඉන්නවා.

Q4. හිරුණි මේ ලියන එකෙන් ඔයා සමනල්ලුන්ට දෙන

වැදගත්කම මොකද්ද?

ඇත්තටම මේ ලෝකේ වැදගත් නැති සතෙක් කියලා නැ

හැමෝම වැදගත්. මේ ලෝකේ ඉන්න මොකෙක් හරි

සතෙක්ගෙන් මේ මහ පොලොවට මොනාම හරි වැඩක්

තියෙනවා. මිනිස්සු කියන්නෙත් සතෙක් ඉතින් මිනිස්සු

වගේම තමයි සමනල්ලුත් අපිට ගොඩක් වැදගත්.

විශේෂයෙන්ම අපි පොඩි කාලේ ඉස්කෝලේ යද්දිත්

සමනල්ලුන්ගේ තියෙන වැදගත් කම් ඉගෙන ගන්නවා. ඒ

ඇරෙන්න මම එයාලා ගැන ඉගෙන ගනිද්දි දැනගත්ත

වටිනාකම් ගොඩයි. පරිසරය ලස්සන කරනවා වගේම එයාලා

පරිසර තත්ව මනින මිම්මක් විදිහටත් ගන්නවා. ඒ ඇරුනම

එයාලා අපේ පලිබෝධ ගැටලුත් විසදෙනවා.

Q5. එතකොට හිරුණි සමනල්ලු ගැන විතරමද අධ්‍යනය

කරන්නේ?

නෑ මම තව සත්ව කාණ්ඩ ගැන ඉගෙන ගන්නවා.

කුරුල්ලෝ, බත්කූරෝ ඒ ඇරුනම ගස් ගැන ඉගෙන ගන්න

ගොඩක් ආසයි. කලිනුත් කිව්වා වගේම මේ පැත්තෙන් ගන්න

විනෝදය වෙනමම එකක්. දැනුම ගන්නවා වගේම ඒක

පාවිච්චි කරලා තර්ජනයක් වෙලා තියෙන සතුන්චේ

සංරක්ෂණයටත් උදව් කරනවා. ඒ අතින් ගත්තාම මේ වගේ

විනෝදාංශයකට හිත ගිය එක ගැන ගොඩක් සතුටුයි.

Q6. එතකොට හිරුණි මේ සත්ව කාන්ඩය සංරක්ෂණය අතින්

ගත්තම දැන් වෙනකොට මොන වගේ තැනකද ඉන්නේ? ඒ

ගැන තියෙන අදහස මොකද්ද?

අදහස් කියන්නේ සමනල්ලුන් ගැන විශේෂයෙන් කිව්වොත්

මේ වෙද්දි සමනල්ලුන්ගේ සංරක්ෂණය සඳහම ලංකාවේ

සංවිධානයක් තියෙනවා. ඒ ඇරුනම වෙනත් පරිසර සංගම්

අතිනුත් මේ සත්ව කාණ්ඩයට අදාල සංරක්ෂණ වැඩහටහන්

වෙනවා. සහ මගේ තියෙන අදහස එක්ක ඒවා තවත් පුලුල්

කරලා පාසල් මට්ටමේ ඉඳන්ම මේ වැඩේ කරොත් අපිට

ඉස්සරහට අපේ පරිසරය ලස්සන කරන සත්ව කාන්ඩයක්

ආරක්ෂා කරන්න පුලුවන්.

ඇත්තටම මට තියෙන්නේ පොඩි දැනුමක් වුනත් මම මේ

විදිහට හරි එයාලා ගැන කියලා කරන්නෙත් එක විදිහක

සංරක්ෂණයක් තමයි. අපි දෙන පොඩි විස්තරයෙන් හරි

ඉස්සරහට අපිට දැනට ඉතුරු වෙලා තියෙන සත්ව සම්පත

ආරක්ෂා කර ගන්න පුලුවන්.

Q7. අවසන් වශයෙන් අපි magazine එකට සම්බන්ධ වීම ගැන

ඔබේ අදහස?

කෙටියෙන් කිව්වොත් ඇත්තටම සතුටුයි. මම ලියන්න

ගොඩක් ආසයි. ඒ බලද්දි මම ආසම දෙයක් ගැන ලියන්න

අපි magazine එකත් එක්ක එකතු වෙන්න ලැබුන එක මගේ

වාසනාව. එතකොට අනිවාර්යයෙන්ම චමල් අයියට ගොඩක්

ස්තූති කරන්න ඕනේ ගයන් අයියජ මාව අදුන්නලා දුන්න

එකට වගේම මාව මේකට සම්බන්ධ කර ගත්තට ගයන්

අයියටත් ගොඩක් ස්තුති කරන්න ඕනේ. මොකද මේ පවුලට

එකතු වෙලා මම ගොඩක් අයව අදුන ගත්තා. ඒ අය

හැමෝම ගොඩක් දක්ෂයි එක එක ක්ෂේත්‍ර වලින්. දක්ෂ

විතරක් නෙමෙයි එගොල්ලෝ ගොඩක් සුහදයි. අපේ

වචනයෙන් කිව්වොත් එයාලා එක්ක එකට එකතු වෙලා

වැඩක කරන්න ලොකු ගැම්මක් එනවා.

ඉතින් එතකොට අපි magazine ලොකු සාර්ථක දුරක් යන්න

ලැබෙන්න කියලා මම හදවතින්ම ප්‍රාර්ථනා කරනවා.