අතරමන් වූ මුව පැටියා.


අතරමන් වූ මුව පැටියා. 

ඔන්න දරුවනේ අද කතාව මුව පැටියෙක් ගැනයි. 

මුව පැටිය යි, අම්මයි, තාත්තයි රසම රස දළු කොළ කඩන් කෑවා. හොදටම බඩ පිරුනා. කෑම කාලා ඉවරයි. දැන් ඉතින් ටිකක් සෙල්ලම් කරන්න තිබුණා නම් හොඳයි. මුව පැටියා හිතුවා. 

 “මම ටිකක් සෙල්ලම් කරන්න යන්නම්” 

කියලා අම්මගෙන් ඇහුවා. හා යන්න වැඩි ඈතකට යන්න එපා. කියලා අම්මා කිව්වා. 

මුව පැටියා දුව පනිමින් සෙල්ලම් කලා. 

මුව පැටියා දැක්ක ලස්සන සමනලයෙක් පියඹා යනවා. ඉතින් මුව පැටියා සමනලයා යන දිහාට දුවමින් ගියා.මුව පැටියා ටත් නොදැනීම ටික ටික ඈතට ගියා.

සමනළයා ඈතට පියාඹා ගියා.

මුව පැටියා ට සමනලයා ව හොයාගන්න බැරි වුණා. හැමතැනම හෙව්වා ඒත් නැහැ. ටිකක් වටපිටාව බලද්දී තමයි මුව පැටියා දැක්කේ අම්මවත් තාත්තාවත් පේන්න නෑ කියලා. මුව පැටියා ගොඩක් කැලෑව තුළට ඇවිදගෙන ඇවිත් තියෙනවා කියලා.

දැන් නම් මුව පැටියා හොඳටම බය වුණා. පැටියට මතක් වුණා අම්මා  ඈතට යන්න එපා කිව්වා කියලා.

“අනේ අම්මා ඔයා කොහෙද”  මුව පැටියා දුකෙන් වගේම බයෙන් එහෙට මෙහෙට ඇවිද්ද.

ටික වෙලාවක් යද්දි ගස් වැල් අතරින් පෙනෙන රුව හඳුනා ගැනීමට මුව පැටියාට වැඩි වෙලාවක් ගියේ නෑ.

“අම්මා” කියලා කෑගහලා සතුටු කඳුළු ඇස් වල පුරෝගෙන දුවගෙන ගිහින් අම්මට තුරුල් වුණා.

අනේ අම්මා මාව අතරමන් වුණා. ලස්සන සමනලයාව මඟ හැරුණා. මුව පැටියා දුකෙන් කිව්වා.

පැටියො අපි එළියේ ඉන්න වෙලාවට හොඳ සිහියෙන් යුතුව ඉන්න ඕන. අම්මා තාත්තා නැතුව තනියම දන්නේ නැති පැති වලට යන්න හොඳ නැහැ. ඒ නිසා හොඳ සිහියෙන් හා නුවණින් යුතුව කටයුතු කරන්න ඕන කියලා මුව පැටියා ට අම්මා උපදෙස් දුන්නා.

පුංචි දුවලා පුතාලා ත් හොඳ සිහියෙන් හා නුවණින් යුතුව වැඩ කටයුතු කරන්න. අම්මා තාත්තා වැඩිහිටියන් නැතුව කොහේවත් නොදන්නා තැන් වලට යන්න එපා හොඳද. ඉතින් 

අලුත් කතාවක් එක්ක නැවත හමුවෙන තුරු සතුටින් ඉන්න.

තිලෝ ප්‍රනාන්දු.

Talents


මගේ නම ධම්මික තරංග ජයවර්ධන

මගේ වයස අවුරුදු 34….මම විවාහකයි .. දරුවන් දෙදෙනකුගේ පියෙක්….මම උසස් පෙල දක්වා අධ්‍යාපනය හැදෑරූ අයෙක්…මගේ පාසල යටගල  මහා විදුහල…උපන් ගම ඇල්පිටිය ඌරගස්මංහන්දිය…

දැනට පදිංචිය කොලඹ කිරුලපන ප්‍රදේශයේ …..විශේෂයෙන්ම කුඩා කල සිට චිත්‍ර ඇදීමේ හැකියාවක් තිබුනත් මා ප්‍රිය කලේ සංගීතයටයි…ඉතින් මම ඩ්‍රම්ස් වාදනයට ප්‍රිය කල  නිසා පාසල් අවදියේදීම සංගීත කන්ඩායම් වලට සම්බන්ධ වී ඩ්‍රම්ස් වාදනයෙන් උපරිම දක්ශතා දැක්වූවා….කාලයත් සමග සංගීත ක්ෂේත්‍රයේ ඉදිරියට යාමේ හීනය  බොද වී ගියේ යම් ආර්ථික අපහසුතා ඇතිවීම නිසා….කාලයත් සමග මා හට පැන්සල් සිතුවම් පිලිබදව උනන්දුවක් ඇතිවීම නිසා ටිකෙන් ටික මා සිතුවම් කලාවට යොමු වුනා….

ලංකාවේ දක්ශ සිත්තරුන්ගෙන් උපදෙස් ලබා ගැනීම තුලින් තවත් හැකියාව වර්ධනය කර ගන්නට හැකි වුනා….බොහෝ විට නිර්මාන සදහා ඉවසීම අත්‍යවශ්‍ය කරුනක් බව කාලයත් සමග මට වැටහුනා….මම විවේක වෙලාවේදී නිරතුරුවම සිතුවම් කරනයේ යෙදුනා….මා කැමති ජනප්‍රිය කලාකරුවනගේ සිතුවම් මා නිර්මානය කලා…(විශේෂයෙන් චාමර වීරසිංහ ,ජය ශ්‍රී )   ….ඉදිරියටත් මගේ තවත් නිර්මාන බිහිවේවි…තවමත් මා කලාව පිලිබදව ඉගෙන ගනිමින් සිටින අයෙක්….මට වඩා විශිෂ්ට දක්ශයින් ලංකාවෙ ඉන්නවා…

ඕනෑම කෙනෙකුට උනන්දුව කැපවීම තිබේනම් ගමනක් යන්න පුළුවන් ……සමහර නිර්මාන කරද්දී ඒවා අසාර්ථක වෙන අවස්තා මට ගොඩක් තිබුනා…කෙනෙක්ගේ සිතුවමක් ඇදල දීල ඒ කෙනාගෙ මූනට හිනාවක් දෙන්න පුළුවන් වීම තරම් සතුටක් මට තවත් නෑ..සිතුවම් සදහා මම graphite සහ charcoal යන පැන්සල් වර්ග දෙකම භාවිතා කරනවා….ඉදිරියේදී පාට පැන්සල් සිතුවම් කරනයටත් ,,acrilyic ආශ්‍රිත නිර්මානකරනයට යොමු වීමටත් බලාපොරොත්තු වෙනවා…විශේෂයෙන්ම “”අපි “”සගරාවට මා ස්තූතිවන්ත වෙනවා මා පිලිබදව සටහන් කිරීම සම්බන්ධයෙන් …

තෙරුවන් සරනයි …

කවුරුන්ද ඔබ මගේ


කවුරුන්ද ඔබ මගේ

මීට සමාන අදහසක් තියෙන තවත් ගීත තියෙනවද..

කවුරුන්ද ඔබ මගේ..

කවුරුන්ද මා ඔබේ..

දෙතොල් සලා මුදු සිනහ නගන්නෙමු

දෙනෙත් පුරා පිරි කඳුළු සලන්නෙමු..

හදවත් ගැහෙනා රිද්මය අතරේ….

සිතින් ගතින් එක්තැන් වී ඉන්නෙමු..

ප්‍රේමය ගොළුවී හඬා වැටීලා..

ඔබ හද මා හද රිදවන මොහොතේ..

ජීවිතයට හුරු පැරදුම හමුවේ..

නොදොඩා ගොළුවී බලා සිටින්නෙමු..

හඬ – සුනිල් එදිරිසිංහ

පද- සමන් ආතාවුදහෙට්ටි

ස්වර – රෝහණ වීරසිංහ

කවුරුන්ද ඔබ මගේ ගීතය ඇත්තටම විශේෂ ගීතයක්.. ඒ නිසායි මම ඉහත ඇහුවෙ මීට සමාන ගීතයක් තියෙනවද කියලා..

බොහෝ ප්‍රේම ගීත වගේම මෙතනත් ඉන්නවනෙ දෙනේනෙක්.. ඒ දෙන්නා අතර තියෙන බැඳීමක්.. නමක් නැති බැඳීමක් කියලා හිතෙන්නෙ ඒ දෙන්නට දෙන්නා තමන් කවුද කියලා සොයන්න උත්සහ කරන නිසා.. එතකොට නමක් නැති බැඳීමක් හැම විටම සෘණාත්මක සම්බන්ධයක් විය යුතු නැහැ නේද? හරි.. ඔවුන් දෙදෙනා ගතින් එක්තැන් වෙලා.. ගතින් එක්තැන් වීම විවාහයක්ම විය යුතුද? ඒක හමුවීමක් පමණක් වෙන්න බැරිද.. මෙහෙම හිතමු නිතරම මුණ ගැහෙන කතා බහ කරන ආශ්‍රය කරන දෙන්නෙක් වෙන්න පුළුවන් නේද? ඊළඟට මොවුන් දෙදෙනාම සිතිනුත් එක් තැන් වෙලා.. ගතින් කොහොම එක්තැන්ව හිටියත් සිතින් එක් තැන් වෙන එක..? ඒක හරිම විශේෂයිනෙ..

කවුරු මොනවා කිව්වත් හිතින් ඇති වෙන බැඳීම් හරි ප්‍රබලයිනෙ.. එතකොට මම ඔබත් එක්ක හිනා වෙනවා.. ඔබේ දුකේදිත් මගේ දුකේදිත් අපි දෙන්නාම කඳුළු හෙලනවා… ඊළඟට ප්‍රේමය ගොළු වෙලා.. මේ දෙන්නා අතර ප්‍රේමයක් තියෙනවා ඒත් ඒක සාර්ථක කරගන්න, තේරුම්ගන්න එකිනෙකාට කියාගන්නට බැහැ… මොකක් හරි බාධාවක් නිසා.. සමහර විට මේ දෙන්නා වෙන දෙන්නෙක්ට අයිති දෙන්නෙක් වෙන්නත් පුළුවන්.. ඉතිං මේ ගොළු වෙච්ච ප්‍රේමය ඔබේ හදත් රිදවනවා.. මගේ හදත් රිදවනවා.. තීරණයක් ගන්න බැහැ.. ඒ නිසා නොදොඩා ගොළුවී බලාගෙන ඉන්නවා..

මට දැනෙන්නෙ මේ ගීතයේ තියෙන්නෙ සුන්දර බැඳීමක් කියලා.. ඒත් බිරිඳ මගේ ඔබ ගීතය හරිම පැහැදිළිවම ඔවුන් දෙදෙනා විවාහක යුවලක්.. දෙමව්පියන්ට සමාජයට ඕනෑ නිසා අතිනත අරගෙන තවමත් අනිත් අය වෙනුවෙන් මවාපෑමක් කරමින් ජීවත් වෙන..

“`අමාලි වසුන්දරා“`

හදවත ගැඹුරෙන්ම ගැස්සිලා


හදවත ගැඹුරෙන්ම ගැස්සිලා

මුල හිතම  නළියද්දී

දෑස් වසාගෙ හිඳින්නේ 

නුඹෙ ගතම වෙවුලද්දී

තුන් හිතම ගිනිගද්දී

ඔය හුස්මෙ හිරවෙලා වෙලෙන්නෙ

මනමාලකම් පිරුණ

කලු පාට ඇස් ඇතුලෙ රිංගලා 

මන් ඉන්න ඉසව්වක් හොයන්නෙ   

මගෙ ගතම ගිනිඅරන් පිච්චෙද්දී

ලංවෙලා මුවට නුඹ

දෙදෙතොල් මගෙ සිඹින්නද

හදන්නේ

හීනියට වැව්න  නුඹෙ රැව්ල් කොට වැදුණමයිදකිනා හීනයෙන්  මන් අවදි   වෙන්නේ


නිශා

විදේශීය කෑම රසගන්වන ලංකාවේ අපේ සූපවේදියා

MANOJ FERNANDO


මනෝජ් ප්රනාන්දු කියන්නේ ඹයාගේම වචනයෙන් කිව්වොත්

හොඳ මනුස්සයෙක් කියලා තමයි හැමෝම කියන්නේ. මම ගැන මගේ වචනයෙන් කිව්වොත් ලේසියෙන් ගේමක් අතඅරින්නෙ නැහැ, හොඳට මහන්සිවෙලා වැඩ කරන්න පුළුවන් චරිතයක් දැනට මගේ වයස අවුරුදු 53 වෙනවා. අවුරුදු තිහක chef කෙනෙක් එක්ක වුණත් හරි හරියට තරගෙට කෑම උයන්නත් පුළුවන්.වැඩ කරන තැන්වල හැමෝම මගෙන් අහන දෙයක් තමයි ඔයාට මහන්සි නැද්ද, එපා වෙන්නෙ නැද්ද කියලා තරමක් මහන්සිය තමයි. මම මහන්සි කිව්වොත් මගෙත් එක්ක වැඩ කරන එයාලත් වැටෙනවා. ඒක නිසා මගේ මහන්සිය මම ගාව හංගගෙන එයාලගේ මොරාල් එක වට්ටන්නෙ නැතුව බිඳෙන්නේ නැතුව වල කටයුතු කරගෙන යනවා.

පව්ලේ විස්තර ටිකක් කිව්වොත්

අපේ පවුලේ හතර දෙනයි අම්මයි තාත්තයි මායි අක්කයි. 2015 දි මගේ අම්මා නැති වුනා. එතකොට මම හිටියේ එංගලන්තේ. මෙහෙ ඉඳලා තමයි ඒ වැඩකටයුතු වලට ලංකාවට ගියේ. අපේ තාත්තා තාම ඉන්නවා ලංකාවේ. අක්කයි මායි එකතු වෙලා  තාත්තාව හොඳින් බලාගන්නවා. පස්සේ 1994 අවුරුද්දේ ද දී මම විවාහ වෙනවා. එයාගේ නම ශ්‍යාමා dias එක ආදර සම්බන්ධතාවයක් උඩ තමයි සිද්ධවෙන්නේ. 1995 දි අපිට තව කෙනෙක් එක්කහු වෙනවා අපේ පවුලට. ඒ මගේ පුතා එයාගේ නම රශ්මික දැනට එංගලන්තයේ ඉගෙන ගන්නවා.architecture මාස්ටර් අන්තිම අවුරුද්දේ දැන් ඉන්නේ. එයා ටිකක් ප්‍රසිද්ධයි එංගලන්තයේ. මොකද හොඳ ආර්ටිස්. ඒ වගේම පත්තර වල ෆැෂන් ෂෝ වලට පොඩි කටවුට් දානවා. යාළුවන් අතර හොඳ හිත දිනාගෙන ඉන්න කෙනෙක්. ටිකක් මම වගේ තමයි. යාලුවන්ට charity වැඩවලට හරියට උදව්  කරනවා.  දැනට අපි තුන්දෙනාම එංගලන්තේ පුරවැසිභාවය අරගෙන  මෙහෙ ජීවත් වෙනවා.

රැකියාව ගැන පොඩ්ඩක් කතා කළොත්

1989 ඉඳන් අද වනතුරු අවුරුදු තිස් දෙකක් මේ ක්ෂේත්‍රයේ නියැලෙනවා. මුලින්ම වැඩකලේ hotel galaxy කියලා 4* හෝටලයක් ලංකාවේ. සහයක චෙෆ් කෙනෙක් හැටියට. ඊට පස්සේ 1994 දී කොළඹ හිල්ටන් හොටෙල් එකට එකතු වෙනවා japaness restaurant එකට. 1997 දී ඩුබායිවලට යන්න චාන්ස් එකක් හම්බවුනා. metropolitan palace hotel   එකේ ඕපන් ස්ටාෆ් එක හැටියට  වැඩ කරන්න වාසනා ලැබුණු.2004 දී එංගලන්තයට sous chef කෙනෙක් හැටියට.grange hotels කියලා company එකක්.  ඊට පස්සේ 2015 care home දෙකක chef manager හැටියට job එක් කරන්න හම්බවෙනවා .එදා ඉඳන් අද එන්න තුරු  head chef කෙනෙක් හැටියට වැඩ කරනවා. එකේ වයසක අය තමයි ඉන්නේ. වයසක අයට උදව් කරගෙන ඒ අය ආස කෑම හදලා සන්තෝසෙන් තියන්ඩ තමයි මගේ බලාපොරොත්තුව. වැඩිහිටි අයත් එක්ක ලේසි නෑ . චූටි පොඩි වැරැද්දෙන්  අසනීප වෙනවා. හරි ප්‍රවේශමෙන් කෑම cook කරන්න ඕනේ. මං එක ආසාවෙන් කරගෙන යනවා.

මොන වගේ කෑම ජාතිද දැනගන්න පුළුවන්

ඕනම කෑම ජාතියක් හදන්න පුළුවන්. මුලින්ම galaxy hotel එකේ ඉන්න කාලේ ලංකාවයි කෑම ජාති සහ සමහර යුරෝපීය ඇමෙරිකන් කෑම ජාති ගැන විතරයි දන්නේ.ඊට පස්සේ colombo Hilton එකට එකතු උනාට පස්සෙ ජැපනීස් කෑම ගැන දන්නවා . ඩුබායි ගියාට පස්සේ ලෝකේ තියෙන හැම කෑමක් ම ඉගෙන ගන්න පුළුවන් වුණා ඒක තමයි මගේ ජීවිතේ හෝටල්  ක්ෂේත්රය හොඳම අඩිතාලම් වැටුන තැන.  polynesian, african, South American, american, european, far eastern central Asia  වගේ තැන්වල කෑම හදන්න ඉගෙන ගන්න පුළුවන් වුණා. ඊට පස්සේ එංගලන්තයට එනවා අර තිබුනොත් දක්ෂතාව ඔක්කොම ඔපමට්ටම් කරන්න අවස්ථාව ලැබෙනවා. ඉතා කෙටි කලක් තුළ මාව head chef හැටියට පත්වීම ලැබෙනවා. ඒ වගේම මට ටිකක් vegetable carving,fruit carving,ice carving වගේ දේවලුත් කරන්න පුළුවන්.  ඒක හින්දා මට ඉස්සර ඉඳලම හැම තැනකම හොඳ ඉල්ලුමක් තිබ්බා.

ලංකාවෙන් එංගලන්තයට ආව එක ගැන මොකක්ද දැනෙන්නේ.

හොඳයි දුකයි දෙකම තියනවා. මුලින්ම හොඳ කියන්නංකො. පුතා එංගලන්ත ඉගෙන ගෙන හොඳ තැනක ඉන්නවා. ඒ වගේම මට අවස්ථාව ලැබුණා මම දන්න දේ අනිත් අයටත්, ලෝකෙට කියලා දෙන්න. දුක තමයි ලංකාවේ මිනිස්සු,නෑදෑයො දෙමාපියෝ දාලා ටිකක් දුර එන්න වුන එක ගැන. කොරොන හින්දා ටික කාලෙකින් ලංකාවට යන්න බැරි වුණා. නැත්තම් මම හැම අවුරුද්දෙම වගේ ලංකාවට ගිහිල්ලා නෑදෑ යාලුවෝ එක්ක ටිකක් ඉඳලා සෙට් වෙලා තමයි එන්නේ.

චෙෆ් කෙනෙක් උනේ කොහොමද

මේක ටිකක් අපූරු සිදුවීමක්. 1989 galaxy hotel   එකේ වැඩ කරාට පස්සේ 1990 දී මම ඉතාලියට යනවා. ඒ යන්නේ මගේ අද  වයිෆ් එකේ ඒ කාලේ girlfrien හින්දා  එහේ අවුරුදු තුනක් විතර වැඩ කරාට පස්සේ මට වීස් එකක් හම්බ වෙනවා  ඉතාලි ඉන්න. ඒක ගන්න නං ලංකාවට ගිහින් ලංකාවෙන් ඇප්ලයි කරන්න ඕනේ. ඉතිං ලංකාවට එනවා මොකක් හෝ හේතුවක් නිසා මට ඒක ගන්ඩ බැරි වෙනවා. ඊට පස්සේ දවස් කිහිපයකට පස්සේ වයිෆ් ඉතාලි අතහැරදාලා ලංකාවට එනවා. ඒකාලෙ අපිට ලංකාවේ පොඩි ග්‍රොසරි එකක් තිබ්බා. අම්මයි තාත්තයි තමයි කළේ සමහර වෙලාවට මමත් ඕකෙ ඉන්නවා. ඒත් මම වැඩිපුර ඉන්නේ වයිෆ් ලගේ ගෙදර. ඉතින් ඒකට අපේ ගෙදර ප්‍රශ්න එහෙම තිබ්බා. මේක කරන්න බැහැ  දැන් බඳින්න ඕන කියලා. ඉතින් බඳින්නත් රස්සාවක් තියෙන්ඩ ඕන නේ. පස්සේ මම පත්තරය ජොබ් එකක් හොයන ගමන් මම දැක්කා දාලා තියෙනවා හිල්ටන් හොටෙල් එකට kitchen ස්ටාෆ් එක ඕනේ කියලා. ඉතින් මම ඇප්ලයි කළා. apply call කර මුල්ම ජොබ් එකත් ඒකයි එතනදි මට රස්සාව ලැබෙනවා kitchen assistan විදිහට. අර මම මුලින් කිව්වේ මම ලේසියෙන් ගේමක් අතාරින්නෑ කියලා,ඊට පස්සේ kitchen එකේ වැඩ කරගෙන ඉන්න අතරෙදි ,teppan yaki චෙෆ් කෙනෙක් අස්වෙනවා. ඒ වෙලාවේදී management එක තීරණය කරනවා මට  position එක දෙන්න. එතන ටිකක් කල් වැඩ කරන්න යනකොට මට හම්බ වෙනවා ලංකා වෙන්න ප්‍රසිද්ධ ව්‍යාපාරිකය අය sports කරන ,ිටරට ප්‍රසිද්ධ අය නළු නිළියෝ එතනදි අඳුනගන්න ලැබෙනවා සමහර වෙලාවට ඒ අය dinner වලට ආවහම මාවම ඉල්ලන තත්ත්වයට පත්වුණා. අන්තිමට එතනට මාව නැති කෙනෙක් බවට පත්වුණා.

ලංකාවේ කෑම වලට මොන වගේ තැනක්ද එංගලන්තයේ තියෙන්නෙ

හොඳ තැනක් තියෙනවා. ලංකාවේ resturent ගොඩක් තියෙනවා. මොකද අපේ කෑම වල හොඳට ලුණු ඇඹුල් දැවිල්ල තියෙන නිසා පිටරට අය හරි කැමතියි. මොකද English food වල ගොඩක් වෙලාවට තියෙන්නේ ක්‍රීම් gravy  fat වලින් තමයි ගොඩක් පිරිල තියෙන්නෙ. කිව්වට විශ්වාස කරයිද දන්නෙ නෑ මම වැඩ කරන care හෝම් එකේ  rice and curry හැදුවා එක දවසක් ලන්ච් වලට. මාසෙකට එක දවසයි දුන්නේ.දැන් සතියට දවස් දෙකක් දෙන්න තීරණය කරා management එක මොකද ඒ අය හරි කැමති නිසා. ඉතින් තේරෙනවනෙ අපේ කෑම වල අගය

සූපවේදියකු ලෙස යා ලබපු අත්දැකීම් සහ අලුතෙන් මේ ක්ෂේත්රයට එන අයට මොනවද දෙන උපදෙස්

කරන වැඩේ හරියට කරන්න ඕනේ.ආවට ගියාට කරන්න එපා. රස්සාවට මුලින්ම ආසාවක් සහ ආදරයක් ඇති කරගන්න. කාවවත් අනුකරණය කරන්න එපා. තමන්ගේ ස්ටයිල් එක තමන් හදාගන්න. දන්නෙ නැත්තං අහල දැනගන්න. නැත්නම් අන්තර්ජාලය ඔස්සේ ගූගල් කරලා දැනගන්න. ඉස්සර වගේ නෙමෙයි දැන් හොඳට අවස්ථාව තියෙනවා ඉගෙන ගන්න.

හොටෙල් එකේ දී restaurant එකේදි cook කරනකොට එතන තියෙන්නේ ටීම් වර්ක් එකක්. ටීම් වර්ක් එක නැත්තං හරි අමාරුයි මේක කරගෙන යන්න. උයන පිහන තනි තරගයකදී  තමයි තියෙන්නේ හංගලා තමන් විතරක් හිතලා වැඩ කරන්න ඕනේ තත්වයක්. ඒ නිසා සුළු වැරැද්දකින් ගොඩක් පසුබට, දුක් වෙන්න  ඉඩ තියෙනවා . ඒකට හොඳ උදාහරණයක් තමයි මම වැඩ කරන තැන වයසක අය ඉන්නේ පොඩි දෙයකින් ජීවිතයෙන් පවා වන්දි ගෙවන්න අවස්ථාව තියෙනවා. මොකද මේ අපි උයන කෑම කෙලින්ම ශරීරය තුළට යන්නේ. උදාහරණයක් හැටියට ගත්තොත් සෂිමි japanese අමු මාළු . උයන්නේ නෑ කෙලින්ම ආහාරයට ගන්නේ.ඒක නිසා hygin තත්ත්වය  උපරිමයෙන්ම හොඳට තියාගෙන කරන්න බලන්න. ්සර නං එච්චර මේ රස්සාව ගණන් ගත්තෙ නෑ දැන් නං හොඳ ප්‍රතිචාර තියෙනවා. එංගලන්තය chef ට සලකන්නට දෙවිවරු වගේ. ඒක නිසා මේ ක්ෂේත්‍රය හොඳ ආර්ථිකය අතින් අවස්ථාව තියෙනවා හොඳින් වැඩ කළොත්.

ජීවිතයේ ලස්සනම දවස ගැන පොඩ්ඩක් මතක් කලොත් සහ Manoj  ගෙන් අපේ අයට මොන වගේ සහයෝගයක්ද ලබාගන්න පුළුවන් Contact කරන්න පහසුම විදිය

දවස් නං ගොඩක් තියෙනවා.එකක් කිව්වොත් මට මගේ වයිෆ් මුලින් හමු උන දවස.අනිත් එක 1995 මගේ පුතා උපන් දවස. ඕන වෙලාවක මම උදව් කරන්න ලෑස්ති. මම තරමක් අවිවේකී පුද්ගලයෙක්.උදේ හයට නැගිට්ටාම ජොබ් වලට ගිහිල්ලා ගෙදර එනකොට ටිකක් රෑ වෙනවා.සමහර වෙලාවට වයිෆ් නිදි යන්නේ නෑ මම එනතුරු. මම

ගොඩක් අයට උදවු කරල තියෙනවා. මේ රක්ෂාවේ kitchen පෝර්ට ලා cooks ලා කරලා තියෙනවා cook ලා chef කරලා තියෙනවා. ලංකාවෙන් පිටරටවලට යන්න උදවු කරල තියෙනවා. තාමත් ඒ ගොල්ලන්  මතක් කරනවා, කතා කරනව, සමහර වෙලාවට තෑගි එවනවා. සමහර වෙලාවට  holiday ගියාම පිටරටවල නවතින තැන්වල  මගෙත් එක්ක හිටපු අය ඉන්නවා මම පුහුණු කළ  අය ඉන්නව ඉතින් මට හරි සන්තෝසයි. හොඳම විදිය තමයි මාව contact කරන්න තියෙන email එකක් දාන එක. මොකද මොබයිල් එකට කතා කලාම මට සමහරක් වෙලාවට ෆෝන් එක ගන්න බැරි වෙයි.  එංගලන්තයයි ලංකාවේ අතර පැය හතරක පහක වෙනසක් තියෙනවා. ඉතින් මේ හේතුන් උඩ හොඳම දේ තමයි ඊමේල් එකක් දාන එක. මගේ ඊ මේල් එඩ්‍රස් එක , stillmanoj@hotmail.co.uk

අපි magazine එකට ලියන්න ලැබීම සහ ඒක ගැන මොනවද හිතෙන්නේ

අපි magazine එකට ලියන්න ලැබීම ඇත්තටම සන්තෝෂයක්. මීට අවුරුදු හමාරට විතර කලින් ගයාන් කරුණාරත්න මගෙන් ඇහුවා මෙහෙම දෙයක් කරනවා පොඩි support එකක් හෝ සහභාගිත්වයක් කරන්න පුළුවන්ද කියලා. මම ඒක භාරගතා. ඇත්තටම එක චැලෙන්ජ් එකක් මොකද මගේ වඩාත් එක්ක කාර්යබහුලත්වයත් එක්ක ඒත් වැඩේ සාර්තකයි. අපි හැම මාසෙකම අද වෙනතුරු කරගෙන යනවා.  මම තමයි food column එක කවර් කළේ.තාමත් ලියනවා අනාගතයටත් එහෙමයි. ම දන්න දේ මොනාහරි කියලා දුන්න තමයි උත්සාහ කළේ. මම දන්නෑ ඒක කොතරම් දුරට සාර්ථකද කියලා. මම උත්සාහයක් ගත්තා දන්න දේ ලෝකයට කියලා දෙන්න. මේ magazine එක දිනෙන් දින  වැඩි වෙනවා ප්‍රසිද්ධ වෙනවා ඉස්සර හිටිය ප්‍රමාණය නෙමෙයි දැන් ඉන්නේ. නව මුහුණුවරකින් දිනෙන් දින නිර්මාණය වෙනවා. ඉතින් ඇත්තටම  සන්තෝසයි අපි magazine එකත් එක්ක වැඩ කරන්න ලැබීම ගැන. මම ප්‍රාර්ථනා කරනවා දිනෙන් දිනම දියුණු වෙලා මුළු ලෝකයක් අතරම ජනප්‍රිය වෙන්න කියලා.

 බොහොම ස්තූතියි

Common wolf snake


අළු රදනකයා 

Lycodon aulicus (Linnaeus, 1758)

Oligozonatus morph 

ශ්‍රී ලංකාවේ හමුවන රදනකයන් 6 අතුරින් දිවයින පුරා පුළුල් ව්‍යාප්තියක් සහිත රදනක විශේෂයක් ලෙස අළු රදනකයා හැඳින්විය හැකි අතර මොවුන් උග්‍ර විෂ සහිත කරවැලුන්ගේ වර්ණ රටා අනුකරණය / mimicking කරන්නාවූ කිසිම විෂක් රහිත නිර්විෂ සර්ප විශේෂයකි. මොවුන් රූපීය ලක්ෂණ ඔස්සේ කරවැලුන්ට සමාන වූවත් අනන්‍ය වූ දේහ ලක්ෂණ කිහිපයකින් සාමාන්‍ය අයෙකුට වූවද පහසුවෙන් වෙන් කොට හඳුනාගැනීමට හැකියාව පවතී..

* කැපී පෙනෙන පෙයාර්ස් හැඩැති හිස

බොහෝවිට උග්‍ර විෂ සහිත කරවැලුන්ගේ පැහැදිලි ගෙලක් හඳුනාගැනීමට අපහසු වන නමුත් අළු රදනකයාගේ හිස පෙයාර්ස් ගෙඩියක හැඩයෙන් පැහැදිලිව ගෙලෙන් වෙන් වී දිස්වෙනු දැකගත හැකි වේ.

* දේහ කොරළ වල ස්වභාවය

අළු රදනකයාගේ සහ කරවැලුන්ගේ පෘෂ්ඨීය කොරල සුමට වූවත් කරවැලුන්ගේ පෘෂ්ඨීය කොරළ වල ඇති ඉතාම විශේෂ ලක්ෂණය වන්නේ කෂේ කොරළ වල ස්වභාවය ශඩාස්‍රාකාර වීමයි. බැලූ බැල්මට කරවැලෙකුගේ කොඳු නාරටිය ඔස්සේ අටපට්ටම් හැඩැති අනෙක් දේහ කොරළ වලට වඩා විශාල වූ කැපීපෙනෙන කොරළ පේලියක් ඉතා හොඳින් දැකගත හැකි වේ.

එමෙන්ම ඔබ සර්පයන් පිළිබඳව වැඩිදුරටත් අධ්‍යනය කරන්නෙක් නම් කරවැලුන්ගේ සහ රදනකයන්ගේ මධ්‍ය දේහයේ හරස් කොරල ප්‍රමාණය සහ කරවැලුන්ගේ මධ්‍ය දේහයේ හරස් කොරළ ප්‍රමාණයෙහි පවතින්නාවූ වෙනස අනුවද මොවුන් වෙන් කොට හඳුනාගැනීමට හැකියාව පවතී.

අළු රදනකයන්ගේ පෞච්ච උදරීය කොරළ / subcaudal scales බෙදුනු ස්වභාවයක් ගන්නා අතර කරවැලුන්ගේ නොබෙදුණු පෞච්ච උදරීය කොරළ වින්‍යාසයක් දැකගත හැකි වේ.

* දේහයේ හැඩය

අළු රදනකයන්ගේ දේහයේ හැඩය කරවැලුන්ගේ තරම් දිගු නොවන අතරම සිලින්ඩරාකාර දේහය උදරීයව තරමක් පළල් වී  දේහයේ අපර කොටසට යන විටදී ක්‍රමයෙන් සිහින්ව යන නමුත් කරවැලුන්ගේ දේහය හිසේ සිට දේහයේ අපර කොටස දක්වාම ඒකාරී සිලින්ඩරාකාර බවකින් යුක්ත වී වල්ගය කොටසේදී පමණක් තරමක් සිහින් ස්වභාවයක් පෙන්නුම් කරනු ලබයි.

වර්ණය

අළු රදනකයන්ගේ වර්ණ ප්‍රභේද කිහිපයක්ම හඳුනාගත හැක.

• Forma typica morph – මෙම වර්ණ ප්‍රභේදයේ හරස් පටි අපැහැදිලි දාරයකින් සීමා වන අතර දේහයේ හරස් පටි 35 ක් හෝ ඊට වඩා දැකගත  හැකි වේ. උදරීය පැත්තට ආසන්න වන විටදී මෙම හරස් පටි දෙකට බෙදී ත්‍රිකෝණාකාර ලෙස දක්නට ලැබෙන අතර පෙයාර්ස් හැඩැති හිස වෙන් වන ගෙල ප්‍රදේශයේ පැහැදිලි සුදු පැහැති කොලරයක් වැනි පටියක් දක්නට ලැබේ.

• Oligozonatus morph – මෙම වර්ණ ප්‍රභේධය ඉහළ කඳුකර ප්‍රදේශ වල සුලභ බව දක්වා තිබුනද සබරගමුව පලාත තුලද යම් ව්‍යාප්තියක් සහිත බව මගේ මතයයි. මෙම වර්ණ ප්‍රභේධයේ සුදු පැහැති හරස් පටි කිහිපයක් පමණක් පවතින අතර හරස් පටි වල පැහැදිලි දාරයක් සහිත වේ.

• Unicolour morph – මෙම වර්ණ ප්‍රභේදයේ සුදු පැහැති හරස් පටි කිසිවක් නොපිහිටන අතර පෘෂ්ඨීයව ඒකාකාර පැහැයක් සහිත වේ. මොවුන්ගේ තොල් සුදු පැහැති වන බව දක්වා තිබුණද තොල් වල පැහැයද දේහයේ පැහැයට සමාන සතුන් ලංකාවේ මෙන්ම ඉන්දියාවේද වාර්තා වී ඇත.

හැසිරීම් රටා 

මොවුන් ප්‍රධාන වශයෙන් නිශාචර සර්පයන් වූවද දිවා කාලයේද සංචරණය කරන අවස්ථා හමුවේ. භෞමික සර්ප විශේෂයක් වූවද ඉතා හොඳින් ගස් මත නැඟීමේ හැකියාව පවතී.  ප්‍රධාන ආහාරය ලෙස හූනන් දැක්විය හැක. මීට අමතරව කටුස්සන් කුඩා මීයන් වැනි සතුන්ද ආහාර ලෙස ගනී. වෙනත් කුඩා සර්ප විශේෂද ආහාර වශයෙන් ගන්නා අවස්ථා ද වාර්තා වී ඇත.

බොහෝවිට මිනිස් ජනාවාස ආශ්‍රිතව ව්‍යාප්තිය ඉහල වීමට හේතුව වන්නේ මොවුන්ගේ ගොදුරු නිවෙස් ආශ්‍රිතව සුලභ වීම නිසාවෙන් වන අතරම නිවෙස් වල ඇති කපරාරු නොකල රළු පෘෂ්ඨ ඔස්සේ ඉතා හොඳින් ඉහළට නැඟීමේ හැකියාව මොවුන්ට පවතී.

නිර්විෂ සර්පයෙක් වූවද බොහෝ අවස්ථා වලදී මොවුන් හපකෑමට පෙළඹෙන සර්ප විශේෂයක් වන නිසාවෙන් නිදහස් අතින් මොවුන් හැසිරවීමේදී කල්පනාකාරී විය යුත්තේ මොවුන්ගේ පවතින රදනක දත් වලින් තියුණු ලෙස තුවාලයක් සිදු වන ලෙස හපාකෑමට හැකියාව සහිත හෙයින් බව මතක තබාගත යුතු වේ.

මොවුන්ගේ ගැහැණු සතුන් වරකට බිත්තර 3 – 11 ක් පමණ [ශ්‍රීලංකාවේ සර්පයන් ආචාර්ය රුචිර සෝමවීර] දමන බව වාර්තා වේ. මොවුන් බියට පත්වූ අවස්ථා වලදී වේගවත්ව පලා යාමට උත්සාහ කලද එසේ නොහැකි අවස්ථා වලදී ගුලිවී හිස සඟවාගැනීමට උත්සාහ දරයි. 

පසු සටහන –

මෙම ඡායාරූපයේ සිටින සතා නිවෙසක් තුල නානකාමරයක තිබූ රෙදි සෝදන යන්ත්‍රයක් තුල සිටියදී හමු වූ අතර සෑම විටෙකදීම මෙවැනි යන්ත්‍ර ක්‍රියාත්මක කිරීමට පෙර හොඳින් පිරික්සීම ඉතාම වැදගත්. සතා ඉවතට ගැනීම සඳහා මුළු රෙදි සෝදන යන්ත්‍රයම කොටස් කිරීමට සිදු වූවේ අප ජලය ගලා යාමට සවි කර තිබූ බටය තුලින් මෙම සතා යන්ත්‍රය ඇතුලට රිංගා සිටි නිසාවෙනි. සෑමවිටම මෙවැනි අප ජලය මුදාහරින බට භාවිතා නොකරන අවස්ථා වලදී end cap එකකින් වසා තැබීම සතුන්ගේ මෙන්ම ඔබේද ආරක්ෂාවට ගතහැකි ක්‍රියාමාර්ගයකි.

සටහන සහ ඡායාරූප – චමල් ලක්ෂාන් ජයවීර

Concentrated Solar Power (CSP)


“සුර්ය විදුලිය” කියපු ගමන් අපේ මනසට එකවරම නැගෙන්නේ නිවසේ වහල මත සවි කරන සුර්ය පැනය පද්දතියක්. මේ ලිපියෙන් අපි කතා කරන්නේ අපි නිතර දකින සුර්ය කෝෂ තාක්‍ෂණයට පරිබාහිර වූ එහෙත් සුර්ය ශක්තියෙන් විදුලිය නිපදවන වෙනත් තාක්‍ෂණයක් ගැන. මේ විදුලි උත්පාදනය ක්‍රමයට කියන්නේ concentrated solar power (CSP) කියල. මෙහි සුර්ය කෝෂ වෙනුවට තියෙන්නේ කණ්නාඩි හෙවත් දර්පණ. හිරුගේ පිහිටීම අනුව දර්පණ වල පිහිටීම වෙනස් කිරීමට tracking system එකක් භාවිතා කරනවා බොහෝ විට. මේ ක්‍රමයේ තාක්‍ෂණික පසුබිම අපි හැමෝම වගේ පුංචි කාලේ භාවිතා කරපු ක්‍රමයි.

උත්තල කාචයකින් සුර්යාලෝකය එකට එකතු කරලා කඩදාසි, පුළුන් කෑලි වගේ දේවල් පුච්චපු අතීතයක් අපි හැමෝටම වගේ තියෙනවා. එතැනදී සිදුවුනේ සුර්ය තාපය එක තැනකට කේන්ද්‍රගතකිරීම නිසා එතන විශාල තාප ශක්තියක් එකතු වීම. මේ පදනම ම තමයි මෙම CSP තාක්‍ෂණයේත් තියෙන්නේ. මෙතැනදී වෙන්නේ බිම සවිකර තිබෙන දර්පණ මගින් සුර්යාලෝකය උස් කුළුණක් මත ඇති තාප අවශෝෂක පද්ධතියක් මතට  පරාවර්තනය කරනවා. දර්පණ දස දහස් ගණනකින් පරාවර්තනය කර එවන මේ සුර්ය කිරණ නිසා මෙම තාප අවශෝෂණ පද්ධතියේ  ඉතා ඉහළ උෂ්ණත්වයක් ඇති වෙනවා (ඇතැම් විට සෙල්සියස් අංශක 1000ක පමණ). මේ උෂ්ණත්වය භාවිතා කර හුමාලය නිපදවා එමගින් විදුලිය නිපදවනවා. ඇතැම් CSP විදුලි බලාගාර වල අවශ්‍ය විටෙක විදුලිය නිපදවීම සඳහා ඉහල තාප ධාරිතාවකින් යුතු ද්‍රාවණයක් රත් කර ගබඩා කර තබා ගන්නවා. ඉන්පසු, අවශ්‍ය විටක එම ද්‍රාවණයෙන් තාපය ලබාගෙන හුමාලය නිපදවා විදුලි නිෂ්පාදනය් කරනවා.

මේ වන විට CSP තාක්‍ෂණය වාණිජ මට්ටමින් විදුලිය නිපදවීම සඳහා භාවිතා කරනවා. මෙහි වැඩිම භාවිතාව වාර්තා වන්නේ ස්පාඥයෙන් – 2014 වන විට ස්පාඥය සතු CSP ධාරිතාව මෙගා වොට් 2,300 බව තමයි විකිපීඩියා වෙබ් අඩවියේ සඳහන් වන්නේ. මිට අමතරව ඇමෙරිකාව, ඉතාලිය, ඔස්ට්‍රේලියාව මෙන්ම මැද පෙරදිග රටවල් වලද CSP තාක්‍ෂණය භාවිතා වනවා. ලොව විශාලතම CSP විදුලි බලාගාරය තිබෙන්නේ ඇමෙරිකාවේ කැලිෆෝනියා ප්‍රාන්තයේ – එය මෙගා වොට් 392ක්.

CHICKEN CORDON BLEU


CHICKEN CORDON BLEU

අවශ් ද්රව් 

 2 chicken breast 

1tsp musterd  

salt and peppe

 4 ham slices

4 cheese slice

100gr පාන් කුඩු

 50gr පිටි 

1 බිත්තර

අවශ්‍යය නම් තයිම් හෝ ඔරිගානෝ ස්වල්පයක්

සාදාගන්නා ආකාරය

මුලින්ම චිකන් බ්‍රෙස්ට් දෙක බෝඩ් එකක් මත තබා පොලිතින් ආවරණයක් යොදා roller pen එකක ආධාරයෙන් අඟල් කාලක ප්‍රමාණයට සමවනසේ තලාගන්න .ඊට පසු එයට  ලුණු ගම්බිරිස් අවශ්‍ය ප්‍රමාණය ඉස ගන්න. අවශ්‍ය නම් මේ අවස්ථාවේ herbs ටික ඉස ගන්න. ඉන්පසුව ham slice උඩින් අතුරා ගෙන ඊට අමතරව චීස් සයිස් ඒ ආකාරයටම අතුරා ගන්න. ඉන් අනතුරුව ොඳට හිර වන ආකාරයට එය රෝල් කර ගන්න. අවශ්‍ය නම් toothpick එකක ආධාරයෙන් මෙය සිරකර තබා ගත හැක. ඉන්පසු පාන් පිටි ඉස ගසා ගත් බිත්තරයේ තවරා  පසුව පාන් කුඩු මත තවරා ගන්න. මේ දෙයාකාරයකින් පිස ගත හැක.  180c රත්වූ ගැඹුරු තෙලේ විනාඩි අටත් දහයත් අතර කාලයක බැද ගැනීමට සහ 180c රත්වූ අවන් එකක විනාඩි 25 ත් 30 ත් අතර කාලයක් බේක් කර ගත හැක. කුමන හෝ ආකාරයකින් cook කරගත් පසු විනාඩියක් නිවෙන්නට හැර, අඟලක ප්‍රමාණයේ පෙති කපා ගන්න. මෙය cream සෝස් එකක් සමඟ කදිමට ගැලපේ. තවද බොයිල් බ්‍රොකලි, mash potato, තම්බාගත් එළවළු සමග ආහාරයට ගත හැක. මෙය මුලින්ම ස්විට්සර්ලන්තයේ හඳුන්වා දුන්නද පසුව ප්‍රශ්නයේ ප්‍රසිද්ධ විය.

MANOJ FERNANDO

HEAD CHEF

ST’ IVES LODGE 

LONDOM

Food Receipt


බිත්තර රහිත වැනිලා කේක් (Eggless vanilla cake)

අවශ්‍ය ද්‍රව්‍ය:

පිටි කෝප්ප 3

බේකින් පවුඩර් තේ හැඳි 2

ලුණු තේ හැඳි 1

⁣බේකින් සෝඩා තේ හැඳි 1/2

තෙල් කෝප්ප 1 (canola, sunflower or vegetable oil)

සීනි කෝප්ප 1,1/2

මුදවපු කිරි කෝප්ප 1

වැනිලා එසන්ස් තේ හැඳි  1 

කිරි කොපප 1 1/2 

විනාකිරි තේ හැඳි 2

සාදන ක්‍රමය:

– බේක් කිරීමට ගන්නා 8″ කේක් ටින් 2 ක් බේකින් පේපර්ස් දමා සකස් කර ගන්න. Oven එක සෙල්සියස් අංශක 165 (nonfan oven) උෂ්ණත්වයේ විනාඩි දහයක් පමණ කලින් රත් කරගන්න. 

– වියලි ද්‍රව්‍ය පිටි හලනයකින් තුන් පාරක්  හලා පසෙකින් තබන්න. (පිටි, බේකින් පවුඩර්, බේකින් සෝඩා, ලුණු) 

– Electric Mixer එකක් ආධාරයෙන් තෙල් සහ සීනි හොඳින් මිශ්‍රකරගන්න. ඉන් පසු යෝගට් සහ වැනිලා එකතු කර ⁣හොඳින් කළවම් කරගන්න. දැන් electric mixer එකේ Speed එක අඩු කර පිටි මිශ්‍රණය ටිකෙන් ටික එකතු කර ගන්න. කිරි සහ විනාකිරිද එකතු කරගන්න. මිශ්‍රණයේ කැට නැති වනතුරු හොඳින් කළවම් කරගන්න. Over mix කිරීමෙන් වළකින්න. 

–  මිශ්‍රණය කේක් ටින් දෙකට සම සමව දමා විනාඩි 45 බේක් කර ගන්න. විනාඩි 45 කට පසු පොඩි toothpick එකක් ආධාරයෙන් හොඳින් බේක් වී ඇද්දැයි බලන්න. බේක් වී මඳි නම් තව විනාඩි 5-10 තබන්න. 

– හොඳින් නිවුනාට පසු රස බලන්න.

Amy Nanayakkara (Diploma in cake Decorating. RL ,Clement Cake school. Sri Lanka)

වැස්ලින්


වැස්ලින් පිළිබඳව අසා නැති අයෙක් නැති තරම්. එය එතරම් ජනප්‍රිය වී ඇත්තේ  ආලේපනයක් ලෙස මෙන් ම ඉතා පහසුවෙන් අඩු මුදලකට මිල දී ගත හැකි වීම ත් ඒ භාවිතයෙන් ලැබෙන උසස් ප්‍රතිලාභ සහ විවිධ ආකාරයට ප්‍රයෝජන ගත හැකිවීම නිසා විය යුතු ය. 

ලොව පුරා කාන්තා , පිරිමි දෙපාර්ශවය ම විසින් රූපලාවණ්‍යය සහ වෙනත් ප්‍රතිකාර ක්‍රම සඳහා වැස්ලින් බහුලව භාවිත කරනු ලබ යි. 

 අද ත් සුපුරුදු පරිදි ම රූපලාවණ්‍යය පිළිබඳ කතා බහේ දී වැස්ලින් රූපලාවණ්‍යය කටයුතු සඳහා උපකාර කරගතහැකි ආකාරය පිළිබඳ තොරතුරු බිඳක් ඔබ හා බෙදාගැනීමට මා සූදානම් .

*) සමේ තෙතමනය ආරක්ෂා කිරීම:

වැස්ලින් භාවිතයෙන් ඔබට ලැබෙන ප්‍රධාන ත ම වාසිය නම් එමඟින් සමේ තෙතමනය මනාව පවත්වාගැනීමේ හැකියාව ලැබීම යි. කලින් කලට විවිධ මතිමතාන්තර ඇතිවූව ත් පෙට්‍රෝලියම් ජෙල් ආශ්‍රිත නිෂ්පාදනයක් වුවත් ලොව පිළිගන්නා සන්නාම යටතේ සමට හිතකර ප්‍රතිඵල ලබාදෙන අයුරින් වැස්ලින් නිපදවනු ලබ යි. එබැවින් ආසාත්මිකතා නොමැති ඕනෑ ම අයෙකුට පහත ක්‍රම අත්හදාබැලීමෙන් විස්මිත ප්‍රතිඵල ළඟාකරගත හැකිවනු ඇත. සම රැලිවැටීම වළක්වා තෙතමනය පවත්වාගැනීමට ත් සම සුසිනිඳු කරගැනීමට ත් නෑමෙන් හෝ පිරිසුදු වීමෙන් අනතුරුව සිරුරේ වැස්ලින් ආලේප කර පිරිමදින්න. දිනපතා මෙසේ වැස්ලින් සත්කාරය තුළින් සුමුදු සමක පහස ඔබට ලැබෙනු ඇත.

*) නිල්වන් ඝන ඇස්පිහාටු සඳහා

වැස්ලින් භාවිතයෙන් ඔබේ ඇස්පිහාටු නිරෝගීව අලංකාරවත්ව පවත්වාගෙන යා හැකි බව ඔබ දැන සිටියා ද? දිනපතා රාත්‍රී නින්දට පෙර පිරිසුදු පොල්තෙල් ( extra verging coconut oil) සහ වැස්ලින් සුළු ප්‍රමාණවලින් මිශ්‍රකරගෙන පිරිසුදු eye brow brush හෝ mascara brush එකක් ආධාරයෙන් ( මේ සඳහා ඉවතලන මස්කාරා ඇසුරුම්වල ඇති brush එකක් හොඳින් සෝදා පිරිසුදු කර ගැනීමෙන් අනතුරුව පාවිච්චියට ගන්න) හොඳින් ඇස්පිහාටු අතර ආලේප කරන්න. සති කිහිපයක් දිනපතා භාවිතයෙන් අනතුරුව ඔබට ම වෙනස වටහාගත හැකිවනු ඇත. 

*) දිගු රෝස පැහැ ශක්තිමත් නියපොතු සඳහා

වැස්ලින් භාවිතයෙන් ඔබට නියපොතුවල ඇති බොහෝ ගැටළු ද මඟහරවා ගත හැකි ය. ඔබ වඩා සුන්දර නිරෝගී නියපොතු පිළිබඳව සිහින දකිනවානම් දිනපතා වැස්ලින් ස්වල්පයක් දෑතේ සහ දෙපාවල නියපොතුවල ආලේප කරන්න. වැදගත් ම කරුණ නම් නියපොතුවල කියුටිකල් මත වැස්ලින් ආලේපකර මෘදුව රවුම් හැඩයට සම්භාහනය කරන්න. 

*) මේක් අප් පහසුවෙන් ඉවත්කිරීමට 

ඔබ නිතර මේක් අප් භාවිත කරන අයෙක් ද? පහසුවෙන් නිවැරදිව මේක්අප් ඉවත්කිරීමට ක්‍රමයක් අත්හදා බැලීමට කැමති ද? එසේ නම් මේක් අප් ඉවත්කිරීමේ දී වැස්ලින් ස්වල්පයක් භාවිත කරන්න. වැස්ලින් භාවිතයෙන් ඔබේ මේක්අප් පහසුවෙන් ඉවත් කරගතහැකිවාක් මෙන් ම සමහර makeup remover මඟින් ඇතිකරවන සමේ වියළි සහ ඉරිතැලීම් ස්වභාවය ද අව ම කර යි. එමෙන් ම වැස්ලින් මඟින් තදපැහැයෙන් සමට කාවැදුණු තොල් ආලේපන, සහ මස්කාරා වැනි තද මේක් අප් පවා පහසුවෙන් ඉවත්කරනු ලබ යි. 

*) පැහැපත් සමක් ලබා දෙයි

ඔබේ මුහුණේ අධිකව තෙල් තැන්පත් වන නාසය, නළල වැනි ස්ථානවල ඇතිවන කලුලප (black heads) සඳහා ද වැස්ලින් කදිම පිළිතුරක් වේ. රාත්‍රී නින්දට පෙර පිරිසුදු කරගත් සම මත තරමක් ඝන ආලේපනයක් ලෙස වැස්ලින් black heads බහුලව ඇති ස්ථානවල layer එකක් ආකාරයට ආලේප කරන්න. අනතුරුව plastic wrap එකකින් වැස්ලින් ආලේප කළ නාසය හෝ ස්ථානය ආවරණය කරන්න. නින්දට යන්න. පසුවදාට mask එක ඉවත් කර cotton bud එකක් ආධාරයෙන් මෘදුව black heads තිබූ ස්ථාන පිසදමමින් black heads ඉවත් කරගන්න. 

*) සුමුදු දෙපා සඳහා වැස්ලින් 

ඔබේ දෙප නිරන්තරයෙන් වියළි ස්වාභාවයක් ගන්නේ නම් යටිපතුල් වේදනා සහගත ලෙස පැළෙනවානම් ඒ සඳහා ද සාර්ථක විසඳුමක් ලෙස වැස්ලින් හඳුන්වා දිය හැකි යි. පිරිසුදු කරගත් යටිපතුල්වල නින්දට පෙර වැස්ලින් ආලේප කර මේස් යුවළක් පළඳින්න.එසේ ම වැස්ලින් ආලේපනයට පෙර පියුමික් ස්ටෝන් එකක් භාවිත කොට තද හම් සහිත යටිපතුල් පිරිසුදු කරගැනීමෙන් වඩා ඉක්මන් සහ සාර්ථක ප්‍රතිඵල ලබාගන්න.  එසේ ම පාවහන් පැළඳීමට පෙර වැස්ලින් ස්වල්පයක් ආලේප කිරීමෙන් යටිපතුල්,දෙපා සහ පා ඇඟිලි අතර ඇතිවන වේදනාව සහ ගැටළු අව ම කරගත හැකි ය. 

*) හිස කෙස් වර්ණගැන්වීමේ දී සම මත පැල්ලම් ඇතිවීම වළක්වා ගැනීමට

බොහෝ කාන්තාවන් වියපත් වනවිට මුහුණපාන ගැටළුවක් වන්නේ හිස කෙස් සුදුපැහැවීම යි. මෙහි දී තමන් විසින් ම තම හිසකෙස් වර්ණගන්වා ගැනීමට බොහෝ දෙනා පෙළඹෙන අතර එහි දී නළල සහ මුහුණේ වෙනත් ස්ථානවල එම වර්ණ තැවරීම වළක්වා ගැනීමට අපහසු වේ. එමෙන් ම ඒ තැවරුණු වර්ණ පහසුවෙන් ඉවත් නොවේ. මේ සඳහා ද නළල, දෙකම්මුල්, දෙකණ වැනි ස්ථානවල හිසකෙස් වර්ණ ගැන්වීමට ප්‍රථම වැස්ලින් ආලේප කිරීමෙන් එසේ තැවරෙන වර්ණ පහසුවෙන් ඉවත්කරගත හැකි වේ.

*) සුසිනිඳු දෙතොලක් සඳහා

රාත්‍රී නින්දට පෙර දෙතොලේ වැස්ලින් ස්වල්පයක් ආලේප කර මෘදුව සම්බාහනය මඟින් ඔබට මනාව පිරුණු සුමුදු දෙතොලක් පවත්වාගත හැකි ය. එසේ ම ශීත් හෝ වියළි කාලගුණික , දේශගුණික හෝ අසනීප තත්ත්ව යටතේ අධික වියළි සහ වේදනාකාරී පැළීම්වලින් ඔබේ දෙතොල ආරාක්ෂාකිරීමට වැස්ලින් මහත් සේ උපකාරී වේ. එසේ ම ලිප් බාම් එකක් ලෙස ද වැස්ලින් ඔබට භාවිත කිරීම ට හැක.

*) දෙබැම හැඩගැන්වීමට 

ඔබේ දෙබැමේ හැඩය මනාව පවත්වාගැනීමට ද හැඩගැන්වීමට ද වැස්ලින් උපකාරී වේ. Eyebrow brush එකක ආධාරයෙන් වැස්ලින් ආලේප කිරීමෙන් දිගුවේලාවක් දෙබැමේ හැඩ නිසි පරිදි පවත්වාගැනීමට ඔබට අවකාශ ලැබේ. 

මේ අනුව අධික මිලක් ගෙවා ලබාගන්නා සමහර රූපලාවණ්‍යය නිෂ්පාදනවලින් අපේක්ෂාකරන ප්‍රතිඵලය ම , සමහරවිට ඊට ත් වඩා සාර්ථක කඩිනම්

ප්‍රතිඵල ඔබට මිලෙන් අඩු, එහෙත් විවිධාකාර අරමුණු වෙනුවෙන් භාවිත කළ හැකි, පහසුවෙන් ම බොහෝ තැන්වලින් මිල දී ගත හැකි වැස්ලින් තුළින් ලබාගත හැකිවනු ඇත. ඉතා සාර්ථක, පහසු ප්‍රතිඵල මෙන් ම මිල අධික නොවීම,පහසුවෙන් ලබාගත හැකිවීම ,අතුරු ආබාධ ඉතා අව ම වීම වැනි කාරණා නිසා වැස්ලින් ඔබේ ප්‍රියත ම රූපලාවණ්‍යය නිෂ්පාදන අතරට එකතුකරගැනීමට මෙම ලිපිය උපකාර වන්නට ඇතැයි සිතන අතර නැවත ඊළඟ කලාපයෙන් මෙවැනි ම වැදගත් ලිපියකින් ඔබ හමුවීමට බලාපොරොත්තු වෙමි.