Category: Daily-Topics

උදේට ඔබ අවදි වෙන්නෙ සතුටින් ද? මෙහෙම ඇහුවොත් කීයෙන් කී දෙනාද සතුටුයි කියන්නෙ. උදෑසන අවදිවීම වගේම රැකියාවට යෑමත් හොඩක් දෙනෙක්ට කරදරයක්. හරිම අකමැත්තෙන් කරන දේවල්. නමුත් ජීවත් වෙන්න මුදල් අවශ්‍ය නිසා අකමැත්තෙන් හෝ රැකියාවට යනවා. මම ඔබට පොඩි කතාවක් කියන්නම්.

ඇය මගේ යෙහෙළියක්. විධායක ශ්‍රේණියේ රැකියාවක් කරන,හොඳ වැටුපක් ගන්නා ඇය රැකියාව කරන්න පටන් ගත් දා සිට සතුටකින් ඉන්නවා මම දැක නැහැ. දිනක් අපි කතා කරමින් සිටිද්දී ඇය මගෙන් මෙසේ විමසුවා.

“ඔයා කැමැත්තෙන් ද ඔය ජොබ් එක කරන්නෙ?”

“ඔව්” මගේ පිළිතුර වුණා. මම කිසිඳු අයෙක්ගෙන් රැකියාව,විවාහය, දරුවො, පවුල ගැන ප්‍රශ්න නොකරන කෙනෙක්. ඒ නිසා ඇගේ රැකියාව ගැන මම විමසුවේ නැහැ. නමුත් ඇය මෙසේ කතාවට මුල පිරුවා.

“අනේ එහෙමද? මට නම් දැන් එපා වෙලා තියෙන්නෙ මේ රස්සාව. කිසිම ගෝ එකක් නැහැ. වෙලාවකට අයින් වෙන්නත් හිතෙනවා. ඒත් ඉතින් ජොබ් එකක් ඕනිනේ. ඒ නිසා ඉතින් ඉන්නවා”

ඇය සහ මම කුඩා කළ සිට ඉතා හොඳ මිතුරියන්. ඇය කුඩා කළ සිටම කැමති වුණේ ක්‍රියේටිව් දේවල් වලට. ඇයට ලස්සනට මහන්නත් පුළුවන්. මගේ උපන්දින වලටත් ඇගේ අතින් මැසූ කොට්ට උර, ටේබල් මැට්ස් පවා මට දී තිබෙනවා. නමුත් සාමාන්‍ය පෙළින් පස්සෙ ඇයට සිදු වුණේ ඇගේ දෙමව්පියන් කැමති දෙයක් උසස් පෙළට කරන්නට. ඉතින් ඇයට ඇගේ නිර්මාණශීලී හැකියාව මග හැරුණා.

“ඔයා දන්නවනෙ මම ඒ කාලෙ ඉඳලම ඩිසයිනින් වලට එහෙම කැමතියි. ඒ වගෙ ජොබ් එකක්වත් කරන්න තිබ්බනම්..” ඇය සුසුම් හෙළුවාය.

“ඉතින් ඔය ජොබ් එක කරන ගමන් ඔයාට ඩිසයිනින් වගෙ දේවල් කරන්නත් පුලුවන්නෙ”

“ඒ කොහොම ද? දවසම මෙතන වැඩ කළාම ඇගට හරිම මහන්සියි. තව දෙයක් කරන්න බෑ”

“ඔයා ට්‍රයි කරලා බැලුවද?”

ඇය කල්පනා කරන්නට විය. ඇයත් සමග කතාවෙන් මට පැහැදිලි වුණේ ඇයට මේ ඩිසයිනින් පැත්තට යොමු වීමට ඉතා දැඩි කැමැත්තක් ඇති බවයි. ඇයට ඇගේ රස්සාව එක්ක වෙලාව කළමණාකරණය කරගන්නට තේරුමක් නැති බවක් තිබුණා.

නමුත් ඔබ විශ්වාස කරනවද? ඇය අද ඇගේම ඩිසයින් කළ ඇඳුම් තිබෙන Online Store එකක හිමිකාරියක්. ඇය අදටත් අපේ එදා හමුවීම ගැන සතුටු වෙනවා. මොකද ඇය එයින් නව පණක් ලැබුවා. තමන්ගෙ සහජ හැකියාවෙන් තමන්ගෙම බිස්නස් ව්කක් පටන් ගන්න ඇයට හැකි උනා.

ඔබත් කරන රැකියාවට කැමැත්තක් නැටි කෙනෙක් ද? පොඩ්ඩක් හිතලා බලන්න. ඔබ ඇත්තටම දක්ෂ දේවල් මොනවද කියලා?කොටින්ම කිව්වොත් ඔබේ Hobby එක (විනෝදාංශය) ඔබේ රැකියාව වුණොත්? ඔබ කැමතියි නේද? අපි හැමෝම එහෙම තමයි. අපේ හිතට සතුට සැනසුම දෙන දේ අපි හරි ආසාවෙන් කරනවා. ඔබත් ඔබේ Hobby එක රැකියාව කරගන්නට හීන දකිමින් වෙමින් රැකියාවක නියැලෙන කෙනෙක් නම් දැන්ම දුක්වෙන එක නවත්තන්න. ඒත් සමග පොඩියට හෝ ඔබේ ව්නෝදාංශය හෙවත් ඔබ කැමති දෙය කරන්නට පටන් ගන්න.කාලයක් යද්දි ඔබට වැටහේවි, එය ඔබ ජීවිතේ ගත්ත නිවැරදිම තීරණයක් කියලා.

තව දෙයක්, ඔබට යමක් කරන්නට ඕනි නම් කවුරුවත් වෙනම ම වෙලාවක් බන්දේසියක තියලා ගෙනත් දෙන්නෑ. ඔබේ දෛනික ක්‍රියාවලීන් තුළින්ම ඔබ, ඔබට කාලය සොයා ගත යුතුයි. දෙයක් බැරි වෙන්නෙ, ඔබ ඔබට ‘බැහැ’ කියලා හිතුවොත් පමණයි. ඔබ ඔබව දිශ්වාස කරලා, මට පුළුවන් කියලා හිතුවොත් අනිවාර්‍යෙන් ම ‘ඔබට පුළුවන්’.

ඉතින් ඔබත් ඉගෙන ගත්ත දේම රැකියාවට කරලා එපා වෙලා ඉන්න කෙනෙක් නම් මේ ලිපිය ගොඩක් වැදගත්. Educational qualifications වලින් හිමිවෙන රැකියාව කරලා හෙම්බත් වෙලානම්, අදම ඔබ දක්ෂ දෙය පටන් ගන්න. ඔබේ හිත සතුටින් එහි නියැලෙන නිසාම, ඉක්මනින් ම ඔබට සාර්ථකත්වයට යන්නත් පුළුවන්. අනිත් අය කරන කරන ජොබ් කරන්නට හීන මවන්නත් එපා. ඔබේ දක්ෂතා වලින් ඔබගේ මාර්ගය තෝරා ගන්න. ඔබ ඔබම වන්න. ඔබත් ඔබේ Hobby එක, Job එක කරගන්න!

වෛද්‍ය චන්ද්‍රිකා රාජපක්ෂ

Doctor of Ayurveda | Motivational Speaker | Counsellor

M. Sc., BAMS, B. Sc., CCHRM,

Ad. Dip. in Psychotherapy & Dip. in Counseling Psychology

බේකින් සෝඩා නැත්නම් sodium bicarbonate යනු ස්වාභාවික රසායනික සංයෝගයක් බව ඔබ දන්නවා ඇති. ආහාර පිපුම්කාරකයක් මෙන් ම , ස්වාභාවික පිරිසුදුකාරයක් ලෙසත් එදිනෙදා ජීවිතයේ දී බෙහෙවින් භාවිතවන බේකින් සෝඩා ඔබේ රැව රැකගැනීමේ සත්කාරවලට ත් යොදාගතහැකි බව ඔබ දැන සිටියා ද? එසේ නම් අද අපි ඉතා පහසුවෙන් සහ අඩු මුදලකට මිල දී ගතහැකි බේකින් සෝඩාවලින් ලබාගතහැකි තවත් වැදගත් ප්‍රයෝජන කිහිපයක් පිළිබඳව කතාබහ කරමු..

හිස්කබලේ ඇතිවන ගැටළු සඳහා..

විවිධ රසායනික සංයෝග අඩංගු සැර ෂැම්පූ සහ hair products මඟින් හිස සෝදා පිරිසුදු කරන්නට අප පෙළඹී සිටිනවා. නමුත් සතියකට වරක් පමණ ෂැම්පූ වෙනුවට බේකින් සෝඩා ස්වල්පයක් වතුර සමඟ කලවම්කර හිස් කබලේ ආලේප කර හෙමින් සම්භාහනය කර සෝදාහරින්න. එමඟින් හිස්කබලේ රැඳී ඇති අධික තෙල් සහ කුණුදූවිලි ඉවත්කර ස්වාභාවිකව හිස්කබල පිරිසිදු කරන අතර

නිතර හිස් හොරි සෑදී මේ අවධානම ද අඩු කර යි. 

මුඛ දුර්ගන්ධය සඳහා..

දිනපතා දත් මැදීමෙන් අනතුරුව බේකින් සෝඩා ස්වල්පයක් දියකරනලද වතුර ස්වල්පයකින් මුඛය සෝදාහැරීම සාර්ථක සහ ස්වාභාවික mouth washer එක කි.. 

Body scrub / soother..

සතියකට වරක් හෝ දින කිහිපයක් ඔබ ස්නානය කරන වතුරට බේකින් සෝඩා එක්කරගන්න. එමඟින් ශරීරයේ විඩාව දුරුකර ස්වාභාවිකව පිරිසුදු කරනු ලබ යි. එසේ ම බේකින් සෝඩා body scrub එකක් ලෙස ද භාවිතයට ගැනීමෙන් ඔබේ සම සුමුදු කර ස්වාභාවිකව පිරිසුදු කරනු ලබ යි. එසේ ම සමෙහි අධික වියළිබව, පැලීම් සහ itchy යනා දී ගැටළුවලටත් බේකින් සෝඩා සේදුම්කාරකය සාර්ථක පිළියමකි. 

සුමුදු යටිපතුලකට..

ඔබත් දෙපාවල අධික වියළිබව සහ පැලීම්

නිසා කණස්සල්ලට පත්වී ඇත්නම්, රාත්‍රී නින්දට පෙර දෙපා සහ යටිපතුල බේකින්සෝඩා ගල්වා scrub කර සෝදා හරින්න. අනතුරුව මෘදු ක්‍රීම්වර්ගයක් තෙතමාත්තුකර දෙපා සහ යටිපතුලේ ගැල්වීමෙන් ඔබට ඉහත කී ගැටළුවෙන් මිදීමට හැකිවනු ඇත.

සුන්දර නියපෙළකට..

සතියකට දෙවතාවක් පමණ බේකින් සෝඩා යොදාගනිමින් නිය සහ ඇඟිලි මිනිත්තු කිහිපයක් scrub කර සෝදාහරින්න. ඔබේ ඇඟිලි සහ අත්ලේ මෘදුබව සහ මැරුණුසෛල ඉවත් වී පැහැපත්වන බව ඔබට ම වැටහේ වි. එමෙන් ම දිගු නියපොතු මනාව පිරිසුදු වී, තවත් අලංකාර ලෙස දිස්වේ වි. 

ආභරණ පිරිසුදු කරගැනීමට..

බේකින් සෝඩා කොටස් තුනකට වතුර එක කොටසක අනුපාතයට සාදාගන්නා මිශ්‍රණයෙන් ඔබගේ රිදී සහ, රන් ආභරණ දිලිසෙන ලෙසට පිරිසුදු කරගත හැකි ය. ( plated ආභරණ සඳහා මෙම ක්‍රමය යොදාගන්න එපා)ඉහත කී මිශ්‍රණයෙන් ස්වල්පය බැගින් ගෙන කුඩා බුරුසුවක් ආධාරයෙන් හොඳින් scrub කර වතුරෙන් සෝදා හැරීමෙන් ඔබේ ආභරණවලට දිදුලන අලංකාරයක් ලබාදෙන්නට හැකිවනු ඇත. 

ඉතින් මෙලෙස ස්වාභාවිකව සහ අඩු මුදලකින් ඔබේ රුව සහ සුන්දරත්වය ඔප් නංවාගන්නට හැකි තවත් ප්‍රයෝජනවත් ලිපියකින් ඔබ හමුවණ තුරු ඔබට සුබ දවසක් !!!!

සමීරා ජයසිංහ 

මුළු ලොවෙහිම එදා මෙදා තුර බලවතුන් හා ධනවතුන් යැයි සැලකෙන බොහෝ දෙනකු ගේ සාක්කු බර වුනෙත් බැංකු පොත් පිරුනේත් සාධාරණව හරි හම්බකරගත් මුදලින් පමණ ක් නොවෙයි.

ධනයට හා බලයට ඇති කෑදරකම නිසා මුලු ලොව වැනසුනද ඔවුනට කම්නැත. අද වන විට සිදුවෙමින් ඇත්තේ මෙයයි.

මත්ද්‍රව්‍ය වලින්  ධනවතුන්ට හා බලවතුන්ට මහා ධනස්කන්ධයක් ගලාගෙන එයි. මේ මත් රකුසාගෙන් රටත් ලෝකයත් ගලවාගන්නට කිසිවකුටත් නොහැකි වී ඇත්තේ දේශපාලනික මැදහත් කම් ඇති බැවිනි. ජීවිතාවර්ජනය තුළින් මා දිගින් දිගටම ඔබ වෙතට ගෙන එන්නට උත්සහ කරනු ලැබුවේ මතට ඇබ්බැහි වී ඉන් මිදුණු ජීවිත ගැනත්, ඒ අයගේ ආදරණීයන් විඳි අත්දැකීම් පිලිබඳවත් ය. එහෙත් අද මා ඔබ වෙත ගෙන එනු ලබන්නේ මීට දින කිහිපයකට පෙර මට අසන්නට හා දකින්නට ලැබුණු සංවේදීය සිදුවීම් දාමයකි. මේ කතාව  අපිට කියන්නේ ලීනා අම්මයි.

1. අම්මේ ඔයාගෙ කවුද මත්ද්‍රව්‍ය වලට ඇබ්බැහි වෙලා තියෙන්නේ?

මගේ බාල පුතා

2. කොච්චර කල් ඉදලා ද? කොහොමද ඇබ්බැහි වෙලා තියෙන්නේ?

දැන් අවුරුදු පහළොවක් විතර ඇති.

ඒක කොහොමද වුණේ කියන්න මම දන්නේ නැහැ. මේ කාලෙ වෙනකොට මම හිටියේ රට රස්සාවට ගිහින්. කාටවත් නොකියා පුතා තොටලඟින් කසාදයක් කරගෙන තිබුණා. අපි දැනගත්තේ ටික දවසක් ගියාට පස්සෙයි. ඊලගට මේ දෙන්නම රට ගෙන ගන්න කියලා මට කරදර කරන්න ගත්තා. මමත් මගේ ලග තිබුන සල්ලි සේරම වගේ වියදම් කළ ඒ දෙන්නව සෞදි අරාබියට ගෙන්න ගත්තා. මෙහෙ ඇවිත් අවුරුදු දෙකක් යන්න කලින් ඒ දෙන්නම වෙන වෙන සම්බන්ධකම් වල පැටලුනා. මට දැනගන්න ලැබුණ විදිහට තොටලග ළමයා ආශ්‍රය කරන කාලෙ තමයි පුතා මත්ද්‍රව්‍ය වලට ඇබ්බැහි වෙලා තියෙන්නේ.

3. අනිත් දරුවෝ මොකද කරන්නේ? 

ඒ දෙන්නම හොඳ රස්සාවල් කරනවා. ඒත් බාල පුතා ගැන  හරිම කලකිරීමෙන් ඉන්නේ. එයාව හොඳ මාර්ගයට ගන්න ගොඩක් උත්සහ කලත් ඒ හැම උත්සාහයක්ම  වතුරේ ගියා.

4. දැන් පුතා මොකද කරන්නෙ අම්මෙ?

පුතා එහිදී දැන අදුනගත්ත ළමයෙක් එක්ක ලංකාවට ආවා. බලාගෙන යනකොට ඒ ළමයාත් අවුරුදු දාහතේදී කසාද බැඳලා දරුවෙකුත් ඉන්න කෙනෙක්. මුලදී කුඩු ගහද්දි අපි අවවාද කලාම සතියක් විතර නොබී ඉන්නවා. අනේ ඉතින් මම හිතනවා දැන් හැදිලා ඇති කියලා. ඒ ඔක්කොම එයාගේ රඟපෑම්. දැන් පුතා කුඩු ගහන්නවා විතරක් නෙමෙයි කුඩු විකුණන්නත් එක්ක. අලුත ගෙනාපු නෝනා ලොකු විරෝධයක් ඒකට දැක්වන්නෙ නැහැ. අම්මා වෙච්ච මම කොහොමද මේවා බලාගෙන ඉන්නේ.

5. අම්මට ගෙදර ඇවිත් කරදර කරනවද?

ඒ ගැන නම් කියලා වැඩක් නැහැ. අවුරුදු ගානක් රට රස්සාව කරල දරුවන් ටයුතුකම් ඉෂ්ඨ කරලා මම දැන් මඩමක දරුවන්ට කෑම හදලා දෙන රස්සාව කරනවා. සතියට සැරයක් ගෙදර එනවා. අද වෙනකොට පුතාගේ කුඩු බිස්නස් එක නැවතිලා. මොකද ඒක කරන්න එයා ලග සල්ලි නැහැ. කන්න නෑ කියලා අඬද්දි නෝනටයි එයාටයි පුළු පුළුවන් විදියට මං උදව් කලා. කුඩු නැතිකොට සික් එක හැදිලා දඟලනවා. නෝනට ගහනවා. නෝනටත් සල්ලි තියනවා නම් එයත් එක්ක හොදින් ඉන්න පුළුවන් නැත්තං රණ්ඩු වෙනවා. මගෙනුත් හැමවෙලේම රුපියල් පන්සීය,  දාහ ඉල්ලගන්නවා කන්න නෑ කියලා. ත්‍රීවිල් රස්සාවක් කරා කුඩු ගහන්න කලින් ඒ ත්‍රීවිල් එකත් විකුණලා. එයාට කියලා අරගෙන දුන්න ඉඩමත් විකුණලා දැන් පුංචි ගේ කෑල්ලක් ඉන්නේ. මම මේ ඊයේ පෙරේදා යි දැනගත්තේ ගෙදර ඉන්න ගැහැණු ළමයව  කසාද බැඳලා නෑ කියලා.

6. පුතාව මත්ද්‍රව්‍ය වලින් මුදවා ගන්න අම්මා මොනවද කලේ? 

පුලුවන් හැම විදිහටම කුඩු බොන එක නවත්තන්න කියලා අවවාද කළා. ඒකෙ ආදිනව කිව්වද දුන්නා. වැඩක් වුණේ නෑ හිස් වචන විතරයි. අනික මට විතරයි ඒක නවත්තන්න උවමනාව එයාගෙ නෝනට වත් වැඩි උවමණාවක් නැහැ. පුතා දැන් නෝනට Spa එකක වැඩට යන්න කියලා කරදර කරනව. ගහනවා. කොහොමද මම අම්මා කනෙක් විදිහට ඒ දරුවා ව එහෙම තැනකට යවනවා බලා ගෙන ඉන්නෙ. දැන් පුතා ගෙදර තියාගන්න අමාරුම තත්වයක් තියෙන්නේ. මං හිතවත් කීපදෙනෙකුගේ මාර්ගයෙනුත් පුතාට කතා කරා. කතා කරපු හැමෝම කිව්වේ පුතා හරි කපටි උත්තර දෙන්නෙ කියලා. අන්තිමට මම සතියකට කලින් දන්න කියන අයගෙ මාර්ගයෙන් පුනරුත්ථාපන මධ්‍යස්ථානයකට පුතාව යොමු කරන්න ලෑස්ති කර ගත්තා. සල්ලි ත් කොහොම හරි ලෑස්ති කරගෙන ඒ තැනට ගිහාම තමයි මෙයා හොදම වැඩේ කෙලේ. සල්ලි ගෙවන ලියකියවිලි අත්සන් කරලා තියලා එන්න හදනකොට ලොකු ලොකු පණ්ඩිත කතා කියලා එයාට එතන ඉන්න බැහැ කිවුවා. ගෙදර තියාගෙන ඉන්න මූණ දිහා බලලා ඇහුවා මං නැතුව එච්චර කල් ඉන්න පුලුවන්ද කියලා. මේ ළමයා එක වචනයක් කිව්වේ නැහැ. මට එයත් එක්ක පුදුම තරහක් තියෙන්නෙ. ඔව් මට පුළුවන් උඹ හැදිලා වරෙන් කිව්වා නම් අද මගේ පුතා පුනරුත්ථාපන  මධ්‍යස්ථානය ඇතුලේ. මොකද ඒ අය කිසිම කෙනෙක්ව බලෙන් තියා ගන්නෙ නැහැ. මොනව කරන්නද කරුමෙ ගෙවන්නත් එපෑ. දැන් නෝනා Spa එකක වැඩට යනවා. සල්ලි තියෙන කන්දෙන් නම් සතුටින්. මට වෙලාවකට හිතෙනවා ඔය ළමයා පුතත් එක්කම ඉන්න හදන්නේ එයත් මත්ද්‍රව්‍ය පාවිච්චි කරනවා ද  කියලා. පුතා මේ තත්වෙට එන්න මමත් හේතුවක් වුණා. තරුණ දරුවෝ ඉන්න දෙමව්පියන්ගෙන් මං ඉල්ලන්නෙ දරුවෝ ගැන හොඳ සෙවිල්ලෙන් ඉන්න. මගේ පුතා ගැන හොයන්න මම ලංකාවෙ හිටියෙ නැහැ. ඒ නිසා මම අදටත් මිනිසුන් ගෙන් බැනුම් අහනවා. මත්ද්‍රව්‍ය කියන්නේ මුළු ලෝකෙටම විනාසයක්. මගේ වැරදි නිසා අද කී දෙනෙක් දුක් විඳිනවාද. පුතා මත්ද්‍රව්‍ය පාවිච්චි කරනවා නම් අනේ මම දන්නේ නැහැ කියන එක දෙමවුපියන්ගේ වගකීම් පැහැර හැරීමක්. දරුවෝ හරියට සමාජගත කළේ නැත්නම් වෙන විනාශය මම දැන් අත්විඳිමින් ඉන්නවා. ගේ ඇතුලේ කිසිම සාමයක් සමගියක් නැහැ. මට දැන් ඕනේ පුතාව බලෙන් හරි පුනරුත්ථාපනය වෙන තැනකට යොමු කරන්න. ඒ ගැන මට හරි අවබෝධයක් නැහැ. කීපදෙනකුගෙන් ඇහුවා..  තාම හරි උත්තරයක් ලැබුණේ නැහැ. කන්දකාඩු හරි දාගන්න පුලුවන් වුනොත් ලොකු දෙයක්. මාත් එක්ක දැන් පුතා ඉන්නේ හරි වෙරයෙන්. වරදින්නේ යන්නේ හරිම පොඩි වෙලාවයි. නරක ආශ්‍රයත් මේකට බලපානවා. අත් දෙක වැදලා ඉල්ලනවා දරුවන් ව පරිස්සම් කරගන්න. පස්සෙ දුක් වෙලා වැඩක් නැහැ.

මටත් යමක් අවසානයට එකතු  කරන්න හිතුනා. දරුවන් බිහි කරපු පලියට අයාලයෙ හැදෙන්නට ඉඩදෙන්න එපා. අධ්‍යාපනය පමනක් පසු පස නොයා දරුවන් යන එන තැන්, ඇසුරු කරන්නන් හා නිවසේදී කාමරය ට වී කුමක් කරන්නේ දැයි විමසිල්ලෙන් ඉන්න. මත්පැන් හා මත්ද්‍රව්‍ය වලට ඔබේ දරුවා ඇබ්බැහි වී ඇති බව දැනගත් විගස ඒ සදහා  සුදුසු ක්‍රියාමාර්ග ගැනීමට යොමු වන්න. එසේ නැතහොත් ශාරීරික හා මානසික බෙලහීනතාව යන්ට දරුවන් ගොදුරු වන අතර මුළු මහත් සමාජයටම පිල්ලියක් වේ.

                              ස්තුතියි 

                      පියුමි සිල්වා

Every lock has a key and every problem has a solution.

ජීවිතේ ලස්සනට දිගහරින්න අපි කැමති වුණත් ජීවිතය කියන්නේ පොඩ්ඩක් අසීරු ගමනක්. අපේ ජීවිතයේ යන්න ඕනේ  දැඩි දුෂ්කර බාධක හමුවේ තමයි අපි ඉදිරියට යා යුත්තේ. අපි පෙලපත් වලින් පැවතගෙන එන  පෝසත්  මිනිස්සු වුණත්,  දුක්ඛිත අවස්ථා අපේ ජීවිතේට එන්න පුළුවන්.මොකද සල්ලිම නෙවෙයි ජීවිතේ  කියන්නේ.

සමහර අවස්ථා වලදී ජීවිතේ වෙහෙසකර දෙයක් බවට සමහරුන්ට පත්වෙන්නේ, තමන් බලාපොරොත්තු  වෙන හැම දෙයක්ම ඔවුන්ට ලැබෙන්න ඕන කියලා හිතන නිසා. 

හැමවෙලේම අපි ආසා  දේවල් ලැබෙන්නේ නැහැ.  සමහරවිට අපිට නොගැලපෙන්න දේවලුත් අපිට ලැබෙන්න පුළුවන්.

මොකද එකටයි ජිවිතේ කියන්නේ. හැම වෙලේම අප සිතන පතන ආකාරයට හැමදේම වෙන්නේ නැහැ.

ජීවිතේ  අපිට ඉදිරියට වෙන්නේ  කුමක්ද කියලා කිසිවෙක්ට තීරණය කරන්න බැහැ .

හැබැයි ජීවිතේ නිසිමගට ගන්න අපිට මේ ජීවිතේ ජීවත් වෙලා ඉන්න කාලේ ඇතුලත අපිට පුළුවන්.

අපිට පාලනය කරන්න පුලුවන් දේවල් අපිට පාලනය කරන්න බැරි දේවල් වලට වඩා ලේසියි.

මොකද ඒව පාලනය කරන්නේ අපි විසින්.එහෙම පාලනය කරන්න  බැරි උනොත් තමයි ගැටලුවක් මතුවන්නේ.

සරලවම කිව්වොත්,අපි අතින් අත්වැරදීමකින් ගැටළුවක් ඇති වූවොත් මිස. ගැටලුවක් ඇති වෙන්න කලින් අපිට හිතන්න පුළුවන් මේකෙන් ගැටලුවක් ඇති වෙයිද නැද්ද කියලා.හැබැයි හැම අගුල කටම යතුරක් තියෙනවා වගේම හැම ප්‍රශ්නෙකටම විසඳුම මේ ලෝකෙ ක් මේ ලෝකෙ තියෙනවා මොකද විසඳුමක් නැති ප්‍රශ්නයක් මේ ලෝකෙ නැහැ .හැබැයි අපි ඒ ගැටළුවට විසඳුමක් හොයාගන්න තුරු ගැටලුව ගැටලුවක් ම පමණයි.

මේ ලෝකය හැම කරදරකාරී ගැටලුවකටම අපි විසදුමක් විසඳුමක් හොයන්න ඕනි. එක අපට තිබෙන සමාන අයිතිවාසිකමක්.ජීවිතයේ අපට  ප්‍රශ්න කරදර කොයිතරම් ආවත්,අපි  ඒවා මඟ නොහැර ඒවට මුහුණ දිය යුතුයි.

මොකද අපි කටුකයි කියලා ජීවිතේ අත්හරින්න ඕනද මඟින්?

නැහැ අපි ජීවිතේ ඒ කටුකත්වය බිදගෙන ගැටළුවලට  විසදුම් හොයාගෙන ඉදිරියට යන්න ඕනේ.නැතිනම් අපට එන ප්‍රශ්න වලින් පැනලා යන්න අපි උත්සාහ කරනවා නම් අපේ ජීවිත ඇත්තටම අතර මගින් නවතිනවා.

මොකද අපිට ආත්ම ශක්තියක් ඒ වගෙම ආත්ම විශ්වාසයක් තියෙන්න ඕනේ මම  කොහොමහරි මේ ප්‍රශ්නේ විසඳ ගන්නවා, මට මේ එන ප්‍රශ්න වලට මං කොහොමද විසඳුමක් හොයා ගන්න ඕන, කොහොමහරි මේ ප්‍රශ්නෙන් මම ගැලවෙනවා කියලා confidence ඇතුව හිතන්න.

අද කාලේ අපිට දකින්න අහන්න ලැබෙන ගොඩක් දේවල් වලින් අපිට තේරුම් යනවා මිනිස්සු ජීවිතේ නැති කර ගන්න පවා පෙළඹිලා තියෙන්නේ ප්‍රශ්න නිසා .

ඇතැම් වෙලාවට ආදර සම්බන්ධතාවය බිඳ වැටුනහම ,නැත්නම් තමන්ගෙ සහකාරයා හෝ සහකාරිය  හරි අනියම් සම්බන්ධතාවයක් පවත්වා ගත්තොත්,අපි ජීවිතේ ගොඩක් ආදරේ කරන අපි ළඟින්ම ඉන්න ආස කෙනෙක්ගෙන් ප්‍රතික්ෂේප වුනොත්,රැකියා ස්ථානයේ හෝ සමාජයේ පිරිසක් මැද අපිව කොන් කරොත්,නැත්තං කලින් තමන් ආදරේ කරපු කෙනා තමන්ගෙ නිරුවත සමාජමාධ්‍යයේ ප්‍රසිද්ධ  කරනවා කියලා කිව්වොත්.

ඉතින් මං මේ ඉහත කිව්ව වගේ පොඩි පොඩි ප්‍රශ්න නිසා තමයි සමහර මිනිස්සු තමන්ගෙ ජීවිතේ මගින් නතර කරන්න හිතා ගන්නේ.ඔවුන්ට මගින් වෙහෙසකර බවක් දැනෙනවා ඇති මේ ප්‍රශ්න වලින් මම මිදෙන්න ඕන හොඳම විසදුම මගේ ජීවිතය නැති කර ගන්න එක කියලා.නමුත් මම කිව්ව වගේ අපි ජීවිතේ කටුකයි කියලා අත්හැහැරිය යුතුද?නැහැ.එය එසේ විය යුතු නැහැ.තමන් කෙසේ හෝ එන බාධක හමුවේ විසඳුම් හොයා ගෙන ජීවත් වෙනවා කියලා හිතන මට්ටමට තමන් ගැන ආත්ම විශ්වාසය තබාගත යුතුයි. ජීවිතය හැමදේම තිබිලත් පොඩි පොඩි ප්‍රශ්න වලට මුහුණ දී ගන්න බැරුව පැත්තකට වෙලා ඉන්නව නම් හිතලා බලන්න,ජීවිතය අපිට තියෙන දේවල් වලින් කාලක් වත් නැතුව ජීවිතේ දිනපු මිනිස්සු ඉන්නවා නේද කියලා.අපි මේ ලෝකෙ ඉපදුනාට පසුව අප කොයි තරම් උත්සාහ කරත් අප මෙලොව හැර යන කාලය පැමිණෙන තුරු අප මේ ලෝකෙ ජීවත් විය යුතුයි.ජීවිත සුන්දර කාල වලට  වගේම,අපට ජීවිතේ දුක්බර අවස්ථා වලට මුහුණ දෙන්න සිදුවෙනවා.

ඒක තමයි මේ ලෝක ස්වභාවය.නමුත් කිසිම දේකින් නොසැලි අපි ජීවිතේ සමබරව එන හැම ගැටළුවකටම නිසි ලෙස මුහුණදී අපි ජීවිතය අපිට අවශ්‍ය ලෙස ගත කරන්න අපිට පුළුවන්.

ජීවිතේ ගැන සුන්දර අවස්ථා අපිට ජීවිතේට ලස්සන දේවල් එකතු කරනවා වගේම.ජීවිතේට එන ප්‍රශ්න අපිට ජීවිතේ කියන්නේ මොකද්ද කියලා අපිට කියා  දෙනවා.මේ ජීවිතේ කිසිවක් පහසු නෑ.අපි දුක් මහන්සි හැම දෙයක්ම උපයාගත යුතු වෙනවා.හැම ප්‍රශ්නෙකටම විසඳුමක් තියෙනවා.අපිට හැම ප්‍රශ්න ම ඔහු කොයි විදිහට විසදෙයිද කියන්න බැහැ.නමුත් අපි නිවැරදිම විසඳුමට පහර දුන්නොත් ගැටළු අතුරුදහන් වෙනවා.එසේ කරන්න ඔබ ඔබ  ගැන දැඩි ලෙස විශ්වාසය තබා ගත යුතු වගේම ඔබ අදහන ධර්මය තුලත් විශ්වාසය තබා ගත යුතුය.එය හැම විටම  අපට ප්‍රශ්න  විසදගන්න ආශිර්වාද කරනවා.

ඉතින් මනස කියන්නේ මේ ලෝකේ හිතාගන්න බැරි අභිරහස් රැසකට විසඳුම්  සොයන්න පුලුවන් අපේ සිරුරම තියෙන අපුරු නිර්මාණයක්.ඉතින් ඒ මනසින් ප්‍රයෝජන අරගෙන එන ගැටලු වලට නිසි ලෙස පිළිතුරු සපයන්න අපි දැනගන්න ඕනේ.ප්‍රශ්න ඇති කරන පුද්ගලයින් ඉන්නවා,ඒ වගේම ඒ ගැටලු පැමිණිලි කරන පුද්ගලයන් ඉන්නවා,ප්‍රශ්න වලට බයේ පරාජය බාරගන්න මිනිස්සුත් ඉන්නවා,ඒ වගේම එන ප්‍රශ්න වලට නිසි ලෙස විසදුම් හොයල ඒවවා ජයගන්න  මිනිස්සුත් ඉන්නවා.ඉතිං මේ හතරෙ අපි වෙන්ඩ ඕනේ කවුද?ඇත්තටම අපි වෙන්න ඕනේ ඒ  ප්‍රශ්න වලට නිසි විසඳුම් හොයා ජීවිතය ජයගන්න මනුස්සයෙක්.අපි ජීවිතේ කොතරම් සාර්ථක තැනකට පත් කර ගත්තත් අපිට ජීවිතේ දුෂ්කර කාල වලදී කියල දුන්න පාඩම් අමතක නොකරන්න ඕන.  

                          සටහන                                                 නවෝද්‍යා දෙව්මිණි ආරියවංශ.

රජය විසින් ඇතිකරන ලද සංවර්ධනය සහ පුද්ගල ජයග්‍රහණ (1971-1979)

වර්ෂ 1971 වන විටදී ආනයනික ඉන්දීය සිනමාව දේශීය සිනමාවට ප්‍රභල පහරක් එල්ල කරමින් පැවතිණි. එකළ රට තුළ බලයට පත් වූ සමාජවාදී රජය විසින් එම අන්තරාදායක 

තත්ත්වය පාලනය කිරීමට දැඩි උත්සහයක් දරන ලදි. විදේශීය චිත්‍රපට අත්කරගෙන තිබූ එම ආදිපත්‍යය විසින් දේශීය චිත්‍රපටවල තිර කාලය 20% ක් දක්වා පහත හෙලීමට සමත් වූ අතර විදේශීය චිත්‍රපටවල තිර කාලය 80% ක් (60% ක් දෙමළ, 10% ක් හින්දි සහ 10% ක් ඉංග්‍රීසි) පමණ  අත්පත්කර ගැනීමට සමත් වී තිබුණි. රජය විසින් 1971 අංක 47 දරන පනත මගින් රාජ්‍ය චිත්‍රපට සංස්ථාව පිහිටුවනු ලැබූ අතර, ජාතික චිත්‍රපට ප්‍රවර්ධනය කිරීම සහ මහජනතාවට විවිදාකාරයේ චිත්‍රපට ලබාදීම හෝ ලබා නොදීමේ අයිතිය සම්බන්ධයෙන් ඇතැම් පාර්ශවයන්ගෙන් චෝදනා එල්ල විය.

රාජ්‍ය චිත්‍රපට සංස්ථාව (SFC) විසින් චිත්‍රපට නිෂ්පාදනය සඳහා සුවිශේෂී ණය යෝජනා ක්‍රමයක් ස්ථාපිත කළේය. තිර රචනා ඇගයීම් පදනම මත සෘණාත්මක ඇපකරයක් සමඟින් එම ණය ලබා දීම සිදු වී ඇත. ලියාපදිංචි කිරීමේ ක්‍රමයක් හරහා ණය ලබා ගැනීම සඳහා අධ්‍යක්ෂවරුන් සහ ප්‍රධාන කාර්මික ශිල්පීන්ට පූර්ව පුහුණුවක් තිබිය යුතුය. මෙම ක්‍රමවේදයට පෙර ස්වතන්ත්‍ර තිර රචනයන් සඳහා කිසිදු ගෞරවයක් හිමි නොවෙන තරමටම දෙමළ සහ හින්දි චිත්‍රපටවල දෙබස් සහ නම පමණක් පරිවර්තනය වූ තිරපිටපත් සඳහා ගෞරවය හිමි වී තිබුණි. 

තිර රචනය හින්දි හෝ දෙමළ මුල් පිටපතේ අක්ෂර පරිවර්තනයක් පමණක් වූ බැවින් එකම ගෞරවය දෙබස් සඳහා විය.  ණය යෝජනා ක්‍රමය විසින් මුල්වරට මුල් තිරපිටපත් රචනය සහතික කළ අතර හින්දි සහ දෙමළ චිත්‍රපටවල පිටපත් වූ තිර රචනයන් සඳහා ණය ලබා ගැනීමට අයිතියක් හිමි නොවුණි. එමඟින් දේශීය වෘත්තීය චිත්‍රපට නිෂ්පාදන කර්මාන්තයක් ස්ථාපිත වීමට මං සැලසිණි.

රාජ්‍ය චිත්‍රපට සංස්ථාව විසින් චිත්‍රපට බෙදා හැරීමේ ක්‍රමවේදයක් හඳුන්වාදෙනු ලැබූ අතර එමඟින් රට තුළ නිෂ්පාදනය කරන සියලුම චිත්‍රපට ප්‍රමුඛතා අනුපිළිවෙලකට අනුව ප්‍රදර්ශනය කිරීම සහතික කළේය. සිනමා ශාලාවල ප්‍රමිතිගත තත්ත්ව පාලන පටිපාටියක් ස්ථාපිත කරන ලද්දේ ඒවායේ තාක්ෂණික උපකරණ පරීක්ෂා කිරීමේ පද්ධතියක් සැකසීම මගිනි. ඒකාධිකාරය මිලදී ගැනීම නිසා ආනයනය කරන ලද චිත්‍රපටවල පිරිවැය 75% කින් පමණ අඩු විය. විශාල වශයෙන් අඩු කළ මිල ගණන් යටතේ වුවද තිරගත වන දෙමළ හා හින්දි චිත්‍රපට ප්‍රමාණයේ සැළකියයුතු වෙනසක් නොවුණි.

එහි ප්‍රතිඵලය වූයේ වර්ෂ 1972 දී මිලියන 30 ක් වූ චිත්‍රපට ප්‍රවේශය වර්ෂ 1979 වන විටදී මිලියන 74.4 දක්වා වර්ධනය වීමයි. දේශීය චිත්‍රපට වෙනුවෙන් වෙන් වූ තිර කාලය 20% සිට 58% ක් දක්වා වර්ධනය විය. වර්ෂ 1978 වන විට සිනමා ශාලා සංඛ්‍යාව 365 ක් දක්වා වර්ධනය විය. 

මීට පෙර පැවති ක්‍රමවේදය මඟින් එකල පැවති වෙළඳපල ඉලක්ක කර නොතිබූ බවටත් ඒ නිසා ඉල්ලුම යටපත් වූ බවටත් මෙම වර්දනය හොඳම සාක්ෂිය විය. වසර හතක් ඇතුළත වාර්ෂික ඇතුළත් කිරීම්වල පෙර නොවූ විරූ ලෙස ඉහළ යාමේ ප්‍රතිඵලයක් ලෙස යටපත් කරන ලද සහ යටපත් වූ ඉල්ලුම සපුරාලීමට රාජ්‍ය චිත්‍රපට සංස්ථාවට හැකිවිය.

වර්ෂ 1979 න් පසු රාජ්‍ය චිත්‍රපට සංස්ථාවේ සභාපති දූරයට පත් වූ ඇන්ටන් වික්‍රමසිංහ විසින් පෙර පැවති සියලු ක්‍රියාමාර්ග ආපසු හරවා ඕනෑම කෙනෙකුට චිත්‍රපට අධ්‍යක්ෂණය කිරීමට හැකි අයුරින් අසීමිත ලෙස ණය ලබා දුන්නේය. ඒ නිසා චිත්‍රපට නිර්මාණකරණය ගැන නිසි දැනුමක් නැත්තන් විසින් චිත්‍රපට සිය ගණනාවක් නිපදවන ලදි. එහි ප්‍රතිඵලය වූයේ වර්ෂ 1982 වන විටදී ඊළඟ වසර 5 තුළදී තිරගත කිරීමට තරම් සරිලන චිත්‍රපට ප්‍රමාණයක් නිෂ්පාදනය වීමය. ප්‍රේක්ෂකයෝ දුර්වල චිත්‍රපටවලට ප්‍රතිචාර දැක්වූයේ සිනමාවෙන් දුරස්ව සිටීමෙනි. වාර්ෂික ඇතුළත් කිරීම් භයානක ලෙස පහත වැටීමට පටන් ගත්තේය. වර්ෂ 1979 දී මිලියන 79.4 ක් දක්වා ඉහළ ගිය වාර්ෂික ඇතුළත් කිරීම්, වර්ෂ 2009 වන විටදී මිලියන 7.2 දක්වා අඩු විණි. එතෙක් ලාභ ලැබූ ආයතනයක් ලෙස පැවතුණත් නොබෝ කලකින් බංකොලොත් භාවයට ඇද වැටීමට පටන් ගත් අතර රජයෙන් ලැබෙන මුදල් සම්භාරයක් මගින් එය පවත්වාගෙන යාමට සිදු විය.

ටයිටස් තොටවත්ත සහ ලෙස්ටර් ජේම්ස් පීරිස් මේ යුගයේ කලාත්මක චිත්‍රපට නිර්මාණය කළ ප්‍රමුඛතම කලාකරුවන් විය. ප්‍රධාන ධාරාවේ ප්‍රේක්ෂකයන්ගේ සිත්ගත් තේමාවන් සමඟ තාක්ෂණික කුසලතාවන්ද එක්කළ හාර ලක්ෂේ, සිහසුන, සාගරිකා සහ මංගල වැනි චිත්‍රපට අධ්‍යක්ෂණය කළේ තොටවත්තයන් විසිනි. ලෙස්ටර් ජේම්ස් පීරිස් මෙම වකවානුවේදී ඉතා සාර්ථකව ඔහුගේ වැඩ කටයුතුවල නිරත වූ අතර, රජය විසින් පනවා ඇති සීමාවන් නොතකා වඩාත් වැදගත් සිනමා කෘති කිහිපයක්ම නිර්මාණය කළේය

වර්ෂ 1972 දී නිකුත් කරන ලද නිධානය චිත්‍රපටය ඔහුගේ විශිෂ්ටතම කෘතිය ලෙස සැලකේ. ඊට අමතරව වර්ෂ 1997 දී එවකට රජය විසින් පනවන ලද මණ්ඩලයක් විසින් ශ්‍රී ලාංකීය සිනමා වංශකතාව තුළ පළමු වසර 50 තුළ බිහිවූ හොඳම චිත්‍රපටය ලෙස සකස් කරන ලදී. ඔහුගේ අතිදක්ෂ අධ්‍යක්ෂණය මෙන්ම ගාමිණී ෆොන්සේකා සහ මාලිනී ෆොන්සේකාගේ අසහාය රංගනය ඊට හේතුවිණි. ඔහු විසින් Peries’ Venice International Film Festival හි Silver Lion of St. Mark සම්මානය දිනා ගැනීම සහ ලන්ඩන් චිත්‍රපට උළෙලේ දී ඩිප්ලෝමාවක්ද ලබා ගනිමින් වසරේ විශිෂ්ටතම චිත්‍රපට අතරින් එකක් ලෙස නිදානය තේරී පත් වීම ඔහු ජාත්‍යන්තර වශයෙන් කීර්තිමත් අද්‍යයක්ෂකවර්ස්‍යෙකු වීමට හේතුවිණි. ඔහුගේ පසුකාලීන කෘති වන දෑස නිසා සහ මඩොල් දූවද දේශීය විචාරකයන්ගේ සම්භාවනාවට පාත්‍ර විය.

ඒ වනවිට සුගතපාල සෙනරත් යාපාගේ හන්තානේ කතාව චිත්‍රපටයේ වැඩ කර අත්දැකීම් ලබා තිබූ ධර්මසේන පතිරාජයන් වර්ෂ 1974 දී ඔහුගේ කුළුඳුල් අධ්‍යක්ෂණය වන අහස් ගව්ව නිර්මාණය කරමින් කරළියට පැමිණේ. එය එකල දිය වී ගිය නාගරික තාරුණ්‍යයේ ආත්මය ග්‍රහණය කර ගැනීමට ඉවහල් වූ නිර්මාණයක් වූ අතර සිරිල් වික්‍රමගේ වැනි අතිදක්ෂ රංගන ශිල්පීන් හට කලාත්මක සිනමාවට අවතීර්ණ වීමේ දොරටු විවර කෙරිණි. 

ඒ හැරුණු විට සූරයන්ගෙත් සූරයා චිත්‍රපටය විසින් ත්‍රාසජනක, ක්‍රියාදාම සහ සංගීතමය ක්ෂානරයේ චිත්‍රපටවල ප්‍රවණතාවක් බිහිකිරීමට සමත් වූ අතර එය ශ්‍රී ලාංකේය සිනමාවේ සන්ධිස්ථානයක් ලෙස සැළකිය හැක. මෙම වාණිජ චිත්‍රපට, දරිද්‍රතාවය, අන්ධ නීතිය, අසාධාරණය සහ ආදරය යන ගැටලු පිළිබඳ සාකච්ඡා කළද ඒවා විදේශීය චිත්‍රපටයන්ගේ පරිවර්තනයන්,බැවින් එම චිත්‍රපටවලට එරෙහිව ඇතැම් විචාරකයෝ ප්‍රහාර එල්ල කරන ලදි.

ඉතිං ආයුබොවන්……. මම නිසංසලා….

ඔන්න අදත් මං අරන් ආවා අපේ රටෙි තවත් සුන්දර ලස්සන තැනක් ගැන විස්තර……. හැබැයි මෙි ගමන නමි මං ගියේ තනියම… ගමන යන්න කලින් මං කීපදෙනෙක්ගෙන් විස්තර ඇහුවා… මොකද අපි කොහේ හරි මිට කලින් ගියෙ නැති තැනකට ඇවිදින්න තනියම යනවා නමි එ යන තැන ගැන අවබොදයක් අරන් යන්න ඔින.. මුලින්ම ස්තුති කරනවා මඟ විස්තර දුන්න කීපදෙනාට විශේෂයෙන් solo traveling පිස්සුව youtube channel එක කරන මිත්‍රයාට…

      ඉතිං මුලින්ම මෙි ගමන මම තනියම යනවා කිවුවාම කිපදෙනෙක් මට තනියම යන්න එපා කිව්වා. බීපු මිනිස්සු ඉන්නවා කිවුවා.. තවත් එක එක දේ කිව්වා.. එ නිසාමයි මං විස්තර හොයා බැලුවෙි… ඉතිං මං ගියා තනියම.. ජිවිතේ එක පාරක් හරි තනියම travel කරන්න ඔින…මොකද එ මානසික නිදහස කවුරුත් කිවුවාට වැඩක් නැ තමන්ම විදලා බලන්න ඔින…. මං නමි ඉතිං කොහොමත් ඇවිදිනවානේ.. තනියම යනවා වගේම යාළුවො එක්කත් මං යනවා..

       මාතලෙන් මම ගමන පටන්ගත්තෙ හරියටම මගේ උපන්දිනය දවසේ මැයි හතර වෙනිදා උදේ හතට.. ඉතිං මං ආවෙි නකල්ස් කදු පන්තියේ දකුණු කෙළවරේ තියන හුලංගල පුංචි ලෝකාන්තය හොයාගෙන, හුලංගලට නැවුගල කියලත් කියනවා… මාතලේ ඉදන් උදේ හතට මං ගමන පටන් ගත්තේ, හරියටම හත වෙද්දි මාතලෙන් එනවා බස් එකක් සැලගමට..

බස් එක හරියටම අට වෙද්දි ලගා උනා සැලගම වතුයායට යන මාර්ගය තියන නා ගහා ලගට… එ ලග පන්සලකුත් තියනවා… බය වෙන්න දෙයක් නැ නිතරම මිනිස්සු ගැවසෙන මාර්ගයක්….. නා ගහා ලග ඉදන් වතුයායේ ටිකටි ගන්න තැනට 3km විතර යන්න තියනවා, ටිකක් කන්ද.. එතන ඉදන් ත්‍රිවිල් එකකින් යන්න පුළුවන් ටිකටි ගන්න තැනට.. ත්‍රිවිල් එකට රුපියල් 500ක් ගන්නවා. මං නමි ඔයාලට විස්තර කියන්න ඔිනම නිසා පයින් ආවා.. එ යන පාරෙත් ලස්සන view එකක් බලාගන්න පුළුවන්.. හුන්නස්ගිරි කන්ද පෙනවා එ හරියට හරි අපුරුවට ඈතින්.. මං ටික දුරක් පයින් එද්දි ත්‍රිවිල් එකක් ඇවිත් නතර කලා. එකේ හිටියෙ ලයිමි නිවාස වලට පහලින් තියන දෙමළ පාසලේ ගුරුවරියක්.. ඇය හිටිය හින්දා මං ත්‍රිවිල් එකට ගොඩ උනා.. හුලංගල ටිකටි ගන්න තැනට මං ගියේ එහෙම. රුපියල් 200යි මගෙන් ගත්තේ…

      හුලංගල viewpoint එකට යන්න එක්කෙනෙකුට ටිකටි එක රුපියල් සියයි.. කොහොම හරි ත්‍රිවිල් එකෙනුත් ආව නිසා 8.30 වෙද්දි මං ටිකටි ගන්න තැනින් ටිකටි එකත් අරන් ගමන පිටත් උනා එ හීන දැකපු ලස්සන තැනට යන්න… මගෙ උපන්දිනයට මම මටම තැග්ගක් දෙන්න… මාරම ලස්සන වටපිටාවක් පහු කරන් මං ඉදිරියට ගියේ මගේ තනියට ආව බලු යාළුවො හතර දෙනෙක් එක්ක. එයාලා ගැන නමි කියන්නම ඔින. මට පාර පෙන්නුවෙි එක්කෙනෙක් මටත් කලින් ඉදරියෙන් ගිහින්…

ලස්සන වටපාටාවක්.. මං හිතන්නේ 3kmක් විතර දුරක් තියනවා ටිකටි ගන්න තැන ඉදන් viewpoint එකට…. මහන්සි දැනුනත් වටපිටාව දැක්කාම එ මහන්සිය නැති වෙලා යනවා… එ තරමි සුන්දරයි… තනියක් දැනුණේම නැ මට.. හෙමින් ගීතයක් මුමුණාගෙනම මාත් එක්ක ආව බලු යාළුවන් එක්කත් කතා කර කර මං හරියටම විනාඩි හතලිහක් ඇතුලත viewpoint එකට ආවා.. මගේ මහන්සිය තනිකම කොහෙන් ගියාද කියලා මටවත් හිතාගන්න බෑ… මං කෑ ගැහුවා සතුටට.. මුළු හුලංගලටම හිටියේ මං විතරයි…. මගේ උපන්දිනේට මං දුන්න ලස්සනම තැග්ග එක…

     හුලංගලට එන්න පාරවල් දෙකක් තියනවා එකක් කුරුණෑගල පැත්තෙන් අනිත් එක මාතලේ පැත්තෙන්. කුරුණෑගලින් 40km.. මාතලෙන් 25.5km.. හුලංගල බැවුම තියෙන්නේ කුරුණෑගල පැත්තට… හැබැයි මෙි තැනට එන්න තියෙන්නේ මාතලේ පැත්තෙන්.. හුලංගල අයිතිය කොහාටද හරියටම කියලා හොයනවාට වඩා මෙි සුන්දරත්වය විදිමයි මට නමි වැදගත් උනේ…

      පුංචි ලෝකාන්තය පිහිටලා තියෙන්නේ මුහුදු මට්ටමේ ඉදන් මීටර් 760 (අඩි 2500) ක් උසින. කොහොම උනත් හුලංගල කන්ද මීටර් 1025 (අඩි 3360) දක්වා ඉහළ යනවා…  හැම වාහනේකටම නමි ලයිමි නිවාස පහු කරලා මෙි තැනට එන්න බෑ… මෝටර් බයිසිකල්, රෝද 3 සහ 4 × 4 වාහන වලින් බැවුම ලගටම එන්න පුළුවන්…. හැබැයි ස්කුටි වල නමි ගමන අමාරු බව මම පහළට බහිද්දි දැක්කා මට පස්සේ ආව පොඩි මල්ලිලා දෙන්නා පහළට ආව විදිහෙන්.. වාහනෙන්ම යන්න පුළුවන් නිසා එකත් වෙනස්ම අත්දැකීමක් උනත් පා ගමනින් යන එකයි වඩාත් සුදුසුම.. වටපිටාවෙි ලස්සන බලන්න පුළුවන්.. ඈතින් නකල්ස් කදු පන්තිය වගේම අපුරුවට හුන්නස්ගිරි කන්ද පෙනවා ටවර් එක්කම..

හුලංගල viewpoint එක නමි ඇත්තටම පුංචි ලෝකාන්තයක්…. වට පිටාවෙි තියන කදු ගැන නමි කියන්න තරමි දැනිමක් මට නැති උනත් මං දැක්කා ඈතින් රිදිවිහාරය එ වගේම තවත් පන්සලක් මං දැක්කා. එ වෙලාවෙි නමි එ පන්සල මොකක්ද කියලා දැනන් හිටියේ නැති උනත් දැන් දන්නවා එ දොළුකන්ද විහාරය කියලා.. තව ඈතින් බතලගොඩ වැවත් දැකගන්න පුළුවන්….

නැවුගල කියලා මෙි කන්දට කියනවා ඇත්තේ සමහර විට කුරුණෑගල පැත්තට මෙි කන්ද නැවක් වගේ පෙන නිසා වෙන්න ඇති. හැබැයි හුලංගල කියලා මෙි තැනට නම වැටිලා තියෙන්නේ නමි හුළග නිසා කියලයි මට ටිකටි ගන්න තැන ඉන්න හෂාන් පැවසුවෙි.. හෂාන් කියන්නේ සැලගම ගමෙි කෙනෙක්. ඔහු කියපු විදිහට ඉස්සර ඔහුගේ පුංචි දවස්වල මෙි හුලංගල දැනට වඩා

හුළගක් තිබිලා තියනවා.. හුළග එන්නේ මෙි ගල් පර්වතය ඇතුලෙන් කියලත් ඔහු පැවසූවා.. ඉස්සර මෙි ස්ථානයට ගිය පසු ඔවුන් ඇද සිටින ටිෂර්ටි ගලවා දානවාලු මෙි ගලෙන් පහළට,එත් ටික වෙලාවකින් ලොකු හුළගක් එක්ක එ ටිෂර්ටි උඩට ඇදි එනවාලු.. එ නිසාම නැවුගල හුලංගල ලෙසට පටබැදුනු බවයි ඔහු පැවසුවෙි…… මං තවත් දේවල් ඇහුවා ඔහුගෙන්… මෙි හුලංගලත් අයිති සෙමිබුවත්තට.. ඉතිං මෙි තේවතු දෙකත් එක්ක වතු තමයක අයිතිය තියෙන්නේ ඇල්කඩුව සෙමිබුවත්තට..

හුලංගල එනවා නමි එක් අයෙක්ට රුපියල් සියක ටිකටි එකක් කඩනවා.. තව අපෙන් අත්සනකුත් ගන්නවා අපිට අනතුරක් උවහොත් හුලංගල පාලනාධිකාරිය වෙත එය නොපවරණ බවට… තමන්ගේ ආරක්ෂාව ඉතිං තමන්ම බලාගන්න ඔින තමයි… camping කරනවා නමි දහා දෙනෙක් වෙනකමි කණ්ඩායමකට රුපියල් 5000ක් වගේම වැඩිවෙන එක්කෙනා ගානේ සියක මුදලක් අය කරනවා.. තව drone යවනවා නමි රුපියල් 3000ක මුදලක් අය කරනවා. එයට හෙතුව විදිහට හෂාන් මට පැවසුවෙි drone ලැයිමි නිවාස දෙසට එවන නිසා එ නිවාස වල ජිවත් වෙන මිනිසුන්ගෙන් හුලංගල පාලනාධිකාරියට ප්‍රශ්න පැමිණි බවයි… මං ඉතිං අහන්නේ මොකටද අනේ ලස්සන දේවල් තියෙද්දි ලයිමි නිවාස පැත්ත විඩියෝ ගත කරන්න යන්නේ ..

ඉතිං අවසානයට මං මෙි ටිකත් කියන්නම ඔින…. හුලංගල බලන්න එන්න… එ සුන්දරත්වය විදින්න.. මම නමි ආයෙත් තනියම හො යාළුවන් එක්ක හුලංගල යනවා , මොකද මට මීදුම දැකගන්න ලැබුණේ නෑ. එ වගේම හුළග විදින්න ලැබුණේ නෑ.. එ නිසා මං ආයෙමත් යනවා.. ඉල්ලන්නේ එක දෙයයි… යන්න එ සුන්දර පරිසරය විදින්න . නමුත් විනාස කරන්න එපා. එ වගේම තමයි තමන්ගේ වගේම තමන්ගේ කණ්ඩායමෙි ආරක්ෂාව ගැනත් පළමුව සැලකිලිමත් වෙන්න…..

නිසංසලා රණසිංහ